1猶大王A-hap-sū十二年，Í-la̍h ê kiáⁿ Hô-sè-a tī撒馬利亞坐位，做以色列王共九年。Iû-tāi ông A-hap-sū cha̍p-jī nî, Í-la̍h ê kiáⁿ Hô-sè-a tī Sat-má-lī-a chē-ūi, chòe Í-sek-lia̍t ông kiōng káu nî.

2伊行耶和華所看做pháiⁿ ê事，總是無親像伊以前ê以色列chiah-ê王。I kiâⁿ Iâ-hô-hoa só͘ khòaⁿ-chòe pháiⁿ ê sū, chóng-sī bô chhin-chhiūⁿ i í-chêng ê Í-sek-lia̍t chiah ê ông.

3亞述王Sat-bān-í-sek上來攻擊伊。Hô-sè-a就降服伊，進貢伊。A-su̍t ông Sat-bān-í-sek chiūⁿ-lâi kong-kek i. Hô-sè-a chiū hâng-ho̍k i, chìn-kòng i.

4亞述王知Hô-sè-a有計謀背叛，因為伊bat差使者去見埃及王So，koh無進貢亞述王，親像以前年年ê所做；所以亞述王關禁伊，縛伊tī 監裡。A-su̍t ông chai Hô-sè-a ū kè-bô͘ pōe-poān, in-ūi i bat chhe sù-chiá khì kìⁿ Ai-ki̍p ông So, koh bô chìn-kòng A-su̍t ông, chhin-chhiūⁿ í-chêng nî-nî ê só͘ chòe; só͘-í A-su̍t ông koaiⁿ-kìm--i, pa̍k i tī kaⁿ--nih.

5亞述王上來遍行hit-ê地，koh上來圍攻撒馬利亞三年久。A-su̍t ông chiūⁿ-lâi piàn-kiâⁿ hit ê tōe, koh chiūⁿ-lâi ûi-kong Sat-má-lī-a saⁿ-nî kú.

6Hô-sè-a第九年亞述王取撒馬利亞，掠以色列人到亞述，安置in tī Hap-la̍h，kap Hap-phok，tī Ko-sàn河邊ê kap馬大人hiah-ê城。Hô-sè-a tē-káu nî A-su̍t ông chhú Sat-má-lī-a, lia̍h Í-sek-lia̍t lâng kàu A-su̍t, an-tì in tī Hap-la̍h, kap Hap-phok, tī Ko-sàn hô-piⁿ-ê kap Má-tāi lâng hiah ê siâⁿ.

7這是因為以色列人得罪耶和華in ê上帝，就是chhōa in出埃及地，脫離埃及王法老ê手ê；Che sī in-ūi Í-sek-lia̍t lâng tek-chōe Iâ-hô-hoa in ê Siōng-tè, chiū-sī chhōa in chhut Ai-ki̍p tōe, thoat-lī Ai-ki̍p ông Hoat-ló ê chhiú ê;

8in去敬畏別ê上帝，thàn耶和華tī以色列ê頭前所趕出ê外邦人，kap以色列列王所設ê規例。in khì kèng-ùi pa̍t ê siōng-tè, thàn Iâ-hô-hoa tī Í-sek-lia̍t ê thâu-chêng só͘ kóaⁿ-chhut ê gōa-pang lâng, kap Í-sek-lia̍t lia̍t-ông só͘ siat ê kui-lē.

9以色列人暗靜行不義ê事，得罪耶和華in ê上帝，tī in hiah-ê城，tùi守更樓到堅固ê城，起山頭壇。Í-sek-lia̍t lâng àm-chīⁿ kiâⁿ put-gī ê sū, tek-chōe Iâ-hô-hoa in ê Siōng-tè, tī in hiah ê siâⁿ, tùi chiú-kiⁿ-lâu kàu kian-kò͘ ê siâⁿ, khí soaⁿ-thâu-tôaⁿ.

10Tī ta̍k-ê高山ê頂面，ta̍k叢青翠ê樹腳，khiā柱像，kap hiah-ê A-sià-la̍h；Tī ta̍k ê koâiⁿ-soaⁿ ê téng-bīn, ta̍k châng chhiⁿ-chhùi ê chhiū-kha, khiā thiāu-siōng, kap hiah ê A-sià-la̍h;

11koh tī-hia燒香tī ta̍k-ê山頭壇，親像耶和華tī in ê頭前所趕出ê外邦人ê所行；koh行hiah-ê pháiⁿ-tāi來激耶和華ê受氣。koh tī-hia sio-hiuⁿ tī ta̍k ê soaⁿ-thâu-tôaⁿ, chhin-chhiūⁿ Iâ-hô-hoa tī in ê thâu-chêng só͘ kóaⁿ-chhut ê gōa-pang lâng ê só͘ kiâⁿ; koh kiâⁿ hiah ê pháiⁿ-tāi lâi kek Iâ-hô-hoa ê siū-khì.

12Koh服事偶像，就是耶和華所吩咐in講，M̄-thang án-ni做ê。Koh ho̍k-sāi ngó͘-siōng, chiū-sī Iâ-hô-hoa só͘ hoan-hù in kóng, M̄-thang án-ni chòe--ê.

13總是耶和華託眾先知kap先見ê，對以色列kap猶大做干證，講，Tio̍h離開lín ê pháiⁿ所行，執守我ê誡命、律例，照我吩咐lín ê列祖，kap託我ê奴僕眾先知所傳hō͘ lín完全ê律法。Chóng-sī Iâ-hô-hoa thok chèng sian-ti kap sian-kiàn--ê, tùi Í-sek-lia̍t kap Iû-tāi chòe kan-chèng, kóng, Tio̍h lī-khui lín ê pháiⁿ só͘ kiâⁿ, chip-siú Góa ê kài-bēng, lu̍t-lē, chiàu Góa hoan-hù lín ê lia̍t-chó͘, kap thok Góa ê lô͘-po̍k chèng sian-ti só͘ thoân hō͘ lín oân-choân ê lu̍t-hoat.

14總是in m̄聽，硬in ê頷頸，親像in ê列祖硬in ê頷頸，m̄信服耶和華in ê上帝ê。Chóng-sī in m̄-thiaⁿ, ngī in ê ām-kún, chhin-chhiūⁿ in ê lia̍t-chó͘ ngī in ê ām-kún, m̄ sìn-ho̍k Iâ-hô-hoa in ê Siōng-tè ê.

15In也棄sak伊ê律例，以及伊kap in ê列祖所立ê約，kap 對in所干證ê干證，thàn虛假，來家己做虛假，學周圍ê外邦人；hiah-ê人就是耶和華bat命令in m̄-thang學in ê所行ê。In iā khì-sak I ê lu̍t-lē, í-ki̍p I kap in ê lia̍t-chó͘ só͘ li̍p ê iok, kap tùi in só͘ kan-chèng ê kan-chèng, thàn hu-ké, lâi ka-kī chòe hu-ké, o̍h chiu-ûi ê gōa-pang lâng; hiah ê lâng chiū-sī Iâ-hô-hoa bat bēng-lēng in m̄-thang o̍h in ê só͘-kiâⁿ-ê.

16In離開耶和華in ê上帝一切ê誡命，為本身鑄像，就是兩隻牛á，做A-sià-la̍h，敬拜天頂ê萬象，服事Pa-le̍k。In lī-khui Iâ-hô-hoa in ê Siōng-tè it-chhè ê kài-bēng, ūi pún-sin chù-siōng, chiū-sī nn̄g-chiah gû-á, chòe A-sià-la̍h, kèng-pài thiⁿ-téng ê bān-siōng, ho̍k-sāi Pa-le̍k.

17Koh hō͘ in ê kiáⁿ cha-bó͘-kiáⁿ經過火，也用占卜、邪術，賣家己行耶和華所看做pháiⁿ ê事，激伊ê受氣。Koh hō͘ in ê kiáⁿ cha-bó͘-kiáⁿ keng-kè hé, iā ēng chiam-pok, siâ-su̍t, bōe ka-kī kiâⁿ Iâ-hô-hoa só͘ khòaⁿ-chòe pháiⁿ ê sū, kek I ê siū-khì.

18所以耶和華大受氣以色列人，趕in離開伊ê面前；獨獨chhun猶大一支派nā-tiāⁿ。Só͘-í Iâ-hô-hoa tōa siū-khì Í-sek-lia̍t lâng, kóaⁿ in lī-khui I ê bīn-chêng; to̍k-to̍k chhun Iû-tāi chi̍t chi-phài nā-tiāⁿ.

19猶大也無thàn耶和華in ê上帝ê誡命，就是thàn以色列所立ê規例。Iû-tāi iā bô thàn Iâ-hô-hoa in ê Siōng-tè ê kài-bēng, chiū-sī thàn Í-sek-lia̍t só͘ li̍p ê kui-lē.

20耶和華棄sak以色列ê眾後裔，苦楚in，將in交tī搶掠in ê人ê手，到尾趕出in離開伊ê面前。Iâ-hô-hoa khì-sak Í-sek-lia̍t ê chèng hō͘-è, khó͘-chhó͘ in, chiong in kau tī chhiúⁿ-lia̍h in ê lâng ê chhiú, kàu-bé kóaⁿ-chhut in lī-khui I ê bīn-chêng.

21因為拆以色列離開大衛ê家；in就設立Nî-pat ê kiáⁿ Iâ-lô-phò-àm做王。Iâ-lô-phò-àm逼以色列hō͘ in無thàn耶和華，hō͘ in干犯大罪。In-ūi thiah Í-sek-lia̍t lī-khui Tāi-pi̍t ê ke; in chiū siat-li̍p Nî-pat ê kiáⁿ Iâ-lô-phò-àm chòe ông. Iâ-lô-phò-àm pek Í-sek-lia̍t hō͘ in bô thàn Iâ-hô-hoa, hō͘ in kan-hoān tōa-chōe.

22以色列人行Iâ-lô-phò-àm所犯一切ê罪，無離開伊。Í-sek-lia̍t lâng kiâⁿ Iâ-lô-phò-àm só͘ hoān it-chhè ê chōe, bô lī-khui i.

23致到耶和華遷徙以色列離開伊ê面前，照伊託伊ê奴僕眾先知所講ê；án-ni以色列受掠離開本地到亞述，到今á日。Tì-kàu Iâ-hô-hoa chhian-sóa Í-sek-lia̍t lī-khui I ê bīn-chêng, chiàu I thok I ê lô͘-po̍k chèng sian-ti só͘ kóng ê; án-ni Í-sek-lia̍t siū-lia̍h lī-khui pún-tōe kàu A-su̍t, kàu kin-á-ji̍t.

24亞述王tùi巴比倫、Kó͘-tha、A-óa、Hap-má，kap Se-hoat-óa-im，移徙人來撒馬利亞，安置in tī hiah-ê城，替以色列人；in就得tio̍h撒馬利亞，來khiā起hiah-ê城。A-su̍t ông tùi Pa-pí-lûn, Kó͘-tha, A-óa, Hap-má, kap Se-hoat-óa-im, î-sóa lâng lâi Sat-má-lī-a, an-tì in tī hiah ê siâⁿ, thòe Í-sek-lia̍t lâng; in chiū tit-tio̍h Sat-má-lī-a, lâi khiā-khí hiah ê siâⁿ.

25In起頭khiā起tī-hia ê時，無敬畏耶和華；所以耶和華hō͘獅入in中間，咬死kúi-nā人。In khí-thâu khiā-khí tī-hia ê sî, bô kèng-ùi Iâ-hô-hoa; só͘-í Iâ-hô-hoa hō͘ sai ji̍p in tiong-kan, kā-sí kúi-nā lâng.

26有人報亞述王講，你所移徙安置tī撒馬利亞hiah-ê城ê列邦人，m̄知hit所在ê上帝ê規例，所以伊hō͘獅入來in中間，咬死in，因為in m̄知hit所在ê上帝ê規例。Ū lâng pò A-su̍t ông kóng, Lí só͘ î-sóa an-tì tī Sat-má-lī-a hiah ê siâⁿ ê lia̍t-pang lâng, m̄-chai hit só͘-chāi ê Siōng-tè ê kui-lē, só͘-í I hō͘ sai ji̍p lâi in tiong-kan, kā-sí in, in-ūi in m̄-chai hit só͘-chāi ê Siōng-tè ê kui-lē.

27亞述王就命令講，Tùi hia掠來ê祭司，thang hō͘ in一個tò去，hō͘伊tòa hia khiā起，用hit所在ê上帝ê規例教示in。A-su̍t ông chiū bēng-lēng kóng, Tùi hia lia̍h-lâi ê chè-si, thang hō͘ in chi̍t-ê tò-khì, hō͘ i tòa hia khiā-khí, ēng hit só͘-chāi ê Siōng-tè ê kui-lē kà-sī in.

28Tùi án-ni，hiah-ê tùi撒馬利亞所掠去ê祭司，一個tò來，khiā起tī Pek-te̍k-lī，教示in tio̍h怎樣敬畏耶和華。Tùi án-ni hiah ê tùi Sat-má-lī-a só͘ lia̍h-khì ê chè-si, chi̍t-ê tò-lâi, khiā-khí tī Pek-te̍k-lī, kà-sī in tio̍h cháiⁿ-iūⁿ kèng-ùi Iâ-hô-hoa.

29總是ta̍k邦國ê人造in家己ê上帝；ta̍k國ê人tī in所khiā起hiah-ê城安置伊ê像tī撒馬利亞人前所造ê山頭廟。Chóng-sī ta̍k pang-kok ê lâng chō in ka-kī ê siōng-tè; ta̍k-kok ê lâng tī in só͘ khiā-khí hiah ê siâⁿ an-tì i ê siōng tī Sat-má-lī-a lâng chêng só͘ chō ê soaⁿ-thâu-biō.

30巴比倫人造So͘-kat-pí-la̍p，Kó͘-tha人造Le̍k-kah，Hap-má人造A-sī-má；Pa-pí-lûn lâng chō So͘-kat-pí-la̍p, Kó͘-tha lâng chō Le̍k-kah, Hap-má lâng chō A-sī-má;

31A-óa人造Le̍k-hap kap Tha-jíⁿ-tha，Se-hoat-óa-im人用火燒kiáⁿ兒，獻hō͘ Se-hoat-óa-im ê上帝A-tek-bí-le̍k kap A-ná-bí-le̍k。A-óa lâng chō Le̍k-hap kap Tha-jíⁿ-tha, Se-hoat-óa-im lâng ēng hé sio kiáⁿ-jî, hiàn hō͘ Se-hoat-óa-im ê siōng-tè A-tek-bí-le̍k kap A-ná-bí-le̍k.

32In án-ni敬畏耶和華，tùi眾人中設立人做山頭壇ê祭司，替in獻祭tī山頭廟。In án-ni kèng-ùi Iâ-hô-hoa, tùi chèng-lâng tiong siat-li̍p lâng chòe soaⁿ-thâu-tôaⁿ ê chè-si, thòe in hiàn-chè tī soaⁿ-thâu-biō.

33In敬畏耶和華，koh服事家己ê上帝；tùi甚麼國徙來，就thàn hit國ê規例。In kèng-ùi Iâ-hô-hoa, koh ho̍k-sāi ka-kī ê siōng-tè; tùi sím-mi̍h kok sóa-lâi, chiū thàn hit kok ê kui-lē.

34In到今á日iáu-kú照前ê風俗去行，無敬畏耶和華，無遵thàn in ê律例，kap in ê規例，也無照耶和華命令雅各後裔ê律法誡命；雅各就是伊所稱做以色列ê。In kàu kin-á-ji̍t iáu-kú chiàu chêng ê hong-sio̍k khì kiâⁿ, bô kèng-ùi Iâ-hô-hoa, bô chun-thàn in ê lu̍t-lē, kap in ê kui-lē, iā bô chiàu Iâ-hô-hoa bēng-lēng Ngá-kok hō͘-è ê lu̍t-hoat kài-bēng; Ngá-kok chiū-sī I só͘ chheng chòe Í-sek-lia̍t ê.

35耶和華bat kap in立約，吩咐in講，M̄-thang敬畏別ê上帝，m̄-thang跪拜，m̄-thang服事伊，m̄-thang祭獻伊。Iâ-hô-hoa bat kap in li̍p-iok, hoan-hù in kóng, M̄-thang kèng-ùi pa̍t ê siōng-tè, m̄-thang kūi-pài, m̄-thang ho̍k-sāi i, m̄-thang chè-hiàn i.

36獨獨hit-ê用大權能kap伸出ê手骨chhōa lín出埃及地ê耶和華，lín tio̍h敬畏伊，跪拜伊，祭獻伊。To̍k-to̍k hit-ê ēng tōa koân-lêng kap chhun-chhut ê chhiú-kut chhōa lín chhut Ai-ki̍p tōe ê Iâ-hô-hoa, lín tio̍h kèng-ùi I, kūi-pài I, chè-hiàn I.

37伊寫hō͘ lín ê律例、禮儀、律法、誡命，lín應該永遠執守遵thàn；m̄-thang敬畏別ê上帝。I siá hō͘ lín ê lu̍t-lē, lé-gî, lu̍t-hoat, kài-bēng, lín eng-kai éng-oán chip-siú chun-thàn; m̄-thang kèng-ùi pa̍t ê siōng-tè.

38我kap lín所立ê約，lín m̄-thang bōe記得，也m̄-thang敬畏別ê上帝。Góa kap lín só͘ li̍p ê iok, lín m̄-thang bōe kì-tit, iā m̄-thang kèng-ùi pa̍t ê siōng-tè.

39獨獨tio̍h敬畏耶和華lín ê上帝，伊beh救lín脫離lín一切對敵ê手。To̍k-to̍k tio̍h kèng-ùi Iâ-hô-hoa lín ê Siōng-tè, I beh kiù lín thoat-lī lín it-chhè tùi-te̍k ê chhiú.

40總是in m̄聽thàn，猶原照前ê風俗去行。Chóng-sī in m̄-thiaⁿ-thàn, iû-goân chiàu chêng ê hong-sio̍k khì kiâⁿ.

41Án-ni chiah-ê列國也敬畏耶和華，也服事in ê偶像；in ê kiáⁿ，in ê孫，也lóng是án-ni；in ê祖公所行ê，到今á日in也行伊。Án-ni chiah ê lia̍t-kok iā kèng-ùi Iâ-hô-hoa, iā ho̍k-sāi in ê ngó͘-siōng; in ê kiáⁿ, in ê sun, iā lóng sī án-ni; in ê chó͘-kong só͘ kiâⁿ ê, kàu kin-á-ji̍t in iā kiâⁿ i.

1當以色列王Í-la̍h ê kiáⁿ Hô-sè-a三年，猶大王A-hap-su ê kiáⁿ Hi-se-ka坐位。Tng Í-sek-lia̍t ông Í-la̍h ê kiáⁿ Hô-sè-a saⁿ nî, Iû-tāi ông A-hap-su ê kiáⁿ Hi-se-ka chē-ūi.

2伊坐位ê時，二十五歲；tī耶路撒冷做王，共二十九年；伊ê老母名叫A-pí，是Sat-ka-lī-ngá ê cha-bó͘-kiáⁿ。I chē-ūi ê sî, jī-cha̍p-gō͘ hè; tī Iâ-lō͘-sat-léng chòe ông, kiōng jī-cha̍p-káu nî; i ê lāu-bú miâ kiò A-pí, sī Sat-ka-lī-ngá ê cha-bó͘-kiáⁿ.

3伊行耶和華所看做好ê事，照伊ê祖大衛一切所行ê。I kiâⁿ Iâ-hô-hoa só͘ khòaⁿ-chòe hó ê sū, chiàu i ê chó͘ Tāi-pi̍t it-chhè só͘ kiâⁿ ê.

4伊廢無山頭壇，毀壞柱像，剉A-sià-la̍h，phah碎摩西所造ê銅蛇；因為到hit時以色列人對伊燒香；叫伊做Nî-hut-si-tàn。I hòe-bô soaⁿ-thâu-tôaⁿ, húi-hoāi thiāu-siōng, chhò A-sià-la̍h, phah-chhùi Mô͘-se só͘ chō ê tâng-chôa; in-ūi kàu hit-sî Í-sek-lia̍t lâng tùi i sio-hiuⁿ; kiò i chòe Nî-hut-si-tàn.

5伊óa靠耶和華以色列ê上帝；tī伊以後猶大列王中無一個能比得伊，伊以前也無。I óa-khò Iâ-hô-hoa Í-sek-lia̍t ê Siōng-tè; tī i í-āu Iû-tāi lia̍t-ông tiong bô chi̍t-ê ōe pí-tit i, i í-chêng iā bô.

6因為伊結聯tī耶和華，tè伊無離開，執守耶和華所命令摩西ê誡命。In-ūi i kiat-liân tī Iâ-hô-hoa, tè I bô lī-khui, chip-siú Iâ-hô-hoa só͘ bēng-lēng Mô͘-se ê kài-bēng.

7耶和華kap伊tī-teh，伊無論去toh落，一盡興通；伊背叛亞述王，無服事伊。Iâ-hô-hoa kap i tī-teh, i bô-lūn khì toh-lo̍h, it-chīn heng-thong; i pōe-poān A-su̍t ông, bô ho̍k-sāi i.

8伊攻擊腓利士人，直到Ka-sat，kap伊ê境界，tùi守更樓到堅固ê城。I kong-kek Hui-lī-sū lâng, ti̍t-kàu Ka-sat, kap i ê kéng-kài, tùi chiú-kiⁿ-lâu kàu kian-kò͘ ê siâⁿ.

9Hi-se-ka王第四年，就是以色列王Í-la̍h ê kiáⁿ Hô-sè-a第七年，亞述王Sat-bān-í-sek上來攻擊撒馬利亞，圍困伊。Hi-se-ka ông tē-sì nî, chiū-sī Í-sek-lia̍t ông Í-la̍h ê kiáⁿ Hô-sè-a tē-chhit nî, A-su̍t ông Sat-bān-í-sek chiūⁿ-lâi kong-kek Sat-má-lī-a, ûi-khùn i.

10到第三年尾就取伊；Hi-se-ka六年，以色列王Hô-sè-a九年，撒馬利亞hō͘伊取去。Kàu tē-saⁿ nî bé chiū chhú i; Hi-se-ka la̍k-nî, Í-sek-lia̍t ông Hô-sè-a káu-nî, Sat-má-lī-a hō͘ i chhú--khì.

11亞述王掠以色列人到亞述，安置in tī Hap-la̍h，kap Hap-phok，tī Ko-sàn河邊ê，kap馬大人hiah-ê城。A-su̍t ông lia̍h Í-sek-lia̍t lâng kàu A-su̍t, an-tì in tī Hap-la̍h, kap Hap-phok, tī Ko-sàn hô-piⁿ-ê, kap Má-tāi lâng hiah ê siâⁿ.

12因為in m̄聽thàn耶和華in ê上帝ê話，違背伊ê約；見耶和華ê奴僕摩西所命令ê，in m̄聽，m̄守伊。In-ūi in m̄ thiaⁿ-thàn Iâ-hô-hoa in ê Siōng-tè ê ōe, ûi-pōe I ê iok; kìⁿ Iâ-hô-hoa ê lô͘-po̍k Mô͘-se só͘ bēng-lēng ê, in m̄-thiaⁿ, m̄-siú i.

13Hi-se-ka王十四年，亞述王Se-ná-ki-li̍p上來攻擊猶大一切堅固ê城，取伊。Hi-se-ka ông cha̍p-sì nî, A-su̍t ông Se-ná-ki-li̍p chiūⁿ lâi kong-kek Iû-tāi it-chhè kian-kò͘ ê siâⁿ, chhú i.

14猶大王Hi-se-ka差人去拉結，見亞述王，講，我有罪lah，求你離開我；見你罰我ê，我beh擔當。Tùi án-ni，亞述王派猶大王Hi-se-ka銀三百tha-liân-tek，金三十tha-liân-tek。Iû-tāi ông Hi-se-ka chhe lâng khì La̍h-kiat, kìⁿ A-su̍t ông, kóng, Góa ū-chōe lah, kiû lí lī-khui góa; kìⁿ lí hoa̍t góa ê, góa beh tam-tng. Tùi án-ni A-su̍t ông phài Iû-tāi ông Hi-se-ka gûn saⁿ-pah tha-liân-tek, kim saⁿ-cha̍p tha-liân-tek.

15Hi-se-ka就將耶和華殿內，kap王宮府庫所有ê銀，lóng hō͘伊。Hi-se-ka chiū chiong Iâ-hô-hoa tiān-lāi, kap ông-kiong hú-khò͘ só͘ ū ê gûn, lóng hō͘ i.

16Hit時Hi-se-ka剝耶和華殿門ê金，kap猶大王Hi-se-ka an tī柱裡hiah-ê金，hō͘亞述王。Hit-sî Hi-se-ka pak Iâ-hô-hoa tiān-mn̂g ê kim, kap Iû-tāi ông Hi-se-ka an tī thiāu--nih hiah ê kim, hō͘ A-su̍t ông.

17亞述王tùi拉結差Tha-jíⁿ-thàm、La̍h-pek-sat-lī，kap La̍h-pek-sa-ki，chhōa大隊兵去耶路撒冷，Hi-se-ka王hia；in上去到耶路撒冷。已經到，就來khiā tī頂池ê水溝邊，就是tī漂布師傅ê田ê大路。A-su̍t ông tùi La̍h-kiat chhe Tha-jíⁿ-thàm, La̍h-pek-sat-lī, kap La̍h-pek-sa-ki, chhōa tōa-tūi peng khì Iâ-lō͘-sat-léng, Hi-se-ka ông hia; in chiūⁿ-khì kàu Iâ-lō͘-sat-léng. Í-keng kàu, chiū lâi khiā tī téng-tî ê chúi-kau-piⁿ, chiū-sī tī phiò-pò͘ sai-hū ê chhân ê tōa-lō͘.

18In喉叫王ê時，就有管家ê Hi-le̍k-ka ê kiáⁿ Í-lī-a-kèng，kap書記Sià-pek-ná，kap史官A-sat ê kiáⁿ Iok-a，出來見伊n。In âu-kiò ông ê sî, chiū ū koán-ke ê Hi-le̍k-ka ê kiáⁿ Í-lī-a-kèng, kap su-kì Sià-pek-ná, kap sú-koaⁿ A-sat ê kiáⁿ Iok-a, chhut-lâi kìⁿ in.

19La̍h-pek-sa-ki對in講，lín去kā Hi-se-ka講，亞述王，大王，án-ni講，你所óa靠ê是óa靠甚麼？La̍h-pek-sa-ki tùi in kóng, Lín khì kā Hi-se-ka kóng, A-su̍t ông, tāi-ông, án-ni kóng, Lí só͘ óa-khò ê sī óa-khò sím-mi̍h?

20你講，有計謀，有氣力，thang交戰；這是空空ê話nā-tiāⁿ。你到底óa靠是誰，chiah背叛我ah？Lí kóng, Ū kè-bô͘, ū khùi-la̍t, thang kau-chiàn; che sī khang-khang ê ōe nā-tiāⁿ. Lí tàu-tí óa-khò chī-chūi, chiah pōe-poān góa ah?

21看ah，你所óa靠ê埃及，是hit-ê pit破ê蘆竹稈；人若óa伊，就會刺入伊ê手；埃及王法老對一切óa靠伊ê人，也是án-ni。Khòaⁿ ah, lí só͘ óa-khò ê Ai-ki̍p, sī hit ê pit-phòa ê lô͘-tek-koáiⁿ; lâng nā òa(**óa) i, chiū ōe chhiah-ji̍p i ê chhiú; Ai-ki̍p ông Hoat-ló tùi it-chhè óa-khò i ê lâng, iā sī án-ni.

22Lín若kā我講，阮óa靠耶和華阮ê上帝；chit-ê耶和華kiám m̄是Hi-se-ka bat廢伊ê山頭壇，kap伊hiah-ê祭壇；也bat對猶大kap耶路撒冷ê人講，Lín tio̍h tī耶路撒冷，tī chit-ê壇前敬拜ê mah？Lín nā kā góa kóng, Goán óa-khò Iâ-hô-hoa goán ê Siōng-tè; chit ê Iâ-hô-hoa kiám m̄-sī Hi-se-ka bat hòe I ê soaⁿ-thâu-tôaⁿ, kap I hiah ê chè-tôaⁿ; iā bat tùi Iû-tāi kap Iâ-lō͘-sat-léng ê lâng kóng, Lín tio̍h tī Iâ-lō͘-sat-léng, tī chit ê tôaⁿ-chêng kèng-pài ê mah?

23Taⁿ請你用準當hō͘我ê主亞述王，我hō͘你兩千隻馬，看你hit面會備辦人騎伊á-bōe；Taⁿ chhiáⁿ lí ēng chún-tǹg hō͘ góa ê chú A-su̍t ông, góa hō͘ lí nn̄g-chheng chiah bé, khòaⁿ lí hit-bīn ōe pī-pān lâng khiâ i á-bōe;

24若bōe，thái-thó能phah退我ê主chiah-ê第一細ê奴僕中一個軍長，也竟然óa靠埃及，ài得tio̍h戰車kap馬兵ah？nā bōe, thái-thó ōe phah-thè góa ê chú chiah-ê tē-it sòe ê lô͘-po̍k-tiong chi̍t ê kun-tiúⁿ, iā kéng-jiân óa-khò Ai-ki̍p, ài tit-tio̍h chiàn-chhia kap bé-peng ah?

25Taⁿ我上來攻擊毀滅chit-ê地，kiám無耶和華ê意思mah？耶和華吩咐我講，你上去攻擊毀滅chit-ê地。Taⁿ góa chiūⁿ lâi kong-kek húi-bia̍t chit ê tōe, kiám bô Iâ-hô-hoa ê ì-sù mah? Iâ-hô-hoa hoan-hù góa kóng, Lí chiūⁿ-khì kong-kek húi-bia̍t chit ê tōe.

26Hi-le̍k-ka ê kiáⁿ Í-lī-a-kèng kap Sià-pek-ná、Iok-a，對La̍h-pek-sa-ki講，求你用A-lân ê話kap你ê奴僕講，因為阮會曉聽，m̄-thang用猶大ê話kap阮講，hō͘城頂ê百姓耳孔聽見。Hi-le̍k-ka ê kiáⁿ Í-lī-a-kèng, kap Sià-pek-ná, Iok-a, tùi La̍h-pek-sa-ki kóng, Kiû lí ēng A-lân ê ōe kap lí ê lô͘-po̍k kóng, in-ūi goán ōe hiáu thiaⁿ, m̄-thang ēng Iû-tāi ê ōe kap goán kóng, hō͘ siâⁿ-téng ê peh-sìⁿ hī-khang thiaⁿ-kìⁿ.

27La̍h-pek-sa-ki講，我ê主差我來，kiám是對你ê主kap你講chiah-ê話mah？kiám m̄是對坐tī城頂 ê人講，hō͘ in kap lín平平食家己ê糞，lim家己ê尿mah？La̍h-pek-sa-ki kóng, Góa ê chú chhe góa lâi, kiám sī tùi lí ê chú kap lí kóng chiah ê ōe mah? kiám m̄-sī tùi chē tī siâⁿ-téng ê lâng kóng, hō͘ in kap lín pîⁿ-pîⁿ chia̍h ka-kī ê pùn, lim ka-kī ê jiō mah?

28La̍h-pek-sa-ki就khiā-teh，用猶大ê話大聲叫講，Lín tio̍h聽亞述王，大王ê話。La̍h-pek-sa-ki chiū khiā-teh, ēng Iû-tāi ê ōe tōa-siaⁿ kiò kóng, Lín tio̍h thiaⁿ A-su̍t ông, tāi-ông ê ōe.

29王án-ni講，Lín m̄-thang hō͘ Hi-se-ka所騙；因為伊bōe會救lín脫離王ê手。Ông án-ni kóng, Lín m̄-thang hō͘ Hi-se-ka só͘ phiàn; in-ūi i bōe-ōe kiù lín thoat-lī ông ê chhiú.

30也莫得聽Hi-se-ka kah lín óa靠耶和華，講，耶和華的確beh救咱，chit-ê城的確無交tī亞述王ê手。Iā bo̍h-tit thiaⁿ Hi-se-ka kah lín óa-khò Iâ-hô-hoa, kóng, Iâ-hô-hoa tek-khak beh kiù lán, chit ê siâⁿ tek-khak bô kau tī A-su̍t ông ê chhiú.

31莫得聽Hi-se-ka ê話；因為亞述王án-ni講，Lín tio̍h kap我和好，出來投降我，ta̍k人就thang食家己ê葡萄樹kap無花果樹ê果子，lim家己ê井水；Bo̍h-tit thiaⁿ Hi-se-ka ê ōe; in-ūi A-su̍t ông án-ni kóng, Lín tio̍h kap góa hô-hó, chhut-lâi tâu-hâng góa, ta̍k-lâng chiū thang chia̍h ka-kī ê phû-tô-chhiū kap bû-hoa-kó chhiū ê ké-chí, lim ka-kī ê chíⁿ-chúi;

32thèng候我chhōa lín到一個地kap lín本地無各樣，就是有五穀kap新酒ê地，有米糧kap葡萄園ê地，有橄欖油kap蜜ê地，hō͘ lín活teh無死。Hi-se-ka引誘lín講，耶和華beh拯救咱，lín莫得聽伊ê話。thèng-hāu góa chhōa lín kàu chi̍t ê tōe kap lín pún-tōe bô koh-iūⁿ, chiū-sī ū gō͘-kak kap sin-chiú ê tōe, ū bí-niû kap phû-tô-hn̂g ê tōe, ū kaⁿ-ná-iû kap bi̍t ê tōe, hō͘ lín oa̍h-teh bô sí. Hi-se-ka ín-iú lín kóng, Iâ-hô-hoa beh chín-kiù lán, lín bo̍h-tit thiaⁿ i ê ōe.

33列國ê上帝，kiám有一個bat救伊ê國脫離亞述王ê手mah？Lia̍t-kok ê siōng-tè, kiám ū chi̍t-ê bat kiù i ê kok thoat-lī A-su̍t ông ê chhiú mah?

34Hap-má kap A-jíⁿ-poa̍t ê上帝tī toh落ah？Se-hoat-óa-im、Hi-ná、Í-óa ê上帝tī toh落ah？in kiám bat救撒馬利亞脫離我ê手mah？Hap-má kap A-jíⁿ-poa̍t ê siōng-tè tī toh-lo̍h ah? Se-hoat-óa-im, Hi-ná, Í-óa ê siōng-tè tī toh-lo̍h ah? in kiám bat kiù Sat-má-lī-a thoat-lī góa ê chhiú mah?

35Chiah-ê國ê上帝有是誰 bat救家己ê國脫離我ê手ah，莫kioh耶和華kiám會救耶路撒冷脫離我ê手ah？Chiah ê kok ê siōng-tè ū chī-chūi bat kiù ka-kī ê kok thoat-lī góa ê chhiú ah, bo̍h-kioh Iâ-hô-hoa kiám ōe kiù Iâ-lō͘-sat-léng thoat-lī góa ê chhiú ah?

36百姓靜靜，也無應一句；因為王bat吩咐講，莫得應伊。Peh-sìⁿ chēng-chēng, iā bô ìn chi̍t-kù; in-ūi ông bat hoan-hù kóng, Bo̍h-tit ìn i.

37Hit時Hi-le̍k-ka ê kiáⁿ管家ê Í-lī-a-kèng，kap書記Sià-pek-ná，kap史官A-sat ê kiáⁿ Iok-a，lóng拆裂衫，來到Hi-se-ka hia，將La̍h-pek-sa-ki ê話kā伊講。Hit-sî Hi-le̍k-ka ê kiáⁿ koán-ke ê Í-lī-a-kèng, kap su-kì Sià-pek-ná, kap sú-koaⁿ A-sat ê kiáⁿ Iok-a, lóng thiah-li̍h saⁿ, lâi kàu Hi-se-ka hia, chiong La̍h-pek-sa-ki ê ōe kā i kóng.

1Hi-se-ka王聽見，就拆裂伊ê衫，穿麻布，入耶和華ê殿；Hi-se-ka ông thiaⁿ-kìⁿ, chiū thiah-li̍h i ê saⁿ, chhēng môa-pò͘, ji̍p Iâ-hô-hoa ê tiān;

2差管家ê Í-lī-a-kèng，kap書記Sià-pek-ná，kap祭司中ê老輩ê，lóng穿麻布，去見A-mô͘-su ê kiáⁿ先知以賽亞。chhe koán-ke ê Í-lī-a-kèng, kap su-kì Sià-pek-ná, kap chè-si tiong ê ló-pòe-ê, lóng chhēng môa-pò͘, khì kìⁿ A-mô͘-su ê kiáⁿ sian-ti Í-sài-a.

3對伊講，Hi-se-ka án-ni講，今á日是患難責罰凌辱ê日；是親像kiáⁿ beh出世，也無力thang生出。Tùi i kóng, Hi-se-ka án-ni kóng, Kin-á-ji̍t sī hoān-lān chek-hoa̍t lêng-jio̍k ê ji̍t; sī chhin-chhiūⁿ kiáⁿ beh chhut-sì, iā bô la̍t thang siⁿ-chhut.

4Kiám-chhái耶和華你ê上帝聽見La̍h-pek-sa-ki ê話，就是伊ê主亞述王差伊來侮慢永活上帝ê話；kiám-chhái耶和華你ê上帝為tio̍h聽見chiah-ê話，就beh責備伊；所以求你為tio̍h iáu chhun ê百姓出聲祈禱。Kiám-chhái Iâ-hô-hoa lí ê Siōng-tè thiaⁿ kìⁿ La̍h-pek-sa-ki ê ōe, chiū-sī i ê chú A-su̍t ông chhe i lâi bú-bān éng-oa̍h Siōng-tè ê ōe; kiám-chhái Iâ-hô-hoa lí ê Siōng-tè ūi-tio̍h thiaⁿ-kìⁿ chiah ê ōe, chiū beh chek-pī i; só͘-í kiû lí ūi-tio̍h iáu chhun ê peh-sìⁿ chhut-siaⁿ kî-tó.

5Hi-se-ka王ê人臣就去見以賽亞。Hi-se-ka ông ê jîn-sîn chiū khì kìⁿ Í-sài-a.

6以賽亞對in講，Tio̍h án-ni對lín ê主講，耶和華án-ni講，你聽見亞述王ê奴僕褻瀆我ê話，m̄免驚in。Í-sài-a tùi in kóng, Tio̍h án-ni tùi lín ê chú kóng, Iâ-hô-hoa án-ni kóng, Lí thiaⁿ-kìⁿ A-su̍t ông ê lô͘-po̍k siat-to̍k Góa ê ōe, m̄-bián kiaⁿ in.

7看ah，我beh用一個神入伊ê心，伊beh聽見風聲，就倒tńg去本所在；我beh hō͘伊tī本所在倒tī刀下。Khòaⁿ ah, Góa beh ēng chi̍t ê sîn ji̍p i ê sim, i beh thiaⁿ-kìⁿ hong-siaⁿ, chiū tò-tńg-khì pún só͘-chāi; Góa beh hō͘ i tī pún só͘-chāi tó tī to-ē.

8La̍h-pek-sa-ki tò去，tú-tio̍h亞述王teh phah Li̍p-ná；因為伊有聽見亞述王離開拉結。La̍h-pek-sa-ki tò-khì, tú-tio̍h A-su̍t ông teh phah Li̍p-ná; in-ūi i ū thiaⁿ-kìⁿ A-su̍t ông lī-khui La̍h-kiat.

9王聽見講，Kó͘-si̍t王Te̍k-hap-ka出來beh kap你交戰；就差使者去見Hi-se-ka，吩咐in講，Ông thiaⁿ-kìⁿ kóng, Kó͘-si̍t ông Te̍k-hap-ka chhut-lâi beh kap lí kau-chiàn; chiū chhe sù-chiá khì kìⁿ Hi-se-ka, hoan-hù in kóng,

10Tio̍h kā猶大王Hi-se-ka án-ni講，你所óa靠你ê上帝講，耶路撒冷的確無交tī亞述王ê手，你莫得hō͘伊欺騙。Tio̍h kā Iû-tāi ông Hi-se-ka án-ni kóng, Lí só͘ óa-khò lí ê Siōng-tè kóng, Iâ-lō͘-sat-léng tek-khak bô kau tī A-su̍t ông ê chhiú, lí bo̍h-tit hō͘ I khi-phiàn.

11看ah，你總有聽見亞述chiah-ê王對列國所行ê，是一盡滅伊，總無你iáu會得tio̍h救mah？Khòaⁿ ah, lí chóng ū thiaⁿ-kìⁿ A-su̍t chiah ê ông tùi lia̍t-kok só͘-kiâⁿ-ê, sī it-chīn bia̍t i, chóng bô lí iáu ōe tit-tio̍h kiù mah?

12阮ê列祖所毀滅ê，就是Ko-sàn、哈蘭、Lī-sit，kap屬Thê-la̍h-sat ê伊甸人，chiah-ê國ê上帝kiám bat救in mah？Goán ê lia̍t-chó͘ só͘ húi-bia̍t-ê, chiū-sī Ko-sàn, Hap-lân, Lī-sek, kap sio̍k Thê-la̍h-sat ê Ai-tiân lâng, chiah ê kok ê siōng-tè kiám bat kiù in mah?

13Hap-má ê王，A-jíⁿ-poa̍t ê王，Se-hoat-óa-im城ê王，Hi-ná kap Í-óa ê王，lóng tī toh落？Hap-má ê ông, A-jíⁿ-poa̍t ê ông, Se-hoat-óa-im siâⁿ ê ông, Hi-ná kap Í-óa ê ông, lóng tī toh-lo̍h?

14Hi-se-ka tùi使者ê手接tio̍h phoe，讀伊，Hi-se-ka就上去耶和華ê殿，將phoe排tī耶和華ê面前。Hi-se-ka tùi sù-chiá ê chhiú chih-tio̍h phoe, tha̍k i, Hi-se-ka chiū chiūⁿ-khì Iâ-hô-hoa ê tiān, chiong phoe pâi tī Iâ-hô-hoa ê bīn-chêng.

15Hi-se-ka tī耶和華ê面前祈禱講，坐tī ki-lō͘兵ê中間，耶和華，以色列ê上帝ah，獨獨你做天下萬國ê上帝；你bat創造天地。Hi-se-ka tī Iâ-hô-hoa ê bīn-chêng kî-tó kóng, Chē tī ki-lō͘-peng ê tiong-kan, Iâ-hô-hoa, Í-sek-lia̍t ê Siōng-tè ah, to̍k-to̍k Lí chòe thiⁿ-ē bān-kok ê Siōng-tè; Lí bat chhòng-chō thiⁿ tōe.

16耶和華ah，求你àⁿ耳孔來聽；耶和華ah，求你開目睭來看；tio̍h聽Se-ná-ki-li̍p ê話，是差使者來侮慢永活ê上帝ê。Iâ-hô-hoa ah, kiû Lí àⁿ hī-khang lâi thiaⁿ; Iâ-hô-hoa ah, kiû Lí khui ba̍k-chiu lâi khòaⁿ; tio̍h thiaⁿ Se-ná-ki-li̍p ê ōe, sī chhe sù-chiá lâi bú-bān éng-oa̍h ê Siōng-tè ê.

17耶和華ah，亞述chiah-ê王果然hō͘列國kap in ê地變做拋荒，Iâ-hô-hoa ah, A-su̍t chiah ê ông kó-jiân hō͘ lia̍t-kok kap in ê tōe pìⁿ chòe pha-hng,

18也將in ê上帝hiat tī火裡，因為in m̄是上帝，是人ê手所造ê，柴ê，石ê；in就剿滅伊。iā chiong in ê siōng-tè hiat tī hé--nih, in-ūi in m̄-sī Siōng-tè, sī lâng ê chhiú só͘ chō--ê, chhâ--ê, chio̍h--ê; in chiū châu-bia̍t i.

19耶和華阮ê上帝ah，taⁿ我求你救阮脫離伊ê手，hō͘天下萬國lóng知獨獨你耶和華是上帝。Iâ-hô-hoa goán ê Siōng-tè ah, taⁿ góa kiû Lí kiù goán thoat-lī i ê chhiú, hō͘ thiⁿ-ē bān-kok lóng chai to̍k-to̍k Lí Iâ-hô-hoa sī Siōng-tè.

20A-mô͘-su ê kiáⁿ以賽亞就差人去見Hi-se-ka講，耶和華，以色列ê上帝，án-ni講，你既然因為亞述王Se-ná-ki-li̍p ê緣故祈求我，我有聽見。A-mô͘-su ê kiáⁿ Í-sài-a chiū chhe lâng khì kìⁿ Hi-se-ka kóng, Iâ-hô-hoa, Í-sek-lia̍t ê Siōng-tè, án-ni kóng, Lí kì-jiân in-ūi A-su̍t ông Se-ná-ki-li̍p ê iân-kò͘ kî-kiû Góa, Góa ū thiaⁿ-kìⁿ.

21Taⁿ論到伊，耶和華有án-ni講，錫安ê在室女藐視你，恥笑你，耶路撒冷ê cha-bó͘-gín-ná對你搖頭。Taⁿ lūn-kàu i, Iâ-hô-hoa ū án-ni kóng, Sek-an ê chāi-sek-lú biáu-sī lí, thí-chhiò lí, Iâ-lō͘-sat-léng ê cha-bó͘-gín-ná tùi lí iô-thâu.

22你凌辱侮慢是誰 ah？出大聲，目睭niah高高，攻擊是誰 ah？就是攻擊以色列ê聖ê。Lí lêng-jio̍k bú-bān chī-chūi ah? chhut tōa-siaⁿ, ba̍k-chiu niah koâiⁿ-koâiⁿ, kong-kek chī-chūi ah? chiū-sī kong-kek Í-sek-lia̍t ê Sèng--ê.

23你差你ê使者侮慢主，講，我chhōa chōe-chōe戰車上到山尖，到Lī-pa-lùn極深ê所在；我beh剉hit塊高大ê柏香柴，kap siōng好ê松樹；我beh到伊極遠歇睏ê所在，kap伊肥地ê樹林。Lí chhe lí ê sù-chiá bú-bān Chú, kóng, Góa chhōa chōe-chōe chiàn-chhia chiūⁿ kàu soaⁿ-chiam, kàu Lī-pa-lùn ke̍k-chhim ê só͘-chāi; góa beh chhò hit tè koâiⁿ-tōa ê pek-hiuⁿ-chhâ, kap siōng-hó ê siông-chhiū; góa beh kàu i ke̍k-hn̄g hioh-khùn ê só͘-chāi, kap i pûi-tōe ê chhiū-nâ.

24我有開井lim外邦ê水，我用腳掌踏埃及一切ê河，hō͘伊乾去。Góa ū khui-chíⁿ lim gōa-pang ê chúi, góa ēng kha-chiúⁿ ta̍h Ai-ki̍p it-chhè ê hô, hō͘ i ta--khì.

25耶和華講，你kiám bē-bat聽見，我tī源起頭所做，tī古早所定tio̍h-ê mah？taⁿ我成伊，是hō͘你毀壞堅固ê城，變做hāu-phiaⁿ-phè。Iâ-hô-hoa kóng, Lí kiám bē-bat thiaⁿ-kìⁿ, Góa tī goân-khí-thâu só͘ chòe, tī kó͘-chá só͘ tiāⁿ-tio̍h-ê mah? taⁿ Góa chiâⁿ i, sī hō͘ lí húi-hoāi kian-kò͘ ê siâⁿ, pìⁿ-chòe hāu-phiaⁿ-phè.

26所以其中khiā起ê百姓，氣力真少，驚惶見笑；in親像曠野ê草，青翠ê菜，親像厝頂ê草，親像iáu未大叢就枯焦ê 稻á。Só͘-í kî-tiong khiā-khí ê peh-sìⁿ, khùi-la̍t chin-chió, kiaⁿ-hiâⁿ kiàn-siàu; in chhin-chhiūⁿ khòng-iá ê chháu, chhiⁿ-chhùi ê chhài, chhin-chhiūⁿ chhù-téng ê chháu, chhin-chhiūⁿ iáu-bē tōa-châng chiū ko͘-tâ ê tiū-á.

27你坐落去，你出去，你入來，你ê大受氣我，我lóng知。Lí chē--lo̍h-khì, lí chhut-khì, lí ji̍p-lâi, lí ê tōa siū-khì Góa, Góa lóng chai.

28因為你大受氣我，koh因為你驕傲ê話thàng到我ê耳孔，我就beh用我ê鉤，鉤你ê鼻，用我ê馬咬韁，掛tī你ê嘴，hō͘你tùi原路tò去。In-ūi lí tōa siū-khì Góa, koh in-ūi lí kiau-ngō͘ ê ōe thàng kàu Góa ê hī-khang, Góa chiū beh ēng Góa ê kau, kau lí ê phīⁿ, ēng Góa ê bé-kā-kiuⁿ, kòa tī lí ê chhùi, hō͘ lí tùi goân-lō͘ tò-khì.

29Hi-se-ka ah，chit-ê hō͘你做兆頭；今年lín beh食家己發ê物，明年beh食tùi hit-ê所出ê，到第三年，lín tio̍h種作收割，栽種葡萄園，來食伊ê果子。Hi-se-ka ah, chit-ê hō͘ lí chòe tiāu-thâu; kin-nî lín beh chia̍h ka-kī hoat ê mi̍h, mê-nî beh chia̍h tùi hit-ê só͘ chhut ê, kàu tē-saⁿ nî, lín tio̍h chèng-choh siu-koah, chai-chèng phû-tô-hn̂g, lâi chia̍h i ê ké-chí.

30猶大家脫離患難所chhun ê百姓，beh猶原下面釘根，頂面結果子。Iû-tāi ke thoat-lī hoān-lān só͘ chhun ê peh-sìⁿ, beh iû-goân ē-bīn tèng-kun, téng-bīn kiat ké-chí.

31因為beh有chhun ê百姓tùi耶路撒冷出來，beh有逃走ê人tùi錫安山來。耶和華ê熱心beh成chit-ê事。In-ūi beh ū chhun ê peh-sìⁿ tùi Iâ-lō͘-sat-léng chhut-lâi, beh ū tô-cháu ê lâng tùi Sek-an soaⁿ lâi. Iâ-hô-hoa ê jia̍t-sim beh chiâⁿ chit ê sū.

32所以耶和華論亞述王講，伊的確bōe到chit-ê城，也bōe tī-chia射箭，bōe會giâ藤牌到城前，也bōe起土堆來攻擊伊。Só͘-í Iâ-hô-hoa lūn A-su̍t ông kóng, I tek-khak bōe kàu chit ê siâⁿ, iā bōe tī-chia siā-chìⁿ, bōe-ōe giâ tîn-pâi kàu siâⁿ-chêng, iā bōe khí thô͘-tui lâi kong-kek i.

33伊tùi hit條路來，beh tùi hit條路tò去，bōe會來到chit-ê城；這是耶和華講ê。I tùi hit tiâu lō͘ lâi, beh tùi hit tiâu lō͘ tò-khì, bōe-ōe lâi kàu chit ê siâⁿ; che sī Iâ-hô-hoa kóng ê.

34因為我為tio̍h家己ê緣故，koh為tio̍h我ê奴僕大衛ê緣故，beh保護chit-ê城，來拯救伊。In-ūi Góa ūi-tio̍h ka-kī ê iân-kò͘, koh ūi-tio̍h Góa ê lô͘-po̍k Tāi-pi̍t ê iân-kò͘, beh pó-hō͘ chit ê siâⁿ, lâi chín-kiù i.

35Hit暝耶和華ê使者出去，tī亞述營中phah死十八萬五千人；到天光早起來ê時，看ah，lóng是死ê身屍。Hit-mî Iâ-hô-hoa ê sù-chiá chhut-khì, tī A-su̍t iâⁿ-tiong phah-sí cha̍p-poeh-bān gō͘-chheng lâng; kàu thiⁿ-kng-chá khí-lâi ê sî, khòaⁿ ah, lóng sī sí ê sin-si.

36亞述王Se-ná-ki-li̍p就離開，tò去，tiàm tī尼尼微。A-su̍t ông Se-ná-ki-li̍p chiū lī-khui, tò-khì, tiàm tī Nî-nî-bî.

37Tī伊ê上帝Nî-su-lo̍k ê廟敬拜ê時，伊ê kiáⁿ A-tek-bí-le̍k kap Sa-lī-sit用刀thâi伊；in就走到A-la̍h-lia̍p ê地。伊ê kiáⁿ Í-sat-hap-tùn續接伊做王。Tī i ê siōng-tè Nî-su-lo̍k ê biō kèng-pài ê sî, i ê kiáⁿ A-tek-bí-le̍k kap Sa-lī-sek ēng to thâi i; in chiū cháu kàu A-la̍h-lia̍p ê tōe. I ê kiáⁿ Í-sat-hap-tùn sòa-chiap i chòe ông.