1A-hap-su坐位ê時，二十歲，tī耶路撒冷做王十六年。無親像伊ê祖大衛行耶和華所看做好ê事；A-hap-su chē-ūi ê sî, jī-cha̍p hè, tī Iâ-lō͘-sat-léng chòe ông cha̍p-la̍k nî. Bô chhin-chhiūⁿ i ê chó͘ Tāi-pi̍t kiâⁿ Iâ-hô-hoa só͘ khòaⁿ-chòe hó ê sū;

2就是行以色列chiah-ê王ê路，koh鑄造hiah-ê Pa-le̍k ê像；chiū-sī kiâⁿ Í-sek-lia̍t chiah ê ông ê lō͘, koh chù-chō hiah ê Pa-le̍k ê siōng;

3koh燒香tī Piān-him-lùn ê山谷，用伊ê kiáⁿ兒燒tī火裡，thàn外邦所行可惡ê事，就是耶和華tī以色列人ê面前所趕逐ê；koh sio-hiuⁿ tī Piān-him-lùn ê soaⁿ-kok, ēng i ê kiáⁿ-jî sio tī hé--nih, thàn gōa-pang só͘ kiâⁿ khó-ò͘ⁿ ê sū, chiū-sī Iâ-hô-hoa tī Í-sek-lia̍t lâng ê bīn-chêng só͘ kóaⁿ-tio̍k--ê;

4koh tī山頭壇，tī山ê頂面，tī ta̍k叢青翠ê樹腳，獻祭燒香。koh tī soaⁿ-thâu-tôaⁿ, tī soaⁿ ê téng-bīn, tī ta̍k-châng chhiⁿ-chhùi ê chhiū-kha, hiàn-chè sio-hiuⁿ.

5所以耶和華伊ê上帝交伊tī A-lân王ê手，in就phah伊，掠伊ê百姓真chōe，帶到大馬色。Koh交伊tī以色列王ê手，伊thâi死in真chōe。Só͘-í Iâ-hô-hoa i ê Siōng-tè kau i tī A-lân ông ê chhiú, in chiū phah i, lia̍h i ê peh-sìⁿ chin-chōe, tòa kàu Tāi-má-sek. Koh kau i tī Í-sek-lia̍t ông ê chhiú, i thâi-sí in chin-chōe.

6Lī-má-lī ê kiáⁿ Pí-ka做一日tī猶大thâi死十二萬人，lóng是勇士；因為in離開耶和華in列祖ê上帝。Lī-má-lī ê kiáⁿ Pí-ka chòe chi̍t-ji̍t tī Iû-tāi thâi-sí cha̍p-jī-bān lâng, lóng sī ióng-sū; in-ūi in lī-khui Iâ-hô-hoa in lia̍t-chó͘ ê Siōng-tè.

7有一個Í-hoat-liân中ê勇士，名叫Sè-ki-lī，thâi王ê kiáⁿ Má-se-ngá，kap管理王宮ê Ap-su-lī-kam，kap宰相Í-lī-ka-ná。Ū chi̍t-ê Í-hoat-liân tiong ê ióng-sū, miâ kiò Sè-ki-lī, thâi ông ê kiáⁿ Má-se-ngá, kap koán-lí ông-kiong ê Ap-su-lī-kam, kap cháiⁿ-siòng Í-lī-ka-ná.

8以色列人掠in ê兄弟，連婦人人、kiáⁿ、cha-bó͘-kiáⁿ，共二十萬；koh搶chōe-chōe財物，帶in所搶ê去撒馬利亞。Í-sek-lia̍t lâng lia̍h in ê hiaⁿ-tī, liân hū-jîn-lâng, kiáⁿ, cha-bó͘-kiáⁿ, kiōng jī-cha̍p-bān; koh chhiúⁿ chōe-chōe châi-bu̍t, tòa in só͘-chhiúⁿ--ê khì Sat-má-lī-a.

9總是tī-hia有耶和華ê先知，名叫Gô-tek，出去接hiah-ê來撒馬利亞ê軍隊，kā in講，因為耶和華lín列祖ê上帝受氣猶大，所以將in交tī lín ê手，lín竟然受氣抵天，thâi in真chōe。Chóng-sī tī-hia ū Iâ-hô-hoa ê sian-ti, miâ kiò Gô-tek, chhut-khì chih hiah ê lâi Sat-má-lī-a ê kun-tūi, kā in kóng, In-ūi Iâ-hô-hoa lín lia̍t-chó͘ ê Siōng-tè siū-khì Iû-tāi, só͘-í chiong in kau tī lín ê chhiú, lín kéng-jiân siū-khì tú-thiⁿ, thâi in chin-chōe.

10Taⁿ lín有意思壓制猶大人kap耶路撒冷人做lín ê奴僕、女婢；總是lín本身kiám無得罪耶和華lín上帝mah？Taⁿ lín ū ì-sù ap-chè Iû-tāi lâng kap Iâ-lō͘-sat-léng lâng chòe lín ê lô͘-po̍k, lú-pī; chóng-sī lín pún-sin kiám bô tek-chōe Iâ-hô-hoa lín Siōng-tè mah?

11Taⁿ lín tio̍h聽我講，lín所掠來lín ê兄弟tio̍h放伊tò去，因為耶和華ê大受氣臨到lín。Taⁿ lín tio̍h thiaⁿ góa kóng, lín só͘ lia̍h lâi lín ê hiaⁿ-tī tio̍h pàng i tò-khì, in-ūi Iâ-hô-hoa ê tōa siū-khì lîm-kàu lín.

12Tùi án-ni， Í-hoat-liân ê首領kúi-nā人，就是Iok-hap-lân ê kiáⁿ A-sat-lī-ngá，Bí-si̍t-lī-boa̍t ê kiáⁿ Pí-lī-ka，Sa-liông ê kiáⁿ Iâ-hi-se-ka，Hap-tek-lâi ê kiáⁿ A-má-sat，起來阻止hiah-ê tùi戰陣tò來ê；Tùi án-ni Í-hoat-liân ê siú-léng kúi-nā lâng, chiū-sī Iok-hap-lân ê kiáⁿ A-sat-lī-ngá, Bí-si̍t-lī-boa̍t ê kiáⁿ Pí-lī-ka, Sa-liông ê kiáⁿ Iâ-hi-se-ka, Hap-tek-lâi ê kiáⁿ A-má-sat, khí-lâi chó͘-chí hiah ê tùi chiàn-tīn tò-lâi--ê;

13kā in講，Lín m̄-thang帶所掠ê人入來chia；因為lín所主意ê是beh hō͘阮得罪耶和華，加添阮ê罪過，阮ê過失，因為阮ê過失真大，已經有大受氣臨到以色列lah。kā in kóng, Lín m̄-thang tòa só͘ lia̍h ê lâng ji̍p-lâi chia; in-ūi lín só͘ chú-ì--ê sī beh hō͘ goán tek-chōe Iâ-hô-hoa, ke-thiⁿ goán ê chōe-kòa, goán ê kè-sit, in-ūi goán ê kè-sit chin-tōa, í-keng ū tōa siū-khì lîm-kàu Í-sek-lia̍t lah.

14Tùi án-ni， kia̍h ke-si ê人，將in所掠ê人，所搶ê物，放tī hiah-ê首領kap會眾ê面前。Tùi án-ni kia̍h ke-si ê lâng, chiong in só͘ lia̍h ê lâng, só͘ chhiúⁿ ê mi̍h, pàng tī hiah ê siú-léng kap hōe-chiòng ê bīn-chêng.

15頂面hiah-ê記名ê人就起來，hō͘受掠ê人來，其中有thǹg-theh-ê，就tùi所搶來ê物中，the̍h衫hō͘ in穿，koh用鞋hō͘ in；koh hō͘ in lim食，用油抹in；其中軟弱ê，就hō͘ in騎驢，送到棗樹城，耶利哥，in ê兄弟hia；後來就tò去撒馬利亞。Téng-bīn hiah ê kì-miâ ê lâng chiū khí-lâi, hō͘ siū-lia̍h ê lâng lâi, kî-tiong ū thǹg-theh--ê, chiū tùi só͘ chhiúⁿ-lâi ê mi̍h-tiong, the̍h saⁿ hō͘ in chhēng, koh ēng ôe hō͘ in; koh hō͘ in lim-chia̍h, ēng iû boah in; kî-tiong loán-jio̍k--ê, chiū hō͘ in khiâ lû, sàng kàu chó-chhiū siâⁿ, Iâ-lī-ko, in ê hiaⁿ-tī hia; āu-lâi chiū tò-khì Sat-má-lī-a.

16Hit時A-hap-su王差使者去見亞述hiah-ê王，求in幫贊；Hit-sî A-hap-su ông chhe sù-chiá khì kìⁿ A-su̍t hiah ê ông, kiû in pang-chān;

17因為Í-tong人koh來phah猶大，掠百姓去。in-ūi Í-tong lâng koh lâi phah Iû-tāi, lia̍h peh-sìⁿ khì.

18腓利士人也來侵犯低ê平洋，kap猶大南pêng hiah-ê城，取Pek-sī-be̍k、A-ngá-lûn、Ki-te-lô、So-ko kap伊ê鄉社，Têng-la̍p kap伊ê鄉社；Kīn-só kap伊ê鄉社，就tiàm tī-hia。Hui-lī-sū lâng iā lâi chhim-hoān kē ê pîⁿ-iûⁿ, kap Iû-tāi lâm-pêng hiah ê siâⁿ, chhú Pek-sī-be̍k, A-ngá-lûn, Ki-te-lô, So-ko kap i ê hiuⁿ-siā, Têng-la̍p kap i ê hiuⁿ-siā; Kīn-só kap i ê hiuⁿ-siā, chiū tiàm tī-hia.

19因為耶和華為tio̍h以色列王A-hap-su ê緣故，hō͘猶大卑微；是因為A-hap-su tī猶大放肆，大得罪耶和華。In-ūi Iâ-hô-hoa ūi-tio̍h Í-sek-lia̍t ông A-hap-su ê iân-kò͘, hō͘ Iû-tāi pi-bî; sī in-ūi A-hap-su tī Iû-tāi hòng-sù, tōa tek-chōe Iâ-hô-hoa.

20亞述王Thê-kek-la̍h-pì-nî-sek上來，無援助伊，反tńg窘迫伊。A-su̍t ông Thê-kek-la̍h-pì-nî-sek chiūⁿ-lâi, bô oān-chō͘ i, hoán-tńg khún-pek i.

21A-hap-su tùi耶和華ê殿，kap王宮，kap首領ê家，the̍h出財寶hō͘亞述王；總是lóng無利益伊。A-hap-su tùi Iâ-hô-hoa ê tiān, kap ông-kiong, kap siú-léng ê ke, the̍h-chhut châi-pó hō͘ A-su̍t ông; chóng-sī lóng bô lī-ek--i.

22Chit-ê A-hap-su王tī緊急ê時，益發得罪耶和華。Chit ê A-hap-su ông tī kín-kip ê sî, it-hoat tek-chōe Iâ-hô-hoa.

23因為伊祭祀大馬色ê上帝。就是phah伊ê，講，因為A-lân王ê上帝幫贊伊n，我也祭祀伊，hō͘伊幫贊我。總是hiah-ê上帝hō͘伊kap以色列眾人lóng倒壞。In-ūi i chè-sū Tāi-má-sek ê siōng-tè. chiū-sī phah i--ê, kóng, In-ūi A-lân ông ê siōng-tè pang-chān in, góa iā chè-sū i, hō͘ i pang-chān góa. Chóng-sī hiah ê siōng-tè hō͘ i kap Í-sek-lia̍t chèng-lâng lóng tó-hoāi.

24A-hap-su聚集上帝殿ê器具，phah破上帝殿內ê器具；koh封鎖耶和華殿ê門；tī耶路撒冷ta̍k-ê oat角起壇。A-hap-su chū-chi̍p Siōng-tè tiān ê khì-kū, phah-phòa Siōng-tè tiān-lāi ê khì-kū; koh hong-só Iâ-hô-hoa tiān ê mn̂g; tī Iâ-lō͘-sat-léng ta̍k ê oat-kak khí-tôaⁿ.

25Koh tī猶大ta̍k-ê城起山頭壇，燒香hō͘別ê上帝，激動耶和華，伊ê列祖ê上帝ê受氣。Koh tī Iû-tāi ta̍k ê siâⁿ khí soaⁿ-thâu-tôaⁿ, sio-hiuⁿ hō͘ pa̍t ê siōng-tè, kek-tōng Iâ-hô-hoa, i ê lia̍t-chó͘ ê Siōng-tè ê siū-khì.

26A-hap-su其餘ê事，kap伊ê行做，tùi頭到尾，lóng記tī猶大kap以色列chiah-ê王ê記錄。A-hap-su kî-û ê sū, kap i ê kiâⁿ-chòe, tùi thâu kàu bé, lóng kì tī Iû-tāi kap Í-sek-lia̍t chiah ê ông ê kì-lio̍k.

27A-hap-su kap伊ê列祖同睏，埋葬伊tī耶路撒冷城，無hō͘伊入tī以色列chiah-ê王ê墓。伊ê kiáⁿ Hi-se-ka續接伊做王。A-hap-su kap i ê lia̍t-chó͘ tâng-khùn, bâi-chòng i tī Iâ-lō͘-sat-léng siâⁿ, bô hō͘ i ji̍p tī Í-sek-lia̍t chiah ê ông ê bōng. I ê kiáⁿ Hi-se-ka sòa-chiap i chòe ông.

1Hi-se-ka坐位ê時，二十五歲，tī耶路撒冷做王共二十九年。伊ê老母名叫A-pí-ngá，是Sat-ka-lī-ngá ê cha-bó͘-kiáⁿ。Hi-se-ka chē-ūi ê sî, jī-cha̍p-gō͘ hè, tī Iâ-lō͘-sat-léng chòe ông kiōng jī-cha̍p-káu nî. I ê lāu-bú miâ kiò A-pí-ngá, sī Sat-ka-lī-ngá ê cha-bó͘-kiáⁿ.

2伊行耶和華所看做好ê事，照伊ê祖大衛一切所行ê。I kiâⁿ Iâ-hô-hoa só͘ khòaⁿ-chòe hó ê sū, chiàu i ê chó͘ Tāi-pi̍t it-chhè só͘ kiâⁿ-ê.

3Tī元年正月，開耶和華殿ê門，修理伊。Tī goân--nî chiaⁿ-ge̍h, khui Iâ-hô-hoa tiān ê mn̂g, siu-lí i.

4I召hiah-ê祭司kap利未人來，聚集tī東勢闊ê所在，I tiàu hiah ê chè-si kap Lī-bī lâng lâi, chū-chi̍p tī tang--sì khoah ê só͘-chāi,

5kā in講，利未人ah，tio̍h聽我講；taⁿ lín tio̍h清氣家己，也tio̍h清氣耶和華lín列祖ê上帝ê殿，tùi聖所piàⁿ出hiah-ê污穢。kā in kóng, Lī-bī lâng ah, tio̍h thiaⁿ góa kóng; taⁿ lín tio̍h chheng-khì ka-kī, iā tio̍h chheng-khì Iâ-hô-hoa lín lia̍t-chó͘ ê Siōng-tè ê tiān, tùi sèng-só͘ piàⁿ-chhut hiah ê ù-òe.

6因為咱ê列祖有犯罪，行耶和華咱ê上帝所看做pháiⁿ ê事，離開伊，oa̍t-tńg伊ê面，背耶和華khiā起ê所在。In-ūi lán ê lia̍t-chó͘ ū hoān-chōe, kiâⁿ Iâ-hô-hoa lán ê Siōng-tè só͘ khòaⁿ-chòe pháiⁿ ê sū, li-khui I, oa̍t-tńg i ê bīn, pōe Iâ-hô-hoa khiā-khí ê só͘-chāi.

7In koh關鎖léng廊ê門，phah熄燈火，無tī聖所燒香，獻燒祭，hō͘耶和華以色列ê上帝。In koh koaiⁿ-só léng-lông ê mn̂g, phah-sit teng-hé, bô tī sèng-só͘ sio-hiuⁿ, hiàn sio-chè, hō͘ Iâ-hô-hoa Í-sek-lia̍t ê Siōng-tè.

8所以耶和華受氣臨到猶大kap耶路撒冷，hō͘ in漂流，hō͘人gông-ngia̍h，恥笑，親像lín親目所看見ê。Só͘-í Iâ-hô-hoa siū-khì lîm-kàu Iû-tāi kap Iâ-lō͘-sat-léng, hō͘ in phiau-liû, hō͘ lâng gông-ngia̍h, thí-chhiò, chhin-chhiūⁿ lín chhin-ba̍k só͘ khòaⁿ-kìⁿ ê.

9因為án-ni阮ê父公受刀thâi，阮ê kiáⁿ，cha-bó͘-kiáⁿ，kap阮ê bó͘，也hō͘人掠去。In-ūi án-ni goán ê pē-kong siū to thâi, goán ê kiáⁿ, cha-bó͘-kiáⁿ, kap goán ê bó͘, iā hō͘ lâng lia̍h-khì.

10Taⁿ我ê心beh kap耶和華以色列ê上帝立約，hō͘伊ê大受氣oa̍t-tńg離開咱。Taⁿ góa ê sim beh kap Iâ-hô-hoa Í-sek-lia̍t ê Siōng-tè li̍p-iok, hō͘ I ê tōa siū-khì oa̍t-tńg lī-khui lán.

11我chiah-ê kiáⁿ ah，taⁿ m̄-thang pîn-tōaⁿ，因為耶和華揀lín khiā tī伊ê面前服事伊，擔當職任燒香hō͘伊。Góa chiah ê kiáⁿ ah, taⁿ m̄-thang pîn-tōaⁿ, in-ūi Iâ-hô-hoa kéng lín khiā tī I ê bīn-chêng ho̍k-sāi I, tam-tng chit-jīm sio-hiuⁿ hō͘ I.

12Tùi án-ni，利未人Ko-hat族A-má-sài ê kiáⁿ Má-hap，A-sat-lī-ngá ê kiáⁿ約珥，Bí-la̍h-lī族A-pek-tí ê kiáⁿ Ki-sū，Iâ-hap-lī-le̍k ê kiáⁿ A-sat-lī-ngá，Kek-siūⁿ族Sin-má ê kiáⁿ Iok-a，Iok-a ê kiáⁿ I-tiān；Tùi án-ni, Lī-bī lâng Ko-hat cho̍k A-má-sài ê kiáⁿ Má-hap, A-sat-lī-ngá ê kiáⁿ Iok-jíⁿ, Bí-la̍h-lī cho̍k A-pek-tí ê kiáⁿ Ki-sū, Iâ-hap-lī-le̍k ê kiáⁿ A-sat-lī-ngá, Kek-sūn cho̍k Sin-má ê kiáⁿ Iok-a, Iok-a ê kiáⁿ I-tiān;

13Í-lī-sat-hoán ê族Sin-lī kap Iâ-lī，A-sat族Sat-ka-lī-ngá，kap Má-thàm-ngá；Í-lī-sat-hoán ê cho̍k Sin-lī kap Iâ-lī, A-sat cho̍k Sat-ka-lī-ngá, kap Má-thàm-ngá;

14Hi-bān族Iâ-iat kap Sī-múi，Iâ-tō͘-tùn族Sī-má-ngá kap O͘-siat，lóng起來；Hi-bān cho̍k Iâ-iat kap Sī-múi, Iâ-tō͘-tùn cho̍k Sī-má-ngá kap O͘-siat, lóng khí-lâi;

15聚集in ê兄弟，清氣家己，照王thàn耶和華ê話所命令ê，入去洗清耶和華ê殿。chū-chi̍p in ê hiaⁿ-tī, chheng-khì ka-kī, chiàu ông thàn Iâ-hô-hoa ê ōe só͘ bēng-lēng ê, ji̍p-khì sóe-chheng Iâ-hô-hoa ê tiān.

16祭司入耶和華殿ê內面beh洗清伊，將耶和華殿內所有ê污穢帶出去到耶和華殿ê院；利未人接伊，帶去外面到Khip-lûn溪。Chè-si ji̍p Iâ-hô-hoa tiān ê lāi-bīn beh sóe-chheng--i, chiong Iâ-hô-hoa tiān-lāi só͘-ū ê ù-òe tòa--chhut-khì kàu Iâ-hô-hoa tiān ê īⁿ; Lī-bī lâng chih--i, tòa-khì gōa-bīn kàu Khip-lûn khoe.

17Tùi正月初一日起手行清氣ê事，hit月ê初八日chiah到耶和華ê léng廊，八日久清氣耶和華ê殿，到正月十六日就明白。Tùi chiaⁿ-ge̍h chhoe-it ji̍t khí-chhiú kiâⁿ chheng-khì ê sū, hit ge̍h ê chhoe-poeh ji̍t chiah kàu Iâ-hô-hoa ê léng-lông, poeh-ji̍t kú chheng-khì Iâ-hô-hoa ê tiān, kàu chiaⁿ-ge̍h cha̍p-la̍k ji̍t chiū bêng-pe̍k.

18Tùi án-ni，in入去見Hi-se-ka王講，阮已經將耶和華ê kui間殿，kap燒祭ê壇，以及伊ê器具，排列餅ê桌，kap伊ê器具，lóng洗清。Tùi án-ni in ji̍p khì kìⁿ Hi-se-ka ông kóng, Goán í-keng chiong Iâ-hô-hoa ê kui keng tiān, kap sio-chè ê tôaⁿ, í-ki̍p i ê khì-kū, pâi-lia̍t piáⁿ ê toh, kap i ê khì-kū, lóng sóe-chheng.

19Koh A-hap-su王坐位犯罪ê時所棄sak ê器具，阮lóng備辦，koh清氣伊。看ah，taⁿ lóng tī耶和華ê壇前。Koh A-hap-su ông chē-ūi hoān-chōe ê sî só͘ khì-sak ê khì-kū, goán lóng pī-pān, koh chheng-khì i. Khòaⁿ ah, taⁿ lóng tī Iâ-hô-hoa ê tôaⁿ-chêng.

20Hi-se-ka王透早起來，聚集城內ê首領，lóng上耶和華ê殿。Hi-se-ka ông thàu-chá khí-lâi, chū-chi̍p siâⁿ-lāi ê siú-léng, lóng chiūⁿ Iâ-hô-hoa ê tiān.

21In牽七隻牛káng，七隻羊káng，七隻綿羊á，七隻山羊káng，beh為國，為聖所，為猶大，獻做贖罪ê祭。王命令亞倫ê kiáⁿ孫hiah-ê祭司，獻in tī耶和華ê壇。In khan chhit chiah gû-káng, chhit chiah iûⁿ-káng, chhit chiah mî-iûⁿ-á, chhit chiah soaⁿ-iûⁿ-káng, beh ūi kok, ūi Sèng-só͘, ūi Iû-tāi, hiàn chòe sio̍k-chōe ê chè. Ông bēng-lēng A-lûn ê kiáⁿ-sun hiah ê chè-si, hiàn--in tī Iâ-hô-hoa ê tôaⁿ.

22In就thâi牛káng，祭司接hit-ê血，hiù tī壇裡；也thâi羊káng，用血hiù tī壇裡；koh thâi綿羊á，也用血hiù tī壇裡；In chiū thâi gû-káng, chè-si chih hit ê huih, hiù tī tôaⁿ--nih; iā thâi iûⁿ-káng, ēng huih hiù tī tôaⁿ--nih; koh thâi mî-iûⁿ-á, iā ēng huih hiù tī tôaⁿ--nih;

23用hiah-ê做贖罪祭ê山羊káng，牽到王kap會眾ê面前，in就按手tī hit頂面。ēng hiah ê chòe sio̍k-chōe-chè ê soaⁿ-iûⁿ-káng, khan kàu ông kap hōe-chiòng ê bīn-chêng, in chiū hōaⁿ-chhiú tī hí(**hit) téng-bīn.

24祭司thâi伊，用in ê血做贖罪ê祭tī壇裡，為以色列眾人贖罪；因為王命令tio̍h用燒祭，kap贖罪祭為以色列眾人來獻。Chè-si thâi--i, ēng in ê huih chòe sio̍k-chōe ê chè tī tôaⁿ--nih, ūi Í-sek-lia̍t chèng-lâng sio̍k-chōe; in-ūi ông bēng-lēng tio̍h ēng sio-chè, kap sio̍k-chōe-chè ūi Í-sek-lia̍t chèng-lâng lâi hiàn.

25王koh派利未人tī耶和華ê殿the̍h鈸、瑟、琴，照大衛，kap王ê先見Ka-tek，kap先知Ná-tan，所命令ê；因為耶和華有託重伊hiah-ê先知命令in án-ni。Ông koh phài Lī-bī lâng tī Iâ-hô-hoa ê tiān the̍h poa̍t, sek, khîm, chiàu Tāi-pi̍t, kap ông ê sian-kiàn Ka-tek, kap sian-ti Ná-tan, só͘ bēng-lēng--ê; in-ūi Iâ-hô-hoa ū thok-tiōng I hiah ê sian-ti bēng-lēng in án-ni.

26利未人the̍h大衛ê樂器，祭司kia̍h號頭，相kap teh khiā。Lī-bī lâng the̍h Tāi-pi̍t ê ga̍k-khì, chè-si kia̍h hō-thâu, saⁿ-kap teh khiā.

27Hi-se-ka命令獻燒祭tī壇裡，燒祭一下獻，就唱o-ló耶和華ê歌，用號頭，koh用以色列王大衛ê樂器來和伊。Hi-se-ka bēng-lēng hiàn sio-chè tī tôaⁿ--nih, sio-chè chi̍t-ē hiàn, chiū chhiùⁿ o-ló Iâ-hô-hoa ê koa, ēng hō-thâu, koh ēng Í-sek-lia̍t ông Tāi-pi̍t ê ga̍k-khì lâi hô[hō] i.

28會眾lóng敬拜，唱歌ê唱伊，pûn號頭ê pûn伊；án-ni到燒祭獻明白。Hōe-chiòng lóng kèng-pài, chhiùⁿ-koa--ê chhiùⁿ--i, pûn hō-thâu--ê pûn i; án-ni kàu sio-chè hiàn bêng-pe̍k.

29獻明白，王kap一切相kap tī-teh ê人，lóng àⁿ頭敬拜。Hiàn bêng-pe̍k, ông kap it-chhè saⁿ-kap tī-teh ê lâng, lóng àⁿ-thâu kèng-pài.

30Hi-se-ka王kap hiah-ê首領，koh命令利未人用大衛kap先見A-sat ê詩，o-ló耶和華；in就歡喜，吟詩o-ló，àⁿ頭敬拜。Hi-se-ka ông kap hiah ê siú-léng, koh bēng-lēng Lī-bī lâng ēng Tāi-pi̍t kap sian-kiàn A-sat ê si, o-ló Iâ-hô-hoa; in chiū hoaⁿ-hí, gîm-si o-ló, àⁿ-thâu kèng-pài.

31Hi-se-ka就應講，Lín已經家己分別歸hō͘耶和華，tio̍h近前來帶祭物kap謝恩祭到耶和華ê殿；會眾就帶祭物kap謝恩祭來；見若甘心樂意ê也帶燒祭來。Hi-se-ka chiū ìn kóng, Lín í-keng ka-kī hun-piat kui hō͘ Iâ-hô-hoa, tio̍h kūn-chêng lâi tòa chè-mi̍h kap siā-un-chè kàu Iâ-hô-hoa ê tiān; hōe-chiòng chiū tòa chè-mi̍h kap siā-un-chè lâi; kìⁿ-nā kam-sim lo̍k-ì--ê iā tòa sio-chè lâi.

32會眾所獻燒祭ê額，計共牛káng七十隻，羊káng一百隻，綿羊á兩百隻，chiah-ê lóng是做燒祭獻hō͘耶和華ê。Hōe-chiòng só͘ hiàn sio-chè ê gia̍h, kè-kiōng gû-káng chhit-cha̍p chiah, iûⁿ-káng chi̍t-pah chiah, mî-iûⁿ-á nn̄g-pah chiah, chiah-ê lóng sī chòe sio-chè hiàn-hō͘ Iâ-hô-hoa--ê.

33Koh有分別做聖ê物，牛káng六百隻，綿羊三千隻。Koh ū hun-piat chòe-sèng ê mi̍h, gû-káng la̍k-pah chiah, mî-iûⁿ saⁿ-chheng chiah.

34總是祭司siuⁿ少，bōe會一盡剝(pak)hiah-ê燒祭cheng-siⁿ ê皮，所以in ê兄弟利未人幫贊伊n到hit-ê tāi-chì明白，koh thèng候hiah-ê祭司家己清氣；因為利未人誠心家己清氣，贏過祭司。Chóng-sī chè-si siuⁿ-chió, bōe-ōe it-chīn pak hiah ê sio-chè cheng-siⁿ ê phê, só͘-í in ê hiaⁿ-tī Lī-bī lâng pang-chān in kàu hit ê tāi-chì bêng-pe̍k, koh thèng-hāu hiah ê chè-si ka-kī chheng-khì; in-ūi Lī-bī lâng sêng-sim ka-kī chheng-khì, iâⁿ-kè chè-si.

35燒祭kap謝恩祭ê油，kap ta̍k號燒祭所配ê灌奠，真chōe。Án-ni，耶和華殿內ê事照次序排列。Sio-chè kap siā-un-chè ê iû, kap ta̍k-hō sio-chè só͘ phòe ê koàn-tiān, chin-chōe. Án-ni, Iâ-hô-hoa tiān-lāi ê sū chiàu chhù-sū pâi-lia̍t.

36Hi-se-ka kap眾百姓歡喜，因為上帝替百姓所備辦ê，因為chit-ê事忽然成。Hi-se-ka kap chèng peh-sìⁿ hoaⁿ-hí, in-ūi Siōng-tè thòe peh-sìⁿ só͘ pī-pān ê, in-ūi chit ê sū hut-jiân chiâⁿ.

1Hi-se-ka差人到以色列kap猶大遍地，koh寫phoe hō͘ Í-hoat-lian5kap Má-ná-se，ài in到耶路撒冷耶和華ê殿，守pôaⁿ過節服事耶和華以色列ê上帝。Hi-se-ka chhe lâng kàu Í-sek-lia̍t kap Iû-tāi piàn-tōe, koh siá phoe hō͘ Í-hoat-liân kap Má-ná-se, ài in kàu Iâ-lō͘-sat-léng Iâ-hô-hoa ê tiān, siú pôaⁿ-kè-choeh ho̍k-sāi Iâ-hô-hoa Í-sek-lia̍t ê Siōng-tè.

2因為王kap伊ê首領，kap tī耶路撒冷ê會眾，已經相kap議論，beh tī二月守pôaⁿ過節。In-ūi ông kap i ê siú-léng, kap tī Iâ-lō͘-sat-léng ê hōe-chiòng, í-keng saⁿ-kap gī-lūn, beh tī jī-ge̍h siú pôaⁿ-kè-choeh.

3Hit時in bōe會守，因為家己清氣ê祭司iáu無夠額，百姓也無有聚集tī耶路撒冷。Hit-sî in bōe-ōe siú, in-ūi ka-kī chheng-khì ê chè-si iáu bô kàu-gia̍h, peh-sìⁿ iā bô-ū chū-chi̍p tī Iâ-lō͘-sat-léng.

4王kap會眾lóng看chit-ê tāi-chì做好。Ông kap hōe-chiòng lóng khòaⁿ chit ê tāi-chì chòe hó.

5就定tio̍h命令，宣布tī以色列全地，tùi別是巴到Tàn，hō͘ in lóng來，tī耶路撒冷守pôaⁿ過節服事耶和華以色列ê上帝；因為百姓平素無chōe-chōe人照所寫ê規例來守伊。Chiū tiāⁿ-tio̍h bēng-lēng, soan-pò͘ tī Í-sek-lia̍t choân-tōe, tùi Pia̍t-sī-pa kàu Tàn, hō͘ in lóng lâi, tī Iâ-lō͘-sat-léng siú pôaⁿ-kè-choeh ho̍k-sāi Iâ-hô-hoa Í-sek-lia̍t ê Siōng-tè; in-ūi peh-sìⁿ pêng-sò͘ bô chōe-chōe lâng chiàu só͘ siá ê kui-lē lâi siú--i.

6走文書ê帶王kap伊hiah-ê首領ê phoe，遍行以色列kap猶大地，照王ê命令，講，以色列人ah，lín tio̍h koh歸向亞伯拉罕、以撒，以色列ê上帝耶和華，伊就beh歸向lín，就是脫離亞述hiah-ê王ê手所chhun ê百姓。Cháu-bûn-su--ê tòa ông kap i hiah ê siú-léng ê phoe, piàn-kiâⁿ Í-sek-lia̍t kap Iû-tāi tōe, chiàu ông ê bēng-lēng, kóng, Í-sek-lia̍t lâng ah, lín tio̍h koh kui-ǹg A-pek-la̍h-hán, Í-sat, Í-sek-lia̍t ê Siōng-tè Iâ-hô-hoa, I chiū beh kui-ǹg lín, chiū-sī thoat-lī A-su̍t hiah ê ông ê chhiú só͘ chhun ê peh-sìⁿ.

7Lín m̄-thang親像lín ê列祖，kap lín ê兄弟，in干犯耶和華in列祖ê上帝，致到伊hō͘ in tú-tio̍h滅無，親像lín所看見ê。Lín m̄-thang chhin-chhiūⁿ lín ê lia̍t-chó͘, kap lín ê hiaⁿ-tī, in kan-hoān Iâ-hô-hoa in lia̍t-chó͘ ê Siōng-tè, tì-kàu I hō͘ in tú-tio̍h bia̍t-bô, chhin-chhiūⁿ lín só͘ khòaⁿ-kìⁿ ê.

8Taⁿ m̄-thang親像lín ê列祖來硬頷頸；tio̍h獻家己hō͘耶和華，入伊ê聖所，就是伊永遠分別做聖ê；koh tio̍h服事耶和華lín ê上帝，thang hō͘伊ê大受氣oa̍t-tńg離開lín。Taⁿ m̄-thang chhin-chhiūⁿ lín ê lia̍t-chó͘ lâi ngī ām-kún; tio̍h hiàn ka-kī hō͘ Iâ-hô-hoa, ji̍p I ê sèng-só͘, chiū-sī I éng-oán hun-piat chòe-sèng--ê; koh tio̍h ho̍k-sāi Iâ-hô-hoa lín ê Siōng-tè, thang hō͘ I ê tōa siū-khì oa̍t-tńg lī-khui lín.

9因為lín若歸向耶和華，就lín ê兄弟kap lín ê kiáⁿ兒beh tī掠in ê人ê面前得tio̍h憐憫，thang koh tò來chit所在；因為耶和華lín ê上帝是慈悲憐憫；lín若歸向伊，伊的確無oa̍t伊ê面m̄看lín。In-ūi lín nā kui-ǹg Iâ-hô-hoa, chiū lín ê hiaⁿ-tī kap lín ê kiáⁿ-jî beh tī lia̍h in ê lâng ê bīn-chêng tit-tio̍h lîn-bín, thang koh tò-lâi chit só͘-chāi; in-ūi Iâ-hô-hoa lín ê Siōng-tè sī chû-pi lîn-bín; lín nā kui-ǹg I, I tek-khak bô oa̍t I ê bīn m̄ khòaⁿ lín.

10走文書ê一城過一城，遍行Í-hoat-liân、Má-ná-se，到Se-pò͘-lûn；但是hiah-ê人恥笑in，譏刺in。Cháu-bûn-su--ê chi̍t siâⁿ kè chi̍t siâⁿ, piàn-kiâⁿ Í-hoat-liân, Má-ná-se, kàu Se-pò͘-lûn; nā-sī hiah ê lâng thí-chhiò in, ki-chhì in.

11總是A-siat、Má-ná-se、Se-pò͘-lûn ê中間，也有人家己謙卑，來到耶路撒冷。Chóng-sī A-siat, Má-ná-se, Se-pò͘-lûn ê tiong-kan, iā ū lâng ka-kī khiam-pi, lâi kàu Iâ-lō͘-sat-léng.

12上帝也感動猶大人，hō͘ in一心thàn王kap hiah-ê首領照耶和華ê話所出ê命令。Siōng-tè iā kám-tōng Iû-tāi lâng, hō͘ in chi̍t-sim thàn ông kap hiah ê siú-léng chiàu Iâ-hô-hoa ê ōe só͘ chhut ê bēng-lēng.

13二月，有chōe-chōe人聚集tī耶路撒冷，成做真大ê會，beh守除酵節。Jī-ge̍h, ū chōe-chōe lâng chū-chi̍p tī Iâ-lō͘-sat-léng, chiâⁿ-chòe chin-tōa ê hōe, beh siú tû-kàⁿ-choeh.

14In起來，一盡除去耶路撒冷所有ê壇，kap燒香ê壇，hiat tī Khip-lûn溪。In khí-lâi, it-chīn tû-khì Iâ-lō͘-sat-léng só͘ ū ê tôaⁿ, kap sio-hiuⁿ ê tôaⁿ, hiat tī Khip-lûn khoe.

15二月十四日thâi pôaⁿ過節ê羊á，祭司kap利未人家己見笑，清氣家己，帶燒祭到耶和華ê殿。Jī-ge̍h cha̍p-sì--ji̍t thâi pôaⁿ-kè-choeh ê iûⁿ-á, chè-si kap Lī-bī lâng ka-kī kiàn-siàu, chheng-khì ka-kī, tòa sio-chè kàu Iâ-hô-hoa ê tiān.

16照上帝ê奴僕摩西ê律法，照例ta̍k人khiā伊ê位；祭司將in tùi利未人ê手接血來hiù伊。Chiàu Siōng-tè ê lô͘-po̍k Mô͘-se ê lu̍t-hoat, chiàu-lē ta̍k-lâng khiā i ê ūi; chè-si chiong in tùi Lī-bī lâng ê chhiú chih huih lâi hiù i.

17會中有chōe-chōe人無清氣家己，所以託利未人替一切無清氣ê人thâi pôaⁿ過節ê羊á，hō͘ in tī耶和華ê面前成做清氣。Hōe-tiong ū chōe-chōe lâng bô chheng-khì ka-kī, só͘-í thok Lī-bī lâng thòe it-chhè bô chheng-khì ê lâng thâi pôaⁿ-kè-choeh ê iûⁿ-á, hō͘ in tī Iâ-hô-hoa ê bīn-chêng chiâⁿ-chòe chheng-khì.

18因為Í-hoat-liân、Má-ná-se、Í-sat-ka、Se-pò͘-lûn，有chōe-chōe人無清氣家己；總是in也食pôaⁿ過節，無合所記載ê例。In-ūi Í-hoat-liân Má-ná-se, Í-sat-ka, Se-pò͘-lûn, ū chōe-chōe lâng bô chheng-khì ka-kī; chóng-sī in iā chia̍h pôaⁿ-kè-choeh, bô ha̍p só͘ kì-chài ê lē.

19因為Hi-se-ka替in祈禱，講，見若有決斷ê心chhē上帝，就是耶和華in列祖ê上帝，雖然無照聖所清氣ê禮家己清氣，求至好ê耶和華也赦免in。In-ūi Hi-se-ka thòe in kî-tó, kóng, Kìⁿ-nā ū koat-toàn ê sim chhē Siōng-tè, chiū-sī Iâ-hô-hoa in lia̍t-chó͘ ê Siōng-tè, sui-jiân bô chiàu sèng-só͘ chheng-khì ê lé ka-kī chheng-khì, kiû chì-hó ê Iâ-hô-hoa iā sià-bián in.

20耶和華聽Hi-se-ka祈禱，就醫好百姓。Iâ-hô-hoa thiaⁿ Hi-se-ka kî-tó, chiū i-hó peh-sìⁿ.

21Tòa tī耶路撒冷ê以色列人大大歡喜，守除酵節七日久；利未人kap祭司日日o-ló耶和華，用響亮ê樂器o-ló耶和華。Tòa tī Iâ-lō͘-sat-léng ê Í-sek-lia̍t lâng tōa-tōa hoaⁿ-hí, siú tû-kàⁿ-choeh chhit-ji̍t kú; Lī-bī lâng kap chè-si ji̍t-ji̍t o-ló Iâ-hô-hoa, ēng hiáng-liāng ê ga̍k-khì o-ló Iâ-hô-hoa.

22Hi-se-ka安慰一切gâu服事耶和華ê利未人。Tùi án-ni，眾人食節筵七日，獻謝恩祭，koh認罪tī耶和華in列祖ê上帝ê面前。Hi-se-ka an-ùi it-chhè gâu ho̍k-sāi Iâ-hô-hoa ê Lī-bī lâng. Tùi án-ni chèng-lâng chia̍h choeh-iân chhit-ji̍t, hiàn siā-un-chè, koh jīn-chōe tī Iâ-hô-hoa in lia̍t-chó͘ ê Siōng-tè ê bīn-chêng.

23全會議論beh koh守節七日。Tùi án-ni，歡喜koh守七日。Choân-hōe gī-lūn beh koh siú-choeh chhit-ji̍t. Tùi án-ni hoaⁿ-hí koh siú chhit-ji̍t.

24因為猶大王Hi-se-ka送會眾牛káng一千隻，羊七千隻，做祭物。眾首領也送會眾牛káng一千隻，羊一萬隻。Koh chōe-chōe祭司家己清氣。In-ūi Iû-tāi ông Hi-se-ka sàng hōe-chiòng gû-káng chi̍t-chheng chiah, iûⁿ chhit-chheng chiah, chòe chè-mi̍h. Chèng siú-léng iā sàng hōe-chiòng gû-káng chi̍t-chheng chiah, iûⁿ chi̍t-bān chiah. Koh chōe-chōe chè-si ka-kī chheng-khì.

25猶大會眾kap祭司利未人，kap hiah-ê tùi以色列來ê會眾，以及hiah-ê tùi以色列地來ê出外人，kap khiā起tī猶大ê出外人，lóng歡喜快樂。Iû-tāi hōe-chiòng kap chè-si Lī-bī lâng, kap hiah ê tùi Í-sek-lia̍t lâi ê hōe-chiòng, í-ki̍p hiah ê tùi Í-sek-lia̍t tōe lâi ê chhut-gōa lâng, kap khiā-khí tī Iû-tāi ê chhut-gōa lâng, lóng hoaⁿ-hí khoài-lo̍k.

26Tùi án-ni，tī耶路撒冷大歡喜，因為tùi以色列王大衛ê kiáⁿ所羅門ê時，tī耶路撒冷bē-bat有án-ni。Tùi án-ni, tī Iâ-lō͘-sat-léng tōa hoaⁿ-hí, in-ūi tùi Í-sek-lia̍t ông Tāi-pi̍t ê kiáⁿ Só͘-lô-bûn ê sî, tī Iâ-lō͘-sat-léng bē-bat ū án-ni.

27Hit時祭司利未人起來，kā百姓祝福；in ê聲得tio̍h聽見，in ê祈禱透到伊khiā起ê聖所，到tī天裡。Hit-sî chè-si Lī-bī lâng khí-lâi, kā peh-sìⁿ chiok-hok; in ê siaⁿ tit-tio̍h thiaⁿ-kìⁿ, in ê kî-tó thàu-kàu I khiā-khí ê sèng-só͘, kàu tī thiⁿ--nih.