1所羅門祈禱明白，就有火tùi天落來，一盡燒燒祭kap別號ê祭；耶和華ê榮光充滿殿。Só͘-lô-bûn kî-tó bêng-pe̍k, chiū ū hé tùi thiⁿ lo̍h-lâi, it-chīn sio sio-chè kap pa̍t-hō ê chè; Iâ-hô-hoa ê êng-kng chhiong-móa tiān.

2因為耶和華ê榮光充滿耶和華ê殿，所以祭司bōe會入耶和華ê殿。In-ūi Iâ-hô-hoa ê êng-kng chhiong-móa Iâ-hô-hoa ê tiān, só͘-í chè-si bōe-ōe ji̍p Iâ-hô-hoa ê tiān.

3Hit-ê火降落，koh耶和華ê榮光tī殿裡ê時，以色列眾人看見，就tī舖石ê所在，仆落地敬拜，感謝耶和華，講，因為伊是好，伊ê 慈惠永永tī-teh。Hit ê hé kàng-lo̍h, koh Iâ-hô-hoa ê êng-kng tī tiān--nih ê sî, Í-sek-lia̍t chèng-lâng khòaⁿ-kìⁿ, chiū tī pho͘-chio̍h ê só͘-chāi, phak-lo̍h tōe kèng-pài, kám-siā Iâ-hô-hoa, kóng, In-ūi I sī hó, I ê chû-hūi éng-éng tī-teh.

4王kap眾百姓tī耶和華ê面前獻祭。Ông kap chèng peh-sìⁿ tī Iâ-hô-hoa ê bīn-chêng hiàn-chè.

5所羅門王用牛兩萬兩千隻，羊十二萬隻，獻祭；án-ni，王kap眾百姓為tio̍h上帝ê殿行獻殿ê禮。Só͘-lô-bûn ông ēng gû nn̄g-bān nn̄g-chheng chiah, iûⁿ cha̍p-jī-bān chiah, hiàn-chè; án-ni, ông kap chèng peh-sìⁿ ūi-tio̍h Siōng-tè ê tiān kiâⁿ hiàn-tiān ê lé.

6祭司照伊ê職teh-khiā；利未人也the̍h耶和華ê樂器，就是前大衛用利未人o-ló ê時，大衛王tiâu-tî造來感謝耶和華ê，(因為伊ê 慈惠永永tī-teh；) 祭司tī in ê面前pûn哨角，以色列人lóng khiā-teh。Chè-si chiàu i ê chit teh-khiā; Lī-bī lâng iā the̍h Iâ-hô-hoa ê ga̍k-khì, chiū-sī chêng Tāi-pi̍t ēng Lī-bī lâng o-ló ê sî, Tāi-pi̍t ông tiâu-tî chō lâi kám-siā Iâ-hô-hoa ê, (in-ūi I ê chû-hūi éng-éng tī-teh;) chè-si tī in ê bīn-chêng pûn sàu-kak, Í-sek-lia̍t lâng lóng khiā--teh.

7所羅門也分別耶和華殿前院中做聖；tī-hia獻燒祭kap謝恩祭ê油；因為所羅門所bat造ê銅壇無夠額容允hiah-ê燒祭、素祭，kap油lâ。Só͘-lô-bûn iā hun-piat Iâ-hô-hoa tiān-chêng īⁿ-tiong chòe-sèng; tī-hia hiàn sio-chè kap siā-un-chè ê iû; in-ūi Só͘-lô-bûn só͘ bat chō ê tâng-tôaⁿ bô kàu-gia̍h iông-ún hiah ê sio-chè, sò͘-chè, kap iû-lâ.

8Hit時所羅門守節期七日；以色列眾人tùi Hap-má ê路口到埃及ê溪lóng來kap伊守；成做大ê會。Hit-sî Só͘-lô-bûn siú choeh-kî chhit-ji̍t; Í-sek-lia̍t chèng-lâng tùi Hap-má ê lō͘-kháu kàu Ai-ki̍p ê khoe lóng lâi kap i siú; chiâⁿ-chòe tōa ê hōe.

9到第八日in設嚴肅會；因為in守獻壇ê禮七日，koh守節七日。Kàu tē-poeh ji̍t in siat giâm-siok-hōe; in-ūi in siú hiàn tôaⁿ ê lé chhit-ji̍t, koh siú choeh chhit-ji̍t.

10七月二十三日，王差百姓tò去in ê布棚，ta̍k-ê歡喜，心快樂；是因為耶和華所施出hō͘大衛，所羅門，kap伊ê百姓以色列ê恩惠。Chhit-ge̍h jī-cha̍p-saⁿ ji̍t, ông chhe peh-sìⁿ tò-khì in ê pò͘-pîⁿ, ta̍k-ê hoaⁿ-hí, sim khoài-lo̍k; sī in-ūi Iâ-hô-hoa só͘ si-chhut hō͘ Tāi-pi̍t, Só͘-lô-bûn, kap I ê peh-sìⁿ Í-sek-lia̍t ê un-hūi.

11Tùi án-ni，所羅門起耶和華ê殿kap王宮完工；tī耶和華ê殿kap王宮，見所羅門心內所ài做ê，lóng做到成功。Tùi án-ni Só͘-lô-bûn khí Iâ-hô-hoa ê tiān kap ông-kiong oân-kang; tī Iâ-hô-hoa ê tiān kap ông-kiong, kìⁿ Só͘-lô-bûn sim-lāi só͘ ài chòe--ê, lóng chòe kàu sêng-kong.

12暝時耶和華出現tī所羅門，kā伊講，我已經聽你ê祈禱，也揀chit所在做獻祭我ê殿。Mî--sî Iâ-hô-hoa chhut-hiān tī Só͘-lô-bûn, kā i kóng, Góa í-keng thiaⁿ lí ê kî-tó, iā kéng chit só͘-chāi chòe hiàn-chè Góa ê tiān.

13我若關密天，致到無落雨，á是命令草蜢食伊ê土產，á是hō͘瘟疫流行tī我ê百姓中；Góa nā koaiⁿ-ba̍t thiⁿ, tì-kàu bô lo̍h-hō͘, á-sī bēng-lēng chháu-meh chia̍h i ê thó͘-sán, á-sī hō͘ un-e̍k liû-hêng tī Góa ê peh-sìⁿ tiong;

14我ê百姓用我ê名來稱ê，若家己謙卑，祈禱，求見我ê面，oa̍t-tńg離開in ê pháiⁿ路，我beh tùi天聽in，赦免in ê罪，醫治in ê地。Góa ê peh-sìⁿ ēng Góa ê miâ lâi chheng-ê, nā ka-kī khiam-pi, kî-tó, kiû kìⁿ Góa ê bīn, oa̍t-tńg lī-khui in ê pháiⁿ-lō͘, Góa beh tùi thiⁿ thiaⁿ in, sià-bián in ê chōe, i-tī in ê tōe.

15我beh目睭看，耳孔聽，tī chit所在所獻ê祈禱。Góa beh ba̍k-chiu khòaⁿ, hī-khang thiaⁿ, tī chit só͘-chāi só͘ hiàn ê kî-tó.

16因為我taⁿ已經揀chit間殿，分別伊做聖，hō͘我ê名永遠tī-hia；我ê目睭我ê心也beh久長tī-hia。In-ūi Góa taⁿ í-keng kéng chit keng tiān, hun-piat i chòe-sèng, hō͘ Góa ê miâ éng-oán tī-hia; Góa ê ba̍k-chiu Góa ê sim iā beh kú-tn̂g tī-hia.

17論到你若行tī我ê面前，親像你ê老父大衛所行ê，遵thàn我一切所命令你ê，執守我ê律例我ê法度，Lūn-kàu lí nā kiâⁿ tī Góa ê bīn-chêng, chhin-chhiūⁿ lí ê lāu-pē Tāi-pi̍t só͘ kiâⁿ--ê, chun-thàn Góa it-chhè só͘ bēng-lēng lí ê, chip-siú Góa ê lu̍t-lē Góa ê hoat-tō͘,

18我就beh堅固你ê國位，親像我kap你ê老父大衛所立ê約，講，你ê後裔beh管理以色列，永無斷。Góa chiū beh kian-kò͘ lí ê kok-ūi, chhin-chhiūⁿ Góa kap lí ê lāu-pē Tāi-pi̍t só͘ li̍p ê iok, kóng, Lí ê hō͘-è beh koán-lí Í-sek-lia̍t, éng bô tn̄g.

19Lín若oa̍t-tńg來棄sak我ê律例我ê誡命，就是我hē tī lín ê面前ê，去服事別ê上帝來敬拜伊；我就beh tùi我賞賜in ê地，拔in ê根；Lín nā oa̍t-tńg lâi khì-sak Góa ê lu̍t-lē Góa ê kài-bēng, chiū-sī Góa hē tī lín ê bīn-chêng-ê, khì ho̍k-sāi pa̍t ê siōng-tè lâi kèng-pài i; Góa chiū beh tùi Góa siúⁿ-sù in ê tōe, pu̍ih in ê kun;

20koh我為家己ê名所分別做聖chit間殿，也beh tùi我ê面前棄sak伊，hō͘伊tī萬國中做話柄受譏刺；koh Góa ūi ka-kī ê miâ só͘ hun-piat chòe-sèng chit keng tiān, iā beh tùi Góa ê bīn-chêng khì-sak--i, hō͘ i tī bān-kok tiong chòe ōe-pìⁿ siū ki-chhì;

21Chit間殿雖然真高，將來經過ê人beh gông-ngia̍h，講，耶和華啥事án-ni款待chit-ê地，chit間殿ah？chit keng tiān sui-jiân chin koâiⁿ, chiong-lâi keng-kè ê lâng beh gông-ngia̍h, kóng, Iâ-hô-hoa siáⁿ-sū án-ni khoán-thāi chit ê tōe, chit keng tiān ah?

22就beh應講，是因為in棄sak耶和華in列祖ê上帝，就是chhōa in出埃及地ê，去結聯別ê上帝，服事敬拜in，所以耶和華hō͘這一切ê災厄臨到in。Chiū beh ìn kóng, Sī in-ūi in khì-sak Iâ-hô-hoa in lia̍t-chó͘ ê Siōng-tè, chiū-sī chhōa in chhut Ai-ki̍p-tōe--ê, khì kiat-liân pa̍t ê siōng-tè, ho̍k-sāi kèng-pài in, só͘-í Iâ-hô-hoa hō͘ che it-chhè ê chai-ē lîm-kàu in.

1到二十年尾，就是所羅門起耶和華ê殿kap王宮完工ê時，Kàu jī-cha̍p-nî bé, chiū-sī Só͘-lô-bûn khí Iâ-hô-hoa ê tiān kap ông-kiong oân-kang ê sî,

2所羅門koh起Hō͘-lân所hō͘所羅門hiah-ê城，hō͘以色列人tòa tī-hia。Só͘-lô-bûn koh khí Hō͘-lân só͘ hō͘ Só͘-lô-bûn hiah ê siâⁿ, hō͘ Í-sek-lia̍t lâng tòa tī-hia.

3所羅門去到Hap-má-só-pa，攻取伊。Só͘-lô-bûn khì kàu Hap-má-só-pa, kong-chhú i.

4伊koh tī曠野起Ta̍t-bo̍k，kap tī Hap-má所起hiah-ê府庫ê城；I koh tī khòng-iá khí Ta̍t-bo̍k, kap tī Hap-má só͘ khí hiah ê hú-khò͘ ê siâⁿ;

5koh起頂Pek-hô-lûn，下Pek-hô-lûn，是險要ê城，有牆，有門，有栱；koh khí téng Pek-hô-lûn, ē Pek-hô-lûn, sī hiám-iàu ê siâⁿ, ū chhiûⁿ, ū mn̂g, ū kông;

6koh起Pa-la̍h kap所羅門所有府庫ê城，kap hē車 ê城，kap馬兵ê城，kap所羅門tī耶路撒冷，tī Lī-pa-lùn，kap tī伊所治理ê全地，為家己ê快樂所ài起ê，lóng起伊。koh khí Pa-la̍h kap Só͘-lô-bûn só͘ ū hú-khò͘ ê siâⁿ, kap hē chhia ê siâⁿ, kap bé-peng ê siâⁿ, kap Só͘-lô-bûn tī Iâ-lō͘-sat-léng, tī Lī-pa-lùn, kap tī i só͘ tī-lí ê choân-tōe, ūi ka-kī ê khoài-lo̍k só͘ ài khí ê, lóng khí--i.

7論到所chhun ê百姓，Hek人、A-mô͘-lī人、Pí-lī-sé人、Hi-bī人、Iâ-pò͘-su人，m̄是屬tī以色列ê，Lūn-kàu só͘ chhun ê peh-sìⁿ, Hek lâng, A-mô͘-lī lâng, Pí-lī-sé lâng, Hi-bī lâng, Iâ-pò͘-su lâng, m̄-sī sio̍k tī Í-sek-lia̍t ê,

8就是tī chit地方in所chhun ê後裔，以色列人無一盡滅ê，所羅門派in做苦工到今á日；chiū-sī tī chit tōe-hng in só͘ chhun ê hō͘-è, Í-sek-lia̍t lâng bô it-chīn bia̍t--ê, Só͘-lô-bûn phài in chòe khó͘-kang kàu kin-á-ji̍t;

9總是以色列人所羅門無hō͘ in做奴僕，做伊ê工；是做伊ê戰士，軍長ê首領，車長、馬兵長。chóng-sī Í-sek-lia̍t lâng Só͘-lô-bûn bô hō͘ in chòe lô͘-po̍k, chòe i ê kang; sī chòe i ê chiàn-sū, kun-tiúⁿ ê siú-léng, chhia-tiúⁿ, bé-peng-tiúⁿ.

10所羅門王ê大官管理百姓ê，兩百五十人。Só͘-lô-bûn ông ê tōa-koaⁿ koán-lí peh-sìⁿ--ê, nn̄g-pah gō͘-cha̍p lâng.

11所羅門帶法老ê cha-bó͘-kiáⁿ tùi大衛ê城上到伊所kā伊起ê厝；因為講，我ê bó͘ m̄-thang khiā起tī以色列王大衛ê厝；因為耶和華ê櫃所到ê所在lóng是聖地。Só͘-lô-bûn tòa Hoat-ló ê cha-bó͘-kiáⁿ tùi Tāi-pi̍t ê siâⁿ chiūⁿ kàu i só͘ kā i khí ê chhù; in-ūi kóng, Góa ê bó͘ m̄-thang khiā-khí tī Í-sek-lia̍t ông Tāi-pi̍t ê chhù; in-ūi Iâ-hô-hoa ê kūi só͘ kàu ê só͘-chāi lóng sī sèng-tōe.

12所羅門tī耶和華ê壇，就是tī léng廊ê頭前所起ê，獻燒祭hō͘耶和華，Só͘-lô-bûn tī Iâ-hô-hoa ê tôaⁿ, chiū-sī tī léng-lông ê thâu-chêng só͘ khí--ê, hiàn sio-chè hō͘ Iâ-hô-hoa,

13照摩西所命令，tī安歇日，月ê初一，一年三pái所定tio̍h ê節，就是除酵節、七七節、搭寮á節，照ta̍k日所應該獻ê來獻。chiàu Mô͘-se só͘ bēng-lēng, tī an-hioh-ji̍t, ge̍h ê chhoe-it, chi̍t-nî saⁿ-pái só͘ tiāⁿ-tio̍h ê choeh, chiū-sī tû-kàⁿ-choeh, chhit-chhit-choeh, tah-liâu-á choeh, chiàu ta̍k-ji̍t só͘ eng-kai hiàn--ê lâi hiàn.

14Koh照伊ê老父大衛ê例，定tio̍h祭司ê班列來做伊ê工；koh定tio̍h利未人盡in ê職，hō͘ in o-ló，koh tī祭司ê面前服事，照ta̍k日所應該做ê；koh設立顧門ê，照in ê班列，tī ta̍k-ê門；這是上帝ê奴僕大衛所命令ê。Koh chiàu i ê lāu-pē Tāi-pi̍t ê lē, tiāⁿ-tio̍h chè-si ê pan-lia̍t lâi chòe i ê kang; koh tiāⁿ-tio̍h Lī-bī lâng chīn in ê chit, hō͘ in o-ló, koh tī chè-si ê bīn-chêng ho̍k-sāi, chiàu ta̍k-ji̍t só͘ eng-kai chòe--ê; koh siat-li̍p kò͘-mn̂g--ê, chiàu in ê pan-lia̍t, tī ta̍k ê mn̂g; che sī Siōng-tè ê lô͘-po̍k Tāi-pi̍t só͘ bēng-lēng--ê.

15王所命令hiah-ê祭司kap利未人，無論管府庫，á是別項事，in lóng無違逆。Ông só͘ bēng-lēng hiah ê chè-si kap Lī-bī lâng, bô-lūn koán hú-khò͘, á-sī pa̍t-hāng sū, in lóng bô ûi-ke̍h.

16所羅門起耶和華ê殿，tùi hē地基到成功ê日，工料lóng事先備辦。Án-ni耶和華ê殿lóng起好。Só͘-lô-bûn khí Iâ-hô-hoa ê tiān, tùi hē tōe-ki kàu sêng-kong ê ji̍t, kang-liāu lóng tāi-seng pī-pān. Án-ni Iâ-hô-hoa ê tiān lóng khí-hó.

17Hit時所羅門去Í-tong地，到tī海墘ê Í-sûn-ka-piat kap以諾。Hit-sî Só͘-lô-bûn khì Í-tong tōe, kàu tī hái-kîⁿ ê Í-sûn-ka-piat kap Í-lo̍k.

18Hō͘-lân託伊ê奴僕，差船隻kap知影海路ê奴僕，到伊hia。In kap所羅門ê奴僕到Gô-hui；tùi-hia得tio̍h金四百五十tha-liân-tek，運到所羅門王hia。Hō͘-lân thok i ê lô͘-po̍k, chhe chûn-chiah kap chai-iáⁿ hái-lō͘ ê lô͘-po̍k, kàu i hia. In kap Só͘-lô-bûn ê lô͘-po̍k kàu Gô-hui; tùi-hia tit-tio̍h kim sì-pah gō͘-cha̍p tha-liân-tek, ūn-kàu Só͘-lô-bûn ông hia.

1Sī-pa ê女王聽見所羅門ê名聲，就到耶路撒冷，beh用oh得解明ê事試所羅門；tè伊ê人真chōe，有駱駝載香料，kap黃金真chōe，也有寶石；伊見所羅門ê時，就將心內一切所存ê，kap伊講。Sī-pa ê lú-ông thiaⁿ-kìⁿ Só͘-lô-bûn ê miâ-siaⁿ, chiū kàu Iâ-lō͘-sat-léng, beh ēng oh-tit kóe-bêng ê sū chhì Só͘-lô-bûn; tè i ê lâng chin chōe, ū lo̍k-tô chài hiuⁿ-liāu, kap n̂g-kim chin-chōe, iā ū pó-chio̍h; i kìⁿ Só͘-lô-bûn ê sî, chiū chiong sim-lāi it-chhè só͘ chûn ê, kap i kóng.

2所羅門照伊所問ê，lóng應伊，無一項所羅門bōe曉得thang kā伊講。Só͘-lô-bûn chiàu i só͘ mn̄g ê, lóng ìn i, bô chi̍t-hāng Só͘-lô-bûn bōe hiáu-tit thang kā i kóng.

3Sī-pa女王看見所羅門ê智慧，kap伊所起ê厝，Sī-pa lú-ông khòaⁿ-kìⁿ Só͘-lô-bûn ê tì-hūi, kap i só͘ khí ê chhù,

4桌頂ê食物，人臣排列teh坐，奴僕跟隨服事，以及in ê衣服kap伊ê酒政，以及in ê衣服，koh看見伊chi運耶和華殿ê崎á，就魂不附體。toh-téng ê chia̍h-mi̍h, jîn-sîn pâi-lia̍t teh-chē, lô͘-po̍k kun-sûi ho̍k-sāi, í-ki̍p in ê i-ho̍k kap i ê chiú-chèng, í-ki̍p in ê i-ho̍k, koh khòaⁿ-kìⁿ i chiūⁿ Iâ-hô-hoa tiān ê kiā-á, chiū hûn put-hū-thé.

5伊對王講，我tī本國聽見你ê tāi-chì，kap你ê智慧，lóng是真實。I tùi ông kóng, Góa tī pún-kok thiaⁿ-kìⁿ lí ê tāi-chì, kap lí ê tì-hūi, lóng sī chin-si̍t.

6總是我m̄信伊n ê話，到我來親目看；看ah，你ê智慧ê大，人所kā我講ê iáu無一半；你贏過我所聽見ê名聲。Chóng-sī góa m̄-sìn in ê ōe, kàu góa lâi chhin-ba̍k khòaⁿ; khòaⁿ ah, lí ê tì-hūi ê tōa, lâng só͘ kā góa kóng-ê iáu bô chi̍t-pòaⁿ; lí iâⁿ-kè góa só͘ thiaⁿ-kìⁿ ê miâ-siaⁿ.

7福氣ah，你ê人，福氣ah，你ê奴僕，常常khiā tī你ê面前聽你ê智慧。Hok-khì ah, lí ê lâng, hok-khì ah, lí ê lô͘-po̍k, siông-siông khiā tī lí ê bīn-chêng thiaⁿ lí ê tì-hūi.

8耶和華你ê上帝是應該o-ló ê，伊歡喜你，hō͘你坐伊ê位，thang為tio̍h耶和華你ê上帝做王；因為你ê上帝疼以色列，ài永遠堅固伊，所以設立你做in ê王，hō͘你秉公行義。Iâ-hô-hoa lí ê Siōng-tè sī eng-kai o-ló ê, I hoaⁿ-hí lí, hō͘ Lí chē I ê ūi, thang ūi-tio̍h Iâ-hô-hoa lí ê Siōng-tè chòe ông; in-ūi lí ê Siōng-tè thiàⁿ Í-sek-lia̍t, ài éng-oán kian-kò͘--i, só͘-í siat-li̍p lí chòe in ê ông, hō͘ lí péng-kong kiâⁿ-gī.

9女王用一百二十tha-liân-tek ê金，kap chōe-chōe香料，kap寶石，送王；bē-bat有香料親像Sī-pa女王送所羅門王ê。Lú-ông ēng chi̍t-pah jī-cha̍p tha-liân-tek ê kim, kap chōe-chōe hiuⁿ-liāu, kap pó-chio̍h, sàng ông; bē-bat ū hiuⁿ-liāu chhin-chhiūⁿ Sī-pa lú-ông sàng Só͘-lô-bûn ông ê.

10Hō͘-lân ê奴僕，kap所羅門ê奴僕，tùi Gô-hui帶金來ê；koh帶檀香柴kap寶石來。Hō͘-lân ê lô͘-po̍k, kap Só͘-lô-bûn ê lô͘-po̍k, tùi Gô-hui tòa kim lâi--ê; koh tòa tôaⁿ-hiuⁿ-chhâ kap pó-chio̍h lâi.

11王用檀香柴為耶和華ê殿kap王宮做欗杆；koh為唱歌ê人做琴kap瑟。Tī猶大地前bē-bat看見親像chit號。Ông ēng tôaⁿ-hiuⁿ-chhâ ūi Iâ-hô-hoa ê tiān kap ông-kiong chòe lân-kan; koh ūi chhiùⁿ-koa ê lâng chòe khîm kap sek. Tī Iû-tāi tōe chêng bē-bat khòaⁿ-kìⁿ chhin-chhiūⁿ chit-hō.

12所羅門王，tī Sī-pa女王所帶來送王ê以外，koh照伊一切所ài所求ê，lóng hō͘伊。Tùi án-ni，女王kap伊ê人臣倒tńg去伊ê本國。Só͘-lô-bûn ông, tī Sī-pa lú-ông só͘ tòa lâi sàng ông--ê í-gōa, koh chiàu i it-chhè só͘ ài só͘ kiû--ê, lóng hō͘ i. Tùi án-ni lú-ông kap i ê jîn-sîn tò-tńg-khì i ê pún-kok.

13所羅門ta̍k年所得tio̍h ê金共六百六十六tha-liân-tek；Só͘-lô-bûn ta̍k-nî só͘ tit-tio̍h ê kim kiōng la̍k-pah la̍k-cha̍p-la̍k tha-liân-tek;

14以外iáu有seng-lí人kap客商所帶來ê；koh阿拉伯列王，以及國內ê首領，lóng帶金銀來hō͘所羅門。í-gōa iáu ū seng-lí lâng kap kheh-siong só͘ tòa--lâi-ê; koh A-la̍h-pek lia̍t-ông, í-ki̍p kok-lāi ê siú-léng, lóng tòa kim-gûn lâi hō͘ Só͘-lô-bûn.

15所羅門王用過phah ê金做大牌兩百面，每面大牌ê金六百sià-khek-le̍k；Só͘-lô-bûn ông ēng kè-phah ê kim chòe tōa-pâi nn̄g-pah bīn, múi-bīn tōa-pâi ê kim la̍k-pah sià-khek-le̍k;

16koh用過phah ê金做屏牌三百面，每面用金三百sià-khek-le̍k；王hē伊tī黎巴嫩樹林ê厝。koh ēng kè-phah ê kim chòe pîn-pâi saⁿ-pah bīn, múi-bīn ēng kim saⁿ-pah sià-khek-le̍k; ông hē i tī Lī-pa-lùn chhiū-nâ ê chhù.

17王koh用象牙做一個大寶座，用好金安伊；Ông koh ēng chhiūⁿ-gê chòe chi̍t-ê tōa pó-chō, ēng hó-kim an i;

18寶座有六層ê崎á，koh有金ê腳踏椅，kap寶座相連；雙pêng有靠手，靠手邊有兩隻獅khiā-teh。pó-chō ū la̍k-chàn ê kiā-á, koh ū kim ê kha-ta̍h-í, kap pó-chō saⁿ-liân; siang-pêng ū khò-chhiú, khò-chhiú-piⁿ ū nn̄g chiah sai khiā-teh.

19Koh有十二隻獅，khiā tī六層崎á ê chit-pêng kap hit-pêng；別國lóng無製造親像án-ni。Koh ū cha̍p-jī chiah sai, khiā tī la̍k-chàn kiā-á ê chit-pêng kap hit-pêng; pa̍t-kok lóng bô chè-chō chhin-chhiūⁿ án-ni.

20所羅門王一切lim ê器具lóng是金ê；黎巴嫩樹林ê厝一切ê器具也是好金ê；所羅門ê年間，人看銀做無物。Só͘-lô-bûn ông it-chhè lim ê khì-kū lóng sī kim--ê; Lī-pa-lùn chhiū-nâ ê chhù it-chhè ê khì-kū iā sī hó-kim--ê; Só͘-lô-bûn ê nî-kan, lâng khòaⁿ gûn chòe bô mi̍h.

21因為王ê船隻kap Hō͘-lân ê奴僕相kap去Tha-si；chiah-ê Tha-si ê船載金、銀、象牙、猴、孔雀，三年tò來一pái。In-ūi ông ê chûn-chiah kap Hō͘-lân ê lô͘-po̍k saⁿ-kap khì Tha-si; chiah ê Tha-si ê chûn chài kim, gûn, chhiūⁿ-gê, kâu, khóng-chhiok, saⁿ-nî tò-lâi chi̍t-pái.

22所羅門王ê好額kap智慧贏過天下列王。Só͘-lô-bûn ông ê hó-gia̍h kap tì-hūi iâⁿ-kè thiⁿ-ē lia̍t-ông.

23天下列王lóng來ài見所羅門ê面，聽伊ê智慧，就是上帝賞賜tī伊ê心ê。Thiⁿ-ē lia̍t-ông lóng lâi ài kìⁿ Só͘-lô-bûn ê bīn, thiaⁿ i ê tì-hūi, chiū-sī Siōng-tè siúⁿ-sù tī i ê sim--ê.

24In ta̍k-ê帶進貢ê物；就是銀器、金器、衣服、軍器、香料、馬，kap騾，ta̍k年有定tio̍h ê例。In ta̍k-ê tòa chìn-kòng ê mi̍h; chiū-sī gûn-khì, kim-khì, i-ho̍k, kun-khì, hiuⁿ-liāu, bé, kap lô, ta̍k-nî ū tiāⁿ-tio̍h ê lē.

25所羅門為tio̍h馬kap車，有馬寮(tiâu)四千，koh有馬兵一萬兩千，安置in tī hiah-ê囤車ê城，也kap王tī耶路撒冷。Só͘-lô-bûn ūi-tio̍h bé kap chhia, ū bé-tiâu sì-chheng, koh ū bé-peng chi̍t-bān nn̄g-chheng, an-tì in tī hiah ê tún chhia ê siâⁿ, iā kap ông tī Iâ-lō͘-sat-léng.

26所羅門管轄列王，tùi大河到腓利士地，到埃及ê交界。Só͘-lô-bûn koán-hat lia̍t-ông, tùi Tōa-hô kàu Hui-lī-sū tōe, kàu Ai-ki̍p ê kau-kài.

27王tī耶路撒冷hō͘銀做親像石頭，hō͘柏香樹親像平洋ê桑材樹，是因為真chōe。Ông tī Iâ-lō͘-sat-léng hō͘ gûn chòe chhin-chhiūⁿ chio̍h-thâu, hō͘ pek-hiuⁿ-chhiū chhin-chhiūⁿ pîⁿ-iûⁿ ê sng-châi-chhiū, sī in-ūi chin-chōe.

28有人帶馬tùi埃及，tùi ta̍k所在，來hō͘所羅門。Ū lâng tòa bé tùi Ai-ki̍p, tùi ta̍k só͘-chāi, lâi hō͘ Só͘-lô-bûn.

29所羅門其餘ê事，tùi頭到尾，kiám無記tī先知Ná-tan ê冊，kap Sī-lô人A-hi-ngá先知ê冊，kap先見E̍k-to默示ê冊，論Nî-pat ê kiáⁿ Iâ-lô-phò-àm-ê mah？Só͘-lô-bûn kî-û ê sū, tùi thâu kàu bé, kiám bô kì tī sian-ti Ná-tan ê chheh, kap Sī-lô lâng A-hi-ngá sian-ti ê chheh, kap sian-kiàn E̍k-to be̍k-sī ê chheh, lūn Nî-pat ê kiáⁿ Iâ-lô-phò-àm--ê mah?

30所羅門tī耶路撒冷做以色列全國ê王，共四十年。Só͘-lô-bûn tī Iâ-lō͘-sat-léng chòe Í-sek-lia̍t choân-kok ê ông, kiōng sì-cha̍p nî.

31所羅門kap伊ê列祖同睏，埋葬tī伊ê老父大衛ê城。伊ê kiáⁿ Lô-phò-àm續接伊做王。Só͘-lô-bûn kap i ê lia̍t-chó͘ tâng-khùn, bâi-chòng tī i ê lāu-pē Tāi-pi̍t ê siâⁿ. I ê kiáⁿ Lô-phò-àm sòa-chiap i chòe ông.