1大衛王對會眾講，我ê kiáⁿ所羅門是上帝特別揀ê，iáu-kú少年幼chíⁿ；chit-ê工程真大；因為chit-ê殿m̄是為tio̍h人，就是為tio̍h耶和華上帝起ê。Tāi-pi̍t ông tùi hōe-chiòng kóng, Góa ê kiáⁿ Só͘-lô-bûn sī Siōng-tè te̍k-pia̍t kéng--ê, iáu-kú siàu-liân iù-chíⁿ; chit ê kang-tiâⁿ chin-tōa; in-ūi chit ê tiān m̄-sī ūi-tio̍h lâng, chiū-sī ūi-tio̍h Iâ-hô-hoa Siōng-tè khí--ê.

2我為tio̍h我ê上帝ê殿，已經盡氣力，備辦金做金器，備辦銀做銀器，銅做銅器，鐵做鐵器，柴做柴器；koh有紅瑪瑙，kap thang鑲ê寶石、光石，彩色ê石，以及ta̍k樣ê寶石，矽(sia̍h)石極chōe。Góa ūi-tio̍h góa ê Siōng-tè ê tiān, í-keng chīn khùi-la̍t, pī-pān kim chòe kim-khì, pī-pān gûn chòe gûn-khì, tâng chòe tâng-khì, thih chòe thih-khì, chhâ chòe chhâ-khì; koh ū âng bé-ló, kap thang siuⁿ ê pó-chio̍h, kng-chio̍h, chhái-sek ê chio̍h, í-ki̍p ta̍k-iūⁿ ê pó-chio̍h, sia̍h-chio̍h ke̍k-chōe.

3因為我欣慕我ê上帝ê殿，就tī備辦起聖殿ê材料以外，koh用我本身所積聚ê金銀，獻tī我上帝ê厝；In-ūi góa him-bō͘ góa ê Siōng-tè ê tiān, chiū tī pī-pān khí sèng-tiān ê chhâi-liāu í-gōa, koh ēng góa pún-sin só͘ chek-chū ê kim-gûn, hiàn tī góa Siōng-tè ê chhù;

4就是Gô-hui ê金，三千tha-liân-tek ê金，鍛鍊ê銀七千tha-liân-tek，來安chiah-ê厝牆；chiū-sī Gô-hui ê kim, saⁿ-chheng tha-liân-tek ê kim, thoàn-liān ê gûn chhit-chheng tha-liân-tek, lâi an chiah ê chhù-chhiûⁿ;

5金做金器，銀做銀器，kap師傅ê手所做chiah-ê工。今á日有甚麼人歡喜將本身獻hō͘耶和華ah？kim chòe kim-khì, gûn chòe gûn-khì, kap sai-hū ê chhiú só͘ chòe chiah ê kang. Kin-á-ji̍t ū sím-mi̍h lâng hoaⁿ-hí chiong pún-sin hiàn hō͘ Iâ-hô-hoa ah?

6Tùi án-ni，眾族長，kap以色列ta̍k支派ê首領、千總、百總，以及監督hiah-ê kā王做工ê，lóng歡喜來獻。Tùi án-ni chèng cho̍k-tiúⁿ, kap Í-sek-lia̍t ta̍k chi-phài ê siú-léng, chhian-chóng, pé-chóng, í-ki̍p kam(**kàm)-tok hiah-ê kā ông chòe-kang--ê, lóng hoaⁿ-hí lâi hiàn.

7In為tio̍h上帝殿ê路用，獻金五千tha-liân-tek連一萬ta̍t-lī-khek，銀一萬tha-liân-tek，銅一萬八千tha-liân-tek，鐵十萬tha-liân-tek。In ūi-tio̍h Siōng-tè tiān ê lō͘-ēng, hiàn kim gō͘ chheng tha-liân-tek liân chi̍t-bān ta̍t-lī-khek, gûn chi̍t-bān tha-liân-tek, tâng chi̍t-bān poeh chheng tha-liân-tek, thih cha̍p-bān tha-liân-tek.

8見若有寶石ê，lóng交代Kek-sūn人Iâ-iat ê手，送入耶和華殿ê府庫。Kìⁿ-nā ū pó-chio̍h--ê, lóng kau-tài Kek-sūn lâng Iâ-iat ê chhiú, sàng-ji̍p Iâ-hô-hoa tiān ê hú-khò͘.

9因為in甘心獻，百姓lóng歡喜，因為in盡心獻hō͘耶和華；大衛王也大歡喜到極。In-ūi in kam-sim hiàn, peh-sìⁿ lóng hoaⁿ-hí, in-ūi in chīn-sim hiàn hō͘ Iâ-hô-hoa; Tāi-pi̍t ông iā tōa hoaⁿ-hí kàu-ke̍k.

10所以大衛tī會眾ê面前o-ló耶和華；大衛講，耶和華阮ê祖以色列ê上帝ah，是應該o-ló-ê，tùi永遠到永遠；Só͘-í Tāi-pi̍t tī hōe-chiòng ê bīn-chêng o-ló Iâ-hô-hoa; Tāi-pi̍t kóng, Iâ-hô-hoa goán ê chó͘ Í-sek-lia̍t ê Siōng-tè ah, sī eng-kai o-ló--ê, tùi éng-oán kàu éng-oán;

11耶和華ah，尊大、能力、榮光、得勝、威嚴lóng是你ê；凡若tī天頂地下ê，lóng是你ê；耶和華ah，國也是你ê，你是至koân，做萬有ê頭。Iâ-hô-hoa ah, chun-tōa, lêng-le̍k, êng-kng, tek-sèng, ui-giâm lóng sī Lí-ê; hoān-nā tī thiⁿ-téng tōe-ē--ê, lóng sī Lí-ê; Iâ-hô-hoa ah, kok iā sī Lí-ê, Lí sī chì-koâiⁿ, chòe bān-ū ê thâu.

12好額尊貴lóng tùi你來，你也掌管萬有；tī你ê手有大權能大氣力；hō͘人尊大，hō͘眾人大氣力，lóng出tī你ê手。Hó-gia̍h chun-kùi lóng tùi Lí lâi, Lí iā chiáng-koán bān-ū; tī Lí ê chhiú ū tōa koân-lêng tōa khùi-la̍t; hō͘ lâng chun-tōa, hō͘ chèng-lâng tōa khùi-la̍t, lóng chhut tī Lí ê chhiú.

13阮ê上帝ah，taⁿ阮感謝你，o-ló你榮光ê名；Goán ê Siōng-tè ah, taⁿ goán kám-siā Lí, o-ló Lí êng-kng ê miâ;

14我是甚麼，我ê百姓是甚麼，阮竟然能án-ni歡喜奉獻ah？因為萬物lóng tùi你來，阮用你ê物獻hō͘你；góa sī sím-mi̍h, góa ê peh-sìⁿ sī sím-mi̍h, goán kéng-jiân ōe án-ni hoaⁿ-hí hōng-hiàn ah? In-ūi bān-mi̍h lóng tùi Lí lâi, goán ēng Lí ê mi̍h hiàn hō͘ Lí;

15阮tī你ê面前是出外人，是寄腳ê，kap阮ê列祖一般樣；阮tī世間ê日子親像影，無thang ǹg望長長tī-teh。goán tī Lí ê bīn-chêng sī chhut-gōa lâng, sī kià-kha--ê, kap goán ê lia̍t-chó͘ chi̍t-poaⁿ-iūⁿ; goán tī sè-kan ê ji̍t-chí chhin-chhiūⁿ iáⁿ, bô thang ǹg-bāng tn̂g-tn̂g tī-teh.

16耶和華阮ê上帝ah，阮備辦chiah-ê chōe-chōe材料，beh為tio̍h你ê聖名起你ê殿，lóng是tùi你來，也lóng是你ê。Iâ-hô-hoa goán ê Siōng-tè ah, goán pī-pān chiah-ê chōe-chōe chhâi-liāu, beh ūi-tio̍h Lí ê sèng-miâ khí Lí ê tiān, lóng sī tùi Lí lâi, iā lóng sī Lí--ê.

17我ê上帝ah，我知你鑑察人ê心，歡喜正直；論到我，我用正直ê心歡喜獻這一切ê物；taⁿ我看見你ê百姓tī-chia，lóng歡喜獻hō͘你，我就歡喜。Góa ê Siōng-tè ah, góa chai Lí kàm-chhat lâng ê sim, hoaⁿ-hí chèng-ti̍t; lūn-kàu góa, góa ēng chèng-ti̍t ê sim hoaⁿ-hí hiàn che it-chhè ê mi̍h; taⁿ góa khòaⁿ-kìⁿ Lí ê peh-sìⁿ tī-chia, lóng hoaⁿ-hí hiàn hō͘ Lí, góa chiū hoaⁿ-hí.

18耶和華，阮列祖亞伯拉罕、以撒，以色列ê上帝ah，求你hō͘你ê百姓常常存chit號ê心思念頭，備辦in ê心歸向你。Iâ-hô-hoa, goán lia̍t-chó͘ A-pek-la̍h-hán, Í-sat, Í-sek-lia̍t ê Siōng-tè ah, kiû Lí hō͘ Lí ê peh-sìⁿ siông-siông chûn chit-hō ê sim-su liām-thâu, pī-pān in ê sim kui-ǹg Lí.

19Koh求你賞賜我ê kiáⁿ所羅門誠實ê心，來守你ê命令、法度、律例，做成這一切ê事，用我所備辦-ê來起殿。Koh kiû Lí siúⁿ-sù góa ê kiáⁿ Só͘-lô-bûn sêng-si̍t ê sim, lâi siú Lí ê bēng-lēng, hoat-tō͘, lu̍t-lē, chòe-chiâⁿ che it-chhè ê sū, ēng góa só͘ pī-pān-ê lâi khí tiān.

20大衛對chiah-ê會眾講，Lín tio̍h o-ló耶和華lín ê上帝；Tùi án-ni，會眾o-ló耶和華in列祖ê上帝，àⁿ頭拜耶和華kap王。Tāi-pi̍t tùi chiah ê hōe-chiòng kóng, Lín tio̍h o-ló Iâ-hô-hoa lín ê Siōng-tè; tùi án-ni hōe-chiòng o-ló Iâ-hô-hoa in lia̍t-chó͘ ê Siōng-tè, àⁿ-thâu pài Iâ-hô-hoa kap ông.

21隔日in獻祭hō͘耶和華，koh獻燒祭hō͘耶和華；就是獻公ê牛一千隻，公ê綿羊一千隻，羊á一千隻，kap伊ê灌奠；koh為以色列ê眾人獻chōe-chōe祭物。Keh-ji̍t in hiàn-chè hō͘ Iâ-hô-hoa, koh hiàn sio-chè hō͘ Iâ-hô-hoa; chiū-sī hiàn kang ê gû chi̍t-chheng chiah, kang ê mî-iûⁿ chi̍t-chheng chiah, iûⁿ-á chi̍t-chheng chiah, kap i ê koàn-tiān; koh ūi Í-sek-lia̍t ê chèng-lâng hiàn chōe-chōe chè-mi̍h.

22Hit日in tī耶和華ê面前lim食大大歡喜。In第二pái設立大衛ê kiáⁿ所羅門做王，為耶和華用油抹伊，hō͘伊做君王；亦用油抹Sat-tok做祭司。Hit-ji̍t in tī Iâ-hô-hoa ê bīn-chêng lim-chia̍h tōa-tōa hoaⁿ-hí. In tē-jī pái siat-li̍p Tāi-pi̍t ê kiáⁿ Só͘-lô-bûn chòe ông, ūi Iâ-hô-hoa ēng iû boah i, hō͘ i chòe kun-ông; ia̍h ēng iû boah Sat-tok chòe chè-si.

23Tùi án-ni，所羅門坐tī耶和華所賞賜ê位，續接伊ê老父大衛做王，無m̄興通；以色列眾人也lóng聽趁伊。Tùi án-ni Só͘-lô-bûn chē tī Iâ-hô-hoa só͘ siúⁿ-sù ê ūi, sòa-chiap i ê lāu-pē Tāi-pi̍t chòe ông, bô m̄ heng-thong; Í-sek-lia̍t chèng-lâng iā lóng thiaⁿ-thàn i.

24眾首領kap勇士，kap大衛王ê眾kiáⁿ，lóng順服所羅門王。Chèng siú-léng kap ióng-sū, kap Tāi-pi̍t ông ê chèng-kiáⁿ, lóng sūn-ho̍k Só͘-lô-bûn ông.

25耶和華hō͘所羅門tī以色列眾人ê面前，極其尊大；hō͘伊做國王ê威風，贏過以色列以前ê王。Iâ-hô-hoa hō͘ Só͘-lô-bûn tī Í-sek-lia̍t chèng-lâng ê bīn-chêng, ke̍k-kî chun-tōa; hō͘ i chòe kok-ông ê ui-hong, iâⁿ-kè Í-sek-lia̍t í-chêng ê ông.

26耶西ê kiáⁿ大衛做以色列眾人ê王；Iâ-se ê kiáⁿ Tāi-pi̍t chòe Í-sek-lia̍t chèng-lâng ê ông;

27伊做以色列王，歷過四十年，tī Hi-pek-lûn做王七年，tī耶路撒冷做王三十三年。i chòe Í-sek-lia̍t ông, le̍k-kè sì-cha̍p nî, tī Hi-pek-lûn chòe-ông chhit-nî, tī Iâ-lō͘-sat-léng chòe-ông saⁿ-cha̍p-saⁿ nî.

28伊食長歲壽；年歲、好額、榮光lóng滿足，就過世；伊ê kiáⁿ所羅門續接伊做王。I chia̍h tn̂g hè-siū; nî-hè, hó-gia̍h, êng-kng lóng móa-chiok, chiū kè-sì; i ê kiáⁿ Só͘-lô-bûn sòa-chiap i chòe-ông.

29大衛王頭到尾ê事，lóng記tī先見撒母耳ê冊，kap先知Ná-tan ê冊，以及先見Ka-tek ê冊。Tāi-pi̍t ông thâu kàu bé ê sū, lóng kì tī sian-kiàn Sat-bó͘-jíⁿ ê chheh, kap sian-ti Ná-tan ê chheh, í-ki̍p sian-kiàn Ka-tek ê chheh.

30Hiah-ê冊也記載伊治理國ê事，kap伊ê大權能，以及伊kap以色列，kap四方ê列國，所經過ê時事。Hiah ê chheh iā kì-chài i tī-lí kok ê sū, kap i ê tōa koân-lêng, í-ki̍p i kap Í-sek-lia̍t, kap sì-hng ê lia̍t-kok, só͘ keng-kè ê sî-sū.

1大衛ê kiáⁿ所羅門國位堅固，耶和華伊ê上帝kap伊tī-teh，hō͘伊不止大興旺。Tāi-pi̍t ê kiáⁿ Só͘-lô-bûn kok-ūi kian-kò͘, Iâ-hô-hoa i ê Siōng-tè kap i tī--teh, hō͘ i put-chí tōa heng-ōng.

2所羅門對以色列眾人講，就是千總、百總、審判司，以及thong以色列ê首領kap族長。Só͘-lô-bûn tùi Í-sek-lia̍t chèng-lâng kóng, chiū-sī chhian-chóng, pé-chóng, sím-phòaⁿ-si, í-ki̍p thong Í-sek-lia̍t ê siú-léng kap cho̍k-tiúⁿ.

3所羅門kap會眾lóng去到Ki-piàn ê山頭壇，tī-hia有上帝ê會幕，就是耶和華ê奴僕摩西tī曠野所造ê。Só͘-lô-bûn kap hōe-chiòng lóng khì kàu Ki-piàn ê soaⁿ-thâu-tôaⁿ, tī-hia ū Siōng-tè ê hōe-bō͘, chiū-sī Iâ-hô-hoa ê lô͘-po̍k Mô͘-se tī khòng-iá só͘ chō--ê.

4獨獨上帝ê櫃，大衛已經tùi Ki-lia̍t-iâ-lîm帶伊上去到大衛替伊備辦ê所在；因為伊bat替伊搭布棚tī耶路撒冷。To̍k-to̍k Siōng-tè ê kūi, Tāi-pi̍t í-keng tùi Ki-lia̍t-iâ-lîm tòa i chiūⁿ-khì kàu Tāi-pi̍t thòe i pī-pān ê só͘-chāi; in-ūi i bat thòe i tah pò͘-pîⁿ tī Iâ-lō͘-sat-léng.

5Koh Hō͘-ní ê孫，O͘-lī ê kiáⁿ，Pí-sat-lia̍t所造ê銅壇也tī-hia，tī耶和華會幕前；所羅門kap會眾就近伊。Koh Hō͘-ní ê sun, O͘-lī ê kiáⁿ, Pí-sat-lia̍t só͘ chō ê tâng-tôaⁿ iā tī-hia, tī Iâ-hô-hoa hōe-bō͘-chêng; Só͘-lô-bûn kap hōe-chiòng chiū-kūn i.

6所羅門上到耶和華面前ê銅壇，就是tī會幕hia，獻燒祭一千tī hit頂面。Só͘-lô-bûn chiūⁿ kàu Iâ-hô-hoa bīn-chêng ê tâng-tôaⁿ, chiū-sī tī hōe-bō͘ hia, hiàn sio-chè chi̍t-chheng tī hit téng-bīn.

7Hit暝上帝對所羅門出現，kā伊講，你ài我賞賜你甚麼，你thang求lah。Hit-mî Siōng-tè tùi Só͘-lô-bûn chhut-hiān, kā i kóng, Lí ài Góa siúⁿ-sù lí sím-mi̍h, lí thang kiû lah.

8所羅門對上帝講，你bat對我ê老父大衛大施慈愛，koh hō͘我續接伊做王。Só͘-lô-bûn tùi Siōng-tè kóng, Lí bat tùi góa ê lāu-pē Tāi-pi̍t tōa si chû-ài, koh hō͘ góa sòa-chiap i chòe ông.

9耶和華上帝ah，taⁿ求你行你所應允我ê老父大衛ê話；因為你設立我做chit-ê百姓ê王，in親像地上ê土沙一樣。Iâ-hô-hoa Siōng-tè ah, taⁿ kiû Lí kiâⁿ Lí só͘ èng-ún góa ê lāu-pē Tāi-pi̍t ê ōe; in-ūi Lí siat-li̍p góa chòe chit ê peh-sìⁿ ê ông, in chhin-chhiūⁿ tōe-chiūⁿ ê thô͘-soa chi̍t-iūⁿ.

10求你賞賜我智慧聰明，hō͘我thang出入tī chit-ê百姓ê面前；因為是誰能審判你hiah大國ê百姓ah？Kiû Lí siúⁿ-sù góa tì-hūi chhang-miâ, hō͘ góa thang chhut-ji̍p tī chit ê peh-sìⁿ ê bīn-chêng; in-ūi chī-chūi ōe sím-phòaⁿ Lí hiah-tōa kok ê peh-sìⁿ ah?

11上帝對所羅門講，你已經有chit號心，無求貨財、好額、尊貴，kap你ê對敵ê性命，也無求家己長歲壽；獨獨為家己求智慧聰明，hō͘你thang審判我ê百姓，就是我設立你做in ê王ê；Siōng-tè tùi Só͘-lô-bûn kóng, Lí í-keng ū chit-hō sim, bô kiû hè-châi, hó-gia̍h, chun-kùi, kap lí ê tùi-te̍k ê sìⁿ-miā, iā bô kiû ka-kī tn̂g hè-siū; to̍k-to̍k ūi ka-kī kiû tì-hūi chhang-miâ, hō͘ lí thang sím-phòaⁿ Góa ê peh-sìⁿ, chiū-sī Góa siat-li̍p lí chòe in ê ông ê;

12所以賞賜你智慧聰明；我也beh賞賜你貨財、好額、尊貴；tī你以前ê列王lóng無有án-ni，tī你以後也無beh有án-ni ê。só͘-í siúⁿ-sù lí tì-hūi chhang-miâ; Góa iā beh siúⁿ-sù lí hè-châi, hó-gia̍h, chun-kùi; tī lí í-chêng ê lia̍t-ông lóng bô ū án-ni, tī lí í-āu iā bô beh ū án-ni ê.

13Tùi án-ni，所羅門tùi Ki-piàn山頭壇會幕前tò來耶路撒冷，做王管理以色列。Tùi án-ni Só͘-lô-bûn tùi Ki-piàn soaⁿ-thâu-tôaⁿ hōe-bō͘-chêng tò-lâi Iâ-lō͘-sat-léng, chòe-ông koán-lí Í-sek-lia̍t.

14所羅門聚集戰車馬兵；有戰車一千四百張，馬兵一萬兩千名；安置tī囤車ê城，也kap王tī耶路撒冷。Só͘-lô-bûn chū-chi̍p chiàn-chhia bé-peng; ū chiàn-chhia chi̍t-chheng sì-pah tiuⁿ, bé-peng chi̍t-bān nn̄g-chheng miâ; an-tì tī tún-chhia ê siâⁿ, iā kap ông tī Iâ-lō͘-sat-léng.

15王tī耶路撒冷hō͘金銀親像石頭，hō͘柏香樹親像平洋ê桑材樹，因為真chōe。Ông tī Iâ-lō͘-sat-léng hō͘ kim-gûn chhin-chhiūⁿ chio̍h-thâu, hō͘ pek-hiuⁿ-chhiū chhin-chhiūⁿ pîⁿ-iûⁿ ê sng-châi-chhiū, in-ūi chin-chōe.

16所羅門所有ê馬是tùi埃及來ê；就是王ê seng-lí人一陣一陣照價錢買來ê。Só͘-lô-bûn só͘ ū ê bé sī tùi Ai-ki̍p lâi ê; chiū-sī ông ê seng-lí-lâng chi̍t-tīn chi̍t-tīn chiàu kè-chîⁿ bóe--lâi ê.

17In tùi埃及買來ê車，每張值銀六百sià-khek-le̍k；馬每匹一百五十；Hek-lêng chiah-ê王kap A-lân chiah-ê王lóng tùi in經手照án-ni帶出來。In tùi Ai-ki̍p bóe--lâi ê chhia, múi-tiuⁿ ta̍t gûn la̍k-pah sià-khek-le̍k; bé múi-phit chi̍t-pah gō͘-cha̍p; Hek-lêng chiah ê ông kap A-lân chiah ê ông lóng tùi in keng-chhiú chiàu án-ni tòa chhut-lâi.

1所羅門定tio̍h意思beh為耶和華ê名起殿堂，也為家己ê國起皇宮。Só͘-lô-bûn tiāⁿ-tio̍h ì-sù beh ūi Iâ-hô-hoa ê miâ khí tiān-tn̂g, iā ūi ka-kī ê kok khí hông-kiong.

2所羅門就揀挑夫七萬，上山phah石ê八萬，督工ê三千六百。Só͘-lô-bûn chiū kéng thiau-hu chhit-bān, chiūⁿ-soaⁿ phah-chio̍h-ê poeh-bān, tok-kang-ê saⁿ-chheng la̍k-pah.

3所羅門差人去見Chhui-lô王，Hō͘-lân，講，你bat運柏香柴hō͘我ê老父大衛起厝來khiā起，求你也照án-ni款待我。Só͘-lô-bûn chhe lâng khì kìⁿ Chhui-lô ông, Hō͘-lân, kóng, Lí bat ūn pek-hiuⁿ-chhâ hō͘ góa ê lāu-pē Tāi-pi̍t khí chhù lâi khiā-khí, kiû lí iā chiàu án-ni khoán-thāi góa.

4看ah，我beh為tio̍h耶和華我ê上帝ê名起殿，分別做聖獻hō͘祂，thang tī祂ê面前燒芳料ê香，常常供給排列ê餅，ta̍k早暗、安歇日、月ê初一，kap耶和華，阮ê上帝，所定tio̍h ê節期，獻燒祭。這是以色列人永遠ê例。Khòaⁿ ah, góa beh ūi-tio̍h Iâ-hô-hoa góa ê Siōng-tè ê miâ khí tiān, hun-piat chòe-sèng hiàn-hō͘ I, thang tī I ê bīn-chêng sio phang-liāu ê hiuⁿ, siông-siông kiong-kip pâi-lia̍t ê piáⁿ, ta̍k chá-àm, an-hioh-ji̍t, ge̍h ê chhoe-it, kap Iâ-hô-hoa, goán ê Siōng-tè, só͘ tiāⁿ-tio̍h ê choeh-kî, hiàn sio-chè. Che sī Í-sek-lia̍t lâng éng-oán ê lē.

5我所beh起ê殿真大，因為阮ê上帝真大，贏過lóng總ê上帝。Góa só͘ beh khí ê tiān chin-tōa, in-ūi goán ê Siōng-tè chin-tōa, iâⁿ-kè lóng-chóng ê siōng-tè.

6天kap天頂ê天尚且無夠額thang hō͘祂khiā起，是誰能為tio̍h祂起殿ah？我是甚麼號人thang kā伊起殿mah？不過tī伊ê面前燒香nā-tiāⁿ。Thiⁿ kap thiⁿ-téng ê thiⁿ siōng-chhiáⁿ bô kàu-gia̍h thang hō͘ I khiā-khí, chī-chūi ōe ūi-tio̍h I khí tiān ah? góa sī sím-mi̍h hō lâng thang kā I khí tiān mah? put-kò tī I ê bīn-chêng sio-hiuⁿ nā-tiāⁿ.

7Taⁿ求你差一人到我chia，就是gâu做金、銀、銅、鐵，kap紫色、朱紅色、藍色ê料ê，也精工tī ta̍k項雕刻ê工，thang kap hiah-ê kap我tī猶大耶路撒冷gâu ê師傅相kap做工，就是我ê老父大衛所備辦ê。Taⁿ kiû lí chhe chi̍t-lâng kàu góa chia, chiū-sī gâu chòe kim, gûn, tâng, thih, kap chí-sek, chu-âng-sek, lâm-sek ê liāu ê, iā cheng-kong tī ta̍k-hāng tiau-khek ê kang, thang kap hiah ê kap góa tī Iû-tāi Iâ-lō͘-sat-léng gâu ê sai-hū saⁿ-kap chòe-kang, chiū-sī góa ê lāu-pē Tāi-pi̍t só͘ pī-pān ê.

8Koh求你tùi Lī-pa-lùn運柏香樹、松樹、檀香樹，到我chia；因為我知你ê奴僕gâu剉 Lī-pa-lùn ê樹；看ah，我ê奴僕beh kap你ê奴僕相kap做；Koh kiû lí tùi Lī-pa-lùn ūn pek-hiuⁿ-chhiū, siông-chhiū, tôaⁿ-hiuⁿ-chhiū, kàu góa chia; in-ūi góa chai lí ê lô͘-po̍k gâu chhò Lī-pa-lùn ê chhiū; khòaⁿ ah, góa ê lô͘-po̍k beh kap lí ê lô͘-po̍k saⁿ-kap chòe;

9án-ni thang kā我備辦chōe-chōe柴料；因為我所beh起ê殿是大koh奇妙。án-ni thang kā góa pī-pān chōe-chōe chhâ-liāu; in-ūi góa só͘ beh khí ê tiān sī tōa koh kî-biāu.

10你ê奴僕剉樹，看ah，我beh hō͘ in好ê小麥兩萬ko-ní，大麥兩萬ko-ní，酒兩萬pà-te̍k，油兩萬pà-te̍k。Lí ê lô͘-po̍k chhò-chhiū, khòaⁿ ah, góa beh hō͘ in hó ê sió-be̍h nn̄g-bān ko-ní, tōa-be̍h nn̄g-bān ko-ní, chiú nn̄g-bān pà-te̍k, iû nn̄g-bān pà-te̍k.

11Chhui-lô王Hō͘-lân回phoe應所羅門講，因為耶和華疼祂ê百姓，就設立你做in ê王。Chhui-lô ông Hō͘-lân hê-phoe ìn Só͘-lô-bûn kóng, In-ūi Iâ-hô-hoa thiàⁿ I ê peh-sìⁿ, chiū siat-li̍p lí chòe in ê ông.

12Hō͘-lân koh講，創造天地ê耶和華，以色列ê上帝，是應該o-ló-ê；祂賞賜大衛王一個智慧ê kiáⁿ，hō͘伊有聰明gâu計謀，thang為tio̍h耶和華起殿koh為伊ê國起皇宮。Hō͘-lân koh kóng, Chhòng-chō thiⁿ tōe ê Iâ-hô-hoa, Í-sek-lia̍t ê Siōng-tè, sī eng-kai o-ló--ê; I siúⁿ-sù Tāi-pi̍t ông chi̍t ê tì-hūi ê kiáⁿ, hō͘ i ū chhang-miâ gâu kè-bô͘, thang ūi-tio̍h Iâ-hô-hoa khí tiān koh ūi i ê kok khí hông-kiong.

13Taⁿ我差一個精工聰明ê人去，是我ê老父Hō͘-lân所用ê。Taⁿ góa chhe chi̍t ê cheng-kong chhang-miâ ê lâng khì, sī góa ê lāu-pē Hō͘-lân só͘-ēng--ê.

14伊是Tàn ê支派一個婦人人ê kiáⁿ，伊ê老父是Chhui-lô人；伊gâu做金、銀、銅、鐵、石、柴，kap紫色、藍色、幼苧布、朱紅色，也會曉得ta̍k等號ê雕刻，也能想出ta̍k等號ê工；hō͘伊kap你gâu ê師傅，以及你ê老父，我ê主大衛，gâu ê師傅相kap做。I sī Tàn ê chi-phài chi̍t ê hū-jîn-lâng ê kiáⁿ, i ê lāu-pē sī Chhui-lô lâng; i gâu chòe kim, gûn, tâng, thih, chio̍h, chhâ, kap chí-sek, lâm-sek, iù-tōe pò͘, chu-âng-sek, iā ōe hiáu-tit ta̍k téng-hō ê tiau-khek, iā ōe siūⁿ-chhut ta̍k téng-hō ê kang; hō͘ i kap lí gâu ê sai-hū, í-ki̍p lí ê lāu-pē, góa ê chú Tāi-pi̍t, gâu ê sai-hū saⁿ-kap chòe.

15Taⁿ我ê主所講ê小麥、大麥、油、酒，願運來hō͘ chiah-ê奴僕。Taⁿ góa ê chú só͘ kóng ê sió-be̍h, tōa-be̍h, iû, chiú, goān ūn lâi hō͘ chiah ê lô͘-po̍k.

16阮beh照你所欠用ê tùi Lī-pa-lùn剉樹，ká kui排浮tī海裡運到Iok-phàⁿ；你就thang運到耶路撒冷。Goán beh chiàu lí só͘ khiàm-ēng--ê tùi Lī-pa-lùn chhò-chhiū, ká kui-pâi phû tī hái--nih ūn kàu Iok-phàⁿ; lí chiū thang ūn kàu Iâ-lō͘-sat-léng.

17所羅門算khiā起tī以色列地ê出外人，照伊ê老父大衛所算ê，計共有十五萬三千六百名。Só͘-lô-bûn sǹg khiā-khí tī Í-sek-lia̍t tōe ê chhut-gōa lâng, chiàu i ê lāu-pē Tāi-pi̍t só͘ sǹg ê, kè-kiōng ū cha̍p-gō͘-bān saⁿ-chheng la̍k-pah miâ.

18伊hō͘七萬人做挑夫，八萬人tī山裡phah石，三千六百人監督in做工ê。I hō͘ chhit-bān lâng chòe thiau-hu, poeh-bān lâng tī soaⁿ--nih phah-chio̍h, saⁿ-chheng la̍k-pah lâng kam-tok in chòe-kang--ê.