1以色列ah，莫得歡喜，莫得快樂親像外邦人；因為你行邪淫離開你ê上帝；tī ta̍k-ê五穀場ài人送物。Í-sek-lia̍t ah, bo̍h-tit hoaⁿ-hí, bo̍h-tit khoài-lo̍k chhin-chhiūⁿ gōa-pang lâng; in-ūi lí kiâⁿ siâ-îm lī-khui lí ê Siōng-tè; tī ta̍k ê gō͘-kak-tiûⁿ ài lâng sàng-mi̍h.

2五穀場kap酒窟無beh養飼in；ǹg望新酒也空空。Gō͘-kak-tiûⁿ kap chiú-khut bô beh iúⁿ-chhī in; ǹg-bāng sin-chiú iā khang-khang.

3In無thang khiā起耶和華ê地；總是Í-hoat-liân beh tò去埃及，beh tī亞述食無清氣ê食物。In bô thang khiā-khí Iâ-hô-hoa ê tōe; chóng-sī Í-hoat-liân beh tò-khì Ai-ki̍p, beh tī A-su̍t chia̍h bô chheng-khì ê chia̍h-mi̍h.

4In無thang ǹg耶和華奠酒；in ê祭物也無得tio̍h伊歡喜；beh親像tú-tio̍h死失ê家ê食物，見若食ê的確bak-tio̍h lâ-sâm；因為in ê食物thang做家己ê路用，bōe-thang入耶和華ê殿。In bô thang ǹg Iâ-hô-hoa tiān-chiú; in ê chè-mi̍h iā bô tit-tio̍h I hoaⁿ-hí; beh chhin-chhiūⁿ tú-tio̍h sí-sit ê ke ê chia̍h-mi̍h, kìⁿ-nā chia̍h--ê tek-khak bak-tio̍h lâ-sâm; in-ūi in ê chia̍h-mi̍h thang chòe ka-kī ê lō͘-ēng, bōe thang ji̍p Iâ-hô-hoa ê tiān.

5Tī大會ê日，kap耶和華ê節期，lín beh怎樣做ah？Tī tōa-hōe ê ji̍t, kap Iâ-hô-hoa ê choeh-kî, lín beh cháiⁿ-iūⁿ chòe ah?

6看ah，in閃避災害去；埃及人beh聚集in，Mô͘-hut人beh埋葬in；in用銀所做thang意愛ê，beh發蒺藜；in ê帳房內，beh發刺phè。Khòaⁿ ah, in siám-pī chai-hāi khì; Ai-ki̍p lâng beh chū-chi̍p in, Mô͘-hut lâng beh bâi-chòng in; in ēng gûn só͘ chòe thang ì-ài ê, beh hoat chi̍t-lê; in ê tiùⁿ-pâng-lāi, beh hoat chhì-phè.

7刑罰ê日已經到，報應ê日已經到；以色列beh知；先知愚戇，受神感動ê顛狂，因為你ê罪過真chōe，怨恨也真大。Hêng-hoa̍t ê ji̍t í-keng kàu, pò-èng ê ji̍t í-keng kàu; Í-sek-lia̍t beh chai; sian-ti gû-gōng, siū sîn kám-tōng--ê tian-kông, in-ūi lí ê chōe-kòa chin-chōe, oàn-hūn iā chin-tōa.

8Í-hoat-liân kap咱ê上帝做守望ê；論到先知，tī伊lóng總ê路做掠鳥ê羅網，tī伊ê上帝ê厝內khǹg怨恨。Í-hoat-liân kap lán ê Siōng-tè chòe siú-bāng--ê; lūn-kàu sian-ti, tī i lóng-chóng ê lō͘ chòe lia̍h-chiáu ê lô-bāng, tī i ê Siōng-tè ê chhù-lāi khǹg oàn-hūn.

9In深深家己敗壞，親像tī Ki-pí-a ê日；伊beh記得in ê罪過，辦in ê罪惡。In chhim-chhim ka-kī pāi-hoāi, chhin-chhiūⁿ tī Ki-pí-a ê ji̍t; I beh kì-tit in ê chōe-kòa, pān in ê chōe-ok.

10我chhē-tio̍h以色列，親像葡萄tī曠野；我看見lín ê列祖，親像無花果頭季起頭熟ê果子；總是in就近Pa-le̍k-pí-jíⁿ，專心敬拜hit-ê thang見笑ê，就成做可惡ê，kap in所戀愛ê一樣。Góa chhē-tio̍h Í-sek-lia̍t, chhin-chhiūⁿ phû-tô tī khòng-iá; Góa khòaⁿ-kìⁿ lín ê lia̍t-chó͘, chhin-chhiūⁿ bû-hoa-kó thâu-kùi khí-thâu-se̍k ê ké-chí; chóng-sī in chiū-kūn Pa-le̍k-pí-jíⁿ, choan-sim kèng-pài hit ê thang kiàn-siàu-ê, chiū chiâⁿ-chòe khó-ò͘ⁿ--ê, kap in só͘ loân-ài--ê chi̍t-iūⁿ.

11論到Í-hoat-liân，in ê榮光beh親像鳥飛去；beh無生kiáⁿ，無帶娠，無懷孕。Lūn-kàu Í-hoat-liân, in ê êng-kng beh chhin-chhiūⁿ chiáu pe--khì; beh bô siⁿ-kiáⁿ, bô tòa-sin, bô hoâi-īn.

12就若飼kiáⁿ到大漢，我也beh hō͘伊死kiáⁿ，到無留一個；我離開in，in就有災厄。Chiū nā chhī-kiáⁿ kàu tōa-hàn, Góa iā beh hō͘ i sí-kiáⁿ, kàu bô lâu chi̍t-ê; Góa lī-khui in, in chiū ū chai-ē.

13我看Í-hoat-liân親像Chhui-lô，栽tī肥ê地；總是Í-hoat-liân beh chhōa伊ê kiáⁿ兒出來交hō͘ thâi死人ê。Góa khòaⁿ Í-hoat-liân chhin-chhiūⁿ Chhui-lô, chai tī pûi ê tōe; chóng-sī Í-hoat-liân beh chhōa i ê kiáⁿ-jî chhut--lâi kau hō͘ thâi-sí lâng--ê.

14耶和華ah，你tio̍h hō͘ in；beh hō͘ in甚麼？hō͘ in ka-la̍uh娠ê胎，奶乾去。Iâ-hô-hoa ah, Lí tio̍h hō͘ in; beh hō͘ in sím-mi̍h? hō͘ in ka-la̍uh-sin ê thai, lin ta--khì.

15In一切ê pháiⁿ-tāi lóng tī Kiat-kah，我tī-hia怨恨in；因為in所行ê pháiⁿ，我beh tùi我ê家趕in出去，無koh疼惜in；in ê首領lóng是悖逆ê。In it-chhè ê pháiⁿ-tāi lóng tī Kiat-kah, Góa tī-hia oàn-hūn in; in-ūi in só͘ kiâⁿ ê pháiⁿ, Góa beh tùi Góa ê ke kóaⁿ in chhut-khì, bô koh thiàⁿ-sioh in; in ê siú-léng lóng sī pōe-ge̍k--ê.

16Í-hoat-liân受phah，in ê根頭枯焦，bōe能結果子；in就若生kiáⁿ，我beh thâi死in所生所疼ê。Í-hoat-liân siū phah, in ê kun-thâu ko͘-tâ, bōe-ōe kiat ké-chí; in chiū nā siⁿ-kiáⁿ, Góa beh thâi-sí in só͘-siⁿ só͘-thiàⁿ--ê.

17我ê上帝的確棄絕in，因為in m̄聽趁伊；in也的確漂流tī列國中。Góa ê Siōng-tè tek-khak khì-choa̍t in, in-ūi in m̄ thiaⁿ-thàn I; in iā tek-khak phiau-liû tī lia̍t-kok-tiong.

1以色列是茂盛ê葡萄樹，伊結伊ê果子；伊ê果子結ná-chōe，就起祭壇ná-chōe；土地ná肥，就造柱像ná-súi。Í-sek-lia̍t sī bō͘-sēng ê phû-tô-chhiū, i kiat i ê ké-chí; i ê ké-chí kiat ná-chōe, chiū khí chè-tôaⁿ ná-chōe; thó͘-tōe ná-pûi, chiū chō thiāu-siōng ná-súi.

2In存兩樣ê心，taⁿ beh受定罪；耶和華beh拆in ê祭壇，毀in ê柱像。In chûn nn̄g-iūⁿ ê sim, taⁿ beh siū tēng-chōe; Iâ-hô-hoa beh thiah in ê chè-tôaⁿ, húi in ê thiāu-siōng.

3因為in taⁿ beh講，阮無王，因為阮無敬畏耶和華；王能替阮做甚麼？In-ūi in taⁿ beh kóng, Goán bô ông, in-ūi goán bô kèng-ùi Iâ-hô-hoa; ông ōe thòe goán chòe sím-mi̍h?

4In講白賊話，lām-sám chiù-chōa立約；所以審判發起，親像園溝 ê茵籐。In kóng pe̍h-chha̍t-ōe, lām-sám chiù-chōa li̍p-iok; só͘-í sím-phòaⁿ hoat-khí, chhin-chhiūⁿ hn̂g-kau ê in-tîn.

5撒馬利亞khiā起ê百姓beh因為Pek-a-bûn ê牛á驚惶；因為伊hiah-ê百姓beh為tio̍h伊憂悶；伊ê祭司為tio̍h伊ê榮光無去，也beh ngia̍uh-ngia̍uh-chhoah。Sat-má-lī-a khiā-khí ê peh-sìⁿ beh in-ūi Pek-a-bûn ê gû-á kiaⁿ-hiâⁿ; in-ūi i hiah ê peh-sìⁿ beh ūi-tio̍h i iu-būn; i ê chè-si ūi-tio̍h i ê êng-kng bô--khì, iā beh ngia̍uh-ngia̍uh-chhoah.

6伊beh hō͘人帶到亞述，做禮物來送hō͘ Iâ-lûi-pò͘王；Í-hoat-liân beh受凌辱，以色列beh為tio̍h家己ê計謀來見笑。I beh hō͘ lâng tòa-kàu A-su̍t, chòe lé-mi̍h lâi sàng hō͘ Iâ-lûi-pò͘ ông; Í-hoat-liân beh siū lêng-jio̍k, Í-sek-lia̍t beh ūi-tio̍h ka-kī ê kè-bô͘ lâi kiàn-siàu.

7論到撒馬利亞，伊ê王滅無，親像水面ê沫(phe̍h)一樣。Lūn-kàu Sat-má-lī-a, i ê ông bia̍t-bô, chhin-chhiūⁿ chúi-bīn ê phe̍h chi̍t-iūⁿ.

8A-bûn ê山頭，以色列ê罪，beh tú-tio̍h毀滅；刺phè kap蒺藜beh發tī in hiah-ê壇頂；in beh對大山講，蓋阮，對小山講，Teh阮。A-bûn ê soaⁿ-thâu, Í-sek-lia̍t ê chōe, beh tú-tio̍h húi-bia̍t; chhì-phè kap chi̍t-lê beh hoat tī in hiah ê tôaⁿ-téng; in beh tùi tōa-soaⁿ kóng, Khàm goán, tùi sió-soaⁿ kóng, Teh goán.

9以色列ah，你tùi Ki-pí-a ê日以來，就犯罪；in tī-hia khiā；免得tī Ki-pí-a攻擊不義ê人ê交戰到tī in。Í-sek-lia̍t ah, lí tùi Ki-pí-a ê ji̍t í-lâi, chiū hoān-chōe; in tī-hia khiā; bián-tit tī Ki-pí-a kong-kek put-gī ê lâng ê kau-chiàn kàu tī in.

10我有注意ê時，就beh責罰伊；in hō͘兩項罪把(pé)縛ê時，列邦beh聚集來攻擊in。Góa ū chú(**chù)-ì ê sî, chiū beh chek-hoa̍t i; in hō͘ nn̄g-hāng chōe pé-pa̍k ê sî, lia̍t-pang beh chū-chi̍p lâi kong-kek in.

11Í-hoat-liân是快chiūⁿ教母ê牛á，ài踏五穀ê；我用擔掛tī伊肥súi ê頷頸；我beh hō͘ Í-hoat-liân拖車；猶大beh犁田；雅各beh耙(pē)鬆田土。Í-hoat-liân sī khoài-chiūⁿ-kà bú ê gû-á, ài ta̍h gō͘-kak--ê; Góa ēng taⁿ kòa tī i pûi-súi ê ām-kún; Góa beh hō͘ Í-hoat-liân thoa-chhia; Iû-tāi beh lôe-chhân; Ngá-kok beh pē-sang chhân-thô͘.

12Lín tio̍h為家己用公義掖種，照仁慈來收割；開墾拋荒ê地；因為這是chhē求耶和華ê時，thèng候祂來，用公義親像hō͘降落tī lín。Lín tio̍h ūi ka-kī ēng kong-gī iā-chéng, chiàu jîn-chû lâi siu-koah; khai-khún pha-hng ê tōe; in-ūi che sī chhē-kiû Iâ-hô-hoa ê sî, thèng-hāu I lâi, ēng kong-gī chhin-chhiūⁿ hō͘ kàng-lo̍h tī lín.

13Lín bat種作奸惡，收成罪過；食白賊ê果子；因為óa靠家己ê所行，也óa靠你chōe-chōe ê勇士。Lín bat chèng-choh kan-ok, siu-sêng chōe-kòa; chia̍h pe̍h-chha̍t ê ké-chí; in-ūi óa-khò ka-kī ê só͘-kiâⁿ, iā óa-khò lí chōe-chōe ê ióng-sū.

14所以tī你ê百姓中beh興起擾亂，你lóng總ê衛所beh受拆毀，是親像Sa-le̍k-bān tī交戰ê日拆毀Pek-a-pí-le̍k；hit時做老母ê kap in ê kiáⁿ，做一下受siak死。Só͘-í tī lí ê peh-sìⁿ-tiong beh heng-khí jiáu-loān, lí lóng-chóng ê ōe-só͘ beh siū thiah-húi, sī chhin-chhiūⁿ Sa-le̍k-bān tī kau-chiàn ê ji̍t thiah-húi Pek-a-pí-le̍k; hit-sî chòe lāu-bú-ê kap in ê kiáⁿ, chòe chi̍t-ē siū siak-sí.

15Pek-te̍k-lī也beh án-ni款待lín，因為lín ê大pháiⁿ；到天光，以色列王決斷beh滅無。Pek-te̍k-lī iā beh án-ni khoán-thāi lín, in-ūi lín ê tōa-pháiⁿ; kàu thiⁿ-kng, Í-sek-lia̍t ông koat-toàn beh bia̍t-bô.

1以色列做gín-ná ê時，我疼伊；koh召我ê kiáⁿ出埃及地。Í-sek-lia̍t chòe gín-ná ê sî, Góa thiàⁿ i; koh tiàu Góa ê kiáⁿ chhut Ai-ki̍p tōe.

2Ná叫in，in ná走開，獻祭tī chiah-ê Pa-le̍k，燒香tī偶像。Ná kiò in, in ná cháu-khui, hiàn-chè tī chiah ê Pa-le̍k, sio-hiuⁿ tī ngó͘-siōng.

3我教Í-hoat-liân學行，牽伊ê手；總是in m̄知我醫好in。Góa kà Í-hoat-liân o̍h-kiâⁿ, khan i ê chhiú; chóng-sī in m̄-chai Góa i-hó in.

4我用慈惠ê索kap仁愛ê帶牽in；我款待in親像tùi in ê頷頸tháu開in ê擔ê，用糧草hē tī in面前。Góa ēng chû-hūi ê soh kap jîn-ài ê tòa khan in; Góa khoán-thāi in chhin-chhiūⁿ tùi in ê ām-kún tháu-khui in ê taⁿ--ê, ēng niû-chháu hē tī in bīn-chêng.

5伊無koh tò去埃及地；亞述beh做伊ê王，因為伊m̄肯倒tńg。I bô koh tò-khì Ai-ki̍p tōe; A-su̍t beh chòe i ê ông, in-ūi i m̄-khéng tò-tńg.

6刀劍beh到伊ê城，毀壞in ê門栱；因為in ê計謀吞滅。To-kiàm beh kàu i ê siâⁿ, húi-hoāi in ê mn̂g-kông; in-ūi in ê kè-bô͘ thun-bia̍t.

7我ê百姓決意beh 背我；雖然有人叫in歸向至koânê，總是無一個尊重祂。Góa ê peh-sìⁿ koat-ì beh pōe Góa; sui-jiân ū lâng kiò in kui-ǹg Chì-koâiⁿ--ê, chóng-sī bô chi̍t-ê chun-tiōng I.

8Í-hoat-liân ah，我thái-thó會棄sak你？以色列ah，我thái-thó會將你交hō͘人？我thái-thó會hō͘你親像Ap-má？thái-thó會款待你做Sé-phian？我回心轉意，我慈愛ê心真熱。Í-hoat-liân ah, Góa thái-thó ōe khì-sak lí? Í-sek-lia̍t ah, Góa thái-thó ōe chiong lí kau hō͘ lâng? Góa thái-thó ōe hō͘ lí chhin-chhiūⁿ Ap-má? thái-thó ōe khoán-thāi lí chòe Sé-phian? Góa hê-sim tńg-ì, Góa chû-ài ê sim chin-jia̍t.

9我無beh發出我猛烈ê受氣；也無koh毀滅Í-hoat-liân；因為我是上帝，m̄是世間人，是tī lín中間ê聖ê；我無beh tī受氣中臨到lín。Góa bô beh hoat-chhut Góa béng-lia̍t ê siū-khì; iā bô koh húi-bia̍t Í-hoat-liân; in-ūi Góa sī Siōng-tè, m̄-sī sè-kan lâng, sī tī lín tiong-kan ê Sèng--ê; Góa bô beh tī siū-khì-tiong lîm-kàu lín.

10耶和華beh親像獅teh哮；in beh tè祂來行；祂哮ê時，hiah-ê kiáⁿ就ngia̍uh-ngia̍uh-chhoah，tùi西方趕緊來。Iâ-hô-hoa beh chhin-chhiūⁿ sai teh háu; in beh tè I lâi kiâⁿ; I háu ê sî, hiah ê kiáⁿ chiū ngia̍uh-ngia̍uh-chhoah, tùi sai-hng kóaⁿ-kín lâi.

11In beh ngia̍uh-ngia̍uh-chhoah，親像雀鳥á，tùi埃及緊緊來；koh親像鴿á tùi亞述地到；我beh hō͘ in khiā起家己ê厝；這是耶和華講ê。In beh ngia̍uh-ngia̍uh-chhoah, chhin-chhiūⁿ chhek-chiáu-á, tùi Ai-ki̍p kín-kín lâi; koh chhin-chhiūⁿ chíⁿ-á tùi A-su̍t tōe kàu ; Góa beh hō͘ in khiā-khí ka-kī ê chhù; che sī Iâ-hô-hoa kóng ê.

12Í-hoat-liân用欺騙圍我，以色列家也用詭計圍纍我；猶大靠上帝掌權，ǹg聖ê有盡忠ê心。Í-hoat-liân ēng khi-phiàn ûi Góa, Í-sek-lia̍t-ke iā ēng khúi-kè ûi-lûi Góa; Iû-tāi khò Siōng-tè chiáng-koân, ǹg Sèng--ê ū chīn-tiong ê sim.