1Iâ-lô-phò-àm王十八年，A-pí-ngá坐位做猶大王。Iâ-lô-phò-àm ông cha̍p-poeh--nî, A-pí-ngá chē-ūi chòe Iû-tāi ông.

2Tī耶路撒冷做王三年久。伊ê老母名叫Bí-kai-a，是Ki-pí-a人O͘-lia̍t ê cha-bó͘-kiáⁿ。Tī Iâ-lō͘-sat-léng chòe ông saⁿ-nî kú. I ê lāu-bú miâ kiò Bí-kai-a, sī Ki-pí-a lâng O͘-lia̍t ê cha-bó͘-kiáⁿ.

3A-pí-ngá kap Iâ-lô-phò-àm交戰。A-pí-ngá用一陣過揀ê兵四十萬，來排陣，lóng是好膽ê戰士。Iâ-lô-phò-àm也用過揀ê大勇士八十萬，來對伊排陣。A-pí-ngá kap Iâ-lô-phò-àm kau-chiàn. A-pí-ngá ēng chi̍t tīn kè-kéng ê peng sì-cha̍p-bān, lâi pâi-tīn, lóng sī hó-táⁿ ê chiàn-sū. Iâ-lô-phò-àm iā ēng kè-kéng ê tōa ióng-sū poeh-cha̍p bān, lâi tùi i pâi-tīn.

4A-pí-ngá khiā tī Í-hoat-liân山地ê Sé-má-liám山，講，Iâ-lô-phò-àm kap以色列眾人ah，tio̍h聽我。A-pí-ngá khiā tī Í-hoat-liân soaⁿ-tōe ê Sé-má-liám soaⁿ, kóng, Iâ-lô-phò-àm kap Í-sek-lia̍t chèng-lâng ah, tio̍h thiaⁿ góa.

5耶和華以色列ê上帝將以色列國永遠hō͘大衛，就是設立鹽ê約，賞賜伊kap伊kiáⁿ孫，lín kiám m̄-tio̍h知mah？Iâ-hô-hoa Í-sek-lia̍t ê Siōng-tè chiong Í-sek-lia̍t kok éng-oán hō͘ Tāi-pi̍t, chiū-sī siat-li̍p iâm ê iok, siúⁿ-sù i kap i kiáⁿ-sun, lín kiám m̄-tio̍h chai mah?

6總是大衛ê kiáⁿ所羅門ê人臣，Nî-pat ê kiáⁿ Iâ-lô-phò-àm，起來背叛伊ê主人。Chóng-sī Tāi-pi̍t ê kiáⁿ Só͘-lô-bûn ê jîn-sîn, Nî-pat ê kiáⁿ Iâ-lô-phò-àm, khí-lâi pōe-poān i ê chú-lâng.

7有hiah-ê無hē落ê匪類聚集tè伊，家己強猛，來攻擊所羅門ê kiáⁿ Lô-phò-àm；hit時Lô-phò-àm iáu少年軟chiáⁿ，bōe能抵擋in。Ū hiah-ê bô hē-lo̍h ê húi-lūi chū-chi̍p tè i, ka-kī kiông-béng, lâi kong-kek Só͘-lô-bûn ê kiáⁿ Lô-phò-àm; hit-sî Lô-phò-àm iáu siàu-liân nńg-chiáⁿ, bōe-ōe tí-tng in.

8Taⁿ lín有意思beh抵敵大衛ê kiáⁿ孫所治理耶和華ê國；lín ê人額真chōe，koh有金牛á kap lín tī-teh，就是Iâ-lô-phò-àm所kā lín造做上帝ê。Taⁿ lín ū ì-sù beh tí-te̍k Tāi-pi̍t ê kiáⁿ-sun só͘ tī-lí Iâ-hô-hoa ê kok; lín ê lâng-gia̍h chin-chōe, koh ū kim-gû-á kap lín tī-teh, chiū-sī Iâ-lô-phò-àm só͘ kā lín chō chòe Siōng-tè ê.

9Lín kiám m̄是趕逐耶和華ê祭司，就是亞倫ê kiáⁿ孫，kap利未人，照外國人ê規例家己設立祭司mah？甚至無論甚麼人牽一隻牛káng-á，kap七隻綿羊káng，來分別家己，就thang做無影跡ê上帝ê祭司？Lín kiám m̄-sī kóaⁿ-tio̍k Iâ-hô-hoa ê chè-si, chiū-sī A-lûn ê kiáⁿ-sun, kap Lī-bī lâng, chiàu gōa-kok lâng ê kui-lē ka-kī siat-li̍p chè-si mah? sīm-chì bô-lūn sím-mi̍h lâng khan chi̍t chiah gû-káng-á, kap chhit-chiah mî-iûⁿ-káng, lâi hun-piat ka-kī, chiū thang chòe bô iáⁿ-chiah ê siōng-tè ê chè-si?

10論到阮，耶和華是阮ê上帝，阮無棄sak伊；阮有祭司服事耶和華，就是亞倫ê kiáⁿ孫；koh有利未人ta̍k-ê盡伊ê職。Lūn-kàu goán, Iâ-hô-hoa sī goán ê Siōng-tè, goán bô khì-sak I; goán ū chè-si ho̍k-sāi Iâ-hô-hoa, chiū-sī A-lûn ê kiáⁿ-sun; koh ū Lī-bī lâng ta̍k-ê chīn i ê chit.

11Ta̍k早起ta̍k-ê-hng獻燒祭燒芳香hō͘耶和華；koh有排列ê餅tī聖潔ê桌；也有金燈台，kap燈盞，ta̍k-ê-hng thang點伊；因為阮守耶和華阮上帝ê命令；獨獨lín棄sak伊。Ta̍k chá-khí ta̍k ê-hng hiàn sio-chè sio phang-hiuⁿ hō͘ Iâ-hô-hoa; koh ū pâi-lia̍t ê piáⁿ tī sèng-kiat ê toh; iā ū kim teng-tâi, kap teng-chóaⁿ, ta̍k ê-hng thang tiám i; in-ūi goán siú Iâ-hô-hoa goán Siōng-tè ê bēng-lēng; to̍k-to̍k lín khì-sak I.

12看ah，上帝kap阮tī-teh，做阮ê頭，伊ê祭司也kap阮tī-teh，the̍h響亮ê號頭大聲pûn攻擊lín。以色列人ah，m̄-thang kap耶和華lín列祖ê上帝交戰；因為lín bōe會興通。Khòaⁿ ah, Siōng-tè kap goán tī-teh, chòe goán ê thâu, I ê chè-si iā kap goán tī-teh, the̍h hiáng-liāng ê hō-thâu tōa-siaⁿ pûn kong-kek lín. Í-sek-lia̍t lâng ah, m̄-thang kap Iâ-hô-hoa lín lia̍t-chó͘ ê Siōng-tè kau-chiàn; in-ūi lín bōe-ōe heng-thong.

13總是Iâ-lô-phò-àm埋伏兵tī in ê後面。Tùi án-ni，以色列人tī猶大ê頭前，埋伏ê兵tī in ê後面。Chóng-sī Iâ-lô-phò-àm bâi-ho̍k peng tī in ê āu-bīn. Tùi án-ni Í-sek-lia̍t lâng tī Iû-tāi ê thâu-chêng, bâi-ho̍k ê peng tī in ê āu-bīn.

14猶大人oa̍t頭看，看前後lóng有對敵ê兵；就求叫耶和華，祭司也pûn號頭。Iû-tāi lâng oa̍t-thâu khòaⁿ, khòaⁿ chêng-āu lóng ū tùi-te̍k ê peng; chiū kiû-kiò Iâ-hô-hoa, chè-si iā pûn hō-thâu.

15猶大人就喉叫；猶大人喉叫ê時，上帝就phah贏Iâ-lô-phò-àm kap以色列眾人，tī A-pí-ngá kap猶大人ê面前。Iû-tāi lâng chiū âu-kiò; Iû-tāi lâng âu-kiò ê sî, Siōng-tè chiū phah-iâⁿ Iâ-lô-phò-àm kap Í-sek-lia̍t chèng-lâng, tī A-pí-ngá kap Iû-tāi lâng ê bīn-chêng.

16以色列人tī猶大人ê面前逃走；上帝交in tī猶大人ê手。Í-sek-lia̍t lâng tī Iû-tāi lâng ê bīn-chêng tô-cháu; Siōng-tè kau in tī Iû-tāi lâng ê chhiú.

17A-pí-ngá kap伊ê百姓大大thâi死in；以色列人倒teh來死ê，有五十萬過揀ê人。A-pí-ngá kap i ê peh-sìⁿ tōa-tōa thâi-sí in; Í-sek-lia̍t lâng tó-teh lâi sí ê, ū gō͘-cha̍p-bān kè-kéng ê lâng.

18Hit時以色列人就降服，猶大人得tio̍h khah贏，因為óa靠耶和華in列祖ê上帝ê緣故。Hit-sî Í-sek-lia̍t lâng chiū hâng-ho̍k, Iû-tāi lâng tit-tio̍h khah-iâⁿ, in-ūi óa-khò Iâ-hô-hoa in lia̍t-chó͘ ê Siōng-tè ê iân-kò͘.

19A-pí-ngá追jip Iâ-lô-phò-àm，取伊kúi-nā ê城；就是Pek-te̍k-lī kap伊ê鄉社，Iâ-sa-ná kap伊ê鄉社，Í-hoat-lian5kap伊ê鄉社。A-pí-ngá tui-jip Iâ-lô-phò-àm, chhú i kúi-nā ê siâⁿ; chiū-sī Pek-te̍k-lī kap i ê hiuⁿ-siā, Iâ-sa-ná kap i ê hiuⁿ-siā, Í-hoat-liân kap i ê hiuⁿ-siā.

20當A-pí-ngá活teh ê日，Iâ-lô-phò-àm bōe能koh強盛；耶和華phah伊，伊就死。Tng A-pí-ngá oa̍h-teh ê ji̍t, Iâ-lô-phò-àm bōe-ōe koh kiông-sēng; Iâ-hô-hoa phah i, i chiū sí.

21A-pí-ngá漸漸強盛，娶bó͘十四個，生kiáⁿ二十二個，cha-bó͘-kiáⁿ十六個。A-pí-ngá chiām-chiām kiông-sēng, chhōa bó͘ cha̍p-sì-ê, siⁿ-kiáⁿ jī-cha̍p-jī ê, cha-bó͘-kiáⁿ cha̍p-la̍k-ê.

22A-pí-ngá其餘ê事，kap伊ê 言行，lóng記tī先知E̍k-to ê註解。A-pí-ngá kî-û ê sū, kap i ê giân-hēng(**hêng), lóng kì tī sian-ti E̍k-to ê chù-kái.

1A-pí-ngá kap伊ê列祖同睏，埋葬tī大衛城。伊ê kiáⁿ A-sat續接伊做王。當A-sat ê日，hit-ê地方太平十年久。A-pí-ngá kap i ê lia̍t-chó͘ tâng-khùn, bâi-chòng tī Tāi-pi̍t siâⁿ. I ê kiáⁿ A-sat sòa-chiap i chòe ông. Tng A-sat ê ji̍t, hit ê tōe-hng thài-pêng cha̍p-nî kú.

2A-sat行耶和華伊ê上帝看做好做正直ê事；A-sat kiâⁿ Iâ-hô-hoa i ê Siōng-tè khòaⁿ-chòe hó chòe chèng-ti̍t ê sū;

3因為伊除去外邦ê上帝ê壇，kap山頭壇，毀hiah-ê柱像，in-ūi i tû-khì gōa-pang ê siōng-tè ê tôaⁿ, kap soaⁿ-thâu-tôaⁿ, húi hiah ê thiāu-siōng,

4剉hiah-ê A-sià-la̍h，koh命令猶大人chhē耶和華in列祖ê上帝，遵thàn伊ê律法誡命；chhò hiah ê A-sià-la̍h, koh bēng-lēng Iû-tāi lâng chhē Iâ-hô-hoa in lia̍t-chó͘ ê Siōng-tè, chun-thàn I ê lu̍t-hoat kài-bēng;

5koh tī猶大ta̍k-ê城除去hiah-ê山頭壇，kap日像；國得tio̍h太平tī伊ê面前。koh tī Iû-tāi ta̍k ê siâⁿ tû-khì hiah ê soaⁿ-thâu-tôaⁿ, kap ji̍t-siōng; kok tit-tio̍h thài-pêng tī i ê bīn-chêng.

6伊tī猶大起kúi-nā座險要ê城，因為伊ê地方平安，tī hit幾年 lóng無交戰，因為耶和華hō͘伊平安。I tī Iû-tāi khí kúi-nā chō hiám-iàu ê siâⁿ, in-ūi i ê tōe-hng pêng-an, tī hí(**hit) kúi nî lóng bô kau-chiàn, in-ūi Iâ-hô-hoa hō͘ i pêng-an.

7伊對猶大人講，咱tio̍h來起chiah-ê城，四圍起牆，kap城樓，kap門，kap門栱；地iáu tī咱ê面前；因為咱有求耶和華咱ê上帝；咱已經求伊，伊tī四圍賞賜咱平安。In就起造來得tio̍h興通。I tùi Iû-tāi lâng kóng, Lán tio̍h lâi khí chiah ê siâⁿ, sì-ûi khí chhiûⁿ, kap siâⁿ-lâu, kap mn̂g, kap mn̂g-kông; tōe iáu tī lán ê bīn-chêng; in-ūi lán ū kiû Iâ-hô-hoa lán ê Siōng-tè; lán í-keng kiû I, I tī sì-ûi siúⁿ-sù lán pêng-an. In chiū khí-chō lâi tit-tio̍h heng-thong.

8A-sat有軍兵，tùi猶大出ê，三十萬，giâ屏牌kap鎗；tùi便雅憫出ê，二十八萬，giâ屏牌開弓。Chiah-ê lóng是大力ê勇士。A-sat ū kun-peng, tùi Iû-tāi chhut--ê, saⁿ-cha̍p-bān, giâ pîn-pâi kap chhiuⁿ; tùi Piān-ngá-bín chhut--ê, jī-cha̍p-poeh bān, giâ pîn-pâi khui keng. Chiah-ê lóng sī tōa la̍t ê ióng-sū.

9有Kó͘-si̍t王謝拉 chhōa軍隊一百萬，戰車三百張，來攻擊伊，來到Má-lī-sa。Ū Kó͘-si̍t ông Siā-la̍h chhōa kun-tūi chi̍t-pah-bān, chiàn-chhia saⁿ-pah tiuⁿ, lâi kong-kek i, lâi kàu Má-lī-sa.

10A-sat就出去，抵敵伊；就tī Má-lī-sa Sé-hoat ê山谷，大家排陣。A-sat chiū chhut-khì, tí-te̍k i; chiū tī Má-lī-sa Sé-hoat ê soaⁿ-kok, tāi-ke pâi-tīn.

11A-sat求叫耶和華伊ê上帝講，耶和華ah，tī強ê，軟弱ê，ê中間，你以外無幫贊ê；耶和華阮ê上帝ah，求你幫贊阮；因為阮óa靠你，koh託你ê名去抵敵chiah-ê眾人；耶和華ah，你是阮ê上帝，m̄-thang hō͘人khah贏你。A-sat kiû-kiò Iâ-hô-hoa i ê Siōng-tè kóng, Iâ-hô-hoa ah, tī kiông-ê, loán-jio̍k-ê, ê tiong-kan, Lí í-gōa bô pang-chān ê; Iâ-hô-hoa goán ê Siōng-tè ah, kiû Lí pang-chān goán; in-ūi goán óa-khò Lí, koh thok Lí ê miâ khì tí-te̍k chiah ê chèng-lâng; Iâ-hô-hoa ah, Lí sī goán ê Siōng-tè, m̄-thang hō͘ lâng khah-iâⁿ Lí.

12耶和華就phah贏Kó͘-si̍t人tī A-sat kap猶大人ê面前；Kó͘-si̍t人就逃走。Iâ-hô-hoa chiū phah-iâⁿ Kó͘-si̍t lâng tī A-sat kap Iû-tāi lâng ê bīn-chêng; Kó͘-si̍t lâng chiū tô-cháu.

13A-sat kap tè伊ê人追jip in，到tī Ki-la̍h-jíⁿ；Kó͘-si̍t人死真chōe，bōe能koh強盛；因為in tī耶和華kap伊ê軍隊ê面前敗壞。猶大人搶chōe-chōe財物去。A-sat kap tè i ê lâng tui-jip in, kàu tī Ki-la̍h-jíⁿ; Kó͘-si̍t lâng sí chin-chōe, bōe-ōe koh kiông-sēng; in-ūi in tī Iâ-hô-hoa kap I ê kun-tūi ê bīn-chêng pāi-hoāi. Iû-tāi lâng chhiúⁿ chōe-chōe châi-bu̍t khì.

14In koh phah Ki-la̍h-jíⁿ四圍hiah-ê城；因為耶和華hō͘ in真驚；in也搶in lóng總ê城，因為城內有chōe-chōe物thang搶。In koh phah Ki-la̍h-jíⁿ sì-ûi hiah ê siâⁿ; in-ūi Iâ-hô-hoa hō͘ in chin kiaⁿ; in iā chhiúⁿ in lóng-chóng ê siâⁿ, in-ūi siâⁿ-lāi ū chōe-chōe mi̍h thang chhiúⁿ.

15Koh phah hiah-ê cheng-siⁿ ê寮，牽真chōe羊kap駱駝tò去耶路撒冷。Koh phah hiah ê cheng-siⁿ ê tiâu, khan chin-chōe iûⁿ kap lo̍k-tô tò-khì Iâ-lō͘-sat-léng.

1上帝ê神臨到Gô-tek ê kiáⁿ A-sat-lī-ngá。Siōng-tè ê Sîn lîm-kàu Gô-tek ê kiáⁿ A-sat-lī-ngá.

2伊出去迎接A-sat，kā伊講，A-sat kap猶大便雅憫ê眾人ah，tio̍h聽我ê話；lín kap耶和華tī-teh，伊也kap lín tī-teh；lín若chhē伊，伊beh hō͘ lín chhē-tio̍h；總是lín若棄sak伊，伊也beh棄sak lín。I chhut-khì ngiâ-chih A-sat, kā i kóng, A-sat kap Iû-tāi Piān-ngá-bín ê chèng-lâng ah, tio̍h thiaⁿ góa ê ōe; lín kap Iâ-hô-hoa tī-teh, I iā kap lín tī-teh; lín nā chhē I, I beh hō͘ lín chhē-tio̍h; chóng-sī lín nā khì-sak I, I iā beh khì-sak lín.

3以色列人久久無真ê上帝，無教示in ê祭司，也無律法；Í-sek-lia̍t lâng kú-kú bô chin ê Siōng-tè, bô kà-sī in ê chè-si, iā bô lu̍t-hoat;

4總是in tī患難ê時歸向耶和華以色列ê上帝，來chhē伊，伊就hō͘伊chhē-tio̍h。chóng-sī in tī hoān-lān ê sî kui-ǹg Iâ-hô-hoa Í-sek-lia̍t ê Siōng-tè, lâi chhē I, I chiū hō͘ i chhē-tio̍h.

5Hit時出入ê人bōe得tio̍h平安；列國khiā起ê百姓lóng tú-tio̍h大擾亂；Hit-sî chhut-ji̍p ê lâng bōe tit-tio̍h pêng-an; lia̍t-kok khiā-khí ê peh-sìⁿ lóng tú-tio̍h tōa jiáu-loān;

6國攻擊國，城攻擊城，lóng相毀壞；因為上帝用ta̍k樣患難擾亂in。kok kong-kek kok, siâⁿ kong-kek siâⁿ, lóng saⁿ húi-hoāi; in-ūi Siōng-tè ēng ta̍k-iūⁿ hoān-lān jiáu-loān in.

7Taⁿ lín tio̍h勇健，手m̄-thang軟落去；因為lín ê所做beh得tio̍h報賞。Taⁿ lín tio̍h ióng-kiāⁿ, chhiú m̄-thang nńg--lo̍h-khì; in-ūi lín ê só͘ chòe beh tit-tio̍h pò-siúⁿ.

8A-sat已經聽見chiah-ê話，kap先知Gô-tek ê讖語，就壯膽；tī猶大便雅憫全地，kap伊所取Í-hoat-liân山地hiah-ê城，除去lóng總可惡ê物；koh tī耶和華léng廊前，新起耶和華ê壇。A-sat í-keng thiaⁿ-kìⁿ chiah ê ōe, kap sian-ti Gô-tek ê chhàm-gú, chiū chòng-táⁿ; tī Iû-tāi Piān-ngá-bín choân-tōe, kap i só͘ chhú Í-hoat-liân soaⁿ-tōe hiah ê siâⁿ, tû-khì lóng-chóng khó-ò͘ⁿ ê mi̍h; koh tī Iâ-hô-hoa léng-lông chêng, sin-khí Iâ-hô-hoa ê tôaⁿ.

9Koh聚集猶大便雅憫ê眾人，kap Í-hoat-liân、Má-ná-se、西門出外tī in中間ê人；因為tùi以色列出來歸A-sat ê真chōe；是為tio̍h in看見耶和華伊ê上帝kap伊tī-teh。Koh chū-chi̍p Iû-tāi Piān-ngá-bín ê chèng-lâng, kap Í-hoat-liân, Má-ná-se, Se-biān chhut-gōa tī in tiong-kan ê lâng; in-ūi tùi Í-sek-lia̍t chhut-lâi kui A-sat ê chin-chōe; sī ūi-tio̍h in khòaⁿ-kìⁿ Iâ-hô-hoa i ê Siōng-tè kap i tī-teh.

10A-sat王十五年三月，in lóng聚集tī耶路撒冷。A-sat ông cha̍p-gō͘-nî saⁿ-ge̍h, in lóng chū-chi̍p tī Iâ-lō͘-sat-léng.

11Hit日in tī所帶來hiah-ê搶ê物ê中間，用牛七百隻，羊七千隻，獻hō͘耶和華。Hit-ji̍t in tī só͘ tòa-lâi hiah ê chhiúⁿ ê mi̍h ê tiong-kan, ēng gû chhit-pah chiah, iûⁿ chhit chheng chiah, hiàn hō͘ Iâ-hô-hoa.

12In就立約，beh盡心、盡性chhē耶和華in列祖ê上帝；In chiū li̍p-iok, beh chīn-sim, chīn-sèng chhē Iâ-hô-hoa in lia̍t-chó͘ ê Siōng-tè;

13見若無chhē耶和華以色列ê上帝ê，無論大細、男女，tio̍h hō͘伊死。kìⁿ-nā bô chhē Iâ-hô-hoa Í-sek-lia̍t ê Siōng-tè ê, bô-lūn tōa-sòe, lâm-lú, tio̍h hō͘ i sí.

14In就用大聲，用歡喜來hoah，用號頭用哨角來對耶和華chiù-chōa。In chiū ēng tōa-siaⁿ, ēng hoaⁿ-hí lâi hoah, ēng hō-thâu ēng sàu-kak lâi tùi Iâ-hô-hoa chiù-chōa.

15猶大眾人為tio̍h所chiù ê chōa歡喜，因為in盡心chiù-chōa，koh盡意chhē耶和華，耶和華也hō͘ in chhē-tio̍h，就tī in四境賞賜in平安。Iû-tāi chèng-lâng ūi-tio̍h só͘ chiù ê chōa hoaⁿ-hí, in-ūi in chīn-sim chiù-chōa, koh chīn-ì chhē Iâ-hô-hoa, Iâ-hô-hoa iā hō͘ in chhē-tio̍h, chiū tī in sì-kéng siúⁿ-sù in pêng-an.

16A-sat王pián伊ê媽，Má-ka，太后ê位；因為伊為A-sià-la̍h bat裝可惡ê像。A-sat剉伊ê像，搥(tûi)伊到碎碎，燒伊tī Khip-lûn溪邊。A-sat ông pián i ê má, Má-ka, thài-hō͘ ê ūi; in-ūi i ūi A-sià-la̍h bat chng khó-ò͘ⁿ ê siōng. A-sat chhò i ê siōng, tûi i kàu chhùi-chhùi, sio i tī Khip-lûn khoe-piⁿ.

17獨獨hiah-ê山頭壇iáu未tùi以色列中除去；總是A-sat ê心一世人專一。To̍k-to̍k hiah ê soaⁿ-thâu-tôaⁿ iáu-bē tùi Í-sek-lia̍t tiong tû-khì; chóng-sī A-sat ê sim chi̍t-sì-lâng choan-it.

18A-sat將伊ê老父所分別做聖，kap伊本身所分別做聖ê金銀，kap器具，lóng帶入上帝ê殿。A-sat chiong i ê lāu-pē só͘ hun-piat chòe-sèng, kap i pún-sin só͘ hun-piat chòe-sèng ê kim gûn, kap khì-kū, lóng tòa-ji̍p Siōng-tè ê tiān.

19Tùi chit時到A-sat三十五年，無koh有交戰ê事。Tùi chit-sî kàu A-sat saⁿ-cha̍p-gō͘-nî, bô koh ū kau-chiàn ê sū.