1Hit時保護你ê百姓ê大人君，Bí-ka-le̍k，beh khiā起來；beh有大困苦ê時，tùi開國以來到hit時bē-bat有án-ni；hit時你ê百姓beh得tio̍h拯救，就是見若記tī冊裡ê。Hit-sî pó-hō͘ lí ê peh-sìⁿ ê tōa jîn-kun, Bí-ka-le̍k, beh khiā--khí-lâi; beh ū tōa khùn-khó͘ ê sî, tùi khai-kok í-lâi kàu hit-sî bē-bat ū án-ni; hit-sî lí ê peh-sìⁿ beh tit-tio̍h chín-kiù, chiū-sī kìⁿ-nā kì tī chheh--nih ê.

2睏tī土粉中ê，beh有chōe-chōe人koh醒，有ê得tio̍h永活，有ê受見笑厭惡到永遠。Khùn tī thô͘-hún-tiong--ê, beh ū chōe-chōe lâng koh chhíⁿ, ū-ê tit-tio̍h éng-oa̍h, ū ê siū kiàn-siàu iàm-ò͘ⁿ kàu éng-oán.

3智慧ê人beh發出光親像天ê光；hiah-ê hō͘ chōe-chōe人歸tī義ê，beh親像光星直到永遠。Tì-hūi ê lâng beh hoat-chhut kng chhin-chhiūⁿ thiⁿ ê kng; hiah ê hō͘ chōe-chōe lâng kui tī gī ê, beh chhin-chhiūⁿ kng-chhiⁿ ti̍t-kàu éng-oán.

4但以理ah，你tio̍h隱khǹg chiah-ê話，封密chit本冊到路尾ê時；beh有chōe-chōe人走來走去，koh見識beh加添。Tān-í-lí ah, lí tio̍h ún-khǹg chiah ê ōe, hong-ba̍t chit pún chheh kàu lō͘-bé ê sî; beh ū chōe-chōe lâng cháu-lâi cháu-khì, koh kiàn-sek beh ke-thiⁿ.

5我但以理teh看，看ah，另外有兩個khiā-teh，一個tī河chit-pêng岸，也一個tī河hit-pêng岸。Góa Tān-í-lí teh khòaⁿ, khòaⁿ ah, lēng-gōa ū nn̄g-ê khiā-teh, chi̍t-ê tī hô chit-pêng-hōaⁿ, iā chi̍t-ê tī hô hit-pêng-hōaⁿ.

6有一個kā hit-ê khiā tī河水ê頂面，穿幼苧衫ê人講，chiah-ê奇事ê結局beh到jōa久ah？Ū chi̍t-ê kā hit ê khiā tī hô-chúi ê téng-bīn, chhēng iù-tōe-saⁿ ê lâng kóng, Chiah ê kî-sū ê kiat-kio̍k beh kàu jōa-kú ah?

7我聽見hit-ê khiā tī河水ê頂面，穿幼苧衫ê人，kia̍h起伊ê chiàⁿ手tò手ǹg天，kí永活ê主來chiù-chōa，講，beh到一個時期，兩個時期，koh半時期；破壞聖ê百姓ê權力ê時，chiah-ê一切ê事lóng beh做完。Góa thiaⁿ-kìⁿ hit ê khiā tī hô-chúi ê téng-bīn, chhēng iù-tōe-saⁿ ê lâng, kia̍h-khí i ê chiàⁿ-chhiú tò-chhiú ǹg-thiⁿ, kí éng-oa̍h ê Chú lâi chiù-chōa, kóng, beh kàu chi̍t ê sî-kî, nn̄g ê sî-kî, koh pòaⁿ-sî-kî; phò-hoāi sèng ê peh-sìⁿ ê koân-le̍k ê sî, chiah ê it-chhè ê sū lóng beh chòe-oân.

8我聽見也無明白，就講，我ê主ah，chiah-ê事ê結局是怎樣？Góa thiaⁿ-kìⁿ iā bô bêng-pe̍k, chiū kóng, Góa ê chú ah, chiah ê sū ê kiat-kio̍k sī cháiⁿ-iūⁿ?

9伊講，但以理ah，你做你去；因為chiah-ê話已經隱khǹg封密，到tī路尾ê時。I kóng, Tān-í-lí ah, lí chòe lí khì; in-ūi chiah ê ōe í-keng ún-khǹg hong-ba̍t, kàu tī lō͘-bé ê sî.

10Beh有chōe-chōe人家己清氣到白白，koh受鍛鍊；總是pháiⁿ人猶原beh行pháiⁿ；一切pháiⁿ人bōe明白，獨獨智慧ê人會明白。Beh ū chōe-chōe lâng ka-kī chheng-khì kàu pe̍h-pe̍h, koh siū thoàn-liān; chóng-sī pháiⁿ-lâng iû-goân beh kiâⁿ pháiⁿ; it-chhè pháiⁿ-lâng bōe bêng-pe̍k, to̍k-to̍k tì-hūi ê lâng ōe bêng-pe̍k.

11Tùi除去日日所獻ê祭祀，也khiā hit-ê殘害可惡ê物ê時，beh有一千兩百九十日。Tùi tû-khì ji̍t-ji̍t só͘ hiàn ê chè-sū, iā khiā hit ê chân-hāi khó-ò͘ⁿ ê mi̍h ê sî, beh ū chi̍t-chheng nn̄g-pah káu-cha̍p ji̍t.

12見若thèng候koh到一千三百三十五日ê，hit-ê人有福氣。Kìⁿ-nā thèng-hāu koh kàu chi̍t-chheng saⁿ-pah saⁿ-cha̍p-gō͘ ji̍t ê, hit ê lâng ū hok-khì.

13總是你tio̍h去到路尾ê時；因為你beh安歇，到路尾ê時你beh khiā tī你ê地位。Chóng-sī lí tio̍h khì kàu lō͘-bé ê sî; in-ūi lí beh an-hioh, kàu lō͘-bé ê sî lí beh khiā tī lí ê tē-ūi.

1當O͘-se-ngá、Iok-thán、A-hap-su、Hi-se-ka相續做猶大王，Iok-a-si ê kiáⁿ Iâ-lô-pho-àm做以色列王ê時，耶和華ê話臨到Pī-lī ê kiáⁿ何西阿。Tng O͘-se-ngá, Iok-thán, A-hap-su, Hi-se-ka saⁿ-sòa chòe Iû-tāi ông, Iok-a-si ê kiáⁿ Iâ-lô-pho-àm chòe Í-sek-lia̍t ông ê sî, Iâ-hô-hoa ê ōe lîm-kàu Pī-lī ê kiáⁿ Hô-se-a.

2耶和華起頭對何西阿講ê話是án-ni。耶和華對何西阿講，你tio̍h去娶淫婦做bó͘，也得tio̍h tùi淫亂所生ê kiáⁿ；因為chit-ê地方大行淫亂，離開耶和華。Iâ-hô-hoa khí-thâu tùi Hô-se-a kóng ê ōe sī án-ni. Iâ-hô-hoa tùi Hô-se-a kóng, Lí tio̍h khì chhōa îm-hū chòe bó͘, iā tit-tio̍h tùi îm-loān só͘ siⁿ ê kiáⁿ; in-ūi chit-ê tōe-hng tōa kiâⁿ îm-loān, lī-khui Iâ-hô-hoa.

3Tùi án-ni，伊就去娶Tek-la̍h-im ê cha-bó͘-kiáⁿ Ko-bia̍t；婦人人懷孕，kā伊生一個kiáⁿ。Tùi án-ni i chiū khì chhōa Tek-la̍h-im ê cha-bó͘-kiáⁿ Ko-bia̍t; hū-jîn-lâng hoâi-īn, kā i siⁿ chi̍t ê kiáⁿ.

4耶和華對伊講，kā伊名叫Iâ-su-lia̍t；因為koh tiap-á久，我beh辦Iâ-hō͘ ê家tī Iâ-su-lia̍t thâi人流血ê罪，也beh hō͘以色列家ê國無去。Iâ-hô-hoa tùi i kóng, Kā i miâ kiò Iâ-su-lia̍t; in-ūi koh tiap-á-kú, Góa beh pān Iâ-hō͘ ê ke tī Iâ-su-lia̍t thâi-lâng lâu-huih ê chōe, iā beh hō͘ Í-sek-lia̍t-ke ê kok bô--khì.

5到hit日，我beh tī Iâ-su-lia̍t平洋，at折以色列ê弓。Kàu hit-ji̍t Góa beh tī Iâ-su-lia̍t pîⁿ-iûⁿ, at-chi̍h Í-sek-lia̍t ê keng.

6婦人人koh懷孕，生一個cha-bó͘-kiáⁿ；耶和華對何西阿講，kā伊號名Lô-lō͘-hap-má，因為我無beh koh憐憫以色列家，決斷無赦免in。Hū-jîn-lâng koh hoâi-īn, siⁿ chi̍t-ê cha-bó͘-kiáⁿ; Iâ-hô-hoa tùi Hô-se-a kóng, Kā i hō-miâ Lô-lō͘-hap-má, in-ūi Góa bô beh koh lîn-bín Í-sek-lia̍t-ke, koat-toàn bô sià-bián in.

7總是我beh憐憫猶大家，用耶和華in ê上帝救in，m̄是用弓，用刀，用交戰，用馬，kap用馬兵來救in。Chóng-sī Góa beh lîn-bín Iû-tāi-ke, ēng Iâ-hô-hoa in ê Siōng-tè kiù in, m̄-sī ēng keng, ēng to, ēng kau-chiàn, ēng bé, kap ēng bé-peng lâi kiù in.

8Lô-lō͘-hap-má斷奶了後，婦人人koh懷孕，生一個kiáⁿ。Lô-lō͘-hap-má tn̄g-lin liáu-āu, hū-jîn-lâng koh hoâi-īn, siⁿ chi̍t ê kiáⁿ.

9耶和華講，Tio̍h kā伊號名叫Lô-a-bí；因為lín m̄是我ê百姓，我也m̄做lín ê上帝。Iâ-hô-hoa kóng, Tio̍h kā i hō-miâ kiò Lô-a-bí; in-ūi lín m̄-sī Góa ê peh-sìⁿ, Góa iā m̄-chòe lín ê Siōng-tè.

10總是以色列ê人額beh親像海沙，bōe 量得，bōe算得；前tī甚麼所在對in講，Lín m̄是我ê百姓，將來tī-hia beh對in講，Lín是永活上帝ê kiáⁿ。Chóng-sī Í-sek-lia̍t ê lâng-gia̍h beh chhin-chhiūⁿ hái-soa, bōe niû--tit, bōe sǹg--tit; chêng tī sím-mi̍h só͘-chāi tùi in kóng, Lín m̄-sī Góa ê peh-sìⁿ, chiong-lâi tī-hia beh tùi in kóng, Lín sī éng-oa̍h Siōng-tè ê kiáⁿ.

11猶大人kap以色列人beh相kap聚集，為家己設立一個頭人，tùi chit-ê地上去；因為Iâ-su-lia̍t ê日beh做大ê日。Iû-tāi lâng kap Í-sek-lia̍t lâng beh saⁿ-kap chū-chi̍p, ūi ka-kī siat-li̍p chi̍t ê thâu-lâng, tùi chit ê tōe chiūⁿ--khì; in-ūi Iâ-su-lia̍t ê ji̍t beh chòe tōa ê ji̍t.

1Tio̍h 對 lín ê兄弟講，A-bí，koh 對 lín ê姊妹講，Lō͘-hap-má。Tio̍h tùi lín ê hiaⁿ-tī kóng, A-bí, koh tùi lín ê chí-bē kóng, Lō͘-hap-má.

2Tio̍h kap lín老母辯論，koh辯論；因為伊m̄是我ê bó͘，我也m̄是伊ê丈夫；kah伊除去面裡ê淫亂，kap伊胸坎ê淫行；Tio̍h kap lín lāu-bú piān-lūn, koh piān-lūn; in-ūi i m̄-sī Góa ê bó͘, Góa iā m̄-sī i ê tiōng-hu; kah i tû--khì bīn--nih ê îm-loān, kap i heng-khám ê îm-hēng;

3免得我kā伊thǹg光光，hō͘伊親像tú-á出世ê日，hō͘伊親像曠野，親像乾燥ê地，hō͘伊tùi嘴乾來死。bián-tit Góa kā i thǹg kng-kng, hō͘ i chhin-chhiūⁿ tú-á chhut-sì ê ji̍t, hō͘ i chhin-chhiūⁿ khòng-iá, chhin-chhiūⁿ ta-sò ê tōe, hō͘ i tùi chhùi-ta lâi sí.

4我無beh憐憫伊ê kiáⁿ，因為in是tùi淫亂生ê kiáⁿ。Góa bô beh lîn-bín i ê kiáⁿ, in-ūi in sī tùi îm-loān siⁿ ê kiáⁿ.

5因為in ê老母行淫亂；懷孕ê做出見笑事；因為伊講，我beh tè我所戀愛ê人，我ê餅、水、羊毛、麻、油kap我所lim-ê，lóng是in hō͘我。In-ūi in ê lāu-bú kiâⁿ îm-loān; hoâi-īn--ê chòe-chhut kiàn-siàu sū; in-ūi i kóng, Góa beh tè góa só͘ loân-ài ê lâng, góa ê piáⁿ, chúi, iûⁿ-mn̂g, môa, iû kap góa só͘ lim--ê, lóng sī in hō͘ góa.

6看ah，因為án-ni，我beh用刺á阻塞伊ê路，作牆hō͘伊chhē無伊ê路。Khòaⁿ ah, in-ūi án-ni, Góa beh ēng chhì-á chó͘-that i ê lō͘, choh-chhiûⁿ hō͘ i chhē-bô i ê lō͘.

7伊beh追jip所戀愛ê人，若是jip-bōe-tio̍h，伊beh chhē in，總是chhē-bōe-tio̍h；就講，我beh tò去chhē我ê本夫，因為我hit時ê景況比現今iáu khah好。I beh tui-jip só͘ loân-ài ê lâng, nā-sī jip-bōe-tio̍h, i beh chhē in, chóng-sī chhē-bōe-tio̍h; chiū kóng, Góa beh tò-khì chhē góa ê pún-hu, in-ūi góa hit-sî ê kéng-hóng pí hiān-kim iáu khah-hó.

8伊m̄知伊ê五穀、酒、油，是我hō͘伊；加添伊ê銀kap金ê，也是我；伊用chiah-ê服事Pa-le̍k。I m̄-chai i ê ngó͘-kok, chiú, iû, sī Góa hō͘ i; ke-thiⁿ i ê gûn kap kim--ê, iā sī Góa; i ēng chiah-ê ho̍k-sāi Pa-le̍k.

9所以到收割ê日，我beh將我ê五穀tùi in the̍h倒tńg；koh tī出酒ê時，beh將我ê新酒the̍h倒tńg，也beh將我hō͘伊thang遮赤theh ê羊毛kap麻，搶倒tńg。Só͘-í kàu siu-koah ê ji̍t, Góa beh chiong Góa ê ngó͘-kok tùi in the̍h tò-tńg; koh tī chhut-chiú ê sî, beh chiong Góa ê sin-chiú the̍h tò-tńg, iā beh chiong Góa hō͘ i thang jia chhiah-theh ê iûⁿ-mn̂g kap môa, chhiúⁿ tò-tńg.

10Taⁿ我beh tī伊所戀愛ê人ê目睭前，露出伊ê淫行；的確無人能救伊脫離我ê手。Taⁿ Góa beh tī i só͘ loân-ài ê lâng ê ba̍k-chiu-chêng, lō͘-chhut i ê îm-hēng; tek-khak bô lâng ōe kiù i thoat-lī Góa ê chhiú.

11我beh soah in hiah-ê宴樂、節筵、月ê初一、安歇日，kap lóng總ê節期。Góa beh soah in hiah ê iàn-lo̍k, choeh-iân, ge̍h ê chhoe-it, an-hioh-ji̍t, kap lóng-chóng ê choeh-kî.

12我也beh毀壞伊ê葡萄樹，kap無花果樹，就是講，這是hiah-ê戀愛我ê hō͘我ê禮數；我beh hō͘ hiah-ê變做樹林，hō͘野獸食伊。Góa iā beh húi-hoāi i ê phû-tô-chhiū, kap bû-hoa-kó chhiū, chiū-sī kóng, Che sī hiah-ê loân-ài góa--ê hō͘ góa ê lé-sò͘; Góa beh hō͘ hiah-ê piàn-chòe chhiū-nâ, hō͘ iá-siù chia̍h--i.

13伊前日燒香服事chiah-ê Pa-le̍k，koh用耳鉤kap別號首飾家己裝飾，tè伊相戀愛ê人，來bōe記得我；因為án-ni我beh辦伊。這是耶和華講ê。I chêng-ji̍t sio-hiuⁿ ho̍k-sāi chiah ê Pa-le̍k, koh ēng hī-kau kap pa̍t-hō siú-sek ka-kī chng-thāⁿ, tè i saⁿ-loân-ài ê lâng, lâi bōe-kì-tit Góa; in-ūi án-ni Góa beh pān--i. Che sī Iâ-hô-hoa kóng--ê.

14看ah，我beh招呼伊，chhōa伊到曠野，用話安慰伊。Khòaⁿ ah, Góa beh chio-ho͘ i, chhōa i kàu khòng-iá, ēng ōe an-ùi i.

15我也beh tùi-hia賞賜伊葡萄園，koh賞賜伊A-kat ê山谷做ǹg望ê門；伊beh tī-hia應聲，kap少年ê日無各樣，kap tùi埃及地上來ê日相同。Góa iā beh tùi-hia siúⁿ-sù i phû-tô-hn̂g, koh siúⁿ-sù i A-kat ê soaⁿ-kok chòe ǹg-bāng ê mn̂g; i beh tī-hia ìn-siaⁿ, kap siàu-liân ê ji̍t bô koh-iūⁿ, kap tùi Ai-ki̍p tōe chiūⁿ-lâi ê ji̍t saⁿ-tâng.

16耶和華講，當hit日你beh叫我講，我ê丈夫ah，無koh叫我講，我ê主ah。Iâ-hô-hoa kóng, Tng hit-ji̍t lí beh kiò Góa kóng, Góa ê tiōng-hu ah, bô koh kiò Góa kóng, Góa ê Chú ah.

17因為我beh tùi in ê嘴除去chiah-ê Pa-le̍k ê名，無koh用chit-ê名記念伊。In-ūi Góa beh tùi in ê chhùi tû--khì chiah ê Pa-le̍k ê miâ, bô koh ēng chit ê miâ kì-liām i.

18當hit日，我beh為tio̍h in，kap田野ê走獸，kap空中ê飛鳥，以及地上ê蟲thōa立約；我也beh tùi chit-ê地方at折弓、刀，交戰，hō͘ in安然倒teh睏。Tng hit-ji̍t Góa beh ūi-tio̍h in, kap chhân-iá ê cháu-siù, kap khong-tiong ê pe-chiáu, í-ki̍p tōe-chiūⁿ ê thâng-thōa li̍p-iok; Góa iā beh tùi chit ê tōe-hng at-chi̍h keng, to, kau-chiàn, hō͘ in an-jiân tó-teh khùn.

19我beh聘定你永遠歸tī我，koh我beh用公義、公平、慈愛、憐憫，聘定你歸我。Góa beh phèng-tiāⁿ lí éng-oán kui tī Góa, koh Góa beh ēng kong-gī, kong-pêng, chû-ài, lîn-bín, phèng-tiāⁿ lí kui Góa.

20我也beh用誠實聘定你歸我，你就beh bat耶和華。Góa iā beh ēng sêng-si̍t phèng-tiāⁿ lí kui Góa, lí chiū beh bat Iâ-hô-hoa.

21耶和華講，hit日我beh應答，我beh應答天，天beh應答地；Iâ-hô-hoa kóng, Hit-ji̍t Góa beh ìn-tap, Góa beh ìn-tap thiⁿ, thiⁿ beh ìn-tap tōe;

22地beh應答五穀、酒、油，chiah-ê beh應答Iâ-su-lia̍t。tōe beh ìn-tap gō͘-kak, chiú, iû, chiah-ê beh ìn-tap Iâ-su-lia̍t.

23我beh為家己栽種伊tī chit-ê地；平素無得tio̍h憐憫ê，我beh憐憫伊；m̄是我ê百姓ê，我beh對伊講，你是我ê百姓，伊也beh講，祢是我ê上帝。Góa beh ūi ka-kī chai-chèng i tī chit ê tōe; pêng-sò͘ bô tit-tio̍h lîn-bín--ê, Góa beh lîn-bín--i; m̄-sī Góa ê peh-sìⁿ--ê, Góa beh tùi i kóng, Lí sī Góa ê peh-sìⁿ, i iā beh kóng, Lí sī góa ê Siōng-tè.