1已經有做干證ê到hiah-chōe，親像雲圍咱，就tio̍h放下ta̍k號ê重擔，kap快快纏絆咱ê罪，用吞忍來走所安排tī咱頭前ê路站，Í-keng ū chòe kan-chèng ê kàu hiah chōe, chhin-chhiūⁿ hûn ûi lán, chiū tio̍h pàng-hē ta̍k hō ê tāng tàⁿ, kap khoài-khoài tîⁿ-pòaⁿ lán ê chōe, ēng thun-lún lâi cháu só͘ an-pâi tī lán thâu-chêng ê lō͘-chām,

2tio̍h注神看耶穌，就是做信ê源頭kap chhiâⁿ尾ê。伊為tio̍h所安排tī伊頭前ê快樂，就無要緊凌辱，忍受十字架，taⁿ坐tī上帝寶座ê大pêng。tio̍h chù-sîn khòaⁿ Iâ-so͘, chiū-sī chòe sìn ê goân-thâu kap chhiâⁿ-bé ê. I ūi-tio̍h só͘ an-pâi tī I thâu-chêng ê khoài-lo̍k, chiū bô iàu-kín lêng-jio̍k, jím-siū si̍p-jī-kè, taⁿ chē tī Siōng-tè pó-chō ê tōa pêng.

3伊吞忍pháiⁿ人親像án-ni橫逆伊，lín tio̍h想伊，免得lín ê心失志來厭倦。I thun-lún pháiⁿ lâng chhin-chhiūⁿ án-ni hêng-ge̍k I, lín tio̍h siūⁿ I, bián-tit lín ê sim sit-chì lâi ià-siān.

4Lín kap罪惡相對敵，猶未bat抵擋到流血；Lín kap chōe-ok saⁿ tùi-te̍k, iáu-bē bat tí-tng kàu lâu huih;

5koh lín bōe記得hit-ê用理氣勸lín親像勸kiáⁿ ê話，講， 我ê kiáⁿ ah，主ê警戒莫得看輕， Hō͘伊責備，莫得失志；koh lín bōe kì-tit hit-ê ēng lí-khì khǹg lín chhin-chhiūⁿ khǹg kiáⁿ ê ōe, kóng, Góa ê kiáⁿ ah, Chú ê kéng-kài bo̍h-tit khòaⁿ-khin, Hō͘ I chek-pī, bo̍h-tit sit-chì;

6因為主所疼ê，就警戒伊； Koh凡所接納ê kiáⁿ，就用鞭phah伊。"In-ūi Chú só͘ thiàⁿ ê, chiū kéng-kài i; Koh hoān só͘ chiap-la̍p ê kiáⁿ, chiū ēng piⁿ phah i. "

7Lín teh吞忍，是做警戒ê路用；上帝款待lín親像kiáⁿ；thái-thó有kiáⁿ無hō͘老父警戒ah？Lín teh thun-lún, sī chòe kéng-kài ê lō͘-ēng; Siōng-tè khoán-thāi lín chhin-chhiūⁿ kiáⁿ; thái-thó ū kiáⁿ bô hō͘ lāu-pē kéng-kài ah?

8眾kiáⁿ所有份ê警戒，lín若無受tio̍h；就是偷生ê，m̄是kiáⁿ。Chèng kiáⁿ só͘ ū hūn ê kéng-kài lín nā bô siū-tio̍h; chiū-sī thau-siⁿ-ê, m̄ sī kiáⁿ.

9Koh咱bat有肉體ê父警戒咱，咱尚且敬畏伊；何況咱ê神ê父，kiám m̄ koh-khah tio̍h降服伊，來得tio̍h活mah？Koh lán bat ū jio̍k-thé ê pē kéng-kài lán, lán siōng-chhiáⁿ kèng-ùi i; hô-hòng lán ê sîn ê Pē, kiám m̄ koh khah tio̍h hâng-ho̍k I, lâi tit-tio̍h oa̍h mah?

10因為hiah-ê是暫時chhut-chāi家己ê意思來警戒咱；獨獨chit-ê是為tio̍h咱ê利益，hō͘咱有份tī伊ê聖潔。In-ūi hiah-ê sī chiām-sî chhut-chāi ka-kī ê ì-sù lâi kéng-kài lán; to̍k-to̍k chit-ê sī ūi-tio̍h lán ê lī-ek, hō͘ lán ū hūn tī I ê sèng-kiat.

11見若警戒ê事，tī當時照看m̄是歡喜，是憂悶；但是後來，就tī hiah-ê tùi警戒來練達ê人，結平安ê果子，就是義ê果子。Kìⁿ-nā kéng-kài ê sū, tī tng-sî chiàu-khòaⁿ m̄ sī hoaⁿ-hí, sī iu-būn; nā-sī āu-lâi, chiū tī hiah-ê tùi kéng-kài lâi liān-ta̍t ê lâng, kiat pêng-an ê ké-chí, chiū-sī gī ê ké-chí.

12所以腳酸手軟ê，lín tio̍h hō͘伊勇健；Só͘-í kha sng chhiú nńg ê, lín tio̍h hō͘ i ióng-kiāⁿ;

13為tio̍h lín ê腳備辦直直ê路，免得跛腳ê人歪chhoa̍h，反tńg hō͘伊得tio̍h醫好。ūi-tio̍h lín ê kha pī-pān ti̍t-ti̍t ê lō͘, bián-tit pái-kha ê lâng oai-chhoa̍h, hoán-tńg hō͘ i tit-tio̍h i-hó.

14Tio̍h致意kap眾人和睦，以及成聖，因為若m̄是聖無人會見tio̍h主；Tio̍h tì-ì kap chèng lâng hô-bo̍k, í-ki̍p chiâⁿ-sèng, in-ūi nā m̄ sī sèng bô lâng ōe kìⁿ-tio̍h Chú;

15亦tio̍h謹慎，驚了有人失落上帝ê恩；驚了有苦ê根發生來攪擾lín，致到chōe-chōe人bak lâ-sâm；ia̍h tio̍h kín-sīn, kiaⁿ-liáu ū lâng sit-lo̍h Siōng-tè ê un; kiaⁿ-liáu ū khó͘ ê kun hoat-siⁿ lâi kiáu-jiáu lín, tì-kàu chōe-chōe lâng bak lâ-sâm;

16驚了有淫亂ê，á是沉溺世情ê，親像以掃；伊因為一頓食賣大kiáⁿ ê業。kiaⁿ-liáu ū îm-loān ê, á-sī tîm-le̍k sè-chêng ê, chhin-chhiūⁿ Í-sò; i in-ūi chi̍t tǹg chia̍h bōe tōa kiáⁿ ê gia̍p.

17因為lín知，伊後來ài承接祝福ê時，有tú-tio̍h棄sak，因為伊chhē無反悔ê地步，雖然流目屎迫切求，亦bōe得tio̍h。In-ūi lín chai, i āu-lâi ài sêng-chiap chiok-hok ê sî, ū tú-tio̍h khì-sak, in-ūi i chhē bô hoán-hóe ê tōe-pō͘, sui-jiân lâu ba̍k-sái pek-chhiat kiû, ia̍h bōe tit-tio̍h.

18Taⁿ lín所到ê m̄是能摸得有火燄ê山，kap密雲、烏暗、大風，Taⁿ lín só͘ kàu ê m̄ sī ōe bong-tit ū hé-iām ê soaⁿ, kap ba̍t hûn, o͘-àm, tōa hong,

19號頭ê音，言語ê聲；聽見ê人求莫得koh kap in講；hō-thâu ê im, giân-gú ê siaⁿ; thiaⁿ-kìⁿ ê lâng kiû bo̍h-tit koh kap in kóng;

20因為所命令ê，in當bōe-tiâu，是講，就若走獸óa-tio̍h山，也tio̍h用石頭tìm死；in-ūi só͘ bēng-lēng ê, in tng bōe tiâu, sī kóng, Chiū nā cháu-siù óa-tio̍h soaⁿ, iā tio̍h ēng chio̍h-thâu tìm sí;

21koh所看見極其thang驚，致到摩西講，我不止驚到ngia̍uh-ngia̍uh-chhoah；koh só͘ khòaⁿ-kìⁿ ke̍k-kî thang kiaⁿ, tì-kàu Mô͘-se kóng, Góa put-chí kiaⁿ kàu ngia̍uh-ngia̍uh-chhoah;

22獨獨lín所到ê就是郇山，真活上帝ê城，天頂ê耶路撒冷，萬萬ê天使，to̍k-to̍k lín só͘ kàu ê chiū-sī Sûn-soaⁿ, chin-oa̍h Siōng-tè ê siâⁿ, thiⁿ-téng ê Iâ-lō͘-sat-léng, bān-bān ê thiⁿ-sài,

23hiah-ê有名記tī天裡ê大kiáⁿ ê聚會kap公會，審判眾人ê上帝，得tio̍h齊全ê義人ê靈魂，hiah ê ū miâ kì tī thiⁿ-ni̍h ê tōa kiáⁿ ê chū-hōe kap kong-hōe, sím-phòaⁿ chèng lâng ê Siōng-tè, tit-tio̍h chiâu-chn̂g ê gī lâng ê lêng-hûn,

24新約ê中保耶穌，kap所hiù ê血，chit-ê血所講ê比A-pek khah好。sin-iok ê tiong-pó Iâ-so͘, kap só͘ hiù ê huih, chit ê huih só͘ kóng ê pí A-pek khah hó.

25謹慎莫得拒絕tùi lín講ê。因為tī地裡來傳命令ê，若拒絕伊，尚且bōe會逃閃，何況咱違背tùi天傳命令ê ah？Kín-sīn bo̍h-tit kū-choa̍t tùi lín kóng ê. In-ūi tī tōe-ni̍h lâi thoân bēng-lēng ê, nā kū-choa̍t i, siōng-chhiáⁿ bōe-ōe tô-siám, hô-hòng lán ûi-pōe tùi thiⁿ thoân bēng-lēng ê ah?

26當時伊ê聲hō͘地振動；但是taⁿ有應允講，iáu有一pái我m̄-nā hou7te7 3搖choah，亦beh hō͘天搖choah。Tong-sî I ê siaⁿ hō͘ tōe tín-tāng; nā-sī taⁿ ū èng-ún kóng, Iáu ū chi̍t pái góa m̄ nā hō͘ tōe iô-choah, ia̍h beh hō͘ thiⁿ iô-choah.

27所講，iáu有一pái，是指明受振動ê物，就是受造ê物，beh tú-tio̍h遷徙，hō͘ hiah-ê無受振動ê長長tī-teh。Só͘ kóng, Iáu ū chi̍t pái, sī chí-bêng siū tín-tāng ê mi̍h, chiū-sī siū-chō ê mi̍h, beh tú-tio̍h chhian-sóa, hō͘ hiah ê bô siū tín-tāng ê tn̂g-tn̂g tī-teh.

28所以咱得tio̍h bōe會振動ê 國，tio̍h有恩惠，thang用虔誠敬畏來服事hō͘上帝歡喜；Só͘-í lán tit-tio̍h bōe-ōe tín-tāng ê kok, tio̍h ū un-hūi, thang ēng khiân-sêng kèng-ùi lâi ho̍k-sāi hō͘ Siōng-tè hoaⁿ-hí;

29因為咱ê上帝就是燄燄ê 火。in-ūi lán ê Siōng-tè chiū-sī iām-iām ê hé.

1兄弟ê相疼tio̍h久長。Hiaⁿ-tī ê saⁿ-thiàⁿ tio̍h kú-tn̂g.

2莫得bōe記得接待人客；因為tùi án-ni，bat有接待tio̍h天使，亦m̄知ê。Bo̍h-tit bōe kì-tit chiap-thāi lâng-kheh; in-ūi tùi án-ni, bat ū chiap-thāi-tio̍h thiⁿ-sài, ia̍h m̄ chai ê.

3Tio̍h siàu念chiah-ê受關ê，親像kap in相同關；siàu念受暴虐 ê，是lín亦有身軀。Tio̍h siàu-liām chiah ê siū koaiⁿ ê, chhin-chhiūⁿ kap in saⁿ-tâng koaiⁿ; siàu-liām siū pō-gio̍k ê, sī lín ia̍h ū seng-khu.

4婚姻人人tio̍h尊重，床無lâ-sâm；因為私通行淫ê人，上帝beh審判伊。Hun-in lâng-lâng tio̍h chun-tiōng, chhn̂g bô lâ-sâm; in-ūi su-thong kiâⁿ-îm ê lâng, Siōng-tè beh sím-phòaⁿ i.

5心志m̄-thang貪財；掠所有ê做夠額；因為上帝有講，我決斷無放sak你，決斷無離開你。Sim-chì m̄ thang tham châi; lia̍h só͘ ū ê chòe kàu-gia̍h; in-ūi Siōng-tè ū kóng, Góa koat-toàn bô pàng-sak lí, koat-toàn bô lī-khui lí.

6所以咱thang好膽講， 主就是幫贊我ê，我無beh驚惶， 人beh啥法得我ta-ôa？"Só͘-í lán thang hó-táⁿ kóng, Chú chiū-sī pang-chān góa ê, góa bô beh kiaⁿ-hiâⁿ, Lâng beh siáⁿ hoat-tit góa ta-ôa?"

7前引chhōa lín，用上帝ê道理傳hō͘ lín ê人，lín tio̍h siàu念in；看in行做ê結局，來學in ê信。Chêng ín-chhōa lín, ēng Siōng-tè ê tō-lí thoân hō͘ lín ê lâng, lín tio̍h siàu-liām in; khòaⁿ in kiâⁿ-chòe ê kiat-kio̍k, lâi o̍h in ê sìn.

8耶穌基督昨日、今á日同一樣，直到代代。Iâ-so͘ Ki-tok chā-ji̍t kin-á-ji̍t tâng chi̍t iūⁿ, ti̍t kàu tāi-tāi.

9Lín莫得hō͘ chhap雜各樣ê教所遷徙；因為心tùi恩典來堅固chiah是好；m̄是tùi hiah-ê食物；因為用工tī hiah-ê物ê，無利益。Lín bo̍h-tit hō͘ chhap-cha̍p koh-iūⁿ ê kàu só͘ chhian-sóa; in-ūi sim tùi un-tián lâi kian-kò͘ chiah sī hó; m̄ sī tùi hiah ê chia̍h-mi̍h; in-ūi ēng kang tī hiah ê mi̍h ê, bô lī-ek.

10咱有祭壇，服事tī會幕ê無權thang食伊。Lán ū chè-tôaⁿ, ho̍k-sāi tī hōe-bō͘ ê bô koân thang chia̍h i.

11因為cheng-siⁿ ê血hō͘祭司頭帶入聖所來贖罪，hiah-ê cheng-siⁿ ê身體就燒tī營外。In-ūi cheng-siⁿ ê huih hō͘ chè-si-thâu tòa ji̍p sèng-só͘ lâi sio̍k chōe, hiah ê cheng-siⁿ ê sin-thé chiū sio tī iâⁿ-gōa.

12所以耶穌因為beh用家己ê血hō͘百姓成聖，亦受苦tī城門外。Só͘-í Iâ-so͘ in-ūi beh ēng ka-kī ê huih hō͘ peh-sìⁿ chiâⁿ-sèng, ia̍h siū khó͘ tī siâⁿ mn̂g gōa.

13Án-ni咱亦tio̍h出營外來就近伊，受伊所受ê凌辱。Án-ni lán ia̍h tio̍h chhut iâⁿ gōa lâi chiū-kūn I, siū I só͘ siū ê lêng-jio̍k.

14因為tī chia咱無久長tī-teh ê城，是chhē hit-ê將來ê。In-ūi tī chia lán bô kú-tn̂g tī-teh ê siâⁿ, sī chhē hit ê chiong-lâi ê.

15所以tio̍h對耶穌常常用o-ló做祭，獻hō͘上帝；這就是承認主名ê嘴唇所結ê果子。Só͘-í tio̍h tùi Iâ-so͘ siông-siông ēng o-ló chòe chè, hiàn hō͘ Siōng-tè; che chiū-sī sêng-jīn Chú miâ ê chhùi-tûn só͘ kiat ê ké-chí.

16獨獨行好，kap相供給，lín m̄-thang bōe記得，因為chit號ê祭是上帝所歡喜ê。To̍k-to̍k kiâⁿ hó, kap saⁿ kiong-kip, lín m̄ thang bōe kì-tit, in-ūi chit hō ê chè sī Siōng-tè só͘ hoaⁿ-hí ê.

17引chhōa lín ê，lín tio̍h聽thàn順服in；因為in為tio̍h lín ê靈魂警醒，是將來tio̍h家己排列ê；lín tio̍h hō͘ in用歡喜來做，無用吐氣；因為chit-ê無利益lín。Ín-chhōa lín ê, lín tio̍h thiaⁿ-thàn sūn-ho̍k in; in-ūi in ūi-tio̍h lín ê lêng-hûn kéng-séng, sī chiong-lâi tio̍h ka-kī pâi-lia̍t ê; lín tio̍h hō͘ in ēng hoaⁿ-hí lâi chòe, bô ēng thó͘-khùi; in-ūi chit-ê bô lī-ek lín.

18Lín tio̍h替阮祈禱；阮信家己有照良心，凡事ài照正直來行。Lín tio̍h thòe goán kî-tó; goán sìn ka-kī ū chiàu liông-sim, hoān sū ài chiàu chèng-ti̍t lâi kiâⁿ.

19我益發勸lín行án-ni，hō͘我thang khah緊koh就近lín。Góa it-hoat khǹg lín kiâⁿ án-ni, hō͘ góa thang khah kín koh chiū-kūn lín.

20Taⁿ願平安ê上帝，就是bat tī永遠ê約ê血，tùi死人中chhōa羊群ê大牧者，咱ê主耶穌，koh起來，Taⁿ goān pêng-an ê Siōng-tè, chiū-sī bat tī éng-oán ê iok ê huih tùi sí-lâng tiong chhōa iûⁿ-kûn ê tōa bo̍k-chiá, lán ê Chú Iâ-so͘, koh khí-lâi,

21hō͘ lín tī ta̍k項好事完全，來行伊ê旨意，koh對耶穌基督，tī咱ê心內，行tāi-chì，得tio̍h歡喜tī伊ê面前；願榮光歸tī伊，代代無soah。À-bēng。hō͘ lín tī ta̍k hāng hó sū oân-choân, lâi kiâⁿ I ê chí-ì, koh tùi Iâ-so͘ Ki-tok, tī lán ê sim-lāi, kiâⁿ tāi-chì, tit-tio̍h hoaⁿ-hí tī I ê bīn-chêng; goān êng-kng kui tī I, tāi-tāi bô soah. À-bēng.

22兄弟ah，我寫短短ê phoe hō͘ lín；勸lín接納我勸勉ê話。Hiaⁿ-tī ah, góa siá té-té ê phoe hō͘ lín; khǹg lín chiap-la̍p góa khoàn-bián ê ōe.

23Lín tio̍h知咱ê兄弟提摩太已經得tio̍h tháu放；伊若緊緊來，我beh kap伊去見lín。Lín tio̍h chai lán ê hiaⁿ-tī Thê-mô͘-thài í-keng tit-tio̍h tháu-pàng; i nā kín-kín lâi, góa beh kap i khì kìⁿ lín.

24請lín請安chiah-ê引chhōa lín ê人kap眾聖徒。有意大利ê人請安lín。Chhiáⁿ lín chhéng-an chiah ê ín-chhōa lín ê lâng kap chèng sèng-tô͘. Ū Í-tāi-lī ê lâng chhéng-an lín.

25願恩典kap lín眾人tī-teh。À-bēng。Goān un-tián kap lín chèng-lâng tī-teh. À-bēng.

1上帝kap主耶穌基督ê奴僕， 雅各請安十二支派四散khiā起ê。Siōng-tè kap Chú Iâ-so͘ Ki-tok ê lô͘-po̍k, Ngá-kok chhéng-an cha̍p-jī chi-phài sì-sòaⁿ khiā-khí ê.

2我ê兄弟ah，lín陷落tī chōe-chōe樣ê試煉，tio̍h lóng掠做歡喜，Góa ê hiaⁿ-tī ah, lín hām-lo̍h tī chōe-chōe iūⁿ ê chhì-liān, tio̍h lóng lia̍h chòe hoaⁿ-hí,

3因為知lín信ê經驗能生出吞忍，in-ūi chai lín sìn ê keng-giām ōe siⁿ-chhut thun-lún,

4獨獨吞忍tio̍h hō͘伊到成功，hō͘ lín完全齊備，無所欠缺。To̍k-to̍k thun-lún tio̍h hō͘ i kàu sêng-kong, hō͘ lín oân-choân chiâu-pī, bô só͘ khiàm-kheh.

5Lín中間若有人欠缺智慧，tio̍h對hit-ê白白hō͘眾人，也無嫌人，ê上帝祈求，就beh hō͘伊。Lín tiong-kan nā ū lâng khiàm-kheh tì-hūi, tio̍h tùi hit ê pe̍h-pe̍h hō͘ chèng lâng, iā bô hiâm lâng, ê Siōng-tè kî-kiû, chiū beh hō͘ i.

6獨獨tio̍h用信來求，lóng無僥疑；因為僥疑ê人譬喻親像海湧hō͘風phah，來起落。To̍k-to̍k tio̍h ēng sìn lâi kiû, lóng bô giâu-gî; in-ūi giâu-gî ê lâng phì-jū chhin-chhiūⁿ hái-éng hō͘ hong phah, lâi khí-lo̍h.

7Hit號人免phah算tùi主有thang得tio̍h甚麼；Hit hō lâng bián phah-sǹg tùi Chú ū thang tit-tio̍h sím-mi̍h;

8兩樣心ê人，tī所行一切ê路無定準。nn̄g iūⁿ sim ê lâng, tī só͘ kiâⁿ it-chhè ê lō͘ bô tēng-chún.

9卑微ê兄弟tio̍h tùi伊ê高升來誇口；Pi-bî ê hiaⁿ-tī tio̍h tùi i ê ko-seng lâi khoa-kháu;

10好額ê tùi伊ê卑微也tio̍h án-ni；因為伊beh過去親像草ê花。hó-gia̍h ê tùi i ê pi-bî iā tio̍h án-ni; in-ūi i beh kè-khì chhin-chhiūⁿ chháu ê hoe.

11因為日出kap燒ê風，hō͘ hit-ê草乾，花謝，伊ê súi就無去；好額人tī伊ê所行也beh án-ni衰退。In-ūi ji̍t chhut kap sio ê hong, hō͘ hit ê chháu ta, hoe siā, i ê súi chiū bô-khì; hó-gia̍h lâng tī i ê só͘ kiâⁿ iā beh án-ni soe-thè.

12Tú-tio̍h試來忍受ê人有福氣，因為既然經過試驗beh得tio̍h活命ê冕旒，就是主所應允hō͘疼伊ê人ê。Tú-tio̍h chhì lâi jím-siū ê lâng ū hok-khì, in-ūi kì-jiân keng-kè chhì-giām beh tit-tio̍h oa̍h-miā ê bián-liû, chiū-sī Chú só͘ èng-ún hō͘ thiàⁿ I ê lâng ê.

13Tú-tio̍h試ê人莫得講，我是hō͘上帝所試；因為上帝無hō͘ pháiⁿ所試，伊家己也無試人。Tú-tio̍h chhì ê lâng bo̍h-tit kóng, Góa sī hō͘ Siōng-tè só͘ chhì; in-ūi Siōng-tè bô hō͘ pháiⁿ só͘ chhì, I ka-kī iā bô chhì lâng.

14獨獨ta̍k人tú-tio̍h試，lóng是hō͘家己私慾所迷所釣。To̍k-to̍k ta̍k lâng tú-tio̍h chhì, lóng sī hō͘ ka-kī su-io̍k só͘ bê só͘ tiò.

15私慾已經懷孕，就生罪惡，罪惡已經長成，就生出死無。Su-io̍k í-keng hoâi-īn, chiū siⁿ chōe-ok, chōe-ok í-keng tióng-sêng, chiū siⁿ chhut sí-bô.

16我所疼ê兄弟ah，莫得錯誤。Góa só͘ thiàⁿ ê hiaⁿ-tī ah, bo̍h-tit chhò -gō͘.

17見若好ê賞賜，kap完全ê恩賜，lóng是tùi頂面，tùi眾項光ê父落來。伊無變換，也無轉旋ê影。Kìⁿ-nā hó ê siúⁿ-sù, kap oân-choân ê un-sù, lóng sī tùi téng-bīn, tùi chèng hāng kng ê Pē lo̍h-lâi. I bô piàn-ōaⁿ, iā bô tńg-se̍h ê iáⁿ.

18伊照家己ê意思bat用真理ê道生咱，beh hō͘咱tī伊所造ê ê中間，做親像頭水ê果子。I chiàu ka-kī ê ì-sù bat ēng chin-lí ê tō siⁿ lán, beh hō͘ lán tī I só͘ chō ê ê tiong-kan, chòe chhin-chhiūⁿ thâu-chúi ê ké-chí.

19我所疼ê兄弟ah，lín知chit-ê。但是ta̍k人論到聽tio̍h緊，講話tio̍h慢，受氣也tio̍h慢。Góa só͘ thiàⁿ ê hiaⁿ-tī ah, lín chai chit-ê. Nā-sī ta̍k lâng lūn-kàu thiaⁿ tio̍h kín, kóng ōe tio̍h bān, siū-khì iā tio̍h bān.

20因為人ê受氣無成上帝ê義。In-ūi lâng ê siū-khì bô chiâⁿ Siōng-tè ê gī.

21所以lín除去lóng總am-cham，kap過額ê惡毒，tio̍h用溫柔來接納所眾tī內面ê道理，就是能救lín ê靈魂ê。Só͘-í lín tû-khì lóng-chóng am-cham, kap kè-gia̍h ê ok-to̍k, tio̍h ēng un-jiû lâi chiap-la̍p só͘ chèng tī lāi-bīn ê tō-lí, chiū-sī ōe kiù lín ê lêng-hûn ê.

22Lín tio̍h做行道理ê，m̄是kan-ta聽ê，來家己騙。Lín tio̍h chòe kiâⁿ tō-lí ê, m̄ sī kan-ta thiaⁿ ê, lâi ka-kī phiàn.

23因為聽道理，若無行ê，譬喻親像人tī鏡裡詳細看伊本然ê面；In-ūi thiaⁿ tō-lí, nā bô kiâⁿ ê, phì-jū chhin-chhiūⁿ lâng tī kiàⁿ-ni̍h siông-sè khòaⁿ i pún-jiân ê bīn;

24看過了就做伊去，liâm-piⁿ bōe記得伊生做甚麼款。Khòaⁿ kè-liáu chiū chòe i khì, liâm-piⁿ bōe kì-tit i siⁿ-chòe sím-mi̍h khoán.

25但是人注神tī hit-ê齊全ê律法，就是hō͘人自由ê，也長長tòa tī hit-ê，m̄是聽了bōe記得ê，是實在teh用工ê，chit號人tī伊ê所做beh有福氣。Nā-sī lâng chù-sîn tī hit ê chiâu-chn̂g ê lu̍t-hoat, chiū-sī hō͘ lâng chū-iû ê, iā tn̂g-tn̂g tòa tī hit-ê, m̄ sī thiaⁿ-liáu bōe kì-tit ê, sī si̍t-chāi teh ēng kang ê, chit hō lâng tī i ê só͘ chòe beh ū hok-khì.

26若有人掠家己做敬虔，也無約束伊ê舌，就是騙伊家己ê心，chit號人ê敬虔是空空。Nā ū lâng lia̍h ka-kī chòe kèng-khiân, iā bô iok-sok i ê chi̍h, chiū-sī phiàn i ka-kī ê sim, chit hō lâng ê kèng-khiân sī khang-khang.

27獨獨眷顧孤兒寡婦tī in ê患難中，koh家己守，無hō͘世俗bak-tio̍h，這tī父上帝ê面前就是做清氣無lâ-sâm ê敬虔。To̍k-to̍k koàn-kò͘ ko͘-jî kóaⁿ-hū tī in ê hoān-lān tiong, koh ka-kī siú, bô hō͘ sè-sio̍k bak-tio̍h, che tī Pē Siōng-tè ê bīn-chêng chiū-sī chòe chheng-khì bô lâ-sâm ê kèng-khiân.