1因為chit-ê Be̍k-ki-sé-tek，就是Sat-léng王，也是至koân上帝ê祭司，早tú-tio̍h亞伯拉罕thâi贏chiah-ê王tò來ê時，kā伊祝福ê，In-ūi chit ê Be̍k-ki-sé-tek, chiū-sī Sat-léng ông, iā sī chì-koâiⁿ Siōng-tè ê chè-si, chá tú-tio̍h A-pek-la̍h-hán thâi-iâⁿ chiah ê ông tò-lâi ê sî, kā i chiok-hok ê,

2亞伯拉罕亦將一切所得tio̍h ê，抽十份一hō͘伊(伊ê名翻譯就是義ê王，koh是Sat-léng王，就是平安王；A-pek-la̍h-hán ia̍h chiong it-chhè só͘ tit-tio̍h ê, thiu cha̍p hūn chi̍t hō͘ i (i ê miâ hoan-e̍k chiū-sī gī ê Ông, koh sī Sat-léng Ông, chiū-sī pêng-an Ông;

3伊無父無母，無世系，無時日ê起頭，無活命ê路尾，是親像上帝ê Kiáⁿ)久長teh做祭司。i bô pē bô bú, bô sè-hē, bô sî-ji̍t ê khí-thâu, bô oa̍h-miā ê lō͘-bé, sī chhin-chhiūⁿ Siōng-tè ê Kiáⁿ) kú-tn̂g teh chòe chè-si.

4試想先祖亞伯拉罕將所得tio̍h上等ê物，抽十份一hō͘伊，就hit人尊貴到怎樣，Chhì-siūⁿ sian-chó͘ A-pek-la̍h-hán chiong só͘ tit-tio̍h siōng-téng ê mi̍h, thiu cha̍p hūn chi̍t hō͘ i, chiū hit lâng chun-kùi kàu cháiⁿ-iūⁿ,

5Taⁿ利未ê kiaⁿ孫擔當祭司ê chit-ê，雖然kap百姓lóng是亞伯拉罕ê後裔，平平是兄弟，iáu-kú奉命令，照律法tùi百姓the̍h十份一；Taⁿ Lī-bī ê kiáⁿ-sun tam-tng chè-si ê chit ê, sui-jiân kap peh-sìⁿ lóng sī A-pek-la̍h-hán ê hō͘-è, pîⁿ-pîⁿ sī hiaⁿ-tī, iáu-kú hōng bēng-lēng, chiàu lu̍t-hoat tùi peh-sìⁿ the̍h cha̍p hūn chi̍t;

6總是hit-ê無屬利未ê世系ê，bat tùi亞伯拉罕the̍h十份一，koh kā得tio̍h chiah-ê應允ê祝福。chóng-sī hit ê bô sio̍k Lī-bī ê sè-hē ê, bat tùi A-pek-la̍h-hán the̍h cha̍p hūn chi̍t, koh kā tit-tio̍h chiah ê èng-ún ê chiok-hok.

7獨獨序細hō͘序大祝福，這是無thang辯駁。To̍k-to̍k sī-sòe hō͘ sī-tōa chiok-hok, che sī bô thang piān-pok.

8Taⁿ tī chia the̍h十份一ê，lóng是會死ê人；但是tī hia是hit-ê有受干證講，伊是活ê。Taⁿ tī chia the̍h cha̍p hūn chi̍t ê, lóng sī ōe sí ê lâng; nā-sī tī hia sī hit-ê ū siū kan-chèng kóng, i sī oa̍h ê.

9Koh也會講得，連the̍h十份一ê利未也bat在tī亞伯拉罕來納十份一；Koh iā ōe kóng-tit, liân the̍h cha̍p hūn chi̍t ê Lī-bī iā bat chāi-tī A-pek-la̍h-hán lâi la̍p cha̍p hūn chi̍t;

10因為Be̍k-ki-sé-tek tú-tio̍h亞伯拉罕ê時，利未iáu-kú tī in祖ê身軀。in-ūi Be̍k-ki-sé-tek tú-tio̍h A-pek-la̍h-hán ê sî, Lī-bī iáu-kú tī in chó͘ ê sin-khu.

11早百姓受律法，是tī利未族祭司ê職任下；若tùi伊能得tio̍h完全，就mih-sái另外koh興起一個祭司，照Be̍k-ki-sé-tek ê班列，無講照亞倫ê班列ah？Chá peh-sìⁿ siū lu̍t-hoat, sī tī Lī-bī cho̍k chè-si ê chit-jīm ē; nā tùi i ōe tit-tio̍h oân-choân, chiū mih-sái lēng-gōa koh heng-khí chi̍t ê chè-si, chiàu Be̍k-ki-sé-tek ê pan-lia̍t, bô kóng chiàu A-lûn ê pan-lia̍t ah?

12因為祭司ê職已經改換，就律法亦的確tio̍h改換。In-ūi chè-si ê chit í-keng kóe-ōaⁿ, chiū lu̍t-hoat ia̍h tek-khak tio̍h kóe-ōaⁿ.

13因為chiah-ê話所指ê，是屬tī別個支派，in中間未bat有人跟隨tī祭壇。In-ūi chiah ê ōe só͘ chí ê, sī sio̍k tī pa̍t ê chi-phài, in tiong-kan bē bat ū lâng kun-sûi tī chè-tôaⁿ.

14是咱ê主明明tùi猶大出；論chit-ê支派，摩西未bat提起祭司ê職。Sī lán ê Chú bêng-bêng tùi Iû-tāi chhut; lūn chit ê chi-phài, Mô͘-se bē bat thê-khí chè-si ê chit.

15Koh若照Be̍k-ki-sé-tek ê款式，有興起別個祭司；Koh nā chiàu Be̍k-ki-sé-tek ê khoán-sit, ū heng-khí pa̍t ê chè-si;

16m̄是照肉體誡命ê法來設立，是照bōe毀壞ê活命ê權能，就頂面所講ê你嶄然khah明。m̄ sī chiàu jio̍k-thé kài-bēng ê hoat lâi siat-li̍p, sī chiàu bōe húi-hoāi ê oa̍h-miā ê koân-lêng, chiū téng-bīn só͘ kóng ê lí chám-jiân khah bêng.

17因為有干證伊講， 你永永做祭司， 照Be̍k-ki-sé-tek ê班列。In-ūi ū kan-chèng I kóng, Lí éng-éng chòe chè-si, Chiàu Be̍k-ki-sé-tek ê pan-lia̍t.

18因為前ê誡命廢無，是為tio̍h伊ê軟弱kap無利益，In-ūi chêng ê kài-bēng hòe-bô, sī ūi-tio̍h i ê loán-jio̍k kap bô lī-ek,

19(因為律法無做一項到完全)chiah設立koh-khah好ê ǹg望，就是咱所tùi伊來親近上帝ê。(in-ūi lu̍t-hoat bô chòe chi̍t hāng kàu oân-choân) chiah siat-li̍p koh khah hó ê ǹg-bāng, chiū-sī lán só͘ tùi i lâi chhin-kūn Siōng-tè ê.

20Koh因為伊m̄是無tùi chiù-chōa來設立；Koh in-ūi I m̄ sī bô tùi chiù-chōa lâi siat-li̍p;

21(in hiah-ê立做祭司無tùi chiù-chōa；獨獨chit-ê就tùi chiù-chōa，因為設立伊ê有kā伊講， 主chiù-chōa，無退悔， 你永永做祭司:)(in hiah-ê li̍p chòe chè-si bô tùi chiù-chōa; to̍k-to̍k chit-ê chiū tùi chiù-chōa, in-ūi siat-li̍p I ê ū kā I kóng, Chú chiù-chōa, bô thè-hóe, Lí éng-éng chòe chè-si:)

22親像án-ni，耶穌做koh-khah好ê約ê保認。Chhin-chhiūⁿ án-ni, Iâ-so͘ chòe koh khah hó ê iok ê pó-jīn.

23Hiah-ê做祭司ê，因為hō͘死阻隔，bōe會久長，所以tio̍h真chōe人；Hiah ê chòe chè-si ê, in-ūi hō͘ sí chó͘-keh, bōe-ōe kú-tn̂g, só͘-í tio̍h chin chōe lâng;

24獨獨chit-ê，因為永永tī-teh，有bōe改換ê祭司職。to̍k-to̍k chit-ê, in-ūi éng-éng tī-teh, ū bōe kóe-ōaⁿ ê chè-si chit.

25所以凡若tùi伊就近上帝ê人，伊能救in到完全，因為伊長長活，來替in祈求。Só͘-í hoān-nā tùi I chiū-kūn Siōng-tè ê lâng, I ōe kiù in kàu oân-choân, in-ūi I tn̂g-tn̂g oa̍h, lâi thòe in kî-kiû.

26因為chit號ê祭司頭合咱ê欠用；伊是聖，無pháiⁿ，無lâ-sâm，離開罪人，成做khah高chiah-ê天；In-ūi chit hō ê chè-si-thâu ha̍p lán ê khiàm-ēng; I sī sèng, bô pháiⁿ, bô lâ-sâm, lī-khui chōe-jîn, chiâⁿ-chòe khah koâiⁿ chiah ê thiⁿ;

27伊m̄免親像hiah-ê祭司頭，tio̍h日日事先為tio̍h家己ê罪，後來為tio̍h百姓ê罪，來獻祭；因為伊獻本身，就做一下成chit-ê事。I m̄ bián chhin-chhiūⁿ hiah ê chè-si-thâu, tio̍h ji̍t-ji̍t tāi-seng ūi-tio̍h ka-kī ê chōe, āu-lâi ūi-tio̍h peh-sìⁿ ê chōe, lâi hiàn-chè; in-ūi I hiàn pún-sin, chiū chòe chi̍t-ē chiâⁿ chit ê sū.

28因為律法設立軟chiáⁿ ê人做祭司頭；獨獨律法後chiù-chōa ê話設立Kiáⁿ，永遠做完全ê祭司頭。In-ūi lu̍t-hoat siat-li̍p nńg-chiáⁿ ê lâng chòe chè-si-thâu; to̍k-to̍k lu̍t-hoat āu chiù-chōa ê ōe siat-li̍p Kiáⁿ, éng-oán chòe oân-choân ê chè-si-thâu.

1Taⁿ阮所講其中第一要緊ê，就是咱有親像chit號ê祭司頭，已經坐tī天頂大威嚴ê寶座ê大pêng，Taⁿ goán só͘ kóng kî-tiong tē it iàu-kín ê, chiū-sī lán ū chhin-chhiūⁿ chit hō ê chè-si-thâu, í-keng chē tī thiⁿ-téng tōa ui-giâm ê pó-chō ê tōa pêng,

2伊做聖所kap真ê會幕ê差用，chit-ê會幕是主所設ê，m̄是人所設ê。I chòe sèng-só͘ kap chin ê hōe-bō͘ ê chhe-ēng, chit ê hōe-bō͘ sī Chú só͘ siat ê, m̄ sī lâng só͘ siat ê.

3凡若祭司頭lóng為tio̍h獻禮物kap祭祀來設立:所以chit-ê祭司頭亦的確tio̍h有所獻。Hoān-nā chè-si-thâu lóng ūi-tio̍h hiàn lé-mi̍h kap chè-sū lâi siat-li̍p: só͘-í chit ê chè-si-thâu ia̍h tek-khak tio̍h ū só͘ hiàn.

4設使伊tī地裡，就無做祭司，因為已經有照律法teh獻禮物ê；Siat-sú I tī tōe-ni̍h, chiū bô chòe chè-si, in-ūi í-keng ū chiàu lu̍t-hoat teh hiàn lé-mi̍h ê;

5in所用來服事ê，就是天裡ê物ê像kap影；親像摩西beh造會幕ê時，受tio̍h命令，講，你tio̍h謹慎，照tī山頂所指示你ê款式，來造ta̍k項物。in só͘ ēng lâi ho̍k-sāi ê, chiū-sī thiⁿ-ni̍h ê mi̍h ê siōng kap iáⁿ; chhin-chhiūⁿ Mô͘-se beh chō hōe-bō͘ ê sî, siū-tio̍h bēng-lēng, kóng, Lí tio̍h kín-sīn, chiàu tī soaⁿ-téng só͘ chí-sī lí ê khoán-sit, lâi chō ta̍k hāng mi̍h.

6Taⁿ耶穌已經得tio̍h khah尊貴ê職，是伊做koh-khah好ê約ê中保，就是用koh-khah好ê應允來設立ê。Taⁿ Iâ-so͘ í-keng tit-tio̍h khah chun-kùi ê chit, sī I chòe koh khah hó ê iok ê tiong-pó, chiū-sī ēng koh khah hó ê èng-ún lâi siat-li̍p ê.

7因為頭一個約若無thang嫌，就無想beh立第二ê約。In-ūi thâu chi̍t ê iok nā bô thang hiâm, chiū bô siūⁿ beh li̍p tē jī ê iok.

8因為有嫌in，就講， 主講，你看，時日beh到， 我beh kap以色列家，以及猶大家，成立新ê約；In-ūi ū hiâm in, chiū kóng, Chú kóng, Lí khòaⁿ, sî-ji̍t beh kàu, Góa beh kap Í-sek-lia̍t ke, í-ki̍p Iû-tāi ke, sêng-li̍p sin ê iok;

9m̄是照我kap in列祖所立ê約， 就是tī牽in ê手，chhōa in出埃及地ê時，所立ê； 因為in無常常守我ê約， 我也無看顧in： 這是主所講ê。M̄ sī chiàu góa kap in lia̍t-chó͘ só͘ li̍p ê iok, Chiū-sī tī khan in ê chhiú, chhōa in chhut Ai-ki̍p tōe ê sî, só͘ li̍p ê; In-ūi in bô siông-siông siú góa ê iok, Góa iā bô khòaⁿ-kò͘ in: che sī Chú só͘ kóng ê.

10主koh講，Chiah-ê日了後， 我kap以色列家所beh立ê約是chit-ê， 就是我beh將我ê律法hē tī in ê頭腦， 刻tī in ê心：我beh做in ê上帝， In beh做我ê百姓:Chú koh kóng, Chiah ê ji̍t liáu-āu, Góa kap Í-sek-lia̍t ke só͘ beh li̍p ê iok sī chit-ê, Chiū-sī góa beh chiong góa ê lu̍t-hoat hē tī in ê thâu-náu, Khek tī in ê sim: Góa beh chòe in ê Siōng-tè, In beh chòe góa ê peh-sìⁿ:

11In ta̍k人將來無教示in本城ê百姓， Kap in ta̍k人ê兄弟，講，你tio̍h bat主: 因為tùi細到大，in lóng beh bat我。In ta̍k lâng chiong-lâi bô kà-sī in pún siâⁿ ê peh-sìⁿ, Kap in ta̍k lâng ê hiaⁿ-tī, kóng, Lí tio̍h bat Chú: In-ūi tùi sòe kàu tōa, in lóng beh bat góa.

12因為我beh憐憫in ê不義， 無koh記念in ê罪惡。In-ūi góa beh lîn-bín in ê put-gī, Bô koh kì-liām in ê chōe-ok.

13既然有講新ê，就是hō͘前ê約做舊。凡若舊來衰退ê就是將近無去。Kì-jiân ū kóng sin-ê, chiū-sī hō͘ chêng ê iok chòe kū. Hoān-nā kū lâi soe-thè ê chiū-sī chiong-kūn bô-khì.

1Taⁿ hit-ê前ê約亦有服事ê禮儀，kap屬世間ê聖殿。Taⁿ hit ê chêng ê iok ia̍h ū ho̍k-sāi ê lé-gî, kap sio̍k sè-kan ê sèng-tiān.

2因為有備辦會幕，頭前間叫做聖所；hit內面有燈台，kap几桌，kap排列ê餅。In-ūi ū pī-pān hōe-bō͘, thâu-chêng keng kiò-chòe Sèng-só͘; hit lāi-bīn ū teng-tâi, kap kí-toh, kap pâi-lia̍t ê piáⁿ.

3第二ê帳籬後koh有會幕，叫做至聖所；Tē jī ê tiùⁿ-lî āu koh ū hōe-bō͘, kiò chòe Chì-sèng-só͘;

4hia有金香壇，kap ka-nn̂g ê包金ê約櫃，內面有勸má-ná ê金壺，亞倫puh牙ê柺á，kap約ê石碑兩塊；hia ū kim hiuⁿ-tôaⁿ, kap ka-nn̂g ê pau-kim ê iok-kūi, lāi-bīn ū khǹg má-ná ê kim-ô͘, A-lûn puh-gê ê koáiⁿ-á, kap iok ê chio̍h-pi nn̄g tè;

5櫃頂有榮光ê Ki-lō͘-peng，遮蓋施恩所；chit幾項taⁿ請免詳細講。kūi-téng ū êng-kng ê ki-lō͘-peng, jia-khàm si-un-só͘; chit kúi hāng taⁿ chhiáⁿ bián siông-sè kóng.

6Chiah-ê物已經齊備，祭司常常入頭前間ê會幕，盡chiah-ê服事ê事；Chiah ê mi̍h í-keng chiâu-pī, chè-si siông-siông ji̍p thâu-chêng keng ê hōe-bō͘, chīn chiah ê ho̍k-sāi ê sū;

7但是第二間，只有祭司頭ta̍k年一pái家己入去，無一pái無帶血，為tio̍h本身kap百姓ê錯誤來獻；nā-sī tē jī keng, chí ū chè-si-thâu ta̍k nî chi̍t pái ka-kī ji̍p khì, bô chi̍t pái bô tòa huih, ūi-tio̍h pún-sin kap peh-sìⁿ ê chhò-gō͘ lâi hiàn;

8聖神án-ni指明，前ê會幕iáu tī-teh ê時，入chiah-ê聖所ê路猶未顯明；Sèng Sîn án-ni chí-bêng, chêng ê hōe-bō͘ iáu tī-teh ê sî, ji̍p chiah ê sèng-só͘ ê lō͘ iáu-bē hián-bêng;

9這是beh做現今ê譬喻；照án-ni有teh獻禮物祭祀，就是bōe會hō͘服事ê人照良心來得tio̍h完全ê；che sī beh chòe hiān-kim ê phì-jū; chiàu án-ni ū teh hiàn lé-mi̍h chè-sū, chiū-sī bōe-ōe hō͘ ho̍k-sāi ê lâng chiàu liông-sim lâi tit-tio̍h oân-choân ê;

10因為hiah-ê(以及lim食kap ta̍k等號ê洗)不過是做肉體ê禮儀，設立來thèng候改正ê時。in-ūi hiah-ê (í-ki̍p lim-chia̍h kap ta̍k téng-hō ê sóe) put-kò sī chòe jio̍k-thé ê lé-gî, siat-li̍p lâi thèng-hāu kái-chèng ê sî.

11Taⁿ基督已經到，做將來chiah-ê好事ê祭司頭，經過khah大khah齊全ê會幕，m̄是人ê手所起造，就是無屬tī chit世間ê，Taⁿ Ki-tok í-keng kàu, chòe chiong-lâi chiah ê hó sū ê chè-si-thâu, keng-kè khah tōa khah chiâu-chn̂g ê hōe-bō͘, m̄ sī lâng ê chhiú só͘ khí-chō, chiū-sī bô sio̍k tī chit sè-kan ê,

12伊亦m̄是用羊kap牛á ê血，就是用家己ê血，入聖所一pái就夠額，得tio̍h永遠ê贖回。I ia̍h m̄ sī ēng iûⁿ kap gû-á ê huih, chiū-sī ēng ka-kī ê huih, ji̍p sèng-só͘ chi̍t pái chiū kàu-gia̍h, tit-tio̍h éng-oán ê sio̍k-hôe.

13因為牛羊ê血，kap牛種á ê灰，hiù tī無清氣ê人，尚且能hō͘ in成聖到tī肉體清氣；In-ūi gû iûⁿ ê huih, kap gû-chéng-á ê hu, hiù tī bô chheng-khì ê lâng, siōng-chhiáⁿ ōe hō͘ in chiâⁿ sèng kàu tī jio̍k-thé chheng-khì;

14何況基督tùi永遠ê神，獻家己無瑕疵hō͘上帝，伊ê血kiám無koh-khah能清氣lín ê良心，脫離chiah-ê死ê所行，來服事真活ê上帝ah？hô-hòng Ki-tok tùi éng-oán ê Sîn, hiàn ka-kī bô hâ-chhû hō͘ Siōng-tè, I ê huih kiám bô koh khah ōe chheng-khì lín ê liông-sim, thoat-lī chiah ê sí ê só͘ kiâⁿ, lâi ho̍k-sāi chin-oa̍h ê Siōng-tè ah?

15因為án-ni，伊做新約ê中保，用死來贖前約ê時所犯ê罪過，是beh hō͘受召ê人得tio̍h永遠ê業ê應允。In-ūi án-ni, I chòe sin iok ê tiong-pó, ēng sí lâi sio̍k chêng iok ê sî só͘ hoān ê chōe-kòa, sī beh hō͘ siū tiàu ê lâng tit-tio̍h éng-oán ê gia̍p ê èng-ún.

16凡若有違命，的確tio̍h有違命ê人死ê憑據。Hoān-nā ū ûi-bēng, tek-khak tio̍h ū ûi-bēng ê lâng sí ê pîn-kù.

17因為已經死，就違命堅固；違命ê人iáu活tī-teh，就違命beh-thái有力？In-ūi í-keng sí, chiū ûi-bēng kian-kò͘; ûi-bēng ê lâng iáu oa̍h tī-teh, chiū ûi-bēng beh-thái ū la̍t?

18所以前ê約亦m̄是無用血來設立。Só͘-í chêng ê iok ia̍h m̄ sī bô ēng huih lâi siat-li̍p.

19因為摩西已經照律法將lóng總ê誡命傳hō͘眾百姓，就捧牛á kap羊ê血，以及水kap朱紅色ê綿kap牛膝草，來hiù hit本冊kap眾百姓，講，In-ūi Mô͘-se í-keng chiàu lu̍t-hoat chiong lóng-chóng ê kài-bēng thoân hō͘ chèng peh-sìⁿ, chiū phâng gû-á kap iûⁿ ê huih, í-ki̍p chúi kap chu-âng sek ê mî kap gû-chhek-chháu, lâi hiù hit pún chheh kap chèng peh-sìⁿ, kóng,

20Chit-ê就是上帝所吩咐lín ê約ê血。Chit-ê chiū-sī Siōng-tè só͘ hoan-hù lín ê iok ê huih.

21Koh亦照án-ni，用血hiù會幕kap所用來服事ê器具。Koh ia̍h chiàu án-ni, ēng huih hiù hōe-bō͘ kap só͘ ēng lâi ho̍k-sāi ê khì-kū.

22Koh照律法，ta̍k項物差不多lóng是用血hō͘伊清氣，若無流血，就無赦免。Koh chiàu lu̍t-hoat, ta̍k hāng mi̍h chha-put-to lóng sī ēng huih hō͘ i chheng-khì, nā bô lâu huih, chiū bô sià-bián.

23照天頂ê樣所做chiah-ê物，的確tio̍h用chiah-ê hō͘伊清氣；就tī天頂ê原物，tio̍h用比這khah好ê祭hō͘伊清氣。Chiàu thiⁿ-téng ê iūⁿ só͘ chòe chiah ê mi̍h, tek-khak tio̍h ēng chiah-ê hō͘ i chheng-khì; chiū tī thiⁿ-téng ê goân mi̍h, tio̍h ēng pí che khah hó ê chè hō͘ i chheng-khì.

24因為基督m̄是入人ê手所造ê聖所，做真聖所ê影像ê；就是入tī真ê天，taⁿ為tio̍h咱chiah-ê顯現tī上帝ê面前；In-ūi Ki-tok m̄ sī ji̍p lâng ê chhiú só͘ chō ê sèng-só͘, chòe chin sèng-só͘ ê iáⁿ-siōng ê; chiū-sī ji̍p tī chin ê thiⁿ, taⁿ ūi-tio̍h lán chiah-ê hián-hiān tī Siōng-tè ê bīn-chêng;

25伊亦免用家己ta̍uh-ta̍uh獻，親像hiah-ê祭司頭，ta̍k年用牛、羊ê血，入chiah-ê聖所；I ia̍h bián ēng ka-kī ta̍uh-ta̍uh hiàn, chhin-chhiūⁿ hiah ê chè-si-thâu, ta̍k nî ēng gû iûⁿ ê huih, ji̍p chiah ê sèng-só͘;

26若án-ni，就基督tùi創造世間以來，tio̍h ta̍uh-ta̍uh受苦：獨獨taⁿ tī chiah-ê世代ê路尾，伊一pái出現，獻本身做祭，來除去罪。nā án-ni, chiū Ki-tok tùi chhòng-chō sè-kan í-lâi, tio̍h ta̍uh-ta̍uh siū khó͘: to̍k-to̍k taⁿ tī chiah ê sè-tāi ê lō͘-bé, I chi̍t pái chhut-hiān, hiàn pún-sin chòe chè, lâi tû-khì chōe.

27Koh照所註定ê，人有一pái死，以後有審判；Koh chiàu só͘ chù-tiāⁿ ê, lâng ū chi̍t pái sí, í-āu ū sím-phòaⁿ;

28án-ni，基督已經一pái tú-tio̍h獻，來擔當chōe-chōe人ê罪過，beh第二pái，tùi ǹg望伊ê人出現，來救in；hit時出現kap罪無干涉。án-ni, Ki-tok í-keng chi̍t pái tú-tio̍h hiàn, lâi tam-tng chōe-chōe lâng ê chōe-kòa, beh tē jī pái, tùi ǹg-bāng I ê lâng chhut-hiān, lâi kiù in; hit sî chhut-hiān kap chōe bô kan-sia̍p.