1所以基督道理ê初學，咱請放下teh，來致意進步到完全；免koh hē地基，就是反悔來脫離chiah-ê死死ê所行，kap信上帝，chiah-ê洗ê禮數，Só͘-í Ki-tok tō-lí ê chho͘-ha̍k, lán chhiáⁿ pàng-hē teh, lâi tì-ì chìn-pō͘ kàu oân-choân; bián koh hē tōe-ki, chiū-sī hoán-hóe lâi thoat-lī chiah ê sí-sí ê só͘ kiâⁿ, kap sìn Siōng-tè, chiah ê sóe ê lé-sò͘,

2以及按手，死人koh活，kap永遠ê審判，chiah-ê教訓。í-ki̍p hōaⁿ chhiú, sí lâng koh-oa̍h, kap éng-oán ê sím-phòaⁿ, chiah ê kàu-hùn.

3上帝若准，阮就beh án-ni行。Siōng-tè nā chún, goán chiū beh án-ni kiâⁿ.

4因為人已經bat得tio̍h光照，受tio̍h天裡ê恩賜，有份tī聖神，In-ūi lâng í-keng bat tit-tio̍h kng chiò, siū-tio̍h thiⁿ-ni̍h ê un-sù, ū hūn tī Sèng Sîn,

5koh受tio̍h上帝ê好話，kap teh來ê世界chiah-ê權能，koh siū-tio̍h Siōng-tè ê hó ōe, kap teh lâi ê sè-kài chiah ê koân-lêng,

6後來背叛，就bōe會hō͘ in koh換新來反悔；因為in家己koh釘上帝ê Kiáⁿ tī十字架，來顯明凌辱伊。āu-lâi pōe-poān, chiū bōe-ōe hō͘ in koh ōaⁿ-sin lâi hoán-hóe; in-ūi in ka-kī koh tèng Siōng-tè ê Kiáⁿ tī si̍p-jī-kè, lâi hián-bêng lêng-jio̍k I.

7因為土地食tio̍h ta̍uh-ta̍uh落ê雨水，來生菜蔬，合作穡人ê路用，就得tio̍h上帝賜福；In-ūi thó͘-tōe chia̍h-tio̍h ta̍uh-ta̍uh lo̍h ê hō͘-chúi, lâi siⁿ chhài-soe, ha̍p choh-sit lâng ê lō͘-ēng, chiū tit-tio̍h Siōng-tè sù hok;

8但是生草刺kapc蒺藜，就受棄sak，近tī受咒詛，伊ê結局就是蕭lio去。nā-sī siⁿ chháu-chhì kap chi̍t-lê, chiū siū khì-sak, kūn tī siū chiù-chó͘, i ê kiat-kio̍k chiū-sī sio-lio-khì.

9所疼ê兄弟ah！阮sui-bóng án-ni講，但是深信lín ta̍k項khah贏這，koh屬tī得救；Só͘ thiàⁿ ê hiaⁿ-tī ah! goán sui-bóng án-ni kóng, nā-sī chhim sìn lín ta̍k hāng khah-iâⁿ che, koh sio̍k tī tit kiù;

10因為上帝m̄是無公道，來bōe記得lín ê工，kap lín為tio̍h伊ê名所顯明ê仁愛，因為lín平素服事chiah-ê聖徒，到taⁿ亦服事in。in-ūi Siōng-tè m̄ sī bô kong-tō, lâi bōe kì-tit lín ê kang, kap lín ūi-tio̍h I ê miâ só͘ hián-bêng ê jîn-ài, in-ūi lín pêng-sò͘ ho̍k-sāi chiah ê sèng-tô͘, kàu taⁿ ia̍h ho̍k-sāi in.

11我ài lín ta̍k人猶原顯出chit號ê慇勤，hō͘ lín ê ǹg望滿足到路尾:Góa ài lín ta̍k lâng iû-goân hián-chhut chit hō ê un-khûn, hō͘ lín ê ǹg-bāng móa-chiok kàu lō͘-bé:

12hō͘ lín無致到pîn-tōaⁿ，就是學hiah-ê tùi信kap吞忍來承接chiah-ê應允ê人。hō͘ lín bô tì-kàu pîn-tōaⁿ, chiū-sī o̍h hiah ê tùi sìn kap thun-lún lâi sêng-chiap chiah ê èng-ún ê lâng.

13Taⁿ上帝應允亞伯拉罕ê時，因為無khah大ê thang kí來chiù-chōa，就kí本身來chiù-chōa講，Taⁿ Siōng-tè èng-ún A-pek-la̍h-hán ê sî, in-ūi bô khah tōa ê thang kí lâi chiù-chōa, chiū kí pún-sin lâi chiù-chōa kóng,

14我賜福beh賜福你，加添beh加添你ê後裔。Góa sù-hok beh sù-hok lí, ke-thiⁿ beh ke-thiⁿ lí ê hō͘-è.

15親像án-ni，亞伯拉罕gâu吞忍，就得tio̍h所應允ê。Chhin-chhiūⁿ án-ni, A-pek-la̍h-hán gâu thun-lún, chiū tit-tio̍h só͘ èng-ún ê.

16因為人是kí khah大ê來chiù-chōa；亦用chiù-chōa做相爭ê結尾，來決定伊。In-ūi lâng sī kí khah tōa ê lâi chiù-chōa; ia̍h ēng chiù-chōa chòe saⁿ-chiⁿ ê kiat-bé, lâi koat-tiāⁿ i.

17Án-ni，上帝ài beh格外顯明伊ê旨意bōe移易，hō͘ hiah-ê承接應允ê人知，chiah用chiù-chōa來做證見:Án-ni, Siōng-tè ài beh kek-gōa hián-bêng I ê chí-ì bōe î-e̍k, hō͘ hiah ê sêng-chiap èng-ún ê lâng chai, chiah ēng chiù-chōa lâi chòe chèng-kìⁿ:

18beh tùi兩項bōe移易ê事，上帝所bōe會白賊ê，hō͘咱有大大ê安慰，就是咱已經逃避來擒所hē tī頭前ê ǹg望；beh tùi nn̄g hāng bōe î-e̍k ê sū, Siōng-tè só͘ bōe-ōe pe̍h-chha̍t ê, hō͘ lán ū tōa-tōa ê an-ùi, chiū-sī lán í-keng tô-pī lâi khîⁿ só͘ hē tī thâu-chêng ê ǹg-bāng;

19咱為chit-ê ǹg望，親像靈魂ê碇，拋tī帳籬內，堅固無移徙；lán ūi chit ê ǹg-bāng, chhin-chhiūⁿ lêng-hûn ê tiàⁿ, pha tī tiùⁿ-lî lāi, kian-kò͘ bô î-sóa;

20耶穌做先鋒，已經為tio̍h咱入去hia，成做永遠ê祭司長，照Be̍k-ki-sé-tek ê班列。Iâ-so͘ chòe sian-hong, í-keng ūi-tio̍h lán ji̍p khì hia, chiâⁿ-chòe éng-oán ê Chè-si-tiúⁿ, chiàu Be̍k-ki-sé-tek ê pan-lia̍t.

1因為chit-ê Be̍k-ki-sé-tek，就是Sat-léng王，也是至koân上帝ê祭司，早tú-tio̍h亞伯拉罕thâi贏chiah-ê王tò來ê時，kā伊祝福ê，In-ūi chit ê Be̍k-ki-sé-tek, chiū-sī Sat-léng ông, iā sī chì-koâiⁿ Siōng-tè ê chè-si, chá tú-tio̍h A-pek-la̍h-hán thâi-iâⁿ chiah ê ông tò-lâi ê sî, kā i chiok-hok ê,

2亞伯拉罕亦將一切所得tio̍h ê，抽十份一hō͘伊(伊ê名翻譯就是義ê王，koh是Sat-léng王，就是平安王；A-pek-la̍h-hán ia̍h chiong it-chhè só͘ tit-tio̍h ê, thiu cha̍p hūn chi̍t hō͘ i (i ê miâ hoan-e̍k chiū-sī gī ê Ông, koh sī Sat-léng Ông, chiū-sī pêng-an Ông;

3伊無父無母，無世系，無時日ê起頭，無活命ê路尾，是親像上帝ê Kiáⁿ)久長teh做祭司。i bô pē bô bú, bô sè-hē, bô sî-ji̍t ê khí-thâu, bô oa̍h-miā ê lō͘-bé, sī chhin-chhiūⁿ Siōng-tè ê Kiáⁿ) kú-tn̂g teh chòe chè-si.

4試想先祖亞伯拉罕將所得tio̍h上等ê物，抽十份一hō͘伊，就hit人尊貴到怎樣，Chhì-siūⁿ sian-chó͘ A-pek-la̍h-hán chiong só͘ tit-tio̍h siōng-téng ê mi̍h, thiu cha̍p hūn chi̍t hō͘ i, chiū hit lâng chun-kùi kàu cháiⁿ-iūⁿ,

5Taⁿ利未ê kiaⁿ孫擔當祭司ê chit-ê，雖然kap百姓lóng是亞伯拉罕ê後裔，平平是兄弟，iáu-kú奉命令，照律法tùi百姓the̍h十份一；Taⁿ Lī-bī ê kiáⁿ-sun tam-tng chè-si ê chit ê, sui-jiân kap peh-sìⁿ lóng sī A-pek-la̍h-hán ê hō͘-è, pîⁿ-pîⁿ sī hiaⁿ-tī, iáu-kú hōng bēng-lēng, chiàu lu̍t-hoat tùi peh-sìⁿ the̍h cha̍p hūn chi̍t;

6總是hit-ê無屬利未ê世系ê，bat tùi亞伯拉罕the̍h十份一，koh kā得tio̍h chiah-ê應允ê祝福。chóng-sī hit ê bô sio̍k Lī-bī ê sè-hē ê, bat tùi A-pek-la̍h-hán the̍h cha̍p hūn chi̍t, koh kā tit-tio̍h chiah ê èng-ún ê chiok-hok.

7獨獨序細hō͘序大祝福，這是無thang辯駁。To̍k-to̍k sī-sòe hō͘ sī-tōa chiok-hok, che sī bô thang piān-pok.

8Taⁿ tī chia the̍h十份一ê，lóng是會死ê人；但是tī hia是hit-ê有受干證講，伊是活ê。Taⁿ tī chia the̍h cha̍p hūn chi̍t ê, lóng sī ōe sí ê lâng; nā-sī tī hia sī hit-ê ū siū kan-chèng kóng, i sī oa̍h ê.

9Koh也會講得，連the̍h十份一ê利未也bat在tī亞伯拉罕來納十份一；Koh iā ōe kóng-tit, liân the̍h cha̍p hūn chi̍t ê Lī-bī iā bat chāi-tī A-pek-la̍h-hán lâi la̍p cha̍p hūn chi̍t;

10因為Be̍k-ki-sé-tek tú-tio̍h亞伯拉罕ê時，利未iáu-kú tī in祖ê身軀。in-ūi Be̍k-ki-sé-tek tú-tio̍h A-pek-la̍h-hán ê sî, Lī-bī iáu-kú tī in chó͘ ê sin-khu.

11早百姓受律法，是tī利未族祭司ê職任下；若tùi伊能得tio̍h完全，就mih-sái另外koh興起一個祭司，照Be̍k-ki-sé-tek ê班列，無講照亞倫ê班列ah？Chá peh-sìⁿ siū lu̍t-hoat, sī tī Lī-bī cho̍k chè-si ê chit-jīm ē; nā tùi i ōe tit-tio̍h oân-choân, chiū mih-sái lēng-gōa koh heng-khí chi̍t ê chè-si, chiàu Be̍k-ki-sé-tek ê pan-lia̍t, bô kóng chiàu A-lûn ê pan-lia̍t ah?

12因為祭司ê職已經改換，就律法亦的確tio̍h改換。In-ūi chè-si ê chit í-keng kóe-ōaⁿ, chiū lu̍t-hoat ia̍h tek-khak tio̍h kóe-ōaⁿ.

13因為chiah-ê話所指ê，是屬tī別個支派，in中間未bat有人跟隨tī祭壇。In-ūi chiah ê ōe só͘ chí ê, sī sio̍k tī pa̍t ê chi-phài, in tiong-kan bē bat ū lâng kun-sûi tī chè-tôaⁿ.

14是咱ê主明明tùi猶大出；論chit-ê支派，摩西未bat提起祭司ê職。Sī lán ê Chú bêng-bêng tùi Iû-tāi chhut; lūn chit ê chi-phài, Mô͘-se bē bat thê-khí chè-si ê chit.

15Koh若照Be̍k-ki-sé-tek ê款式，有興起別個祭司；Koh nā chiàu Be̍k-ki-sé-tek ê khoán-sit, ū heng-khí pa̍t ê chè-si;

16m̄是照肉體誡命ê法來設立，是照bōe毀壞ê活命ê權能，就頂面所講ê你嶄然khah明。m̄ sī chiàu jio̍k-thé kài-bēng ê hoat lâi siat-li̍p, sī chiàu bōe húi-hoāi ê oa̍h-miā ê koân-lêng, chiū téng-bīn só͘ kóng ê lí chám-jiân khah bêng.

17因為有干證伊講， 你永永做祭司， 照Be̍k-ki-sé-tek ê班列。In-ūi ū kan-chèng I kóng, Lí éng-éng chòe chè-si, Chiàu Be̍k-ki-sé-tek ê pan-lia̍t.

18因為前ê誡命廢無，是為tio̍h伊ê軟弱kap無利益，In-ūi chêng ê kài-bēng hòe-bô, sī ūi-tio̍h i ê loán-jio̍k kap bô lī-ek,

19(因為律法無做一項到完全)chiah設立koh-khah好ê ǹg望，就是咱所tùi伊來親近上帝ê。(in-ūi lu̍t-hoat bô chòe chi̍t hāng kàu oân-choân) chiah siat-li̍p koh khah hó ê ǹg-bāng, chiū-sī lán só͘ tùi i lâi chhin-kūn Siōng-tè ê.

20Koh因為伊m̄是無tùi chiù-chōa來設立；Koh in-ūi I m̄ sī bô tùi chiù-chōa lâi siat-li̍p;

21(in hiah-ê立做祭司無tùi chiù-chōa；獨獨chit-ê就tùi chiù-chōa，因為設立伊ê有kā伊講， 主chiù-chōa，無退悔， 你永永做祭司:)(in hiah-ê li̍p chòe chè-si bô tùi chiù-chōa; to̍k-to̍k chit-ê chiū tùi chiù-chōa, in-ūi siat-li̍p I ê ū kā I kóng, Chú chiù-chōa, bô thè-hóe, Lí éng-éng chòe chè-si:)

22親像án-ni，耶穌做koh-khah好ê約ê保認。Chhin-chhiūⁿ án-ni, Iâ-so͘ chòe koh khah hó ê iok ê pó-jīn.

23Hiah-ê做祭司ê，因為hō͘死阻隔，bōe會久長，所以tio̍h真chōe人；Hiah ê chòe chè-si ê, in-ūi hō͘ sí chó͘-keh, bōe-ōe kú-tn̂g, só͘-í tio̍h chin chōe lâng;

24獨獨chit-ê，因為永永tī-teh，有bōe改換ê祭司職。to̍k-to̍k chit-ê, in-ūi éng-éng tī-teh, ū bōe kóe-ōaⁿ ê chè-si chit.

25所以凡若tùi伊就近上帝ê人，伊能救in到完全，因為伊長長活，來替in祈求。Só͘-í hoān-nā tùi I chiū-kūn Siōng-tè ê lâng, I ōe kiù in kàu oân-choân, in-ūi I tn̂g-tn̂g oa̍h, lâi thòe in kî-kiû.

26因為chit號ê祭司頭合咱ê欠用；伊是聖，無pháiⁿ，無lâ-sâm，離開罪人，成做khah高chiah-ê天；In-ūi chit hō ê chè-si-thâu ha̍p lán ê khiàm-ēng; I sī sèng, bô pháiⁿ, bô lâ-sâm, lī-khui chōe-jîn, chiâⁿ-chòe khah koâiⁿ chiah ê thiⁿ;

27伊m̄免親像hiah-ê祭司頭，tio̍h日日事先為tio̍h家己ê罪，後來為tio̍h百姓ê罪，來獻祭；因為伊獻本身，就做一下成chit-ê事。I m̄ bián chhin-chhiūⁿ hiah ê chè-si-thâu, tio̍h ji̍t-ji̍t tāi-seng ūi-tio̍h ka-kī ê chōe, āu-lâi ūi-tio̍h peh-sìⁿ ê chōe, lâi hiàn-chè; in-ūi I hiàn pún-sin, chiū chòe chi̍t-ē chiâⁿ chit ê sū.

28因為律法設立軟chiáⁿ ê人做祭司頭；獨獨律法後chiù-chōa ê話設立Kiáⁿ，永遠做完全ê祭司頭。In-ūi lu̍t-hoat siat-li̍p nńg-chiáⁿ ê lâng chòe chè-si-thâu; to̍k-to̍k lu̍t-hoat āu chiù-chōa ê ōe siat-li̍p Kiáⁿ, éng-oán chòe oân-choân ê chè-si-thâu.

1Taⁿ阮所講其中第一要緊ê，就是咱有親像chit號ê祭司頭，已經坐tī天頂大威嚴ê寶座ê大pêng，Taⁿ goán só͘ kóng kî-tiong tē it iàu-kín ê, chiū-sī lán ū chhin-chhiūⁿ chit hō ê chè-si-thâu, í-keng chē tī thiⁿ-téng tōa ui-giâm ê pó-chō ê tōa pêng,

2伊做聖所kap真ê會幕ê差用，chit-ê會幕是主所設ê，m̄是人所設ê。I chòe sèng-só͘ kap chin ê hōe-bō͘ ê chhe-ēng, chit ê hōe-bō͘ sī Chú só͘ siat ê, m̄ sī lâng só͘ siat ê.

3凡若祭司頭lóng為tio̍h獻禮物kap祭祀來設立:所以chit-ê祭司頭亦的確tio̍h有所獻。Hoān-nā chè-si-thâu lóng ūi-tio̍h hiàn lé-mi̍h kap chè-sū lâi siat-li̍p: só͘-í chit ê chè-si-thâu ia̍h tek-khak tio̍h ū só͘ hiàn.

4設使伊tī地裡，就無做祭司，因為已經有照律法teh獻禮物ê；Siat-sú I tī tōe-ni̍h, chiū bô chòe chè-si, in-ūi í-keng ū chiàu lu̍t-hoat teh hiàn lé-mi̍h ê;

5in所用來服事ê，就是天裡ê物ê像kap影；親像摩西beh造會幕ê時，受tio̍h命令，講，你tio̍h謹慎，照tī山頂所指示你ê款式，來造ta̍k項物。in só͘ ēng lâi ho̍k-sāi ê, chiū-sī thiⁿ-ni̍h ê mi̍h ê siōng kap iáⁿ; chhin-chhiūⁿ Mô͘-se beh chō hōe-bō͘ ê sî, siū-tio̍h bēng-lēng, kóng, Lí tio̍h kín-sīn, chiàu tī soaⁿ-téng só͘ chí-sī lí ê khoán-sit, lâi chō ta̍k hāng mi̍h.

6Taⁿ耶穌已經得tio̍h khah尊貴ê職，是伊做koh-khah好ê約ê中保，就是用koh-khah好ê應允來設立ê。Taⁿ Iâ-so͘ í-keng tit-tio̍h khah chun-kùi ê chit, sī I chòe koh khah hó ê iok ê tiong-pó, chiū-sī ēng koh khah hó ê èng-ún lâi siat-li̍p ê.

7因為頭一個約若無thang嫌，就無想beh立第二ê約。In-ūi thâu chi̍t ê iok nā bô thang hiâm, chiū bô siūⁿ beh li̍p tē jī ê iok.

8因為有嫌in，就講， 主講，你看，時日beh到， 我beh kap以色列家，以及猶大家，成立新ê約；In-ūi ū hiâm in, chiū kóng, Chú kóng, Lí khòaⁿ, sî-ji̍t beh kàu, Góa beh kap Í-sek-lia̍t ke, í-ki̍p Iû-tāi ke, sêng-li̍p sin ê iok;

9m̄是照我kap in列祖所立ê約， 就是tī牽in ê手，chhōa in出埃及地ê時，所立ê； 因為in無常常守我ê約， 我也無看顧in： 這是主所講ê。M̄ sī chiàu góa kap in lia̍t-chó͘ só͘ li̍p ê iok, Chiū-sī tī khan in ê chhiú, chhōa in chhut Ai-ki̍p tōe ê sî, só͘ li̍p ê; In-ūi in bô siông-siông siú góa ê iok, Góa iā bô khòaⁿ-kò͘ in: che sī Chú só͘ kóng ê.

10主koh講，Chiah-ê日了後， 我kap以色列家所beh立ê約是chit-ê， 就是我beh將我ê律法hē tī in ê頭腦， 刻tī in ê心：我beh做in ê上帝， In beh做我ê百姓:Chú koh kóng, Chiah ê ji̍t liáu-āu, Góa kap Í-sek-lia̍t ke só͘ beh li̍p ê iok sī chit-ê, Chiū-sī góa beh chiong góa ê lu̍t-hoat hē tī in ê thâu-náu, Khek tī in ê sim: Góa beh chòe in ê Siōng-tè, In beh chòe góa ê peh-sìⁿ:

11In ta̍k人將來無教示in本城ê百姓， Kap in ta̍k人ê兄弟，講，你tio̍h bat主: 因為tùi細到大，in lóng beh bat我。In ta̍k lâng chiong-lâi bô kà-sī in pún siâⁿ ê peh-sìⁿ, Kap in ta̍k lâng ê hiaⁿ-tī, kóng, Lí tio̍h bat Chú: In-ūi tùi sòe kàu tōa, in lóng beh bat góa.

12因為我beh憐憫in ê不義， 無koh記念in ê罪惡。In-ūi góa beh lîn-bín in ê put-gī, Bô koh kì-liām in ê chōe-ok.

13既然有講新ê，就是hō͘前ê約做舊。凡若舊來衰退ê就是將近無去。Kì-jiân ū kóng sin-ê, chiū-sī hō͘ chêng ê iok chòe kū. Hoān-nā kū lâi soe-thè ê chiū-sī chiong-kūn bô-khì.