1阮kap主同tio̍h磨ê亦勸lín m̄-thang空空受上帝ê恩。Goán kap Chú tâng tio̍h-bôa ê ia̍h khǹg lín m̄ thang khang-khang siū Siōng-tè ê un.

2(因為伊講， Tī得tio̍h接納ê時，我有聽你， Tī拯救ê日我有幫贊你；你看，chit-tia̍p是受接納ê時，你看，chit-tia̍p是拯救ê日。)(In-ūi I kóng, Tī tit-tio̍h chiap-la̍p ê sî góa ū thiaⁿ lí, Tī chín-kiù ê ji̍t góa ū pang-chān lí; lí khòaⁿ, chit tia̍p sī siū chiap-la̍p ê sî, lí khòaⁿ, chit tia̍p sī chín-kiù ê ji̍t.)

3阮一概無塞礙人，免得chit-ê職份犯嫌；Goán it-khài bô that-gāi lâng, bián-tit chit ê chit-hūn hoān hiâm;

4就是凡事證明本身合tī做上帝ê差用，是tī chōe-chōe吞忍、患難、chiū-sī hoān sū chèng-bêng pún-sin ha̍p tī chòe Siōng-tè ê chhe-ēng, sī tī chōe-chōe thun-lún, hoān-lān,

5欠缺、困迫、受phah、關監、擾亂、tio̍h磨、無睏、無食、khiàm-kheh, khùn-pek, siū-phah, koaiⁿ-kaⁿ, jiáu-loān, tio̍h-bôa, bô khùn, bô chia̍h,

6廉潔、知識、寬容、仁慈、聖神ê感化、無假ê疼、liâm-kiat, tì-sek, khoan-iông, jîn-chû, Sèng Sîn ê kám-hòa, bô ké ê thiàⁿ,

7真理ê道、上帝ê權能，用義ê 戰器tī左右，chin-lí ê tō, Siōng-tè ê koân-lêng, ēng gī ê chiàn-khì tī chó-iū,

8無論榮光凌辱，pháiⁿ名聲好名聲；親像騙人ê，其實是誠實ê；bô lūn êng-kng lêng-jio̍k, pháiⁿ miâ-siaⁿ hó miâ-siaⁿ; chhin-chhiūⁿ phiàn lâng ê, kî-si̍t sī sêng-si̍t ê;

9親像人m̄知，其實chōe-chōe人知；親像beh死，其實是活；親像受責罰，其實無致到死；chhin-chhiūⁿ lâng m̄ chai, kî-si̍t chōe-chōe lâng chai; chhin-chhiūⁿ beh sí, kî-si̍t sī oa̍h; chhin-chhiūⁿ siū chek-hoa̍t, kî-si̍t bô tì-kàu sí;

10親像煩惱，其實常常快樂；親像sòng-hiong，其實hō͘ chōe-chōe人富；親像無有，其實是無m̄有。chhin-chhiūⁿ hoân-ló, kî-si̍t siông-siông khoài-lo̍k; chhin-chhiūⁿ sòng-hiong, kî-si̍t hō͘ chōe-chōe lâng pù; chhin-chhiūⁿ bô ū, kî-si̍t sī bô m̄ ū.

11哥林多人ah，阮ǹg lín嘴開開，心闊闊。Ko-lîm-to lâng ah, goán ǹg lín chhùi khui-khui, sim khoah-khoah.

12m̄是tùi阮hō͘ lín 狹toe̍h，是tī lín ê心家己狹toe̍h。M̄ sī tùi goán hō͘ lín oe̍h-toe̍h, sī tī lín ê sim ka-kī oe̍h-toe̍h.

13Taⁿ lín tio̍h學chit-ê款，家己開闊來報答阮；我講án-ni，是親像對家己ê細kiáⁿ來講。Taⁿ lín tio̍h o̍h chit ê khoán, ka-kī khui-khoah lâi pò-tap goán; góa kóng án-ni, sī chhin-chhiūⁿ tùi ka-kī ê sòe-kiáⁿ lâi kóng.

14莫得kap m̄信ê人做伴，因為義kap不義有甚麼相通？光kap暗有甚麼交陪？Bo̍h-tit kap m̄ sìn ê lâng chòe phōaⁿ, in-ūi gī kap put-gī ū sím-mi̍h siong-thong? kng kap àm ū sím-mi̍h kau-pôe?

15基督kap Pí-lia̍t有甚麼和合？信kap m̄信有甚麼干涉？Ki-tok kap Pí-lia̍t ū sím-mi̍h hô-ha̍p? sìn kap m̄ sìn ū sím-mi̍h kan-sia̍p?

16上帝ê殿kap偶像有甚麼相同？因為咱是真活上帝ê殿；親像上帝有講，我beh khiā起tī in中間，行遊tī in中間；我beh做in ê上帝，in也beh做我ê百姓。Siōng-tè ê tiān kap ngó͘-siōng ū sím-mi̍h saⁿ-tâng? In-ūi lán sī chin-oa̍h Siōng-tè ê tiān; chhin-chhiūⁿ Siōng-tè ū kóng, Góa beh khiā-khí tī in tiong-kan, kiâⁿ-iû tī in tiong-kan; góa beh chòe in ê Siōng-tè, in iā beh chòe góa ê peh-sìⁿ.

17所以照主所講ê， Lín tio̍h tùi in中間出來，家己分別， 莫得摸無清氣ê物； 我就接納lín，Só͘-í chiàu Chú só͘ kóng ê, Lín tio̍h tùi in tiong-kan chhut-lâi, ka-kī hun-piat, Bo̍h-tit bong bô chheng-khì ê mi̍h; Góa chiū chiap-la̍p lín,

18我beh做lín ê父， Lín beh做我ê kiáⁿ、cha-bó͘-kiáⁿ。這是全能ê主講ê。Góa beh chòe lín ê Pē, Lín beh chòe góa ê kiáⁿ cha-bó͘-kiáⁿ. Che sī choân-lêng ê Chú kóng ê.

1所疼ê兄弟ah，既然有chiah-ê應允，咱tio̍h清氣本身，除去一切肉體kap神ê lâ-sâm，驚畏上帝，來完全成聖。Só͘ thiàⁿ ê hiaⁿ-tī ah, kì-jiân ū chiah ê èng-ún, lán tio̍h chheng-khì pún-sin, tû-khì it-chhè jio̍k-thé kap sîn ê lâ-sâm, kiaⁿ-ùi Siōng-tè, lâi oân-choân chiâⁿ-sèng.

2Tio̍h開闊lín ê心，來接納阮。阮未bat刻虧人，未bat損壞人，未bat phiⁿ人。Tio̍h khui-khoah lín ê sim, lâi chiap-la̍p goán. Goán bē bat khek-khui lâng, bē bat sún-hoāi lâng, bē bat phiⁿ lâng.

3我講án-ni m̄是beh責罪lín；因為我已經有講，lín tī阮ê心頭，同死同活。Góa kóng án-ni m̄ sī beh chek-chōe lín; in-ūi góa í-keng ū kóng, lín tī goán ê sim-thâu, tâng sí tâng oa̍h.

4我ǹg tī lín大好膽，我為tio̍h lín大誇口。我滿心得tio̍h安慰；tī阮一切患難中，我有格外ê歡喜。Góa ǹg tī lín tōa hó-táⁿ, góa ūi-tio̍h lín tōa khoa-kháu. Góa móa-sim tit-tio̍h an-ùi; tī goán it-chhè hoān-lān tiong, góa ū kek-gōe ê hoaⁿ-hí.

5因為阮來到馬其頓ê時，阮ê肉體lóng無平安，凡事tú-tio̍h患難，外面有相爭，內面有驚。In-ūi goán lâi kàu Má-kî-tùn ê sî, goán ê jio̍k-thé lóng bô pêng-an, hoān sū tú-tio̍h hoān-lān, gōa-bīn ū saⁿ-chiⁿ, lāi-bīn ū kiaⁿ.

6總是安慰卑微ê人ê，就是上帝，用提多到來安慰阮。Chóng-sī an-ùi pi-bî ê lâng ê, chiū-sī Siōng-tè, ēng Thê-to kàu lâi an-ùi goán.

7M̄-nā用伊到，也是用伊tùi lín所受ê安慰來安慰阮，因為伊將lín ê戀慕，lín ê哀傷，lín ǹg tī我ê熱心，kā阮講，致到我益發歡喜。M̄ nā ēng i kàu, iā sī ēng i tùi lín só͘ siū ê an-ùi lâi an-ùi goán, in-ūi i chiong lín ê loân-bō͘, lín ê ai-siong, lín ǹg tī góa ê jia̍t-sim, kā goán kóng, tì-kàu góa it-hoat hoaⁿ-hí.

8我bat用phoe hō͘ lín煩惱，前雖然有m̄過心，taⁿ就無lah；因為我看hit張phoe hō͘ lín煩惱ê，不過是暫時。Góa bat ēng phoe hō͘ lín hoân-ló, chêng sui-jiân ū m̄ kè-sim, taⁿ chiū bô lah; in-ūi góa khòaⁿ hit tiuⁿ phoe hō͘ lín hoân-ló ê, put-kò sī chiām-sî.

9Taⁿ我歡喜，m̄是因為lín煩惱，是因為lín有tùi煩惱致到反悔。因為lín煩惱是順上帝，hō͘ lín無一項tùi阮受刻虧。Taⁿ góa hoaⁿ-hí, m̄ sī in-ūi lín hoân-ló, sī in-ūi lín ū tùi hoân-ló tì-kàu hoán-hóe. In-ūi lín hoân-ló sī sūn Siōng-tè, hō͘ lín bô chi̍t hāng tùi goán siū khek-khui.

10因為順上帝ê煩惱生出反悔，致到得tio̍h救，無有後來ê退悔；但是世間ê煩惱是致到死。In-ūi sūn Siōng-tè ê hoân-ló siⁿ-chhut hoán-hóe, tì-kàu tit-tio̍h kiù, bô ū āu-lâi ê thè-hóe; nā-sī sè-kan ê hoân-ló sī tì-kàu sí.

11因為lín看，lín chit-ê順上帝ê煩惱，tī lín有生出jōa大ê慇勤，怎樣ê家己分訴，怎樣ê怨慼，怎樣ê驚惶，怎樣ê戀慕，怎樣ê熱心，怎樣ê責罰。Lín tī chit層事已經ta̍k項表明家己是清氣。In-ūi lín khòaⁿ, lín chit ê sūn Siōng-tè ê hoân-ló, tī lín ū siⁿ-chhut jōa tōa ê un-khûn, cháiⁿ-iūⁿ ê ka-kī hun-sò͘, cháiⁿ-iūⁿ ê oàn-chhoeh, cháiⁿ-iūⁿ ê kiaⁿ-hiâⁿ, cháiⁿ-iūⁿ ê loân-bō͘, cháiⁿ-iūⁿ ê jia̍t-sim, cháiⁿ-iūⁿ ê chek-hoa̍t. Lín tī chit chân sū í-keng ta̍k hāng piáu-bêng ka-kī sī chheng-khì.

12我前sui-bóng寫phoe hó͘ lín，m̄是為tio̍h hit-ê刻虧人ê，也m̄是為tio̍h hit-ê受刻虧ê，是beh hō͘ lín為tio̍h阮ê慇勤，tī上帝ê面前，對lín顯明。Góa chêng sui-bóng siá phoe hó͘ lín, m̄ sī ūi-tio̍h hit ê khek-khui lâng ê, iā m̄ sī ūi-tio̍h hit ê siū khek-khui ê, sī beh hō͘ lín ūi-tio̍h goán ê un-khûn, tī Siōng-tè ê bīn-chêng, tùi lín hián-bêng.

13所以阮已經受安慰；koh tī安慰中，因為提多ê歡喜，就阮ê歡喜益發充滿，因為伊ê心tùi lín眾人來得tio̍h安歇。Só͘-í goán í-keng siū an-ùi; koh tī an-ùi tiong, in-ūi Thê-to ê hoaⁿ-hí chiū goán ê hoaⁿ-hí it-hoat chhiong-móa, in-ūi i ê sim tùi lín chèng lâng lâi tit-tio̍h an-hioh.

14我若bat對伊誇口lín甚麼tāi-chì，也就無見笑。因為阮tùi提多所誇口lín ê話是真實，親像阮對lín所講ê話也lóng是真實。Góa nā bat tùi i khoa-kháu lín sím-mi̍h tāi-chì, iā chiū bô kiàn-siàu. In-ūi goán tùi Thê-to só͘ khoa-kháu lín ê ōe sī chin-si̍t, chhin-chhiūⁿ goán tùi lín só͘ kóng ê ōe iā lóng sī chin-si̍t.

15Koh伊記念lín lóng順服，用驚惶ngia̍uh-ngia̍uh-chhoah接納伊，就伊ê心益發ǹg tī lín。Koh i kì-liām lín lóng sūn-ho̍k, ēng kiaⁿ-hiâⁿ ngia̍uh-ngia̍uh-chhoah chiap-la̍p i, chiū i ê sim it-hoat ǹg tī lín.

16Taⁿ我歡喜，因為論到lín，我凡事能放心得。Taⁿ góa hoaⁿ-hí, in-ūi lūn-kàu lín, góa hoān sū ōe pàng-sim tit.

1兄弟ah，阮將上帝所賞賜tī馬其頓chiah-ê教會ê恩報lín知，Hiaⁿ-tī ah, goán chiong Siōng-tè só͘ siúⁿ-sù tī Má-kî-tùn chiah ê kàu-hōe ê un pò lín chai,

2就是tī患難中受大試煉ê時，in ê大歡喜，kap in ê極sòng-hiong，有格外成in大大ê好心。chiū-sī tī hoān-lān tiong siū tōa chhì-liān ê sî, in ê tōa hoaⁿ-hí, kap in ê ke̍k sòng-hiong, ū kek-gōe chiâⁿ in tōa-tōa ê hó-sim.

3因為我干證in家己甘願照in ê力量，koh過頭tī in ê力量，In-ūi góa kan-chèng in ka-kī kam-goān chiàu in ê le̍k-liōng, koh kè-thâu tī in ê le̍k-liōng,

4懇切求阮hō͘ in得tio̍h chit-ê恩，來saⁿ-kap有份tī服事聖徒。khún-chhiat kiû goán hō͘ in tit-tio̍h chit ê un, lâi saⁿ-kap ū hūn tī ho̍k-sāi sèng-tô͘.

5Koh m̄-nā照阮所ǹg望，就是事先將本身獻hō͘主，也tùi上帝ê旨意獻hō͘阮。Koh m̄ nā chiàu goán só͘ ǹg-bāng, chiū-sī tāi-seng chiong pún-sin hiàn hō͘ Chú, iā tùi Siōng-tè ê chí-ì hiàn hō͘ goán.

6所以阮勸提多，伊既然有提倡chit-ê恩惠tī lín中間，就tio̍h照án-ni hō͘伊成。Só͘-í goán khǹg Thê-to, i kì-jiân ū thê-chhiòng chit ê un-hūi tī lín tiong-kan, chiū tio̍h chiàu án-ni hō͘ i chiâⁿ.

7Taⁿ lín tī凡事，親像信心、口才、知識，lóng總ê熱心，以及lín ê疼阮，chiah-ê事既然充滿，就tī chit-ê恩惠也tio̍h充滿。Taⁿ lín tī hoān sū, chhin-chhiūⁿ sìn-sim, kháu-châi, tì-sek, lóng-chóng ê jia̍t-sim, í-ki̍p lín ê thiàⁿ goán, chiah ê sū kì-jiân chhiong-móa, chiū tī chit ê un-hūi iā tio̍h chhiong-móa.

8我講án-ni，m̄是命令lín；是tùi別人ê慇勤來試驗lín仁愛ê實在。Góa kóng án-ni, m̄ sī bēng-lēng lín; sī tùi pa̍t lâng ê un-khûn lâi chhì-giām lín jîn-ài ê si̍t-chāi.

9因為lín知咱ê主耶穌基督ê恩；伊本好額，為tio̍h lín成做sòng-hiong，beh hō͘ lín tùi伊ê sòng-hiong來成做好額。In-ūi lín chai lán ê Chú Iâ-so͘ Ki-tok ê un; I pún hó-gia̍h, ūi-tio̍h lín chiâⁿ-chòe sòng-hiong, beh hō͘ lín tùi I ê sòng-hiong lâi chiâⁿ-chòe hó-gia̍h.

10我tī chit層事將我ê意見hō͘ lín知；因為這是lín ê利益；是lín tùi舊年已經提倡chit-ê事，m̄-nā做前行，也做前甘願。Góa tī chit chân sū chiong góa ê ì-kiàn hō͘ lín chai; in-ūi che sī lín ê lī-ek; sī lín tùi kū-nî í-keng thê-chhiòng chit ê sū, m̄ nā chòe-chêng kiâⁿ, iā chòe-chêng kam-goān.

11Taⁿ tio̍h做成chit-ê事；致到lín既然有熱心ê甘願，也照所有ê來成伊。Taⁿ tio̍h chòe-chiâⁿ chit ê sū; tì-kàu lín kì-jiân ū jia̍t-sim ê kam-goān, iā chiàu só͘ ū ê lâi chiâⁿ i.

12因為已經有chit號熱心，就得tio̍h接納，是照人所有ê，m̄是照人所無ê。In-ūi í-keng ū chit hō jia̍t-sim, chiū tit-tio̍h chiap-la̍p, sī chiàu lâng só͘ ū ê, m̄ sī chiàu lâng só͘ bô ê.

13卻m̄是ài別人liāu-lēng，lín 乏ta̍t，是ài得平平；Khiok m̄ sī ài pa̍t lâng liāu-lēng, lín ha̍t-ta̍t, sī ài tit pîⁿ-pîⁿ;

14現時將lín有chhun ê補in ê無夠，thang將in有chhun ê補lín ê無夠，án-ni chiah會平；hiān-sî chiong lín ū chhun ê pó͘ in ê bô kàu, thang chiong in ū chhun ê pó͘ lín ê bô kàu, án-ni chiah ōe pîⁿ;

15照所記載講，拾chōe ê無chhun，拾少ê無欠。chiàu só͘ kì-chài kóng, khioh chōe ê bô chhun, khioh chió ê bô khiàm.

16感謝上帝hō͘提多ê心平平為tio̍h lín慇勤；Kám-siā Siōng-tè hō͘ Thê-to ê sim pîⁿ-pîⁿ ūi-tio̍h lín un-khûn;

17伊卻也是受阮ê苦勸；總是伊本然真慇勤，家己甘願去chhē lín。i khiok iā sī siū goán ê khó͘-khǹg; chóng-sī i pún-jiân chin un-khûn, ka-kī kam-goān khì chhē lín.

18我也差一個兄弟kap伊去，就是tī福音有hō͘眾教會o-ló ê；Góa iā chhe chi̍t ê hiaⁿ-tī kap i khì, chiū-sī tī hok-im ū hō͘ chèng kàu-hōe o-ló ê;

19m̄-nā án-ni，也是chiah-ê教會所揀選kap阮出門tàu料理阮所teh辦ê恩惠，來表明主ê榮光kap阮ê甘願；m̄ nā án-ni, iā sī chiah ê kàu-hōe só͘ kéng-soán kap goán chhut-mn̂g tàu liāu-lí goán só͘ teh pān ê un-hūi, lâi piáu-bêng Chú ê êng-kng kap goán ê kam-goān;

20是持防人，為tio̍h阮所料理ê chōe-chōe銀，來嫌阮；sī tî-hông lâng, ūi-tio̍h goán só͘ liāu-lí ê chōe-chōe gûn lâi hiâm goán;

21因為阮圖謀好事，m̄-nā tī主ê面前，也是tī人ê面前。in-ūi goán tô͘-bô͘ hó-sū, m̄ nā tī Chú ê bīn-chêng, iā sī tī lâng ê bīn-chêng.

22Koh差阮ê兄弟一人kap in去，阮tī chōe-chōe事bat chōe-chōe pái試驗伊，知伊ê慇勤，taⁿ因為深信lín，就koh-khah慇勤。Koh chhe goán ê hiaⁿ-tī chi̍t lâng kap in khì, goán tī chōe-chōe sū bat chōe-chōe pái chhì-giām i, chai i ê un-khûn, taⁿ in-ūi chhim sìn lín, chiū koh khah un-khûn.

23論到提多，伊是我ê同伴，為tio̍h lín來saⁿ-kap tio̍h磨ê，á是阮chiah-ê兄弟，in是chiah-ê教會ê使者，也是基督ê榮光。Lūn-kàu Thê-to, i sī góa ê tâng-phōaⁿ, ūi-tio̍h lín lâi saⁿ-kap tio̍h-bôa ê. Á-sī goán chiah ê hiaⁿ-tī, in sī chiah ê kàu-hōe ê sù-chiá, iā sī Ki-tok ê êng-kng.

24所以tī chiah-ê教會ê面前，lín tio̍h對in顯明lín ê仁愛ê憑據，也顯明阮為tio̍h lín所誇口ê是實在。Só͘-í tī chiah ê kàu-hōe ê bīn-chêng, lín tio̍h tùi in hián-bêng lín ê jîn-ài ê pîn-kù, iā hián-bêng goán ūi-tio̍h lín só͘ khoa-kháu ê sī si̍t-chāi.