1Tio̍h 對 lín ê兄弟講，A-bí，koh 對 lín ê姊妹講，Lō͘-hap-má。Tio̍h tùi lín ê hiaⁿ-tī kóng, A-bí, koh tùi lín ê chí-bē kóng, Lō͘-hap-má.

2Tio̍h kap lín老母辯論，koh辯論；因為伊m̄是我ê bó͘，我也m̄是伊ê丈夫；kah伊除去面裡ê淫亂，kap伊胸坎ê淫行；Tio̍h kap lín lāu-bú piān-lūn, koh piān-lūn; in-ūi i m̄-sī Góa ê bó͘, Góa iā m̄-sī i ê tiōng-hu; kah i tû--khì bīn--nih ê îm-loān, kap i heng-khám ê îm-hēng;

3免得我kā伊thǹg光光，hō͘伊親像tú-á出世ê日，hō͘伊親像曠野，親像乾燥ê地，hō͘伊tùi嘴乾來死。bián-tit Góa kā i thǹg kng-kng, hō͘ i chhin-chhiūⁿ tú-á chhut-sì ê ji̍t, hō͘ i chhin-chhiūⁿ khòng-iá, chhin-chhiūⁿ ta-sò ê tōe, hō͘ i tùi chhùi-ta lâi sí.

4我無beh憐憫伊ê kiáⁿ，因為in是tùi淫亂生ê kiáⁿ。Góa bô beh lîn-bín i ê kiáⁿ, in-ūi in sī tùi îm-loān siⁿ ê kiáⁿ.

5因為in ê老母行淫亂；懷孕ê做出見笑事；因為伊講，我beh tè我所戀愛ê人，我ê餅、水、羊毛、麻、油kap我所lim-ê，lóng是in hō͘我。In-ūi in ê lāu-bú kiâⁿ îm-loān; hoâi-īn--ê chòe-chhut kiàn-siàu sū; in-ūi i kóng, Góa beh tè góa só͘ loân-ài ê lâng, góa ê piáⁿ, chúi, iûⁿ-mn̂g, môa, iû kap góa só͘ lim--ê, lóng sī in hō͘ góa.

6看ah，因為án-ni，我beh用刺á阻塞伊ê路，作牆hō͘伊chhē無伊ê路。Khòaⁿ ah, in-ūi án-ni, Góa beh ēng chhì-á chó͘-that i ê lō͘, choh-chhiûⁿ hō͘ i chhē-bô i ê lō͘.

7伊beh追jip所戀愛ê人，若是jip-bōe-tio̍h，伊beh chhē in，總是chhē-bōe-tio̍h；就講，我beh tò去chhē我ê本夫，因為我hit時ê景況比現今iáu khah好。I beh tui-jip só͘ loân-ài ê lâng, nā-sī jip-bōe-tio̍h, i beh chhē in, chóng-sī chhē-bōe-tio̍h; chiū kóng, Góa beh tò-khì chhē góa ê pún-hu, in-ūi góa hit-sî ê kéng-hóng pí hiān-kim iáu khah-hó.

8伊m̄知伊ê五穀、酒、油，是我hō͘伊；加添伊ê銀kap金ê，也是我；伊用chiah-ê服事Pa-le̍k。I m̄-chai i ê ngó͘-kok, chiú, iû, sī Góa hō͘ i; ke-thiⁿ i ê gûn kap kim--ê, iā sī Góa; i ēng chiah-ê ho̍k-sāi Pa-le̍k.

9所以到收割ê日，我beh將我ê五穀tùi in the̍h倒tńg；koh tī出酒ê時，beh將我ê新酒the̍h倒tńg，也beh將我hō͘伊thang遮赤theh ê羊毛kap麻，搶倒tńg。Só͘-í kàu siu-koah ê ji̍t, Góa beh chiong Góa ê ngó͘-kok tùi in the̍h tò-tńg; koh tī chhut-chiú ê sî, beh chiong Góa ê sin-chiú the̍h tò-tńg, iā beh chiong Góa hō͘ i thang jia chhiah-theh ê iûⁿ-mn̂g kap môa, chhiúⁿ tò-tńg.

10Taⁿ我beh tī伊所戀愛ê人ê目睭前，露出伊ê淫行；的確無人能救伊脫離我ê手。Taⁿ Góa beh tī i só͘ loân-ài ê lâng ê ba̍k-chiu-chêng, lō͘-chhut i ê îm-hēng; tek-khak bô lâng ōe kiù i thoat-lī Góa ê chhiú.

11我beh soah in hiah-ê宴樂、節筵、月ê初一、安歇日，kap lóng總ê節期。Góa beh soah in hiah ê iàn-lo̍k, choeh-iân, ge̍h ê chhoe-it, an-hioh-ji̍t, kap lóng-chóng ê choeh-kî.

12我也beh毀壞伊ê葡萄樹，kap無花果樹，就是講，這是hiah-ê戀愛我ê hō͘我ê禮數；我beh hō͘ hiah-ê變做樹林，hō͘野獸食伊。Góa iā beh húi-hoāi i ê phû-tô-chhiū, kap bû-hoa-kó chhiū, chiū-sī kóng, Che sī hiah-ê loân-ài góa--ê hō͘ góa ê lé-sò͘; Góa beh hō͘ hiah-ê piàn-chòe chhiū-nâ, hō͘ iá-siù chia̍h--i.

13伊前日燒香服事chiah-ê Pa-le̍k，koh用耳鉤kap別號首飾家己裝飾，tè伊相戀愛ê人，來bōe記得我；因為án-ni我beh辦伊。這是耶和華講ê。I chêng-ji̍t sio-hiuⁿ ho̍k-sāi chiah ê Pa-le̍k, koh ēng hī-kau kap pa̍t-hō siú-sek ka-kī chng-thāⁿ, tè i saⁿ-loân-ài ê lâng, lâi bōe-kì-tit Góa; in-ūi án-ni Góa beh pān--i. Che sī Iâ-hô-hoa kóng--ê.

14看ah，我beh招呼伊，chhōa伊到曠野，用話安慰伊。Khòaⁿ ah, Góa beh chio-ho͘ i, chhōa i kàu khòng-iá, ēng ōe an-ùi i.

15我也beh tùi-hia賞賜伊葡萄園，koh賞賜伊A-kat ê山谷做ǹg望ê門；伊beh tī-hia應聲，kap少年ê日無各樣，kap tùi埃及地上來ê日相同。Góa iā beh tùi-hia siúⁿ-sù i phû-tô-hn̂g, koh siúⁿ-sù i A-kat ê soaⁿ-kok chòe ǹg-bāng ê mn̂g; i beh tī-hia ìn-siaⁿ, kap siàu-liân ê ji̍t bô koh-iūⁿ, kap tùi Ai-ki̍p tōe chiūⁿ-lâi ê ji̍t saⁿ-tâng.

16耶和華講，當hit日你beh叫我講，我ê丈夫ah，無koh叫我講，我ê主ah。Iâ-hô-hoa kóng, Tng hit-ji̍t lí beh kiò Góa kóng, Góa ê tiōng-hu ah, bô koh kiò Góa kóng, Góa ê Chú ah.

17因為我beh tùi in ê嘴除去chiah-ê Pa-le̍k ê名，無koh用chit-ê名記念伊。In-ūi Góa beh tùi in ê chhùi tû--khì chiah ê Pa-le̍k ê miâ, bô koh ēng chit ê miâ kì-liām i.

18當hit日，我beh為tio̍h in，kap田野ê走獸，kap空中ê飛鳥，以及地上ê蟲thōa立約；我也beh tùi chit-ê地方at折弓、刀，交戰，hō͘ in安然倒teh睏。Tng hit-ji̍t Góa beh ūi-tio̍h in, kap chhân-iá ê cháu-siù, kap khong-tiong ê pe-chiáu, í-ki̍p tōe-chiūⁿ ê thâng-thōa li̍p-iok; Góa iā beh tùi chit ê tōe-hng at-chi̍h keng, to, kau-chiàn, hō͘ in an-jiân tó-teh khùn.

19我beh聘定你永遠歸tī我，koh我beh用公義、公平、慈愛、憐憫，聘定你歸我。Góa beh phèng-tiāⁿ lí éng-oán kui tī Góa, koh Góa beh ēng kong-gī, kong-pêng, chû-ài, lîn-bín, phèng-tiāⁿ lí kui Góa.

20我也beh用誠實聘定你歸我，你就beh bat耶和華。Góa iā beh ēng sêng-si̍t phèng-tiāⁿ lí kui Góa, lí chiū beh bat Iâ-hô-hoa.

21耶和華講，hit日我beh應答，我beh應答天，天beh應答地；Iâ-hô-hoa kóng, Hit-ji̍t Góa beh ìn-tap, Góa beh ìn-tap thiⁿ, thiⁿ beh ìn-tap tōe;

22地beh應答五穀、酒、油，chiah-ê beh應答Iâ-su-lia̍t。tōe beh ìn-tap gō͘-kak, chiú, iû, chiah-ê beh ìn-tap Iâ-su-lia̍t.

23我beh為家己栽種伊tī chit-ê地；平素無得tio̍h憐憫ê，我beh憐憫伊；m̄是我ê百姓ê，我beh對伊講，你是我ê百姓，伊也beh講，祢是我ê上帝。Góa beh ūi ka-kī chai-chèng i tī chit ê tōe; pêng-sò͘ bô tit-tio̍h lîn-bín--ê, Góa beh lîn-bín--i; m̄-sī Góa ê peh-sìⁿ--ê, Góa beh tùi i kóng, Lí sī Góa ê peh-sìⁿ, i iā beh kóng, Lí sī góa ê Siōng-tè.

1耶和華對我講，你tio̍h koh去疼婦人人，是淫婦，也是伊相好ê人所疼ê，親像耶和華疼以色列人，總是in偏ǹg別ê上帝，歡喜葡萄干餅。Iâ-hô-hoa tùi góa kóng, Lí tio̍h koh khì thiàⁿ hū-jîn-lâng, sī îm-hū, iā sī i siong-hó ê lâng só͘-thiàⁿ--ê, chhin-chhiūⁿ Iâ-hô-hoa thiàⁿ Í-sek-lia̍t lâng, chóng-sī in phian-ǹg pa̍t ê siōng-tè, hoaⁿ-hí phû-tô-koaⁿ-piáⁿ.

2我就用銀十五sià-khek-le̍k，大麥一號mûi-jíⁿ，koh半號mûi-jíⁿ，買伊歸我。Góa chiū ēng gûn cha̍p-gō͘ sià-khek-le̍k, tōa-be̍h chi̍t hō-mûi-jíⁿ, koh pòaⁿ hō-mûi-jíⁿ, bóe i kui góa.

3我對伊講，你tio̍h為我家己tòa chōe-chōe日；m̄-thang行淫，也m̄-thang tè別人；我對tī你也beh án-ni。Góa tùi i kóng, Lí tio̍h ūi góa ka-kī tòa chōe-chōe ji̍t; m̄-thang kiâⁿ-îm, iā m̄-thang tè pa̍t-lâng; góa tùi tī lí iā beh án-ni.

4因為以色列也beh家己tòa chōe-chōe日，無君王，無首領，無祭祀，無雕刻ê柱，無í-hut-tek，無家內ê偶像。In-ūi Í-sek-lia̍t iā beh ka-kī tòa chōe-chōe ji̍t, bô kun-ông, bô siú-léng, bô chè-sū, bô tiau-khek ê thiāu, bô í-hut-tek, bô ke-lāi ê ngó͘-siōng.

5後來以色列人beh oa̍t-tńg來chhē in ê上帝耶和華，kap in ê王大衛；日後in beh用驚畏ǹg耶和華，kap祂ê恩惠。Āu-lâi Í-sek-lia̍t lâng beh oa̍t-tńg lâi chhē in ê Siōng-tè Iâ-hô-hoa, kap in ê ông Tāi-pi̍t; ji̍t-āu in beh ēng kiaⁿ-ùi ǹg Iâ-hô-hoa, kap I ê un-hūi.

1以色列人ah，lín tio̍h聽耶和華ê話；因為耶和華kap chit所在ê人辯論；因為tī chit-ê地方無誠實，無仁慈，無人bat上帝。Í-sek-lia̍t lâng ah, lín tio̍h thiaⁿ Iâ-hô-hoa ê ōe; in-ūi Iâ-hô-hoa kap chit só͘-chāi ê lâng piān-lūn; in-ūi tī chit ê tōe-hng bô sêng-si̍t, bô jîn-chû, bô lâng bat Siōng-tè.

2只有chiù-chōa、背約、thâi人、偷the̍h、姦淫、強暴，thâi人無soah。Chí-ū chiù-chōa, pōe-iok, thâi-lâng, thau-the̍h, kan-îm, kiông-pō, thâi lâng bô soah.

3所以chit-ê地方beh悲哀，其中khiā起ê人，kap田野ê獸，空中ê鳥，lóng beh衰微；海中ê魚也beh無去。Só͘-í chit ê tōe-hng beh pi-ai, kî-tiong khiā-khí ê lâng, kap chhân-iá ê siù, khong-tiong ê chiáu, lóng beh soe-bî; hái-tiong ê hî iā beh bô--khì.

4總是人m̄-thang辯論，m̄-thang相責備；因為你ê百姓親像kap祭司辯駁ê一樣。Chóng-sī lâng m̄-thang piān-lūn, m̄-thang saⁿ chek-pī; in-ūi lí ê peh-sìⁿ chhin-chhiūⁿ kap chè-si piān-pok--ê chi̍t-iūⁿ.

5你beh tī日時跋倒，先知也beh tī暝時kap你相kap跋倒，我beh滅無你ê老母。Lí beh tī ji̍t--sî poa̍h-tó, sian-ti iā beh tī mî--sî kap lí saⁿ-kap poa̍h-tó, Góa beh bia̍t-bô lí ê lāu-bú.

6我ê百姓因為無知來滅無；因為你棄sak智識，我也beh棄sak你，hō͘你無thang koh做祭司服事我；你既然bōe記得你ê上帝ê律法，我也beh bōe記得你ê kiáⁿ兒。Góa ê peh-sìⁿ in-ūi bû-ti lâi bia̍t-bô; in-ūi lí khì-sak tì-sek, Góa iā beh khì-sak lí, hō͘ lí bô thang koh chòe chè-si ho̍k-sāi Góa; lí kì-jiân bōe-kì-tit lí ê Siōng-tè ê lu̍t-hoat, Góa iā beh bōe-kì-tit lí ê kiáⁿ-jî.

7In加添ná-chōe，就ná得罪我；我beh hō͘伊ê榮光變做凌辱。In ke-thiⁿ ná-chōe, chiū ná tek-chōe Góa; Góa beh hō͘ i ê êng-kng piàn-chòe lêng-jio̍k.

8In食我ê百姓ê贖罪祭，意愛in犯罪。In chia̍h Góa ê peh-sìⁿ ê sio̍k-chōe-chè, ì-ài in hoān-chōe.

9將來百姓怎樣，祭司也beh án-ni；我beh因為in所行ê來辦in，照in所做ê來報應in。Chiong-lâi peh-sìⁿ cháiⁿ-iūⁿ, chè-si iā beh án-ni; Góa beh in-ūi in só͘ kiâⁿ--ê lâi pān in, chiàu in só͘ chòe--ê lâi pò-èng in.

10In食也bōe得tio̍h飽，行淫也無加添人；因為in放sak耶和華，m̄聽thàn祂。In chia̍h iā bōe tit-tio̍h pá, kiâⁿ-îm iā bô ke-thiⁿ lâng; in-ūi in pàng-sak Iâ-hô-hoa, m̄ thiaⁿ-thàn--I.

11淫行kap酒kap新酒是奪人ê心。Îm-hēng kap chiú kap sin-chiú sī toa̍t lâng ê sim.

12我ê百姓問in ê柴頭，koh in ê柺á指示in；因為in行淫ê心hō͘ in失迷；in行淫離開in ê上帝ê管轄。Góa ê peh-sìⁿ mn̄g in ê chhâ-thâu, koh in ê koáiⁿ-á chí-sī in; in-ūi in kiâⁿ-îm ê sim hō͘ in sit-bê; in kiâⁿ-îm lī-khui in ê Siōng-tè ê koán-hat.

13In獻祭tī山頂，燒香tī山頭，tī橡樹、楊樹、栗樹ê下面，因為in ê蔭影ê好；所以lín ê cha-bó͘-kiáⁿ淫亂，lín ê新娘行淫。In hiàn-chè tī soaⁿ-téng, sio-hiuⁿ tī soaⁿ-thâu, tī siōng-chhiū, iông-chhiū, lek-chhiū ê ē-bīn, in-ūi in ê ìm-ńg ê hó; só͘-í lín ê cha-bó͘-kiáⁿ îm-loān, lín ê sin-niû kiâⁿ-îm.

14Lín ê cha-bó͘-kiáⁿ淫亂，lín ê新娘行淫，我無刑罰in；因為hiah-ê ta-po͘人kap娼妓另外tòa，kap廟內ê妓女相kap獻祭；chit號無知ê百姓的確chhia倒。Lín ê cha-bó͘-kiáⁿ îm-loān, lín ê sin-niû kiâⁿ-îm, Góa bô hêng-hoa̍t in; in-ūi hiah ê ta-po͘-lâng kap chhiong-ki lēng-gōa tòa, kap biō-lāi ê ki-lú saⁿ-kap hiàn-chè; chit-hō bû-ti ê peh-sìⁿ tek-khak chhia-tó.

15以色列ah，你雖然行淫，總是猶大m̄-thang犯罪；m̄-thang去Kiat-kah，也m̄-thang上到Pek-a-bûn，也m̄-thang kí永活ê耶和華來chiù-chōa。Í-sek-lia̍t ah, lí sui-jiân kiâⁿ-îm, chóng-sī Iû-tāi m̄-thang hoān-chōe; m̄-thang khì Kiat-kah, iā m̄-thang chiūⁿ-kàu Pek-a-bûn, iā m̄-thang kí éng-oa̍h ê Iâ-hô-hoa lâi chiù-chōa.

16以色列硬鼻，親像硬鼻ê牛母；taⁿ耶和華beh飼in，親像飼羊tī開闊ê地。Í-sek-lia̍t ngī-phīⁿ, chhin-chhiūⁿ ngī-phīⁿ ê gû-bú; taⁿ Iâ-hô-hoa beh chhī in, chhin-chhiūⁿ chhī iûⁿ tī khui-khoah ê tōe.

17Í-hoat-liân結聯偶像，chhut-chāi伊。Í-hoat-liân kiat-liân ngó͘-siōng, chhut-chāi--i.

18In所lim-ê已經發酸，in常常行淫，in ê官長真歡喜見笑事。In só͘ lim--ê í-keng hoat-sng, in siông-siông kiâⁿ-îm, in ê koaⁿ-tiúⁿ chin hoaⁿ-hí kiàn-siàu sū.

19風用伊ê翼捲伊；in beh為tio̍h in ê祭祀，致到見笑。Hong ēng i ê si̍t kńg--i; in beh ūi-tio̍h in ê chè-sū, tì-kàu kiàn-siàu.