1A-sat王三十六年，以色列王Pa-sa上來攻擊猶大，起La̍h-má，beh阻擋人出入tī猶大王A-sat hia。A-sat ông saⁿ-cha̍p-la̍k nî, Í-sek-lia̍t ông Pa-sa chiūⁿ-lâi kong-kek Iû-tāi, khí La̍h-má, beh chó͘-tòng lâng chhut-ji̍p tī Iû-tāi ông A-sat hia.

2A-sat就tùi耶和華ê殿kap王宮ê府庫，the̍h出金銀，送hō͘ khiā起tī大馬色ê A-lân王Piān-hap-ta̍t，講，A-sat chiū tùi Iâ-hô-hoa ê tiān kap ông-kiong ê hú-khò͘, the̍h-chhut kim gûn, sàng hō͘ khiā-khí tī Tāi-má-sek ê A-lân ông Piān-hap-ta̍t, kóng,

3我kap你有約，親像前我ê老父kap你ê老父一樣；taⁿ我用金銀送你；請你去廢無你kap以色列王Pa-sa所立ê約，hō͘伊離開我。Góa kap lí ū iok, chhin-chhiūⁿ chêng góa ê lāu-pē kap lí ê lāu-pē chi̍t-iūⁿ; taⁿ góa ēng kim gûn sàng lí; chhiáⁿ lí khì hòe-bô lí kap Í-sek-lia̍t ông Pa-sa só͘ li̍p ê iok, hō͘ i lī-khui góa.

4Piān-hap-ta̍t聽thàn A-sat王ê話，差伊hiah-ê軍長去攻擊以色列ê城；in就攻破Í-hûn，Tàn，A-pek-má-im，以及Ná-hut-tha-lī一切府庫ê城。Piān-hap-ta̍t thiaⁿ-thàn A-sat ông ê ōe, chhe i hiah ê kun-tiúⁿ khì kong-kek Í-sek-lia̍t ê siâⁿ; in chiū kong-phòa Í-hûn, Tàn, A-pek-má-im, í-ki̍p Ná-hut-tha-lī it-chhè hú-khò͘ ê siâⁿ.

5Pa-sa聽見就停工，無koh起La̍h-má。Pa-sa thiaⁿ-kìⁿ chiū thêng-kang, bô koh khí La̍h-má.

6Tùi án-ni， A-sat王chhōa猶大眾人；in就搬徙Pa-sa所用來起La̍h-má ê石頭kap chhâ，用伊來起Ka-pa kap Bí-su-pa。Tùi án-ni A-sat ông chhōa Iû-tāi chèng-lâng; in chiū poaⁿ-sóa Pa-sa só͘ ēng lâi khí La̍h-má ê chio̍h-thâu kap chhâ, ēng i lâi khí Ka-pa kap Bí-su-pa.

7Hit時先見Hap-ná-nî來見猶大王A-sat，kā伊講，因為你óa靠A-lân王，無óa靠耶和華你ê上帝，所以A-lân王ê軍兵脫離你ê手。Hit-sî sian-kiàn Hap-ná-nî lâi kìⁿ Iû-tāi ông A-sat, kā i kóng, In-ūi lí óa-khò A-lân ông, bô óa-khò Iâ-hô-hoa lí ê Siōng-tè, só͘-í A-lân ông ê kun-peng thoat-lī lí ê chhiú.

8Kó͘-si̍t人kap Lō͘-pí人kiám m̄是大ê軍隊，有chōe-chōe戰車kap馬兵mah？獨獨因為你óa靠耶和華，伊就將in交tī你ê手。Kó͘-si̍t lâng kap Lō͘-pí lâng kiám m̄-sī tōa ê kun-tūi, ū chōe-chōe chiàn-chhia kap bé-peng mah? To̍k-to̍k in-ūi lí óa-khò Iâ-hô-hoa, I chiū chiong in kau tī lí ê chhiú.

9因為耶和華ê目睭tī全地看來看去；見若專心ǹg伊ê，伊beh顯明伊ê大氣力幫贊伊。Tī chit-ê tāi-chì，你所行是戇；因為án-ni，以後你beh有交戰ê事。In-ūi Iâ-hô-hoa ê ba̍k-chiu tī choân-tōe khòaⁿ-lâi khòaⁿ-khì; kìⁿ-nā choan-sim ǹg I ê, I beh hián-bêng I ê tōa khùi-la̍t pang-chān i. Tī chit ê tāi-chì, lí só͘ kiâⁿ sī gōng; in-ūi án-ni, í-āu lí beh ū kau-chiàn ê sū.

10A-sat就受氣先見，關伊tī監裡；因為伊為tio̍h chit件事大受氣。Hit時A-sat也pháiⁿ款待百姓中kúi-nā人。A-sat chiū siū-khì sian-kiàn, koaiⁿ i tī kaⁿ--nih; in-ūi i ūi-tio̍h chit-kiāⁿ sū tōa siū-khì. Hit-sî A-sat iā pháiⁿ khoán-thāi peh-sìⁿ-tiong kúi-nā lâng.

11A-sat所行ê事，對頭到尾，lóng記tī猶大kap以色列chiah-ê王ê記錄。A-sat só͘ kiâⁿ ê sū, tùi-thâu kàu-bé, lóng kì tī Iû-tāi kap Í-sek-lia̍t chiah ê ông ê kì-lio̍k.

12A-sat王三十九年，伊ê腳有破病，病真傷重。破病ê時無求耶和華，獨獨去求醫生。A-sat ông saⁿ-cha̍p-káu--nî, i ê kha ū phòa-pīⁿ, pīⁿ chin siong-tiōng. Phòa-pīⁿ ê sî bô kiû Iâ-hô-hoa, to̍k-to̍k khì kiû i-seng.

13A-sat做王四十一年就死；kap伊ê列祖相kap睏；A-sat chòe ông sì-cha̍p-it nî chiū sí; kap i ê lia̍t-chó͘ saⁿ-kap khùn;

14埋葬tī伊家己ê墓，就是伊tī大衛ê城為家己所鑿ê，hē tī眠床裡；伊ê眠床有芳香滿滿，就是照調和香ê法所chhòng-ê。百姓為tio̍h伊行chōe-chōe 燒 ê禮數。bâi-chòng tī i ka-kī ê bōng, chiū-sī i tī Tāi-pi̍t ê siâⁿ ūi ka-kī só͘ chha̍k ê, hē tī bîn-chhn̂g--nih; i ê bîn-chhn̂g ū phang-hiuⁿ móa-móa, chiū-sī chiàu tiau-hô hiuⁿ ê hoat só͘ chhòng--ê. Peh-sìⁿ ūi-tio̍h i kiâⁿ chōe-chōe sio ê lé-sò͘.

1A-sat ê kiáⁿ Iok-sa-hoat續接伊做王，家己強盛，抵敵以色列。A-sat ê kiáⁿ Iok-sa-hoat sòa-chiap i chòe-ông, ka-kī kiông-sēng, tí-te̍k Í-sek-lia̍t.

2安置軍兵tī猶大hiah-ê堅固ê城，各設防守ê兵tī猶大地，kap伊ê老父A-sat所取Í-hoat-liân hiah-ê城。An-tì kun-peng tī Iû-tāi hiah ê kian-kò͘ ê siâⁿ, kok siat hông-siú ê peng tī Iû-tāi tōe, kap i ê lāu-pē A-sat só͘ chhú Í-hoat-liân hiah ê siâⁿ.

3耶和華kap Iok-sa-hoat tī-teh，因為伊行伊ê祖大衛起頭行ê路，無chhē hiah-ê Pa-le̍k；Iâ-hô-hoa kap Iok-sa-hoat tī-teh, in-ūi i kiâⁿ i ê chó͘ Tāi-pi̍t khí-thâu kiâⁿ ê lō͘, bô chhē hiah ê Pa-le̍k;

4獨獨chhē伊ê老父ê上帝，行伊ê誡命，無照以色列人ê所行。to̍k-to̍k chhē i ê lāu-pē ê Siōng-tè, kiâⁿ I ê kài-bēng, bô chiàu Í-sek-lia̍t lâng ê só͘ kiâⁿ.

5所以耶和華堅固伊ê國位，猶大眾人獻禮物hō͘ Iok-sa-hoat。伊就有chōe-chōe貨財kap榮光。Só͘-í Iâ-hô-hoa kian-kò͘ i ê kok-ūi, Iû-tāi chèng-lâng hiàn lé-mi̍h hō͘ Iok-sa-hoat. I chiū ū chōe-chōe hè-châi kap êng-kng.

6伊奮志行耶和華ê道路；koh tùi猶大除去hiah-ê山頭壇，kap hiah-ê A-sià-la̍h。I hùn-chì kiâⁿ Iâ-hô-hoa ê tō-lō͘; koh tùi Iû-tāi tû-khì hiah ê soaⁿ-thâu-tôaⁿ, kap hiah ê A-sià-la̍h.

7伊做王第三年就差伊ê人臣Piān-hâi-i-le̍k、Gô-pa-tí、Sat-ka-lī-ngá、Ná-thán-gia̍p、Bí-kai-a，去猶大ta̍k-ê城教示百姓。I chòe ông tē-saⁿ nî chiū chhe i ê jîn-sîn Piān-hâi-i-le̍k, Gô-pa-tí, Sat-ka-lī-ngá, Ná-thán-gia̍p, Bí-kai-a, khì Iû-tāi ta̍k ê siâⁿ kà-sī peh-sìⁿ.

8Kap in去ê有利未人，Sī-má-ngá、Nî-thàm-ngá、Se-pa-tē-ngá、A-sat-hek、Sī-bí-la̍h-boa̍t、約拿單、A-to-nî-ngá、To-pí-ngá、Tô-pa-to-nî-ngá；koh有祭司Í-lī-sa-má、Iok-lân，也kap in去。Kap in khì ê ū Lī-bī lâng, Sī-má-ngá, Nî-thàm-ngá, Se-pa-tē-ngá, A-sat-hek, Sī-bí-la̍h-boa̍t, Iok-ná-tan, A-to-nî-ngá, To-pí-ngá, Tô-pa-to-nî-ngá; koh ū chè-si Í-lī-sa-má, Iok-lân, iā kap in khì.

9In tī猶大教示，有帶耶和華律法ê冊，遍行猶大ta̍k-ê城，教示百姓。In tī Iû-tāi kà-sī, ū tòa Iâ-hô-hoa lu̍t-hoat ê chheh, piàn-kiâⁿ Iû-tāi ta̍k ê siâⁿ, kà-sī peh-sìⁿ.

10耶和華hō͘猶大四圍ta̍k邦國真驚，m̄敢kap Iok-sa-hoat交戰。Iâ-hô-hoa hō͘ Iû-tāi sì-ûi ta̍k pang-kok chin kiaⁿ, m̄-káⁿ kap Iok-sa-hoat kau-chiàn.

11腓利士人有ê送禮物進貢銀hō͘ Iok-sa-hoat；阿拉伯人也帶kui群cheng-siⁿ hō͘伊，就是綿羊káng七千七百隻，山羊káng七千七百隻。Hui-lī-sū lâng ū-ê sàng lé-mi̍h chìn-kòng gûn hō͘ Iok-sa-hoat; A-la̍h-pek lâng iā tòa kui-kûn cheng-siⁿ hō͘ i, chiū-sī mî-iûⁿ-káng chhit-chheng chhit-pah chiah, soaⁿ-iûⁿ-káng chhit-chheng chhit-pah chiah.

12Iok-sa-hoat漸漸強大到極，tī猶大起營寨kap府庫ê城。Iok-sa-hoat chiām-chiām kiông-tōa kàu-ke̍k, tī Iû-tāi khí iâⁿ-chē kap hú-khò͘ ê siâⁿ.

13伊tī猶大chiah-ê城有chōe-chōe工作： koh tī耶路撒冷有戰士，就是大權能ê勇士。I tī Iû-tāi chiah ê siâⁿ ū chōe-chōe kong-chok: koh tī Iâ-lō͘-sat-léng ū chiàn-sū, chiū-sī tōa koân-lêng ê ióng-sū.

14In ê數額，照宗族記tī下面。猶大族ê千總： Ap-ná做統領，chhōa大權能ê勇士三十萬；In ê siàu-gia̍h, chiàu chong-cho̍k kì tī ē-bīn. Iû-tāi cho̍k ê chhian-chóng: Ap-ná chòe thóng-léng, chhōa tōa koân-lêng ê ióng-sū saⁿ-cha̍p-bān;

15koh落來是統領，Iok-hap-lân，chhōa二十八萬勇士；koh lo̍h-lâi sī thóng-léng, Iok-hap-lân, chhōa jī-cha̍p-poeh-bān ióng-sū;

16koh落來是Sè-ki-lī ê kiáⁿ A-má-su-ngá，伊甘願獻家己hō͘耶和華，chhōa大權能ê勇士二十萬。koh lo̍h-lâi sī Sè-ki-lī ê kiáⁿ A-má-su-ngá, i kam-goān hiàn ka-kī hō͘ Iâ-hô-hoa, chhōa tōa koân-lêng ê ióng-sū jī-cha̍p-bān.

17便雅憫族有大權能ê勇士Í-lī-ngá-tāi，chhōa kia̍h弓箭kap kōaⁿ汗屏牌ê二十萬；Piān-ngá-bín cho̍k ū tōa koân-lêng ê ióng-sū Í-lī-ngá-tāi, chhōa kia̍h keng-chìⁿ kap kōaⁿ pîn-pâi-ê jī-cha̍p-bān;

18koh落來是Iok-sat-poat chhōa備辦交戰ê十八萬。koh lo̍h-lâi sī Iok-sat-poat chhōa pī-pān kau-chiàn-ê cha̍p-poeh-bān.

19Chiah-ê lóng是伺候王ê，另外有王所安置tī猶大ta̍k-ê堅固ê城ê。Chiah ê lóng sī su-hāu ông--ê, lēng-gōa ū ông só͘ an-tì tī Iû-tāi ta̍k ê kian-kò͘ ê siâⁿ--ê.

1Iok-sa-hoat有chōe-chōe貨財kap榮光，就kap A-hap結親。Iok-sa-hoat ū chōe-chōe hè-châi kap êng-kng, chiū kap A-hap kiat-chhin.

2過kúi-nā年，伊落去撒馬利亞見A-hap；A-hap為tio̍h伊kap tè伊ê百姓，thâi chōe-chōe牛、羊，勸伊kap伊相kap去Ki-lia̍t ê La̍h-boa̍t。Kè kúi-nā nî, i lo̍h-khì Sat-má-lī-a kìⁿ A-hap; A-hap ūi-tio̍h i kap tè i ê peh-sìⁿ, thâi chōe-chōe gû, iûⁿ, khǹg i kap i saⁿ-kap khì Ki-lia̍t ê La̍h-boa̍t.

3以色列王A-hap kā猶大王Iok-sa-hoat講，你beh kap我去Ki-lia̍t ê La̍h-boa̍t á-m̄？應講，我親像你，我ê百姓親像你ê百姓，阮beh kap你去交戰。Í-sek-lia̍t ông A-hap kā Iû-tāi ông Iok-sa-hoat kóng, Lí beh kap góa khì Ki-lia̍t ê La̍h-boa̍t á-m̄? Ìn kóng, Góa chhin-chhiūⁿ lí, góa ê peh-sìⁿ chhin-chhiūⁿ lí ê peh-sìⁿ, goán beh kap lí khì kau-chiàn.

4Iok-sa-hoat kā以色列王講，請你事先問耶和華ê意思。Iok-sa-hoat kā Í-sek-lia̍t ông kóng, Chhiáⁿ lí tāi-seng mn̄g Iâ-hô-hoa ê ì-sù.

5以色列王就聚集先知四百人，問in講，阮tio̍h上去Ki-lia̍t ê La̍h-boa̍t來交戰，á是tio̍h soah ah？In應講，Thang上去；因為上帝beh用in交tī王ê手。Í-sek-lia̍t ông chiū chū-chi̍p sian-ti sì-pah lâng, mn̄g in kóng, Goán tio̍h chiūⁿ khì Ki-lia̍t ê La̍h-boa̍t lâi kau-chiàn, á-sī tio̍h soah ah? In ìn kóng, Thang chiūⁿ-khì; in-ūi Siōng-tè beh ēng in kau tī ông ê chhiú.

6Iok-sa-hoat講，Tī-chia kiám無iáu有耶和華ê先知hō͘咱thang對伊來問mah？Iok-sa-hoat kóng, Tī-chia kiám bô iáu ū Iâ-hô-hoa ê sian-ti hō͘ lán thang tùi i lâi mn̄g mah?

7以色列王kā Iok-sa-hoat講，iáu有一人咱thang對伊來問耶和華；總是我怨恨伊，因為伊所讖語我ê，無一項好，只有常常講災厄nā-tiāⁿ。Chit人是Im-la̍h ê kiáⁿ Bí-kai-ngá。Iok-sa-hoat講，請王莫得án-ni講。Í-sek-lia̍t ông kā Iok-sa-hoat kóng, Iáu ū chi̍t-lâng lán thang tùi i lâi mn̄g Iâ-hô-hoa; chóng-sī góa oàn-hūn i, in-ūi i só͘ chhàm-gú góa ê, bô chi̍t-hāng hó, chí-ū siông-siông kóng chai-ē nā-tiāⁿ. Chit lâng sī Im-la̍h ê kiáⁿ Bí-kai-ngá. Iok-sa-hoat kóng, Chhiáⁿ ông bo̍h-tit án-ni kóng.

8以色列王就召一個官員來，講，你去叫Im-la̍h ê kiáⁿ Bí-kai-ngá緊緊來。Í-sek-lia̍t ông chiū tiàu chi̍t ê koaⁿ-oân lâi, kóng, Lí khì kiò Im-la̍h ê kiáⁿ Bí-kai-ngá kín-kín lâi.

9以色列王kap猶大王Iok-sa-hoat ta̍k-ê坐伊ê座位，穿禮服，坐tī撒馬利亞城門口闊ê所在；眾先知ta̍k-ê tī in ê面前讖語。Í-sek-lia̍t ông kap Iû-tāi ông Iok-sa-hoat ta̍k-ê chē i ê chō-ūi, chhēng lé-ho̍k, chē tī Sat-má-lī-a siâⁿ-mn̂g-kháu khoah ê só͘-chāi; chèng sian-ti ta̍k-ê tī in ê bīn-chêng chhàm-gú.

10Ki-ná-ná ê kiáⁿ Se-tí-ka做鐵角，講，耶和華án-ni講，你beh用chiah-ê tak A-lân人，到in滅無。Ki-ná-ná ê kiáⁿ Se-tí-ka chòe thih-kak, kóng, Iâ-hô-hoa án-ni kóng, Lí beh ēng chiah-ê tak A-lân lâng, kàu in bia̍t-bô.

11眾先知lóng án-ni讖語講，Thang上去Ki-lia̍t ê La̍h-boa̍t，beh得勝；因為耶和華beh將伊交tī王ê手。Chèng sian-ti lóng án-ni chhàm-gú kóng, Thang chiūⁿ-khì Ki-lia̍t ê La̍h-boa̍t, beh tek-sèng; in-ūi Iâ-hô-hoa beh chiong i kau tī ông ê chhiú.

12Hit-ê去叫Bí-kai-ngá ê使者kā伊講，看ah，眾先知lóng講一樣話，對王講好事；求你所講ê kap in相同，平平講好話。Hit-ê khì kiò Bí-kai-ngá ê sù-chiá kā i kóng, Khòaⁿ ah, chèng sian-ti lóng kóng chi̍t-iūⁿ ōe, tùi ông kóng hó-sū; kiû lí só͘ kóng-ê kap in saⁿ-tâng, pîⁿ-pîⁿ kóng hó-ōe.

13Bí-kai-ngá講，我kí永活ê耶和華chiù-chōa來講，我ê上帝講甚麼，我beh講伊。Bí-kai-ngá kóng, Góa kí éng-oa̍h ê Iâ-hô-hoa chiù-chōa lâi kóng, góa ê Siōng-tè kóng sím-mi̍h, góa beh kóng i.

14Bí-kai-ngá到王ê面前，王問伊講，Bí-kai-ngá ah，阮tio̍h上去Ki-lia̍t ê La̍h-boa̍t來交戰，á是tio̍h soah ah？伊應講，Thang上去，beh得勝；因為in beh受交付tī lín ê手。Bí-kai-ngá kàu ông ê bīn-chêng, ông mn̄g i kóng, Bí-kai-ngá ah, goán tio̍h chiūⁿ-khì Ki-lia̍t ê La̍h-boa̍t lâi kau-chiàn, á-sī tio̍h soah ah? I ìn kóng, Thang chiūⁿ-khì, beh tek-sèng; in-ūi in beh siū kau-hù tī lín ê chhiú.

15王對伊講，我tio̍h kúi-pái kah你chiù-chōa，你託耶和華ê名，只有tio̍h用真實kā我講。Ông tùi i kóng, Góa tio̍h kúi-pái kah lí chiù-chōa, lí thok Iâ-hô-hoa ê miâ, chí-ū tio̍h ēng chin-si̍t kā góa kóng.

16Bí-kai-ngá講，我看見以色列眾百姓四散tī山裡，親像無牧者ê羊一般；耶和華án-ni講，Chiah-ê無主人；in ta̍k-ê thang平安tò去in ê家。Bí-kai-ngá kóng, Góa khòaⁿ-kìⁿ Í-sek-lia̍t chèng peh-sìⁿ sì-sòaⁿ tī soaⁿ--nih, chhin-chhiūⁿ bô bo̍k-chiá ê iûⁿ chi̍t-poaⁿ; Iâ-hô-hoa án-ni kóng, Chiah-ê bô chú-lâng; in ta̍k-ê thang pêng-an tò-khì in ê ke.

17以色列王kā Iok-sa-hoat講，我kiám無kā你講，Chit人所beh讖語我ê，無講好話，只有災厄nā-tiāⁿ？Í-sek-lia̍t ông kā Iok-sa-hoat kóng, Góa kiám bô kā lí kóng, Chit lâng só͘ beh chhàm-gú góa ê, bô kóng hó-ōe, chí-ū chai-ē nā-tiāⁿ?

18Bí-kai-ngá講，所以lín tio̍h聽耶和華ê話；我看見耶和華坐tī寶座，天頂ê萬軍khiā tī伊ê左右。Bí-kai-ngá kóng, Só͘-í lín tio̍h thiaⁿ Iâ-hô-hoa ê ōe; góa khòaⁿ-kìⁿ Iâ-hô-hoa chē tī pó-chō, thiⁿ-téng ê bān-kun khiā tī I ê chó-iū.

19耶和華講，Chī-chūi beh引誘以色列王A-hap，hō͘伊上去Ki-lia̍t ê La̍h-boa̍t，死tī-hia ah？Chit-ê講án-ni，hit-ê講àn-ni。Iâ-hô-hoa kóng, Chī-chūi beh ín-iú Í-sek-lia̍t ông A-hap, hō͘ i chiūⁿ-khì Ki-lia̍t ê La̍h-boa̍t, sí tī-hia ah? Chit-ê kóng án-ni, hit-ê kóng àn-ni.

20後來有一個神出來，khiā tī耶和華ê面前，講，我beh引誘伊。耶和華問伊講，你beh用甚麼法度？Āu-lâi ū chi̍t ê sîn chhut-lâi, khiā tī Iâ-hô-hoa ê bīn-chêng, kóng, Góa beh ín-iú i. Iâ-hô-hoa mn̄g i kóng, Lí beh ēng sím-mi̍h hoat-tō͘?

21伊講，我beh出去做白賊ê神，tī伊眾先知ê嘴。耶和華講，你beh引誘伊，也beh成伊；出去來做án-ni。I kóng, Góa beh chhut-khì chòe pe̍h-chha̍t ê sîn, tī i chèng sian-ti ê chhùi. Iâ-hô-hoa kóng, Lí beh ín-iú i, iā beh chiâⁿ--i; chhut-khì lâi chòe án-ni.

22Taⁿ耶和華用白賊ê神入tī你chiah-ê先知ê嘴。耶和華論到你有講災厄。Taⁿ Iâ-hô-hoa ēng pe̍h-chha̍t ê sîn ji̍p tī lí chiah ê sian-ti ê chhùi. Iâ-hô-hoa lūn-kàu lí ū kóng chai-ē.

23Ki-ná-ná ê kiáⁿ Se-tí-ka進前，siàn Bí-kai-ngá ê嘴phóe，講，耶和華ê神tùi toh落一條路離開我來kap你講ah？Ki-ná-ná ê kiáⁿ Se-tí-ka chìn-chêng, siàn Bí-kai-ngá ê chhùi-phóe, kóng, Iâ-hô-hoa ê sîn tùi toh-lo̍h chi̍t-tiâu-lō͘ lī-khui góa lâi kap lí kóng ah?

24Bí-kai-ngá講，看ah，你入內房家己bih，hit日就beh看見。Bí-kai-ngá kóng, Khòaⁿ ah, lí ji̍p lāi-pâng ka-kī bih, hit-ji̍t chiū beh khòaⁿ-kìⁿ.

25以色列王講，Tio̍h帶Bí-kai-ngá去交城守A-bûn，kap王ê kiáⁿ Iok-a-si，講，Í-sek-lia̍t ông kóng, Tio̍h tòa Bí-kai-ngá khì kau siâⁿ-siú A-bûn, kap ông ê kiáⁿ Iok-a-si, kóng,

26王án-ni講，用chit人關tī監裡，用艱苦ê餅艱苦ê水hō͘伊食，thèng候我平安tò來。Ông án-ni kóng, Ēng chit lâng koaiⁿ tī kaⁿ--nih, ēng kan-khó͘ ê piáⁿ kan-khó͘ ê chúi hō͘ i chia̍h, thèng-hāu góa pêng-an tò-lâi.

27Bí-kai-ngá講，你若真正平安tò來，就是耶和華無託我講。Koh講，chiah-ê百姓ah，lín lóng tio̍h聽。Bí-kai-ngá kóng, Lí nā chin-chiàⁿ pêng-an tò-lâi, chiū-sī Iâ-hô-hoa bô thok góa kóng. Koh kóng, Chiah ê peh-sìⁿ ah, lín lóng tio̍h thiaⁿ.

28以色列王kap猶大王Iok-sa-hoat上去Ki-lia̍t ê La̍h-boa̍t。Í-sek-lia̍t ông kap Iû-tāi ông Iok-sa-hoat chiūⁿ-khì Ki-lia̍t ê La̍h-boa̍t.

29以色列王kā Iok-sa-hoat講，我beh改妝上陣，你thang穿王服。以色列王就改妝，in就上陣。Í-sek-lia̍t ông kā Iok-sa-hoat kóng, Góa beh kái-chong chiūⁿ-tīn, lí thang chhēng ông-ho̍k. Í-sek-lia̍t ông chiū kái-chong, in chiū chiūⁿ-tīn.

30A-lân王有吩咐伊ê戰車ê官長講，無論大細m̄-thang kap in交戰，只有kap以色列王交戰。A-lân ông ū hoan-hù i ê chiàn-chhia ê koaⁿ-tiúⁿ kóng, Bô-lūn tōa-sòe m̄-thang kap in kau-chiàn, chí-ū kap Í-sek-lia̍t ông kau-chiàn.

31戰車ê官長看見Iok-sa-hoat就講，這是以色列王，就oa̍t過去beh kap伊交戰。Iok-sa-hoat就哮救，耶和華就幫贊伊；上帝也感動in離開伊。Chiàn-chhia ê koaⁿ-tiúⁿ khòaⁿ-kìⁿ Iok-sa-hoat chiū kóng, Che sī Í-sek-lia̍t ông, chiū oa̍t-kè--khì beh kap i kau-chiàn. Iok-sa-hoat chiū háu-kiù, Iâ-hô-hoa chiū pang-chān i; Siōng-tè iā kám-tōng in lī-khui i.

32戰車ê官長看見m̄是以色列王就oa̍t-tńg無追伊。Chiàn-chhia ê koaⁿ-tiúⁿ khòaⁿ-kìⁿ m̄-sī Í-sek-lia̍t ông chiū oa̍t-tńg bô tui i.

33有一人偶然開弓，射入以色列王戰甲ê kap-chōa；王kā趕車ê講，你oa̍t-tńg手，帶我出陣；因為我tio̍h重傷lah。Ū chi̍t-lâng ngó͘-jiân khui-keng, siā-ji̍p Í-sek-lia̍t ông chiàn-kah ê kap-chōa; ông kā kóaⁿ-chhia--ê kóng, Lí oa̍t-tńg chhiú, tòa góa chhut-tīn; in-ūi góa tio̍h tāng-siong lah.

34Hit日交戰ê勢面ná猛烈；以色列王勉強khiā tī車裡，抵擋A-lân人，到ê-hng；差不多日落ê時，就死。Hit-ji̍t kau-chiàn ê sè-bīn ná béng-lia̍t; Í-sek-lia̍t ông bián-kióng khiā tī chhia--nih, tí-tng A-lân lâng, kàu ê-hng; chha-put-to ji̍t-lo̍h ê sî, chiū sí.