1所以咱tio̍h益發致意所聽見ê，驚了咱會致到溜去。Só͘-í lán tio̍h it-hoat tì-ì só͘ thiaⁿ-kìⁿ ê, kiaⁿ-liáu lán ōe tì-kàu liu-khì.

2因為tùi天使所傳ê道理，尚且是堅固，也見若干犯違逆ê tāi-chì lóng tú-tio̍h應該受ê報應；In-ūi tùi thiⁿ-sài só͘ thoân ê tō-lí, siōng-chhiáⁿ sī kian-kò͘, iā kìⁿ-nā kan-hoān ûi-ke̍h ê tāi-chì lóng tú-tio̍h eng-kai siū ê pò-èng;

3咱若忽略chiah-nih大ê拯救kiám會逃閃mah？Chit-ê拯救既然是主起頭講ê，聽見ê人干證到實實hō͘咱；lán nā hut-lio̍k chiah-ni̍h tōa ê chín-kiù kiám ōe tô-siám mah? Chit ê chín-kiù kì-jiân sī Chú khí-thâu kóng ê, thiaⁿ-kìⁿ ê lâng kan-chèng kàu si̍t-si̍t hō͘ lán;

4koh上帝用chiah-ê神蹟、奇事、ta̍k項ê權能kap聖神ê賞賜，lóng照家己ê旨意，kap in saⁿ-kap干證。koh Siōng-tè ēng chiah ê sîn-jiah, kî-sū, ta̍k hāng ê koân-lêng kap Sèng Sîn ê siúⁿ-sù, lóng chiàu ka-kī ê chí-ì, kap in saⁿ-kap kan-chèng.

5因為阮所講teh來ê世界，上帝未bat hō͘伊降服tī天使。In-ūi goán só͘ kóng teh lâi ê sè-kài Siōng-tè bē bat hō͘ i hâng-ho̍k tī thiⁿ-sài.

6獨獨有干證tī某所在ê，講， 人是甚麼，hō͘你siàu念伊？ 人ê Kiáⁿ是甚麼，hō͘你看顧伊？To̍k-to̍k ū kan-chèng tī bó͘ só͘-chāi ê, kóng, Lâng sī sím-mi̍h, hō͘ lí siàu-liām i? Lâng ê kiáⁿ sī sím-mi̍h, hō͘ lí khòaⁿ-kò͘ i?

7你hō͘伊略á khah輸天使， Koh用榮光尊貴，hō͘伊做冕旒， Koh設立伊tī你ê手所造ê ê頂面；Lí hō͘ i lio̍h-á khah-su thiⁿ-sài, Koh ēng êng-kng chun-kùi, hō͘ i chòe bián-liû, Koh siat-li̍p i tī lí ê chhiú só͘ chō ê ê téng-bīn;

8Hō͘萬物lóng降服tī伊ê腳下。　已經hō͘萬物lóng降服伊，就無chhun一項物無降服伊。總是到taⁿ咱猶未看見萬物lóng降服伊。Hō͘ bān mi̍h lóng hâng-ho̍k tī i ê kha-ē.Í-keng hō͘ bān mi̍h lóng hâng-ho̍k i, chiū bô chhun chi̍t hāng mi̍h bô hâng-ho̍k i. Chóng-sī kàu taⁿ lán iáu-bē khòaⁿ-kìⁿ bān mi̍h lóng hâng-ho̍k i.

9獨獨看見hit-ê略á khah輸天使ê耶穌，為tio̍h受死ê艱苦得tio̍h榮光尊貴做冕旒，thang tùi上帝ê恩，為tio̍h眾人受死。To̍k-to̍k khòaⁿ-kìⁿ hit ê lio̍h-á khah-su thiⁿ-sài ê Iâ-so͘, ūi-tio̍h siū sí ê kan-khó͘ tit-tio̍h êng-kng chun-kùi chòe bián-liû, thang tùi Siōng-tè ê un, ūi-tio̍h chèng lâng siū sí.

10因為萬物所為tio̍h伊，萬物所tùi伊ê，teh chhōa chōe-chōe kiáⁿ到tī榮光，就hō͘救in ê首領tùi苦難來成完全，本是合宜。In-ūi bān mi̍h só͘ ūi-tio̍h I, bān mi̍h só͘ tùi I ê, teh chhōa chōe-chōe kiáⁿ kàu tī êng-kng, chiū hō͘ kiù in ê siú-léng tùi khó͘-lān lâi chiâⁿ oân-choân, pún sī ha̍p-gî.

11因為hit-ê hō͘人成聖ê，kap hiah-ê得tio̍h成聖ê，lóng tùi一個出；所以伊稱in做兄弟無掠做見笑；In-ūi hit ê hō͘ lâng chiâⁿ sèng ê, kap hiah ê tit-tio̍h chiâⁿ sèng ê, lóng tùi chi̍t-ê chhut; só͘-í I chheng in chòe hiaⁿ-tī bô lia̍h chòe kiàn-siàu;

12講， 我beh報揚你ê名tī我ê兄弟， O-ló你tī會中。kóng, Góa beh pò-iông lí ê miâ tī góa ê hiaⁿ-tī, O-ló lí tī hōe-tiong.

13Koh講， 我beh óa靠伊。Koh講， 看ah！我kap上帝所hō͘我ê kiáⁿ兒。Koh kóng, Góa beh óa-khò I.Koh kóng, Khòaⁿ ah! góa kap Siōng-tè só͘ hō͘ góa ê kiáⁿ-jî.

14Taⁿ chiah-ê kiáⁿ兒既然相同有血肉ê體，伊本身亦平平有；beh用死來廢無有死ê權勢ê，就是魔鬼；Taⁿ chiah ê kiáⁿ-jî kì-jiân saⁿ-tâng ū huih bah ê thé, I pún-sin ia̍h pîⁿ-pîⁿ ū; beh ēng sí lâi hòe-bô ū sí ê koân-sè ê, chiū-sī Mô͘-kúi;

15亦beh hō͘一生驚畏死到親像做奴才ê，lóng得tio̍h tháu放。ia̍h beh hō͘ it-seng kiaⁿ-ùi sí kàu chhin-chhiūⁿ chòe lô͘-châi ê, lóng tit-tio̍h tháu-pàng.

16因為伊無牽救天使，是牽救亞伯拉罕ê後裔。In-ūi I bô khan-kiù thiⁿ-sài, sī khan-kiù A-pek-la̍h-hán ê hō͘-è.

17所以凡事伊tio̍h kap兄弟相同，thang tī上帝ê事做憐憫忠信ê祭司頭，因為百姓ê罪獻挽回ê祭。Só͘-í hoān sū I tio̍h kap hiaⁿ-tī saⁿ-tâng, thang tī Siōng-tè ê sū chòe lîn-bín tiong-sìn ê chè-si-thâu, in-ūi peh-sìⁿ ê chōe hiàn bán-hôe ê chè.

18因為伊已經受苦來tú-tio̍h試，就會幫贊chiah-ê受試ê人。In-ūi I í-keng siū khó͘ lâi tú-tio̍h chhì, chiū ōe pang-chān chiah ê siū chhì ê lâng.

1所以lín chiah-ê聖ê兄弟，同得tio̍h天召ê，tio̍h深想咱所承認做使者，做祭司頭ê耶穌；Só͘-í lín chiah ê sèng ê hiaⁿ-tī, tâng tit-tio̍h thiⁿ tiàu ê, tio̍h chhim siūⁿ lán só͘ sêng-jīn chòe Sù-chiá, chòe Chè-si-thâu ê Iâ-so͘;

2伊盡忠tī設立伊ê，親像摩西tī上帝ê全家一樣。I chīn-tiong tī siat-li̍p I ê, chhin-chhiūⁿ Mô͘-se tī Siōng-tè ê choân ke chi̍t iūⁿ.

3因為伊算是能堪得受榮光贏過摩西親像建立家ê，比家khah尊貴。In-ūi I sǹg sī ōe kham-tit siū êng-kng iâⁿ-kè Mô͘-se chhin-chhiūⁿ kiàn-li̍p ke ê, pí ke khah chun-kùi.

4因為家lóng有人建立伊，獨獨建立萬物ê就是上帝。In-ūi ke lóng ū lâng kiàn-li̍p i, to̍k-to̍k kiàn-li̍p bān mi̍h ê chiū-sī Siōng-tè.

5Koh摩西做奴僕，果然盡忠tī上帝ê全家，來干證將來beh傳ê事；Koh Mô͘-se chòe lô͘-po̍k, kó-jiân chīn-tiong tī Siōng-tè ê choân ke, lâi kan-chèng chiong-lâi beh thoân ê sū;

6獨獨基督做Kiáⁿ，治理伊ê家；咱若執守tùi ǹg望所有ê好膽kap誇口，堅固到尾，就做伊ê家。to̍k-to̍k Ki-tok chòe Kiáⁿ, tī-lí I ê ke; lán nā chip-siú tùi ǹg-bāng só͘ ū ê hó-táⁿ kap khoa-kháu, kian-kò͘ kàu bé, chiū chòe I ê ke.

7所以，親像聖神講: 今á日lín若聽見伊ê聲， 就m̄-thang剛硬lín ê心，親像tī激我受氣ê時， Tī曠野試探我ê日。Só͘-í, chhin-chhiūⁿ Sèng Sîn kóng: Kin-á-ji̍t lín nā thiaⁿ-kìⁿ I ê siaⁿ, Chiū m̄ thang kong-ngī lín ê sim, chhin-chhiūⁿ tī kek góa siū-khì ê sî, Tī khòng-iá chhì-thàm góa ê ji̍t.

9Tī hia lín ê列祖驗來試我， Koh歷過四十年看見我ê所行。Tī hia lín ê lia̍t-chó͘ giām lâi chhì góa, Koh le̍k-kè sì-cha̍p nî khòaⁿ-kìⁿ góa ê só͘ kiâⁿ.

10所以我無歡喜hit代ê人， 講，In ê心常常失迷， M̄-bat我chiah-ê路；Só͘-í góa bô hoaⁿ-hí hit tāi ê lâng, Kóng, In ê sim siông-siông sit-bê, M̄ bat góa chiah ê lō͘;

11我就tī受氣中chiù-chōa，講， In斷斷bōe得thang入我ê安歇。Góa chiū tī siū-khì tiong chiù-chōa, kóng, In toàn-toàn bōe tit thang ji̍p góa ê an-hioh.

12兄弟ah，lín tio̍h謹慎，驚了lín中間kiám-chhái有人勸m̄信ê pháiⁿ心，離開真活ê上帝；Hiaⁿ-tī ah, lín tio̍h kín-sīn, kiaⁿ-liáu lín tiong-kan kiám-chhái ū lâng khǹg m̄ sìn ê pháiⁿ sim, lī-khui chin oa̍h ê Siōng-tè;

13所以lín tio̍h thàn iáu有thang叫做今á日ê，日日相勸勉；驚了lín中間有ê hō͘罪迷去，來硬心:só͘-í lín tio̍h thàn iáu ū thang kiò chòe kin-á-ji̍t ê, ji̍t-ji̍t saⁿ khoàn-bián; kiaⁿ-liáu lín tiong-kan ū-ê hō͘ chōe bê--khì, lâi ngī-sim:

14因為咱若持守起頭ê深信，堅固到路尾，就有份tī基督:in-ūi lán nā chhî-siú khí-thâu ê chhim sìn, kian-kò͘ kàu lō͘-bé, chiū ū hūn tī Ki-tok:

15當iáu teh講， 今á日lín若聽見伊ê聲， 就m̄-thang剛硬lín ê心，親像tī激我受氣ê時。tng iáu teh kóng, Kin-á-ji̍t lín nā thiaⁿ-kìⁿ I ê siaⁿ, Chiū m̄ thang kong-ngī lín ê sim, chhin-chhiūⁿ tī kek góa siū-khì ê sî.

16因為聽來激受氣ê，是是誰 ah？kiám m̄是tè摩西出埃及ê眾人mah？In-ūi thiaⁿ lâi kek siū-khì ê, sī chī-chūi ah? kiám m̄ sī tè Mô͘-se chhut Ai-ki̍p ê chèng lâng mah?

17上帝四十年久所無歡喜ê是是誰 ah？kiám m̄是犯罪，身屍倒tī曠野ê人mah？Siōng-tè sì-cha̍p nî kú só͘ bô hoaⁿ-hí ê sī chī-chūi ah? kiám m̄ sī hoān-chōe, sin-si tó tī khòng-iá ê lâng mah?

18上帝chiù-chōa m̄准入伊ê安歇ê，若m̄是m̄信thàn ê人，是是誰 ah？Siōng-tè chiù-chōa m̄ chún ji̍p I ê an-hioh ê, nā m̄ sī m̄ sìn-thàn ê lâng, sī chī-chūi ah?

19Tùi án-ni看，in bōe能入，就是因為m̄信。Tùi án-ni khòaⁿ, in bōe ōe ji̍p, chiū-sī in-ūi m̄ sìn.

1所以有入伊ê安歇ê應允留teh hō͘咱，就tio̍h驚惶，驚見lín中間kiám-chhái有人親像得無tio̍h。Só͘-í ū ji̍p I ê an-hioh ê èng-ún lâu-teh hō͘ lán, chiū tio̍h kiaⁿ-hiâⁿ, kiaⁿ-kìⁿ lín tiong-kan kiám-chhái ū lâng chhin-chhiūⁿ tit bô tio̍h.

2因為福音有傳hō͘咱，親像傳hō͘ in，總是所聽ê話無利益in，因為聽ê人無用信kap道理相合。In-ūi hok-im ū thoân hō͘ lán, chhin-chhiūⁿ thoân hō͘ in, chóng-sī só͘ thiaⁿ ê ōe bô lī-ek in, in-ūi thiaⁿ ê lâng bô ēng sìn kap tō-lí saⁿ-ha̍p.

3因為咱已經信ê，是入chit-ê安歇；照伊所講， 我就tī受氣中chiù-chōa講， In斷斷bōe得thang入我ê安歇；其實chiah-ê工，tùi創世間以來，已經成lah。In-ūi lán í-keng sìn ê, sī ji̍p chit ê an-hioh; chiàu I só͘ kóng, Góa chiū tī siū-khì tiong chiù-chōa kóng, In toàn-toàn bōe tit thang ji̍p góa ê an-hioh;kî-si̍t chiah ê kang, tùi chhòng-sè-kan í-lâi, í-keng chiâⁿ lah.

4因為論到第七日，tī某所在有án-ni講，上帝tī第七日明白伊lóng總ê工來安歇；In-ūi lūn-kàu tē chhit ji̍t, tī bó͘ só͘-chāi ū án-ni kóng, Siōng-tè tī tē chhit ji̍t bêng-pe̍k I lóng-chóng ê kang lâi an-hioh;

5亦tī chit所在koh講， In斷斷bōe得thang入我ê安歇。ia̍h tī chit só͘-chāi koh kóng, In toàn-toàn bōe tit-thang ji̍p góa ê an-hioh.

6所以chit-ê安歇iáu teh thèng候有人入，但是hiah-ê事先得tio̍h福音ê，因為m̄信thàn，chiah無入；Só͘-í chit ê an-hioh iáu teh thèng-hāu ū lâng ji̍p, nā-sī hiah ê tāi-seng tit-tio̍h hok-im ê, in-ūi m̄ sìn-thàn, chiah bô ji̍p;

7歷過chōe-chōe年，tī大衛ê冊內7，伊koh定一日，講，今á日，親像頂面所講， 今á日lín若聽見伊ê聲， 就m̄-thang剛硬lín ê心。le̍k-kè chōe-chōe nî, tī Tāi-pi̍t ê chheh-lāi, I koh tēng chi̍t ji̍t, kóng, Kin-á-ji̍t, chhin-chhiūⁿ téng-bīn só͘ kóng, Kin-á-ji̍t lín nā thiaⁿ-kìⁿ I ê siaⁿ, Chiū m̄ thang kong-ngī lín ê sim.

8因為約書亞若bat用安歇賞賜百姓，就後來的確無講起別日。In-ūi Iok-su-a nā bat ēng an-hioh siúⁿ-sù peh-sìⁿ, chiū āu-lâi tek-khak bô kóng-khí pa̍t ji̍t.

9Tùi án-ni看，iáu有安歇kā上帝ê百姓留teh。Tùi án-ni khòaⁿ, iáu ū an-hioh kā Siōng-tè ê peh-sìⁿ lâu-teh.

10因為入伊ê安歇ê是明白伊lóng總ê工來安歇，In-ūi ji̍p i ê an-hioh ê sī bêng-pe̍k i lóng-chóng ê kang lâi an-hioh,

11親像上帝明白伊ê工來安歇。所以咱tio̍h盡力來入chit-ê安歇，免得有人跋倒tī siāng hit樣ê m̄信。chhin-chhiūⁿ Siōng-tè bêng-pe̍k I ê kang lâi an-hioh. Só͘-í lán tio̍h chīn-la̍t lâi ji̍p chit ê an-hioh, bián-tit ū lâng poa̍h-tó tī siāng hit iūⁿ ê m̄ sìn.

12因為上帝ê道是活ê，是有功效ê，比一切雙面ê劍khah利，凡若魂kap神，骨節kap骨髓，無m̄刺入破開，心內chiah-ê念頭kap主意亦無m̄鑑察。In-ūi Siōng-tè ê tō sī oa̍h ê, sī ū kong-hāu ê, pí it-chhè siang-bīn ê kiàm khah lāi, hoān-nā hûn kap sîn, kut-chat kap kut-chhé, bô m̄ chhì-ji̍p phòa-khui, sim-lāi chiah ê liām-thâu kap chú-ì ia̍h bô m̄ kàm-chhat.

13Koh所創造ê，tī伊ê面前無一項蓋密:就是萬物掀開露出tī審判咱ê ê目前。Koh só͘ chhòng-chō ê, tī I ê bīn-chêng bô chi̍t hāng khàm-ba̍t: chiū-sī bān mi̍h hian-khui lō͘-chhut tī sím-phòaⁿ lán ê ê ba̍k-chêng.

14所以咱已經有大ê祭司頭，上帝ê Kiáⁿ耶穌，經過hiah-ê天，就tio̍h執守所承認ê。Só͘-í lán í-keng ū tōa ê chè-si-thâu, Siōng-tè ê Kiáⁿ Iâ-so͘, keng-kè hiah ê thiⁿ, chiū tio̍h chip-siú só͘ sêng-jīn ê.

15因為咱所有ê祭司頭m̄是bōe會體貼咱lóng總ê軟弱；就是凡事平平有受試，但是無罪。In-ūi lán só͘ ū ê chè-si-thâu m̄ sī bōe-ōe thé-thiap lán lóng-chóng ê loán-jio̍k; chiū-sī hoān sū pîⁿ-pîⁿ ū siū chhì, nā-sī bô chōe.

16所以咱tio̍h好膽就近恩典ê座位，thang受憐憫，也得tio̍h恩典，做及時ê幫贊。Só͘-í lán tio̍h hó-táⁿ chiū-kūn un-tián ê chō-ūi, thang siū lîn-bín, iā tit-tio̍h un-tián, chòe ki̍p-sî ê pang-chān.