1Iok-ngá-kèng ê年間，巴比倫王Nî-pò͘-kah-nî-sat上來。Iok-ngá-kèng服事伊三年；後來反tńg悖逆伊。Iok-ngá-kèng ê nî-kan, Pa-pí-lûn ông Nî-pò͘-kah-nî-sat chiūⁿ-lâi. Iok-ngá-kèng ho̍k-sāi i saⁿ nî; āu-lâi hoán-tńg pōe-ge̍k i.

2耶和華差Ka-le̍k-tí ê軍隊，A-lân ê軍隊，Mô͘-ap ê軍隊，kap A-bûn ê軍隊，來攻擊伊；koh差in攻擊猶大beh滅伊；照耶和華託伊ê奴僕chiah-ê先知所講ê。Iâ-hô-hoa chhe Ka-le̍k-tí ê kun-tūi, A-lân ê kun-tūi, Mô͘-ap ê kun-tūi, kap A-bûn ê kun-tūi, lâi kong-kek i; koh chhe in kong-kek Iû-tāi beh bia̍t i; chiàu Iâ-hô-hoa thok I ê lô͘-po̍k chiah ê sian-ti só͘ kóng ê.

3Chit-ê事臨到猶大，實在是tùi耶和華ê命令beh遷徙伊，離開伊ê面前；這lóng是因為Má-ná-se ê罪，照伊一切所行ê；Chit ê sū lîm-kàu Iû-tāi, si̍t-chāi sī tùi Iâ-hô-hoa ê bēng-lēng beh chhian-sóa i, lī-khui I ê bīn-chêng; che lóng sī in-ūi Má-ná-se ê chōe, chiàu i it-chhè só͘ kiâⁿ ê;

4也為tio̍h伊流無罪ê人ê血，因為伊用無罪ê人ê血充滿耶路撒冷；chit-ê罪耶和華m̄肯赦免。iā ūi-tio̍h i lâu bô-chōe ê lâng ê huih, in-ūi i ēng bô-chōe ê lâng ê huih chhiong-móa Iâ-lō͘-sat-léng; chit ê chōe Iâ-hô-hoa m̄-khéng sià-bián.

5Iok-ngá-kèng其餘ê事，見伊所行ê，kiám無lóng記tī猶大列王ê記錄mah？Iok-ngá-kèng kî-û ê sū, kìⁿ i só͘ kiâⁿ ê, kiám bô lóng kì tī Iû-tāi lia̍t-ông ê kì-lio̍k mah?

6Iok-ngá-kèng kap伊ê列祖同睏；伊ê kiáⁿ Iok-ngá-kun續接伊做王。Iok-ngá-kèng kap i ê lia̍t-chó͘ tâng-khùn; i ê kiáⁿ Iok-ngá-kun sòa-chiap i chòe-ông.

7埃及王無koh對伊ê地出來；因為巴比倫有王取見屬埃及王ê地，tùi埃及小河，到Pek-la̍h河。Ai-ki̍p ông bô koh tùi i ê tōe chhut-lâi; in-ūi Pa-pí-lûn ū ông chhú kìⁿ sio̍k Ai-ki̍p ông ê tōe, tùi Ai-ki̍p sió-hô, kàu Pek-la̍h hô.

8Iok-ngá-kun坐位ê時，十八歲，tī耶路撒冷做王三月日；伊ê老母名叫Nî-hō͘-si-tha，是耶路撒冷人Í-lī-ná-tan ê cha-bó͘-kiáⁿ。Iok-ngá-kun chē-ūi ê sî, cha̍p-poeh-hè, tī Iâ-lō͘-sat-léng chòe ông saⁿ-ge̍h-ji̍t; i ê lāu-bú miâ kiò Nî-hō͘-si-tha, sī Iâ-lō͘-sat-léng lâng Í-lī-ná-tan ê cha-bó͘-kiáⁿ.

9Iok-ngá-kun行耶和華所看做pháiⁿ ê事，照伊ê老父一切所行。Iok-ngá-kun kiâⁿ Iâ-hô-hoa só͘ khòaⁿ-chòe pháiⁿ ê sū, chiàu i ê lāu-pē it-chhè só͘ kiâⁿ.

10Hit時巴比倫王Nî-pò͘-kah-nî-sat ê人臣上來耶路撒冷，圍困hit-ê城。Hit-sî Pa-pí-lûn ông Nî-pò͘-kah-nî-sat ê jîn-sîn chiūⁿ lâi Iâ-lō͘-sat-léng, ûi-khùn hit ê siâⁿ.

11當伊ê人臣圍困城ê時，巴比倫王Nî-pò͘-kah-nî-sat就來。Tng i ê jîn-sîn ûi-khùn siâⁿ ê sî, Pa-pí-lûn ông Nî-pò͘-kah-nî-sat chiū lâi.

12猶大王Iok-ngá-kun出城到巴比倫王hia，伊kap伊ê老母，kap伊ê人臣、首領、太監，lóng去。巴比倫王掠伊；tī伊做王第八年。Iû-tāi ông Iok-ngá-kun chhut siâⁿ kàu Pa-pí-lûn ông hia, i kap i ê lāu-bú, kap i ê jîn-sîn, siú-léng, thài-kàm, lóng khì. Pa-pí-lûn ông lia̍h i; tī i chòe ông tē-poeh nî.

13Koh將耶和華殿內ê寶物，kap王宮ê寶物，lóng tùi hia the̍h去；將以色列王所羅門所造耶和華殿內ê金器，lóng phah破，照耶和華所講ê話；Koh chiong Iâ-hô-hoa tiān-lāi ê pó-mi̍h, kap ông-kiong ê pó-mi̍h, lóng tùi hia the̍h-khì; chiong Í-sek-lia̍t ông Só͘-lô-bûn só͘ chō Iâ-hô-hoa tiān-lāi ê kim-khì, lóng phah-phòa, chiàu Iâ-hô-hoa só͘ kóng ê ōe;

14koh將耶路撒冷ê眾百姓，kap眾首領，以及所有大權能ê勇士，共一萬人，連一切ê工匠、鐵匠，lóng掠去；除國內極sòng-hiong ê人以外，無chhun一個；koh chiong Iâ-lō͘-sat-léng ê chèng peh-sìⁿ, kap chèng siú-léng, í-ki̍p só͘ ū tōa koân-lêng ê ióng-sū, kiōng chi̍t-bān lâng, liân it-chhè ê kang-chhiūⁿ, thih-chhiūⁿ, lóng lia̍h-khì; tû kok-lāi ke̍k sòng-hiong ê lâng í-gōa, bô chhun chi̍t-ê;

15也帶Iok-ngá-kun到巴比倫，kap太后、后妃、太監，kap國內ê大官，lóng掠伊tùi耶路撒冷到巴比倫。iā tòa Iok-ngá-kun kàu Pa-pí-lûn, kap thài-hō͘, hō͘-hui, thài-kàm, kap kok-lāi ê tōa-koaⁿ, lóng lia̍h i tùi Iâ-lō͘-sat-léng kàu Pa-pí-lûn.

16Koh將一切ê勇士七千人，kap工匠、鐵匠，一千人，lóng是勇壯能上陣ê，巴比倫王lóng掠伊到巴比倫。Koh chiong it-chhè ê ióng-sū chhit-chheng lâng, kap kang-chhiūⁿ, thih-chhiūⁿ, chi̍t-chheng lâng, lóng sī ióng-chòng ōe chiūⁿ-tīn-ê, Pa-pí-lûn ông lóng lia̍h i kàu Pa-pí-lûn.

17巴比倫王設立Iok-ngá-kun ê叔Má-thàm-ngá做王續接伊，換伊ê名叫Se-tí-ka。Pa-pí-lûn ông siat-li̍p Iok-ngá-kun ê chek Má-thàm-ngá chòe ông sòa-chiap i, ōaⁿ i ê miâ kiò Se-tí-ka.

18Se-tí-ka坐位ê時，二十一歲，tī耶路撒冷做王十一年；伊ê老母名Hap-bō͘-tha，是Li̍p-ná人耶利米ê cha-bó͘-kiáⁿ。Se-tí-ka chē-ūi ê sî, jī-cha̍p-it hè, tī Iâ-lō͘-sat-léng chòe ông cha̍p-it nî; i ê lāu-bú miâ Hap-bō͘-tha, sī Li̍p-ná lâng Iâ-lī-bí ê cha-bó͘-kiáⁿ.

19伊行耶和華所看做pháiⁿ ê事，照Iok-ngá-kèng一切所行ê。I kiâⁿ Iâ-hô-hoa só͘ khòaⁿ-chòe pháiⁿ ê sū, chiàu Iok-ngá-kèng it-chhè só͘ kiâⁿ ê.

20耶路撒冷kap猶大tú-tio̍h chiah-ê事，是因為耶和華發出受氣，beh tùi伊ê面前趕出in。Iâ-lō͘-sat-léng kap Iû-tāi tú-tio̍h chiah ê sū, sī in-ūi Iâ-hô-hoa hoat-chhut siū-khì, beh tùi I ê bīn-chêng kóaⁿ-chhut in.

1Se-tí-ka背叛巴比倫王。當伊坐位第九年，十月初十，巴比倫王Nî-pò͘-kah-nî-sat chhōa伊全軍來攻擊耶路撒冷，tī城ê對面紮營，koh tī四圍作土堆攻擊城。Se-tí-ka pōe-poān Pa-pí-lûn ông. Tng i chē-ūi tē-káu nî, cha̍p-ge̍h chhoe-cha̍p, Pa-pí-lûn ông Nî-pò͘-kah-nî-sat chhōa i choân-kun lâi kong-kek Iâ-lō͘-sat-léng, tī siâⁿ ê tùi-bīn chat-iâⁿ, koh tī sì-ûi choh thô͘-tui kong-kek siâⁿ.

2Tùi án-ni，城受圍困，直到Se-tí-ka王十一年。Tùi án-ni siâⁿ siū ûi-khùn, ti̍t-kàu Se-tí-ka ông cha̍p-it nî.

3四月初九日，城內飢荒真傷重，致到hit所在ê百姓lóng無米糧。Sì-ge̍h chhoe-káu ji̍t, siâⁿ-lāi ki-hng chin siong-tiōng, tì-kàu hit só͘-chāi ê peh-sìⁿ lóng bô bí-niû.

4城受攻破，一切ê兵丁透暝，tùi óa近王ê園，兩個城牆中ê門hit條路逃走。Ka-le̍k-tí人tú-tú tī四圍攻擊城，王就tùi A-la̍h-pa ê路逃走。Siâⁿ siū kong-phòa, it-chhè ê peng-teng thàu-mî, tùi óa-kūn ông ê hn̂g, nn̄g ê siâⁿ-chhiûⁿ tiong ê mn̂g hit tiâu lō͘ tô-cháu. Ka-le̍k-tí lâng tú-tú tī sì-ûi kong-kek siâⁿ, ông chiū tùi A-la̍h-pa ê lō͘ tô-cháu.

5Ka-le̍k-tí ê軍兵追jip王，tī耶利哥ê平洋追tio̍h伊，伊ê全軍lóng離開伊四散。Ka-le̍k-tí ê kun-peng tui-jip ông, tī Iâ-lī-ko ê pîⁿ-iûⁿ tui-tio̍h i, i ê choân-kun lóng lī-khui i sì-sòaⁿ.

6In掠tio̍h王，帶到Lī-pí-la̍h巴比倫王hia，就審判伊。In lia̍h-tio̍h ông, tòa kàu Lī-pí-la̍h Pa-pí-lûn ông hia, chiū sím-phòaⁿ i.

7Tī Se-tí-ka ê目睭前，thâi死Se-tí-ka hiah-ê kiáⁿ，koh iah Se-tí-ka兩蕊目睭，用鐵鏈鏈伊，帶伊到巴比倫。Tī Se-tí-ka ê ba̍k-chiu chêng, thâi-sí Se-tí-ka hiah ê kiáⁿ, koh iah Se-tí-ka nn̄g-lúi ba̍k-chiu, ēng thih-liān liān i, tòa i kàu Pa-pí-lûn.

8巴比倫王Nî-pò͘-kah-nî-sat王十九年，五月初七日，跟隨巴比倫王ê侍衛長Nî-pò͘-sat-la̍h-tàn到耶路撒冷；Pa-pí-lûn ông Nî-pò͘-kah-nî-sat ông cha̍p-káu nî, gō͘-ge̍h chhoe-chhit ji̍t, kun-sûi Pa-pí-lûn ông ê sī-ōe-tiúⁿ Nî-pò͘-sat-la̍h-tàn kàu Iâ-lō͘-sat-léng;

9用火燒耶和華ê殿，kap王宮，koh用火燒耶路撒冷一切ê厝，就是富貴家ê厝。ēng hé sio Iâ-hô-hoa ê tiān, kap ông-kiong, koh ēng hé sio Iâ-lō͘-sat-léng it-chhè ê chhù, chiū-sī hù-kùi ke ê chhù.

10跟tè侍衛長Ka-le̍k-tí ê全軍，就拆毀耶路撒冷四圍ê城牆。Kun-tè sī-ōe-tiúⁿ Ka-le̍k-tí ê choân-kun, chiū thiah-húi Iâ-lō͘-sat-léng sì-ûi ê siâⁿ-chhiûⁿ.

11Hit時侍衛長Nî-pò͘-sat-la̍h-tàn，將留tī城內所chhun ê百姓，kap hiah-ê投降巴比倫王ê，以及眾人中所chhun-ê，lóng掠去。Hit-sî sī-ōe-tiúⁿ Nî-pò͘-sat-la̍h-tàn, chiong lâu tī siâⁿ-lāi só͘ chhun ê peh-sìⁿ, kap hiah ê tâu-hâng Pa-pí-lûn ông ê, í-ki̍p chèng-lâng tiong só͘ chhun-ê, lóng lia̍h-khì.

12獨獨侍衛長留第一sòng-hiong-ê，hō͘ in治理葡萄園kap種作。To̍k-to̍k sī-ōe-tiúⁿ lâu tē-it sòng-hiong-ê, hō͘ in tī-lí phû-tô-hn̂g kap chèng-choh.

13耶和華殿內ê銅柱，kap耶和華殿內ê盆座，以及銅海，Ka-le̍k-tí人lóng phah破，將hiah-ê銅運到巴比倫；Iâ-hô-hoa tiān-lāi ê tâng-thiāu, kap Iâ-hô-hoa tiān-lāi ê phûn-chō, í-ki̍p tâng-hái, Ka-le̍k-tí lâng lóng phah-phòa, chiong hiah ê tâng ūn-kàu Pa-pí-lûn;

14koh帶去鼎、托á、剪刀、碗，kap所用一切ê銅器；koh tòa-khì tiáⁿ, thuh-á, chián-to, óaⁿ, kap só͘ ēng it-chhè ê tâng-khì;

15火爐、盤，一切金器ê金，銀器ê銀，侍衛長lóng帶去。hé-lô͘, pôaⁿ, it-chhè kim-khì ê kim, gûn-khì ê gûn, sī-ōe-tiúⁿ lóng tòa-khì.

16Koh帶所羅門王為耶和華ê殿所chhòng兩支柱，一個銅海，kap hiah-ê座；chiah-ê器具ê銅bōe能秤伊ê輕重。Koh tòa Só͘-lô-bûn ông ūi Iâ-hô-hoa ê tiān só͘ chhòng nn̄g ki thiāu, chi̍t ê tâng-hái, kap hiah ê chō; chiah ê khì-kū ê tâng bōe-ōe chhìn i ê khin-tāng.

17Chit支柱高十八肘，伊ê頂面有銅ê柱斗；柱斗高三肘；柱斗ê周圍有網á kap石榴，lóng是銅做ê；第二支柱siâng一款，也有網á。Chit ki thiāu koâiⁿ cha̍p-poeh tiú, i ê téng-bīn ū tâng ê thiāu-táu; thiāu-táu koâiⁿ saⁿ-tiú; thiāu-táu ê chiu-ûi ū bāng-á kap sia̍h-liû, lóng sī tâng chòe ê; tē-jī ki thiāu siâng chi̍t khoán, iā ū bāng-á.

18侍衛長掠祭司頭Se-lâi-ngá，kap第二級ê祭司Se-hoan-a，kap三個顧門ê；Sī-ōe-tiúⁿ lia̍h chè-si-thâu Se-lâi-ngá, kap tē jī kip ê chè-si Se-hoan-a, kap saⁿ ê kò͘-mn̂g--ê;

19koh tùi城內掠一個管兵ê官，kap tī城內所tú-tio̍h常常見王ê面ê五人，kap軍長ê書記點算百姓ê，以及城中所tú-tio̍h ê國民六十人。koh tùi siâⁿ-lāi lia̍h chi̍t ê koán-peng ê koaⁿ, kap tī siâⁿ-lāi só͘ tú-tio̍h siông-siông kìⁿ ông ê bīn ê gō͘ lâng, kap kun-tiúⁿ ê su-kì tiám-sǹg peh-sìⁿ ê, í-ki̍p siâⁿ-tiong só͘ tú-tio̍h ê kok-bîn la̍k-cha̍p lâng.

20侍衛長Nî-pò͘-sat-la̍h-tàn將chiah-ê人帶到Lī-pí-la̍h，巴比倫王hia。Sī-ōe-tiúⁿ Nî-pò͘-sat-la̍h-tàn chiong chiah ê lâng tòa kàu Lī-pí-la̍h, Pa-pí-lûn ông hia.

21巴比倫王phah in tī Hap-má地ê Lī-pí-la̍h，thâi死in。Án-ni猶大ê百姓受掠離開本地。Pa-pí-lûn ông phah in tī Hap-má tōe ê Lī-pí-la̍h, thâi-sí in. Án-ni Iû-tāi ê peh-sìⁿ siū-lia̍h lī-khui pún-tōe.

22論到猶大國chhun ê百姓，就是巴比倫王Nî-pò͘-kah-nî-sat所留ê，王設立Sa-hoan ê孫，A-hi-kam ê kiáⁿ，Ki-tāi-lī，管轄in。Lūn-kàu Iû-tāi kok chhun ê peh-sìⁿ, chiū-sī Pa-pí-lûn ông Nî-pò͘-kah-nî-sat só͘ lâu--ê, ông siat-li̍p Sa-hoan ê sun, A-hi-kam ê kiáⁿ, Ki-tāi-lī, koán-hat in.

23眾軍長kap屬in ê人，聽見巴比倫王設立Ki-tāi-lī管轄in。Tùi án-ni，Nî-thàm-ngá ê kiáⁿ以實瑪利，Ka-lī-a ê kiáⁿ Iok-hap-lân，Nî-tô-hoat ê人Tan-hō͘-bia̍t ê kiáⁿ Se-lâi-ngá，Má-ka人ê kiáⁿ Ngá-sat-nî-a，kap屬in ê人，lóng到Bí-su-pa見Ki-tāi-lī。Chèng kun-tiúⁿ kap sio̍k in ê lâng, thiaⁿ-kìⁿ Pa-pí-lûn ông siat-li̍p Ki-tāi-lī koán-hat in. Tùi án-ni Nî-thàm-ngá ê kiáⁿ Í-si̍t-má-lī, Κa-lī-a ê kiáⁿ Iok-hap-lân, Nî-tô-hoat ê lâng Tan-hō͘-bia̍t ê kiáⁿ Se-lâi-ngá, Má-ka lâng ê kiáⁿ Ngá-sat-nî-a, kap sio̍k in ê lâng, lóng kàu Bí-su-pa kìⁿ Ki-tāi-lī.

24Ki-tāi-lī tùi in kap屬in ê人chiù-chōa，講，Lín莫得驚Ka-le̍k-tí ê人臣；做lín tiàm chit所在，服事巴比倫王，就thang得tio̍h福氣。Ki-tāi-lī tùi in kap sio̍k in ê lâng chiù-chōa, kóng, Lín bo̍h-tit kiaⁿ Ka-le̍k-tí ê jîn-sîn; chòe lín tiàm chit só͘-chāi, ho̍k-sāi Pa-pí-lûn ông, chiū thang tit-tio̍h hok-khì.

25七月間，王親Í-lī-sa-má ê孫，Nî-thàm-ngá ê kiáⁿ，以實瑪利，帶十人kap伊來，phah死Ki-tāi-lī以及kap伊tī Bí-su-pa ê猶大人，kap Ka-le̍k-tí人。Chhit-ge̍h-kan ông-chhin Í-lī-sa-má ê sun, Nî-thàm-ngá ê kiáⁿ, Í-si̍t-má-lī, tòa cha̍p-lâng kap i lâi, phah-sí Ki-tāi-lī í-ki̍p kap i tī Bí-su-pa ê Iû-tāi lâng, kap Ka-le̍k-tí lâng.

26Tùi án-ni，眾百姓無論大細，kap hiah-ê軍長，lóng起來去埃及；因為驚Ka-le̍k-tí人ê緣故。Tùi án-ni chèng peh-sìⁿ bô-lūn tōa-sòe, kap hiah ê kun-tiúⁿ, lóng khí-lâi khì Ai-ki̍p; in-ūi kiaⁿ Ka-le̍k-tí lâng ê iân-kò͘.

27猶大王Iok-ngá-kun受掠了後第三十七年，巴比倫王Í-bī-bí-lô-ta̍t元年，十二月二十七日，舉起猶大王Iok-ngá-kun，放伊出監。Iû-tāi ông Iok-ngá-kun siū-lia̍h liáu-āu tē saⁿ-cha̍p-chhit nî, Pa-pí-lûn ông Í-bī-bí-lô-ta̍t goân--nî, cha̍p-jī ge̍h jī-cha̍p-chhit ji̍t, kú-khí Iû-tāi ông Iok-ngá-kun, pàng i chhut-kaⁿ.

28亦用好話安慰伊，hō͘伊ê位khah高其餘chiah-ê王ê位，就是kap伊同tī巴比倫ê。Ia̍h ēng hó-ōe an-ùi i, hō͘ i ê ūi khah-koâiⁿ kî-û chiah ê ông ê ūi, chiū-sī kap i tâng tī Pa-pí-lûn ê.

29Thǹg去伊監內所穿ê衫，一世人kap巴比倫王相kap食。Thǹg--khì i kaⁿ-lāi só͘ chhēng ê saⁿ, chi̍t-sì-lâng kap Pa-pí-lûn ông saⁿ-kap chia̍h.

30巴比倫王賞賜伊所欠用ê植物，日日hō͘伊一份，一世人lóng是án-ni。Pa-pí-lûn ông siúⁿ-sù i só͘ khiàm-ēng ê si̍t-bu̍t, ji̍t-ji̍t hō͘ i chi̍t-hūn, chi̍t-sì-lâng lóng sī án-ni.

1亞當、Siat、Í-lô-sū；A-tong, Siat, Í-lô-sū;

2Kai-lâm、Má-le̍k-lia̍t、Ngá-lia̍t；Kai-lâm, Má-le̍k-lia̍t, Ngá-lia̍t;

3以諾、Má-thó͘-sat-la̍h、La̍h-be̍k；Í-lo̍k, Má-thó͘-sat-la̍h, La̍h-be̍k;

4挪亞、閃、含、雅弗。Ná-a, Siám, Hâm, Ngá-hut.

5雅弗ê kiáⁿ：Ko-bia̍t、Má-kok、馬大、Ngá-oân、Thó͘-pa、Bí-siat、Thê-la̍h。Ngá-hut ê kiáⁿ; Ko-bia̍t, Má-kok, Má-tāi, Ngá-oân, Thó͘-pa, Bí-siat, Thê-la̍h.

6Ko-bia̍t ê kiáⁿ：A-si̍t-ki-ná、Te-hoat、To-ka-má。Ko-bia̍t ê kiáⁿ; A-si̍t-ki-ná, Te-hoat, To-ka-má.

7Ngá-oân ê kiáⁿ：以利沙、Tha-sì、Ki-thê、Lô-tan。Ngá-oân ê kiáⁿ; Í-lī-sa, Tha-sì, Ki-thê, Lô-tan.

8含ê kiáⁿ：Kó͘-si̍t、Be̍k-se-im、Hut、迦南。Hâm ê kiáⁿ; Kó͘-si̍t, Be̍k-se-im, Hut, Ka-lâm.

9Kó͘-si̍t ê kiáⁿ：Se-pa、Hap-hui-la̍h、Sat-hut-tha、La̍h-má、Sat-hut-thê-ka。La̍h-má ê kiáⁿ：Sī-pa、Tí-tàn。Kó͘-si̍t ê kiáⁿ; Se-pa, Hap-hui-la̍h, Sat-hut-tha, La̍h-má, Sat-hut-thê-ka. La̍h-má ê kiáⁿ, Sī-pa, Tí-tàn.

10Kó͘-si̍t生Lêng-lio̍k；伊做世上英雄ê起頭。Kó͘-si̍t siⁿ Lêng-lio̍k; i chòe sè-chiūⁿ eng-hiông ê khí-thâu.

11Be̍k-se-im生Lō͘-téng-im、A-ná-bí-im、Lī-hap-pí-im、Ná-hut-thó͘-hi-im；Be̍k-se-im siⁿ Lō͘-téng-im, A-ná-bí-im, Lī-hap-pí-im, Ná-hut-thó͘-hi-im;

12Phàⁿ-su-ló͘-sè-im、Ka-su-lō͘-hi-im、(tùi in出腓利士人)，Ka-hui-thok-im。Phàⁿ-su-ló͘-sè-im, Ka-su-lō͘-hi-im, (tùi in chhut Hui-lī-sū lâng), Ka-hui-thok-im.

13迦南生大kiáⁿ Se-tùn，kap Hek；Ka-lâm siⁿ tōa-kiáⁿ Se-tùn, kap Hek;

14以及Iâ-pò͘-su、A-mô͘-lī、Kek-ka-sat；í-ki̍p Iâ-pò͘-su, A-mô͘-lī, Kek-ka-sat;

15Hi-bī、A-ki、Sé-nî；Hi-bī, A-ki, Sé-nî;

16A-óa-tí、Sé-má-lī、Hap-má，chiah-ê族。A-óa-tí, Sé-má-lī, Hap-má, chiah ê cho̍k.

17閃ê kiáⁿ：Í-lân、A-sūt、A-hoat-sat、路得、A-lân、O͘-su、Hō͘-le̍k、Ki-thiap、Bí-siat。Siám ê kiáⁿ; Í-lân, A-sūt, A-hoat-sat, Lō͘-tek, A-lân, O͘-su, Hō͘-le̍k, Ki-thiap, Bí-siat.

18A-hoat-sat生Sa-la̍h，Sa-la̍h生Hi-pek。A-hoat-sat siⁿ Sa-la̍h, Sa-la̍h siⁿ Hi-pek.

19Hi-pek生兩個kiáⁿ；一個名叫Hoat-le̍k，因為tī伊hit時地上就分界；Hoat-le̍k ê小弟名叫Iok-tan。Hi-pek siⁿ nn̄g ê kiáⁿ; chi̍t-ê miâ-kiò Hoat-le̍k, in-ūi tī i hit-sî tōe-chiūⁿ chiū hun-kài; Hoat-le̍k ê sió-tī miâ-kiò Iok-tan.

20Iok-tan生A-mô͘-tap、Sa-lia̍t、Hap-sat-má-hui、Iâ-la̍h；Iok-tan siⁿ A-mô͘-tap, Sa-lia̍t, Hap-sat-má-hui, Iâ-la̍h;

21Hap-to-lân、O͘-sat、Tek-la̍h；Hap-to-lân, O͘-sat, Tek-la̍h;

22Í-pa-lio̍k、A-pí-má-lī、Sī-pa；Í-pa-lio̍k, A-pí-má-lī, Sī-pa;

23O͘-hui、Hap-hui-la̍h、Iok-pa；chiah-ê lóng是Iok-tan ê kiáⁿ。O͘-hui, Hap-hui-la̍h, Iok-pa; chiah-ê lóng sī Iok-tan ê kiáⁿ.

24閃、A-hoat-sat、Sa-la̍h；Siám, A-hoat-sat, Sa-la̍h;

25Hi-pek、Hoat-le̍k、La̍h-ngô͘；Hi-pek, Hoat-le̍k, La̍h-ngô͘;

26Se-lo̍k、Ná-ho̍k、Tha-la̍h；Se-lo̍k, Ná-ho̍k, Tha-la̍h;

27亞伯蘭，(亞伯蘭就是亞伯拉罕)。A-pek-lân, (A-pek-lân chiū-sī A-pek-la̍h-hán).

28亞伯拉罕ê kiáⁿ：以撒、以實瑪利。A-pek-la̍h-hán ê kiáⁿ; Í-sat, Í-si̍t-má-lī.

29In ê世系記tī下底：以實瑪利ê大kiáⁿ，Nî-pài-iok；koh有Ki-ta̍t、Ap-tek-pia̍t、Bí-pí-sam；In ê sè-hē kì tī ē-tóe: Í-si̍t-má-lī ê tōa-kiáⁿ, Nî-pài-iok; koh ū Ki-ta̍t, Ap-tek-pia̍t, Bí-pí-sam;

30Bí-si-má、Tō͘-má，Má-sat，Hap-ta̍t，Thê-má；Bí-si-má, Tō͘-má, Má-sat, Hap-ta̍t, Thê-má;

31I-tu̍t，Ná-hui-si，Ki-tí-má。Chiah-ê lóng是以實瑪利ê kiáⁿ。I-tu̍t, Ná-hui-si, Ki-tí-má. Chiah-ê lóng sī Í-si̍t-má-lī ê kiáⁿ.

32亞伯拉罕ê細姨Ki-thó͘-la̍h所生ê kiáⁿ就是Sim-lân、Iok-san、Bí-tàn、米甸、I-si-pa、Su-a。Iok-san ê kiáⁿ；Sī-pa、Tí-tàn。A-pek-la̍h-hán ê sòe-î Ki-thó͘-la̍h só͘ siⁿ ê kiáⁿ chiū-sī Sim-lân, Iok-san, Bí-tàn, Bí-tiân, I-si-pa, Su-a. Iok-san ê kiáⁿ; Sī-pa, Tí-tàn.

33米甸ê kiáⁿ：Í-hoat、Í-hut、Hap-lo̍k、A-pí-tāi、Í-le̍k-tāi。Chiah-ê lóng是Ki-thó͘-la̍h ê kiáⁿ孫。Bí-tiân ê kiáⁿ; Í-hoat, Í-hut, Hap-lo̍k, A-pí-tāi, Í-le̍k-tāi. Chiah-ê lóng sī Ki-thó͘-la̍h ê kiáⁿ-sun.

34亞伯拉罕生以撒。以撒ê kiáⁿ：以掃kap以色列。A-pek-la̍h-hán siⁿ Í-sat. Í-sat ê kiáⁿ; Í-sò kap Í-sek-lia̍t.

35以掃ê kiáⁿ：Í-lī-hoat、Liû-jíⁿ、Iâ-o͘-si、Ngá-lân、Khó-la̍h。Í-sò ê kiáⁿ: Í-lī-hoat, Liû-jíⁿ, Iâ-o͘-si, Ngá-lân, Khó-la̍h.

36Í-lī-hoat ê kiáⁿ：Thê-bān、O-boa̍t、Sé-phi、Ka-thán、Ki-la̍p-su、Têng-la̍p、A-má-le̍k。Í-lī-hoat ê kiáⁿ; Thê-bān, O-boa̍t, Sé-phi, Ka-thán, Ki-la̍p-su, Têng-la̍p, A-má-le̍k.

37Liû-jíⁿ ê kiáⁿ：Ná-hap、謝拉、Sa-má、Bí-sat。Liû-jíⁿ ê kiáⁿ; Ná-hap, Siā-la̍h, Sa-má, Bí-sat.

38Se-jíⁿ ê kiáⁿ：Lô-tan、Sok-pa、Chè-piān、A-ná、Tí-sūn、Í-chhat、Tí-san。Se-jíⁿ ê kiáⁿ; Lô-tan, Sok-pa, Chè-piān, A-ná, Tí-sūn, Í-chhat, Tí-san.

39Lô-tan ê kiáⁿ：Hô-lī、Hô-bān；Lô-tan ê姊妹是Têng-la̍p。Lô-tan ê kiáⁿ; Hô-lī, Hô-bān; Lô-tan ê chí-bē sī Têng-la̍p.

40Sok-pa ê kiáⁿ：A-le̍k-bûn、Má-ná-hat、Í-pa-lio̍k、Sī-hui、O-lâm。Chè-piān ê kiáⁿ：A-ngá、A-ná。A-ná ê kiáⁿ：Tí-sūn。Sok-pa ê kiáⁿ; A-le̍k-bûn, Má-ná-hat, Í-pa-lio̍k, Sī-hui, O-lâm. Chè-piān ê kiáⁿ; A-ngá, A-ná. A-ná ê kiáⁿ; Tí-sūn.

41Tí-sūn ê kiáⁿ：Hap-bek-lân，I-sī-pan、Ek-lân、Ki-lân。Tí-sūn ê kiáⁿ; Hap-bek-lân, I-sī-pan, Ek-lân, Ki-lân.

42Í-chhat ê kiáⁿ：Phek-hán、Sat-hoan、A-kan。Tí-san ê kiáⁿ：O͘-su、A-lân。Í-chhat ê kiáⁿ; Phek-hán, Sat-hoan, A-kan. Tí-san ê kiáⁿ; O͘-su, A-lân.

43當以色列人未有君王治理ê事先，tī Í-tong地做王來治理ê記tī下底：Pí-jíⁿ ê kiáⁿ Pí-la̍h；伊ê京城名叫Têng-hap-pa。Tng Í-sek-lia̍t lâng bē ū kun-ông tī-lí ê tāi-seng, tī Í-tong tōe chòe-ông lâi tī-lí--ê kì tī ē-tóe: Pí-jíⁿ ê kiáⁿ Pí-la̍h; i ê kiaⁿ-siâⁿ miâ kiò Têng-hap-pa.

44Pí-la̍h死了，Pho-su-la̍h人謝拉 ê kiáⁿ Iok-pa續接伊做王。Pí-la̍h sí-liáu, Pho-su-la̍h lâng Siā-la̍h ê kiáⁿ Iok-pa sòa-chiap i chòe-ông.

45Iok-pa死了，Thê-bān地ê人Hō͘-san續接伊做王。Iok-pa sí-liáu, Thê-bān tōe ê lâng Hō͘-san sòa-chiap i chòe-ông.

46Hō͘-san死了，Pí-ta̍t ê kiáⁿ Hap-ta̍t續接伊做王；伊就是tī Mô͘-ap地thâi贏米甸人ê；伊ê京城名叫A-bī-tek。Hō͘-san sí-liáu, Pí-ta̍t ê kiáⁿ Hap-ta̍t sòa-chiap i chòe-ông; i chiū-sī tī Mô͘-ap tōe thâi-iâⁿ Bí-tiân lâng ê; i ê kiaⁿ-siâⁿ miâ-kiò A-bī-tek.

47Hap-ta̍t死了，Má-sū-lī-ka人Song-la̍h續接伊做王。Hap-ta̍t sí-liáu, Má-sū-lī-ka lâng Song-la̍h sòa-chiap i chòe-ông.

48Song-la̍h死了，河邊Lī-hô-pek人掃羅續接伊做王。Song-la̍h sí-liáu, Hô-piⁿ Lī-hô-pek lâng Sò-lô sòa-chiap i chòe-ông.

49掃羅死了，A-kek-pho ê kiáⁿ Pa-le̍k-hap-lâm續接伊做王。Sò-lô sí-liáu, A-kek-pho ê kiáⁿ Pa-le̍k-hap-lâm sòa-chiap i chòe-ông.

50Pa-le̍k-hap-lâm死了，Hap-ta̍t續接伊做王；伊ê京城名叫Pa-i；伊ê bó͘名叫Bí-hi-tha-piat，是Bí-sat-ha̍p ê cha-bó͘孫，Má-te̍k-lia̍t ê cha-bó͘-kiáⁿ。Hap-ta̍t死。Pa-le̍k-hap-lâm sí-liáu, Hap-ta̍t sòa-chiap i chòe-ông; i ê kiaⁿ-siâⁿ miâ-kiò Pa-i; i ê bó͘ miâ-kiò Bí-hi-tha-piat, sī Bí-sat-ha̍p ê cha-bó͘-sun, Má-te̍k-lia̍t ê cha-bó͘-kiáⁿ. Hap-ta̍t sí.

51有Í-tong人ê族長，就是Têng-la̍p族長、A-le̍k-óa族長、Iâ-thiap族長；Ū Í-tong lâng ê cho̍k-tiúⁿ, chiū-sī Têng-la̍p cho̍k-tiúⁿ, A-le̍k-óa cho̍k-tiúⁿ, Iâ-thiap cho̍k-tiúⁿ;

52A-hô-lī-pa-má族長、Í-la̍h族長、Pí-lùn族長；A-hô-lī-pa-má cho̍k-tiúⁿ, Í-la̍h cho̍k-tiúⁿ, Pí-lùn cho̍k-tiúⁿ;

53Ki-la̍p-su族長、Thê-bān族長、Bí-pí-sat族長；Ki-la̍p-su cho̍k-tiúⁿ, Thê-bān cho̍k-tiúⁿ, Bí-pí-sat cho̍k-tiúⁿ;

54Má-ki-tia̍p族長、Í-lân族長。Chiah-ê就是Í-tong人ê族長。Má-ki-tia̍p cho̍k-tiúⁿ, Í-lân cho̍k-tiúⁿ. Chiah-ê chiū-sī Í-tong lâng ê cho̍k-tiúⁿ.