1Chiah-ê tāi-chì，伊實心行伊以後，亞述王Se-ná-ki-li̍p上來，來深入猶大，紮營圍困chiah-ê堅固ê城，想beh取做家己ê。Chiah ê tāi-chì, i si̍t-sim kiâⁿ--i í-āu, A-su̍t ông Se-ná-ki-li̍p chiūⁿ-lâi, lâi chhim-ji̍p Iû-tāi, chat-iâⁿ ûi-khùn chiah ê kian-kò͘ ê siâⁿ, siūⁿ beh chhú chòe ka-kī-ê.

2Hi-se-ka看見Se-ná-ki-li̍p已經來，定tio̍h意思beh攻擊耶路撒冷；Hi-se-ka khòaⁿ-kìⁿ Se-ná-ki-li̍p í-keng lâi, tiāⁿ-tio̍h ì-sù beh kong-kek Iâ-lō͘-sat-léng;

3就kap伊hiah-ê首領以及勇士參詳，beh塞密城外ê水源；in就幫贊伊。chiū kap i hiah ê siú-léng í-ki̍p ióng-sū chham-siông, beh that-ba̍t siâⁿ-gōa ê chúi-goân; in chiū pang-chān i.

4Tùi án-ni， chōe-chōe百姓聚集，塞密一切ê水源，kap流過hit所在ê溪，講，亞述hiah-ê王來，啥事hō͘伊得tio̍h chōe-chōe水ah？Tùi án-ni chōe-chōe peh-sìⁿ chū-chi̍p, that-ba̍t it-chhè ê chúi-goân, kap lâu kè hit só͘-chāi ê khoe, kóng, A-su̍t hiah ê ông lâi, siáⁿ-sū hō͘ i tit-tio̍h chōe-chōe chúi ah?

5Hi-se-ka強伊ê心志，起hit-ê倒壞ê城牆，高到守更樓，koh起一chōa牆tī城外，koh堅固大衛城ê Bí-lô，koh製造chōe-chōe戰器，kap屏牌；Hi-se-ka kiông i ê sim-chì, khí hit ê tó-hoāi ê siâⁿ-chhiûⁿ, koâiⁿ kàu chiú-kiⁿ-lâu , koh khí chi̍t-chōa chhiûⁿ tī siâⁿ-gōa, koh kian-kò͘ Tāi-pi̍t siâⁿ ê Bí-lô, koh chè-chō chōe-chōe chiàn-khì, kap pîn-pâi;

6設立軍長管理百姓，聚集in到伊hia，tī城門寬闊ê所在，用話安慰in講，siat-li̍p kun-tiúⁿ koán-lí peh-sìⁿ, chū-chi̍p in kàu i hia, tī siâⁿ-mn̂g khoan-khoah ê só͘-chāi, ēng ōe an-ùi in kóng,

7強lín ê心，壯lín ê志，莫得因為亞述王kap tè伊ê大軍隊來忍，來驚；因為kap咱tī-teh-ê，比kap in tī-teh-ê khah大；Kiông lín ê sim, chòng lín ê chì, bo̍h-tit in-ūi A-su̍t ông kap tè i ê tōa kun-tūi lâi lún, lâi kiaⁿ; in-ūi kap lán tī-teh--ê, pí kap in tī-teh--ê khah-tōa;

8kap伊tī-teh-ê是肉體ê手，kap咱tī-teh-ê是耶和華咱ê上帝，伊beh幫贊咱，替咱交戰。百姓就安然靠猶大王Hi-se-ka ê話。kap i tī-teh--ê sī jio̍k-thé ê chhiú, kap lán tī-teh--ê sī Iâ-hô-hoa lán ê Siōng-tè, I beh pang-chān lán, thòe lán kau-chiàn. Peh-sìⁿ chiū an-jiân khò Iû-tāi ông Hi-se-ka ê ōe.

9後來亞述王Se-ná-ki-li̍p，kap伊ê全軍，攻擊拉結ê時，就差伊ê奴僕到耶路撒冷見猶大王Hi-se-ka kap一切tī耶路撒冷ê猶大人，講，Āu-lâi A-su̍t ông Se-ná-ki-li̍p, kap i ê choân-kun, kong-kek La̍h-kiat ê sî, chiū chhe i ê lô͘-po̍k kàu Iâ-lō͘-sat-léng kìⁿ Iû-tāi ông Hi-se-ka kap it-chhè tī Iâ-lō͘-sat-léng ê Iû-tāi lâng, kóng,

10亞述王Se-ná-ki-li̍p án-ni講，Lín óa靠甚麼，chiah tiàm tī耶路撒冷受圍困ah？A-su̍t ông Se-ná-ki-li̍p án-ni kóng, Lín óa-khò sím-mi̍h, chiah tiàm tī Iâ-lō͘-sat-léng siū ûi-khùn ah?

11Hi-se-ka講，耶和華咱ê上帝beh救咱脫離亞述王ê手，這kiám m̄是引誘lín，hō͘ lín iau嘴乾來死mah？Hi-se-ka kóng, Iâ-hô-hoa lán ê Siōng-tè beh kiù lán thoat-lī A-su̍t ông ê chhiú, che kiám m̄-sī ín-iú lín, hō͘ lín iau chhùi-ta lâi sí mah?

12Chit-ê Hi-se-ka kiám m̄是廢無耶和華ê山頭壇，kap伊hiah-ê壇，命令猶大kap耶路撒冷ê人講，Lín tio̍h tī chit-ê壇前敬拜，燒香tī hit頂面？Chit ê Hi-se-ka kiám m̄-sī hòe-bô Iâ-hô-hoa ê soaⁿ-thâu-tôaⁿ, kap I hiah ê tôaⁿ, bēng-lēng Iû-tāi kap Iâ-lō͘-sat-léng ê lâng kóng, Lín tio̍h tī chit ê tôaⁿ-chêng kèng-pài, sio-hiuⁿ tī hí(**hit) téng-bīn?

13我kap我ê列祖對列國ê百姓所行ê，lín kiám m̄知mah？列邦ê上帝，hit時kiám會救家己ê國脫離我ê手mah？Góa kap góa ê lia̍t-chó͘ tùi lia̍t-kok ê peh-sìⁿ só͘ kiâⁿ--ê, lín kiám m̄-chia mah? lia̍t-pang ê siōng-tè, hit-sî kiám ōe kiù ka-kī ê kok thoat-lī góa ê chhiú mah?

14我ê列祖所滅無hiah-ê國，in hiah-ê上帝ê中間是誰能救伊ê國脫離我ê手，就lín ê上帝kiám會救lín脫離我ê手mah？Góa ê lia̍t-chó͘ só͘ bia̍t-bô hiah ê kok, in hiah ê siōng-tè ê tiong-kan chī-chūi ōe kiù i ê kok thoat-lī góa ê chhiú, chiū lín ê Siōng-tè kiám ōe kiù lín thoat-lī góa ê chhiú mah?

15所以莫得hō͘ Hi-se-ka án-ni騙lín，引誘lín，也莫得信伊；因為無一邦一國ê上帝能救伊ê百姓脫離我ê手，脫離我ê列祖ê手；何況lín ê上帝，kiám會救lín脫離我ê手？Só͘-í bo̍h-tit hō͘ Hi-se-ka án-ni phiàn lín, ín-iú lín, iā bo̍h-tit sìn i; in-ūi bô chi̍t-pang chi̍t-kok ê siōng-tè ōe kiù i ê peh-sìⁿ thoat-lī góa ê chhiú, thoat-lī góa ê lia̍t-chó͘ ê chhiú; hô-hòng lín ê Siōng-tè, kiám ōe kiù lín thoat-lī góa ê chhiú?

16Se-ná-ki-li̍p ê人臣iáu koh講譭謗耶和華上帝kap伊ê奴僕Hi-se-ka ê話。Se-ná-ki-li̍p ê jîn-sîn iáu koh kóng húi-pòng Iâ-hô-hoa Siōng-tè kap I ê lô͘-po̍k Hi-se-ka ê ōe.

17Koh寫phoe謗瀆耶和華以色列ê上帝，譏刺伊講，列邦ê百姓ê上帝既然bōe會救伊ê百姓脫離我ê手，Hi-se-ka ê上帝也bōe會救伊ê百姓脫離我ê手。Koh siá phoe pòng-to̍k Iâ-hô-hoa Í-sek-lia̍t ê Siōng-tè, ki-chhì I kóng, Lia̍t-pang ê peh-sìⁿ ê siōng-tè kì-jiân bōe-ōe kiù i ê peh-sìⁿ thoat-lī góa ê chhiú, Hi-se-ka ê Siōng-tè iā bōe-ōe kiù I ê peh-sìⁿ thoat-lī góa ê chhiú.

18伊hiah-ê人臣用猶大ê腔口，大聲叫hiah-ê tī城牆頂ê耶路撒冷人，beh hō͘ in驚，擾亂in，thang取hit-ê城。I hiah ê jîn-sîn ēng Iû-tāi ê khiuⁿ-kháu, tōa-siaⁿ kiò hiah ê tī siâⁿ-chhiûⁿ-téng ê Iâ-lō͘-sat-léng lâng, beh hō͘ in kiaⁿ, jiáu-loān in, thang chhú hit ê siâⁿ.

19In講論耶路撒冷ê上帝，親像講論世上hiah-ê百姓ê上帝，人ê手所造ê一樣。In káng-lūn Iâ-lō͘-sat-léng ê Siōng-tè, chhin-chhiūⁿ káng-lūn sè-chiūⁿ hiah ê peh-sìⁿ ê siōng-tè, lâng ê chhiú só͘ chō-ê chi̍t-iūⁿ.

20Hi-se-ka王kap A-mô͘-su ê kiáⁿ先知以賽亞，因為án-ni祈禱，ǹg天求叫。Hi-se-ka ông kap A-mô͘-su ê kiáⁿ sian-ti Í-sài-a, in-ūi án-ni kî-tó, ǹg thiⁿ kiû-kiò.

21耶和華就差一個使者入亞述王ê營中，一盡滅hiah-ê大能力ê勇士，以及hiah-ê首領軍長；亞述王滿面見笑tò去本國；入伊ê上帝ê廟內，有伊親生ê kiáⁿ tī-hia用刀thâi死伊。Iâ-hô-hoa chiū chhe chi̍t ê sù-chiá ji̍p A-su̍t ông ê iâⁿ-tiong, it-chīn bia̍t hiah ê tōa lêng-le̍k ê ióng-sū, í-ki̍p hiah ê siú-léng kun-tiúⁿ; A-su̍t ông móa-bīn kiàn-siàu tò-khì pún-kok; ji̍p i ê siōng-tè ê biō-lāi, ū i chhin-siⁿ ê kiáⁿ tī-hia ēng to thâi-sí i.

22Án-ni耶和華救Hi-se-ka kap耶路撒冷khiā起ê百姓脫離亞述王Se-ná-ki-li̍p ê手，也脫離一切對敵ê手，koh hō͘ in四圍平安。Án-ni Iâ-hô-hoa kiù Hi-se-ka kap Iâ-lō͘-sat-léng khiā-khí ê peh-sìⁿ thoat-lī A-su̍t ông Se-ná-ki-li̍p ê chhiú, iā thoat-lī it-chhè tùi-te̍k ê chhiú, koh hō͘ in sì-ûi pêng-an.

23有chōe-chōe人帶禮物到耶路撒冷，獻hō͘耶和華，koh將寶物送猶大王Hi-se-ka。Chit-tia̍p了後，Hi-se-ka hō͘列邦看伊做尊大。Ū chōe-chōe lâng tòa lé-mi̍h kàu Iâ-lō͘-sat-léng, hiàn-hō͘ Iâ-hô-hoa, koh chiong pó-mi̍h sàng Iû-tāi ông Hi-se-ka. Chit-tia̍p liáu-āu, Hi-se-ka hō͘ lia̍t-pang khòaⁿ i chòe chun-tōa.

24Hit時Hi-se-ka破病得beh死，就祈禱耶和華，耶和華kā伊講，koh hō͘伊一個兆頭。Hit-sî Hi-se-ka phòa-pīⁿ tit-beh sí, chiū kî-tó Iâ-hô-hoa, Iâ-hô-hoa kā i kóng, koh hō͘ i chi̍t ê tiāu-thâu.

25總是Hi-se-ka無照伊所得tio̍h ê恩典來報答；因為伊心內驕傲；所以有受氣到tī伊kap猶大kap耶路撒冷。Chóng-sī Hi-se-ka bô chiàu i só͘ tit-tio̍h ê un-tián lâi pò-tap; in-ūi i sim-lāi kiau-ngō͘; só͘-í ū siū-khì kàu tī i kap Iû-tāi kap Iâ-lō͘-sat-léng.

26總是Hi-se-ka kap耶路撒冷khiā起ê百姓，因為心驕傲就家己謙卑，致到耶和華ê受氣tī Hi-se-ka tī-teh ê日無夠tī in。Chóng-sī Hi-se-ka kap Iâ-lō͘-sat-léng khiā-khí ê peh-sìⁿ, in-ūi sim kiau-ngō͘ chiū ka-kī khiam-pi, tì-kàu Iâ-hô-hoa ê siū-khì tī Hi-se-ka tī-teh ê ji̍t bô kàu tī in.

27Hi-se-ka有chōe-chōe貨財kap大榮光，為家己起府庫，收khǹg金銀、寶石、香料、屏牌，kap ta̍k樣ê寶器；Hi-se-ka ū chōe-chōe hè-châi kap tōa êng-kng, ūi ka-kī khí hú-khò͘, siu-khǹg kim-gûn, pó-chio̍h, hiuⁿ-liāu, pîn-pâi, kap ta̍k-iūⁿ ê pó-khì;

28koh為tio̍h所出ê五穀新酒kap油起庫房；koh為tio̍h ta̍k樣ê cheng-siⁿ搭草坪，起羊寮。koh ūi-tio̍h só͘ chhut ê ngó͘-kok sin-chiú kap iû khí khò͘-pâng; koh ūi-tio̍h ta̍k-iūⁿ ê cheng-siⁿ tah chháu-pîⁿ, khí iûⁿ-tiâu.

29Koh為家己起城，koh有chōe-chōe牛群、羊群，因為上帝賞賜伊財產真chōe。Koh ūi ka-kī khí siâⁿ, koh ū chōe-chōe gû-kûn, iûⁿ-kûn, in-ūi Siōng-tè siúⁿ-sù i châi-sán chin-chōe.

30Chit-ê Hi-se-ka也塞密Ki-hùn頂面ê水泉，引水hō͘伊落來，流到大衛城ê西pêng。Hi-se-ka見所行ê無m̄興通。Chit ê Hi-se-ka iā that-ba̍t Ki-hùn téng-bīn ê chúi-chôaⁿ, ín chúi hō͘ i lo̍h-lâi, lâu kàu Tāi-pi̍t siâⁿ ê sai-pêng. Hi-se-ka kìⁿ só͘ kiâⁿ ê bô m̄ heng-thong.

31總是巴比倫hiah-ê首領差使者來伊hia，beh問國內所有ê奇事；tī chit-ê事上帝離開伊，beh試驗伊，thang知伊心內一盡所有ê。Chóng-sī Pa-pí-lûn hiah ê siú-léng chhe sù-chiá lâi i hia, beh mn̄g kok-lāi só͘ ū ê kî-sū; tī chit ê sū Siōng-tè lī-khui i, beh chhì-giām i, thang chai i sim-lāi it-chīn só͘-ū-ê.

32Hi-se-ka其餘ê事，kap伊ê好所行，lóng記tī A-mô͘-su ê kiáⁿ先知以賽亞默示ê冊，kap猶大以色列chiah-ê王ê記錄。Hi-se-ka kî-û ê sū, kap i ê hó só͘ kiâⁿ, lóng kì tī A-mô͘-su ê kiáⁿ sian-ti Í-sài-a be̍k-sī ê chheh, kap Iû-tāi Í-sek-lia̍t chiah ê ông ê kì-lio̍k.

33Hi-se-ka kap伊ê列祖同睏，埋葬tī大衛ê kiáⁿ孫墳墓khah-高ê所在；伊死ê時，猶大人kap耶路撒冷khiā起ê百姓，lóng尊敬伊。伊ê kiáⁿ Má-ná-se續接伊做王。Hi-se-ka kap i ê lia̍t-chó͘ tâng-khùn, bâi-chòng tī Tāi-pi̍t ê kiáⁿ-sun hûn-bōng khah-koâiⁿ ê só͘-chāi; i sí ê sî Iû-tāi lâng kap Iâ-lō͘-sat-léng khiā-khí ê peh-sìⁿ, lóng chun-kèng i. I ê kiáⁿ Má-ná-se sòa-chiap i chòe ông.

1Má-ná-se坐位ê時，十二歲，tī耶路撒冷做王共五十五年。Má-ná-se chē-ūi ê sî, cha̍p-jī hè, tī Iâ-lō͘-sat-léng chòe ông kiōng gō͘-cha̍p-gō͘ nî.

2伊行耶和華所看做pháiⁿ ê事，學外邦人所行可惡ê事，就是耶和華tī以色列ê面前所趕出ê。I kiâⁿ Iâ-hô-hoa só͘ khòaⁿ-chòe pháiⁿ ê sū, o̍h gōa-pang lâng só͘ kiâⁿ khó-ò͘ⁿ ê sū, chiū-sī Iâ-hô-hoa tī Í-sek-lia̍t ê bīn-chêng só͘ kóaⁿ-chhut--ê.

3因為伊ê老父Hi-se-ka所毀壞ê山頭壇伊koh起伊，koh為hiah-ê Pa-le̍k起壇，做A-su-tha-lio̍k；koh敬拜天頂ê萬象來服事伊。In-ūi i ê lāu-pē Hi-se-ka só͘ húi-hoāi ê soaⁿ-thâu-tôaⁿ i koh khí i, koh ūi hiah ê Pa-le̍k khí tôaⁿ, chòe A-su-tha-lio̍k; koh kèng-pài thiⁿ-téng ê bān-siōng lâi ho̍k-sāi i.

4Tī耶和華ê殿內起kúi-nā ê壇；耶和華bat kí chit-ê殿講，我ê名beh永遠tī耶路撒冷。Tī Iâ-hô-hoa ê tiān-lāi khí kúi-nā ê tôaⁿ; Iâ-hô-hoa bat kí chit ê tiān kóng, Góa ê miâ beh éng-oán tī Iâ-lō͘-sat-léng.

5伊tī耶和華ê殿兩個院內，為tio̍h天頂ê萬象起壇。I tī Iâ-hô-hoa ê tiān nn̄g ê īⁿ-lāi, ūi-tio̍h thiⁿ-téng ê bān-siōng khí tôaⁿ.

6Koh tī Piān-him-lùn ê山谷，hō͘伊ê kiáⁿ兒經過火，koh看兆頭，用法術，做徼(khiò)，用跳童ê，請司公，行chōe-chōe耶和華所看做pháiⁿ ê事，激伊受氣。Koh tī Piān-him-lùn ê soaⁿ-kok, hō͘ i ê kiáⁿ-jî keng-kè hé, koh khòaⁿ tiāu-thâu, ēng hoat-su̍t, chòe-khiò, ēng thiàu-tâng--ê, chhiáⁿ sai-kong, kiâⁿ chōe-chōe Iâ-hô-hoa só͘ khòaⁿ-chòe pháiⁿ ê sū, kek I siū-khì.

7Koh tī上帝ê殿內，chhāi伊所造雕刻ê像，chit間殿是上帝bat對大衛kap伊ê kiáⁿ所羅門kí伊來講，chit間殿kap耶路撒冷就是我tī以色列眾支派中所揀ê，我beh安置我ê名tī-hia到永遠。Koh tī Siōng-tè ê tiān-lāi, chhāi i só͘ chō tiau-khek ê siōng, chit keng tiān sī Siōng-tè bat tùi Tāi-pi̍t kap i ê kiáⁿ Só͘-lô-bûn kí i lâi kóng, Chit keng tiān kap Iâ-lō͘-sat-léng chiū-sī Góa tī Í-sek-lia̍t chèng chi-phài-tiong só͘-kéng--ê, Góa beh an-tì Góa ê miâ tī-hia kàu éng-oán.

8以色列人若執守來行我一切所命令in ê，就是我託摩西所傳一切ê法度，律例，禮儀，我就無koh移徙in ê腳離開我所定tio̍h hō͘ lín列祖ê地。Í-sek-lia̍t lâng nā chip-siú lâi kiâⁿ Góa it-chhè só͘ bēng-lēng in ê, chiū-sī Góa thok Mô͘-se só͘ thoân it-chhè ê hoat-tō͘, lu̍t-lē, lé-gî, Góa chiū bô koh î-sóa in ê kha lī-khui Góa só͘ tiāⁿ-tio̍h hō͘ lín lia̍t-chó͘ ê tōe.

9Má-ná-se迷惑猶大kap耶路撒冷khiā起ê百姓，致到in行pháiⁿ比耶和華tī以色列人ê面前所滅ê列國koh-khah傷重。Má-ná-se bê-he̍k Iû-tāi kap Iâ-lō͘-sat-léng khiā-khí ê peh-sìⁿ, tì-kàu in kiâⁿ pháiⁿ pí Iâ-hô-hoa tī Í-sek-lia̍t lâng ê bīn-chêng só͘ bia̍t ê lia̍t-kok koh-khah siong-tiōng.

10耶和華吩咐Má-ná-se kap伊ê百姓，總是in無beh聽。Iâ-hô-hoa hoan-hù Má-ná-se kap i ê peh-sìⁿ, chóng-sī in bô beh thiaⁿ.

11所以耶和華hō͘亞述王ê軍長來攻擊in，用鉤鉤tio̍h Má-ná-se，用銅鏈縛伊，帶到巴比倫。Só͘-í Iâ-hô-hoa hō͘ A-su̍t ông ê kun-tiúⁿ lâi kong-kek in, ēng kau kau-tio̍h Má-ná-se, ēng tâng-liān pa̍k i, tòa kàu Pa-pí-lûn.

12伊tī患難ê時，就懇求耶和華伊ê上帝，koh tī伊ê列祖ê上帝ê面前極其謙卑。I tī hoān-lān ê sî, chiū khún-kiû Iâ-hô-hoa i ê Siōng-tè, koh tī i ê lia̍t-chó͘ ê Siōng-tè ê bīn-chêng ke̍k-kî khiam-pi.

13伊求叫伊，上帝准伊所求，聽伊祈禱，hō͘伊tò來耶路撒冷，猶原坐伊ê國位；Má-ná-se chiah知耶和華是上帝。I kiû-kiò I, Siōng-tè chún i só͘ kiû, thiaⁿ i kî-tó, hō͘ i tò-lâi Iâ-lō͘-sat-léng, iû-goân chē i ê kok-ūi; Má-ná-se chiah chai Iâ-hô-hoa sī Siōng-tè.

14Chit-tia̍p了後，Má-ná-se起牆tī大衛ê城外，tī Ki-hùn ê西pêng，tī山谷內，到魚門ê門口，圍se̍h Gô-húi-le̍k，牆起真高，koh設立軍長tī猶大hiah-ê堅固ê城內。Chit-tia̍p liáu-āu Má-ná-se khí chhiûⁿ tī Tāi-pi̍t ê siâⁿ-gōa, tī Ki-hùn ê sai-pêng, tī soaⁿ-kok-lāi, kàu Hî-mn̂g ê mn̂g-kháu, ûi-se̍h Gô-húi-le̍k, chhiûⁿ khí chin koâiⁿ, koh siat-li̍p kun-tiúⁿ tī Iû-tāi hiah ê kian-kò͘ ê siâⁿ-lāi.

15Koh tùi耶和華ê殿除去hiah-ê外邦ê上帝kap偶像；koh tī耶和華殿ê山，kap耶路撒冷所起hiah-ê壇，lóng hiat tī城外。Koh tùi Iâ-hô-hoa ê tiān tû-khì hiah ê gōa-pang ê siōng-tè kap ngó͘-siōng; koh tī Iâ-hô-hoa tiān ê soaⁿ, kap Iâ-lō͘-sat-léng só͘ khí hiah ê tôaⁿ, lóng hiat tī siâⁿ-gōa.

16Koh起耶和華ê祭壇，tī壇頂獻謝恩祭，感謝祭，命令猶大人服事耶和華以色列ê上帝。Koh khí Iâ-hô-hoa ê chè-tôaⁿ, tī tôaⁿ-téng hiàn siā-un-chè, kám-siā-chè, bēng-lēng Iû-tāi lâng ho̍k-sāi Iâ-hô-hoa Í-sek-lia̍t ê Siōng-tè.

17總是百姓猶原tī山頭壇獻祭，獨獨獻hō͘耶和華伊ê上帝nā-tiāⁿ。Chóng-sī peh-sìⁿ iû-goân tī soaⁿ-thâu-tôaⁿ hiàn-chè, to̍k-to̍k hiàn hō͘ Iâ-hô-hoa i ê Siōng-tè nā-tiāⁿ.

18Má-ná-se其餘ê事，kap伊祈禱上帝ê話，kap先見奉耶和華以色列ê上帝ê名對伊講hiah-ê話，lóng記tī以色列chiah-ê王ê記錄。Má-ná-se kî-û ê sū, kap i kî-tó Siōng-tè ê ōe, kap sian-kiàn hōng Iâ-hô-hoa Í-sek-lia̍t ê Siōng-tè ê miâ tùi i kóng hiah ê ōe, lóng kì tī Í-sek-lia̍t chiah ê ông ê kì-lio̍k.

19伊ê祈禱，kap上帝怎樣允准伊，伊bē謙卑以前ê罪過過失，kap起山頭壇，設立hiah-ê A-sià-la̍h kap雕刻偶像hiah-ê所在，lóng記tī Hô-sài ê史記。I ê kî-tó, kap Siōng-tè cháiⁿ-iūⁿ ún-chún i, i bē khiam-pi í-chêng ê chōe-kòa kè-sit, kap khí soaⁿ-thâu-tôaⁿ, siat-li̍p hiah ê A-sià-la̍h kap tiau-khek ngó͘-siōng hiah ê só͘-chāi, lóng kì tī Hô-sài ê sú-kì.

20Má-ná-se kap伊ê列祖同睏，埋葬tī家己ê宮內；伊ê kiáⁿ A-bûn續接伊做王。Má-ná-se kap i ê lia̍t-chó͘ tâng khùn, bâi-chòng tī ka-kī ê kiong-lāi; i ê kiáⁿ A-bûn sòa-chiap i chòe ông.

21A-bûn坐位ê時，二十二歲，tī耶路撒冷做王歷過兩年。A-bûn chē-ūi ê sî, jī-cha̍p-jī hè, tī Iâ-lō͘-sat-léng chòe ông le̍k-kè nn̄g nî.

22伊行耶和華所看做pháiⁿ ê事，學伊ê老父Má-ná-se所做ê，A-bûn祭祀伊ê老父Má-ná-se所造hiah-ê雕刻ê偶像來服事伊。I kiâⁿ Iâ-hô-hoa só͘ khòaⁿ-chòe pháiⁿ ê sū, o̍h i ê lāu-pē Má-ná-se só͘ chòe ê, A-bûn chè-sū i ê lāu-pē Má-ná-se só͘ chō hiah ê tiau-khek ê ngó͘-siōng lâi ho̍k-sāi i.

23無家己謙卑tī耶和華ê面前，親像伊ê老父Má-ná-se ê家己謙卑；chit-ê A-bûn ná久ná犯罪。Bô ka-kī khiam-pi tī Iâ-hô-hoa ê bīn-chêng, chhin-chhiūⁿ i ê lāu-pē Má-ná-se ê ka-kī khiam-pi; chit ê A-bûn ná-kú ná hoān-chōe.

24伊ê人臣背叛伊，thâi死伊tī王宮內。I ê jîn-sîn pōe-poān i, thâi-sí i tī ông-kiong-lāi.

25總是國民thâi死hiah-ê背叛A-bûn王ê人；國民就設立伊ê kiáⁿ約西亞續接伊做王。Chóng-sī kok-bîn thâi-sí hiah ê pōe-poān A-bûn ông ê lâng; kok-bîn chiū siat-li̍p i ê kiáⁿ Iok-se-a sòa-chiap i chòe ông.

1約西亞坐位ê時，八歲，tī耶路撒冷做王共三十一年。Iok-se-a chē-ūi ê sî, poeh hè, tī Iâ-lō͘-sat-léng chòe-ông kiōng saⁿ-cha̍p-it nî.

2伊行耶和華所看做好ê事，行伊ê祖大衛一切ê路，無偏左右。I kiâⁿ Iâ-hô-hoa só͘ khòaⁿ-chòe hó ê sū, kiâⁿ i ê chó͘ Tāi-pi̍t it-chhè ê lō͘, bô phian chó-iū.

3I做王第八年，iáu-kú少年，起頭chhē伊ê祖大衛ê上帝；到十二年起頭清氣猶大kap耶路撒冷，除去山頭壇，kap hiah-ê A-sià-la̍h，雕刻ê像kap鑄造ê像。I chòe ông tē-poeh nî, iáu-kú siàu-liân, khí-thâu chhē i ê chó͘ Tāi-pi̍t ê Siōng-tè; kàu cha̍p-jī nî khí-thâu chheng-khì Iû-tāi kap Iâ-lō͘-sat-léng, tû-khì soaⁿ-thâu-tôaⁿ, kap hiah ê A-sià-la̍h, tiau-khek ê siōng kap chù-chō ê siōng.

4In tī伊ê面前毀壞hiah-ê Pa-le̍k ê壇，伊剉斷壇頂高高ê日像，koh phah碎hiah-ê A-sià-la̍h kap雕刻ê像，kap鑄 ê偶像，搥伊做粉，掖tī bat祭祀伊ê ê墓；In tī i ê bīn-chêng húi-hoāi hiah ê Pa-le̍k ê tôaⁿ, i chhò-tn̄g tôaⁿ-téng koâiⁿ-koâiⁿ ê ji̍t-siōng, koh phah-chhùi hiah ê A-sià-la̍h kap tiau-khek ê siōng, kap chù ê ngó͘-siōng, tûi--i chòe-hún, iā tī bat chè-sū i--ê ê bōng;

5將in ê祭司ê骨頭燒 tī in ê壇頂，清氣猶大kap耶路撒冷。chiong in ê chè-si ê kut-thâu sio tī in ê tôaⁿ-téng, chheng-khì Iû-tāi kap Iâ-lō͘-sat-léng.

6Tī Má-ná-se，Í-hoat-liân、西門，到tī Ná-hut-tha-lī hiah-ê城，kap四圍破壞ê所在，lóng也án-ni行。Tī Má-ná-se, Í-hoat-liân, Se-biān, kàu tī Ná-hut-tha-lī hiah ê siâⁿ, kap sì-ûi phòa-hoāi ê só͘-chāi, lóng iā án-ni kiâⁿ.

7Koh拆毀祭壇，phah碎A-sià-la̍h kap雕刻ê像成做粉，剉斷以色列遍地所有ê日像，就tò去耶路撒冷。Koh thiah-húi chè-tôaⁿ, phah-chhùi A-sià-la̍h kap tiau-khek ê siōng chiâⁿ-chòe hún, chhò-tn̄g Í-sek-lia̍t piàn-tōe só͘ ū ê ji̍t-siōng, chiū tò-khì Iâ-lō͘-sat-léng.

8約西亞王十八年，清氣地清氣殿以後，就差 A-sat-lī-ngá ê kiáⁿ Sa-hoan，城守Má-se-ngá，史官Iok-hap-su ê kiáⁿ Iok-a，去修理耶和華伊ê上帝ê殿。Iok-se-a ông cha̍p-poeh nî, chheng-khì tōe chheng-khì tiān í-āu, chiū chhe A-sat-lī-ngá ê kiáⁿ Sa-hoan, siâⁿ-siú Má-se-ngá, sú-koaⁿ Iok-hap-su ê kiáⁿ Iok-a, khì siu-lí Iâ-hô-hoa i ê Siōng-tè ê tiān.

9In就去見祭司頭Hi-le̍k-ka，將所有獻tī上帝殿ê銀交伊；chit-ê銀是顧門ê利未人，tùi Má-ná-se、Í-hoat-liân，kap一切以色列chhun ê人，以及猶大，便雅憫眾人，kap耶路撒冷khiā起ê百姓收來ê。In chiū khì kìⁿ chè-si-thâu Hi-le̍k-ka, chiong só͘ ū hiàn tī Siōng-tè tiān ê gûn kau i; chit ê gûn sī kò͘-mn̂g ê Lī-bī lâng, tùi Má-ná-se, Í-hoat-liân, kap it-chhè Í-sek-lia̍t chhun ê lâng, í-ki̍p Iû-tāi, Piān-ngá-bín chèng-lâng, kap Iâ-lō͘-sat-léng khiā-khí ê peh-sìⁿ siu-lâi--ê.

10In將hit-ê銀交hō͘管理耶和華殿做工人ê手，轉交耶和華殿做工ê人修理殿hō͘伊好勢。In chiong hit ê gûn kau-hō͘ koán-lí Iâ-hô-hoa tiān chòe-kang lâng ê chhiú, choán-kau Iâ-hô-hoa tiān chòe-kang ê lâng siu-lí tiān hō͘ i hó-sè.

11就是交hō͘木匠，起造ê，hō͘ in買過phah ê石，kap連絡ê柴料，修理猶大王所毀壞hiah-ê厝。Chiū-sī kau hō͘ ba̍k-chhiūⁿ, khí-chō--ê, hō͘ in bóe kè-phah ê chio̍h, kap liân-lo̍k ê chhâ-liāu, siu-lí Iû-tāi ông só͘ húi-hoāi hiah ê chhù.

12Hiah-ê人盡忠做工；督工ê是利未人Bí-la̍h-lī ê kiáⁿ孫Ngá-hap、Gô-pa-tí；督催ê是Ko-hat ê kiáⁿ孫撒迦利亞、Bí-su-lân，koh有作樂ê利未人。Hiah ê lâng chīn-tiong chòe-kang; tok-kang--ê sī Lī-bī lâng Bí-la̍h-lī ê kiáⁿ-sun Ngá-hap, Gô-pa-tí; tok-chhui--ê sī Ko-hat ê kiáⁿ-sun Sat-ka-lī-a, Bí-su-lân, koh ū chok-ga̍k ê Lī-bī lâng.

13In也管理hiah-ê擔teh ê人，督催一切做工ê，無論做甚麼工；利未人有ê做書記，做有司，做管門ê。In iā koán-lí hiah ê taⁿ-teh ê lâng, tok-chhui it-chhè chòe-kang ê, bô-lūn chòe sím-mi̍h kang; Lī-bī lâng ū-ê chòe su-kì, chòe iú-si, chòe koán-mn̂g--ê.

14In將所有獻tī耶和華殿ê銀帶出去ê時，祭司Hi-le̍k-ka偶然得tio̍h摩西所傳耶和華律法ê冊。In chiong só͘ ū hiàn tī Iâ-hô-hoa tiān ê gûn tòa chhut-khì ê sî, chè-si Hi-le̍k-ka ngó͘-jiân tit-tio̍h Mô͘-se só͘ thoân Iâ-hô-hoa lu̍t-hoat ê chheh.

15Hi-le̍k-ka 應書記Sa-hoan講，我tī耶和華殿內偶然得tio̍h律法ê冊。Hi-le̍k-ka就將冊交hō͘ Sa-hoan。Hi-le̍k-ka ìn su-kì Sa-hoan kóng, Góa tī Iâ-hô-hoa tiān-lāi ngó͘-jiân tit-tio̍h lu̍t-hoat ê chheh. Hi-le̍k-ka chiū chiong chheh kau hō͘ Sa-hoan.

16Sa-hoan就帶冊去王hia，koh回覆王講，見若你所託重你ê奴僕ê in teh做伊。Sa-hoan chiū tòa chheh khì ông hia, koh hê-hok ông kóng, Kìⁿ-nā lí só͘ thok-tiōng lí ê lô͘-po̍k-ê in teh chòe i.

17所得tio̍h tī耶和華殿ê銀lóng piàⁿ出來，交hō͘督工ê，kap做工人ê手。Só͘ tit-tio̍h tī Iâ-hô-hoa tiān ê gûn lóng piàⁿ--chhut-lâi, kau hō͘ tok-kang--ê, kap chòe-kang lâng ê chhiú.

18書記Sa-hoan koh 對王講，祭司Hi-le̍k-ka有the̍h一本冊hō͘我；Sa-hoan tī王ê面前摘讀伊。Su-kì Sa-hoan koh tùi ông kóng, Chè-si Hi-le̍k-ka ū the̍h chi̍t pún chheh hō͘ góa; Sa-hoan tī ông ê bīn-chêng tiah tha̍k i.

19王聽見律法ê話，就拆裂伊ê衫。Ông thiaⁿ-kìⁿ lu̍t-hoat ê ōe, chiū thiah-li̍h i ê saⁿ.

20王吩咐Hi-le̍k-ka kap Sa-hoan ê kiáⁿ A-hi-kam，Bí-ka ê kiáⁿ A-pí-tùn，書記Sa-hoan，kap王ê近臣A-sat-ngá，講，Ông hoan-hù Hi-le̍k-ka kap Sa-hoan ê kiáⁿ A-hi-kam, Bí-ka ê kiáⁿ A-pí-tùn, su-kì Sa-hoan, kap ông ê kūn-sîn A-sat-ngá, kóng,

21Lín去為我，為以色列kap猶大所留ê百姓，將所拾tio̍h chit本冊ê話問耶和華；因為耶和華ê受氣大大piàⁿ落tī咱，是為tio̍h咱ê列祖無守耶和華ê話，無照chit本冊一切所記載ê去行。Lín khì ūi góa, ūi Í-sek-lia̍t kap Iû-tāi só͘ lâu ê peh-sìⁿ, chiong só͘ khioh-tio̍h chit pún chheh ê ōe mn̄g Iâ-hô-hoa; in-ūi Iâ-hô-hoa ê siū-khì tōa-tōa piàⁿ-lo̍h tī lán, sī ūi-tio̍h lán ê lia̍t-chó͘ bô siú Iâ-hô-hoa ê ōe, bô chiàu chit pún chheh it-chhè só͘ kì-chài-ê khì kiâⁿ.

22Tùi án-ni，Hi-le̍k-ka kap王所託ê人，lóng去見女先知Hō͘-le̍k-tāi；伊是Hap-su-la̍h ê孫，Tô-khó-hap ê kiáⁿ，管理禮服hit-ê Sa-liông ê bó͘。伊tiàm tī耶路撒冷第二區；in將chit-ê意思kā伊講。Tùi án-ni, Hi-le̍k-ka kap ông só͘ thok ê lâng, lóng khì kìⁿ lú sian-ti Hō͘-le̍k-tāi; i sī Hap-su-la̍h ê sun, Tô-khó-hap ê kiáⁿ, koán-lí lé-ho̍k hit ê Sa-liông ê bó͘. I tiàm tī Iâ-lō͘-sat-léng tē-jī khu; in chiong chit ê ì-sù kā i kóng.

23伊應in講，耶和華以色列ê上帝án-ni講，lín去回覆hit-ê 差 lín來見我ê人講，I ìn in kóng, Iâ-hô-hoa Í-sek-lia̍t ê Siōng-tè án-ni kóng, Lín khì hê-hok hit ê chhe lín lâi kìⁿ góa ê lâng kóng,

24耶和華án-ni講，看ah，我beh降災厄tī chit所在，以及tī-chia khiā起ê百姓，就是in讀tī猶大王面前ê冊所記載hiah-ê咒詛。Iâ-hô-hoa án-ni kóng, Khòaⁿ ah, Góa beh kàng chai-ē tī chit só͘-chāi, í-ki̍p tī-chia khiā-khí ê peh-sìⁿ, chiū-sī in tha̍k tī Iû-tāi ông bīn-chêng ê chheh só͘ kì-chài hiah ê chiù-chó͘.

25因為in棄sak我，燒香tī別ê上帝，用in ê手所做ê激我ê受氣；所以我ê大受氣piàⁿ落tī chit所在，無soah。In-ūi in khì-sak Góa, sio-hiuⁿ tī pa̍t ê siōng-tè, ēng in ê chhiú só͘-chòe-ê kek Góa ê siū-khì; só͘-í Góa ê tōa siū-khì piàⁿ-lo̍h tī chit só͘-chāi, bô soah.

26總是差 lín來問耶和華ê猶大王，lín tio̍h án-ni kā伊講，耶和華以色列ê上帝án-ni講，論到你所聽見ê話，Chóng-sī chhe lín lâi mn̄g Iâ-hô-hoa ê Iû-tāi ông, lín tio̍h án-ni kā i kóng, Iâ-hô-hoa Í-sek-lia̍t ê Siōng-tè án-ni kóng, Lūn-kàu lí só͘ thiaⁿ-kìⁿ ê ōe,

27你ê心就軟，家己謙卑tī上帝ê面前，因為你聽見伊所講攻擊chit所在kap tī-chia khiā起ê百姓ê話，hit時你tī我ê面前家己謙卑，koh拆裂你ê衫，tī我ê面前啼哭，我已經聽見你；這是耶和華講ê。lí ê sim chiū nńg, ka-kī khiam-pi tī Siōng-tè ê bīn-chêng, in-ūi lí thiaⁿ-kìⁿ I só͘ kóng kong-kek chit só͘-chāi kap tī-chia khiā-khí ê peh-sìⁿ ê ōe, hit-sî lí tī Góa ê bīn-chêng ka-kī khiam-pi, koh thiah-li̍h lí ê saⁿ, tī Góa ê bīn-chêng thî-khàu, Góa í-keng thiaⁿ-kìⁿ lí; che sī Iâ-hô-hoa kóng ê.

28我beh hō͘你歸你ê列祖，你beh平安歸墓；我所beh降落tī chit所在kap tī-chia khiā起ê百姓一切ê災厄，你ê目睭的確bōe看見。In就倒tńg去回覆王。Góa beh hō͘ lí kui lí ê lia̍t-chó͘, lí beh pêng-an kui-bōng; Góa só͘ beh kàng-lo̍h tī chit só͘-chāi kap tī-chia khiā-khí ê peh-sìⁿ it-chhè ê chai-ē, lí ê ba̍k-chiu tek-khak bōe khòaⁿ-kìⁿ. In chiū tò-tńg khì hê-hok ông.

29王就差人聚集猶大kap耶路撒冷ê眾長老。Ông chiū chhe lâng chū-chi̍p Iû-tāi kap Iâ-lō͘-sat-léng ê chèng tiúⁿ-ló.

30王就上去耶和華ê殿；猶大眾人kap khiā起耶路撒冷ê百姓，kap祭司利未人，kap眾百姓，無論大細，lóng kap伊去。王就將耶和華殿內偶然得tio̍h約ê冊，一切ê話讀hō͘ in聽。Ông chiū chiūⁿ-khì Iâ-hô-hoa ê tiān; Iû-tāi chèng-lâng kap khiā-khí Iâ-lō͘-sat-léng ê peh-sìⁿ, kap chè-si Lī-bī lâng, kap chèng peh-sìⁿ, bô-lūn tōa-sòe, lóng kap i khì. Ông chiū chiong Iâ-hô-hoa tiān-lāi ngó͘-jiân tit-tio̍h iok ê chheh, it-chhè ê ōe tha̍k hō͘ in thiaⁿ.

31王khiā tī伊ê位，tī耶和華ê面前立約，beh盡心盡性順thàn耶和華，守伊ê誡命，kap干證ê話，kap律例，來成chit本冊所記立約ê話。Ông khiā tī i ê ūi, tī Iâ-hô-hoa ê bīn-chêng li̍p-iok, beh chīn-sim chīn-sèng sūn-thàn Iâ-hô-hoa, siú I ê kài-bēng, kap kan-chèng ê ōe, kap lu̍t-lē, lâi chiâⁿ chit pún chheh só͘ kì li̍p-iok ê ōe.

32伊hō͘耶路撒冷kap便雅憫所有ê百姓lóng承認chit-ê約；Tùi án-ni，耶路撒冷khiā起ê百姓照上帝ê約來行，就是in列祖ê上帝。I hō͘ Iâ-lō͘-sat-léng kap Piān-ngá-bín só͘ ū ê peh-sìⁿ lóng sêng-jīn chit ê iok; tùi án-ni Iâ-lō͘-sat-léng khiā-khí ê peh-sìⁿ chiàu Siōng-tè ê iok lâi kiâⁿ, chiū-sī in lia̍t-chó͘ ê Siōng-tè.

33約西亞將屬以色列人hiah-ê地，一切可惡ê lóng除去，koh hō͘所有tī以色列ê人服事耶和華in ê上帝。當約西亞tī-teh ê日，百姓thàn耶和華in列祖ê上帝，lóng無離開。Iok-se-a chiong sio̍k Í-sek-lia̍t lâng hiah ê tōe, it-chhè khó-ò͘ⁿ--ê lóng tû-khì, koh hō͘ só͘ ū tī Í-sek-lia̍t ê lâng ho̍k-sāi Iâ-hô-hoa in ê Siōng-tè. Tng Iok-se-a tī-teh ê ji̍t, peh-sìⁿ thàn Iâ-hô-hoa in lia̍t-chó͘ ê Siōng-tè, lóng bô lī-khui.