1以色列人ah，lín tio̍h聽耶和華ê話；因為耶和華kap chit所在ê人辯論；因為tī chit-ê地方無誠實，無仁慈，無人bat上帝。Í-sek-lia̍t lâng ah, lín tio̍h thiaⁿ Iâ-hô-hoa ê ōe; in-ūi Iâ-hô-hoa kap chit só͘-chāi ê lâng piān-lūn; in-ūi tī chit ê tōe-hng bô sêng-si̍t, bô jîn-chû, bô lâng bat Siōng-tè.

2只有chiù-chōa、背約、thâi人、偷the̍h、姦淫、強暴，thâi人無soah。Chí-ū chiù-chōa, pōe-iok, thâi-lâng, thau-the̍h, kan-îm, kiông-pō, thâi lâng bô soah.

3所以chit-ê地方beh悲哀，其中khiā起ê人，kap田野ê獸，空中ê鳥，lóng beh衰微；海中ê魚也beh無去。Só͘-í chit ê tōe-hng beh pi-ai, kî-tiong khiā-khí ê lâng, kap chhân-iá ê siù, khong-tiong ê chiáu, lóng beh soe-bî; hái-tiong ê hî iā beh bô--khì.

4總是人m̄-thang辯論，m̄-thang相責備；因為你ê百姓親像kap祭司辯駁ê一樣。Chóng-sī lâng m̄-thang piān-lūn, m̄-thang saⁿ chek-pī; in-ūi lí ê peh-sìⁿ chhin-chhiūⁿ kap chè-si piān-pok--ê chi̍t-iūⁿ.

5你beh tī日時跋倒，先知也beh tī暝時kap你相kap跋倒，我beh滅無你ê老母。Lí beh tī ji̍t--sî poa̍h-tó, sian-ti iā beh tī mî--sî kap lí saⁿ-kap poa̍h-tó, Góa beh bia̍t-bô lí ê lāu-bú.

6我ê百姓因為無知來滅無；因為你棄sak智識，我也beh棄sak你，hō͘你無thang koh做祭司服事我；你既然bōe記得你ê上帝ê律法，我也beh bōe記得你ê kiáⁿ兒。Góa ê peh-sìⁿ in-ūi bû-ti lâi bia̍t-bô; in-ūi lí khì-sak tì-sek, Góa iā beh khì-sak lí, hō͘ lí bô thang koh chòe chè-si ho̍k-sāi Góa; lí kì-jiân bōe-kì-tit lí ê Siōng-tè ê lu̍t-hoat, Góa iā beh bōe-kì-tit lí ê kiáⁿ-jî.

7In加添ná-chōe，就ná得罪我；我beh hō͘伊ê榮光變做凌辱。In ke-thiⁿ ná-chōe, chiū ná tek-chōe Góa; Góa beh hō͘ i ê êng-kng piàn-chòe lêng-jio̍k.

8In食我ê百姓ê贖罪祭，意愛in犯罪。In chia̍h Góa ê peh-sìⁿ ê sio̍k-chōe-chè, ì-ài in hoān-chōe.

9將來百姓怎樣，祭司也beh án-ni；我beh因為in所行ê來辦in，照in所做ê來報應in。Chiong-lâi peh-sìⁿ cháiⁿ-iūⁿ, chè-si iā beh án-ni; Góa beh in-ūi in só͘ kiâⁿ--ê lâi pān in, chiàu in só͘ chòe--ê lâi pò-èng in.

10In食也bōe得tio̍h飽，行淫也無加添人；因為in放sak耶和華，m̄聽thàn祂。In chia̍h iā bōe tit-tio̍h pá, kiâⁿ-îm iā bô ke-thiⁿ lâng; in-ūi in pàng-sak Iâ-hô-hoa, m̄ thiaⁿ-thàn--I.

11淫行kap酒kap新酒是奪人ê心。Îm-hēng kap chiú kap sin-chiú sī toa̍t lâng ê sim.

12我ê百姓問in ê柴頭，koh in ê柺á指示in；因為in行淫ê心hō͘ in失迷；in行淫離開in ê上帝ê管轄。Góa ê peh-sìⁿ mn̄g in ê chhâ-thâu, koh in ê koáiⁿ-á chí-sī in; in-ūi in kiâⁿ-îm ê sim hō͘ in sit-bê; in kiâⁿ-îm lī-khui in ê Siōng-tè ê koán-hat.

13In獻祭tī山頂，燒香tī山頭，tī橡樹、楊樹、栗樹ê下面，因為in ê蔭影ê好；所以lín ê cha-bó͘-kiáⁿ淫亂，lín ê新娘行淫。In hiàn-chè tī soaⁿ-téng, sio-hiuⁿ tī soaⁿ-thâu, tī siōng-chhiū, iông-chhiū, lek-chhiū ê ē-bīn, in-ūi in ê ìm-ńg ê hó; só͘-í lín ê cha-bó͘-kiáⁿ îm-loān, lín ê sin-niû kiâⁿ-îm.

14Lín ê cha-bó͘-kiáⁿ淫亂，lín ê新娘行淫，我無刑罰in；因為hiah-ê ta-po͘人kap娼妓另外tòa，kap廟內ê妓女相kap獻祭；chit號無知ê百姓的確chhia倒。Lín ê cha-bó͘-kiáⁿ îm-loān, lín ê sin-niû kiâⁿ-îm, Góa bô hêng-hoa̍t in; in-ūi hiah ê ta-po͘-lâng kap chhiong-ki lēng-gōa tòa, kap biō-lāi ê ki-lú saⁿ-kap hiàn-chè; chit-hō bû-ti ê peh-sìⁿ tek-khak chhia-tó.

15以色列ah，你雖然行淫，總是猶大m̄-thang犯罪；m̄-thang去Kiat-kah，也m̄-thang上到Pek-a-bûn，也m̄-thang kí永活ê耶和華來chiù-chōa。Í-sek-lia̍t ah, lí sui-jiân kiâⁿ-îm, chóng-sī Iû-tāi m̄-thang hoān-chōe; m̄-thang khì Kiat-kah, iā m̄-thang chiūⁿ-kàu Pek-a-bûn, iā m̄-thang kí éng-oa̍h ê Iâ-hô-hoa lâi chiù-chōa.

16以色列硬鼻，親像硬鼻ê牛母；taⁿ耶和華beh飼in，親像飼羊tī開闊ê地。Í-sek-lia̍t ngī-phīⁿ, chhin-chhiūⁿ ngī-phīⁿ ê gû-bú; taⁿ Iâ-hô-hoa beh chhī in, chhin-chhiūⁿ chhī iûⁿ tī khui-khoah ê tōe.

17Í-hoat-liân結聯偶像，chhut-chāi伊。Í-hoat-liân kiat-liân ngó͘-siōng, chhut-chāi--i.

18In所lim-ê已經發酸，in常常行淫，in ê官長真歡喜見笑事。In só͘ lim--ê í-keng hoat-sng, in siông-siông kiâⁿ-îm, in ê koaⁿ-tiúⁿ chin hoaⁿ-hí kiàn-siàu sū.

19風用伊ê翼捲伊；in beh為tio̍h in ê祭祀，致到見笑。Hong ēng i ê si̍t kńg--i; in beh ūi-tio̍h in ê chè-sū, tì-kàu kiàn-siàu.

1祭司ah，lín tio̍h聽chit-ê；以色列家ah，lín tio̍h注意；王親ah，lín tio̍h俯耳孔；因為審判關係tī lín，因為lín做活tauh tī Bí-su-pa，做羅網張tī Tha-po̍k。Chè-si ah, lín tio̍h thiaⁿ chit-ê; Í-sek-lia̍t-ke ah, lín tio̍h chù-ì; ông-chhin ah, lín tio̍h àⁿ hī-khang; in-ūi sím-phòaⁿ koan-hē tī lín, in-ūi lín chòe oa̍h-tauh tī Bí-su-pa, chòe lô-bāng tiuⁿ tī Tha-po̍k.

2Chiah-ê悖逆ê人大行thâi人；我beh責罰in。Chiah ê pōe-ge̍k ê lâng tōa kiâⁿ thâi-lâng; Góa beh chek-hoa̍t in.

3我bat Í-hoat-liân，以色列也bōe隱密tī我；Í-hoat-liân ah，taⁿ你行淫，以色列bak-tio̍h lâ-sâm。Góa bat Í-hoat-liân, Í-sek-lia̍t iā bōe ún-ba̍t tī Góa; Í-hoat-liân ah, taⁿ lí kiâⁿ-îm, Í-sek-lia̍t bak-tio̍h lâ-sâm.

4In所做ê阻擋in歸tī in ê上帝；因為淫亂ê心tī in內面，in也m̄-bat耶和華。In só͘-chòe--ê chó͘-tòng in kui tī in ê Siōng-tè; in-ūi îm-loān ê sim tī in lāi-bīn, in iā m̄-bat Iâ-hô-hoa.

5以色列ê驕傲當面干證in；所以以色列kap Í-hoat-liân，beh因為in ê罪過來tio̍h-tak；猶大也beh kap in相kap tio̍h-tak。Í-sek-lia̍t ê kiau-ngō͘ tng-bīn kan-chèng in; só͘-í Í-sek-lia̍t kap Í-hoat-liân, beh in-ūi in ê chōe-kòa lâi tio̍h-tak; Iû-tāi iā beh kap in saⁿ-kap tio̍h-tak.

6In beh帶牛群羊群去chhē耶和華，總是chhē-bōe-tio̍h；因為祂已經離開in。In beh tòa gû-kûn iûⁿ-kûn khì chhē Iâ-hô-hoa, chóng-sī chhē-bōe-tio̍h; in-ūi I í-keng lī-khui in.

7In ǹg耶和華行詭詐，偷生kiáⁿ；taⁿ到月ê初一，in kap in ê產業beh受吞滅。In ǹg Iâ-hô-hoa kiâⁿ khúi-chà, thau-siⁿ kiáⁿ; taⁿ kàu ge̍h ê chhoe-it, in kap in ê sán-gia̍p beh siū thun-bia̍t.

8Lín tio̍h tī Ki-pí-a pûn哨角，tī La̍h-má pûn號頭；tī Pek-a-bûn出警告ê聲，講，便雅憫ah，tī你ê後面。Lín tio̍h tī Ki-pí-a pûn sàu-kak, tī La̍h-má pûn hō-thâu; tī Pek-a-bûn chhut kéng-kò ê siaⁿ, kóng, Piān-ngá-bín ah, tī lí ê āu-bīn.

9Tī責罰ê日，Í-hoat-liân beh拋荒；我tī以色列chiah-ê支派中，hō͘ in知將來的確有ê事。Tī chek-hoa̍t ê ji̍t, Í-hoat-liân beh pha-hng; Góa tī Í-sek-lia̍t chiah ê chi-phài tiong, hō͘ in chai chiong-lâi tek-khak ū ê sū.

10猶大ê首領親像遷徙地界ê人；我beh piàⁿ我ê受氣tī in ê身上，親像piàⁿ水一樣。Iû-tāi ê siú-léng chhin-chhiūⁿ chhian-sóa tōe-kài ê lâng; Góa beh piàⁿ Góa ê siū-khì tī in ê sin-chiūⁿ, chhin-chhiūⁿ piàⁿ-chúi chi̍t-iūⁿ.

11Í-hoat-liân受暴虐，受審判壓制；因為伊甘心thàn命令。Í-hoat-liân siū pō-gio̍k, siū sím-phòaⁿ ap-chè; in-ūi i kam-sim thàn bēng-lēng.

12所以我對tī Í-hoat-liân，親像蛀蟲，對tī猶大親像朽壞伊ê。Só͘-í Góa tùi tī Í-hoat-liân, chhin-chhiūⁿ chiù-thâng, tùi tī Iû-tāi chhin-chhiūⁿ hiú-hoāi i--ê.

13Í-hoat-liân看見家己有病，猶大看本身有傷；Í-hoat-liân就去亞述，差人去見Iâ-lûi-pò͘王；伊bōe能醫好你，也bōe能hō͘你ê傷好。Í-hoat-liân khòaⁿ-kìⁿ ka-kī ū pīⁿ, Iû-tāi khòaⁿ pún-sin ū siong; Í-hoat-liân chiū khì A-su̍t, chhe lâng khì kìⁿ Iâ-lûi-pò͘ ông; i bōe-ōe i-hó lí, iā bōe-ōe hō͘ lí ê siong hó.

14我對tī Í-hoat-liân beh親像獅，對tī猶大家親像勇ê獅；我beh拆裂chiah去；我beh咬去，無有救伊ê。Góa tùi-tī Í-hoat-liân beh chhin-chhiūⁿ sai, tùi-tī Iû-tāi ke chhin-chhiūⁿ ióng ê sai; Góa beh thiah-li̍h chiah khì; Góa beh kā khì, bô ū kiù i--ê.

15Taⁿ我beh去，tò去我ê所在，到in認家己ê罪，求見我ê面；in tī急難ê時，beh切切chhē求我。Taⁿ góa beh khì, tò-khì Góa ê só͘-chāi, kàu in jīn ka-kī ê chōe, kiû kìⁿ Góa ê bīn; in tī kip-lān ê sî, beh chhiat-chhiat chhē-kiû Góa.

1來ah，咱tio̍h歸óa耶和華；伊拆裂咱，也beh醫好咱；伊phah咱，也beh包咱ê傷。Lâi ah, lán tio̍h kui-óa Iâ-hô-hoa; I thiah-li̍h lán, iā beh i-hó lán; I phah lán, iā beh pau lán ê siong.

2過兩日伊beh hō͘咱koh活；到第三日，伊beh hō͘咱起來，咱就活tī伊ê面前。Kè nn̄g ji̍t I beh hō͘ lán koh-oa̍h; kàu tē-saⁿ-ji̍t, I beh hō͘ lán khí-lâi, lán chiū oa̍h tī I ê bīn-chêng.

3咱tio̍h認識耶和華，出力進前來bat祂；祂穩當出現親像天光早ê光，祂beh臨到咱，親像雨，也親像春天ê雨，潤澤土地。Lán tio̍h jīn-bat Iâ-hô-hoa, chhut-la̍t chìn-chêng lâi bat I; I ún-tàng chhut-hiān chhin-chhiūⁿ thiⁿ-kng-chá ê kng, I beh lîm-kàu lán, chhin-chhiūⁿ hō͘, iā chhin-chhiūⁿ chhun-thiⁿ ê hō͘, lūn-te̍k thó͘-tōe.

4Í-hoat-liân ah，我beh怎樣款待你？猶大ah，我beh怎樣款待你？因為你ê善良親像早起時ê雲霧，koh親像緊緊乾ê露水。Í-hoat-liân ah, Góa beh cháiⁿ-iūⁿ khoán-thāi lí? Iû-tāi ah, Góa beh cháiⁿ-iūⁿ khoán-thāi lí? in-ūi lí ê siān-liông chhin-chhiūⁿ chá-khí-sî ê hûn-bū, koh chhin-chhiūⁿ kín-kín ta ê lō͘-chúi.

5因為án-ni，我用先知thâi削in：用我嘴內ê話，thâi死in。我ê審判親像光發出。In-ūi án-ni, Góa ēng sian-ti thâi-siah in: ēng Góa chhùi-lāi ê ōe, thâi-sí in. Góa ê sím-phòaⁿ chhin-chhiūⁿ kng hoat-chhut.

6因為我ài憐憫，m̄-ài祭祀，ài人bat上帝，贏過燒祭。In-ūi Góa ài lîn-bín, m̄-ài chè-sū, ài lâng bat Siōng-tè, iâⁿ-kè sio-chè.

7總是in背約親像亞當；tī-hia ǹg我行詭詐。Chóng-sī in pōe-iok chhin-chhiūⁿ A-tong; tī-hia ǹg Góa kiâⁿ khúi-chà.

8Ki-lia̍t就是行pháiⁿ-ê ê城，bak-tio̍h血跡。Ki-lia̍t chiū-sī kiâⁿ-pháiⁿ--ê ê siâⁿ, bak-tio̍h huih-jiah.

9親像kui陣ê賊埋伏teh當人，祭司結黨；也親像án-ni，tī示劍ê路thâi人；koh實在行邪淫。Chhin-chhiūⁿ kui-tīn ê chha̍t bâi-ho̍k teh tng--lâng, chè-si kiat-tóng; iā chhin-chhiūⁿ án-ni, tī Sī-kiàm ê lō͘ thâi lâng; koh si̍t-chāi kiâⁿ siâ-îm.

10Tī以色列家我看見極thang厭惡ê事；tī-hia有Í-hoat-liân ê淫行，以色列bak-tio̍h lâ-sâm。Tī Í-sek-lia̍t-ke Góa khòaⁿ-kìⁿ ke̍k thang iàm-ò͘ⁿ ê sū; tī-hia ū Í-hoat-liân ê îm-hēng, Í-sek-lia̍t bak--tio̍h lâ-sâm.

11猶大ah，我hō͘我受掠ê百姓tò來ê時，就beh為你備辦收割。Iû-tāi ah, Góa hō͘ Góa siū-lia̍h ê peh-sìⁿ tò-lâi ê sî, chiū beh ūi lí pī-pān siu-koah.