1Lô-phò-àm到耶路撒冷ê時，就聚集猶大kap便雅憫ê家，共十八萬人，lóng是過揀ê戰士，beh kap以色列交戰，hō͘國位koh歸tī Lô-phò-àm。Lô-phò-àm kàu Iâ-lō͘-sat-léng ê sî, chiū chū-chi̍p Iû-tāi kap Piān-ngá-bín ê ke, kiōng cha̍p-poeh-bān lâng, lóng sī kè-kéng ê chiàn-sū, beh kap Í-sek-lia̍t kau-chiàn, hō͘ kok-ūi koh kui tī Lô-phò-àm.

2總是耶和華ê話臨到上帝ê奴僕Sī-má-ngá講，Chóng-sī Iâ-hô-hoa ê ōe lîm-kàu Siōng-tè ê lô͘-po̍k Sī-má-ngá kóng,

3你去kā所羅門ê kiáⁿ猶大王Lô-phò-àm，kap khiā起猶大kap便雅憫ê眾以色列人，講，Lí khì kā Só͘-lô-bûn ê kiáⁿ Iû-tāi ông Lô-phò-àm, kap khiā-khí Iû-tāi kap Piān-ngá-bín ê chèng Í-sek-lia̍t lâng, kóng,

4耶和華án-ni講，Lín莫得上去，莫得kap lín ê兄弟交戰；ta̍k人tò去伊ê家；因為chit-ê tāi-chì出tī我。In聽耶和華ê話，就tò去，無去攻擊Iâ-lô-phò-àm。Iâ-hô-hoa án-ni kóng, Lín bo̍h-tit chiūⁿ-khì, bo̍h-tit kap lín ê hiaⁿ-tī kau-chiàn; ta̍k-lâng tò-khì i ê ke; in-ūi chit ê tāi-chì chhut tī Góa. In thiaⁿ Iâ-hô-hoa ê ōe, chiū tò-khì, bô khì kong-kek Iâ-lô-phò-àm.

5Lô-phò-àm tiàm tī耶路撒冷；tī猶大地起kúi-nā ê城做衛所。Lô-phò-àm tiàm tī Iâ-lō͘-sat-léng; tī Iû-tāi tōe khí kúi-nā ê siâⁿ chòe ōe-só͘.

6就是起伯利恆、Í-thán、Thê-ko-a；Chiū-sī khí Pek-lī-hêng, Í-thán, Thê-ko-a;

7Pek-siok、So-ko、A-tō͘-lân；Pek-siok, So-ko, A-tō͘-lân;

8Ka-te̍k、Má-lī-sa、Se-hut；Ka-te̍k, Má-lī-sa, Se-hut;

9A-to-lâi-im、拉結、A-se-ka；A-to-lâi-im, La̍h-kiat, A-se-ka;

10Só-la̍h、A-ngá-lûn、Hi-pek-lûn；chiah-ê lóng tī猶大kap便雅憫做堅固ê城。Só-la̍h, A-ngá-lûn, Hi-pek-lûn; chiah-ê lóng tī Iû-tāi kap Piān-ngá-bín chòe kian-kò͘ ê siâⁿ.

11Lô-phò-àm koh堅固hiah-ê衛所，tī in中間設兵ê頭人；koh積聚米糧，kap油，kap酒；Lô-phò-àm koh kian-kò͘ hiah ê ōe-só͘, tī in tiong-kan siat peng ê thâu-lâng; koh chek-chū bí-niû, kap iû, kap chiú;

12koh tī ta̍k-ê城備辦屏牌kap鎗，hō͘伊極其堅固。猶大便雅憫lóng屬tī伊。koh tī ta̍k ê siâⁿ pī-pān pîn-pâi kap chhiuⁿ, hō͘ i ke̍k-kî kian-kò͘. Iû-tāi Piān-ngá-bín lóng sio̍k tī i.

13以色列全地ê祭司kap利未人lóng 對四境來歸Lô-phò-àm。Í-sek-lia̍t choân-tōe ê chè-si kap Lī-bī lâng lóng tùi sì-kéng lâi kui Lô-phò-àm.

14利未人離開in ê郊野kap產業，來到猶大kap耶路撒冷；是因為Iâ-lô-phò-àm kap伊ê kiáⁿ拒絕in，m̄准in行祭司ê職份，服事耶和華。Lī-bī lâng lī-khui in ê kau-iá kap sán-gia̍p, lâi kàu Iû-tāi kap Iâ-lō͘-sat-léng; sī in-ūi Iâ-lô-phò-àm kap i ê kiáⁿ kū-choa̍t in, m̄-chún in kiâⁿ chè-si ê chit-hūn, ho̍k-sāi Iâ-hô-hoa.

15Iâ-lô-phò-àm為山頭壇，為鬼怪，為伊所鑄ê牛á，家己設立祭司。Iâ-lô-phò-àm ūi soaⁿ-thâu-tôaⁿ, ūi kúi-koài, ūi i só͘ chù ê gû-á, ka-kī siat-li̍p chè-si.

16以色列眾支派中，見若定tio̍h意思beh chhē耶和華以色列ê上帝ê，tè in到耶路撒冷，beh獻祭hō͘耶和華in列祖ê上帝。Í-sek-lia̍t chèng chi-phài tiong, kìⁿ-nā tiāⁿ-tio̍h ì-sù beh chhē Iâ-hô-hoa Í-sek-lia̍t ê Siōng-tè--ê, tè in kàu Iâ-lō͘-sat-léng, beh hiàn-chè hō͘ Iâ-hô-hoa in lia̍t-chó͘ ê Siōng-tè.

17Án-ni堅固猶大國歷過三年，hō͘所羅門ê kiáⁿ Lô-phò-àm強盛；因為in三年久行大衛所羅門ê路。Án-ni kian-kò͘ Iû-tāi kok le̍k-kè saⁿ-nî, hō͘ Só͘-lô-bûn ê kiáⁿ Lô-phò-àm kiông-sēng; in-ūi in saⁿ-nî kú kiâⁿ Tāi-pi̍t Só͘-lô-bûn ê lō͘.

18Lô-phò-àm娶Má-hap-la̍h做bó͘，伊是大衛ê cha-bó͘孫，Iâ-lī-mô͘ ê cha-bó͘-kiáⁿ；又koh耶西ê cha-bó͘孫，Í-lī-ap ê cha-bó͘-kiáⁿ，A-pí-hâi ê cha-bó͘-kiáⁿ。Lô-phò-àm chhōa Má-hap-la̍h chòe bó͘, i sī Tāi-pi̍t ê cha-bó͘-sun, Iâ-lī-mô͘ ê cha-bó͘-kiáⁿ; iū-koh Iâ-se ê cha-bó͘-sun, Í-lī-ap ê cha-bó͘-kiáⁿ, A-pí-hâi ê cha-bó͘-kiáⁿ.

19伊kā伊生kúi-nā ê kiáⁿ，就是Iâ-o͘-si、Sī-má-lī-ngá、Sat-hán。I kā i siⁿ kúi-nā ê kiáⁿ, chiū-sī Iâ-o͘-si, Sī-má-lī-ngá, Sat-hán.

20娶伊了後koh娶Ap-sa-liong5e5 cha-bó͘-kiáⁿ Má-ka，伊kā伊生 A-pí-ngá、A-thài、Sè-sat、Sī-lô-bi̍t。Chhōa i liáu-āu koh chhōa Ap-sa-liông ê cha-bó͘-kiáⁿ Má-ka, i kā i siⁿ A-pí-ngá, A-thài, Sè-sat, Sī-lô-bi̍t.

21Lô-phò-àm娶十八個bó͘，六十個妃，生二十八個kiáⁿ，六十個cha-bó͘-kiáⁿ；總是伊疼Ap-sa-liong5e5 cha-bó͘-kiáⁿ Má-ka，贏過lóng總hiah-ê bó͘ kap妃。Lô-phò-àm chhōa cha̍p-poeh ê bó͘, la̍k-cha̍p ê hui, siⁿ jī-cha̍p-poeh ê kiáⁿ, la̍k-cha̍p ê cha-bó͘-kiáⁿ; chóng-sī i thiàⁿ Ap-sa-liông ê cha-bó͘-kiáⁿ Má-ka, iâⁿ-kè lóng-chóng hiah ê bó͘ kap hui.

22Lô-phò-àm設立Má-ka ê kiáⁿ A-pí-ngá做頭，tī兄弟中做首領；因為想beh設立伊續接做王。Lô-phò-àm siat-li̍p Má-ka ê kiáⁿ A-pí-ngá chòe thâu, tī hiaⁿ-tī-tiong chòe siú-léng; in-ūi siūⁿ beh siat-li̍p i sòa-chiap chòe ông.

23Lô-phò-àm照智慧來行，分散眾kiáⁿ tī猶大kap便雅憫ê全地，到ta̍k-ê堅固ê城；koh hō͘ in chōe-chōe米糧，koh kā in chhē chōe-chōe bó͘。Lô-phò-àm chiàu tì-hūi lâi kiâⁿ, hun-sòaⁿ chèng-kiáⁿ tī Iû-tāi kap Piān-ngá-bín ê choân-tōe, kàu ta̍k ê kian-kò͘ ê siâⁿ; koh hō͘ in chōe-chōe bí-niû, koh kā in chhē chōe-chōe bó͘.

1Lô-phò-àm ê國堅固，伊強盛ê時，就棄sak耶和華ê律法，以色列也lóng tè伊。Lô-phò-àm ê kok kian-kò͘, i kiông-sēng ê sî, chiū khì-sak Iâ-hô-hoa ê lu̍t-hoat, Í-sek-lia̍t iā lóng tè i.

2Lô-phò-àm王五年，埃及王Sī-sat上來攻擊耶路撒冷；因為in得罪耶和華。Lô-phò-àm ông gō͘--nî, Ai-ki̍p ông Sī-sat chiūⁿ-lâi kong-kek Iâ-lō͘-sat-léng; in-ūi in tek-chōe Iâ-hô-hoa.

3Sī-sat有戰車一千兩百張，馬兵六萬；koh tè伊tùi埃及出來ê人，就是Lō͘-pí人、So͘-ki人、Kó͘-si̍t人，chōe到bōe算得。Sī-sat ū chiàn-chhia chi̍t-chheng nn̄g-pah tiuⁿ, bé-peng la̍k-bān; koh tè i tùi Ai-ki̍p chhut-lâi ê lâng, chiū-sī Lō͘-pí lâng, So͘-ki lâng, Kó͘-si̍t lâng, chōe kàu bōe-sǹg-tit.

4伊攻取猶大堅固ê城，就來到耶路撒冷。I kong-chhú Iû-tāi kian-kò͘ ê siâⁿ, chiū lâi kàu Iâ-lō͘-sat-léng.

5Hit時猶大ê首領為tio̍h Sī-sat ê緣故，聚集tī耶路撒冷，先知Sī-má-ngá來見Lô-phò-àm kap hiah-ê首領，kā in講，耶和華án-ni講，lín棄sak我，所以我棄sak lín tī Sī-sat ê手。Hit-sî Iû-tāi ê siú-léng ūi-tio̍h Sī-sat ê iân-kò͘, chū-chi̍p tī Iâ-lō͘-sat-léng, sian-ti Sī-má-ngá lâi kìⁿ Lô-phò-àm kap hiah ê siú-léng, kā in kóng, Iâ-hô-hoa án-ni kóng, Lín khì-sak Góa, só͘-í Góa khì-sak lín tī Sī-sat ê chhiú.

6Tùi án-ni，以色列hiah-ê首領kap王家己謙卑，講，耶和華是公義。Tùi án-ni Í-sek-lia̍t hiah ê siú-léng kap ông ka-kī khiam-pi, kóng, Iâ-hô-hoa sī kong-gī.

7耶和華看見in家己謙卑，耶和華ê話就臨到Sī-má-ngá講，In既然家己謙卑，我無beh剿滅in，beh hō͘ in略á得tio̍h拯救，我無beh用Sī-sat ê手piàⁿ落我ê受氣tī耶路撒冷。Iâ-hô-hoa khòaⁿ-kìⁿ in ka-kī khiam-pi, Iâ-hô-hoa ê ōe chiū lîm-kàu Sī-má-ngá kóng, In kì-jiân ka-kī khiam-pi, Góa bô beh châu-bia̍t in, beh hō͘ in lio̍h-á tit-tio̍h chín-kiù, Góa bô beh ēng Sī-sat ê chhiú piàⁿ-lo̍h Góa ê siū-khì tī Iâ-lō͘-sat-léng.

8總是in beh做Sī-sat ê奴僕，hō͘ in知服事我，kap服事列國，有甚麼分別。Chóng-sī in beh chòe Sī-sat ê lô͘-po̍k, hō͘ in chai ho̍k-sāi Góa, kap ho̍k-sāi lia̍t-kok, ū sím-mi̍h hun-piat.

9Tùi án-ni，埃及王Sī-sat上來攻擊耶路撒冷搶耶和華殿ê寶物，kap王宮ê寶物，lóng帶去；koh搶所羅門所做金ê屏牌。Tùi án-ni Ai-ki̍p ông Sī-sat chiūⁿ-lâi kong-kek Iâ-lō͘-sat-léng chhiúⁿ Iâ-hô-hoa tiān ê pó-mi̍h, kap ông-kiong ê pó-mi̍h, lóng tòa--khì; koh chhiúⁿ Só͘-lô-bûn só͘ chòe kim ê pîn-pâi.

10Lô-phò-àm王做銅ê屏牌來替in，交hō͘守王宮門ê侍衛長顧守。Lô-phò-àm ông chòe tâng ê pîn-pâi lâi thòe in, kau hō͘ siú ông-kiong mn̂g ê sī-ōe-tiúⁿ kò͘-siú.

11王ta̍k-pái入耶和華ê殿，侍衛就帶chiah-ê屏牌；後來就帶倒tńg來hē tī侍衛ê厝。Ông ta̍k-pái ji̍p Iâ-hô-hoa ê tiān, sī-ōe chiū tòa chiah ê pîn-pâi; āu-lâi chiū tòa tò-tńg lâi hē tī sī-ōe ê chhù.

12王家己謙卑ê時，耶和華ê受氣收倒tńg，無一盡滅伊；koh tī猶大ê中間也有好ê tāi-chì。Ông ka-kī khiam-pi ê sî, Iâ-hô-hoa ê siū-khì siu tò-tńg, bô it-chīn bia̍t--i; koh tī Iû-tāi ê tiong-kan iā ū hó ê tāi-chì.

13Lô-phò-àm王家己強盛，tī耶路撒冷做王。Lô-phò-àm坐位ê時四十一歲，tī耶路撒冷，就是耶和華tùi以色列眾支派中所揀安置伊ê名ê城，做王十七年。伊ê老母名叫Ná-má，是A-bûn人。Lô-phò-àm ông ka-kī kiông-sēng, tī Iâ-lō͘-sat-léng chòe ông. Lô-phò-àm chē-ūi ê sî sì-cha̍p-it hè, tī Iâ-lō͘-sat-léng, chiū-sī Iâ-hô-hoa tùi Í-sek-lia̍t chèng chi-phài-tiong só͘ kéng an-tì I ê miâ ê siâⁿ, chòe ông cha̍p chhit nî. I ê lāu-bú miâ kiò Ná-má, sī A-bûn lâng.

14Lô-phò-àm行pháiⁿ；因為伊無定tio̍h意思chhē耶和華。Lô-phò-àm kiâⁿ pháiⁿ; in-ūi i bô tiāⁿ-tio̍h ì-sù chhē Iâ-hô-hoa.

15Lô-phò-àm所行ê事，tùi頭到尾，kiám無記tī先知Sī-má-ngá kap先見E̍k-to ê冊，論族譜ê mah？Lô-phò-àm kap Iâ-lô-phò-àm常常交戰。Lô-phò-àm só͘ kiâⁿ ê sū, tùi thâu kàu bé, kiám bô kì tī sian-ti Sī-má-ngá kap sian-kiàn E̍k-to ê chheh, lūn cho̍k-phó͘--ê mah? Lô-phò-àm kap Iâ-lô-phò-àm siông-siông kau-chiàn.

16Lô-phò-àm kap伊ê列祖同睏，埋葬tī大衛城；伊ê kiáⁿ A-pí-ngá續接伊做王。Lô-phò-àm kap i ê lia̍t-chó͘ tâng-khùn, bâi-chòng tī Tāi-pi̍t siâⁿ; I ê kiáⁿ A-pí-ngá sòa-chiap i chòe ông.

1Iâ-lô-phò-àm王十八年，A-pí-ngá坐位做猶大王。Iâ-lô-phò-àm ông cha̍p-poeh--nî, A-pí-ngá chē-ūi chòe Iû-tāi ông.

2Tī耶路撒冷做王三年久。伊ê老母名叫Bí-kai-a，是Ki-pí-a人O͘-lia̍t ê cha-bó͘-kiáⁿ。Tī Iâ-lō͘-sat-léng chòe ông saⁿ-nî kú. I ê lāu-bú miâ kiò Bí-kai-a, sī Ki-pí-a lâng O͘-lia̍t ê cha-bó͘-kiáⁿ.

3A-pí-ngá kap Iâ-lô-phò-àm交戰。A-pí-ngá用一陣過揀ê兵四十萬，來排陣，lóng是好膽ê戰士。Iâ-lô-phò-àm也用過揀ê大勇士八十萬，來對伊排陣。A-pí-ngá kap Iâ-lô-phò-àm kau-chiàn. A-pí-ngá ēng chi̍t tīn kè-kéng ê peng sì-cha̍p-bān, lâi pâi-tīn, lóng sī hó-táⁿ ê chiàn-sū. Iâ-lô-phò-àm iā ēng kè-kéng ê tōa ióng-sū poeh-cha̍p bān, lâi tùi i pâi-tīn.

4A-pí-ngá khiā tī Í-hoat-liân山地ê Sé-má-liám山，講，Iâ-lô-phò-àm kap以色列眾人ah，tio̍h聽我。A-pí-ngá khiā tī Í-hoat-liân soaⁿ-tōe ê Sé-má-liám soaⁿ, kóng, Iâ-lô-phò-àm kap Í-sek-lia̍t chèng-lâng ah, tio̍h thiaⁿ góa.

5耶和華以色列ê上帝將以色列國永遠hō͘大衛，就是設立鹽ê約，賞賜伊kap伊kiáⁿ孫，lín kiám m̄-tio̍h知mah？Iâ-hô-hoa Í-sek-lia̍t ê Siōng-tè chiong Í-sek-lia̍t kok éng-oán hō͘ Tāi-pi̍t, chiū-sī siat-li̍p iâm ê iok, siúⁿ-sù i kap i kiáⁿ-sun, lín kiám m̄-tio̍h chai mah?

6總是大衛ê kiáⁿ所羅門ê人臣，Nî-pat ê kiáⁿ Iâ-lô-phò-àm，起來背叛伊ê主人。Chóng-sī Tāi-pi̍t ê kiáⁿ Só͘-lô-bûn ê jîn-sîn, Nî-pat ê kiáⁿ Iâ-lô-phò-àm, khí-lâi pōe-poān i ê chú-lâng.

7有hiah-ê無hē落ê匪類聚集tè伊，家己強猛，來攻擊所羅門ê kiáⁿ Lô-phò-àm；hit時Lô-phò-àm iáu少年軟chiáⁿ，bōe能抵擋in。Ū hiah-ê bô hē-lo̍h ê húi-lūi chū-chi̍p tè i, ka-kī kiông-béng, lâi kong-kek Só͘-lô-bûn ê kiáⁿ Lô-phò-àm; hit-sî Lô-phò-àm iáu siàu-liân nńg-chiáⁿ, bōe-ōe tí-tng in.

8Taⁿ lín有意思beh抵敵大衛ê kiáⁿ孫所治理耶和華ê國；lín ê人額真chōe，koh有金牛á kap lín tī-teh，就是Iâ-lô-phò-àm所kā lín造做上帝ê。Taⁿ lín ū ì-sù beh tí-te̍k Tāi-pi̍t ê kiáⁿ-sun só͘ tī-lí Iâ-hô-hoa ê kok; lín ê lâng-gia̍h chin-chōe, koh ū kim-gû-á kap lín tī-teh, chiū-sī Iâ-lô-phò-àm só͘ kā lín chō chòe Siōng-tè ê.

9Lín kiám m̄是趕逐耶和華ê祭司，就是亞倫ê kiáⁿ孫，kap利未人，照外國人ê規例家己設立祭司mah？甚至無論甚麼人牽一隻牛káng-á，kap七隻綿羊káng，來分別家己，就thang做無影跡ê上帝ê祭司？Lín kiám m̄-sī kóaⁿ-tio̍k Iâ-hô-hoa ê chè-si, chiū-sī A-lûn ê kiáⁿ-sun, kap Lī-bī lâng, chiàu gōa-kok lâng ê kui-lē ka-kī siat-li̍p chè-si mah? sīm-chì bô-lūn sím-mi̍h lâng khan chi̍t chiah gû-káng-á, kap chhit-chiah mî-iûⁿ-káng, lâi hun-piat ka-kī, chiū thang chòe bô iáⁿ-chiah ê siōng-tè ê chè-si?

10論到阮，耶和華是阮ê上帝，阮無棄sak伊；阮有祭司服事耶和華，就是亞倫ê kiáⁿ孫；koh有利未人ta̍k-ê盡伊ê職。Lūn-kàu goán, Iâ-hô-hoa sī goán ê Siōng-tè, goán bô khì-sak I; goán ū chè-si ho̍k-sāi Iâ-hô-hoa, chiū-sī A-lûn ê kiáⁿ-sun; koh ū Lī-bī lâng ta̍k-ê chīn i ê chit.

11Ta̍k早起ta̍k-ê-hng獻燒祭燒芳香hō͘耶和華；koh有排列ê餅tī聖潔ê桌；也有金燈台，kap燈盞，ta̍k-ê-hng thang點伊；因為阮守耶和華阮上帝ê命令；獨獨lín棄sak伊。Ta̍k chá-khí ta̍k ê-hng hiàn sio-chè sio phang-hiuⁿ hō͘ Iâ-hô-hoa; koh ū pâi-lia̍t ê piáⁿ tī sèng-kiat ê toh; iā ū kim teng-tâi, kap teng-chóaⁿ, ta̍k ê-hng thang tiám i; in-ūi goán siú Iâ-hô-hoa goán Siōng-tè ê bēng-lēng; to̍k-to̍k lín khì-sak I.

12看ah，上帝kap阮tī-teh，做阮ê頭，伊ê祭司也kap阮tī-teh，the̍h響亮ê號頭大聲pûn攻擊lín。以色列人ah，m̄-thang kap耶和華lín列祖ê上帝交戰；因為lín bōe會興通。Khòaⁿ ah, Siōng-tè kap goán tī-teh, chòe goán ê thâu, I ê chè-si iā kap goán tī-teh, the̍h hiáng-liāng ê hō-thâu tōa-siaⁿ pûn kong-kek lín. Í-sek-lia̍t lâng ah, m̄-thang kap Iâ-hô-hoa lín lia̍t-chó͘ ê Siōng-tè kau-chiàn; in-ūi lín bōe-ōe heng-thong.

13總是Iâ-lô-phò-àm埋伏兵tī in ê後面。Tùi án-ni，以色列人tī猶大ê頭前，埋伏ê兵tī in ê後面。Chóng-sī Iâ-lô-phò-àm bâi-ho̍k peng tī in ê āu-bīn. Tùi án-ni Í-sek-lia̍t lâng tī Iû-tāi ê thâu-chêng, bâi-ho̍k ê peng tī in ê āu-bīn.

14猶大人oa̍t頭看，看前後lóng有對敵ê兵；就求叫耶和華，祭司也pûn號頭。Iû-tāi lâng oa̍t-thâu khòaⁿ, khòaⁿ chêng-āu lóng ū tùi-te̍k ê peng; chiū kiû-kiò Iâ-hô-hoa, chè-si iā pûn hō-thâu.

15猶大人就喉叫；猶大人喉叫ê時，上帝就phah贏Iâ-lô-phò-àm kap以色列眾人，tī A-pí-ngá kap猶大人ê面前。Iû-tāi lâng chiū âu-kiò; Iû-tāi lâng âu-kiò ê sî, Siōng-tè chiū phah-iâⁿ Iâ-lô-phò-àm kap Í-sek-lia̍t chèng-lâng, tī A-pí-ngá kap Iû-tāi lâng ê bīn-chêng.

16以色列人tī猶大人ê面前逃走；上帝交in tī猶大人ê手。Í-sek-lia̍t lâng tī Iû-tāi lâng ê bīn-chêng tô-cháu; Siōng-tè kau in tī Iû-tāi lâng ê chhiú.

17A-pí-ngá kap伊ê百姓大大thâi死in；以色列人倒teh來死ê，有五十萬過揀ê人。A-pí-ngá kap i ê peh-sìⁿ tōa-tōa thâi-sí in; Í-sek-lia̍t lâng tó-teh lâi sí ê, ū gō͘-cha̍p-bān kè-kéng ê lâng.

18Hit時以色列人就降服，猶大人得tio̍h khah贏，因為óa靠耶和華in列祖ê上帝ê緣故。Hit-sî Í-sek-lia̍t lâng chiū hâng-ho̍k, Iû-tāi lâng tit-tio̍h khah-iâⁿ, in-ūi óa-khò Iâ-hô-hoa in lia̍t-chó͘ ê Siōng-tè ê iân-kò͘.

19A-pí-ngá追jip Iâ-lô-phò-àm，取伊kúi-nā ê城；就是Pek-te̍k-lī kap伊ê鄉社，Iâ-sa-ná kap伊ê鄉社，Í-hoat-lian5kap伊ê鄉社。A-pí-ngá tui-jip Iâ-lô-phò-àm, chhú i kúi-nā ê siâⁿ; chiū-sī Pek-te̍k-lī kap i ê hiuⁿ-siā, Iâ-sa-ná kap i ê hiuⁿ-siā, Í-hoat-liân kap i ê hiuⁿ-siā.

20當A-pí-ngá活teh ê日，Iâ-lô-phò-àm bōe能koh強盛；耶和華phah伊，伊就死。Tng A-pí-ngá oa̍h-teh ê ji̍t, Iâ-lô-phò-àm bōe-ōe koh kiông-sēng; Iâ-hô-hoa phah i, i chiū sí.

21A-pí-ngá漸漸強盛，娶bó͘十四個，生kiáⁿ二十二個，cha-bó͘-kiáⁿ十六個。A-pí-ngá chiām-chiām kiông-sēng, chhōa bó͘ cha̍p-sì-ê, siⁿ-kiáⁿ jī-cha̍p-jī ê, cha-bó͘-kiáⁿ cha̍p-la̍k-ê.

22A-pí-ngá其餘ê事，kap伊ê 言行，lóng記tī先知E̍k-to ê註解。A-pí-ngá kî-û ê sū, kap i ê giân-hēng(**hêng), lóng kì tī sian-ti E̍k-to ê chù-kái.