1我保羅，saⁿ見面ê時就tī lín中間做卑微，saⁿ離開ê時就ǹg lín做好膽ê，taⁿ用基督ê溫柔純良家己勸lín；Góa Pó-lô, saⁿ kìⁿ-bīn ê sî chiū tī lín tiong-kan chòe pi-bî, saⁿ lī-khui ê sî chiū ǹg lín chòe hó-táⁿ ê, taⁿ ēng Ki-tok ê un-jiû sûn-liông ka-kī khǹg lín;

2有人phah算阮是照肉體來行，我phah算決意tio̍h用好膽來辦in；求lín莫得hō͘我tī saⁿ對面ê時有chit號決意ê好膽。ū lâng phah-sǹg goán sī chiàu jio̍k-thé lâi kiâⁿ, góa phah-sǹg koat-ì tio̍h ēng hó-táⁿ lâi pān in; kiû lín bo̍h-tit hō͘ góa tī saⁿ tùi-bīn ê sî ū chit hō koat-ì ê hó-táⁿ.

3因為阮雖然tī肉體來行，m̄是照肉體來交戰，In-ūi goán sui-jiân tī jio̍k-thé lâi kiâⁿ, m̄ sī chiàu jio̍k-thé lâi kau-chiàn,

4(因為阮交戰ê器具m̄是屬tī肉體，是tī上帝ê面前有氣力夠額thang來攻破chiah-ê堅固ê營寨)，(in-ūi goán kau-chiàn ê khì-kū m̄ sī sio̍k tī jio̍k-thé, sī tī Siōng-tè ê bīn-chêng ū khùi-la̍t kàu-gia̍h thang lâi kong-phòa chiah ê kian-kò͘ ê iâⁿ-chē),

5凡若chiah-ê計謀，以及lóng總高高ê物，所舉起來阻擋人bat上帝ê，阮lóng毀壞伊，將lóng總ê念頭掠來hō͘伊順服基督；hoān-nā chiah ê kè-bô͘, í-ki̍p lóng-chóng koâiⁿ-koâiⁿ ê mi̍h, só͘ kú-khí lâi chó͘-tòng lâng bat Siōng-tè ê, goán lóng húi-hoāi i, chiong lóng-chóng ê liām-thâu lia̍h lâi hō͘ i sūn-ho̍k Ki-tok;

6koh已經備辦便，thèng候lín完全順服，chiah來責罰lóng總ê無順服ê。koh í-keng pī-pān piān, thèng-hāu lín oân-choân sūn-ho̍k, chiah lâi chek-hoa̍t lóng-chóng ê bô sūn-ho̍k ê.

7Lín看目前ah，若有人靠家己是屬基督ê，伊tio̍h koh家己想，看伊怎樣屬基督，阮也是án-ni。Lín khòaⁿ ba̍k-chêng ah. Nā ū lâng khò ka-kī sī sio̍k Ki-tok ê, i tio̍h koh ka-kī siūⁿ, khòaⁿ i cháiⁿ-iūⁿ sio̍k Ki-tok, goán iā sī án-ni.

8主所賞賜阮ê權是beh建立lín，m̄是beh敗壞lín，阮就若為tio̍h chit-ê權略á過頭誇口，也不致見笑；Chú só͘ siúⁿ-sù goán ê koân sī beh kiàn-li̍p lín, m̄ sī beh pāi-hoāi lín, goán chiū nā ūi-tio̍h chit ê koân lio̍h-á kè-thâu khoa-kháu, iā put-tì kiàn-siàu;

9免得我親像用phoe hō͘ lín驚。bián-tit góa chhin-chhiūⁿ ēng phoe hō͘ lín kiaⁿ.

10因為有人講，伊ê phoe tēng-tiōng，koh有力；但是saⁿ對面ê時，身軀軟chiáⁿ，講話俗俗。In-ūi ū lâng kóng, I ê phoe tēng-tiōng, koh ū la̍t; nā-sī saⁿ tùi-bīn ê sî, seng-khu nńg-chiáⁿ, kóng ōe sio̍h-sio̍h.

11Hit號人tio̍h想，阮saⁿ離開ê時，phoe裡講話是甚麼款，saⁿ對面ê時做事也是án-ni。Hit hō lâng tio̍h siūⁿ, goán saⁿ lī-khui ê sî, phoe-ni̍h kóng ōe sī sím-mi̍h khoán, saⁿ tùi-bīn ê sî chòe sū iā sī án-ni.

12有人家己o-ló，阮m̄敢kap in掠平，kap in比並；但是in用家己批評家己，也用家己比並家己，是無知識。Ū lâng ka-kī o-ló, goán m̄ káⁿ kap in lia̍h pîⁿ, kap in pí-phēng; nā-sī in ēng ka-kī phoe-phêng ka-kī, iā ēng ka-kī pí-phēng ka-kī, sī bô tì-sek.

13但是阮無beh誇口過份ê事，就是照上帝所派hō͘阮限定ê份額；chit-ê份額lín也在內。Nā-sī goán bô beh khoa-kháu kè-hūn ê sū, chiū-sī chiàu Siōng-tè só͘ phài hō͘ goán hān-tiāⁿ ê hūn-gia̍h; chit ê hūn-gia̍h lín iā chāi-lāi.

14因為阮m̄是pôaⁿ過份，ná親像m̄應該到tī lín ê；是阮傳基督ê福音也bat到tī lín。In-ūi goán m̄ sī pôaⁿ-kè hūn, ná chhin-chhiūⁿ m̄ eng-kai kàu tī lín ê; sī goán thoân Ki-tok ê hok-im iā bat kàu tī lín.

15阮m̄是過份來誇口別人ê tio̍h磨；就是ǹg望lín信ná深，就阮tī lín中間照我ê份額，會開闊到滿出去，Goán m̄ sī kè-hūn lâi khoa-kháu pa̍t lâng ê tio̍h-bôa; chiū-sī ǹg-bāng lín sìn ná chhim, chiū goán tī lín tiong-kan chiàu góa ê hūn-gia̍h, ōe khui-khoah kàu móa-chhut-khì,

16來傳福音到tī lín界外ê地；無用別人份內已經做便ê事來誇口。lâi thoân hok-im kàu tī lín kài-gōa ê tōe; bô ēng pa̍t lâng hūn-lāi í-keng chòe piān ê sū lâi khoa-kháu.

17誇口ê人tio̍h用主來誇口。Khoa-kháu ê lâng tio̍h ēng Chú lâi khoa-kháu.

18因為m̄是家己o-ló ê人上取，就是主所o-ló ê上取。In-ūi m̄ sī ka-kī o-ló ê lâng chiūⁿ chhú, chiū-sī Chú só͘ o-ló ê chiūⁿ chhú.

1願lín容允我小khóa ê戇；其實lín無m̄容允我。Goān lín iông-ún góa sió-khóa ê gōng; kî-si̍t lín bô m̄ iông-ún góa.

2因為我將上帝ê熱心，為tio̍h lín來熱心；因為我bat聘定lín hō͘一個丈夫，beh將lín做貞節ê在室女，獻hō͘基督。In-ūi góa chiong Siōng-tè ê jia̍t-sim, ūi-tio̍h lín lâi jia̍t-sim; in-ūi góa bat phèng-tiāⁿ lín hō͘ chi̍t ê tiōng-hu, beh chiong lín chòe cheng-chiat ê chāi-sek-lú, hiàn hō͘ Ki-tok.

3總是我驚了lín ê心思敗壞，無純全清潔來ǹg基督，親像蛇用伊ê詭譎引誘夏娃一樣。Chóng-sī góa kiaⁿ-liáu lín ê sim-su pāi-hoāi, bô sûn-choân chheng-kiat lâi ǹg Ki-tok, chhin-chhiūⁿ chôa ēng i ê khúi-khiat ín-iú Hā-oa chi̍t iūⁿ.

4若有人來傳別個耶穌，阮所未bat傳ê，á是lín受tio̍h各樣ê神，前所未bat受tio̍h ê，á是各樣ê福音，前所未bat承受ê，lín容允伊，好。Nā ū lâng lâi thoân pa̍t ê Iâ-so͘, goán só͘ bē bat thoân ê, á-sī lín siū-tio̍h koh-iūⁿ ê sîn, chêng só͘ bē bat siū-tio̍h ê, á-sī koh-iūⁿ ê hok-im, chêng só͘ bē bat sêng-siū ê, lín iông-ún i, hó.

5因為我phah算我lóng無khah輸tī hiah-ê上等ê使徒。In-ūi góa phah-sǹg góa lóng bô khah su tī hiah ê siōng-téng ê sù-tô͘.

6我講話雖然俗俗，但是知識kú m̄是án-ni；因為阮凡事有tùi lín顯明chit-ê tī眾人中。Góa kóng-ōe sui-jiân sio̍h-sio̍h, nā sī tì-sek kú m̄ sī án-ni; in-ūi goán hoān sū ū tùi lín hián-bêng chit-ê tī chèng lâng tiong.

7Á是我家己屈低，hō͘ lín升高，無the̍h所費，白白傳上帝ê福音hō͘ lín，這kiám是犯罪mah？Á-sī góa ka-kī khut-kē, hō͘ lín seng koâiⁿ, bô the̍h só͘-hùi, pe̍h-pe̍h thoân Siōng-tè ê hok-im hō͘ lín, che kiám sī hoān-chōe mah?

8我搶別個教會，the̍h in ê束脩，來服事lín。Góa chhiúⁿ pa̍t ê kàu-hōe, the̍h in ê sok-siu, lâi ho̍k-sāi lín.

9我kap lín tī-teh ê時用無夠，未bat連-l位-tio̍h lín一人；因為tùi馬其頓來ê兄弟補足我ê欠缺；我凡事家己守，無拖thūi lín；後來也beh家己守。Góa kap lín tī-teh ê sî ēng bô kàu, bē bat liân-lūi-tio̍h lín chi̍t lâng; in-ūi tùi Má-kî-tùn lâi ê hiaⁿ-tī pó͘-chiok góa ê khiàm-kheh; góa hoān sū ka-kī siú, bô thoa-thūi lín; āu-lâi iā beh ka-kī siú.

10基督ê真實既然tī我就tī A-kai-a chiah-ê地方，無人會阻止我chit號ê誇口。Ki-tok ê chin-si̍t kì-jiân tī góa chiū tī A-kai-a chiah ê tōe-hng, bô lâng ōe chó͘-chí góa chit hō ê khoa-kháu.

11是甚麼緣故？是我無疼lín mah？上帝知lah。Sī sím-mi̍h iân-kò͘? sī góa bô thiàⁿ lín mah? Siōng-tè chai lah.

12總是我所行ê猶原beh行伊，beh絕斷hiah-ê chhē機會ê人ê機會，hō͘ in tī in所誇口ê，究竟kap阮無各樣。Chóng-sī góa só͘ kiâⁿ ê iû-goân beh kiâⁿ i, beh choa̍t-tn̄g hiah ê chhē ki-hōe ê lâng ê ki-hōe, hō͘ in tī in só͘ khoa-kháu ê, kiù-kèng kap goán bô koh-iūⁿ.

13因為hit號人是假使徒，行tāi-chì奸詐，家己裝做基督ê使徒。In-ūi hit hō lâng sī ké sù-tô͘, kiâⁿ tāi-chì kan-chà, ka-kī chng-chòe Ki-tok ê sù-tô͘.

14這也無奇怪；因為撒旦也家己裝做光明ê天使。Che iā bô kî-koài; in-ūi Sat-tàn iā ka-kī chng-chòe kng-bêng ê thiⁿ-sài.

15所以伊ê差用家己裝親像義ê差用，這也m̄是大事。In ê結局beh照in ê所行。Só͘-í i ê chhe-ēng ka-kī chng chhin-chhiūⁿ gī ê chhe-ēng, che iā m̄ sī tōa sū. In ê kiat-kio̍k beh chiàu in ê só͘ kiâⁿ.

16我koh講，人m̄-thang看我做戇；總是若án-ni，就tio̍h猶原接納我親像戇，hō͘我也thang略略á誇口。Góa koh kóng, lâng m̄ thang khòaⁿ góa chòe gōng; chóng-sī nā án-ni, chiū tio̍h iû-goân chiap-la̍p góa chhin-chhiūⁿ gōng, hō͘ góa iā thang lio̍h-lio̍h-á khoa-kháu.

17我taⁿ所講ê m̄是照主來講；是親像戇，大膽來誇口。Góa taⁿ só͘ kóng ê m̄ sī chiàu Chú lâi kóng; sī chhin-chhiūⁿ gōng, tōa táⁿ lâi khoa-kháu.

18既然有chōe-chōe人照肉體來誇口，就我也beh誇口。Kì-jiân ū chōe-chōe lâng chiàu jio̍k-thé lâi khoa-kháu, chiū góa iā beh khoa-kháu.

19Lín既然是知識ê人，就歡喜容允戇ê人。Lín kì-jiân sī tì-sek ê lâng, chiū hoaⁿ-hí iông-ún gōng ê lâng.

20設使有人款待lín做奴僕，吞咬lín，掠lín，自高，siàn lín ê面，lín就容允伊。Siat-sú ū lâng khoán-thāi lín chòe lô͘-po̍k, thun-kā lín, lia̍h lín, chū-ko, siàn lín ê bīn, lín chiū iông-ún i.

21我講án-ni是無體面，ná親像阮前是軟chiáⁿ。總是人tī甚麼tāi-chì好膽，我也好膽；我講chit句是戇話。Góa kóng án-ni sī bô thé-biān, ná chhin-chhiūⁿ goán chêng sī nńg-chiáⁿ. Chóng-sī lâng tī sím-mi̍h tāi-chì hó-táⁿ, góa iā hó-táⁿ; góa kóng chit kù sī gōng ōe.

22In是希伯來人mah？我也是。In是以色列人mah？我也是。In是亞伯拉罕ê後裔mah？我也是。In sī Hi-pek-lâi lâng mah? góa iā sī. In sī Í-sek-lia̍t lâng mah? góa iā sī. In sī A-pek-la̍h-hán ê hō͘-è mah? góa iā sī.

23In是基督ê差用mah？我koh-khah是；(我親像狂teh講。) 我tio̍h磨iáu khah-chōe，關落監也khah-chōe，受phah到bōe算得，chōe-chōe pái險險死。In sī Ki-tok ê chhe-ēng mah? Góa koh khah sī; (góa chhin-chhiūⁿ kông teh kóng.) Góa tio̍h-bôa iáu khah chōe, koaiⁿ-lo̍h kaⁿ iā khah chōe, siū phah kàu bōe sǹg tit, chōe-chōe pái hiám-hiám sí.

24我hō͘猶太人phah五pái，每pái四十下減一下。Góa hō͘ Iû-thài lâng phah gō͘ pái, múi pái sì-cha̍p ē kiám chi̍t ē.

25三pái受柺á phah，一pái受tio̍h石頭tìm，三pái tú-tio̍h船破，一日一暝tī深海；Saⁿ pái siū koáiⁿ-á phah, chi̍t pái siū-tio̍h chio̍h-thâu tìm, saⁿ pái tú-tio̍h chûn-phòa, chi̍t ji̍t chi̍t mî tī chhim hái;

26常常le̍k路，tú-tio̍h 江河ê危險，賊馬ê危險，本族ê危險，外邦ê危險，城內ê危險，曠野ê危險，海面ê危險，假兄弟ê危險；siông-siông le̍k-lō͘, tú-tio̍h kang-hô ê gûi-hiám, chha̍t-bé ê gûi-hiám, pún-cho̍k ê gûi-hiám, gōa-pang ê gûi-hiám, siâⁿ-lāi ê gûi-hiám, khòng-iá ê gûi-hiám, hái-bīn ê gûi-hiám, ké hiaⁿ-tī ê gûi-hiám;

27受勞碌kap艱苦ta̍uh-ta̍uh無睏，iau kòa嘴乾，ta̍uh-ta̍uh無食，寒kòa thǹg-pak-theh。siū lô-lo̍k kap kan-khó͘ ta̍uh-ta̍uh bô khùn, iau kòa chhùi-ta, ta̍uh-ta̍uh bô chia̍h, kôaⁿ kòa thǹg-pak-theh.

28除去chiah-ê外事，iáu有一項ta̍k日teh我，就是替眾教會掛慮。Tû-khì chiah ê gōa-sū, iáu ū chi̍t hāng ta̍k ji̍t teh góa, chiū-sī thòe chèng kàu-hōe khòa-lū.

29Chī-chūi軟弱，也我無續軟弱ah？Chī-chūi tio̍h-tak，也我ê心無親像火to̍h ah？Chī-chūi loán-jio̍k, iā góa bô sòa loán-jio̍k ah? Chī-chūi tio̍h-tak, iā góa ê sim bô chhin-chhiūⁿ hé to̍h ah?

30我若不得不tio̍h誇口，就beh誇口關係我軟弱ê事。Góa nā put-tek-put tio̍h khoa-kháu, chiū beh khoa-kháu koan-hē góa loán-jio̍k ê sū.

31主耶穌ê上帝，也是伊ê父，永遠thang o-ló ê，知我無白賊。Chú Iâ-so͘ ê Siōng-tè iā sī I ê Pē, éng-oán thang o-ló ê, chai góa bô pe̍h-chha̍t.

32Tī大馬色A-lí-ta̍t王所設ê地方官把守大馬色人ê城beh掠我；Tī Tāi-má-sek A-lí-ta̍t ông só͘ siat ê tōe-hng koaⁿ pé-siú Tāi-má-sek lâng ê siâⁿ beh lia̍h góa;

33但是我tùi窗á，用筐tùi城牆hō͘人lūi落去，脫離伊ê手。nā-sī góa tùi thang-á, ēng kheng tùi siâⁿ-chhiûⁿ hō͘ lâng lūi-lo̍h-khì, thoat-lī i ê chhiú.

1雖然無利益，我不得不tio̍h誇口；我beh講起主ê異象kap啟示。Sui-jiân bô lī-ek, góa put-tek-put tio̍h khoa-kháu; góa beh kóng-khí Chú ê īⁿ-siōng kap khé-sī.

2我bat一人tiàm-tī基督ê，十四年前受帶到第三層天；或是tiàm-tī身軀，我m̄知；或是無tiàm-tī身軀，我也m̄知；上帝知。Góa bat chi̍t lâng tiàm-tī Ki-tok ê, cha̍p-sì nî chêng siū tòa kàu tē saⁿ chàn thiⁿ; he̍k-sī tiàm-tī seng-khu, góa m̄ chai; he̍k-sī bô tiàm-tī seng-khu, góa iā m̄ chai; Siōng-tè chai.

3我bat一個親像chit號ê人，或是tiàm-tī身軀，或是無tī身軀，我m̄知，上帝知；Góa bat chi̍t-ê chhin-chhiūⁿ chit hō ê lâng, he̍k-sī tiàm-tī seng-khu, he̍k-sī bô tī seng-khu, góa m̄ chai, Siōng-tè chai;

4伊受帶到樂園，聽見bōe得thang講ê話，就是人所m̄-thang講ê。i siū tòa kàu Lo̍k-hn̂g, thiaⁿ-kìⁿ bōe tit thang kóng ê ōe, chiū-sī lâng só͘ m̄ thang kóng ê.

5我beh為tio̍h chit號人誇口；但是為tio̍h家己，除我ê軟弱以外，我無beh誇口。Góa beh ūi-tio̍h chit hō lâng khoa-kháu; nā-sī ūi-tio̍h ka-kī, tû góa ê loán-jio̍k í-gōa, góa bô beh khoa-kháu.

6我若ài beh誇口，也m̄是戇，因為我beh講真實；總是我家己約束，驚了人ê評論我khah過頭tī伊所看見我，á是伊tùi我所聽見ê。Góa nā ài beh khoa-kháu, iā m̄ sī gōng, in-ūi góa beh kóng chin-si̍t; chóng-sī góa ka-kī iok-sok, kiaⁿ-liáu lâng ê phêng-lūn góa khah kè-thâu tī i só͘ khòaⁿ-kìⁿ góa, á-sī i tùi góa só͘ thiaⁿ-kìⁿ ê.

7Koh因為chiah-ê啟示ê極大，免得我過頭自高，所以hō͘我肉體內有刺，就是撒旦ê使者來phah我，免得我過頭自高。Koh in-ūi chiah ê khé-sī ê ke̍k tōa, bián-tit góa kè-thâu chū-ko, só͘-í hō͘ góa jio̍k-thé lāi ū chhì, chiū-sī Sat-tàn ê sù-chiá lâi phah góa, bián-tit góa kè-thâu chū-ko.

8為tio̍h án-ni，我三pái求主，hō͘ hit-ê離開我。Ūi-tio̍h án-ni, góa saⁿ pái kiû Chú, hō͘ hit-ê lī-khui góa.

9伊kā我講，有我ê恩，你就夠額；因為我ê氣力是tī人ê軟弱來成。所以我真歡喜，khah ài誇口我chiah-ê軟弱，hō͘基督ê氣力tòa tī我。I kā góa kóng, Ū góa ê un, lí chiū kàu-gia̍h; in-ūi góa ê khùi-la̍t sī tī lâng ê loán-jio̍k lâi chiâⁿ. Só͘-í góa chin hoaⁿ-hí, khah ài khoa-kháu góa chiah ê loán-jio̍k, hō͘ Ki-tok ê khùi-la̍t tòa tī góa.

10所以我為tio̍h基督掠chiah-ê軟弱、欠缺、khún-tio̍k、困迫做歡喜；因為我軟弱ê時，反tńg有氣力。Só͘-í góa ūi-tio̍h Ki-tok lia̍h chiah ê loán-jio̍k, khiàm-kheh, khún-tio̍k, khùn-pek chòe hoaⁿ-hí; in-ūi góa loán-jio̍k ê sî, hoán-tńg ū khùi-la̍t.

11我成做戇，是lín逼tio̍h我；因為我合該tio̍h hō͘ lín o-ló；我雖然無甚麼tī-teh，實在無khah輸hiah-ê上等 ê使徒。Góa chiâⁿ-chòe gōng, sī lín pek-tio̍h góa; in-ūi góa ha̍p-kai tio̍h hō͘ lín o-ló; góa sui-jiân bô sím-mi̍h tī-teh si̍t-chāi bô khah-su hiah ê siōng-téng ê sù-tô͘.

12使徒ê證據，我果然用百般ê吞忍來行tī lín中間，就是chiah-ê兆頭、神蹟、權能。Sù-tô͘ ê chèng-kù, góa kó-jiân ēng pah-poaⁿ ê thun-lún lâi kiâⁿ tī lín tiong-kan, chiū-sī chiah ê tiāu-thâu, sîn-jiah, koân-lêng.

13除去chit項，我無連累lín，以外，lín iáu有甚麼事m̄值tio̍h其餘ê教會？Chit-ê無公道ê所在，請lín寬恕我。Tû-khì chit hāng, góa bô liân-lūi lín, í-gōa, lín iáu ū sím-mi̍h sū m̄ ta̍t-tio̍h kî-û ê kàu-hōe? Chit ê bô kong-tō ê só͘-chāi, chhiáⁿ lín khoan-sù góa.

14Taⁿ chit-ê是我第三pái備辦便beh去lín hia，也無beh連累lín；我所憶tio̍h ê就是lín，m̄是lín ê物；因為kiáⁿ兒m̄應該kā父母粒積，是父母kā kiáⁿ兒粒積。Taⁿ chit-ê sī góa tē saⁿ pái pī-pān piān beh khì lín hia, iā bô beh liân-lūi lín; góa só͘ it-tio̍h ê chiū-sī lín, m̄ sī lín ê mi̍h; in-ūi kiáⁿ-jî m̄ eng-kai kā pē-bú lia̍p-chek, sī pē-bú kā kiáⁿ-jî lia̍p-chek.

15我真歡喜為tio̍h lín ê靈魂來開費，也費盡家己ê性命；總無我jú疼lín，jú少得tio̍h lín ê疼mah？Góa chin hoaⁿ-hí ūi-tio̍h lín ê lêng-hûn lâi khai-hùi, iā hùi-chīn ka-kī ê sìⁿ-miā; chóng-bô góa jú thiàⁿ lín, jú chió tit-tio̍h lín ê thiàⁿ mah?

16有人講我無拖thūi lín，是我奇巧，用詭譎ê部數來the̍h lín。Ū lâng kóng góa bô thoa-thūi lín, sī góa kî-khiáu, ēng khúi-khiat ê pō͘-sò͘ lâi the̍h lín.

17我所差去lín hia ê人，其中我有bat用甚麼人lut lín ah？Góa só͘ chhe khì lín hia ê lâng, kî-tiong góa ū bat ēng sím-mi̍h lâng lut lín ah?

18我勸提多，也差一個兄弟kap伊去。提多bat lutl ín mah？阮所行kiám m̄是同一個神？同一樣ê腳步mah？Góa khǹg Thê-to, iā chhe chi̍t ê hiaⁿ-tī kap i khì. Thê-to bat lut lín mah? Goán só͘ kiâⁿ kiám m̄ sī tâng chi̍t ê Sîn? tâng chi̍t iūⁿ ê kha-pō͘ mah?

19Lín到taⁿ掠做阮對lín teh分訴，阮tiàm-tī基督，講話tī上帝ê面前。所疼ê兄弟ah，一切ê事lóng是為tio̍h建立lín。Lín kàu taⁿ lia̍h-chòe goán tùi lín teh hun-sò͘. Goán tiàm-tī Ki-tok kóng ōe tī Siōng-tè ê bīn-chêng. Só͘ thiàⁿ ê hiaⁿ-tī ah, it-chhè ê sū lóng sī ūi-tio̍h kiàn-li̍p lín.

20因為我teh驚，驚了我來ê時kiám-chhái tú-tio̍h lín無照我所ài，也lín tú-tio̍h我照lín所m̄ ài；驚了有相爭、怨妒、受氣、結黨、譭謗、講ka-chiah後話、phín-phóng、紛亂，chiah-ê事；In-ūi góa teh kiaⁿ, kiaⁿ-liáu góa lâi ê sî kiám-chhái tú-tio̍h lín bô chiàu góa só͘ ài, iā lín tú-tio̍h góa chiàu lín só͘ m̄ ài; kiaⁿ-liáu ū saⁿ-chiⁿ, oàn-tò͘, siū-khì, kiat-tóng, húi-pòng, kóng ka-chiah-āu ōe, phín-phóng, hun-loān, chiah ê sū;

21也驚了我koh來ê時，我ê上帝hō͘我tī lín ê面前卑微，我也為tio̍h chōe-chōe從前犯罪，也無反悔in所行ê污穢、姦淫、放蕩ê人來憂悶。iā kiaⁿ-liáu góa koh lâi ê sî, góa ê Siōng-tè hō͘ góa tī lín ê bīn-chêng pi-bî, góa iā ūi-tio̍h chōe-chōe chiông-chiân hoān-chōe, iā bô hoán-hóe in só͘ kiâⁿ ê ù-òe, kan-îm, hòng-tōng ê lâng lâi iu-būn.