1Iok-sa-hoat有chōe-chōe貨財kap榮光，就kap A-hap結親。Iok-sa-hoat ū chōe-chōe hè-châi kap êng-kng, chiū kap A-hap kiat-chhin.

2過kúi-nā年，伊落去撒馬利亞見A-hap；A-hap為tio̍h伊kap tè伊ê百姓，thâi chōe-chōe牛、羊，勸伊kap伊相kap去Ki-lia̍t ê La̍h-boa̍t。Kè kúi-nā nî, i lo̍h-khì Sat-má-lī-a kìⁿ A-hap; A-hap ūi-tio̍h i kap tè i ê peh-sìⁿ, thâi chōe-chōe gû, iûⁿ, khǹg i kap i saⁿ-kap khì Ki-lia̍t ê La̍h-boa̍t.

3以色列王A-hap kā猶大王Iok-sa-hoat講，你beh kap我去Ki-lia̍t ê La̍h-boa̍t á-m̄？應講，我親像你，我ê百姓親像你ê百姓，阮beh kap你去交戰。Í-sek-lia̍t ông A-hap kā Iû-tāi ông Iok-sa-hoat kóng, Lí beh kap góa khì Ki-lia̍t ê La̍h-boa̍t á-m̄? Ìn kóng, Góa chhin-chhiūⁿ lí, góa ê peh-sìⁿ chhin-chhiūⁿ lí ê peh-sìⁿ, goán beh kap lí khì kau-chiàn.

4Iok-sa-hoat kā以色列王講，請你事先問耶和華ê意思。Iok-sa-hoat kā Í-sek-lia̍t ông kóng, Chhiáⁿ lí tāi-seng mn̄g Iâ-hô-hoa ê ì-sù.

5以色列王就聚集先知四百人，問in講，阮tio̍h上去Ki-lia̍t ê La̍h-boa̍t來交戰，á是tio̍h soah ah？In應講，Thang上去；因為上帝beh用in交tī王ê手。Í-sek-lia̍t ông chiū chū-chi̍p sian-ti sì-pah lâng, mn̄g in kóng, Goán tio̍h chiūⁿ khì Ki-lia̍t ê La̍h-boa̍t lâi kau-chiàn, á-sī tio̍h soah ah? In ìn kóng, Thang chiūⁿ-khì; in-ūi Siōng-tè beh ēng in kau tī ông ê chhiú.

6Iok-sa-hoat講，Tī-chia kiám無iáu有耶和華ê先知hō͘咱thang對伊來問mah？Iok-sa-hoat kóng, Tī-chia kiám bô iáu ū Iâ-hô-hoa ê sian-ti hō͘ lán thang tùi i lâi mn̄g mah?

7以色列王kā Iok-sa-hoat講，iáu有一人咱thang對伊來問耶和華；總是我怨恨伊，因為伊所讖語我ê，無一項好，只有常常講災厄nā-tiāⁿ。Chit人是Im-la̍h ê kiáⁿ Bí-kai-ngá。Iok-sa-hoat講，請王莫得án-ni講。Í-sek-lia̍t ông kā Iok-sa-hoat kóng, Iáu ū chi̍t-lâng lán thang tùi i lâi mn̄g Iâ-hô-hoa; chóng-sī góa oàn-hūn i, in-ūi i só͘ chhàm-gú góa ê, bô chi̍t-hāng hó, chí-ū siông-siông kóng chai-ē nā-tiāⁿ. Chit lâng sī Im-la̍h ê kiáⁿ Bí-kai-ngá. Iok-sa-hoat kóng, Chhiáⁿ ông bo̍h-tit án-ni kóng.

8以色列王就召一個官員來，講，你去叫Im-la̍h ê kiáⁿ Bí-kai-ngá緊緊來。Í-sek-lia̍t ông chiū tiàu chi̍t ê koaⁿ-oân lâi, kóng, Lí khì kiò Im-la̍h ê kiáⁿ Bí-kai-ngá kín-kín lâi.

9以色列王kap猶大王Iok-sa-hoat ta̍k-ê坐伊ê座位，穿禮服，坐tī撒馬利亞城門口闊ê所在；眾先知ta̍k-ê tī in ê面前讖語。Í-sek-lia̍t ông kap Iû-tāi ông Iok-sa-hoat ta̍k-ê chē i ê chō-ūi, chhēng lé-ho̍k, chē tī Sat-má-lī-a siâⁿ-mn̂g-kháu khoah ê só͘-chāi; chèng sian-ti ta̍k-ê tī in ê bīn-chêng chhàm-gú.

10Ki-ná-ná ê kiáⁿ Se-tí-ka做鐵角，講，耶和華án-ni講，你beh用chiah-ê tak A-lân人，到in滅無。Ki-ná-ná ê kiáⁿ Se-tí-ka chòe thih-kak, kóng, Iâ-hô-hoa án-ni kóng, Lí beh ēng chiah-ê tak A-lân lâng, kàu in bia̍t-bô.

11眾先知lóng án-ni讖語講，Thang上去Ki-lia̍t ê La̍h-boa̍t，beh得勝；因為耶和華beh將伊交tī王ê手。Chèng sian-ti lóng án-ni chhàm-gú kóng, Thang chiūⁿ-khì Ki-lia̍t ê La̍h-boa̍t, beh tek-sèng; in-ūi Iâ-hô-hoa beh chiong i kau tī ông ê chhiú.

12Hit-ê去叫Bí-kai-ngá ê使者kā伊講，看ah，眾先知lóng講一樣話，對王講好事；求你所講ê kap in相同，平平講好話。Hit-ê khì kiò Bí-kai-ngá ê sù-chiá kā i kóng, Khòaⁿ ah, chèng sian-ti lóng kóng chi̍t-iūⁿ ōe, tùi ông kóng hó-sū; kiû lí só͘ kóng-ê kap in saⁿ-tâng, pîⁿ-pîⁿ kóng hó-ōe.

13Bí-kai-ngá講，我kí永活ê耶和華chiù-chōa來講，我ê上帝講甚麼，我beh講伊。Bí-kai-ngá kóng, Góa kí éng-oa̍h ê Iâ-hô-hoa chiù-chōa lâi kóng, góa ê Siōng-tè kóng sím-mi̍h, góa beh kóng i.

14Bí-kai-ngá到王ê面前，王問伊講，Bí-kai-ngá ah，阮tio̍h上去Ki-lia̍t ê La̍h-boa̍t來交戰，á是tio̍h soah ah？伊應講，Thang上去，beh得勝；因為in beh受交付tī lín ê手。Bí-kai-ngá kàu ông ê bīn-chêng, ông mn̄g i kóng, Bí-kai-ngá ah, goán tio̍h chiūⁿ-khì Ki-lia̍t ê La̍h-boa̍t lâi kau-chiàn, á-sī tio̍h soah ah? I ìn kóng, Thang chiūⁿ-khì, beh tek-sèng; in-ūi in beh siū kau-hù tī lín ê chhiú.

15王對伊講，我tio̍h kúi-pái kah你chiù-chōa，你託耶和華ê名，只有tio̍h用真實kā我講。Ông tùi i kóng, Góa tio̍h kúi-pái kah lí chiù-chōa, lí thok Iâ-hô-hoa ê miâ, chí-ū tio̍h ēng chin-si̍t kā góa kóng.

16Bí-kai-ngá講，我看見以色列眾百姓四散tī山裡，親像無牧者ê羊一般；耶和華án-ni講，Chiah-ê無主人；in ta̍k-ê thang平安tò去in ê家。Bí-kai-ngá kóng, Góa khòaⁿ-kìⁿ Í-sek-lia̍t chèng peh-sìⁿ sì-sòaⁿ tī soaⁿ--nih, chhin-chhiūⁿ bô bo̍k-chiá ê iûⁿ chi̍t-poaⁿ; Iâ-hô-hoa án-ni kóng, Chiah-ê bô chú-lâng; in ta̍k-ê thang pêng-an tò-khì in ê ke.

17以色列王kā Iok-sa-hoat講，我kiám無kā你講，Chit人所beh讖語我ê，無講好話，只有災厄nā-tiāⁿ？Í-sek-lia̍t ông kā Iok-sa-hoat kóng, Góa kiám bô kā lí kóng, Chit lâng só͘ beh chhàm-gú góa ê, bô kóng hó-ōe, chí-ū chai-ē nā-tiāⁿ?

18Bí-kai-ngá講，所以lín tio̍h聽耶和華ê話；我看見耶和華坐tī寶座，天頂ê萬軍khiā tī伊ê左右。Bí-kai-ngá kóng, Só͘-í lín tio̍h thiaⁿ Iâ-hô-hoa ê ōe; góa khòaⁿ-kìⁿ Iâ-hô-hoa chē tī pó-chō, thiⁿ-téng ê bān-kun khiā tī I ê chó-iū.

19耶和華講，Chī-chūi beh引誘以色列王A-hap，hō͘伊上去Ki-lia̍t ê La̍h-boa̍t，死tī-hia ah？Chit-ê講án-ni，hit-ê講àn-ni。Iâ-hô-hoa kóng, Chī-chūi beh ín-iú Í-sek-lia̍t ông A-hap, hō͘ i chiūⁿ-khì Ki-lia̍t ê La̍h-boa̍t, sí tī-hia ah? Chit-ê kóng án-ni, hit-ê kóng àn-ni.

20後來有一個神出來，khiā tī耶和華ê面前，講，我beh引誘伊。耶和華問伊講，你beh用甚麼法度？Āu-lâi ū chi̍t ê sîn chhut-lâi, khiā tī Iâ-hô-hoa ê bīn-chêng, kóng, Góa beh ín-iú i. Iâ-hô-hoa mn̄g i kóng, Lí beh ēng sím-mi̍h hoat-tō͘?

21伊講，我beh出去做白賊ê神，tī伊眾先知ê嘴。耶和華講，你beh引誘伊，也beh成伊；出去來做án-ni。I kóng, Góa beh chhut-khì chòe pe̍h-chha̍t ê sîn, tī i chèng sian-ti ê chhùi. Iâ-hô-hoa kóng, Lí beh ín-iú i, iā beh chiâⁿ--i; chhut-khì lâi chòe án-ni.

22Taⁿ耶和華用白賊ê神入tī你chiah-ê先知ê嘴。耶和華論到你有講災厄。Taⁿ Iâ-hô-hoa ēng pe̍h-chha̍t ê sîn ji̍p tī lí chiah ê sian-ti ê chhùi. Iâ-hô-hoa lūn-kàu lí ū kóng chai-ē.

23Ki-ná-ná ê kiáⁿ Se-tí-ka進前，siàn Bí-kai-ngá ê嘴phóe，講，耶和華ê神tùi toh落一條路離開我來kap你講ah？Ki-ná-ná ê kiáⁿ Se-tí-ka chìn-chêng, siàn Bí-kai-ngá ê chhùi-phóe, kóng, Iâ-hô-hoa ê sîn tùi toh-lo̍h chi̍t-tiâu-lō͘ lī-khui góa lâi kap lí kóng ah?

24Bí-kai-ngá講，看ah，你入內房家己bih，hit日就beh看見。Bí-kai-ngá kóng, Khòaⁿ ah, lí ji̍p lāi-pâng ka-kī bih, hit-ji̍t chiū beh khòaⁿ-kìⁿ.

25以色列王講，Tio̍h帶Bí-kai-ngá去交城守A-bûn，kap王ê kiáⁿ Iok-a-si，講，Í-sek-lia̍t ông kóng, Tio̍h tòa Bí-kai-ngá khì kau siâⁿ-siú A-bûn, kap ông ê kiáⁿ Iok-a-si, kóng,

26王án-ni講，用chit人關tī監裡，用艱苦ê餅艱苦ê水hō͘伊食，thèng候我平安tò來。Ông án-ni kóng, Ēng chit lâng koaiⁿ tī kaⁿ--nih, ēng kan-khó͘ ê piáⁿ kan-khó͘ ê chúi hō͘ i chia̍h, thèng-hāu góa pêng-an tò-lâi.

27Bí-kai-ngá講，你若真正平安tò來，就是耶和華無託我講。Koh講，chiah-ê百姓ah，lín lóng tio̍h聽。Bí-kai-ngá kóng, Lí nā chin-chiàⁿ pêng-an tò-lâi, chiū-sī Iâ-hô-hoa bô thok góa kóng. Koh kóng, Chiah ê peh-sìⁿ ah, lín lóng tio̍h thiaⁿ.

28以色列王kap猶大王Iok-sa-hoat上去Ki-lia̍t ê La̍h-boa̍t。Í-sek-lia̍t ông kap Iû-tāi ông Iok-sa-hoat chiūⁿ-khì Ki-lia̍t ê La̍h-boa̍t.

29以色列王kā Iok-sa-hoat講，我beh改妝上陣，你thang穿王服。以色列王就改妝，in就上陣。Í-sek-lia̍t ông kā Iok-sa-hoat kóng, Góa beh kái-chong chiūⁿ-tīn, lí thang chhēng ông-ho̍k. Í-sek-lia̍t ông chiū kái-chong, in chiū chiūⁿ-tīn.

30A-lân王有吩咐伊ê戰車ê官長講，無論大細m̄-thang kap in交戰，只有kap以色列王交戰。A-lân ông ū hoan-hù i ê chiàn-chhia ê koaⁿ-tiúⁿ kóng, Bô-lūn tōa-sòe m̄-thang kap in kau-chiàn, chí-ū kap Í-sek-lia̍t ông kau-chiàn.

31戰車ê官長看見Iok-sa-hoat就講，這是以色列王，就oa̍t過去beh kap伊交戰。Iok-sa-hoat就哮救，耶和華就幫贊伊；上帝也感動in離開伊。Chiàn-chhia ê koaⁿ-tiúⁿ khòaⁿ-kìⁿ Iok-sa-hoat chiū kóng, Che sī Í-sek-lia̍t ông, chiū oa̍t-kè--khì beh kap i kau-chiàn. Iok-sa-hoat chiū háu-kiù, Iâ-hô-hoa chiū pang-chān i; Siōng-tè iā kám-tōng in lī-khui i.

32戰車ê官長看見m̄是以色列王就oa̍t-tńg無追伊。Chiàn-chhia ê koaⁿ-tiúⁿ khòaⁿ-kìⁿ m̄-sī Í-sek-lia̍t ông chiū oa̍t-tńg bô tui i.

33有一人偶然開弓，射入以色列王戰甲ê kap-chōa；王kā趕車ê講，你oa̍t-tńg手，帶我出陣；因為我tio̍h重傷lah。Ū chi̍t-lâng ngó͘-jiân khui-keng, siā-ji̍p Í-sek-lia̍t ông chiàn-kah ê kap-chōa; ông kā kóaⁿ-chhia--ê kóng, Lí oa̍t-tńg chhiú, tòa góa chhut-tīn; in-ūi góa tio̍h tāng-siong lah.

34Hit日交戰ê勢面ná猛烈；以色列王勉強khiā tī車裡，抵擋A-lân人，到ê-hng；差不多日落ê時，就死。Hit-ji̍t kau-chiàn ê sè-bīn ná béng-lia̍t; Í-sek-lia̍t ông bián-kióng khiā tī chhia--nih, tí-tng A-lân lâng, kàu ê-hng; chha-put-to ji̍t-lo̍h ê sî, chiū sí.

1猶大王Iok-sa-hoat平安tò去耶路撒冷到伊ê厝。Iû-tāi ông Iok-sa-hoat pêng-an tò-khì Iâ-lō͘-sat-léng kàu i ê chhù.

2先見Hap-ná-nî ê kiáⁿ Iâ-hō͘出來迎接Iok-sa-hoat王，kā伊講，你幫贊pháiⁿ人，疼怨恨耶和華ê人，合宜mah？因為án-ni耶和華ê受氣臨到你。Sian-kiàn Hap-ná-nî ê kiáⁿ Iâ-hō͘ chhut-lâi ngiâ-chih Iok-sa-hoat ông, kā i kóng, Lí pang-chān pháiⁿ-lâng, thiàⁿ oàn-hūn Iâ-hô-hoa ê lâng, ha̍p-gî mah? In-ūi án-ni Iâ-hô-hoa ê siū-khì lîm-kàu lí.

3但是你iáu有好事tī-teh；因為你tùi chit-ê地方除去A-su-tha-lio̍k，koh定tio̍h你ê心chhē上帝。Nā-sī lí iáu ū hó-sū tī-teh; in-ūi lí tùi chit ê tōe-hng tû-khì A-su-tha-lio̍k, koh tiāⁿ-tio̍h lí ê sim chhē Siōng-tè.

4Iok-sa-hoat tiàm tī耶路撒冷；後來koh出去巡視百姓ê中間，tùi別是巴到Í-hoat-liân山地，chhōa百姓歸向耶和華in列祖ê上帝。Iok-sa-hoat tiàm tī Iâ-lō͘-sat-léng; āu-lâi koh chhut-khì sûn-sī peh-sìⁿ ê tiong-kan, tùi Pia̍t-sī-pa kàu Í-hoat-liân soaⁿ-tōe, chhōa peh-sìⁿ kui-ǹg Iâ-hô-hoa in lia̍t-chó͘ ê Siōng-tè.

5Koh設立審判官tī境內，tī猶大堅固ê城；ta̍k-ê城lóng án-ni。Koh siat-li̍p sím-phòaⁿ-koaⁿ tī kéng-lāi, tī Iû-tāi kian-kò͘ ê siâⁿ; ta̍k ê siâⁿ lóng án-ni.

6Kā hiah-ê審判官講，謹慎lín ê所做；因為lín審判m̄是為tio̍h人，是為tio̍h耶和華；lín審判ê時，伊kap lín tī-teh。Kā hiah ê sím-phòaⁿ-koaⁿ kóng, Kín-sīn lín ê só͘-chòe; in-ūi lín sím-phòaⁿ m̄-sī ūi-tio̍h lâng, sī ūi-tio̍h Iâ-hô-hoa; lín sím-phòaⁿ ê sî, I kap lín tī-teh.

7Taⁿ lín tio̍h驚畏耶和華；謹慎做tāi-chì；因為耶和華咱ê上帝無有不義，無偏袒，無受pò͘賂。Taⁿ lín tio̍h kiaⁿ-ùi Iâ-hô-hoa; kín-sīn chòe tāi-chì; in-ūi Iâ-hô-hoa lán ê Siōng-tè bô-ū put-gī, bô phian-thán, bô siū pò͘-lō͘.

8Iok-sa-hoat tùi利未人，kap祭司，kap以色列族長中，設立人，tī耶路撒冷為耶和華判斷tāi-chì，kap相告。In就tò去耶路撒冷。Iok-sa-hoat tùi Lī-bī lâng, kap chè-si, kap Í-sek-lia̍t cho̍k-tiúⁿ tiong, siat-li̍p lâng, tī Iâ-lō͘-sat-léng ūi Iâ-hô-hoa phòaⁿ-toàn tāi-chì, kap saⁿ-kò. In chiū tò-khì Iâ-lō͘-sat-léng.

9伊koh命令in講，Lín tio̍h驚畏耶和華，盡忠誠實心來行chit-ê tāi-chì。I koh bēng-lēng in kóng, Lín tio̍h kiaⁿ-ùi Iâ-hô-hoa, chīn-tiong sêng-si̍t sim lâi kiâⁿ chit ê tāi-chì.

10見若lín ê兄弟tiàm tī in hiah-ê城ê，若有冤家ê事，來就近lín，無論甚麼tāi-chì，或是為tio̍h流血，á是tī律法kap誡命，á是律例kap法度ê中間，lín tio̍h警戒in，m̄-thang得罪耶和華，致到受氣臨到lín，kap lín ê兄弟；lín án-ni做，就無罪。Kìⁿ-nā lín ê hiaⁿ-tī tiàm tī in hiah ê siâⁿ--ê, nā ū oan-ke ê sū, lâi chiū-kūn lín, bô-lūn sím-mi̍h tāi-chì, he̍k-sī ūi-tio̍h lâu huih, á-sī tī lu̍t-hoat kap kài-bēng, á-sī lu̍t-lē kap hoat-tō͘ ê tiong-kan, lín tio̍h kéng-kài in, m̄-thang tek-chōe Iâ-hô-hoa, tì-kàu siū-khì lîm-kàu lín, kap lín ê hiaⁿ-tī; lín án-ni chòe, chiū bô chōe.

11看ah，見若屬耶和華ê事，有祭司頭A-má-lī-ngá管理lín；見若屬王ê事，有猶大ê族長以實瑪利ê kiáⁿ Se-pa-tē-ngá管理lín。Tī lín ê面前有利未人做官長；lín tio̍h好膽做tāi-chì，願耶和華kap好人tī-teh。Khòaⁿ ah, kìⁿ-nā sio̍k Iâ-hô-hoa ê sū, ū chè-si-thâu A-má-lī-ngá koán-lí lín; kìⁿ-nā sio̍k ông ê sū, ū Iû-tāi ê cho̍k-tiúⁿ Í-si̍t-má-lī ê kiáⁿ Se-pa-tē-ngá koán-lí lín. Tī lín ê bīn-chêng ū Lī-bī lâng chòe koaⁿ-tiúⁿ; lín tio̍h hó-táⁿ chòe tāi-chì, goān Iâ-hô-hoa kap hó-lâng tī-teh.

1Chit-tia̍p了後，Mô͘-ap人kap A-bûn人，koh有Bí-o͘-nî人，相kap來，beh kap Iok-sa-hoat交戰。Chit-tia̍p liáu-āu, Mô͘-ap lâng kap A-bûn lâng, koh ū Bí-o͘-nî lâng, saⁿ-kap lâi, beh kap Iok-sa-hoat kau-chiàn.

2有人來報Iok-sa-hoat講，Tùi海外tùi A-lân hia有大軍隊來攻擊你；taⁿ in tī Hap-sé-sùn-tha-má，就是Ún-ki-tí。Ū lâng lâi pò Iok-sa-hoat kóng, Tùi hái-gōa tùi A-lân hia ū tōa kun-tūi lâi kong-kek lí; taⁿ in tī Hap-sé-sùn-tha-má, chiū-sī Ún-ki-tí.

3Iok-sa-hoat就驚，定tio̍h意思懇求耶和華；tī猶大全地宣布禁食。Iok-sa-hoat chiū kiaⁿ, tiāⁿ-tio̍h ì-sù khún-kiû Iâ-hô-hoa; tī Iû-tāi choân-tōe soan-pò͘ kìm-chia̍h.

4Tùi án-ni，猶大人聚會，求耶和華幫贊；猶大ta̍k-ê城lóng有人出來chhē耶和華。Tùi án-ni Iû-tāi lâng chū-hōe, kiû Iâ-hô-hoa pang-chān; Iû-tāi ta̍k ê siâⁿ lóng ū lâng chhut-lâi chhē Iâ-hô-hoa.

5Iok-sa-hoat就tī猶大kap耶路撒冷ê會中，khiā tī耶和華殿ê新院ê頭前，講，Iok-sa-hoat chiū tī Iû-tāi kap Iâ-lō͘-sat-léng ê hōe-tiong, khiā tī Iâ-hô-hoa tiān ê sin-īⁿ ê thâu-chêng, kóng,

6耶和華阮ê列祖ê上帝ah，你kiám m̄是tī天裡ê上帝mah？你kiám m̄是列邦萬國ê主宰mah？ tī你ê手有權能有氣力，無一個能抵敵你。Iâ-hô-hoa goán ê lia̍t-chó͘ ê Siōng-tè ah, Lí kiám m̄-sī tī thiⁿ--nih ê Siōng-tè mah? Lí kiám m̄-sī lia̍t-pang bān-kok ê chú-cháiⁿ mah? tī Lí ê chhiú ū koân-lêng ū khùi-la̍t, bô chi̍t-ê ōe tí-te̍k lí.

7阮ê上帝ah，你kiám m̄是bat tī你ê百姓以色列人ê面前趕逐chit-ê地方khiā起ê百姓，將伊賞賜你ê朋友亞伯拉罕ê後裔到永遠mah？Goán ê Siōng-tè ah, Lí kiám m̄-sī bat tī Lí ê peh-sìⁿ Í-sek-lia̍t lâng ê bīn-chêng kóaⁿ-tio̍k chit ê tōe-hng khiā-khí ê peh-sìⁿ, chiong i siúⁿ-sù Lí ê pêng-iú A-pek-la̍h-hán ê hō͘-è kàu éng-oán mah?

8In就tiàm tī chit-ê地方，koh因為你ê名tī-chia kā你起一間聖所，講，In chiū tiàm tī chit ê tōe-hng, koh in-ūi Lí ê miâ tī-chia kā Lí khí chi̍t keng sèng-só͘, kóng,

9設使有災厄臨到阮，或是刀劍、譴責，或是瘟疫、飢荒，當患難ê時，阮beh khiā tī chit間ê頭前，tī你ê面前懇求你；因為你ê名是tiàm-tī chit間殿，你beh聽來拯救。Siat-sú ū chai-ē lîm-kàu goán, he̍k-sī to-kiàm, khiàn-chek, He̍k-sī un-e̍k, ki-hng, tng hoān-lān ê sî, goán beh khiā tī chit keng ê thâu-chêng, tī Lí ê bīn-chêng khún-kiû Lí; in-ūi Lí ê miâ sī tiàm-tī chit keng tiān, Lí beh thiaⁿ lâi chín-kiù.

10前以色列人出埃及地ê時，你m̄准in侵犯A-bûn人、Mô͘-ap人，kap Se-jíⁿ-soaⁿ人；就離開in，無滅in。Chêng Í-sek-lia̍t lâng chhut Ai-ki̍p tōe ê sî, Lí m̄-chún in chhim-hoān A-bûn lâng, Mô͘-ap lâng, kap Se-jíⁿ-soaⁿ lâng; chiū lī-khui in, bô bia̍t in.

11看ah，in taⁿ怎樣報應阮，來趕逐阮出你ê業，就是你賞賜阮，hō͘阮承接ê。Khòaⁿ ah, in taⁿ cháiⁿ-iūⁿ pò-èng goán, lâi kóaⁿ-tio̍k goán chhut Lí ê gia̍p, chiū-sī Lí siúⁿ-sù goán, hō͘ goán sêng-chiap ê.

12阮ê上帝ah，你無beh責罰in mah？ 因為阮無力thang抵擋chit-ê來攻擊阮ê大軍隊，阮也m̄知tio̍h怎樣行，阮ê目睭專專ǹg你。Goán ê Siōng-tè ah, Lí bô beh chek-hoa̍t in mah? in-ūi goán bô la̍t thang tí-tng chit-ê lâi kong-kek goán ê tōa kun-tūi, goán iā m̄-chai tio̍h cháiⁿ-iūⁿ kiâⁿ, goán ê ba̍k-chiu choan-choan ǹg Lí.

13猶大眾人，kap in ê細漢gín-ná，in ê bó͘，in ê kiáⁿ兒，lóng khiā tī耶和華ê面前。Iû-tāi chèng-lâng, kap in ê sòe-hàn gín-ná, in ê bó͘, in ê kiáⁿ-jî, lóng khiā tī Iâ-hô-hoa ê bīn-chêng.

14Hit時耶和華ê神tī公會中臨到Ngá-hap-sek；伊是利未人A-sat ê後裔，Má-thàm-ngá ê元孫，Iâ-lī ê曾孫，Pí-ná-ngá ê孫，Sat-ka-lī-ngá ê kiáⁿ。Hit-sî Iâ-hô-hoa ê Sîn tī kong-hōe tiong lîm-kàu Ngá-hap-sek; i sī Lī-bī lâng A-sat ê hō͘-è, Má-thàm-ngá ê goân-sun, Iâ-lī ê cheng-sun, Pí-ná-ngá ê sun, Sat-ka-lī-ngá ê kiáⁿ.

15伊講，猶大眾人，耶路撒冷khiā起ê百姓，kap Iok-sa-hoat王你，lóng tio̍h聽；耶和華對 lín án-ni講，莫得因為chit-ê大軍隊來驚，來忍；因為chit-ê交戰m̄是在tī lín，就是在tī上帝。I kóng, Iû-tāi chèng-lâng, Iâ-lō͘-sat-léng khiā-khí ê peh-sìⁿ, kap Iok-sa-hoat ông lí, lóng tio̍h thiaⁿ; Iâ-hô-hoa tùi lín án-ni kóng, Bo̍h-tit in-ūi chit ê tōa kun-tūi lâi kiaⁿ, lâi lún; in-ūi chit ê kau-chiàn m̄-sī chāi-tī lín, chiū-sī chāi-tī Siōng-tè.

16明á日lín tio̍h落去接陣；in tùi Sé-su山坪上來，lín beh tī Iâ-ló͘-i-le̍k曠野頭前ê山谷口tú-tio̍h in。Bîn-á-ji̍t lín tio̍h lo̍h-khì chih-tīn; in tùi Sé-su soaⁿ-phiâⁿ chiūⁿ lâi, lín beh tī Iâ-ló͘-i-le̍k khòng-iá thâu-chêng ê soaⁿ-kok-kháu tú-tio̍h in.

17Chit-pái lín m̄免交戰；猶大kap耶路撒冷ah，lín tio̍h排陣khiā-teh，看耶和華拯救lín；m̄免驚，m̄免忍，明á日tio̍h出去in hia；因為耶和華kap lín tī-teh。Chit-pái lín m̄-bián kau-chiàn; Iû-tāi kap Iâ-lō͘-sat-léng ah, lín tio̍h pâi-tīn khiā-teh, khòaⁿ Iâ-hô-hoa chín-kiù lín; m̄-bián kiaⁿ, m̄-bián lún, bîn-á-ji̍t tio̍h chhut-khì in hia; in-ūi Iâ-hô-hoa kap lín tī-teh.

18Iok-sa-hoat就àⁿ頭仆tī地裡；猶大眾人，kap耶路撒冷khiā起ê百姓，也仆tī耶和華ê面前，敬拜耶和華。Iok-sa-hoat chiū àⁿ-thâu phak tī tōe-nih; Iû-tāi chèng-lâng, kap Iâ-lō͘-sat-léng khiā-khí ê peh-sìⁿ, iā phak tī Iâ-hô-hoa ê bīn-chêng, kèng-pài Iâ-hô-hoa.

19Ko-hat族kap Khó-la̍h族ê利未人，lóng khiā起來，用極大ê聲o-ló耶和華以色列ê上帝。Ko-hat cho̍k kap Khó-la̍h-cho̍k ê Lī-bī lâng, lóng khiā--khí-lâi, ēng ke̍k-tōa ê siaⁿ o-ló Iâ-hô-hoa Í-sek-lia̍t ê Siōng-tè.

20隔日in早早起來，出去Thê-ko-a ê曠野；出去ê時，Iok-sa-hoat khiā-teh講，猶大人，kap耶路撒冷khiā起ê百姓ah，tio̍h聽我，lín tio̍h信耶和華lín ê上帝，就beh khiā在；信伊ê先知就beh興通。Keh ji̍t in chá-chá khí-lâi, chhut-khì Thê-ko-a ê khòng-iá; chhut-khì ê sî, Iok-sa-hoat khiā-teh kóng, Iû-tāi lâng, kap Iâ-lō͘-sat-léng khiā-khí ê peh-sìⁿ ah, tio̍h thiaⁿ góa, lín tio̍h sìn Iâ-hô-hoa lín ê Siōng-tè, chiū beh khiā-chāi; sìn I ê sian-ti chiū beh heng-thong.

21伊已經kap百姓議論，就設立唱歌o-ló耶和華ê，hō͘ in穿聖koh súi ê衫，行tī軍隊ê頭前o-ló耶和華，講，Tio̍h感謝耶和華；因為伊ê慈愛永遠tī-teh。I í-keng kap peh-sìⁿ gī-lūn, chiū siat-li̍p chhiùⁿ-koa o-ló Iâ-hô-hoa ê, hō͘ in chhēng sèng koh súi ê saⁿ, kiâⁿ tī kun-tūi ê thâu-chêng o-ló Iâ-hô-hoa, kóng, Tio̍h kám-siā Iâ-hô-hoa; in-ūi i ê chû-ài éng-oán tī-teh.

22In tú-á唱歌o-ló ê時，耶和華就派埋伏ê兵攻擊hiah-ê來攻擊猶大ê A-bûn、Mô͘-ap，kap Se-jíⁿ山ê人；in就受phah。In tú-á chhiùⁿ-koa o-ló ê sî, Iâ-hô-hoa chiū phài bâi-ho̍k ê peng kong-kek hiah ê lâi kong-kek Iû-tāi ê A-bûn, Mô͘-ap, kap Se-jíⁿ soaⁿ ê lâng; in chiū siū-phah.

23因為A-bûn kap Mô͘-ap人起來攻擊tiàm-tī Se-jíⁿ山ê人，一盡thâi來滅in；一盡滅tiàm-tī Se-jíⁿ ê人了後，in ta̍k-ê分pêng相剿滅。In-ūi A-bûn kap Mô͘-ap lâng khí--lâi kong-kek tiàm-tī Se-jíⁿ soaⁿ ê lâng, it-chīn thâi lâi bia̍t in; it-chīn bia̍t tiàm-tī Se-jíⁿ ê lâng liáu-āu, in ta̍k-ê hun-pêng saⁿ châu-bia̍t.

24猶大人到曠野守望ê樓，看見hiah-ê大軍隊；看ah，身屍倒tī地裡，無一個走離。Iû-tāi lâng kàu khòng-iá siú-bāng ê lâu, khòaⁿ-kìⁿ hiah ê tōa kun-tūi; khòaⁿ ah, sin-si tó tī tōe--nih, bô chi̍t-ê cháu-lī.

25Iok-sa-hoat kap伊ê百姓來搶in ê財物，tī in中間chhē-tio̍h chōe-chōe財物、衣服、寶貝；in pak做家己ê，chōe到帶bē去。In搶物到三日，因為真chōe。Iok-sa-hoat kap i ê peh-sìⁿ lâi chhiúⁿ in ê châi-bu̍t, tī in tiong-kan chhē-tio̍h chōe-chōe châi-bu̍t, i-ho̍k, pó-pòe; in pak chòe ka-kī-ê, chōe kàu tòa-bōe-khì. In chhiúⁿ mi̍h kàu saⁿ-ji̍t, in-ūi chin-chōe.

26第四日in聚集tī Pí-la̍h-ka ê山谷；因為tī-hia o-ló耶和華，所以hit所在名叫Pí-la̍h-ka山谷，到tī今á日。Tē-sì-ji̍t in chū-chi̍p tī Pí-la̍h-ka ê soaⁿ-kok; in-ūi tī-hia o-ló Iâ-hô-hoa, só͘-í hit só͘-chāi miâ-kiò Pí-la̍h-ka soaⁿ-kok, kàu tī kin-á-ji̍t.

27In就tò去，就是猶大kap耶路撒冷ê人，Iok-sa-hoat tī in ê頭前，大家歡喜tò去耶路撒冷；因為耶和華hō͘ in thâi贏對敵，來歡喜快樂。In chiū tò-khì, chiū-sī Iû-tāi kap Iâ-lō͘-sat-léng ê lâng, Iok-sa-hoat tī in ê thâu-chêng, tāi-ke hoaⁿ-hí tò-khì Iâ-lō͘-sat-léng; in-ūi Iâ-hô-hoa hō͘ in thâi-iâⁿ tùi-te̍k, lâi hoaⁿ-hí khoài-lo̍k.

28In彈琴、彈瑟、pûn號頭，來耶路撒冷，到耶和華ê殿。In tôaⁿ-khîm, tôaⁿ-sek, pûn hō-thâu, lâi Iâ-lō͘-sat-léng, kàu Iâ-hô-hoa ê tiān.

29列邦chiah-ê國聽見耶和華thâi贏以色列ê對敵，就驚上帝。Lia̍t-pang chiah ê kok thiaⁿ-kìⁿ Iâ-hô-hoa thâi-iâⁿ Í-sek-lia̍t ê tùi-te̍k, chiū kiaⁿ Siōng-tè.

30Án-ni Iok-sa-hoat ê國太平；因為伊ê上帝賞賜伊四圍平安。Án-ni Iok-sa-hoat ê kok thài-pêng; in-ūi i ê Siōng-tè siúⁿ-sù i sì-ûi pêng-an.

31Iok-sa-hoat做猶大王；坐位ê時三十五歲；tī耶路撒冷做王歷過二十五年；伊ê老母名叫A-so͘-pa，就是Sī-lī-hi ê cha-bó͘-kiáⁿ。Iok-sa-hoat chòe Iû-tāi ông; chē-ūi ê sî saⁿ-cha̍p-gō͘ hè; tī Iâ-lō͘-sat-léng chòe ông le̍k-kè jī-cha̍p-gō͘ nî; I ê lāu-bú miâ kiò A-so͘-pa, chiū-sī Sī-lī-hi ê cha-bó͘-kiáⁿ.

32Iok-sa-hoat行伊ê老父A-sat ê路，無偏歪，行耶和華所看做好ê事。Iok-sa-hoat kiâⁿ i ê lāu-pē A-sat ê lō͘, bô phian-oai, kiâⁿ Iâ-hô-hoa só͘ khòaⁿ-chòe hó ê sū.

33總是山頭壇iáu未廢無，koh百姓也未有定tio̍h心意歸向in列祖ê上帝。Chóng-sī soaⁿ-thâu-tôaⁿ iáu-bē hòe-bô, koh peh-sìⁿ iā bē ū tiāⁿ-tio̍h sim-ì kui-ǹg in lia̍t-chó͘ ê Siōng-tè.

34Iok-sa-hoat其餘ê事，對頭到尾，lóng記tī Hap-ná-nî ê kiáⁿ Iâ-hō͘ ê冊，hit-ê冊也列tī以色列列王ê冊。Iok-sa-hoat kî-û ê sū, tùi-thâu kàu-bé, lóng kì tī Hap-ná-nî ê kiáⁿ Iâ-hō͘ ê chheh, hit ê chheh iā lia̍t tī Í-sek-lia̍t lia̍t-ông ê chheh.

35Hit時了後，猶大王Iok-sa-hoat kap以色列王A-hap-siā結交。A-hap-siā行pháiⁿ到極。Hit-sî liáu-āu, Iû-tāi ông Iok-sa-hoat kap Í-sek-lia̍t ông A-hap-siā kiat-kau. A-hap-siā kiâⁿ pháiⁿ kàu-ke̍k.

36兩個王相kap造船beh去Tha-si；就tī Í-sûn-ka-pia̍t造船。Nn̄g ê ông saⁿ-kap chō-chûn beh khì Tha-si; chiū tī Í-sûn-ka-pia̍t chō-chûn.

37Hit時Má-lī-sa人，To-tāi-óa ê kiáⁿ Í-lī-í-siā，用讖語攻擊Iok-sa-hoat講，因為你結交A-hap-siā，耶和華破壞你ê所做。Tùi án-ni， 船就破，bōe能去Tha-si。Hit-sî Má-lī-sa lâng, To-tāi-óa ê kiáⁿ Í-lī-í-siā, ēng chhàm-gú kong-kek Iok-sa-hoat kóng, In-ūi lí kiat-kau A-hap-siā, Iâ-hô-hoa phò-hoāi lí ê só͘ chòe. Tùi án-ni chûn chiū phòa, bōe-ōe khì Tha-si.