1第七年Iâ-hô-iâ-tāi家己強盛；召百總Iâ-lô-hán ê kiáⁿ A-sat-lī-ngá，Iok-hap-lân ê kiáⁿ以實瑪利，Gô-pī-tek ê kiáⁿ A-sat-lī-ngá，A-tāi-ngá ê kiáⁿ Má-se-ngá，Sè-ki-lī ê kiáⁿ Í-lī-sa-hoat，hiah-ê來kap伊立約。Tē-chhit nî Iâ-hô-iâ-tāi ka-kī kiông-sēng; tiàu pé-chóng Iâ-lô-hán ê kiáⁿ A-sat-lī-ngá, Iok-hap-lân ê kiáⁿ Í-si̍t-má-lī, Gô-pī-tek ê kiáⁿ A-sat-lī-ngá, A-tāi-ngá ê kiáⁿ Má-se-ngá, Sè-ki-lī ê kiáⁿ Í-lī-sa-hoat, hiah-ê lâi kap i li̍p-iok.

2In遍行猶大，tùi猶大hiah-ê城聚集利未人，kap以色列ê族長，lóng到耶路撒冷。In piàn-kiâⁿ Iû-tāi, tùi Iû-tāi hiah ê siâⁿ chū-chi̍p Lī-bī lâng, kap Í-sek-lia̍t ê cho̍k-tiúⁿ, lóng kàu Iâ-lō͘-sat-léng.

3全會tī上帝ê殿kap王立約。伊對in講，看ah，王ê kiáⁿ beh做王，照耶和華論到大衛ê kiáⁿ孫所講ê。Choân-hōe tī Siōng-tè ê tiān kap ông li̍p-iok. I tùi in kóng, Khòaⁿ ah, ông ê kiáⁿ beh chòe ông, chiàu Iâ-hô-hoa lūn-kàu Tāi-pi̍t ê kiáⁿ-sun só͘ kóng--ê.

4Taⁿ lín tio̍h án-ni行；lín chiah-ê祭司kap利未人，三份一tī安歇日入來ê，tio̍h做顧門ê；Taⁿ lín tio̍h án-ni kiâⁿ; lín chiah ê chè-si kap Lī-bī lâng, saⁿ-hūn-chi̍t tī an-hioh-ji̍t ji̍p--lâi--ê, tio̍h chòe kò͘-mn̂g--ê;

5三份一tio̍h tī王宮，三份一tio̍h tī地基ê門；百姓lóng tio̍h tī耶和華殿內ê院。saⁿ-hūn-chi̍t tio̍h tī ông-kiong, saⁿ-hūn-chi̍t tio̍h tī tōe-ki ê mn̂g; peh-sìⁿ lóng tio̍h tī Iâ-hô-hoa tiān-lāi ê īⁿ.

6獨獨祭司，kap teh服事ê利未人以外，別人m̄-thang入耶和華ê殿；chiah-ê人thang入去，因為in是聖。總是眾百姓tio̍h為tio̍h耶和華來顧守。To̍k-to̍k chè-si, kap teh ho̍k-sāi ê Lī-bī lâng í-gōa, pa̍t-lâng m̄-thang ji̍p Iâ-hô-hoa ê tiān; chiah ê lâng thang ji̍p-khì, in-ūi in sī sèng. Chóng-sī chèng peh-sìⁿ tio̍h ūi-tio̍h Iâ-hô-hoa lâi kò͘-siú.

7利未人ta̍k-ê手tio̍h kia̍h軍器，四圍保護王；見若自專入殿ê tio̍h hō͘伊死；王出入ê時，lín tio̍h跟隨伊。Lī-bī lâng ta̍k-ê chhiú tio̍h kia̍h kun-khì, sì-ûi pó-hō͘ ông; kìⁿ-nā chū-choan ji̍p-tiān--ê tio̍h hō͘ i sí; ông chhut-ji̍p ê sî, lín tio̍h kun-sûi i.

8利未人，kap猶大眾人，照祭司Iâ-hô-iâ-tāi一切所命令ê去行；ta̍k人帶in輪tio̍h安歇日入來ê人，kap輪tio̍h安歇日出去ê人；因為祭司Iâ-hô-iâ-tāi m̄准in 散班。Lī-bī lâng, kap Iû-tāi chèng-lâng, chiàu chè-si Iâ-hô-iâ-tāi it-chhè só͘ bēng-lēng-ê khì kiâⁿ; ta̍k-lâng tòa in lûn-tio̍h an-hioh-ji̍t ji̍p-lâi ê lâng, kap lûn-tio̍h an-hioh-ji̍t chhut-khì ê lâng; in-ūi chè-si Iâ-hô-iâ-tāi m̄-chún in sòaⁿ-pan.

9祭司Iâ-hô-iâ-tāi就將上帝殿內所勸大衛王ê鎗、屏牌、大牌，交hō͘ hiah-ê百總。Chè-si Iâ-hô-iâ-tāi chiū chiong Siōng-tè tiān-lāi só͘ khǹg Tāi-pi̍t ông ê chhiuⁿ, pîn-pâi, tōa-pâi, kau hō͘ hiah ê pé-chóng.

10Koh派眾百姓，手ta̍k-ê kia̍h ke-si，tī壇kap殿hia，tùi殿ê chiàⁿ-pêng到殿ê tò-pêng，khiā tī王ê四圍。Koh phài chèng peh-sìⁿ, chhiú ta̍k-ê kia̍h ke-si, tī tôaⁿ kap tiān hia, tùi tiān ê chiàⁿ-pêng kàu tiān ê tò-pêng, khiā tī ông ê sì-ûi.

11In就chhōa王ê kiáⁿ出來，kā伊戴冕旒，將律法ê冊hō͘伊；Iâ-hô-iâ-tāi kap伊hiah-ê kiáⁿ用油抹伊，設立伊做王；眾人講，願王萬歲。In chiū chhōa ông ê kiáⁿ chhut-lâi, kā i tì bián-liû, chiong lu̍t-hoat ê chheh hō͘ i; Iâ-hô-iâ-tāi kap i hiah ê kiáⁿ ēng iû boah i, siat-li̍p i chòe ông; chèng-lâng kóng, Goān ông bān-sòe.

12A-tha-lī-ngá聽見百姓走來，o-ló王ê聲，就到百姓hia，入耶和華ê殿；A-tha-lī-ngá thiaⁿ-kìⁿ peh-sìⁿ cháu-lâi, o-ló ông ê siaⁿ, chiū kàu peh-sìⁿ hia, ji̍p Iâ-hô-hoa ê tiān;

13看見王khiā tī殿門ê柱邊，hiah-ê軍長kap pûn號頭ê khiā tī王ê左右；百姓歡喜pûn號頭；koh有唱歌ê，用ta̍k樣ê樂器，chhōa眾人o-ló，A-tha-lī-ngá就拆裂伊ê衫，hoah講，反叛lah，反叛lah。khòaⁿ-kìⁿ ông khiā tī tiān-mn̂g ê thiāu-piⁿ, hiah ê kun-tiúⁿ kap pûn hō-thâu--ê khiā tī ông ê chó-iū; peh-sìⁿ hoaⁿ-hí pûn hō-thâu; koh ū chhiùⁿ-koa--ê, ēng ta̍k-iūⁿ ê ga̍k-khì, chhōa chèng-lâng o-ló, A-tha-lī-ngá chiū thiah-li̍h i ê saⁿ, hoah kóng, Hoán-poān lah, hoán-poān lah.

14祭司Iâ-hô-iâ-tāi chhōa管轄軍隊ê百總，對in講，Tùi班列ê中間趕伊出去，見若tè伊ê tio̍h用刀thâi死伊；因為祭司講，M̄-thang tī耶和華ê殿thâi伊。Chè-si Iâ-hô-iâ-tāi chhōa koán-hat kun-tūi ê pé-chóng, tùi in kóng, Tùi pan-lia̍t ê tiong-kan kóaⁿ i chhut-khì, kìⁿ-nā tè i ê tio̍h ēng to thâi-sí i; in-ūi chè-si kóng, M̄-thang tī Iâ-hô-hoa ê tiān thâi i.

15In閃開雙pêng，hō͘伊去；伊行到王宮馬ê門，就tī-hia thâi死伊。In siám-khui siang-pêng, hō͘ i khì; i kiâⁿ kàu ông-kiong Bé ê mn̂g, chiū tī-hia thâi-sí i.

16Iâ-hô-iâ-tāi tī本身，kap百姓，kap王ê中間立約，lóng beh做耶和華ê百姓。Iâ-hô-iâ-tāi tī pún-sin, kap peh-sìⁿ, kap ông ê tiong-kan li̍p-iok, lóng beh chòe Iâ-hô-hoa ê peh-sìⁿ.

17Tùi án-ni，眾百姓到Pa-le̍k ê廟，拆毀伊，phah碎伊hiah-ê壇kap偶像，koh tī壇前phah死Pa-le̍k ê祭司Má-thán。Tùi án-ni chèng peh-sìⁿ kàu Pa-le̍k ê biō, thiah-húi i, phah-chhùi i hiah ê tôaⁿ kap ngó͘-siōng, koh tī tôaⁿ-chêng phah-sí Pa-le̍k ê chè-si Má-thán.

18Iâ-hô-iâ-tāi koh照大衛早日所定tio̍h-ê，設立祭司利未人擔當耶和華殿ê職，前大衛用chit-ê班列派tī耶和華ê殿，hō͘ in歡喜唱歌，獻耶和華ê燒祭，照所記載tī摩西ê律法ê。Iâ-hô-iâ-tāi koh chiàu Tāi-pi̍t chá-ji̍t só͘ tiāⁿ-tio̍h--ê, siat-li̍p chè-si Lī-bī lâng tam-tng Iâ-hô-hoa tiān ê chit, chêng Tāi-pi̍t ēng chit ê pan-lia̍t phài tī Iâ-hô-hoa ê tiān, hō͘ in hoaⁿ-hí chhiùⁿ-koa, hiàn Iâ-hô-hoa ê sio-chè, chiàu só͘ kì-chài tī Mô͘-se ê lu̍t-hoat--ê.

19伊也設顧門ê tī耶和華ê殿hiah-ê門；無論啥tāi，無清氣ê bōe得入去。I iā siat kò͘-mn̂g--ê tī Iâ-hô-hoa ê tiān hiah ê mn̂g; bô-lūn siáⁿ-tāi, bô chheng-khì--ê bōe--tit ji̍p-khì.

20Koh帶百總kap貴族，kap百姓ê首領，kap國內ê眾百姓，tùi耶和華ê殿chhōa王落來；tùi頂ê門進入王宮，hō͘王坐國位。Koh tòa pé-chóng kap kùi-cho̍k, kap peh-sìⁿ ê siú-léng, kap kok-lāi ê chèng peh-sìⁿ, tùi Iâ-hô-hoa ê tiān chhōa ông lo̍h-lâi; tùi téng ê mn̂g chìn-ji̍p ông-kiong, hō͘ ông chē kok-ūi.

21國內眾百姓lóng歡喜，thong城安靜，in用刀thâi死A-tha-lī-ngá。Kok-lāi chèng peh-sìⁿ lóng hoaⁿ-hí, thong siâⁿ an-chēng, in ēng to thâi-sí A-tha-lī-ngá.

1Iok-a-si坐位ê時，七歲，tī耶路撒冷做王歷過四十年。伊ê老母名叫Se-pí-a，是別是巴人。Iok-a-si chē-ūi ê sî, chhit-hè, tī Iâ-lō͘-sat-léng chòe ông le̍k-kè sì-cha̍p nî. I ê lāu-bú miâ kiò Se-pí-a, sī Pia̍t-sī-pa lâng.

2祭司Iâ-hô-iâ-tāi tī-teh ê日，Iok-a-si行耶和華所看做好ê事。Chè-si Iâ-hô-iâ-tāi tī-teh ê ji̍t, Iok-a-si kiâⁿ Iâ-hô-hoa só͘ khòaⁿ-chòe hó ê sū.

3Iâ-hô-iâ-tāi kā伊chhōa兩個bó͘，伊生kiáⁿ cha-bó͘-kiáⁿ。Iâ-hô-iâ-tāi kā i chhōa nn̄g ê bó͘, i siⁿ-kiáⁿ cha-bó͘-kiáⁿ.

4後來Iok-a-si有意思beh修理耶和華ê殿；Āu-lâi Iok-a-si ū ì-sù beh siu-lí Iâ-hô-hoa ê tiān;

5就召集祭司kap利未人，kā in講，Lín tio̍h去猶大hiah-ê城，對以色列眾人tôe銀，thang ta̍k年修理lín ê上帝ê殿；lín tio̍h趕緊辨理chit-ê事。總是利未人無趕緊。chiū tiàu-chi̍p chè-si kap Lī-bī lâng, kā in kóng, Lín tio̍h khì Iû-tāi hiah ê siâⁿ, tùi Í-sek-lia̍t chèng-lâng tôe gûn, thang ta̍k-nî siu-lí lín ê Siōng-tè ê tiān; lín tio̍h kóaⁿ-kín pān-lí chit ê sū. Chóng-sī Lī-bī lâng bô kóaⁿ-kín.

6王召祭司頭Iâ-hô-iâ-tāi來，kā伊講，你啥事無逼利未人tùi猶大kap耶路撒冷帶銀來，就是照耶和華ê奴僕摩西，kap以色列ê會眾，所定tio̍h tio̍h獻做干證ê布棚ê路用ê？Ông tiàu chè-si-thâu Iâ-hô-iâ-tāi lâi, kā i kóng, Lí siáⁿ-sū bô pek Lī-bī lâng tùi Iû-tāi kap Iâ-lō͘-sat-léng tòa gûn lâi, chiū-sī chiàu Iâ-hô-hoa ê lô͘-po̍k Mô͘-se, kap Í-sek-lia̍t ê hōe-chiòng, só͘ tiāⁿ-tio̍h tio̍h hiàn-chòe kan-chèng ê pò͘-pîⁿ ê lō͘-ēng-ê?

7因為hit-ê pháiⁿ婦人人A-tha-lī-ngá ê眾kiáⁿ bat拆毀上帝ê殿；koh用耶和華殿內分別做聖ê物獻hō͘ hiah-ê Pa-le̍k。In-ūi hit ê pháiⁿ hū-jîn-lâng A-tha-lī-ngá ê chèng-kiáⁿ bat thiah-húi Siōng-tè ê tiān; koh ēng Iâ-hô-hoa tiān-lāi hun-piat chòe-sèng ê mi̍h hiàn hō͘ hiah ê Pa-le̍k.

8Tùi án-ni，王出命令，in就做一個櫃，hē tī耶和華殿ê門外。Tùi án-ni ông chhut bēng-lēng, in chiū chòe chi̍t ê kūi, hē tī Iâ-hô-hoa tiān ê mn̂g-gōa.

9Koh宣布猶大kap耶路撒冷ê百姓，tio̍h照上帝ê奴僕摩西tī曠野命令以色列人所定tio̍h tio̍h獻ê銀，帶來hō͘耶和華。Koh soan-pò͘ Iû-tāi kap Iâ-lō͘-sat-léng ê peh-sìⁿ, tio̍h chiàu Siōng-tè ê lô͘-po̍k Mô͘-se tī khòng-iá bēng-lēng Í-sek-lia̍t lâng só͘ tiāⁿ-tio̍h tio̍h hiàn ê gûn, tòa lâi hō͘ Iâ-hô-hoa.

10眾首領kap眾百姓lóng歡喜帶來hiat tī櫃裡，到完滿。Chèng siú-léng kap chèng peh-sìⁿ lóng hoaⁿ-hí tòa lâi hiat tī kūi--nih, kàu oân-móa.

11利未人帶hit-ê櫃入王ê辦公室，in看見銀真chōe，就王ê書記kap祭司頭ê委員來，piàⁿ空hit-ê櫃，後來用櫃koh hē tī原位；日日án-ni做伊；拾銀真chōe。Lī-bī lâng tòa hit ê kūi ji̍p ông ê pān-kong-sek, in khòaⁿ-kìⁿ gûn chin-chōe, chiū ông ê su-kì kap chè-si-thâu ê úi-oân lâi, piàⁿ-khang hit ê kūi, āu-lâi ēng kūi koh hē tī goân-ūi; ji̍t-ji̍t án-ni chòe i; khioh gûn chin-chōe.

12王kap Iâ-hô-iâ-tāi用銀hō͘做耶和華殿內辦事ê人；in就chhiàⁿ石匠、木匠，修整耶和華ê殿。Koh chhiàⁿ鐵工、銅匠，來修理耶和華ê殿。Ông kap Iâ-hô-iâ-tāi ēng gûn hō͘ chòe Iâ-hô-hoa tiān-lāi pān-sū ê lâng; in chiū chhiàⁿ chio̍h-chhiūⁿ, ba̍k-chhiūⁿ, siu-chéng Iâ-hô-hoa ê tiān. koh chhiàⁿ thih-kang, tâng-chhiūⁿ, lâi siu-lí Iâ-hô-hoa ê tiān.

13做工ê人做in ê工，hit-ê工就明白，修理上帝ê殿照舊ê款；koh hō͘伊真堅固。Chòe-kang ê lâng chòe in ê kang, hit ê kang chiū bêng-pe̍k, siu-lí Siōng-tè ê tiān chiàu kū ê khoán; koh hō͘ i chin kian-kò͘.

14已經完工，in就帶所chhun ê銀，到王kap Iâ-hô-iâ-tāi ê面前，用伊來造器具，做耶和華殿ê路用，就是服事ê器具，來獻燒祭；koh造匙，kap金銀ê器具。當Iâ-hô-iâ-tāi活teh ê日，人常常獻燒祭tī耶和華ê殿。Í-keng oân-kang, in chiū tòa só͘ chhun ê gûn, kàu ông kap Iâ-hô-iâ-tāi ê bīn-chêng, ēng i lâi chō khì-kū, chòe Iâ-hô-hoa tiān ê lō͘-ēng, chiū-sī ho̍k-sāi ê khì-kū, lâi hiàn sio-chè; koh chō sî, kap kim-gûn ê khì-kū. Tng Iâ-hô-iâ-tāi oa̍h-teh ê ji̍t, lâng siông-siông hiàn sio-chè tī Iâ-hô-hoa ê tiān.

15Iâ-hô-iâ-tāi漸漸老，日子滿足，就死，死ê時；一百三十歲。Iâ-hô-iâ-tāi chiām-chiām lāu, ji̍t-chí móa-chiok, chiū sí, sí ê sî; chi̍t-pah saⁿ-cha̍p hè.

16人葬伊tī大衛城kap列王ê中間；因為伊tī以色列中ǹg上帝kap伊ê殿行好。Lâng chòng i tī Tāi-pi̍t siâⁿ kap lia̍t-ông ê tiong-kan; in-ūi i tī Í-sek-lia̍t tiong ǹg Siōng-tè kap I ê tiān kiâⁿ-hó.

17Iâ-hô-iâ-tāi死了，猶大眾首領來朝拜王；王聽thàn in。Iâ-hô-iâ-tāi sí-liáu, Iû-tāi chèng siú-léng lâi tiâu-pài ông; ông thiaⁿ-thàn in.

18In放sak耶和華in列祖ê上帝ê殿，去服事hiah-ê A-sià-la̍h，kap偶像；因為in chit-ê罪，就有受氣臨到猶大kap耶路撒冷。In pàng-sak Iâ-hô-hoa in lia̍t-chó͘ ê Siōng-tè ê tiān, khì ho̍k-sāi hiah ê A-sià-la̍h, kap ngó͘-siōng; in-ūi in chit ê chōe, chiū ū siū-khì lîm-kàu Iû-tāi kap Iâ-lō͘-sat-léng.

19總是伊差先知到in hia，beh引chhōa in歸向耶和華；先知對 in做干證，但是in m̄聽。Chóng-sī I chhe sian-ti kàu in hia, beh ín-chhōa in kui-ǹg Iâ-hô-hoa; sian-ti tùi in chòe kan-chèng, nā-sī in m̄ thiaⁿ.

20Hit時上帝ê神臨到祭司Iâ-hô-iâ-tāi ê kiáⁿ撒迦利亞；伊就khiā tī百姓ê頂面，對in講，上帝án-ni講，Lín啥事犯tio̍h耶和華ê誡令，致到bōe得tio̍h興通ah？因為lín棄sak耶和華，耶和華也棄sak lín。Hit-sî Siōng-tè ê Sîn lîm-kàu chè-si Iâ-hô-iâ-tāi ê kiáⁿ Sat-ka-lī-a; i chiū khiā tī peh-sìⁿ ê téng-bīn, tùi in kóng, Siōng-tè án-ni kóng, Lín siáⁿ-sū hoān-tio̍h Iâ-hô-hoa ê kài-lēng, tì-kàu bōe tit-tio̍h heng-thong ah? In-ūi lín khì-sak Iâ-hô-hoa, Iâ-hô-hoa iā khì-sak lín.

21In就結黨來害伊，照王ê命令，tī耶和華殿ê院內，用石頭tìm死伊。In chiū kiat-tóng lâi hāi--i, chiàu ông ê bēng-lēng, tī Iâ-hô-hoa tiān ê īⁿ-lāi, ēng chio̍h-thâu tìm-sí i.

22Án-niIok-a-si王無siàu念撒迦利亞ê老父Iâ-hô-iâ-tāi所kā伊做ê，來害死伊ê kiáⁿ。撒迦利亞死ê時，講，願耶和華鑑察伸冤。Án-ni Iok-a-si ông bô siàu-liām Sat-ka-lī-a ê lāu-pē Iâ-hô-iâ-tāi só͘ kā i chòe ê, lâi hāi-sí i ê kiáⁿ. Sat-ka-lī-a sí ê sî, kóng, Goān Iâ-hô-hoa kàm-chhat sin-oan.

23年尾A-lân ê軍兵上來攻擊Iok-a-si，來到猶大kap耶路撒冷，tùi百姓中滅百姓hiah-ê首領，用所搶ê物運到大馬色王hia。Nî-bé A-lân ê kun-peng chiūⁿ-lâi kong-kek Iok-a-si, lâi kàu Iû-tāi kap Iâ-lō͘-sat-léng, tùi peh-sìⁿ-tiong bia̍t peh-sìⁿ hiah ê siú-léng, ēng só͘ chhiúⁿ ê mi̍h ūn-kàu Tāi-má-sek ông hia.

24A-lân ê軍兵chhōa一小隊ê人來，耶和華用大隊ê人交tī in ê手，是因為in放sak耶和華in列祖ê上帝，chiah用án-ni來責罰Iok-a-si。A-lân ê kun-peng chhōa chi̍t sió-tūi ê lâng lâi, Iâ-hô-hoa ēng tōa-tūi ê lâng kau tī in ê chhiú, sī in-ūi in pàng-sak Iâ-hô-hoa in lia̍t-chó͘ ê Siōng-tè, chiah ēng án-ni lâi chek-hoa̍t Iok-a-si.

25對敵離開伊，放sak伊；tī伊tio̍h重病ê時，伊ê奴僕為tio̍h祭司Iâ-hô-iâ-tāi hiah-ê kiáⁿ ê血結黨來攻擊伊，thâi伊tī伊ê眠床，伊就死；人埋葬伊tī大衛ê城，獨獨無葬伊tī列王ê墓。Tùi-te̍k lī-khui--i, pàng-sak--i; tī i tio̍h tāng-pīⁿ ê sî, i ê lô͘-po̍k ūi-tio̍h chè-si Iâ-hô-iâ-tāi hiah ê kiáⁿ ê huih kiat-tóng lâi kong-kek i, thâi i tī i ê bîn-chhn̂g, i chiū sí; lâng bâi-chòng i tī Tāi-pi̍t ê siâⁿ, to̍k-to̍k bô chòng i tī lia̍t-ông ê bōng.

26結黨來害伊ê是A-bûn ê婦人人Sī-bí-ap ê kiáⁿ Sat-poa̍t，kap Mô͘-ap ê婦人人Sī-bí-lī ê kiáⁿ Iok-sat-poa̍t。Kiat-tóng lâi hāi--i-ê sī A-bûn ê hū-jîn-lâng Sī-bí-ap ê kiáⁿ Sat-poa̍t, kap Mô͘-ap ê hū-jîn-lâng Sī-bí-lī ê kiáⁿ Iok-sat-poa̍t.

27論到伊hiah-ê kiáⁿ，kap伊所受ê警戒，kap伊修理上帝ê殿ê事，lóng記tī列王記錄ê註解。伊ê kiáⁿ A-má-siā續接伊做王。Lūn-kàu i hiah ê kiáⁿ, kap i só͘ siū ê kéng-kài, kap i siu-lí Siōng-tè ê tiān ê sū, lóng kì tī lia̍t-ông kì-lio̍k ê chù-kái. I ê kiáⁿ A-má-siā sòa-chiap i chòe ông.

1A-má-siā坐位ê時，二十五歲，tī耶路撒冷做王，共二十九年。伊ê老母名叫Iok-iâ-tàn，是耶路撒冷人。A-má-siā chē-ūi ê sî, jī-cha̍p-gō͘ hè, tī Iâ-lō͘-sat-léng chòe ông, kiōng jī-cha̍p-káu nî. I ê lāu-bú miâ kiò Iok-iâ-tàn, sī Iâ-lō͘-sat-léng lâng.

2A-má-siā行耶和華所看做好ê事，總是心無專一。A-má-siā kiâⁿ Iâ-hô-hoa só͘ khòaⁿ-chòe hó ê sū, chóng-sī sim bô choan-it.

3伊ê國權已經堅固，就thâi死前刺激伊ê老父猶大王hiah-ê人臣；I ê kok-koân í-keng kian-kò͘, chiū thâi-sí chêng chhì-khek i ê lāu-pē Iû-tāi ông hiah ê jîn-sîn;

4總是無thâi死in ê kiáⁿ，是照摩西律法ê冊所記載，耶和華命令講，M̄-thang因為kiáⁿ來thâi死老父，也m̄-thang因為父來thâi死kiáⁿ，ta̍k人tio̍h 因為本身ê罪來死。chóng-sī bô thâi-sí in ê kiáⁿ, sī chiàu Mô͘-se lu̍t-hoat ê chheh só͘ kì-chài, Iâ-hô-hoa bēng-lēng kóng, M̄-thang in-ūi kiáⁿ lâi thâi-sí lāu-pē, iā m̄-thang in-ūi pē lâi thâi-sí kiáⁿ, ta̍k lâng tio̍h in-ūi pún-sin ê chōe lâi sí.

5A-má-siā聚集猶大人，照猶大kap便雅憫ê宗族，設立千總百總來chhōa-in；koh算人額，tùi二十歲以上，得tio̍h過揀ê兵，能kia̍h鎗，kōaⁿ藤牌，上陣ê，共三十萬。A-má-siā chū-chi̍p Iû-tāi lâng, chiàu Iû-tāi kap Piān-ngá-bín ê chong-cho̍k, siat-li̍p chhian-chóng pé-chóng lâi chhōa--in; koh sǹg lâng-gia̍h, tùi jī-cha̍p hè í-siōng, tit-tio̍h kè-kéng ê peng, ōe kia̍h chhiuⁿ, kōaⁿ tîn-pâi, chiūⁿ-tīn--ê, kiōng saⁿ-cha̍p bān.

6Koh用銀一百tha-liân-tek，tùi以色列招募大能力ê勇士，十萬人。Koh ēng gûn chi̍t-pah tha-liân-tek, tùi Í-sek-lia̍t chio-bō͘ tōa lêng-le̍k ê ióng-sū, cha̍p-bān lâng.

7有上帝ê奴僕來見伊講，王ah，莫得hō͘以色列ê軍兵kap你去；因為耶和華無kap以色列人，就是Í-hoat-liân ê後裔，tī-teh。Ū Siōng-tè ê lô͘-po̍k lâi kìⁿ i kóng, Ông ah, bo̍h-tit hō͘ Í-sek-lia̍t ê kun-peng kap lí khì; in-ūi Iâ-hô-hoa bô kap Í-sek-lia̍t lâng, chiū-sī Í-hoat-liân ê hō͘-è, tī-teh.

8你若一定beh去，就tio̍h奮勇爭戰；上帝beh hō͘你敗tī對敵ê面前，因為上帝有權能幫贊人，也會chhia倒人。Lí nā it-tēng beh khì, chiū tio̍h hùn-ióng cheng-chiàn; Siōng-tè beh hō͘ lí pāi tī tùi-te̍k ê bīn-chêng, in-ūi Siōng-tè ū koân ōe pang-chān lâng, iā ōe chhia-tó lâng.

9A-má-siā問上帝ê奴僕講，我已經用銀一百tha-liân-tek hō͘以色列ê軍隊，hiah-ê beh怎樣ah？上帝ê奴僕應講，耶和華會用比chiah-ê khah-chōe hō͘你。A-má-siā mn̄g Siōng-tè ê lô͘-po̍k kóng, Góa í-keng ēng gûn chi̍t-pah tha-liân-tek hō͘ Í-sek-lia̍t ê kun-tūi, hiah-ê beh cháiⁿ-iūⁿ ah? Siōng-tè ê lô͘-po̍k ìn kóng, Iâ-hô-hoa ōe ēng pí chiah-ê khah-chōe hō͘ lí.

10Tùi án-ni，A-má-siā分別tùi Í-hoat-liân來ê軍兵，hō͘ in tò去in tau；所以in真受氣猶大人，氣phut-phut tò去in tau。Tùi án-ni A-má-siā hun-piat tùi Í-hoat-liân lâi ê kun-peng, hō͘ in tò-khì in tau; só͘-í in chin siū-khì Iû-tāi lâng, khì-phut-phut tò-khì in tau.

11A-má-siā家己奮勇，chhōa伊ê百姓出去到鹽ê山谷，thâi死Se-jíⁿ人一萬。A-má-siā ka-kī hùn-ióng, chhōa i ê peh-sìⁿ chhut-khì kàu Iâm ê soaⁿ-kok, thâi-sí Se-jíⁿ lâng chi̍t-bān.

12猶大人koh活掠一萬人，帶到山崁頂，tùi山崁頂kā in chhia落去，致到in lóng碎碎。Iû-tāi lâng koh oa̍h-lia̍h chi̍t-bān lâng, tòa kàu soaⁿ-khàm-téng, tùi soaⁿ-khàm-téng kā in chhia--lo̍h-khì, tì-kàu in lóng chhùi-chhùi.

13A-má-siā所差tò去hiah-ê軍隊，m̄准in kap伊去交戰ê，in攻擊猶大hiah-ê城，tùi撒馬利亞到Pek-hô-lûn，thâi死三千人，搶chōe-chōe物。A-má-siā só͘ chhe tò-khì hiah ê kun-tūi, m̄-chún in kap i khì kau-chiàn--ê, in kong-kek Iû-tāi hiah ê siâⁿ, tùi Sat-má-lī-a kàu Pek-hô-lûn, thâi-sí saⁿ-chheng lâng chhiúⁿ chōe-chōe mi̍h.

14A-má-siā thâi Í-tong人tò來，就帶Se-jíⁿ族hiah-ê上帝，立伊做家己ê上帝，跪拜tī伊ê面前，燒香hō͘伊。A-má-siā thâi Í-tong lâng tò--lâi, chiū tòa Se-jíⁿ cho̍k hiah ê siōng-tè, li̍p i chòe ka-kī ê siōng-tè, kūi-pài tī i ê bīn-chêng, sio-hiuⁿ hō͘ i.

15因為án-ni，耶和華大受氣A-má-siā，就差一個先知去見伊，講，hiah-ê百姓ê上帝bōe能救in ê百姓脫離你ê手，你啥事求in ah？In-ūi án-ni, Iâ-hô-hoa tōa siū-khì A-má-siā, chiū chhe chi̍t ê sian-ti khì kìⁿ i, kóng, Hiah ê peh-sìⁿ ê siōng-tè bōe-ōe kiù in ê peh-sìⁿ thoat-lī lí ê chhiú, lí siáⁿ-sū kiû in ah?

16伊kap伊講ê時，王kā伊講，阮kiám設立你做王ê謀士ah？你恬恬，啥事討phah ah？先知就恬恬，koh講，我知上帝定tio̍h意思beh滅你，因為你做chit-ê，m̄聽我ê勸解。I kap i kóng ê sî, ông kā i kóng, Goán kiám siat-li̍p lí chòe ông ê bô͘-sū ah? lí tiām-tiām, siáⁿ-sū thó phah ah? Sian-ti chiū tiām-tiām, koh kóng, Góa chai Siōng-tè tiāⁿ-tio̍h ì-sù beh bia̍t lí, in-ūi lí chòe chit-ê, m̄-thiaⁿ góa ê khoàn-kài.

17Hit時猶大王A-má-siā參詳差使者起見Iâ-hō͘ ê孫，Iok-hap-su ê kiáⁿ，以色列王Iok-a-si，講，來ah，咱兩人相見面tī戰場。Hit-sî Iû-tāi ông A-má-siā chham-siông chhe sù-chiá khí kìⁿ Iâ-hō͘ ê sun, Iok-hap-su ê kiáⁿ, Í-sek-lia̍t ông Iok-a-si, kóng, Lâi ah, lán nn̄g-lâng saⁿ kìⁿ-bīn tī chiàn-tiûⁿ.

18以色列王Iok-a-si差使者去見猶大王A-má-siā講，Lī-pa-lùn ê草刺差使者去見Lī-pa-lùn ê柏香樹講，用你ê cha-bó͘-kiáⁿ hō͘我ê kiáⁿ做bó͘；後來Lī-pa-lùn有一隻野獸經過thún踏hit-ê草刺。Í-sek-lia̍t ông Iok-a-si chhe sù-chiá khì kìⁿ Iû-tāi ông A-má-siā kóng, Lī-pa-lùn ê chháu-chhì chhe sù-chiá khì kìⁿ Lī-pa-lùn ê pek-hiuⁿ-chhiū kóng, Ēng lí ê cha-bó͘-kiáⁿ hō͘ góa ê kiáⁿ chòe bó͘; āu-lâi Lī-pa-lùn ū chi̍t chiah iá-siù keng-kè thún-ta̍h hit ê chháu-chhì.

19Taⁿ你講，你已經phah贏Í-tong，你ê心就驕，致到你誇口；你tī家內安然khiā起就好，啥事起事惹災厄，hō͘你本身kap猶大國相kap倒壞ah？Taⁿ lí kóng, lí í-keng phah-iâⁿ Í-tong, lí ê sim chiū kiau, tì-kàu lí khoa-kháu; lí tī ke-lāi an-jiân khiā-khí chiū hó, siáⁿ-sū khí-sū jiá chai-ē, hō͘ lí pún-sin kap Iû-tāi kok saⁿ-kap tó-hoāi ah?

20總是A-má-siā m̄肯聽，因為chit-ê事是出tī上帝，beh將in交tī對敵ê手；因為in chhē Í-tong hiah-ê上帝。Chóng-sī A-má-siā m̄-khéng thiaⁿ, in-ūi chit ê sū sī chhut tī Siōng-tè, beh chiong in kau tī tùi-te̍k ê chhiú; in-ūi in chhē Í-tong hiah ê siōng-tè.

21Tùi án-ni，以色列王Iok-a-si上來，tī猶大ê Pek-sī-be̍k kap猶大王A-má-siā相見面tī戰場。Tùi án-ni, Í-sek-lia̍t ông Iok-a-si chiūⁿ-lâi, tī Iû-tāi ê Pek-sī-be̍k kap Iû-tāi ông A-má-siā saⁿ kìⁿ-bīn tī chiàn-tiûⁿ.

22猶大thâi輸tī以色列ê面前，ta̍k人走tò去in ê布棚。Iû-tāi thâi-su tī Í-sek-lia̍t ê bīn-chêng, ta̍k-lâng cháu tò-khì in ê pò͘-pîⁿ.

23以色列王Iok-a-si，tī Pek-sī-be̍k掠tio̍h Iok-hap-su ê孫，Iok-a-si ê kiáⁿ，猶大王A-má-siā，帶伊到耶路撒冷；koh拆毀耶路撒冷ê城牆，tùi Í-hoat-liân門到角門，共四百肘。Í-sek-lia̍t ông Iok-a-si, tī Pek-sī-be̍k lia̍h-tio̍h Iok-hap-su ê sun, Iok-a-si ê kiáⁿ, Iû-tāi ông A-má-siā, tòa i kàu Iâ-lō͘-sat-léng; koh thiah-húi Iâ-lō͘-sat-léng ê siâⁿ-chhiûⁿ, tùi Í-hoat-liân mn̂g kàu kak-mn̂g, kiōng sì-pah tiú.

24取上帝殿內Gô-piat-í-tong所顧守ê金、銀、器具，kap王宮ê財寶，koh掠人做準當，就tò去撒馬利亞。Chhú Siōng-tè tiān-lāi Gô-piat-í-tong só͘ kò͘-siú ê kim, gûn, khì-kū, kap ông-kiong ê châi-pó, koh lia̍h lâng chòe chún-tǹg, chiū tò-khì Sat-má-lī-a.

25I-sek-lia̍t王Iok-hap-su ê kiáⁿ Iok-a-si死了後，猶大王Iok-a-si ê kiáⁿ A-má-siā iáu活十五年。I-sek-lia̍t ông Iok-hap-su ê kiáⁿ Iok-a-si sí liáu-āu, Iû-tāi ông Iok-a-si ê kiáⁿ A-má-siā iáu oa̍h cha̍p-gō͘ nî.

26A-má-siā其餘ê事，tùi頭到尾，kiám無lóng記tī猶大kap以色列chiah-ê王ê記錄mah？A-má-siā kî-û ê sū, tùi thâu kàu bé, kiám bô lóng kì tī Iû-tāi kap Í-sek-lia̍t chiah ê ông ê kì-lio̍k mah?

27Tùi A-má-siā偏離無tè耶和華了後，tī耶路撒冷有人結黨beh害伊，伊就走到拉結；in差人jip伊到拉結，tī-hia thâi死伊。Tùi A-má-siā phian-lī bô tè Iâ-hô-hoa liáu-āu, tī Iâ-lō͘-sat-léng ū lâng kiat-tóng beh hāi i, i chiū cháu kàu La̍h-kiat; in chhe lâng jip i kàu La̍h-kiat, tī-hia thâi-sí i.

28人就用馬載伊tò來，kap伊ê列祖埋葬tī猶大ê城。Lâng chiū ēng bé chài i tò-lâi, kap i ê lia̍t-chó͘ bâi-chòng tī Iû-tāi ê siâⁿ.