1王差人聚集猶大kap耶路撒冷ê眾長老。Ông chhe lâng chū-chi̍p Iû-tāi kap Iâ-lō͘-sat-léng ê chèng tiúⁿ-ló.

2王就上去耶和華ê殿；猶大眾人kap khiā起耶路撒冷ê百姓，kap祭司、先知，kap眾百姓，無論大細，lóng kap伊去。王就將耶和華殿內偶然得tio̍h約ê冊一切ê話，讀hō͘ in聽。Ông chiū chiūⁿ-khì Iâ-hô-hoa ê tiān; Iû-tāi chèng lâng kap khiā-khí Iâ-lō͘-sat-léng ê peh-sìⁿ, kap chè-si, sian-ti, kap chèng peh-sìⁿ, bô-lūn tōa-sòe, lóng kap i khì. Ông chiū chiong Iâ-hô-hoa tiān-lāi ngó͘-jiân tit-tio̍h iok ê chheh it-chhè ê ōe, tha̍k hō͘ in thiaⁿ.

3王khiā tī柱邊，tī耶和華ê面前立約，beh盡心盡性順thàn耶和華，守伊ê誡命，kap干證ê話，kap律例，來成chit本冊所記立約ê話。百姓lóng承認chit-ê約。Ông khiā tī thiāu-piⁿ, tī Iâ-hô-hoa ê bīn-chêng li̍p-iok, beh chīn-sim chīn-sèng sūn-thàn Iâ-hô-hoa, siú I ê kài-bēng, kap kan-chèng ê ōe, kap lu̍t-lē, lâi chiâⁿ chit pún chheh só͘ kì li̍p-iok ê ōe. Peh-sìⁿ lóng sêng-jīn chit ê iok.

4王命令祭司頭Hi-le̍k-ka，kap第二級ê祭司，kap顧門ê官，將為tio̍h Pa-le̍k，kap A-sià-la̍h，kap天頂ê萬象，所造hiah-ê器具，搬出耶和華ê殿，燒伊tī耶路撒冷外，Khip-lûn溪邊ê田，帶伊ê火灰到Pek-te̍k-lī。Ông bēng-lēng chè-si-thâu Hi-le̍k-ka, kap tē-jī-kip ê chè-si, kap kò͘-mn̂g ê koaⁿ, chiong ūi-tio̍h Pa-le̍k, kap A-sià-la̍h, kap thiⁿ-téng ê bān-siōng, só͘ chō hiah ê khì-kū, poaⁿ-chhut Iâ-hô-hoa ê tiān, sio i tī Iâ-lō͘-sat-léng gōa, Khip-lûn khoe-piⁿ ê chhân, tòa i ê hé-hu kàu Pek-te̍k-lī.

5前猶大列王所設立拜偶像ê祭司，tī猶大hiah-ê城，kap耶路撒冷四圍ê山頭壇燒香ê，taⁿ王lóng lut伊，也lut hiah-ê燒香tī Pa-le̍k，kap日、月、行星，以及天頂ê萬象ê。Chêng Iû-tāi lia̍t-ông só͘ siat-li̍p pài ngó͘-siōng ê chè-si, tī Iû-tāi hiah ê siâⁿ, kap Iâ-lō͘-sat-léng sì-ûi ê soaⁿ-thâu-tôaⁿ sio-hiuⁿ--ê, taⁿ ông lóng lut i, iā lut hiah ê sio-hiuⁿ tī Pa-le̍k, kap ji̍t, ge̍h, hêng-chhiⁿ, í-ki̍p thiⁿ-téng ê bān-siōng ê.

6伊koh帶A-sià-la̍h出耶和華ê殿，去耶路撒冷外，到Khip-lûn 溪，tī Khip-lûn溪燒伊，搥伊做粉，用hit-ê粉掖tī百姓ê墓。I koh tòa A-sià-la̍h chhut Iâ-hô-hoa ê tiān, khì Iâ-lō͘-sat-léng gōa, kàu Khip-lûn khoe, tī Khip-lûn khoe sio i, tûi i chòe hún, ēng hit ê hún iā tī peh-sìⁿ ê bōng.

7Koh毀耶和華殿內攣童ê厝，就是婦女為tio̍h A-sià-la̍h織布棚ê所在。Koh húi Iâ-hô-hoa tiān-lāi loân-tông ê chhù, chiū-sī hū-lú ūi-tio̍h A-sià-la̍h chit pò͘-pîⁿ ê só͘-chāi.

8Koh tùi猶大hiah-ê城帶hiah-ê祭司出去，phah lâ-sâm祭司燒香ê山頭壇，tùi Ka-pa到別是巴；也拆毀hiah-ê門ê山頭壇，就是tī管城ê約書亞ê門前，就是人入城門ê tò-pêng。Koh tùi Iû-tāi hiah ê siâⁿ tòa hiah ê chè-si chhut-khì, phah lâ-sâm chè-si sio-hiuⁿ ê soaⁿ-thâu-tôaⁿ, tùi Ka-pa kàu Pia̍t-sī-pa; iā thiah-húi hiah ê mn̂g ê soaⁿ-thâu-tôaⁿ, chiū-sī tī koán-siâⁿ--ê Iok-su-a ê mn̂g-chêng, chiū-sī lâng ji̍p siâⁿ-mn̂g ê tò-pêng.

9總是山頭壇ê祭司tī耶路撒冷，無上耶和華ê壇，只有tī in兄弟中食無酵餅。Chóng-sī soaⁿ-thâu-tôaⁿ ê chè-si tī Iâ-lō͘-sat-léng, bô chiūⁿ Iâ-hô-hoa ê tôaⁿ, chí-ū tī in hiaⁿ-tī tiong chia̍h bô-kàⁿ-piáⁿ.

10伊koh phah lâ-sâm tī Piān-him-lùn ê Tô-húi-te̍k，免得人tī-hia hō͘ in ê kiáⁿ cha-bó͘-kiáⁿ經過火，來獻hō͘ Mô͘-lo̍k。I koh phah lâ-sâm tī Piān-him-lùn ê Tô-húi-te̍k, bián-tit lâng tī-hia hō͘ in ê kiáⁿ cha-bó͘-kiáⁿ keng-kè hé, lâi hiàn hō͘ Mô͘-lo̍k.

11Koh除去猶大列王獻hō͘日頭hiah-ê馬，tī入耶和華殿ê所在，tī太監Ná-tan-bí-le̍k óa近léng廊ê厝；koh用火燒日頭hiah-ê車。Koh tû-khì Iû-tāi lia̍t-ông hiàn hō͘ ji̍t-thâu hiah ê bé, tī ji̍p Iâ-hô-hoa tiān ê só͘-chāi, tī thài-kàm Ná-tan-bí-le̍k óa-kūn léng-lông ê chhù; koh ēng hé sio ji̍t-thâu hiah ê chhia.

12猶大列王tī A-hap-su ê樓頂ê厝蓋所起 ê祭壇，kap Má-ná-se tī耶和華殿兩個院中所起ê壇，王lóng毀壞伊，tùi hit所在遷徙伊，piàⁿ伊ê粉tī Khip-lûn溪。Iû-tāi lia̍t-ông tī A-hap-su ê lâu-téng ê chhù-kòa só͘ khí ê chè-tôaⁿ, kap Má-ná-se tī Iâ-hô-hoa tiān nn̄g ê īⁿ-tiong só͘ khí ê tôaⁿ, ông lóng húi-hoāi--i, tùi hit só͘-chāi chhian-sóa--i, piàⁿ i ê hún tī Khip-lûn khoe.

13從前以色列王所羅門tī耶路撒冷ê頭前，tī斜僻山ê chiàⁿ-pêng，所起 ê山頭壇，服事Se-tùn人可惡ê A-su-tha-lio̍k，Mô͘-ap人可惡ê Ki-boa̍t，A-bûn人可惡ê Bí-le̍k-kong ê，王lóng phah lâ-sâm伊；Chiông-chêng Í-sek-lia̍t ông Só͘-lô-bûn tī Iâ-lō͘-sat-léng ê thâu-chêng, tī siâ-phiah-soaⁿ ê chiàⁿ-pêng, só͘ khí ê soaⁿ-thâu-tôaⁿ, ho̍k-sāi Se-tùn lâng khó-ò͘ⁿ ê A-su-tha-lio̍k, Mô͘-ap lâng khó-ò͘ⁿ ê Ki-boa̍t, A-bûn lâng khó-ò͘ⁿ ê Bí-le̍k-kong ê, ông lóng phah lâ-sâm i;

14koh毀壞hiah-ê柱像，剉hiah-ê A-sià-la̍h，將人ê骨頭充滿hiah-ê所在。koh húi-hoāi hiah ê thiāu-siōng, chhò hiah ê A-sià-la̍h, chiong lâng ê kut-thâu chhiong-móa hiah ê só͘-chāi.

15Tī Pek-te̍k-lī ê壇，以及Nî-pat ê kiáⁿ Iâ-lô-phò-àm，hō͘以色列犯罪ê，所起 ê山頭廟；taⁿ約西亞毀hit-ê壇kap山頭廟，koh 燒伊ê山頭廟，搥伊成粉；續燒hit-ê A-sià-la̍h。Tī Pek-te̍k-lī ê tôaⁿ, í-ki̍p Nî-pat ê kiáⁿ Iâ-lô-phò-àm, hō͘ Í-sek-lia̍t hoān-chōe--ê, só͘ khí ê soaⁿ-thâu-biō; taⁿ Iok-se-a húi hit ê tôaⁿ kap soaⁿ-thâu-biō, koh sio i ê soaⁿ-thâu-biō, tûi i chiâⁿ hún; sòa sio hit ê A-sià-la̍h.

16約西亞oa̍t-tńg身看見山裡hiah-ê墓，就差人去the̍h墓內ê骨頭，燒tī壇頂，來phah lâ-sâm伊；照耶和華所講，就是前宣傳chiah-ê tāi-chì上帝ê奴僕所宣傳ê。Iok-se-a oa̍t-tńg-sin khòaⁿ-kìⁿ soaⁿ--nih hiah ê bōng, chiū chhe lâng khì the̍h bōng-lāi ê kut-thâu, sio tī tôaⁿ-téng, lâi phah lâ-sâm i; chiàu Iâ-hô-hoa só͘ kóng, chiū-sī chêng soan-thoân chiah ê tāi-chì Siōng-tè ê lô͘-po̍k só͘ soan-thoân ê.

17約西亞講，我所看見ê石碑是甚麼？hit-ê城ê人kā伊講，前有上帝ê奴僕tùi猶大來，事先講你現今所做ê事來攻擊Pek-te̍k-lī ê壇ê；chit-ê是伊ê墓。Iok-se-a kóng, Góa só͘ khòaⁿ-kìⁿ ê chio̍h-pi sī sím-mi̍h? Hit ê siâⁿ ê lâng kā i kóng, Chêng ū Siōng-tè ê lô͘-po̍k tùi Iû-tāi lâi, tāi-seng kóng lí hiān-kim só͘ chòe ê sū lâi kong-kek Pek-te̍k-lī ê tôaⁿ--ê; chit-ê sī i ê bōng.

18伊講，莫得chhap伊，人m̄-thang遷徙伊ê骨頭。In就無動tio̍h伊ê骨頭，也無動tio̍h tùi撒馬利亞來hit-ê先知ê骨頭。I kóng, Bo̍h-tit chhap i, lâng m̄-thang chhian-sóa i ê kut-thâu. In chiū bô tāng-tio̍h i ê kut-thâu, iā bô tāng-tio̍h tùi Sat-má-lī-a lâi hit ê sian-ti ê kut-thâu.

19撒馬利亞hiah-ê城內山頭ê厝，就是前以色列chiah-ê王所起來激耶和華ê受氣ê，taⁿ約西亞毀伊；照伊所行tī Pek-te̍k-lī ê來行tī in；Sat-má-lī-a hiah ê siâⁿ-lāi soaⁿ-thâu ê chhù, chiū-sī chêng Í-sek-lia̍t chiah ê ông só͘ khí lâi kek Iâ-hô-hoa ê siū-khì-ê, taⁿ Iok-se-a húi i; chiàu i só͘ kiâⁿ tī Pek-te̍k-lī--ê lâi kiâⁿ tī in;

20koh thâi死hit所在山頭廟ê祭司tī壇頂；也燒人ê骨頭tī壇頂；chiah tò去耶路撒冷。koh thâi-sí hit só͘-chāi soaⁿ-thâu-biō ê chè-si tī tôaⁿ-téng; iā sio lâng ê kut-thâu tī tôaⁿ-téng; chiah tò-khì Iâ-lō͘-sat-léng.

21王命令眾百姓講，Tio̍h守pôaⁿ過節來服事耶和華lín ê上帝，照chit-ê約ê冊所記ê。Ông bēng-lēng chèng peh-sìⁿ kóng, Tio̍h siú pôaⁿ-kè-choeh lâi ho̍k-sāi Iâ-hô-hoa lín ê Siōng-tè, chiàu chit ê iok ê chheh só͘-kì-ê.

22Tùi士師治理以色列ê時，kap以色列王，猶大列王ê時，實在bē有守親像chit號ê pôaⁿ過節。Tùi sū-su tī-lí Í-sek-lia̍t ê sî, kap Í-sek-lia̍t-ông, Iû-tāi lia̍t-ông ê sî, si̍t-chāi bē ū siú chhin-chhiūⁿ chit-hō ê pôaⁿ-kè-choeh.

23只有約西亞王十八年tī耶路撒冷守chit-ê pôaⁿ過節服事耶和華。Chí-ū Iok-se-a ông cha̍p-poeh nî tī Iâ-lō͘-sat-léng siú chit ê pôaⁿ-kè-choeh ho̍k-sāi Iâ-hô-hoa.

24猶大地kap耶路撒冷所有跳童ê，做司公ê，kap家內ê偶像，kap神佛，kap一切可惡ê物，約西亞lóng除伊，來成律法ê話，是記tī祭司Hi-le̍k-ka tī耶和華ê殿所得tio̍h ê冊所記ê。Iû-tāi tōe kap Iâ-lō͘-sat-léng só͘ ū thiàu-tâng--ê, chòe sai-kong-ê, kap ke-lāi ê ngó͘-siōng, kap sîn-pu̍t, kap it-chhè khó-ò͘ⁿ ê mi̍h, Iok-se-a lóng tû i, lâi chiâⁿ lu̍t-hoat ê ōe, sī kì tī chè-si Hi-le̍k-ka tī Iâ-hô-hoa ê tiān só͘ tit-tio̍h ê chheh só͘ kì ê.

25Tī約西亞以前無有王親像伊盡心盡性盡力歸向耶和華，照摩西一切ê律法；tī伊以後，也無出一個王親像伊。Tī Iok-se-a í-chêng bô ū ông chhin-chhiūⁿ i chīn-sim chīn-sèng chīn-la̍t kui-ǹg Iâ-hô-hoa, chiàu Mô͘-se it-chhè ê lu̍t-hoat; tī i í-āu, iā bô chhut chi̍t ê ông chhin-chhiūⁿ i.

26總是耶和華無soah伊猛烈ê大受氣，就是伊對猶大發出ê受氣，是因為Má-ná-se所激tio̍h伊受氣hiah-ê事。Chóng-sī Iâ-hô-hoa bô soah I béng-lia̍t ê tōa siū-khì, chiū-sī I tùi Iû-tāi hoat-chhut ê siū-khì, sī in-ūi Má-ná-se só͘ kek-tio̍h I siū-khì hiah ê sū.

27耶和華講，我beh遷徙猶大離開我ê面前，親像遷徙以色列一樣；我beh棄sak我所揀chit-ê城，就是耶路撒冷，kap chit間殿，就是我指伊來講，我ê名beh tī-hia ê。Iâ-hô-hoa kóng, Góa beh chhian-sóa Iû-tāi lī-khui Góa ê bīn-chêng, chhin-chhiūⁿ chhian-sóa Í-sek-lia̍t chi̍t-iūⁿ; Góa beh khì-sak Góa só͘ kéng chit ê siâⁿ, chiū-sī Iâ-lō͘-sat-léng, kap chit keng tiān, chiū-sī Góa chí i lâi kóng, Góa ê miâ beh tī-hia--ê.

28約西亞其餘ê事，見伊所行ê，kiám無lóng記tī猶大列王ê記錄mah？Iok-se-a kî-û ê sū, kìⁿ i só͘ kiâⁿ ê, kiám bô lóng kì tī Iû-tāi lia̍t-ông ê kì-lio̍k mah?

29約西亞ê年間，埃及王Hoat-ló-nî-ko上Pek-la̍h河，攻擊亞述王，約西亞去抵擋伊；埃及王tú-tio̍h約西亞tī Bí-kiat-to就thâi伊。Iok-se-a ê nî-kan, Ai-ki̍p ông Hoat-ló-nî-ko chiūⁿ Pek-la̍h hô, kong-kek A-su̍t ông, Iok-se-a khì tí-tng i; Ai-ki̍p ông tú-tio̍h Iok-se-a tī Bí-kiat-to chiū thâi i.

30伊ê人臣用車載伊ê身屍tùi Bí-kiat-to，帶伊到耶路撒冷，埋葬tī伊本身ê墓。國民將約西亞ê kiáⁿ Iok-hap-su用油抹伊，設立伊做王，續接伊ê老父。I ê jîn-sîn ēng chhia chài i ê sin-si tùi Bí-kiat-to, tòa i kàu Iâ-lō͘-sat-léng, bâi-chòng tī i pún-sin ê bōng. Kok-bîn chiong Iok-se-a ê kiáⁿ Iok-hap-su ēng iû boah i, siat-li̍p i chòe ông, sòa-chiap i ê lāu-pē.

31Iok-hap-su坐位ê時，二十三歲，tī耶路撒冷做王三月日。伊ê老母名Hap-bó͘-tha，是Li̍p-ná人耶利米ê cha-bó͘-kiáⁿ。Iok-hap-su chē-ūi ê sî, jī-cha̍p-saⁿ hè, tī Iâ-lō͘-sat-léng chòe ông saⁿ-ge̍h-ji̍t. I ê lāu-bú miâ Hap-bó͘-tha, sī Li̍p-ná lâng Iâ-lī-bí ê cha-bó͘-kiáⁿ.

32伊行耶和華所看做pháiⁿ ê事，照伊ê列祖一切所行ê。I kiâⁿ Iâ-hô-hoa só͘ khòaⁿ-chòe pháiⁿ ê sū, chiàu i ê lia̍t-chó͘ it-chhè só͘ kiâⁿ--ê.

33Hoat-ló-nî-ko關禁伊tī Hap-má地ê Lī-pí-la̍h，hō͘伊無做王tī耶路撒冷；koh hō͘ hit國進貢銀一百tha-liân-tek，金一tha-liân-tek。Hoat-ló-nî-ko koaiⁿ-kìm i tī Hap-má tōe ê Lī-pí-la̍h, hō͘ i bô chòe ông tī Iâ-lō͘-sat-léng; koh hō͘ hit-kok chìn-kòng gûn chi̍t-pah tha-liân-tek, kim chi̍t tha-liân-tek.

34Hoat-ló-nî-ko設立約西亞ê kiáⁿ Í-lī-a-kèng續接伊ê老父約西亞做王，kā伊改名叫Iok-ngá-kèng；也帶Iok-hap-su到埃及；伊就死tī-hia。Hoat-ló-nî-ko siat-li̍p Iok-se-a ê kiáⁿ Í-lī-a-kèng sòa-chiap i ê lāu-pē Iok-se-a chòe ông, kā i kóe-miâ kiò Iok-ngá-kèng; iā tòa Iok-hap-su kàu Ai-ki̍p; i chiū sí tī-hia.

35Iok-ngá-kèng用銀kap金hō͘法老，照法老ê命令，tùi hit地方收銀來hō͘伊，強抽hit地方百姓ê金銀，ta̍k人照所派定tio̍h ê，來hō͘ Hoat-ló-nî-ko。Iok-ngá-kèng ēng gûn kap kim hō͘ Hoat-ló, chiàu Hoat-ló ê bēng-lēng, tùi hit tōe-hng siu gûn lâi hō͘ i, kiông-thiu hit tōe-hng peh-sìⁿ ê kim-gûn, ta̍k-lâng chiàu só͘ phài tiāⁿ-tio̍h--ê, lâi hō͘ Hoat-ló-nî-ko.

36Iok-ngá-敬坐位ê時，二十五歲，tī耶路撒冷做王，共十一年。伊ê老母名叫Se-pò͘-tāi，是Ló͘-má人Pì-tāi-ngá ê cha-bó͘-kiáⁿ。Iok-ngá-kèng chē-ūi ê sî, jī-cha̍p-gō͘ hè, tī Iâ-lō͘-sat-léng chòe ông, kiōng cha̍p-it nî. I ê lāu-bú miâ kiò Se-pò͘-tāi, sī Ló͘-má lâng Pì-tāi-ngá ê cha-bó͘-kiáⁿ.

37Iok-ngá-kèng行耶和華所看做pháiⁿ ê事，照伊ê列祖一切所行ê。Iok-ngá-kèng kiâⁿ Iâ-hô-hoa só͘ khòaⁿ-chòe pháiⁿ ê sū, chiàu i ê lia̍t-chó͘ it-chhè só͘ kiâⁿ ê.

1Iok-ngá-kèng ê年間，巴比倫王Nî-pò͘-kah-nî-sat上來。Iok-ngá-kèng服事伊三年；後來反tńg悖逆伊。Iok-ngá-kèng ê nî-kan, Pa-pí-lûn ông Nî-pò͘-kah-nî-sat chiūⁿ-lâi. Iok-ngá-kèng ho̍k-sāi i saⁿ nî; āu-lâi hoán-tńg pōe-ge̍k i.

2耶和華差Ka-le̍k-tí ê軍隊，A-lân ê軍隊，Mô͘-ap ê軍隊，kap A-bûn ê軍隊，來攻擊伊；koh差in攻擊猶大beh滅伊；照耶和華託伊ê奴僕chiah-ê先知所講ê。Iâ-hô-hoa chhe Ka-le̍k-tí ê kun-tūi, A-lân ê kun-tūi, Mô͘-ap ê kun-tūi, kap A-bûn ê kun-tūi, lâi kong-kek i; koh chhe in kong-kek Iû-tāi beh bia̍t i; chiàu Iâ-hô-hoa thok I ê lô͘-po̍k chiah ê sian-ti só͘ kóng ê.

3Chit-ê事臨到猶大，實在是tùi耶和華ê命令beh遷徙伊，離開伊ê面前；這lóng是因為Má-ná-se ê罪，照伊一切所行ê；Chit ê sū lîm-kàu Iû-tāi, si̍t-chāi sī tùi Iâ-hô-hoa ê bēng-lēng beh chhian-sóa i, lī-khui I ê bīn-chêng; che lóng sī in-ūi Má-ná-se ê chōe, chiàu i it-chhè só͘ kiâⁿ ê;

4也為tio̍h伊流無罪ê人ê血，因為伊用無罪ê人ê血充滿耶路撒冷；chit-ê罪耶和華m̄肯赦免。iā ūi-tio̍h i lâu bô-chōe ê lâng ê huih, in-ūi i ēng bô-chōe ê lâng ê huih chhiong-móa Iâ-lō͘-sat-léng; chit ê chōe Iâ-hô-hoa m̄-khéng sià-bián.

5Iok-ngá-kèng其餘ê事，見伊所行ê，kiám無lóng記tī猶大列王ê記錄mah？Iok-ngá-kèng kî-û ê sū, kìⁿ i só͘ kiâⁿ ê, kiám bô lóng kì tī Iû-tāi lia̍t-ông ê kì-lio̍k mah?

6Iok-ngá-kèng kap伊ê列祖同睏；伊ê kiáⁿ Iok-ngá-kun續接伊做王。Iok-ngá-kèng kap i ê lia̍t-chó͘ tâng-khùn; i ê kiáⁿ Iok-ngá-kun sòa-chiap i chòe-ông.

7埃及王無koh對伊ê地出來；因為巴比倫有王取見屬埃及王ê地，tùi埃及小河，到Pek-la̍h河。Ai-ki̍p ông bô koh tùi i ê tōe chhut-lâi; in-ūi Pa-pí-lûn ū ông chhú kìⁿ sio̍k Ai-ki̍p ông ê tōe, tùi Ai-ki̍p sió-hô, kàu Pek-la̍h hô.

8Iok-ngá-kun坐位ê時，十八歲，tī耶路撒冷做王三月日；伊ê老母名叫Nî-hō͘-si-tha，是耶路撒冷人Í-lī-ná-tan ê cha-bó͘-kiáⁿ。Iok-ngá-kun chē-ūi ê sî, cha̍p-poeh-hè, tī Iâ-lō͘-sat-léng chòe ông saⁿ-ge̍h-ji̍t; i ê lāu-bú miâ kiò Nî-hō͘-si-tha, sī Iâ-lō͘-sat-léng lâng Í-lī-ná-tan ê cha-bó͘-kiáⁿ.

9Iok-ngá-kun行耶和華所看做pháiⁿ ê事，照伊ê老父一切所行。Iok-ngá-kun kiâⁿ Iâ-hô-hoa só͘ khòaⁿ-chòe pháiⁿ ê sū, chiàu i ê lāu-pē it-chhè só͘ kiâⁿ.

10Hit時巴比倫王Nî-pò͘-kah-nî-sat ê人臣上來耶路撒冷，圍困hit-ê城。Hit-sî Pa-pí-lûn ông Nî-pò͘-kah-nî-sat ê jîn-sîn chiūⁿ lâi Iâ-lō͘-sat-léng, ûi-khùn hit ê siâⁿ.

11當伊ê人臣圍困城ê時，巴比倫王Nî-pò͘-kah-nî-sat就來。Tng i ê jîn-sîn ûi-khùn siâⁿ ê sî, Pa-pí-lûn ông Nî-pò͘-kah-nî-sat chiū lâi.

12猶大王Iok-ngá-kun出城到巴比倫王hia，伊kap伊ê老母，kap伊ê人臣、首領、太監，lóng去。巴比倫王掠伊；tī伊做王第八年。Iû-tāi ông Iok-ngá-kun chhut siâⁿ kàu Pa-pí-lûn ông hia, i kap i ê lāu-bú, kap i ê jîn-sîn, siú-léng, thài-kàm, lóng khì. Pa-pí-lûn ông lia̍h i; tī i chòe ông tē-poeh nî.

13Koh將耶和華殿內ê寶物，kap王宮ê寶物，lóng tùi hia the̍h去；將以色列王所羅門所造耶和華殿內ê金器，lóng phah破，照耶和華所講ê話；Koh chiong Iâ-hô-hoa tiān-lāi ê pó-mi̍h, kap ông-kiong ê pó-mi̍h, lóng tùi hia the̍h-khì; chiong Í-sek-lia̍t ông Só͘-lô-bûn só͘ chō Iâ-hô-hoa tiān-lāi ê kim-khì, lóng phah-phòa, chiàu Iâ-hô-hoa só͘ kóng ê ōe;

14koh將耶路撒冷ê眾百姓，kap眾首領，以及所有大權能ê勇士，共一萬人，連一切ê工匠、鐵匠，lóng掠去；除國內極sòng-hiong ê人以外，無chhun一個；koh chiong Iâ-lō͘-sat-léng ê chèng peh-sìⁿ, kap chèng siú-léng, í-ki̍p só͘ ū tōa koân-lêng ê ióng-sū, kiōng chi̍t-bān lâng, liân it-chhè ê kang-chhiūⁿ, thih-chhiūⁿ, lóng lia̍h-khì; tû kok-lāi ke̍k sòng-hiong ê lâng í-gōa, bô chhun chi̍t-ê;

15也帶Iok-ngá-kun到巴比倫，kap太后、后妃、太監，kap國內ê大官，lóng掠伊tùi耶路撒冷到巴比倫。iā tòa Iok-ngá-kun kàu Pa-pí-lûn, kap thài-hō͘, hō͘-hui, thài-kàm, kap kok-lāi ê tōa-koaⁿ, lóng lia̍h i tùi Iâ-lō͘-sat-léng kàu Pa-pí-lûn.

16Koh將一切ê勇士七千人，kap工匠、鐵匠，一千人，lóng是勇壯能上陣ê，巴比倫王lóng掠伊到巴比倫。Koh chiong it-chhè ê ióng-sū chhit-chheng lâng, kap kang-chhiūⁿ, thih-chhiūⁿ, chi̍t-chheng lâng, lóng sī ióng-chòng ōe chiūⁿ-tīn-ê, Pa-pí-lûn ông lóng lia̍h i kàu Pa-pí-lûn.

17巴比倫王設立Iok-ngá-kun ê叔Má-thàm-ngá做王續接伊，換伊ê名叫Se-tí-ka。Pa-pí-lûn ông siat-li̍p Iok-ngá-kun ê chek Má-thàm-ngá chòe ông sòa-chiap i, ōaⁿ i ê miâ kiò Se-tí-ka.

18Se-tí-ka坐位ê時，二十一歲，tī耶路撒冷做王十一年；伊ê老母名Hap-bō͘-tha，是Li̍p-ná人耶利米ê cha-bó͘-kiáⁿ。Se-tí-ka chē-ūi ê sî, jī-cha̍p-it hè, tī Iâ-lō͘-sat-léng chòe ông cha̍p-it nî; i ê lāu-bú miâ Hap-bō͘-tha, sī Li̍p-ná lâng Iâ-lī-bí ê cha-bó͘-kiáⁿ.

19伊行耶和華所看做pháiⁿ ê事，照Iok-ngá-kèng一切所行ê。I kiâⁿ Iâ-hô-hoa só͘ khòaⁿ-chòe pháiⁿ ê sū, chiàu Iok-ngá-kèng it-chhè só͘ kiâⁿ ê.

20耶路撒冷kap猶大tú-tio̍h chiah-ê事，是因為耶和華發出受氣，beh tùi伊ê面前趕出in。Iâ-lō͘-sat-léng kap Iû-tāi tú-tio̍h chiah ê sū, sī in-ūi Iâ-hô-hoa hoat-chhut siū-khì, beh tùi I ê bīn-chêng kóaⁿ-chhut in.

1Se-tí-ka背叛巴比倫王。當伊坐位第九年，十月初十，巴比倫王Nî-pò͘-kah-nî-sat chhōa伊全軍來攻擊耶路撒冷，tī城ê對面紮營，koh tī四圍作土堆攻擊城。Se-tí-ka pōe-poān Pa-pí-lûn ông. Tng i chē-ūi tē-káu nî, cha̍p-ge̍h chhoe-cha̍p, Pa-pí-lûn ông Nî-pò͘-kah-nî-sat chhōa i choân-kun lâi kong-kek Iâ-lō͘-sat-léng, tī siâⁿ ê tùi-bīn chat-iâⁿ, koh tī sì-ûi choh thô͘-tui kong-kek siâⁿ.

2Tùi án-ni，城受圍困，直到Se-tí-ka王十一年。Tùi án-ni siâⁿ siū ûi-khùn, ti̍t-kàu Se-tí-ka ông cha̍p-it nî.

3四月初九日，城內飢荒真傷重，致到hit所在ê百姓lóng無米糧。Sì-ge̍h chhoe-káu ji̍t, siâⁿ-lāi ki-hng chin siong-tiōng, tì-kàu hit só͘-chāi ê peh-sìⁿ lóng bô bí-niû.

4城受攻破，一切ê兵丁透暝，tùi óa近王ê園，兩個城牆中ê門hit條路逃走。Ka-le̍k-tí人tú-tú tī四圍攻擊城，王就tùi A-la̍h-pa ê路逃走。Siâⁿ siū kong-phòa, it-chhè ê peng-teng thàu-mî, tùi óa-kūn ông ê hn̂g, nn̄g ê siâⁿ-chhiûⁿ tiong ê mn̂g hit tiâu lō͘ tô-cháu. Ka-le̍k-tí lâng tú-tú tī sì-ûi kong-kek siâⁿ, ông chiū tùi A-la̍h-pa ê lō͘ tô-cháu.

5Ka-le̍k-tí ê軍兵追jip王，tī耶利哥ê平洋追tio̍h伊，伊ê全軍lóng離開伊四散。Ka-le̍k-tí ê kun-peng tui-jip ông, tī Iâ-lī-ko ê pîⁿ-iûⁿ tui-tio̍h i, i ê choân-kun lóng lī-khui i sì-sòaⁿ.

6In掠tio̍h王，帶到Lī-pí-la̍h巴比倫王hia，就審判伊。In lia̍h-tio̍h ông, tòa kàu Lī-pí-la̍h Pa-pí-lûn ông hia, chiū sím-phòaⁿ i.

7Tī Se-tí-ka ê目睭前，thâi死Se-tí-ka hiah-ê kiáⁿ，koh iah Se-tí-ka兩蕊目睭，用鐵鏈鏈伊，帶伊到巴比倫。Tī Se-tí-ka ê ba̍k-chiu chêng, thâi-sí Se-tí-ka hiah ê kiáⁿ, koh iah Se-tí-ka nn̄g-lúi ba̍k-chiu, ēng thih-liān liān i, tòa i kàu Pa-pí-lûn.

8巴比倫王Nî-pò͘-kah-nî-sat王十九年，五月初七日，跟隨巴比倫王ê侍衛長Nî-pò͘-sat-la̍h-tàn到耶路撒冷；Pa-pí-lûn ông Nî-pò͘-kah-nî-sat ông cha̍p-káu nî, gō͘-ge̍h chhoe-chhit ji̍t, kun-sûi Pa-pí-lûn ông ê sī-ōe-tiúⁿ Nî-pò͘-sat-la̍h-tàn kàu Iâ-lō͘-sat-léng;

9用火燒耶和華ê殿，kap王宮，koh用火燒耶路撒冷一切ê厝，就是富貴家ê厝。ēng hé sio Iâ-hô-hoa ê tiān, kap ông-kiong, koh ēng hé sio Iâ-lō͘-sat-léng it-chhè ê chhù, chiū-sī hù-kùi ke ê chhù.

10跟tè侍衛長Ka-le̍k-tí ê全軍，就拆毀耶路撒冷四圍ê城牆。Kun-tè sī-ōe-tiúⁿ Ka-le̍k-tí ê choân-kun, chiū thiah-húi Iâ-lō͘-sat-léng sì-ûi ê siâⁿ-chhiûⁿ.

11Hit時侍衛長Nî-pò͘-sat-la̍h-tàn，將留tī城內所chhun ê百姓，kap hiah-ê投降巴比倫王ê，以及眾人中所chhun-ê，lóng掠去。Hit-sî sī-ōe-tiúⁿ Nî-pò͘-sat-la̍h-tàn, chiong lâu tī siâⁿ-lāi só͘ chhun ê peh-sìⁿ, kap hiah ê tâu-hâng Pa-pí-lûn ông ê, í-ki̍p chèng-lâng tiong só͘ chhun-ê, lóng lia̍h-khì.

12獨獨侍衛長留第一sòng-hiong-ê，hō͘ in治理葡萄園kap種作。To̍k-to̍k sī-ōe-tiúⁿ lâu tē-it sòng-hiong-ê, hō͘ in tī-lí phû-tô-hn̂g kap chèng-choh.

13耶和華殿內ê銅柱，kap耶和華殿內ê盆座，以及銅海，Ka-le̍k-tí人lóng phah破，將hiah-ê銅運到巴比倫；Iâ-hô-hoa tiān-lāi ê tâng-thiāu, kap Iâ-hô-hoa tiān-lāi ê phûn-chō, í-ki̍p tâng-hái, Ka-le̍k-tí lâng lóng phah-phòa, chiong hiah ê tâng ūn-kàu Pa-pí-lûn;

14koh帶去鼎、托á、剪刀、碗，kap所用一切ê銅器；koh tòa-khì tiáⁿ, thuh-á, chián-to, óaⁿ, kap só͘ ēng it-chhè ê tâng-khì;

15火爐、盤，一切金器ê金，銀器ê銀，侍衛長lóng帶去。hé-lô͘, pôaⁿ, it-chhè kim-khì ê kim, gûn-khì ê gûn, sī-ōe-tiúⁿ lóng tòa-khì.

16Koh帶所羅門王為耶和華ê殿所chhòng兩支柱，一個銅海，kap hiah-ê座；chiah-ê器具ê銅bōe能秤伊ê輕重。Koh tòa Só͘-lô-bûn ông ūi Iâ-hô-hoa ê tiān só͘ chhòng nn̄g ki thiāu, chi̍t ê tâng-hái, kap hiah ê chō; chiah ê khì-kū ê tâng bōe-ōe chhìn i ê khin-tāng.

17Chit支柱高十八肘，伊ê頂面有銅ê柱斗；柱斗高三肘；柱斗ê周圍有網á kap石榴，lóng是銅做ê；第二支柱siâng一款，也有網á。Chit ki thiāu koâiⁿ cha̍p-poeh tiú, i ê téng-bīn ū tâng ê thiāu-táu; thiāu-táu koâiⁿ saⁿ-tiú; thiāu-táu ê chiu-ûi ū bāng-á kap sia̍h-liû, lóng sī tâng chòe ê; tē-jī ki thiāu siâng chi̍t khoán, iā ū bāng-á.

18侍衛長掠祭司頭Se-lâi-ngá，kap第二級ê祭司Se-hoan-a，kap三個顧門ê；Sī-ōe-tiúⁿ lia̍h chè-si-thâu Se-lâi-ngá, kap tē jī kip ê chè-si Se-hoan-a, kap saⁿ ê kò͘-mn̂g--ê;

19koh tùi城內掠一個管兵ê官，kap tī城內所tú-tio̍h常常見王ê面ê五人，kap軍長ê書記點算百姓ê，以及城中所tú-tio̍h ê國民六十人。koh tùi siâⁿ-lāi lia̍h chi̍t ê koán-peng ê koaⁿ, kap tī siâⁿ-lāi só͘ tú-tio̍h siông-siông kìⁿ ông ê bīn ê gō͘ lâng, kap kun-tiúⁿ ê su-kì tiám-sǹg peh-sìⁿ ê, í-ki̍p siâⁿ-tiong só͘ tú-tio̍h ê kok-bîn la̍k-cha̍p lâng.

20侍衛長Nî-pò͘-sat-la̍h-tàn將chiah-ê人帶到Lī-pí-la̍h，巴比倫王hia。Sī-ōe-tiúⁿ Nî-pò͘-sat-la̍h-tàn chiong chiah ê lâng tòa kàu Lī-pí-la̍h, Pa-pí-lûn ông hia.

21巴比倫王phah in tī Hap-má地ê Lī-pí-la̍h，thâi死in。Án-ni猶大ê百姓受掠離開本地。Pa-pí-lûn ông phah in tī Hap-má tōe ê Lī-pí-la̍h, thâi-sí in. Án-ni Iû-tāi ê peh-sìⁿ siū-lia̍h lī-khui pún-tōe.

22論到猶大國chhun ê百姓，就是巴比倫王Nî-pò͘-kah-nî-sat所留ê，王設立Sa-hoan ê孫，A-hi-kam ê kiáⁿ，Ki-tāi-lī，管轄in。Lūn-kàu Iû-tāi kok chhun ê peh-sìⁿ, chiū-sī Pa-pí-lûn ông Nî-pò͘-kah-nî-sat só͘ lâu--ê, ông siat-li̍p Sa-hoan ê sun, A-hi-kam ê kiáⁿ, Ki-tāi-lī, koán-hat in.

23眾軍長kap屬in ê人，聽見巴比倫王設立Ki-tāi-lī管轄in。Tùi án-ni，Nî-thàm-ngá ê kiáⁿ以實瑪利，Ka-lī-a ê kiáⁿ Iok-hap-lân，Nî-tô-hoat ê人Tan-hō͘-bia̍t ê kiáⁿ Se-lâi-ngá，Má-ka人ê kiáⁿ Ngá-sat-nî-a，kap屬in ê人，lóng到Bí-su-pa見Ki-tāi-lī。Chèng kun-tiúⁿ kap sio̍k in ê lâng, thiaⁿ-kìⁿ Pa-pí-lûn ông siat-li̍p Ki-tāi-lī koán-hat in. Tùi án-ni Nî-thàm-ngá ê kiáⁿ Í-si̍t-má-lī, Κa-lī-a ê kiáⁿ Iok-hap-lân, Nî-tô-hoat ê lâng Tan-hō͘-bia̍t ê kiáⁿ Se-lâi-ngá, Má-ka lâng ê kiáⁿ Ngá-sat-nî-a, kap sio̍k in ê lâng, lóng kàu Bí-su-pa kìⁿ Ki-tāi-lī.

24Ki-tāi-lī tùi in kap屬in ê人chiù-chōa，講，Lín莫得驚Ka-le̍k-tí ê人臣；做lín tiàm chit所在，服事巴比倫王，就thang得tio̍h福氣。Ki-tāi-lī tùi in kap sio̍k in ê lâng chiù-chōa, kóng, Lín bo̍h-tit kiaⁿ Ka-le̍k-tí ê jîn-sîn; chòe lín tiàm chit só͘-chāi, ho̍k-sāi Pa-pí-lûn ông, chiū thang tit-tio̍h hok-khì.

25七月間，王親Í-lī-sa-má ê孫，Nî-thàm-ngá ê kiáⁿ，以實瑪利，帶十人kap伊來，phah死Ki-tāi-lī以及kap伊tī Bí-su-pa ê猶大人，kap Ka-le̍k-tí人。Chhit-ge̍h-kan ông-chhin Í-lī-sa-má ê sun, Nî-thàm-ngá ê kiáⁿ, Í-si̍t-má-lī, tòa cha̍p-lâng kap i lâi, phah-sí Ki-tāi-lī í-ki̍p kap i tī Bí-su-pa ê Iû-tāi lâng, kap Ka-le̍k-tí lâng.

26Tùi án-ni，眾百姓無論大細，kap hiah-ê軍長，lóng起來去埃及；因為驚Ka-le̍k-tí人ê緣故。Tùi án-ni chèng peh-sìⁿ bô-lūn tōa-sòe, kap hiah ê kun-tiúⁿ, lóng khí-lâi khì Ai-ki̍p; in-ūi kiaⁿ Ka-le̍k-tí lâng ê iân-kò͘.

27猶大王Iok-ngá-kun受掠了後第三十七年，巴比倫王Í-bī-bí-lô-ta̍t元年，十二月二十七日，舉起猶大王Iok-ngá-kun，放伊出監。Iû-tāi ông Iok-ngá-kun siū-lia̍h liáu-āu tē saⁿ-cha̍p-chhit nî, Pa-pí-lûn ông Í-bī-bí-lô-ta̍t goân--nî, cha̍p-jī ge̍h jī-cha̍p-chhit ji̍t, kú-khí Iû-tāi ông Iok-ngá-kun, pàng i chhut-kaⁿ.

28亦用好話安慰伊，hō͘伊ê位khah高其餘chiah-ê王ê位，就是kap伊同tī巴比倫ê。Ia̍h ēng hó-ōe an-ùi i, hō͘ i ê ūi khah-koâiⁿ kî-û chiah ê ông ê ūi, chiū-sī kap i tâng tī Pa-pí-lûn ê.

29Thǹg去伊監內所穿ê衫，一世人kap巴比倫王相kap食。Thǹg--khì i kaⁿ-lāi só͘ chhēng ê saⁿ, chi̍t-sì-lâng kap Pa-pí-lûn ông saⁿ-kap chia̍h.

30巴比倫王賞賜伊所欠用ê植物，日日hō͘伊一份，一世人lóng是án-ni。Pa-pí-lûn ông siúⁿ-sù i só͘ khiàm-ēng ê si̍t-bu̍t, ji̍t-ji̍t hō͘ i chi̍t-hūn, chi̍t-sì-lâng lóng sī án-ni.