1Tùi án-ni，所羅門為tio̍h耶和華ê殿所做ê工lóng完。所羅門將伊ê老父大衛所獻hiah-ê物帶入去；伊ê銀，伊ê金，伊hiah-ê器具，hē tī上帝殿內ê府庫。Tùi án-ni Só͘-lô-bûn ūi-tio̍h Iâ-hô-hoa ê tiān só͘ chòe ê kang lóng oân. Só͘-lô-bûn chiong i ê lāu-pē Tāi-pi̍t só͘ hiàn hiah ê mi̍h tòa ji̍p-khì; i ê gûn, i ê kim, i hiah ê khì-kū, hē tī Siōng-tè tiān-lāi ê hú-khò͘.

2Hit時所羅門聚集以色列ê長老，各支派ê首領，kap以色列人hiah-ê族長，到耶路撒冷；beh將耶和華ê約櫃，tùi大衛城，就是錫安，運上來。Hit-sî Só͘-lô-bûn chū-chi̍p Í-sek-lia̍t ê tiúⁿ-ló, kok chi-phài ê siú-léng, kap Í-sek-lia̍t lâng hiah ê cho̍k-tiúⁿ, kàu Iâ-lō͘-sat-léng; beh chiong Iâ-hô-hoa ê iok-kūi, tùi Tāi-pi̍t siâⁿ, chiū-sī Sek-an, ūn chiūⁿ--lâi.

3以色列眾人就tī七月ê節期，lóng聚集到王hia。Í-sek-lia̍t chèng-lâng chiū tī chhit-ge̍h ê choeh-kî, lóng chū-chi̍p kàu ông hia.

4以色列chiah-ê長老到tè；hiah-ê利未人扛約櫃。Í-sek-lia̍t chiah ê tiúⁿ-ló kàu-tè; hiah ê Lī-bī lâng kng iok-kūi.

5In就扛約櫃，kap會幕，kap布棚內一切聖ê器具，上來；祭司利未人lóng 扛伊上來。In chiū kng iok-kūi, kap hōe-bō͘, kap Pò͘-pîⁿ-lāi it-chhè sèng ê khì-kū, chiūⁿ--lâi; chè-si Lī-bī lâng lóng kng i chiūⁿ--lâi.

6所羅門王kap聚集到伊hia以色列ê全會，tī約櫃前獻羊、牛，做祭祀，chōe到bōe算得，也算bōe了。Só͘-lô-bûn ông kap chū-chi̍p kàu i hia Í-sek-lia̍t ê choân-hōe, tī iok-kūi chêng hiàn iûⁿ, gû, chòe chè-sū, chōe kàu bōe-sǹg-tit, iā sǹg-bōe-liáu.

7祭司扛耶和華ê約櫃到伊ê所在，入hit間厝ê後殿，到至聖所，hē tī ki-lō͘兵ê翼下；Chè-si kng Iâ-hô-hoa ê iok-kūi kàu i ê só͘-chāi, ji̍p hit keng chhù ê āu-tiān, kàu chì-sèng-só͘, hē tī ki-lō͘-peng ê si̍t-ē;

8因為ki-lō͘兵thí開in ê翼，tī櫃ê所在ê頂面；ki-lō͘兵tī hit頂面遮蓋櫃kap伊ê槓(kǹg)；in-ūi ki-lō͘-peng thí-khui in ê si̍t, tī kūi ê só͘-chāi ê téng-bīn; ki-lō͘-peng tī hí(**hit) téng-bīn jia-khàm kūi kap i ê kǹg;

9Hiah-ê槓真長，伊ê槓尾tùi約櫃tī後殿前，thang看見，tī外面就bōe看見；到今á日iáu tī-hia。hiah ê kǹg chin-tn̂g, i ê kǹg-bé tùi iok-kūi tī āu-tiān chêng, thang khòaⁿ-kìⁿ, tī gōa-bīn chiū bōe khòaⁿ-kìⁿ; kàu kin-á-ji̍t iáu tī-hia.

10櫃內只有兩塊石碑，就是以色列人出埃及地，耶和華kap in立約ê時，摩西tī何烈山所hē-ê；這以外無別項物。Kūi-lāi chí-ū nn̄g tè chio̍h-pi, chiū-sī Í-sek-lia̍t lâng chhut Ai-ki̍p tōe, Iâ-hô-hoa kap in li̍p-iok ê sî, Mô͘-se tī Hô-lia̍t soaⁿ só͘ hē--ê; che í-gōa bô pa̍t-hāng mi̍h.

11Hiah-ê祭司出聖所，因為所tī-hia ê祭司lóng已經家己清氣，無照in ê班列；Hiah ê chè-si chhut sèng-só͘, in-ūi só͘ tī-hia ê chè-si lóng í-keng ka-kī chheng-khì, bô chiàu in ê pan-lia̍t;

12利未人中眾唱歌ê，就是A-sat、Hi-bān、Iâ-tō͘-tùn kap in hiah-ê kiáⁿ，hiah-ê兄弟lóng穿幼苧衫，khiā tī壇ê東勢，the̍h鐃鈸kap瑟kap琴；koh有祭司百二人kap in tī-hia pûn哨角；Lī-bī lâng tiong chèng chhiùⁿ-koa--ê, chiū-sī A-sat, Hi-bān, Iâ-tō͘-tùn kap in hiah ê kiáⁿ, hiah ê hiaⁿ-tī lóng chhēng iù-tōe-saⁿ, khiā tī tôaⁿ ê tang--sì, the̍h nâ-poa̍h kap sek kap khîm; koh ū chè-si pah-jī lâng kap in tī-hia pûn sàu-kak;

13Hiah-ê pûn哨角ê，hiah-ê唱歌ê，一齊同聲，o-ló感謝耶和華；用伊ê哨角、鐃鈸、樂器，大聲o-ló耶和華講，因為伊是好，伊ê慈惠永永tī-teh；hit時hit-ê殿，就是耶和華ê殿，有雲充滿；hiah-ê pûn sàu-kak--ê, hiah-ê chhiùⁿ-koa--ê, chi̍t-chôe tâng-siaⁿ, o-ló kám-siā Iâ-hô-hoa; ēng i ê sàu-kak, nâ-poa̍h, ga̍k-khì, tōa-siaⁿ o-ló Iâ-hô-hoa kóng, In-ūi I sī hó, I ê chû-hūi éng-éng tī-teh; hit-sî hit ê tiān, chiū-sī Iâ-hô-hoa ê tiān, ū hûn chhiong-móa;

14致到祭司為tio̍h雲ê緣故，bōe能khiā-teh服事；因為耶和華ê榮光充滿上帝ê殿。tì-kàu chè-si ūi-tio̍h hûn ê iân-kò͘, bōe-ōe khiā-teh ho̍k-sāi; in-ūi Iâ-hô-hoa ê êng-kng chhiong-móa Siōng-tè ê tiān.

1Hit時所羅門講，耶和華bat講，伊beh tiàm tī烏烏暗暗ê中間。Hit-sî Só͘-lô-bûn kóng, Iâ-hô-hoa bat kóng, I beh tiàm tī o͘-o͘ àm-àm ê tiong-kan.

2總是我已經起一間殿hō͘你khiā起，做你永遠tòa ê所在。Chóng-sī góa í-keng khí chi̍t keng tiān hō͘ Lí khiā-khí, chòe Lí éng-oán tòa ê só͘-chāi.

3王oa̍t-tńg伊ê面，祝福以色列ê會眾，以色列會眾lóng khiā起來。Ông oa̍t-tńg i ê bīn, chiok-hok Í-sek-lia̍t ê hōe-chiòng, Í-sek-lia̍t hōe-chiòng lóng khiā--khí-lâi.

4伊講，耶和華以色列ê上帝是應該o-ló-ê；因為伊親嘴對我ê父大衛所應允ê，親手應驗伊，講，I kóng, Iâ-hô-hoa Í-sek-lia̍t ê Siōng-tè sī eng-kai o-ló--ê; in-ūi I chhin-chhùi tùi góa ê pē Tāi-pi̍t só͘ èng-ún ê, chhin-chhiú èng-giām--i, kóng,

5Tùi我chhōa我ê百姓出埃及地以來，我bē-bat tī以色列眾支派中揀一個城來起殿hō͘我ê名tiàm tī-hia；也bē-bat揀人做我ê百姓以色列ê人君；Tùi Góa chhōa Góa ê peh-sìⁿ chhut Ai-ki̍p tōe í-lâi, Góa bē-bat tī Í-sek-lia̍t chèng chi-phài tiong kéng chi̍t ê siâⁿ lâi khí tiān hō͘ Góa ê miâ tiàm tī-hia; iā bē-bat kéng lâng chòe Góa ê peh-sìⁿ Í-sek-lia̍t ê jîn-kun;

6獨獨揀耶路撒冷hō͘我ê名tiàm tī-hia，koh揀大衛治理我ê百姓以色列。to̍k-to̍k kéng Iâ-lō͘-sat-léng hō͘ Góa ê miâ tiàm tī-hia, koh kéng Tāi-pi̍t tī-lí Góa ê peh-sìⁿ Í-sek-lia̍t.

7我ê父大衛心內有意思，beh為耶和華以色列ê上帝ê名起殿。Góa ê pē Tāi-pi̍t sim-lāi ū ì-sù, beh ūi Iâ-hô-hoa Í-sek-lia̍t ê Siōng-tè ê miâ khí tiān.

8總是耶和華對我ê父大衛講，你ê心有意思beh為我ê名起殿，你chit-ê意思真好；Chóng-sī Iâ-hô-hoa tùi góa ê pē Tāi-pi̍t kóng, Lí ê sim ū ì-sù beh ūi Góa ê miâ khí tiān, lí chit ê ì-sù chin-hó;

9獨獨你m̄-thang起殿，你所親生ê kiáⁿ beh為我ê名起殿。to̍k-to̍k lí m̄-thang khí tiān, lí só͘ chhin-siⁿ ê kiáⁿ beh ūi Góa ê miâ khí tiān.

10Taⁿ耶和華應驗伊所講ê話；我照耶和華ê話起來續接我ê父大衛，坐以色列ê國位；koh為耶和華以色列上帝ê名起殿。Taⁿ Iâ-hô-hoa èng-giām I só͘ kóng ê ōe; Góa chiàu Iâ-hô-hoa ê ōe khí-lâi sòa-chiap góa ê pē Tāi-pi̍t, chē Í-sek-lia̍t ê kok-ūi; koh ūi Iâ-hô-hoa Í-sek-lia̍t Siōng-tè ê miâ khí tiān.

11我安置約櫃tī-hia；櫃內有耶和華ê約，就是伊kap以色列人所立ê約。Góa an-tì iok-kūi tī-hia; kūi-lāi ū Iâ-hô-hoa ê iok, chiū-sī I kap Í-sek-lia̍t lâng só͘ li̍p ê iok.

12王當以色列會眾ê面前，khiā tī耶和華ê壇前，kia̍h起手；Ông tng Í-sek-lia̍t hōe-chiòng ê bīn-chêng, khiā tī Iâ-hô-hoa ê tôaⁿ-chêng, kia̍h-khí chhiú;

13(因為所羅門bat造一個銅台，長五肘，闊五肘，高三肘，hē tī院中；就khiā tī台頂，當以色列會眾ê面前跪落去，kia̍h起手ǹg天，) 講，(in-ūi Só͘-lô-bûn bat chō chi̍t ê tâng-tâi, tn̂g gō͘-tiú, khoah gō͘-tiú, koâiⁿ saⁿ-tiú, hē tī īⁿ-tiong; chiū khiā tī tâi-téng, tng Í-sek-lia̍t hōe-chiòng ê bīn-chêng kūi--lo̍h-khì, kia̍h-khí chhiú ǹg thiⁿ,) kóng,

14耶和華以色列ê上帝ah，tī天裡，tī地裡，無有上帝親像你，守約行慈愛tī你hiah-ê奴僕，就是盡心行tī你ê面前ê。Iâ-hô-hoa Í-sek-lia̍t ê Siōng-tè ah, tī thiⁿ--nih, tī tōe--nih, bô ū siōng-tè chhin-chhiūⁿ Lí, siú iok kiâⁿ chû-ài tī Lí hiah ê lô͘-po̍k, chiū-sī chīn-sim kiâⁿ tī Lí ê bīn-chêng--ê.

15你對你ê奴僕，我ê父大衛，所應允ê，你有守伊；你親嘴講ê，親手應驗伊，照今á日ê款。Lí tùi Lí ê lô͘-po̍k, góa ê pē Tāi-pi̍t, só͘ èng-ún ê, Lí ū siú--i; Lí chhin-chhùi kóng--ê, chhin-chhiú èng-giām--i, chiàu kin-á-ji̍t ê khoán.

16耶和華以色列ê上帝ah，你所應允你ê奴僕我ê父大衛，講，你ê kiáⁿ孫若謹慎in ê所做，行我ê律法，親像你行tī我ê面前，就屬tī你ê beh tī我ê面前坐以色列ê國位永無斷，taⁿ求你應驗伊。Iâ-hô-hoa Í-sek-lia̍t ê Siōng-tè ah, Lí só͘ èng-ún Lí ê lô͘-po̍k góa ê pē Tāi-pi̍t, kóng, Lí ê kiáⁿ-sun nā kín-sīn in ê só͘-chòe, kiâⁿ Góa ê lu̍t-hoat, chhin-chhiūⁿ lí kiâⁿ tī Góa ê bīn-chêng, chiū sio̍k tī lí-ê beh tī Góa ê bīn-chêng chē Í-sek-lia̍t ê kok-ūi éng bô tn̄g, taⁿ kiû Lí èng-giām i.

17耶和華，以色列ê上帝ah，你對你ê奴僕大衛所講ê，求你hō͘伊成做實事。Iâ-hô-hoa, Í-sek-lia̍t ê Siōng-tè ah, Lí tùi Lí ê lô͘-po̍k Tāi-pi̍t só͘ kóng-ê, kiû Lí hō͘ i chiâⁿ-chòe si̍t-sū.

18上帝kiám真正beh kap世間人khiā起地上mah？看ah，天kap chiah-ê天ê天，尚且無夠額hō͘你khiā起，何況我所起chit間殿ah？Siōng-tè kiám chin-chiàⁿ beh kap sè-kan lâng khiā-khí tōe-chiūⁿ mah? Khòaⁿ ah, thiⁿ kap chiah ê thiⁿ ê thiⁿ, siōng-chhiáⁿ bô kàu-gia̍h hō͘ Lí khiā-khí, hô-hòng góa só͘ khí chit keng tiān ah?

19耶和華我ê上帝ah，願你àⁿ落siàu念你ê奴僕ê祈禱懇求，來聽你ê奴僕所祈禱tī你ê面前ê求叫祈禱；Iâ-hô-hoa góa ê Siōng-tè ah, goān Lí àⁿ-lo̍h siàu-liām Lí ê lô͘-po̍k ê kî-tó khún-kiû, lâi thiaⁿ Lí ê lô͘-po̍k só͘ kî-tó tī Lí ê bīn-chêng ê kiû-kiò kî-tó;

20願你日暝看顧chit-ê殿，就是你所講起beh安置你ê名tī-hia ê所在，來聽你ê奴僕所beh ǹg chit所在祈禱ê祈禱。goān Lí ji̍t-mî khòaⁿ-kò͘ chit ê tiān, chiū-sī Lí só͘ kóng-khí beh an-tì Lí ê miâ tī-hia ê só͘-chāi, lâi thiaⁿ Lí ê lô͘-po̍k só͘ beh ǹg chit só͘-chāi kî-tó ê kî-tó.

21你ê奴僕kap你ê百姓以色列ǹg chit所在祈禱ê時，願你聽in ê祈求，願你tùi天，你khiā起ê所在，來聽in；你聽見ê時就赦免。Lí ê lô͘-po̍k kap Lí ê peh-sìⁿ Í-sek-lia̍t ǹg chit só͘-chāi kî-tó ê sî, goān Lí thiaⁿ in ê kî-kiû, goān Lí tùi thiⁿ, Lí khiā-khí ê só͘-chāi, lâi thiaⁿ in; Lí thiaⁿ-kìⁿ ê sî chiū sià-bián.

22人若得罪伊ê厝邊，也有人用一個chiù-chōa kah伊chiù-chōa，伊若來chit間殿，tī你ê壇前chiù-chōa；Lâng nā tek-chōe i ê chhù-piⁿ, iā ū lâng ēng chi̍t ê chiù-chōa kah i chiù-chōa, i nā lâi chit keng tiān, tī Lí ê tôaⁿ-chêng chiù-chōa;

23求你tùi天聽來辨理伊，審判你chiah-ê奴僕，定pháiⁿ人ê罪，照伊所行ê，報應tī伊ê頭殼；定義人做義，照伊ê義來hō͘伊。kiû Lí tùi thiⁿ thiaⁿ lâi pān-lí i, sím-phòaⁿ Lí chiah ê lô͘-po̍k, tēng pháiⁿ-lâng ê chōe, chiàu i só͘ kiâⁿ--ê, pò-èng tī i ê thâu-khak; tēng gī-lâng chòe gī, chiàu i ê gī lâi hō͘ i.

24設使你ê百姓以色列，因為得罪你，chiah thâi輸tī對敵ê面前，in若歸向你，認你ê名，koh tī chit間殿祈禱懇求你；Siat-sú Lí ê peh-sìⁿ Í-sek-lia̍t, in-ūi tek-chōe Lí, chiah thâi-su tī tùi-te̍k ê bīn-chêng, in nā kui-ǹg Lí, jīn Lí ê miâ, koh tī chit keng tiān kî-tó khún-kiû Lí;

25求你tùi天聽in，來赦免你ê百姓以色列ê罪，hō͘ in tò來你所賞賜in，kap in列祖ê地。kiû Lí tùi thiⁿ thiaⁿ in, lâi sià-bián Lí ê peh-sìⁿ Í-sek-lia̍t ê chōe, hō͘ in tò-lâi Lí só͘ siúⁿ-sù in, kap in lia̍t-chó͘ ê tōe.

26設使in得罪你，致到天關密無落雨；你刑罰in ê時，in若ǹg chit所在祈禱，認你ê名，離開in ê罪；Siat-sú in tek-chōe Lí, tì-kàu thiⁿ koaiⁿ-ba̍t bô lo̍h-hō͘; Lí hêng-hoa̍t in ê sî, in nā ǹg chit só͘-chāi kî-tó, jīn Lí ê miâ, lī-khui in ê chōe;

27求你tī天裡聽in，赦免你ê奴僕kap你ê百姓以色列ê罪，tī你教示in所tio̍h行ê好路ê時，koh落雨tī你ê地，就是你賞賜你ê百姓做業ê。kiû Lí tī thiⁿ--nih thiaⁿ in, sià-bián Lí ê lô͘-po̍k kap Lí ê peh-sìⁿ Í-sek-lia̍t ê chōe, tī Lí kà-sī in só͘ tio̍h kiâⁿ ê hó-lō͘ ê sî, koh lo̍h-hō͘ tī Lí ê tōe, chiū-sī Lí siúⁿ-sù Lí ê peh-sìⁿ chòe gia̍p ê.

28Chit-ê地若有飢荒、瘟疫、枯焦、朽爛、草蜢、剪蟲，á是in hiah-ê對敵，tī in hiah-ê城ê地，圍困in，無論有甚麼災厄，甚麼破病；Chit ê tōe nā ū ki-hng, un-e̍k, ko͘-tâ, hiú-nōa, chháu-meh, chián-thâng, á-sī in hiah ê tùi-te̍k, tī in hiah ê siâⁿ ê tōe, ûi-khùn in, bô-lūn ū sím-mi̍h chai-ē, sím-mi̍h phòa-pīⁿ;

29或是一人，或是你ê百姓以色列ê眾人，ta̍k-ê知家己心內ê災厄憂悶，ǹg chit間殿kia̍h起手，無論怎樣懇求，怎樣祈禱；he̍k-sī chi̍t-lâng, he̍k-sī Lí ê peh-sìⁿ Í-sek-lia̍t ê chèng-lâng, ta̍k-ê chai ka-kī sim-lāi ê chai-ē iu-būn, ǹg chit keng tiān kia̍h-khí chhiú, bô-lūn cháiⁿ-iūⁿ khún-kiû, cháiⁿ-iūⁿ kî-tó;

30願你tùi天裡，你所khiā起ê所在，來聽伊，來赦免伊，你知in ê心，照in ta̍k人ê行做來款待in，(因為世間人ê心只有你知nā-tiāⁿ) ；goān Lí tùi thiⁿ--nih, Lí só͘ khiā-khí ê só͘-chāi, lâi thiaⁿ i, lâi sià-bián--i, Lí chai in ê sim, chiàu in ta̍k-lâng ê kiâⁿ-chòe lâi khoán-thāi in, (in-ūi sè-kan lâng ê sim chí-ū Lí chai nā-tiāⁿ);

31Hō͘ in tī你賞賜阮列祖ê地，一世人敬畏你，行你ê道路。hō͘ in tī Lí siúⁿ-sù goán lia̍t-chó͘ ê tōe, chi̍t-sì-lâng kèng-ùi Lí, kiâⁿ Lí ê tō-lō͘.

32論到外邦人，m̄是屬你ê百姓以色列ê，為tio̍h你ê大名，大權能ê手伸出ê手骨，tùi遠遠ê所在來，in若來ǹg chit間殿祈禱；Lūn-kàu gōa-pang lâng, m̄-sī sio̍k Lí ê peh-sìⁿ Í-sek-lia̍t ê, ūi-tio̍h Lí ê tōa-miâ, tōa koân-lêng ê chhiú chhun-chhut ê chhiú-kut, tùi hn̄g-hn̄g ê só͘-chāi lâi, in nā lâi ǹg chit keng tiān kî-tó;

33願你tùi天，你khiā起ê所在，來聽in，照外邦人一切所對你求ê來行；hō͘天下萬百姓lóng bat你ê名，敬畏你，親像你ê百姓以色列一樣；koh hō͘ in知我所起chit間殿，是用你ê名來稱ê。goān Lí tùi thiⁿ, Lí khiā-khí ê só͘-chāi, lâi thiaⁿ in, chiàu gōa-pang lâng it-chhè só͘ tùi Lí kiû-ê lâi kiâⁿ; hō͘ thiⁿ-ē bān peh-sìⁿ lóng bat Lí ê miâ, kèng-ùi Lí, chhin-chhiūⁿ Lí ê peh-sìⁿ Í-sek-lia̍t chi̍t-iūⁿ; koh hō͘ in chai góa só͘ khí chit keng tiān, sī ēng Lí ê miâ lâi chheng-ê.

34你ê百姓若出去你所差in去ê路，kap對敵交戰，ǹg你所揀chit-ê城，kap我為tio̍h你ê名所起ê殿，來祈禱你；Lí ê peh-sìⁿ nā chhut-khì Lí só͘ chhe in khì ê lō͘, kap tùi-te̍k kau-chiàn, ǹg Lí só͘ kéng chit ê siâⁿ, kap góa ūi-tio̍h Lí ê miâ só͘ khí ê tiān, lâi kî-tó Lí;

35願你tùi天來聽in ê祈禱懇求，來保護in ê義。goān Lí tùi thiⁿ lâi thiaⁿ in ê kî-tó khún-kiû, lâi pó-hō͘ in ê gī.

36你ê百姓若得罪你，(因為無有無犯罪ê人，) 你受氣in，將in交hō͘對敵，致到in掠in到或是遠或是近ê地；Lí ê peh-sìⁿ nā tek-chōe Lí, (in-ūi bô ū bô hoān-chōe ê lâng,) Lí siū-khì in, chiong in kau hō͘ tùi-te̍k, tì-kàu in lia̍h in kàu he̍k-sī hn̄g he̍k-sī kūn ê tōe;

37in若tī所掠去ê地，心內倒tńg想來反悔，koh tī掠in ê人ê地，懇求你講，阮有罪，阮有悖逆，阮有做pháiⁿ；in nā tī só͘ lia̍h-khì ê tōe, sim-lāi tò-tńg siūⁿ lâi hoán-hóe, koh tī lia̍h in ê lâng ê tōe, khún-kiû Lí kóng, Goán ū-chōe, goán ū pōe-ge̍k, goán ū chòe-pháiⁿ;

38in若tī受掠去ê地，就是對敵掠in去ê地，盡心盡性歸服你，koh ǹg本地，就是你賞賜in列祖ê地，kap你所揀ê城，以及我為tio̍h你ê名所起ê殿，來祈禱你；in nā tī siū lia̍h-khì ê tōe, chiū-sī tùi-te̍k lia̍h in khì ê tōe, chīn-sim chīn-sèng kui-ho̍k Lí, koh ǹg pún-tōe, chiū-sī Lí siúⁿ-sù in lia̍t-chó͘ ê tōe, kap Lí só͘ kéng ê siâⁿ, í-ki̍p góa ūi-tio̍h Lí ê miâ só͘ khí ê tiān, lâi kî-tó Lí;

39願你tùi天，你所khiā起ê所在，聽in ê祈禱懇求，來保護in ê義，koh赦免你ê百姓得罪你ê。goān Lí tùi thiⁿ, Lí só͘ khiā-khí ê só͘-chāi, thiaⁿ in ê kî-tó khún-kiû, lâi pó-hō͘ in ê gī, koh sià-bián Lí ê peh-sìⁿ tek-chōe Lí ê.

40我ê上帝ah，taⁿ我求你目睭看，耳孔聽，tī chit所在所獻ê祈禱。Góa ê Siōng-tè ah, taⁿ góa kiû Lí ba̍k-chiu khòaⁿ, hī-khang thiaⁿ, tī chit só͘-chāi só͘ hiàn ê kî-tó.

41耶和華上帝ah，求你起來，你kap你能力ê櫃，入你安歇ê所在；耶和華上帝ah，願你ê祭司穿救恩，願你hiah-ê聖ê百姓得tio̍h福氣來歡喜。Iâ-hô-hoa Siōng-tè ah, kiû Lí khí-lâi, Lí kap Lí lêng-le̍k ê kūi, ji̍p Lí an-hioh ê só͘-chāi; Iâ-hô-hoa Siōng-tè ah, goān Lí ê chè-si chhēng kiù-un, goān Lí hiah ê sèng ê peh-sìⁿ tit-tio̍h hok-khì lâi hoaⁿ-hí.

42耶和華上帝ah，求你莫得拒絕你受抹油ê；tio̍h記念你施hō͘你ê奴僕大衛ê慈愛。Iâ-hô-hoa Siōng-tè ah, kiû Lí bo̍h-tit kū-choa̍t Lí siū boah-iû--ê; tio̍h kì-liām Lí si-hō͘ Lí ê lô͘-po̍k Tāi-pi̍t ê chû-ài.

1所羅門祈禱明白，就有火tùi天落來，一盡燒燒祭kap別號ê祭；耶和華ê榮光充滿殿。Só͘-lô-bûn kî-tó bêng-pe̍k, chiū ū hé tùi thiⁿ lo̍h-lâi, it-chīn sio sio-chè kap pa̍t-hō ê chè; Iâ-hô-hoa ê êng-kng chhiong-móa tiān.

2因為耶和華ê榮光充滿耶和華ê殿，所以祭司bōe會入耶和華ê殿。In-ūi Iâ-hô-hoa ê êng-kng chhiong-móa Iâ-hô-hoa ê tiān, só͘-í chè-si bōe-ōe ji̍p Iâ-hô-hoa ê tiān.

3Hit-ê火降落，koh耶和華ê榮光tī殿裡ê時，以色列眾人看見，就tī舖石ê所在，仆落地敬拜，感謝耶和華，講，因為伊是好，伊ê 慈惠永永tī-teh。Hit ê hé kàng-lo̍h, koh Iâ-hô-hoa ê êng-kng tī tiān--nih ê sî, Í-sek-lia̍t chèng-lâng khòaⁿ-kìⁿ, chiū tī pho͘-chio̍h ê só͘-chāi, phak-lo̍h tōe kèng-pài, kám-siā Iâ-hô-hoa, kóng, In-ūi I sī hó, I ê chû-hūi éng-éng tī-teh.

4王kap眾百姓tī耶和華ê面前獻祭。Ông kap chèng peh-sìⁿ tī Iâ-hô-hoa ê bīn-chêng hiàn-chè.

5所羅門王用牛兩萬兩千隻，羊十二萬隻，獻祭；án-ni，王kap眾百姓為tio̍h上帝ê殿行獻殿ê禮。Só͘-lô-bûn ông ēng gû nn̄g-bān nn̄g-chheng chiah, iûⁿ cha̍p-jī-bān chiah, hiàn-chè; án-ni, ông kap chèng peh-sìⁿ ūi-tio̍h Siōng-tè ê tiān kiâⁿ hiàn-tiān ê lé.

6祭司照伊ê職teh-khiā；利未人也the̍h耶和華ê樂器，就是前大衛用利未人o-ló ê時，大衛王tiâu-tî造來感謝耶和華ê，(因為伊ê 慈惠永永tī-teh；) 祭司tī in ê面前pûn哨角，以色列人lóng khiā-teh。Chè-si chiàu i ê chit teh-khiā; Lī-bī lâng iā the̍h Iâ-hô-hoa ê ga̍k-khì, chiū-sī chêng Tāi-pi̍t ēng Lī-bī lâng o-ló ê sî, Tāi-pi̍t ông tiâu-tî chō lâi kám-siā Iâ-hô-hoa ê, (in-ūi I ê chû-hūi éng-éng tī-teh;) chè-si tī in ê bīn-chêng pûn sàu-kak, Í-sek-lia̍t lâng lóng khiā--teh.

7所羅門也分別耶和華殿前院中做聖；tī-hia獻燒祭kap謝恩祭ê油；因為所羅門所bat造ê銅壇無夠額容允hiah-ê燒祭、素祭，kap油lâ。Só͘-lô-bûn iā hun-piat Iâ-hô-hoa tiān-chêng īⁿ-tiong chòe-sèng; tī-hia hiàn sio-chè kap siā-un-chè ê iû; in-ūi Só͘-lô-bûn só͘ bat chō ê tâng-tôaⁿ bô kàu-gia̍h iông-ún hiah ê sio-chè, sò͘-chè, kap iû-lâ.

8Hit時所羅門守節期七日；以色列眾人tùi Hap-má ê路口到埃及ê溪lóng來kap伊守；成做大ê會。Hit-sî Só͘-lô-bûn siú choeh-kî chhit-ji̍t; Í-sek-lia̍t chèng-lâng tùi Hap-má ê lō͘-kháu kàu Ai-ki̍p ê khoe lóng lâi kap i siú; chiâⁿ-chòe tōa ê hōe.

9到第八日in設嚴肅會；因為in守獻壇ê禮七日，koh守節七日。Kàu tē-poeh ji̍t in siat giâm-siok-hōe; in-ūi in siú hiàn tôaⁿ ê lé chhit-ji̍t, koh siú choeh chhit-ji̍t.

10七月二十三日，王差百姓tò去in ê布棚，ta̍k-ê歡喜，心快樂；是因為耶和華所施出hō͘大衛，所羅門，kap伊ê百姓以色列ê恩惠。Chhit-ge̍h jī-cha̍p-saⁿ ji̍t, ông chhe peh-sìⁿ tò-khì in ê pò͘-pîⁿ, ta̍k-ê hoaⁿ-hí, sim khoài-lo̍k; sī in-ūi Iâ-hô-hoa só͘ si-chhut hō͘ Tāi-pi̍t, Só͘-lô-bûn, kap I ê peh-sìⁿ Í-sek-lia̍t ê un-hūi.

11Tùi án-ni，所羅門起耶和華ê殿kap王宮完工；tī耶和華ê殿kap王宮，見所羅門心內所ài做ê，lóng做到成功。Tùi án-ni Só͘-lô-bûn khí Iâ-hô-hoa ê tiān kap ông-kiong oân-kang; tī Iâ-hô-hoa ê tiān kap ông-kiong, kìⁿ Só͘-lô-bûn sim-lāi só͘ ài chòe--ê, lóng chòe kàu sêng-kong.

12暝時耶和華出現tī所羅門，kā伊講，我已經聽你ê祈禱，也揀chit所在做獻祭我ê殿。Mî--sî Iâ-hô-hoa chhut-hiān tī Só͘-lô-bûn, kā i kóng, Góa í-keng thiaⁿ lí ê kî-tó, iā kéng chit só͘-chāi chòe hiàn-chè Góa ê tiān.

13我若關密天，致到無落雨，á是命令草蜢食伊ê土產，á是hō͘瘟疫流行tī我ê百姓中；Góa nā koaiⁿ-ba̍t thiⁿ, tì-kàu bô lo̍h-hō͘, á-sī bēng-lēng chháu-meh chia̍h i ê thó͘-sán, á-sī hō͘ un-e̍k liû-hêng tī Góa ê peh-sìⁿ tiong;

14我ê百姓用我ê名來稱ê，若家己謙卑，祈禱，求見我ê面，oa̍t-tńg離開in ê pháiⁿ路，我beh tùi天聽in，赦免in ê罪，醫治in ê地。Góa ê peh-sìⁿ ēng Góa ê miâ lâi chheng-ê, nā ka-kī khiam-pi, kî-tó, kiû kìⁿ Góa ê bīn, oa̍t-tńg lī-khui in ê pháiⁿ-lō͘, Góa beh tùi thiⁿ thiaⁿ in, sià-bián in ê chōe, i-tī in ê tōe.

15我beh目睭看，耳孔聽，tī chit所在所獻ê祈禱。Góa beh ba̍k-chiu khòaⁿ, hī-khang thiaⁿ, tī chit só͘-chāi só͘ hiàn ê kî-tó.

16因為我taⁿ已經揀chit間殿，分別伊做聖，hō͘我ê名永遠tī-hia；我ê目睭我ê心也beh久長tī-hia。In-ūi Góa taⁿ í-keng kéng chit keng tiān, hun-piat i chòe-sèng, hō͘ Góa ê miâ éng-oán tī-hia; Góa ê ba̍k-chiu Góa ê sim iā beh kú-tn̂g tī-hia.

17論到你若行tī我ê面前，親像你ê老父大衛所行ê，遵thàn我一切所命令你ê，執守我ê律例我ê法度，Lūn-kàu lí nā kiâⁿ tī Góa ê bīn-chêng, chhin-chhiūⁿ lí ê lāu-pē Tāi-pi̍t só͘ kiâⁿ--ê, chun-thàn Góa it-chhè só͘ bēng-lēng lí ê, chip-siú Góa ê lu̍t-lē Góa ê hoat-tō͘,

18我就beh堅固你ê國位，親像我kap你ê老父大衛所立ê約，講，你ê後裔beh管理以色列，永無斷。Góa chiū beh kian-kò͘ lí ê kok-ūi, chhin-chhiūⁿ Góa kap lí ê lāu-pē Tāi-pi̍t só͘ li̍p ê iok, kóng, Lí ê hō͘-è beh koán-lí Í-sek-lia̍t, éng bô tn̄g.

19Lín若oa̍t-tńg來棄sak我ê律例我ê誡命，就是我hē tī lín ê面前ê，去服事別ê上帝來敬拜伊；我就beh tùi我賞賜in ê地，拔in ê根；Lín nā oa̍t-tńg lâi khì-sak Góa ê lu̍t-lē Góa ê kài-bēng, chiū-sī Góa hē tī lín ê bīn-chêng-ê, khì ho̍k-sāi pa̍t ê siōng-tè lâi kèng-pài i; Góa chiū beh tùi Góa siúⁿ-sù in ê tōe, pu̍ih in ê kun;

20koh我為家己ê名所分別做聖chit間殿，也beh tùi我ê面前棄sak伊，hō͘伊tī萬國中做話柄受譏刺；koh Góa ūi ka-kī ê miâ só͘ hun-piat chòe-sèng chit keng tiān, iā beh tùi Góa ê bīn-chêng khì-sak--i, hō͘ i tī bān-kok tiong chòe ōe-pìⁿ siū ki-chhì;

21Chit間殿雖然真高，將來經過ê人beh gông-ngia̍h，講，耶和華啥事án-ni款待chit-ê地，chit間殿ah？chit keng tiān sui-jiân chin koâiⁿ, chiong-lâi keng-kè ê lâng beh gông-ngia̍h, kóng, Iâ-hô-hoa siáⁿ-sū án-ni khoán-thāi chit ê tōe, chit keng tiān ah?

22就beh應講，是因為in棄sak耶和華in列祖ê上帝，就是chhōa in出埃及地ê，去結聯別ê上帝，服事敬拜in，所以耶和華hō͘這一切ê災厄臨到in。Chiū beh ìn kóng, Sī in-ūi in khì-sak Iâ-hô-hoa in lia̍t-chó͘ ê Siōng-tè, chiū-sī chhōa in chhut Ai-ki̍p-tōe--ê, khì kiat-liân pa̍t ê siōng-tè, ho̍k-sāi kèng-pài in, só͘-í Iâ-hô-hoa hō͘ che it-chhè ê chai-ē lîm-kàu in.