1猶大王A-hap-siā ê kiáⁿ Iok-a-si二十三年，Iâ-hō͘ ê kiáⁿ Iok-hap-su tī撒馬利亞坐位，做以色列王，共十七年。Iû-tāi ông A-hap-siā ê kiáⁿ Iok-a-si jī-cha̍p-saⁿ nî, Iâ-hō͘ ê kiáⁿ Iok-hap-su tī Sat-má-lī-a chē-ūi, chòe Í-sek-lia̍t ông, kiōng cha̍p-chhit nî.

2伊行耶和華所看做pháiⁿ ê事，thàn Nî-pat ê kiáⁿ Iâ-lô-phò-àm hō͘以色列人犯罪hit-ê罪，lóng無離開伊。I kiâⁿ Iâ-hô-hoa só͘ khòaⁿ-chòe pháiⁿ ê sū, thàn Nî-pat ê kiáⁿ Iâ-lô-phò-àm hō͘ Í-sek-lia̍t lâng hoān-chōe hit ê chōe, lóng bô lī-khui i.

3耶和華就受氣到以色列人，常常交in tī A-lân王Hap-siat ê手，kap Hap-siat ê kiáⁿ Piān-hap-ta̍t ê手。Iâ-hô-hoa chiū siū-khì kàu Í-sek-lia̍t lâng, siông-siông kau in tī A-lân ông Hap-siat ê chhiú, kap Hap-siat ê kiáⁿ Piān-hap-ta̍t ê chhiú.

4Iok-hap-su懇求耶和華，耶和華聽伊；因為伊看見以色列人受制壓，就是A-lân王制壓in。Iok-hap-su khún-kiû Iâ-hô-hoa, Iâ-hô-hoa thiaⁿ i; in-ūi I khòaⁿ-kìⁿ Í-sek-lia̍t lâng siū chè-ap, chiū-sī A-lân ông chè-ap in.

5(耶和華賞賜以色列一個拯救ê，hō͘ in脫離A-lân人ê手。以色列人就照舊khiā起in ê布棚。(Iâ-hô-hoa siúⁿ-sù Í-sek-lia̍t chi̍t ê chín-kiù-ê, hō͘ in thoat-lī A-lân lâng ê chhiú. Í-sek-lia̍t lâng chiū chiàu-kū khiā-khí in ê pò͘-pîⁿ.

6總是in無離開Iâ-lô-phò-àm ê家ê罪，就是hō͘以色列人犯罪ê，猶原án-ni去行；撒馬利亞ê A-sià-la̍h iáu留teh。)Chóng-sī in bô lī-khui Iâ-lô-phò-àm ê ke ê chōe, chiū-sī hō͘ Í-sek-lia̍t lâng hoān-chōe ê, iû-goân án-ni khì kiâⁿ; Sat-má-lī-a ê A-sià-la̍h iáu lâu-teh.)

7伊tī百姓中只有留馬兵五十，戰車十張，步兵一萬，因為A-lân王有滅伊n，thún踏in，親像五穀場ê土沙。I tī peh-sìⁿ tiong chí-ū lâu bé-peng gō͘ cha̍p, chiàn-chhia cha̍p-tiuⁿ, pō͘-peng chi̍t-bān, in-ūi A-lân ông ū bia̍t in, thún-ta̍h in, chhin-chhiūⁿ gō͘-kak-tiûⁿ ê thô͘-soa.

8Iok-hap-su其餘ê事，見伊所行ê，kap伊ê能力，kiám無lóng記tī以色列chiah-ê王ê記錄mah？Iok-hap-su kî-û ê sū, kìⁿ i só͘ kiâⁿ ê, kap i ê lêng-le̍k, kiám bô lóng kì tī Í-sek-lia̍t chiah ê ông ê kì-lio̍k mah?

9Iok-hap-su kap伊ê列祖同睏，人埋葬伊tī撒馬利亞；伊ê kiáⁿ Iok-a-si續接伊做王。Iok-hap-su kap i ê lia̍t-chó͘ tâng-khùn, lâng bâi-chòng i tī Sat-má-lī-a; i ê kiáⁿ Iok-a-si sòa-chiap i chòe ông.

10猶大王Iok-a-si三十七年，Iok-hap-su ê kiáⁿ Iok-â-si tī撒馬利亞坐位，做以色列王，共十六年。Iû-tāi ông Iok-a-si saⁿ-cha̍p-chhit nî, Iok-hap-su ê kiáⁿ Iok-a-si tī Sat-má-lī-a chē-ūi, chòe Í-sek-lia̍t ông, kiōng cha̍p-la̍k nî.

11伊行耶和華所看做pháiⁿ ê事，無離開Nî-pat ê kiáⁿ Iâ-lô-phò-àm ê罪，就是伊hō͘以色列人犯罪ê；猶原án-ni行。I kiâⁿ Iâ-hô-hoa só͘ khòaⁿ-chòe pháiⁿ ê sū, bô lī-khui Nî-pat ê kiáⁿ Iâ-lô-phò-àm ê chōe, chiū-sī i hō͘ Í-sek-lia̍t lâng hoān-chōe ê; iû-goân án-ni kiâⁿ.

12Iok-a-si其餘ê事，見伊所行ê，以及伊kap猶大王A-má-siā交戰ê能力，kiám無lóng記tī以色列chiah-ê王ê記錄mah？Iok-a-si kî-û ê sū, kìⁿ i só͘ kiâⁿ ê, í-ki̍p i kap Iû-tāi ông A-má-siā kau-chiàn ê lêng-le̍k, kiám bô lóng kì tī Í-sek-lia̍t chiah ê ông ê kì-lio̍k mah?

13Iok-a-si kap伊ê列祖同睏；Iâ-lô-phò-àm坐伊ê位。Iok-a-si kap以色列chiah-ê王相kap葬tī撒馬利亞。Iok-a-si kap i ê lia̍t-chó͘ tâng-khùn; Iâ-lô-phò-àm chē i ê ūi. Iok-a-si kap Í-sek-lia̍t chiah ê ông saⁿ-kap chòng tī Sat-má-lī-a.

14以利沙患tio̍h破病，就是beh死ê病；以色列王Iok-a-si落來看伊，àⁿ tī伊ê面啼哭，講，我ê父ah，我ê父ah，以色列ê戰車kap伊ê馬兵ah。Í-lī-sa hoān-tio̍h phòa-pīⁿ, chiū-sī beh sí ê pīⁿ; Í-sek-lia̍t ông Iok-a-si lo̍h-lâi khòaⁿ i, àⁿ tī i ê bīn thî-khàu, kóng, Góa ê pē ah, góa ê pē ah, Í-sek-lia̍t ê chiàn-chhia kap i ê bé-peng ah.

15以利沙kā伊講，你kia̍h弓箭。伊就kia̍h弓kap箭。Í-lī-sa kā i kóng, Lí kia̍h keng-chìⁿ. I chiū kia̍h keng kap chìⁿ.

16Koh kā以色列王講，你用手拔弓；伊就用手拔伊。Koh kā Í-sek-lia̍t ông kóng, Lí ēng chhiú pu̍ih keng; i chiū ēng chhiú pu̍ih i.

17以利沙按手tī王ê手，講，你開ǹg東四個窗á。伊就開。以利沙講，射箭。伊就射箭。以利沙講，這是耶和華thâi贏ê箭，就是thâi贏A-lân人ê箭，因為你beh tī A-hut攻擊A-lân人，到一盡滅伊n。Í-lī-sa hōaⁿ-chhiú tī ông ê chhiú, kóng, Lí khui ǹg tang--sì ê thang-á. I chiū khui. Í-lī-sa kóng, Siā chìⁿ. I chiū siā chìⁿ. Í-lī-sa kóng, Che sī Iâ-hô-hoa thâi-iâⁿ ê chìⁿ, chiū-sī thâi-iâⁿ A-lân lâng ê chìⁿ, in-ūi lí beh tī A-hut kong-kek A-lân lâng, kàu it-chīn bia̍t in.

18Koh講，Kia̍h hiah-ê箭；伊就kia̍h伊。伊koh kā以色列王講，Phah地。伊phah三pái就soah。Koh kóng, Kia̍h hiah ê chìⁿ; i chiū kia̍h i. I koh kā Í-sek-lia̍t ông kóng, Phah tōe. I phah saⁿ-pái chiū soah.

19上帝ê奴僕受氣伊講，你hit-tia̍p tio̍h phah五六pái，就會攻擊A-lân，到伊一盡滅；taⁿ只有能phah敗A-lân人三pái。Siōng-tè ê lô͘-po̍k siū-khì i kóng, Lí hit-tia̍p tio̍h phah gō͘-la̍k pái, chiū ōe kong-kek A-lân, kàu i it-chīn bia̍t; taⁿ chí-ū ōe phah-pāi A-lân lâng saⁿ-pái.

20以利沙死了，人kā伊埋葬；到新年，有Mô͘-ap kui陣人侵犯境界。Í-lī-sa sí-liáu, lâng kā i bâi-chòng; kàu sin-nî, ū Mô͘-ap kui-tīn lâng chhim-hoān kéng-kài.

21有人tú-á teh埋葬死人，忽然看見kui陣人，就將死人hiat tī以利沙ê墓；死人一下kha̍p-tio̍h以利沙ê骨頭，就koh活起來khiā。Ū lâng tú-á teh bâi-chòng sí-lâng, hut-jiân khòaⁿ-kìⁿ kui-tīn lâng, chiū chiong sí-lâng hiat tī Í-lī-sa ê bōng; sí-lâng chi̍t-ē kha̍p-tio̍h Í-lī-sa ê kut-thâu, chiū koh-oa̍h khí-lâi khiā.

22Iok-hap-su ê年間，A-lân王Hap-siat ta̍uh-ta̍uh制壓以色列人。Iok-hap-su ê nî-kan, A-lân ông Hap-siat ta̍uh-ta̍uh chè-ap Í-sek-lia̍t lâng.

23總是耶和華因為伊kap亞伯拉罕、以撒、雅各所立ê約，猶原施恩hō͘以色列，憐憫in，眷顧in，m̄甘剿滅伊n，iáu未趕逐in離開祂ê面前。Chóng-sī Iâ-hô-hoa in-ūi I kap A-pek-la̍h-hán, Í-sat, Ngá-kok só͘ li̍p ê iok, iû-goân si-un hō͘ Í-sek-lia̍t, lîn-bín in, koàn-kò͘ in, m̄-kam châu-bia̍t in, iáu-bē kóaⁿ-tio̍k in lī-khui I ê bīn-chêng.

24A-lân王Hap-siat死，伊ê kiáⁿ Piān-hap-ta̍t續接伊做王。A-lân ông Hap-siat sí, i ê kiáⁿ Piān-hap-ta̍t sòa-chiap i chòe ông.

25前Hap-siat kap Iok-a-si ê老父Iok-hap-su交戰，對伊ê手the̍h去kúi-nā ê城；taⁿ Iok-hap-su ê kiáⁿ Iok-a-si tùi Hap-siat ê kiáⁿ Piān-hap-ta̍t ê手the̍h 倒tńg。Iok-a-si phah伊三pái，克服以色列hiah-ê城。Chêng Hap-siat kap Iok-a-si ê lāu-pē Iok-hap-su kau-chiàn, tùi i ê chhiú the̍h-khì kúi-nā ê siâⁿ; taⁿ Iok-hap-su ê kiáⁿ Iok-a-si tùi Hap-siat ê kiáⁿ Piān-hap-ta̍t ê chhiú the̍h tò-tńg. Iok-a-si phah i saⁿ-pái, Khek-ho̍k Í-sek-lia̍t hiah ê siâⁿ.

1以色列王Iok-hap-su ê kiáⁿ Iok-a-si第二年，猶大王Iok-a-si ê kiáⁿ A-má-siā坐位。Í-sek-lia̍t ông Iok-hap-su ê kiáⁿ Iok-a-si tē-jī nî, Iû-tāi ông Iok-a-si ê kiáⁿ A-má-siā chē-ūi.

2伊坐位ê時，二十五歲；tī耶路撒冷做王共二十九年；伊ê老母名叫Iok-iâ-tàn，是耶路撒冷人。I chē-ūi ê sî, jī-cha̍p-gō͘ hè; tī Iâ-lō͘-sat-léng chòe-ông kiōng jī-cha̍p-káu nî; i ê lāu-bú miâ kiò Iok-iâ-tàn, sī Iâ-lō͘-sat-léng lâng.

3A-má-siā行耶和華看做好ê事；總是無親像伊ê祖大衛，就是照伊ê老父Iok-a-si一切所行ê去行。A-má-siā kiâⁿ Iâ-hô-hoa khòaⁿ-chòe hó ê sū; chóng-sī bô chhin-chhiūⁿ i ê chó͘ Tāi-pi̍t, chiū-sī chiàu i ê lāu-pē Iok-a-si it-chhè só͘-kiâⁿ-ê khì kiâⁿ.

4總是山頭壇iáu未廢無；百姓猶原獻祭燒香tī山頭壇。Chóng-sī soaⁿ-thâu-tôaⁿ iáu-bē hòe-bô; peh-sìⁿ iû-goân hiàn-chè sio-hiuⁿ tī soaⁿ-thâu-tôaⁿ.

5前hiah-ê人臣thâi死伊ê老父，猶大王，taⁿ國權一下堅固，就kā in thâi死。Chêng hiah ê jîn-sîn thâi-sí i ê lāu-pē, Iû-tāi ông, taⁿ kok-koân chi̍t-ē kian-kò͘, chiū kā in thâi-sí.

6總是無thâi死in ê kiáⁿ，照摩西律法ê冊所記載，耶和華命令講，M̄-thang因為kiáⁿ來thâi死老父，也m̄-thang因為老父來thâi死kiáⁿ；ta̍k人tio̍k因為本身ê罪來死。Chóng-sī bô thâi-sí in ê kiáⁿ, chiàu Mô͘-se lu̍t-hoat ê chheh só͘ kì-chài, Iâ-hô-hoa bēng-lēng kóng, M̄-thang in-ūi kiáⁿ lâi thâi-sí lāu-pē, iā m̄-thang in-ūi lāu-pē lâi thâi-sí kiáⁿ; ta̍k-lâng tio̍k in-ūi pún-sin ê chōe lâi sí.

7A-má-siā tī鹽ê山谷thâi死伊2-tong人一萬，koh攻取Se-la̍h，改名叫Iok-thiap，到今á日。A-má-siā tī Iâm ê soaⁿ-kok thâi-sí Í-tong lâng chi̍t-bān, koh kong-chhú Se-la̍h, kóe miâ kiò Iok-thiap, kàu kin-á-ji̍t.

8Hit時A-má-siā差使者去見Iâ-hō͘ ê孫，Iok-hap-su ê kiáⁿ，以色列王Iok-a-si，講，來ah，咱兩人相見面tī戰場。Hit-sî A-má-siā chhe sù-chiá khì kìⁿ Iâ-hō͘ ê sun, Iok-hap-su ê kiáⁿ, Í-sek-lia̍t ông Iok-a-si, kóng, Lâi ah, lán nn̄g-lâng saⁿ-kìⁿ-bīn tī chiàn-tiûⁿ.

9以色列王Iok-a-si差使者去見猶大王A-má-siā講，黎巴嫩ê草刺差使者去見黎巴嫩ê柏香樹，講，用你ê cha-bó͘-kiáⁿ hō͘我ê kiáⁿ做bó͘；後來黎巴嫩有一隻野獸經過，thún踏hit-ê草刺。Í-sek-lia̍t ông Iok-a-si chhe sù-chiá khì kìⁿ Iû-tāi ông A-má-siā kóng, Lī-pa-lùn ê chháu-chhì chhe sù-chiá khì kìⁿ Lī-pa-lùn ê peh-hiuⁿ-chhiū, kóng, Ēng lí ê cha-bó͘-kiáⁿ hō͘ góa ê kiáⁿ chòe-bó͘; āu-lâi Lī-pa-lùn ū chi̍t chiah iá-siù keng-kè, thún-ta̍h hit ê chháu-chhì.

10你已經phah贏Í-tong，心就驕傲；你掠chit-ê做榮光，tī家內安然khiā起就好；啥事起事惹災厄，hō͘本身kap猶大國相kap倒壞ah？Lí í-keng phah-iâⁿ Í-tong, sim chiū kiau-ngō͘; lí lia̍h chit-ê chòe êng-kng, tī ke-lāi an-jiân khiā-khí chiū hó; siáⁿ-sū khí-sū jiá chai-ē, hō͘ pún-sin kap Iû-tāi kok saⁿ-kap tó-hoāi ah?

11總是A-má-siā m̄肯聽。Tùi án-ni，以色列王Iok-a-si上來；tī猶大ê Pek-sī-be̍k kap猶大王A-má-siā相見面tī戰場。Chóng-sī A-má-siā m̄-khéng thiaⁿ. Tùi án-ni Í-sek-lia̍t ông Iok-a-si chiūⁿ-lâi; tī Iû-tāi ê Pek-sī-be̍k kap Iû-tāi ông A-má-siā saⁿ-kìⁿ-bīn tī chiàn-tiûⁿ.

12猶大thâi輸tī以色列ê面前；ta̍k人走tò去in ê布棚。Iû-tāi thâi-su tī Í-sek-lia̍t ê bīn-chêng; ta̍k-lâng cháu tò-khì in ê pò͘-pîⁿ.

13以色列王Iok-a-si tī Pek-sī-be̍k掠tio̍h A-hap-siā ê孫，Iok-a-si ê kiáⁿ，猶大王A-má-siā，就來到耶路撒冷，拆毀耶路撒冷ê城牆，tùi Í-hoat-liân門到角門，共四百肘；Í-sek-lia̍t ông Iok-a-si tī Pek-sī-be̍k lia̍h--tio̍h A-hap-siā ê sun, Iok-a-si ê kiáⁿ, Iû-tāi ông A-má-siā, chiū lâi kàu Iâ-lō͘-sat-léng, thiah-húi Iâ-lō͘-sat-léng ê siâⁿ-chhiûⁿ, tùi Í-hoat-liân mn̂g kàu kak-mn̂g, kiōng sì-pah tiú;

14koh將耶和華殿內kap王宮府庫所有ê金銀kap器具，lóng the̍h去；koh帶人去做準當，就tò去撒馬利亞。koh chiong Iâ-hô-hoa tiān-lāi kap ông-kiong hú-khò͘ só͘ ū ê kim-gûn kap khì-kū, lóng the̍h--khì; koh tòa lâng khì chòe chún-tǹg, chiū tò khì Sat-má-lī-a.

15Iok-a-si其餘ê事，見伊所行ê，kap伊ê能力，以及kap猶大王A-má-siā交戰ê事，kiám無lóng記tī以色列chiah-ê王ê記錄mah？Iok-a-si kî-û ê sū, kìⁿ i só͘-kiâⁿ-ê, kap i ê lêng-le̍k, í-ki̍p kap Iû-tāi ông A-má-siā kau-chiàn ê sū, kiám bô lóng kì tī Í-sek-lia̍t chiah ê ông ê kì-lio̍k mah?

16Iok-a-si kap伊ê列祖同睏，kap以色列chiah-ê王相kap葬tī撒馬利亞；伊ê kiáⁿ Iâ-lô-phò-àm續接伊做王。Iok-a-si kap i ê lia̍t-chó͘ tâng-khùn, kap Í-sek-lia̍t chiah ê ông saⁿ-kap chòng tī Sat-má-lī-a; i ê kiáⁿ Iâ-lô-phò-àm sòa-chiap i chòe ông.

17以色列王Iok-hap-su ê kiáⁿ Iok-a-si死了，猶大王Iok-a-si ê kiáⁿ A-má-siā iáu活十五年。Í-sek-lia̍t ông Iok-hap-su ê kiáⁿ Iok-a-si sí-liáu, Iû-tāi ông Iok-a-si ê kiáⁿ A-má-siā iáu oa̍h cha̍p-gō͘ nî.

18A-má-siā其餘ê事，kiám無lóng記tī猶大列王ê記錄mah？Tī耶路撒冷有人結黨beh害A-má-siā。A-má-siā kî-û ê sū, kiám bô lóng kì tī Iû-tāi lia̍t-ông ê kì-lio̍k mah? Tī Iâ-lō͘-sat-léng ū lâng kiat-tóng beh hāi A-má-siā.

19伊就走到拉結，in差人jip伊到拉結，thâi死伊tī-hia。I chiū cháu kàu La̍h-kiat, in chhe lâng jip i kàu La̍h-kiat, thâi-sí i tī-hia.

20人就用馬載伊到耶路撒冷，kap伊ê列祖葬tī大衛ê城。Lâng chiū ēng bé chài i kàu Iâ-lō͘-sat-léng, kap i ê lia̍t-chó͘ chòng tī Tāi-pi̍t ê siâⁿ.

21猶大眾百姓設立A-sat-lī-ngá續接伊ê老父A-má-siā做王。Hit時伊十六歲。Iû-tāi chèng peh-sìⁿ siat-li̍p A-sat-lī-ngá sòa-chiap i ê lāu-pē A-má-siā chòe-ông. Hit-sî i cha̍p-la̍k hè.

22A-má-siā王kap伊ê列祖同睏了後，A-sat-lī-ngá起Í-la̍h-tha，hō͘伊猶原kui猶大國管轄。A-má-siā ông kap i ê lia̍t-chó͘ tâng-khùn liáu-āu, A-sat-lī-ngá khí Í-la̍h-tha , hō͘ i iû-goân kui Iû-tāi kok koán-hat.

23猶大王Iok-a-si ê kiáⁿ A-má-siā十五年，以色列王Iok-a-si ê kiáⁿ Iâ-lô-phò-am3ti7撒馬利亞坐位，共做王四十一年。Iû-tāi ông Iok-a-si ê kiáⁿ A-má-siā cha̍p-gō͘ nî, Í-sek-lia̍t ông Iok-a-si ê kiáⁿ Iâ-lô-phò-àm tī Sat-má-lī-a chē-ūi, kiōng chòe-ông sì-cha̍p-it nî.

24伊行耶和華看做pháiⁿ ê事，無離開Nî-pat ê kiáⁿ Iâ-lô-phò-àm hō͘以色列犯罪ê。I kiâⁿ Iâ-hô-hoa khòaⁿ-chòe pháiⁿ ê sū, bô lī-khui Nî-pat ê kiáⁿ Iâ-lô-phò-àm hō͘ Í-sek-lia̍t hoān-chōe ê.

25伊恢復以色列交界ê地，tùi Hap-má-kháu到A-la̍h-pa海，照耶和華以色列ê上帝託伊ê奴僕Ka-te̍k-hi-hut人，A-bí-thài ê kiáⁿ，先知約拿所講ê話。I khoe-ho̍k Í-sek-lia̍t kau-kài ê tōe, tùi Hap-má-kháu kàu A-la̍h-pa hái, chiàu Iâ-hô-hoa Í-sek-lia̍t ê Siōng-tè thok I ê lô͘-po̍k Ka-te̍k-hi-hut lâng, A-bí-thài ê kiáⁿ, sian-ti Iok-ná só͘ kóng ê ōe.

26因為耶和華看見以色列人真艱苦，無論受拘束ê，自由ê，lóng無lah，也無人幫贊以色列。In-ūi Iâ-hô-hoa khòaⁿ-kìⁿ Í-sek-lia̍t lâng chin kan-khó͘, bô-lūn siū khu-sok ê, chū-iû ê, lóng bô--lah, iā bô lâng pang-chān Í-sek-lia̍t.

27耶和華bē-bat講beh擦消以色列ê名tī天下；就託Iok-a-si ê kiáⁿ Iâ-lô-phò-àm ê手來救in。Iâ-hô-hoa bē-bat kóng beh chhat-siau Í-sek-lia̍t ê miâ tī thiⁿ-ē; chiū thok Iok-a-si ê kiáⁿ Iâ-lô-phò-àm ê chhiú lâi kiù in.

28Iâ-lô-phò-àm其餘ê事，見伊所行ê，kap伊ê能力，伊怎樣交戰，怎樣復到大馬色kap Hap-má，就是前屬猶大ê，hō͘ in koh 歸以色列，kiám無lóng記tī以色列chiah-ê王ê記錄mah？Iâ-lô-phò-àm kî-û ê sū, kìⁿ i só͘ kiâⁿ ê, kap i ê lêng-le̍k, i cháiⁿ-iūⁿ kau-chiàn, cháiⁿ-iūⁿ ho̍k-tò Tāi-má-sek kap Hap-má, chiū-sī chêng sio̍k Iû-tāi ê, hō͘ in koh kui Í-sek-lia̍t, kiám bô lóng kì tī Í-sek-lia̍t chiah ê ông ê kì-lio̍k mah?

29Iâ-lô-phò-àm kap伊ê列祖以色列chiah-ê王同睏；伊ê kiáⁿ Sat-ka-lī-ngá續接伊做王。Iâ-lô-phò-àm kap i ê lia̍t-chó͘ Í-sek-lia̍t chiah ê ông tâng-khùn; i ê kiáⁿ Sat-ka-lī-ngá sòa-chiap i chòe-ông.

1以色列王Iâ-lô-phò-àm二十七年，猶大王A-má-siā ê kiáⁿ A-sat-lī-ngá坐位。Í-sek-lia̍t ông Iâ-lô-phò-àm jī-cha̍p-chhit nî, Iû-tāi ông A-má-siā ê kiáⁿ A-sat-lī-ngá chē-ūi.

2伊坐位ê時，十六歲；tī耶路撒冷做王共五十二年。伊ê老母名叫Iâ-khó-lī-ngá，是耶路撒冷人。I chē-ūi ê sî, cha̍p-la̍k hè; tī Iâ-lō͘-sat-léng chòe-ông kiōng gō͘-cha̍p-jī nî. I ê lāu-bú miâ kiò Iâ-khó-lī-ngá, sī Iâ-lō͘-sat-léng lâng.

3伊行耶和華所看做好ê事，照伊ê老父A-má-siā一切ê所行。I kiâⁿ Iâ-hô-hoa só͘ khòaⁿ-chòe hó ê sū, chiàu i ê lāu-pē A-má-siā it-chhè ê só͘-kiâⁿ.

4總是山頭壇iáu無廢去，百姓猶原獻祭燒香tī山頭壇。Chóng-sī soaⁿ-thâu-tôaⁿ iáu bô hòe--khì, peh-sìⁿ iû-goân hiàn-chè sio-hiuⁿ tī soaⁿ-thâu-tôaⁿ.

5耶和華就phah王，hō͘伊thái-ko，到伊死ê日，伊就另外厝khiā起。伊ê kiáⁿ Iok-thán管理家事，治理國民。Iâ-hô-hoa chiū phah ông, hō͘ i thái-ko, kàu i sí ê ji̍t, i chiū lēng-gōa chhù khiā-khí. I ê kiáⁿ Iok-thán koán-lí ke-sū, tī-lí kok-bîn.

6A-sat-lī-ngá其餘ê事，見伊所行ê，kiám無lóng記tī猶大列王ê記錄mah？A-sat-lī-ngá kî-û ê sū, kìⁿ i só͘ kiâⁿ ê, kiám bô lóng kì tī Iû-tāi lia̍t-ông ê kì-lio̍k mah?

7A-sat-lī-ngá kap伊ê祖同睏，kap伊ê祖葬tī大衛ê城。伊ê kiáⁿ Iok-thán續接伊做王。A-sat-lī-ngá kap i ê chó͘ tâng-khùn, kap i ê chó͘ chòng tī Tāi-pi̍t ê siâⁿ. I ê kiáⁿ Iok-thán sòa-chiap i chòe-ông.

8猶大王A-sat-lī-ngá三十八年，Iâ-lô-phò-àm ê kiáⁿ Sat-ka-lī-ngá tī撒馬利亞做以色列王六月日。Iû-tāi ông A-sat-lī-ngá saⁿ-cha̍p-poeh nî, Iâ-lô-phò-àm ê kiáⁿ Sat-ka-lī-ngá tī Sat-má-lī-a chòe Í-sek-lia̍t ông la̍k-ge̍h-ji̍t.

9伊行耶和華看做pháiⁿ ê事，照伊ê列祖所行ê，無離開Nî-pat ê kiáⁿ Iâ-lô-phò-àm ê罪，就是hō͘以色列犯罪ê。I kiâⁿ Iâ-hô-hoa khòaⁿ-chòe pháiⁿ ê sū, chiàu i ê lia̍t-chó͘ só͘ kiâⁿ ê, bô lī-khui Nî-pat ê kiáⁿ Iâ-lô-phò-àm ê chōe, chiū-sī hō͘ Í-sek-lia̍t hoān-chōe ê.

10Ngá-pí ê kiáⁿ Sa-li王背叛伊，tī百姓ê面前phah伊，thâi伊，篡伊ê位。Ngá-pí ê kiáⁿ Sa-liông pōe-poān i, tī peh-sìⁿ ê bīn-chêng phah i, thâi i, chhoàn i ê ūi.

11Sat-ka-lī-ngá其餘ê事，lóng記tī以色列chiah-ê王ê記錄。Sat-ka-lī-ngá kî-û ê sū, lóng kì tī Í-sek-lia̍t chiah ê ông ê kì-lio̍k.

12這是前耶和華kā Iâ-hō͘講ê話，講，你ê kiáⁿ孫beh坐以色列ê國位到四代，chit-ê話án-ni應驗。Che sī chêng Iâ-hô-hoa kā Iâ-hō͘ kóng ê ōe, kóng, Lí ê kiáⁿ-sun beh chē Í-sek-lia̍t ê kok-ūi kàu sì-tāi, chit ê ōe án-ni èng-giām.

13猶大王O͘-se-ngá三十九年，Ngá-pí ê kiáⁿ Sa-li王坐位，tī撒馬利亞做王一月日。Iû-tāi ông O͘-se-ngá saⁿ-cha̍p-káu nî, Ngá-pí ê kiáⁿ Sa-liông chē-ūi, tī Sat-má-lī-a chòe-ông chi̍t-ge̍h-ji̍t.

14Ka-tí ê kiáⁿ Bí-ná-hiān tùi Tek-sat上去撒馬利亞，phah Ngá-pí ê kiáⁿ Sa-li王tī撒馬利亞，thâi死伊，篡伊ê位。Ka-tí ê kiáⁿ Bí-ná-hiān tùi Tek-sat chiūⁿ-khì Sat-má-lī-a, phah Ngá-pí ê kiáⁿ Sa-liông tī Sat-má-lī-a, thâi-sí i, chhoàn i ê ūi.

15Sa-liông其餘ê事，kap伊背叛ê情形，lóng記tī以色列chiah-ê王ê記錄。Sa-liông kî-û ê sū, kap i pōe-poān ê chêng-hêng, lóng kì tī Í-sek-lia̍t chiah ê ông ê kì-lio̍k.

16Hit時Bí-ná-hiān phah Thê-húi-sat，kap見若tī in中間ê，kap伊ê四境，tùi Tek-sat起；因為in無kā伊開城門，所以phah伊，也破開in中間一切有身孕ê婦人人。Hit-sî Bí-ná-hiān phah Thê-húi-sat, kap kìⁿ-nā tī in tiong-kan ê, kap i ê sì-kéng, tùi Tek-sat khí; in-ūi in bô kā i khui siâⁿ-mn̂g, só͘-í phah i, iā phòa-khui in tiong-kan it-chhè ū sin-īn ê hū-jîn-lâng.

17猶大王A-sat-lī-ngá三十九年，Ka-tí ê kiáⁿ Bí-ná-hiān坐位，tī撒馬利亞做以色列王，共十年。Iû-tāi ông A-sat-lī-ngá saⁿ-cha̍p-káu nî, Ka-tí ê kiáⁿ Bí-ná-hiān chē-ūi, tī Sat-má-lī-a chòe Í-sek-lia̍t ông, kiōng cha̍p-nî.

18伊行耶和華所看做pháiⁿ ê事，一世人無離開Nî-pat ê kiáⁿ Iâ-lô-phò-àm ê罪，就是hō͘以色列犯罪ê。I kiâⁿ Iâ-hô-hoa só͘ khòaⁿ-chòe pháiⁿ ê sū, chi̍t-sì-lâng bô lī-khui Nî-pat ê kiáⁿ Iâ-lô-phò-àm ê chōe, chiū-sī hō͘ Í-sek-lia̍t hoān-chōe--ê.

19亞述王Phó͘-le̍k來攻擊chit-ê土地。Bí-ná-hiān用銀一千tha-liân-tek hō͘ Phó͘-le̍k，ài伊幫贊來堅固伊ê國權。A-su̍t ông Phó͘-le̍k lâi kong-kek chit ê thó͘-tōe. Bí-ná-hiān ēng gûn chi̍t-chheng tha-liân-tek hō͘ Phó͘-le̍k, ài i pang-chān lâi kian-kò͘ i ê kok-koân.

20Bí-ná-hiān tùi以色列一切ê大好額人，強派chiah-ê銀，kah ta̍k人出銀五十sià-khek-le̍k，送hō͘亞述王。Tùi án-ni，亞述王tò去，無tiàm hit所在。Bí-ná-hiān tùi Í-sek-lia̍t it-chhè ê tōa hó-gia̍h lâng, kiông phài chiah ê gûn, kah ta̍k-lâng chhut gûn gō͘-cha̍p sià-khek-le̍k, sàng hō͘ A-su̍t ông. Tùi án-ni A-su̍t ông tò-khì, bô tiàm hit só͘-chāi.

21Bí-ná-hiān其餘ê事，見伊所行ê，kiám無lóng記tī以色列chiah-ê王ê記錄mah？Bí-ná-hiān kî-û ê sū, kìⁿ i só͘ kiâⁿ ê, kiám bô lóng kì tī Í-sek-lia̍t chiah ê ông ê kì-lio̍k mah?

22Bí-ná-hiān kap伊ê列祖同睏；伊ê kiáⁿ Pí-ka-hat續接伊做王。Bí-ná-hiān kap i ê lia̍t-chó͘ tâng-khùn; i ê kiáⁿ Pí-ka-hat sòa-chiap i chòe-ông.

23猶大王A-sat-lī-ngá五十年，Bí-ná-hiān ê kiáⁿ Pí-ka-hat tī撒馬利亞做以色列王，共兩年。Iû-tāi ông A-sat-lī-ngá gō͘-cha̍p nî, Bí-ná-hiān ê kiáⁿ Pí-ka-hat tī Sat-má-lī-a chòe Í-sek-lia̍t ông, kiōng nn̄g-nî.

24伊行耶和華所看做pháiⁿ ê事；無離開Nî-pat ê kiáⁿ Iâ-lô-phò-àm ê罪，就是hō͘以色列犯罪ê。I kiâⁿ Iâ-hô-hoa só͘ khòaⁿ-chòe pháiⁿ ê sū; bô lī-khui Nî-pat ê kiáⁿ Iâ-lô-phò-àm ê chōe, chiū-sī hō͘ Í-sek-lia̍t hoān-chōe--ê.

25伊ê軍長，Lī-má-lī ê kiáⁿ Pí-ka背叛伊，tī撒馬利亞王宮ê衛所phah伊；A-jíⁿ-ko-pek kap A-lī-iâ kap Ki-lia̍t ê人五十個kap伊同謀；thâi死伊，篡伊ê位。I ê kun-tiúⁿ, Lī-má-lī ê kiáⁿ Pí-ka pōe-poān i, tī Sat-má-lī-a ông-kiong ê ōe-só͘ phah i; A-jíⁿ-ko-pek kap A-lī-iâ kap Ki-lia̍t ê lâng gō͘-cha̍p-ê kap i tâng-bô͘; thâi-sí i, chhoàn i ê ūi.

26Pí-ka-hat其餘ê事，見伊所行ê，lóng記tī以色列chiah-ê王ê記錄。Pí-ka-hat kî-û ê sū, kìⁿ i só͘ kiâⁿ ê, lóng kì tī Í-sek-lia̍t chiah ê ông ê kì-lio̍k.

27猶大王A-sat-lī-ngá五十二 年，Lī-má-lī ê kiáⁿ Pí-ka tī撒馬利亞坐位，做以色列王，共二十年。Iû-tāi ông A-sat-lī-ngá gō͘-cha̍p-jī nî, Lī-má-lī ê kiáⁿ Pí-ka tī Sat-má-lī-a chē-ūi, chòe Í-sek-lia̍t ông, kiōng jī-cha̍p nî.

28伊行耶和華所看做pháiⁿ ê事，無離開Nî-pat ê kiáⁿ Iâ-lô-phò-àm ê罪，就是hō͘以色列犯罪ê。I kiâⁿ Iâ-hô-hoa só͘ khòaⁿ-chòe pháiⁿ ê sū, bô lī-khui Nî-pat ê kiáⁿ Iâ-lô-phò-àm ê chōe, chiū-sī hō͘ Í-sek-lia̍t hoān-chōe--ê.

29以色列王Pí-ka ê時，亞述王Thê-kek-la̍h-pí-lia̍t-sek來取Í-hûn、A-pek-pek-má-ka、A-lô、Ki-te-su、Hā-só、Ki-lia̍t、加利利，kap Ná-hut-tha-lī全地；lóng掠in到亞述。Í-sek-lia̍t ông Pí-ka ê sî, A-su̍t ông Thê-kek-la̍h-pí-lia̍t-sek lâi chhú Í-hûn, A-pek-pek-má-ka, A-lô, Ki-te-su, Hā-só, Ki-lia̍t, Ka-lī-lī, kap Ná-hut-tha-lī choân-tōe; lóng lia̍h in kàu A-su̍t.

30O͘-se-ngá ê kiáⁿ Iok-thán二十年，Í-la̍h ê kiáⁿ Hô-sè-a背叛Lī-má-lī ê kiáⁿ Pí-ka，phah來thâi死伊，篡伊ê位。O͘-se-ngá ê kiáⁿ Iok-thán jī-cha̍p nî, Í-la̍h ê kiáⁿ Hô-sè-a pōe-poān Lī-má-lī ê kiáⁿ Pí-ka, phah lâi thâi-sí i, chhoàn i ê ūi.

31Pí-ka其餘ê事，見伊所行ê，lóng記tī以色列chiah-ê王ê記錄。Pí-ka kî-û ê sū, kìⁿ i só͘ kiâⁿ ê, lóng kì tī Í-sek-lia̍t chiah ê ông ê kì-lio̍k.

32以色列王Lī-má-lī ê kiáⁿ Pí-ka第二年，猶大王O͘-se-ngá ê kiáⁿ Iok-thán坐位。Í-sek-lia̍t ông Lī-má-lī ê kiáⁿ Pí-ka tē-jī nî, Iû-tāi ông O͘-se-ngá ê kiáⁿ Iok-thán chē-ūi.

33伊坐位ê時，二十五歲，tī耶路撒冷做王十六年；伊ê老母名叫Iâ-lō͘-sa，是Sat-tok ê cha-bó͘-kiáⁿ。I chē-ūi ê sî, jī-cha̍p-gō͘ hè, tī Iâ-lō͘-sat-léng chòe-ông cha̍p-la̍k nî; i ê lāu-bú miâ kiò Iâ-lō͘-sa, sī Sat-tok ê cha-bó͘-kiáⁿ.

34伊行耶和華所看做好ê事；照伊ê老父O͘-se-ngá一切所行ê去行。I kiâⁿ Iâ-hô-hoa só͘ khòaⁿ-chòe hó ê sū; chiàu i ê lāu-pē O͘-se-ngá it-chhè só͘ kiâⁿ ê khì kiâⁿ.

35總是山頭壇iáu無廢無，百姓猶原獻祭燒香tī山頭壇。Iok-thán起耶和華殿頂面ê門。Chóng-sī soaⁿ-thâu-tôaⁿ iáu bô hòe-bô, peh-sìⁿ iû-goân hiàn-chè sio-hiuⁿ tī soaⁿ-thâu-tôaⁿ. Iok-thán khí Iâ-hô-hoa tiān téng-bīn ê mn̂g.

36Iok-thán其餘ê事，見伊所行ê，kiám無lóng記tī猶大列王ê記錄mah？Iok-thán kî-û ê sū, kìⁿ i só͘ kiâⁿ ê, kiám bô lóng kì tī Iû-tāi lia̍t-ông ê kì-lio̍k mah?

37Hit時耶和華起頭差A-lân王Lī-sìn kap Lī-má-lī ê kiáⁿ Pí-ka去攻擊猶大。Hit-sî Iâ-hô-hoa khí-thâu chhe A-lân ông Lī-sìn kap Lī-má-lī ê kiáⁿ Pí-ka khì kong-kek Iû-tāi.

38Iok-thán kap伊ê列祖同睏，kap伊ê列祖葬tī伊ê祖大衛ê城。伊ê kiáⁿ A-hap-su續接伊做王。Iok-thán kap i ê lia̍t-chó͘ tâng-khùn, kap i ê lia̍t-chó͘ chòng tī i ê chó͘ Tāi-pi̍t ê siâⁿ. I ê kiáⁿ A-hap-su sòa-chiap i chòe-ông.