1做長老ê phoe寄hō͘受揀選尊貴ê婦人人kap伊ê kiáⁿ兒，是我tī真理所疼ê；koh m̄-nā我，見若bat真理ê也lóng是án-ni；Chòe tiúⁿ-ló ê phoe kià hō͘ siū kéng-soán chun-kùi ê hū-jîn-lâng kap i ê kiáⁿ-jî, sī góa tī chin-lí só͘ thiàⁿ ê; koh m̄ nā góa, kìⁿ-nā bat chin-lí ê iā lóng sī án-ni;

2疼lín是為tio̍h真理，chit-ê真理就是tiàm tī咱ê，也beh永遠kap咱tī-teh。thiàⁿ lín sī ūi-tio̍h chin-lí, chit ê chin-lí chiū-sī tiàm tī lán ê, iā beh éng-oán kap lán tī-teh.

3恩典、憐憫、平安，tùi父上帝，也tùi父ê Kiáⁿ，耶穌基督，tī真理kap疼痛，beh kap咱tī-teh。Un-tián, lîn-bín, pêng-an, tùi Pē Siōng-tè, iā tùi Pē ê Kiáⁿ, Iâ-so͘ Ki-tok, tī chin-lí kap thiàⁿ-thàng, beh kap lán tī-teh.

4我真歡喜，因為tù-tio̍h你ê kiáⁿ兒有tī真理來行ê，照咱tùi父領受ê命令。Góa chin hoaⁿ-hí, in-ūi tù-tio̍h lí ê kiáⁿ-jî ū tī chin-lí lâi kiâⁿ ê, chiàu lán tùi Pē niá-siū ê bēng-lēng.

5尊貴ê婦人人ah，taⁿ我求你，m̄是親像寫新ê命令hō͘你，是咱tùi起頭所有ê，就是大家tio̍h相疼。Chun-kùi ê hū-jîn-lâng ah, taⁿ góa kiû lí, m̄ sī chhin-chhiūⁿ siá sin ê bēng-lēng hō͘ lí, sī lán tùi khí-thâu só͘ ū ê, chiū-sī tāi-ke tio̍h saⁿ-thiàⁿ.

6咱照伊ê命令來行，這就是疼。Lín thàn伊來行，照lín tùi起頭所聽見ê，這就是hit-ê命令。Lán chiàu I ê bēng-lēng lâi kiâⁿ, che chiū-sī thiàⁿ. Lín thàn i lâi kiâⁿ, chiàu lín tùi khí-thâu só͘ thiaⁿ-kìⁿ ê, che chiū-sī hit ê bēng-lēng.

7因為有chōe-chōe迷惑人ê出來入世間，就是m̄認耶穌基督tī肉體來ê。Chit-ê就是hit-ê迷惑人ê，也是對敵基督ê。In-ūi ū chōe-chōe bê-he̍k lâng ê chhut-lâi ji̍p sè-kan, chiū-sī m̄ jīn Iâ-so͘ Ki-tok tī jio̍k-thé lâi ê. Chit-ê chiū-sī hit ê bê-he̍k lâng ê, iā sī tùi-te̍k Ki-tok ê.

8Lín tio̍h謹慎家己，免得lín失落咱所tio̍h磨ê，thang得tio̍h滿足ê報賞。Lín tio̍h kín-sīn ka-kī, bián-tit lín sit-lo̍h lán só͘ tio̍h-bôa ê, thang tit-tio̍h móa-chiok ê pò-siúⁿ.

9見若進前，也無tiàm tī基督ê教示ê，無有上帝；tiàm tī hit-ê教示ê，就有父kap Kiáⁿ。Kìⁿ-nā chìn-chêng, iā bô tiàm tī Ki-tok ê kà-sī ê, bô ū Siōng-tè; tiàm tī hit ê kà-sī ê, chiū ū Pē kap Kiáⁿ.

10若有人到lín hia，也無傳chit-ê教示，就m̄-thang接納伊入厝，也m̄-thangka7伊請安；Nā ū lâng kàu lín hia, iā bô thoân chit ê kà-sī, chiū m̄ thang chiap-la̍p i ji̍p chhù, iā m̄ thang kā i chhéng-an;

11因為kā伊請安ê，有份tī伊ê pháiⁿ所行。in-ūi kā i chhéng-an ê, ū hūn tī i ê pháiⁿ só͘ kiâⁿ.

12我有chōe-chōe項beh寫hō͘ lín，m̄-ài用紙kap墨；是ǹg望到lín hia，當面saⁿ-kap講，hō͘ lín ê歡喜充滿。Góa ū chōe-chōe hāng beh siá hō͘ lín, m̄ ài ēng chóa kap ba̍k; sī ǹg-bāng kàu lín hia, tng-bīn saⁿ-kap kóng, hō͘ lín ê hoaⁿ-hí chhiong-móa.

13你受揀ê姊妹ê kiáⁿ兒lóng kā你請安。Lí siū kéng ê chí-bē ê kiáⁿ-jî lóng kā lí chhéng-an.

1做長老ê phoe寄hō͘所疼ê Ka-iû，就是我tī真理所疼ê。Chòe tiúⁿ-ló ê phoe kià hō͘ só͘ thiàⁿ ê Ka-iû, chiū-sī góa tī chin-lí só͘ thiàⁿ ê.

2所疼ê兄弟ah，我願你萬事會興通勇健，親像你ê靈魂興通一樣。Só͘ thiàⁿ ê hiaⁿ-tī ah, góa goān lí bān sū ōe heng-thong ióng-kiāⁿ, chhin-chhiūⁿ lí ê lêng-hûn heng-thong chi̍t iūⁿ.

3因為有兄弟來干證你所存ê真理，親像你tī真理teh行，我就真歡喜。In-ūi ū hiaⁿ-tī lâi kan-chèng lí só͘ chûn ê chin-lí, chhin-chhiūⁿ lí tī chin-lí teh kiâⁿ, góa chiū chin hoaⁿ-hí.

4我聽見我ê kiáⁿ兒tī真理teh行，我ê歡喜無khah大tī chit-ê。Góa thiaⁿ-kìⁿ góa ê kiáⁿ-jî tī chin-lí teh kiâⁿ, góa ê hoaⁿ-hí bô khah tōa tī chit ê.

5所疼ê兄弟ah，見若你所款待出外ê兄弟ê，是忠信ê所行。Só͘ thiàⁿ ê hiaⁿ-tī ah, kìⁿ-nā lí só͘ khoán-thāi chhut-gōa ê hiaⁿ-tī ê, sī tiong-sìn ê só͘ kiâⁿ.

6In bat tī教會ê面前干證你ê疼痛；你若合tī上帝kā in送行，就是做好事。In bat tī kàu-hōe ê bīn-chêng kan-chèng lí ê thiàⁿ-thàng; lí nā ha̍p tī Siōng-tè kā in sòng-hêng, chiū-sī chòe hó sū.

7因為in為tio̍h伊ê名出外，無tùi外邦人the̍h甚麼物。In-ūi in ūi-tio̍h I ê miâ chhut-gōa, bô tùi gōa-pang lâng the̍h sím-mi̍h mi̍h.

8所以hit號人，咱應該chih接in，hō͘咱為tio̍h真理做同tio̍h磨ê。Só͘-í hit hō lâng, lán eng-kai chih-chiap in, hō͘ lán ūi-tio̍h chin-lí chòe tâng tio̍h-bôa ê.

9我已經有寫淡薄hō͘教會，獨獨in中間ài做頭ê Tiu-te̍k-hui無接納阮。Góa í-keng ū siá tām-po̍h hō͘ kàu-hōe; to̍k-to̍k in tiong-kan ài chòe thâu ê Tiu-te̍k-hui bô chiap-la̍p goán.

10所以我若來，beh記得伊所行ê事，就是伊用pháiⁿ話lām-sám講阮；koh無掠chit-ê做夠額，本身m̄接納兄弟，有人ài接納，伊就阻擋，續激in出教會。Só͘-í góa nā lâi, beh kì-tit i só͘ kiâⁿ ê sū, chiū-sī i ēng pháiⁿ ōe lām-sám kóng goán; koh bô lia̍h chit-ê chòe kàu-gia̍h, pún-sin m̄ chiap-la̍p hiaⁿ-tī, ū lâng ài chiap-la̍p, i chiū chó͘-tòng, sòa kek in chhut kàu-hōe.

11所疼ê兄弟ah，m̄-thang學pháiⁿ，tio̍h學好。行好ê是tùi上帝出；行pháiⁿ ê未bat看見上帝。Só͘ thiàⁿ ê hiaⁿ-tī ah, m̄ thang o̍h pháiⁿ, tio̍h o̍h hó. Kiâⁿ hó ê sī tùi Siōng-tè chhut; kiâⁿ pháiⁿ ê bē bat khòaⁿ-kìⁿ Siōng-tè.

12Tí-bí-tiu hō͘眾人所干證，真理也家己做伊ê干證；阮也做干證;你知阮ê干證是真。Tí-bí-tiu hō͘ chèng lâng só͘ kan-chèng, chin-lí iā ka-kī chòe i ê kan-chèng; goán iā chòe kan-chèng; lí chai goán ê kan-chèng sī chin.

13我有chōe-chōe項ài寫hō͘你，但是m̄-ài用筆墨寫hō͘你；Góa ū chōe-chōe hāng ài siá hō͘ lí, nā-sī m̄ ài ēng pit ba̍k siá hō͘ lí;

14是ǹg望緊緊見你，咱chiah beh當面講。sī ǹg-bāng kín-kín kìⁿ lí, lán chiah beh tng-bīn kóng.

15願你平安。Chiah-ê朋友kā你請安。請你隨一名kā hiah-ê朋友請安。Goān lí pêng-an. Chiah ê pêng-iú kā lí chhéng-an. Chhiáⁿ lí sûi chi̍t miâ kā hiah ê pêng-iú chhéng-an.

1耶穌基督ê奴僕，雅各ê兄弟，猶大，phoe寄hō͘受召ê，tī父上帝得tio̍h疼，為tio̍h耶穌基督來保守ê；Iâ-so͘ Ki-tok ê lô͘-po̍k, Ngá-kok ê hiaⁿ-tī, Iû-tāi, phoe kià hō͘ siū tiàu ê, tī Pē Siōng-tè tit-tio̍h thiàⁿ, ūi-tio̍h Iâ-so͘ Ki-tok lâi pó-siú ê;

2願憐憫、平安、疼痛，加添chōe-chōe hō͘ lín。Goān lîn-bín, pêng-an, thiàⁿ-thàng, ke-thiⁿ chōe-chōe hō͘ lín.

3所疼ê兄弟ah，我本真致意beh寫phoe hō͘ lín，議論咱saⁿ-kap有份ê拯救，當hit時就不得不tio̍h寫phoe苦勸lín，為tio̍h做一下交代tī聖徒ê道理，來出力交戰。Só͘ thiàⁿ ê hiaⁿ-tī ah, góa pún chin tì-ì beh siá phoe hō͘ lín, gī-lūn lán saⁿ-kap ū hūn ê chín-kiù, tng hit sî chiū put-tek-put tio̍h siá phoe khó͘-khǹg lín, ūi-tio̍h chòe chi̍t-ē kau-tāi tī sèng-tô͘ ê tō-lí, lâi chhut-la̍t kau-chiàn.

4因為有kúi-nā人暗靜入來，就是早事先定tio̍h beh受chit-ê審判ê；in是不虔ê人，將咱ê上帝ê恩反tńg做放縱ê因由，也m̄認獨一ê主宰，咱ê主耶穌基督。In-ūi ū kúi-nā lâng àm-chīⁿ ji̍p-lâi, chiū-sī chá tāi-seng tiāⁿ-tio̍h beh siū chit ê sím-phòaⁿ ê; in sī put-khiân ê lâng, chiong lán ê Siōng-tè ê un hoán-tńg chòe hòng-chhiòng ê in-iû, iā m̄ jīn to̍k-it ê Chú-cháiⁿ, lán ê Chú Iâ-so͘ Ki-tok.

5Lín是已經bat萬事ê人，taⁿ我ài hō͘ lín會記得，就是主已經救百姓出埃及地，後來滅無hiah-ê m̄信ê。Lín sī í-keng bat bān sū ê lâng, taⁿ góa ài hō͘ lín ōe kì-tit, chiū-sī Chú í-keng kiù peh-sìⁿ chhut Ai-ki̍p tōe, āu-lâi bia̍t-bô hiah ê m̄ sìn ê.

6Koh有天使無守in-ê本質，離開家己khiā起ê所在，主用永遠ê鎖鏈，禁守in tī烏暗ê下面，到tī大日期ê審判。Koh ū thiⁿ-sài bô siú in ê pún-chit, lī-khui ka-kī khiā-khí ê só͘-chāi, Chú ēng éng-oán ê só-liān, kìm-siú in tī o͘-àm ê ē-bīn, kàu tī tōa ji̍t-kî ê sím-phòaⁿ.

7親像所多瑪、Gô͘-mô͘-la̍h，以及四圍ê城，也同in-ê款來行淫亂，thàn逆性ê色慾，就受永遠ê火ê刑罰，hē-teh做鑑戒。Chhin-chhiūⁿ Só͘-to-má, Gô͘-mô͘-la̍h, í-ki̍p sì-ûi ê siâⁿ, iā tâng in ê khoán lâi kiâⁿ îm-loān, thàn ge̍k-sèng ê sek-io̍k, chiū siū éng-oán ê hé ê hêng-hoa̍t. hē-teh chòe kàm-kài.

8但是chiah-ê人也親像án-ni，tī in ê眠夢phah lâ-sâm肉體，也藐視辦政事ê，褻瀆尊貴ê。Nā-sī chiah ê lâng iā chhin-chhiūⁿ án-ni, tī in ê bîn-bāng phah lâ-sâm jio̍k-thé, iā biáu-sī pān chèng-sū ê, siat-to̍k chun-kùi ê.

9至大ê天使，Bí-ka-le̍k，kap魔鬼相爭ê時，為tio̍h摩西ê身屍辯論，尚且m̄敢用謗瀆ê話責罪伊，只有講，願主責備你。Chì-tōa ê thiⁿ-sài, Bí-ka-le̍k, kap Mô͘-kúi saⁿ-chiⁿ ê sî, ūi-tio̍h Mô͘-se ê sin-si piān-lūn, siōng-chhiáⁿ m̄ káⁿ ēng pòng-to̍k ê ōe chek-chōe i, chí-ū kóng, Goān Chú chek-pī lí.

10獨獨chiah-ê人褻瀆見若in所m̄知ê；koh in本性所會曉得ê，親像無靈性ê活物，tī chiah-ê家己敗壞。To̍k-to̍k chiah ê lâng siat-to̍k kìⁿ-nā in só͘ m̄ chai ê; koh in pún-sèng só͘ ōe hiáu-tit ê, chhin-chhiūⁿ bô lêng-sèng ê oa̍h mi̍h, tī chiah-ê ka-kī pāi-hoāi.

11In有災禍ah!因為in有行該隱ê路，為tio̍h財利走chông tī Pa-lân ê錯誤，受滅無tī Ko-lat ê違逆。In ū chai-ē ah! in-ūi in ū kiâⁿ Kai-ún ê lō͘, ūi-tio̍h châi-lī cháu-chông tī Pa-lân ê chhò-gō͘, siū bia̍t-bô tī Ko-lat ê ûi-ke̍h.

12In tī lín ê Hô-ài-se̍k是做暗ê石礁，kap lín siâng桌，in養飼家己lóng無驚畏；in是無雨ê雲，hō͘風吹過去；是秋天無果子ê樹，死了koh死，根頭lóng拔起來；In tī lín ê hô-ài-se̍k sī chòe àm ê chio̍h-ta, kap lín siâng toh, in iúⁿ-chhī ka-kī lóng bô kiaⁿ-ùi; in sī bô hō͘ ê hûn, hō͘ hong chhe kè-khì; sī chhiu-thiⁿ bô ké-chí ê chhiū, sí-liáu koh sí, kun-thâu lóng pu̍ih-khí-lâi;

13是海ê狂湧，吐出家己thang見笑ê沫(phe̍h)；是離開in ê所在ê星，有烏烏暗暗留teh thèng候in到tī永遠。sī hái ê kông éng, thò͘-chhut ka-kī thang kiàn-siàu ê phe̍h; sī lī-khui in ê só͘-chāi ê chhiⁿ, ū o͘-o͘ àm-àm lâu teh thèng-hāu in kàu tī éng-oán.

14亞當第七代ê孫以諾讖語chiah-ê人，講，看ah！主kap伊慢慢ê聖ê來，A-tong tē chhit tāi ê sun Í-lo̍k chhàm-gú chiah ê lâng, kóng, Khòaⁿ ah! Chú kap I bān-bān ê sèng ê lâi,

15來審判眾人，來責罪一切無敬虔ê人，為tio̍h in用無敬虔所行一切無敬虔ê事，kap見若無敬虔ê罪人所講橫惡攻擊伊ê話。lâi sím-phòaⁿ chèng lâng, lâi chek-chōe it-chhè bô kèng-khiân ê lâng, ūi-tio̍h in ēng bô kèng-khiân só͘ kiâⁿ it-chhè bô kèng-khiân ê sū, kap kìⁿ-nā bô kèng-khiân ê chōe-jîn só͘ kóng hoâiⁿ-ok kong-kek I ê ōe.

16Chiah-ê人nga̍uh-nga̍uh念、怨慼，照in ê私慾來行，in ê嘴講誇口ê話，為tio̍h財利來諂媚人。Chiah ê lâng nga̍uh-nga̍uh liām, oàn-chhoeh, chiàu in ê su-io̍k lâi kiâⁿ, in ê chhùi kóng khoa-kháu ê ōe, ūi-tio̍h châi-lī lâi thiám-mī lâng.

17所疼ê兄弟ah，taⁿ lín tio̍h記得咱ê主耶穌基督ê使徒所事先講ê話；Só͘ thiàⁿ ê hiaⁿ-tī ah, taⁿ lín tio̍h kì-tit lán ê Chú Iâ-so͘ Ki-tok ê sù-tô͘ só͘ tāi-seng kóng ê ōe;

18有kā lín講，路尾ê時beh有戲謔ê人照in家己無敬虔ê私慾來行。ū kā lín kóng, Lō͘-bé ê sî beh ū hì-hiok ê lâng chiàu in ka-kī bô kèng-khiân ê su-io̍k lâi kiâⁿ.

19In hiah-ê是分黨ê，thàn血氣，無有神。In hiah-ê sī hun-tóng ê, thàn hiat-khì, bô ū Sîn.

20但是所疼ê兄弟ah，tio̍h tī lín至聖ê信家己起造，tī聖神來祈禱，Nā-sī só͘ thiàⁿ ê hiaⁿ-tī ah, tio̍h tī lín chì-sèng ê sìn ka-kī khí-chō, tī Sèng Sîn lâi kî-tó,

21tio̍h tī上帝ê疼家己保守，ǹg望咱ê主耶穌基督ê憐憫到永活。tio̍h tī Siōng-tè ê thiàⁿ ka-kī pó-siú, ǹg-bāng lán ê Chú Iâ-so͘ Ki-tok ê lîn-bín kàu éng-oa̍h.

22有僥疑ê，lín tio̍h憐憫伊；Ū giâu-gî ê, lín tio̍h lîn-bín i;

23有ê，lín tio̍h搶in出火來救in；有ê，lín tio̍h驚惶來憐憫伊；連hit-ê hō͘肉體phah lâ-sâm ê衣服，也tio̍h厭惡伊。ū-ê, lín tio̍h chhiúⁿ in chhut hé lâi kiù in; ū-ê, lín tio̍h kiaⁿ-hiâⁿ lâi lîn-bín i; liân hit ê hō͘ jio̍k-thé phah lâ-sâm ê i-ho̍k, iā tio̍h iàm-ò͘ⁿ i.

24Taⁿ會照顧lín無tio̍h-tak，也hō͘ lín khiā tī伊榮光ê面前，無瑕疵，有快樂ê，Taⁿ ōe chiàu-kò͘ lín bô tio̍h-tak, iā hō͘ lín khiā tī I êng-kng ê bīn-chêng, bô hâ-chhû, ū khoài-lo̍k ê,

25就是獨一ê上帝咱ê救主，願榮光、威嚴、權能、氣力，對咱ê主耶穌基督，lóng歸伊，tùi萬古以前，kap現今，直到萬世。À-bēng。chiū-sī to̍k-it ê Siōng-tè lán ê Kiù-chú, goān êng-kng, ui-giâm, koân-lêng, khùi-la̍t, tùi lán ê Chú Iâ-so͘ Ki-tok, lóng kui I, tùi bān kó͘ í-chêng, kap hiān-kim, ti̍t kàu bān sè. À-bēng.