1有一個婦人人，是先知ê學生ê bó͘，叫以利沙講，你ê奴僕我ê丈夫已經死，你ê奴僕平素敬畏耶和華，是你所知ê。Taⁿ債主來beh取我兩個kiáⁿ做奴僕。Ū chi̍t ê hū-jîn-lâng, sī sian-ti ê ha̍k-seng ê bó͘, kiò Í-lī-sa kóng, Lí ê lô͘-po̍k góa ê tiōng-hu í-keng sí, lí ê lô͘-po̍k pêng-sò͘ kèng-ùi Iâ-hô-hoa, sī lí só͘ chai ê. Taⁿ chè-chú lâi beh chhú góa nn̄g ê kiáⁿ chòe lô͘-po̍k.

2以利沙問伊講，我thang kā你做甚麼？你kā我講；你厝內有甚麼？伊講，你ê女婢厝內chhun一瓶油，以外lóng無。Í-lī-sa mn̄g i kóng, Góa thang kā lí chòe sím-mi̍h? lí kā góa kóng; lí chhù-lāi ū sím-mi̍h? I kóng, Lí ê lú-pī chhù-lāi chhun chi̍t pân iû, í-gōa lóng bô.

3以利沙講，你去ah，tī外面對你hiah-ê厝邊借器具，就是空ê器具，m̄-thang借少少。Í-lī-sa kóng, Lí khì ah, tī gōa-bīn tùi lí hiah ê chhù-piⁿ chioh khì-kū, chiū-sī khang ê khì-kū, m̄-thang chioh chió-chió.

4Tio̍h入厝，關門，你kap你ê kiáⁿ tiàm內面，thîn油tī所有ê器具；thîn滿ê tio̍h另外hē。Tio̍h ji̍p chhù, koaiⁿ-mn̂g, lí kap lí ê kiáⁿ tiàm lāi-bīn, thîn-iûⁿ tī só͘-ū ê khì-kū; thîn-móa-ê tio̍h lēng-gōa hē.

5婦人人離開伊去，關門，伊kap伊ê kiáⁿ tiàm內面；kiáⁿ帶器具來hō͘伊，伊就thîn油。Hū-jîn-lâng lī-khui i khì, koaiⁿ mn̂g, i kap i ê kiáⁿ tiàm lāi-bīn; kiáⁿ tòa khì-kū lâi hō͘ i, i chiū thîn iû.

6Hiah-ê器具lóng滿，伊kā伊ê kiáⁿ講，Koh the̍h器具來hō͘我。Kiáⁿ講，無koh有器具lah；油就止。Hiah ê khì-kū lóng móa, i kā i ê kiáⁿ kóng, Koh the̍h khì-kū lâi hō͘ góa. Kiáⁿ kóng, Bô koh ū khì-kū lah; iû chiū chí.

7婦人人去kā上帝ê奴僕講。伊講，你去賣油來還債；所chhun-ê，你kap你ê kiáⁿ thang度活。Hū-jîn-lâng khì kā Siōng-tè ê lô͘-po̍k kóng. I kóng, Lí khì bōe iû lâi hêng-chè; só͘ chhun-ê, lí kap lí ê kiáⁿ thang tō͘-oa̍h.

8有一日以利沙行到Su-liām，tī-hia有一個好額ê婦人人，強強留伊tiàm teh食；後來以利沙ta̍k-pái tùi-hia經過，就入去食。Ū chi̍t-ji̍t Í-lī-sa kiâⁿ kàu Su-liām, tī-hia ū chi̍t ê hó-gia̍h ê hū-jîn-lâng, kiông-kiông lâu i tiàm teh chia̍h; āu-lâi Í-lī-sa ta̍k-pái tùi-hia keng-kè, chiū ji̍p-khì chia̍h.

9婦人人對伊ê丈夫講，你看，hit-ê常常對咱chia經過ê，我看伊是上帝聖ê奴僕。Hū-jîn-lâng tùi i ê tiōng-hu kóng, Lí khòaⁿ, hit ê siông-siông tùi lán chia keng-kè--ê, góa khòaⁿ i sī Siōng-tè sèng ê lô͘-po̍k.

10求你允，咱thang tī牆頂起一間細間房，tī-hia kā伊安置眠床、桌、椅、燈台，hō͘伊來咱chia，thang入去歇。Kiû lí ún, lán thang tī chhiûⁿ-téng khí chi̍t keng sòe-keng pâng, tī-hia kā i an-tì bîn-chhn̂g, toh, í, teng-tâi, hō͘ i lâi lán chia, thang ji̍p--khì hioh.

11有一日以利沙來到hia，就入去hit間房睏。Ū chi̍t-ji̍t Í-lī-sa lâi kàu hia, chiū ji̍p-khì hit keng pâng khùn.

12以利沙kā伊ê奴僕Ki-hap-se講，你叫chit-ê Su-liām ê婦人人來。伊就叫伊來；婦人人khiā tī伊ê面前。Í-lī-sa kā i ê lô͘-po̍k Ki-hap-se kóng, Lí kiò chit ê Su-liām ê hū-jîn-lâng lâi. I chiū kiò i lâi; hū-jîn-lâng khiā tī i ê bīn-chêng.

13伊kā伊ê奴僕講，你thang kā伊講，看ah，你為阮費chōe-chōe心思，taⁿ tio̍h kā你做甚麼？你ài我替你kā王，á是軍長，講ah？伊應講，我khiā起tī我ê百姓ê中間。I kā i ê lô͘-po̍k kóng, Lí thang kā i kóng, Khòaⁿ ah, lí ūi goán hùi chōe-chōe sim-su, taⁿ tio̍h kā lí chòe sím-mi̍h? lí ài góa thòe lí kā ông, á-sī kun-tiúⁿ, kóng ah? I ìn kóng, Góa khiā-khí tī góa ê peh-sìⁿ ê tiong-kan.

14以利沙講，Án-ni tio̍h為伊怎樣做nih？Ki-hap-se講，伊無kiáⁿ，伊ê丈夫也老lah。Í-lī-sa kóng, Án-ni tio̍h ūi i cháiⁿ-iūⁿ chòe--nih? Ki-hap-se kóng, I bô kiáⁿ, i ê tiōng-hu iā lāu lah.

15伊koh講，叫伊來；就叫伊來。婦人人就khiā tī門口。I koh kóng, Kiò i lâi; chiū kiò i lâi. Hū-jîn-lâng chiū khiā tī mn̂g-kháu.

16伊講，明年到chit時，你beh抱一個kiáⁿ。伊講，無lah。上帝ê奴僕，我ê主ah，m̄-thang騙你ê女婢。I kóng, Mê-nî kàu chit-sî, lí beh phō chi̍t ê kiáⁿ. I kóng, Bô--lah. Siōng-tè ê lô͘-po̍k, góa ê chú ah, m̄-thang phiàn lí ê lú-pī.

17婦人人果然懷孕，到明年hit時生一個kiáⁿ，照以利沙所講ê。Hū-jîn-lâng kó-jiân hoâi-īn, kàu mê-nî hit-sî siⁿ chi̍t ê kiáⁿ, chiàu Í-lī-sa só͘ kóng--ê.

18Gín-ná大漢；有一日出去到伊ê老父，到收割ê人hia。Gín-ná tōa-hàn; ū chi̍t-ji̍t chhut-khì kàu i ê lāu-pē, kàu siu-koah ê lâng hia.

19伊kā老父講，我ê頭殼ah，我ê頭殼ah；伊ê老父kā奴僕講，抱伊到伊ê老母hia。I kā lāu-pē kóng, Góa ê thâu-khak ah, góa ê thâu-khak ah; i ê lāu-pē kā lô͘-po̍k kóng, Phō i kàu i ê lāu-bú hia.

20伊抱伊到伊ê老母hia；gín-ná坐tī老母ê腳頭u，到中晝就死。I phō i kàu i ê lāu-bú hia; gín-ná chē tī lāu-bú ê kha-thâu-u, kàu tiong-tàu chiū sí.

21老母上去樓頂，將伊ê kiáⁿ hē tī上帝ê奴僕ê眠床，關門出來；Lāu-bú chiūⁿ-khì lâu-téng, chiong i ê kiáⁿ hē tī Siōng-tè ê lô͘-po̍k ê bîn-chhn̂g, koaiⁿ-mn̂g chhut-lâi;

22叫伊ê丈夫講，請差一個奴僕牽一隻驢來我chia；我beh跑去上帝ê奴僕hia，chiah tò來。kiò i ê tiōng-hu kóng, Chhiáⁿ chhe chi̍t ê lô͘-po̍k khan chi̍t chiah lû lâi góa chia; góa beh pháu--khì Siōng-tè ê lô͘-po̍k hia, chiah tò-lâi.

23丈夫講，今á日m̄是月ê初一，也m̄是安歇，你啥事beh去伊hia？婦人人講，平安。Tiōng-hu kóng, Kin-á-ji̍t m̄-sī ge̍h ê chhoe-it, iā m̄-sī an-hioh, lí siáⁿ-sū beh khì i hia? Hū-jîn-lâng kóng, Pêng-an.

24就備辦驢，kā奴僕講，你趕驢進前去；我若無kā你講，就m̄-thang khah慢。Chiū pī-pān lû, kā lô͘-po̍k kóng, Lí kóaⁿ-lû chìn-chêng khì; góa nā bô kā lí kóng, chiū m̄-thang khah-bān.

25婦人人就去Ka-bi̍t山，去上帝ê奴僕hia。上帝ê奴僕遠遠看見伊，kā伊ê奴僕Ki-hap-se講。看ah，Su-liām ê婦人人來ah；Hū-jîn-lâng chiū khì Ka-bi̍t soaⁿ, khì Siōng-tè ê lô͘-po̍k hia. Siōng-tè ê lô͘-po̍k hn̄g-hn̄g khòaⁿ-kìⁿ i, kā i ê lô͘-po̍k Ki-hap-se kóng. Khòaⁿ ah, Su-liām ê hū-jîn-lâng lâi ah;

26你走去迎接伊，問伊講，你平安mah？你ê丈夫平安mah？gín-ná平安mah？伊講，平安。Lí cháu--khì ngiâ-chih i, mn̄g i kóng, Lí pêng-an mah? lí ê tiōng-hu pêng-an mah? gín-ná pêng-an mah? I kóng, Pêng-an.

27婦人人到hit-ê山，到上帝ê奴僕hia，就抱伊ê腳。Ki-hap-se進前beh kā伊chhia開；上帝ê奴僕講，Kù-chāi伊，因為伊心內痛苦；耶和華tùi我隱khǹg，無kā我講。Hū-jîn-lâng kàu hit ê soaⁿ, kàu Siōng-tè ê lô͘-po̍k hia, chiū phō i ê kha. Ki-hap-se chìn-chêng beh kā i chhia-khui; Siōng-tè ê lô͘-po̍k kóng, Kù-chāi i, in-ūi i sim-lāi thòng-khó͘; Iâ-hô-hoa tùi góa ún-khǹg, bô kā góa kóng.

28婦人人講，我kiám bat對我ê主求kiáⁿ mah？我kiám無講，M̄-thang騙我mah？Hū-jîn-lâng kóng, Góa kiám bat tùi góa ê chú kiû kiáⁿ mah? góa kiám bô kóng, M̄-thang phiàn góa mah?

29伊kā Ki-hap-se講，你hâ腰，手kia̍h我ê柺，進前去；若tú-tio̍h人，莫得kā in請安，人若請安你，也莫得應伊；tio̍h用我ê柺á hē tī gín-ná ê面。I kā Ki-hap-se kóng, Lí hâ-io, chhiú kia̍h góa ê koáiⁿ, chìn-chêng khì; nā tú-tio̍h lâng, bo̍h-tit kā in chhéng-an, lâng nā chhéng-an lí, iā bo̍h-tit ìn i; tio̍h ēng góa ê koáiⁿ-á hē tī gín-ná ê bīn.

30Gín-ná ê老母講，我kí永活ê耶和華kap你ê活命來講，我的確m̄離開你。以利沙就起來，tè伊去。Gín-ná ê lāu-bú kóng, Góa kí éng-oa̍h ê Iâ-hô-hoa kap lí ê oa̍h-miā lâi kóng, góa tek-khak m̄ lī-khui lí. Í-lī-sa chiū khí-lâi, tè i khì.

31Ki-hap-se頭前去，用柺á hē tī gín-ná ê面；總是無聲seh，也m̄知人。Ki-hap-se 倒tńg tú-tio̍h伊，kā伊講，Gín-ná無醒。Ki-hap-se thâu-chêng khì, ēng koáiⁿ-á hē tī gín-ná ê bīn; chóng-sī bô siaⁿ-seh, iā m̄-chai lâng. Ki-hap-se tò-tńg tú-tio̍h i, kā i kóng, Gín-ná bô chhíⁿ.

32以利沙到tè，入厝，看見gín-ná已經死，hē tī伊ê眠床。Í-lī-sa kàu-tè, ji̍p chhù, khòaⁿ-kìⁿ gín-ná í-keng sí, hē tī i ê bîn-chhn̂g.

33伊入去，就關門，只有in兩個tī內面；伊就祈禱耶和華。I ji̍p-khì, chiū koaiⁿ-mn̂g, chí-ū in nn̄g-ê tī lāi-bīn; i chiū kî-tó Iâ-hô-hoa.

34上去仆tī gín-ná ê身軀，嘴對嘴，目睭對目睭，手對手，kui身àⁿ tī gín-ná ê身軀；gín-ná ê肉就漸漸燒lō。Chiūⁿ-khì phak tī gín-ná ê seng-khu, chhùi tùi chhùi, ba̍k-chiu tùi ba̍k-chiu, chhiú tùi chhiú, kui-sin àⁿ tī gín-ná ê seng-khu; gín-ná ê bah chiū chiām-chiām sio-lō.

35伊落來，tī厝內行來行去一pái，koh上去，kui身àⁿ tī gín-ná；gín-ná phah-ka-chhiùⁿ七pái，目睭就thí開。I lo̍h-lâi, tī chhù-lāi kiâⁿ-lâi kiâⁿ-khì chi̍t-pái, koh chiūⁿ-khì, kui-sin àⁿ tī gín-ná; gín-ná phah-ka-chhiùⁿ chhit-pái, ba̍k-chiu chiū thí-khui.

36以利沙叫Ki-hap-se講，你叫chit-ê Su-liām ê婦人人來。伊就叫伊；伊入來伊hia，以利沙講，抱你ê gín-ná 起來。Í-lī-sa kiò Ki-hap-se kóng, Lí kiò chit ê Su-liām ê hū-jîn-lâng lâi. I chiū kiò i; i ji̍p-lâi i hia, Í-lī-sa kóng, Phō lí ê gín-ná khí--lâi.

37婦人人就入來，àⁿ tī伊ê腳前，仆tī地裡，抱伊ê kiáⁿ出去。Hū-jîn-lâng chiū ji̍p-lâi, àⁿ tī i ê kha-chêng, phak tī tōe--nih, phō i ê kiáⁿ chhut-khì.

38以利沙koh來到Kiat-kah；hit時國內飢荒，先知ê學生坐tī伊ê面前；伊吩咐奴僕講，你將大鼎hē tī火裡，kā先知ê學生煮菜湯。Í-lī-sa koh lâi kàu Kiat-kah; hit-sî kok-lāi ki-hng, sian-ti ê ha̍k-seng chē tī i ê bīn-chêng; i hoan-hù lô͘-po̍k kóng, Lí chiong tōa-tiáⁿ hē tī hé--nih, kā sian-ti ê ha̍k-seng chú chhài-thng.

39有一人去田裡挽菜，tú-tio̍h一叢野藤，就挽伊ê瓜滿p歲 tò來；切伊，lok tī煮菜湯ê鼎；因為in m̄ bat是甚麼物。Ū chi̍t-lâng khì chhân--nih bán chhài, tú-tio̍h chi̍t châng iá-tîn, chiū bán i ê koe móa-phè tò-lâi; chhiat i, lok tī chú chhài-thng ê tiáⁿ; in-ūi in m̄ bat sī sím-mi̍h mi̍h.

40Piàⁿ出來hō͘ in食；食菜湯ê時，in lóng叫講，上帝ê奴僕ah，鼎內有死ê毒；in lóng bōe食得。Piàⁿ--chhut-lâi hō͘ in chia̍h; chia̍h chhài-thng ê sî, in lóng kiò kóng, Siōng-tè ê lô͘-po̍k ah, tiáⁿ-lāi ū sí ê to̍k; in lóng bōe-chia̍h-tit.

41以利沙講，The̍h淡薄麵粉來；就將麵粉sám tī鼎裡，講，Piàⁿ出來hō͘ in食；鼎內就無害。Í-lī-sa kóng, The̍h tām-po̍h mī-hún lâi; chiū chiong mī-hún sám tī tiáⁿ--nih, kóng, Piàⁿ--chhut-lâi hō͘ in chia̍h; tiáⁿ-lāi chiū bô hāi.

42有一人tùi Pa-le̍k-sa-lī-sa來，帶起頭熟ê麥所做ê餅，kap大麥餅二十個，kap新ê穗，貯tī袋裡，送hō͘上帝ê奴僕。伊就講，將chiah-ê hō͘百姓食。Ū chi̍t-lâng tùi Pa-le̍k-sa-lī-sa lâi, tòa khí-thâu se̍k ê be̍h só͘ chòe ê piáⁿ, kap tōa-be̍h piáⁿ jī-cha̍p-ê, kap sin ê sūi, tóe tī tē--nih, sàng hō͘ Siōng-tè ê lô͘-po̍k. I chiū kóng, Chiong chiah-ê hō͘ peh-sìⁿ chia̍h.

43伊ê差用講，怎樣，我kiám thang排chiah-ê tī一百人ê面前mah？伊講，做你hō͘百姓食，因為耶和華án-ni講，In beh食伊，iáu有chhun。I ê chhe-ēng kóng, Cháiⁿ-iūⁿ, góa kiám thang pâi chiah-ê tī chi̍t-pah lâng ê bīn-chêng mah? I kóng, Chòe lí hō͘ peh-sìⁿ chia̍h, in-ūi Iâ-hô-hoa án-ni kóng, In beh chia̍h i, iáu ū chhun.

44伊就排tī in ê面前，in食伊，也有chhun，照耶和華所講。I chiū pâi tī in ê bīn-chêng, in chia̍h i, iā ū chhun, chiàu Iâ-hô-hoa só͘ kóng.

1A-lân王ê軍長Nái-bān，tī伊ê主人ê面前做大，做尊貴，因為耶和華bat用伊hō͘ A-lân得勝，伊也是大權能ê勇士；總是thái-ko。A-lân ông ê kun-tiúⁿ Nái-bān, tī i ê chú-lâng ê bīn-chêng chòe-tōa, chòe chun-kùi, in-ūi Iâ-hô-hoa bat ēng i hō͘ A-lân tek-sèng, i iā sī tōa koân-lêng ê ióng-sū; chóng-sī thái-ko.

2前A-lân人kui陣出去，tùi以色列地掠一個cha-bó͘-gín-ná；伊就伺候Nái-bān ê bó͘。Chêng A-lân lâng kui-tīn chhut-khì, tùi Í-sek-lia̍t tōe lia̍h chi̍t ê cha-bó͘-gín-ná; i chiū su-hāu Nái-bān ê bó͘.

3伊kā伊ê主母講，苦bōe得tio̍h我ê主kap撒馬利亞ê先知相kap tī-teh，伊的確能醫好伊ê thái-ko。I kā i ê chú-bú kóng, Khó͘ bōe tit-tio̍h góa ê chú kap Sat-má-lī-a ê sian-ti saⁿ-kap tī-teh, i tek-khak ōe i-hó i ê thái-ko.

4有人入去kā伊ê主講，屬以色列地ê cha-bó͘-gín-ná án-ni án-ni講。Ū lâng ji̍p-khì kā i ê chú kóng, Sio̍k Í-sek-lia̍t tōe ê cha-bó͘-gín-ná án-ni án-ni kóng.

5A-lân王講，你去ah，我也beh寄一張phoe hō͘以色列王。Nái-bān就去，帶銀十tha-liân-tek，金六千，衣裳十套；A-lân ông kóng, Lí khì ah, góa iā beh kià chi̍t tiuⁿ phoe hō͘ Í-sek-lia̍t ông. Nái-bān chiū khì, tòa gûn cha̍p tha-liân-tek, kim la̍k chheng, i-chiûⁿ cha̍p-thò;

6帶phoe到以色列王hia。phoe內講，Phoe到你hia ê時，看ah，我差人臣Nái-bān去見你，你tio̍h醫好伊ê thái-ko。tòa phoe kàu Í-sek-lia̍t ông hia. phoe-lāi kóng, Phoe kàu lí hia ê sî, khòaⁿ ah, góa chhe jîn-sîn Nái-bān khì kìⁿ lí, lí tio̍h i-hó i ê thái-ko.

7以色列王看phoe了，就拆裂伊ê衫，講，我kiám是上帝，hō͘人死，hō͘人活mah？Chit人竟然差人來我chia，kah我醫好伊ê thái-ko；請lín chim-chiok想，看chit人怎樣chhē縫攻擊我。Í-sek-lia̍t ông khòaⁿ phoe liáu, chiū thiah li̍h i ê saⁿ, kóng, Góa kiám sī Siōng-tè, hō͘ lâng sí, hō͘ lâng oa̍h mah? chit-lâng kéng-jiân chhe lâng lâi góa chia, kah góa i-hó i ê thái-ko; chhiáⁿ lín chim-chiok siūⁿ, khòaⁿ chit-lâng cháiⁿ-iūⁿ chhē-phāng kong-kek góa.

8上帝ê奴僕以利沙聽見以色列王拆裂伊ê衫，就差人去見王講，你啥事拆裂衫ah？Thang hō͘ hit人到我chia，伊chiah知以色列中有先知。Siōng-tè ê lô͘-po̍k Í-lī-sa thiaⁿ-kìⁿ Í-sek-lia̍t ông thiah-li̍h i ê saⁿ, chiū chhe lâng khì kìⁿ ông kóng, Lí siáⁿ-sū thiah-li̍h saⁿ ah? Thang hō͘ hit-lâng kàu góa chia, i chiah chai Í-sek-lia̍t tiong ū sian-ti.

9Nái-bān就kap伊ê馬，伊ê車來，khiā tī以利沙ê厝門口。Nái-bān chiū kap i ê bé, i ê chhia lâi, khiā tī Í-lī-sa ê chhù mn̂g-kháu.

10以利沙差一個使者，kā Nái-bān講，你去約旦河洗身軀七pái，你ê肉就復原，你beh得tio̍h清氣。Í-lī-sa chhe chi̍t ê sù-chiá, kā Nái-bān kóng, Lí khì Iok-tàn hô sóe sin-khu chhit-pái, lí ê bah chiū ho̍k-goân, lí beh tit-tio̍h chheng-khì.

11Nái-bān就受氣，退去，講，我本phah算伊的確beh出來見我，khiā-teh求叫耶和華伊ê上帝ê名，搖手tī患tio̍h ê所在，來醫好thái-ko-ê。Nái-bān chiū siū-khì, thè-khì, kóng, Góa pún phah-sǹg i tek-khak beh chhut-lâi kìⁿ góa, khiā--teh kiû-kiò Iâ-hô-hoa i ê Siōng-tè ê miâ, iô-chhiú tī hoān-tio̍h ê só͘-chāi, lâi i-hó thái-ko-ê.

12大馬色ê河，A-pa-ná kap Hoat-jíⁿ-hoat，kiám無比以色列一切ê水khah好mah？我tī-hia洗身軀bōe得tio̍h清氣mah？就oa̍t-tńg身受氣，做伊去。Tāi-má-sek ê hô, A-pa-ná kap Hoat-jíⁿ-hoat, kiám bô pí Í-sek-lia̍t it-chhè ê chúi khah-hó mah? góa tī-hia sóe seng-khu bōe tit-tio̍h chheng-khì mah? chiū oa̍t-tńg-sin siū-khì, chòe i khì.

13伊ê奴僕進前，kā伊講，我ê父ah，先知若kah你去做一件大事，你kiám無beh做mah？何況伊kan-ta kā你講，洗就清氣ah？I ê lô͘-po̍k chìn-chêng, kā i kóng, Góa ê pē ah, sian-ti nā kah lí khì chòe chi̍t-kiāⁿ tōa-sū, lí kiám bô beh chòe mah? hô-hòng i kan-ta kā lí kóng, Sóe chiū chheng-khì ah?

14Nái-bān就落去，照上帝奴僕ê話，tī約旦河洗七pái；伊ê肉復原，親像gín-ná肉，伊就清氣。Nái-bān chiū lo̍h-khì, chiàu Siōng-tè lô͘-po̍k ê ōe, tī Iok-tàn hô sóe chhit-pái; i ê bah ho̍k-goân, chhin-chhiūⁿ gín-ná bah, i chiū chheng-khì.

15伊kap一切tè伊ê人倒tńg來上帝ê奴僕hia，khiā tī伊ê面前講，看ah，我taⁿ知，除以色列以外，普天下無有上帝；taⁿ求你收你ê奴僕ê禮物。I kap it-chhè tè i ê lâng tò-tńg-lâi Siōng-tè ê lô͘-po̍k hia, khiā tī i ê bīn-chêng kóng, Khòaⁿ ah, góa taⁿ chai, tû Í-sek-lia̍t í-gōa, phó͘ thiⁿ-ē bô ū Siōng-tè; taⁿ kiû lí siu lí ê lô͘-po̍k ê lé-mi̍h.

16伊講，我kí永活ê耶和華，就是我khiā tī伊ê面前ê，來chiù-chōa，我的確m̄收。伊強迫伊收，伊決斷m̄。I kóng, Góa kí éng-oa̍h ê Iâ-hô-hoa, chiū-sī góa khiā tī I ê bīn-chêng ê, lâi chiù-chōa, góa tek-khak m̄-siu. I kiông-pek i siu, i koat-toàn m̄.

17Nái-bān講，若m̄，求你將兩隻騾所能載ê土hō͘你ê奴僕；因為tùi taⁿ以後，你ê奴僕無koh用燒祭á是別號ê祭hō͘別ê上帝；只有獻hō͘耶和華。Nái-bān kóng, Nā m̄, kiû lí chiong nn̄g chiah lô só͘ ōe chài ê thô͘ hō͘ lí ê lô͘-po̍k; in-ūi tùi taⁿ í-āu, lí ê lô͘-po̍k bô koh ēng sio-chè á-sī pa̍t-hō ê chè hō͘ pa̍t ê siōng-tè; chí-ū hiàn hō͘ Iâ-hô-hoa.

18獨獨有一項事，願耶和華赦免你ê奴僕，就是我ê主入Lîm-bûn ê廟，tī-hia敬拜，óa-tio̍h我ê手ê時，koh我tī Lîm-bûn ê廟àⁿ腰；就是我tī Lîm-bûn ê廟àⁿ腰 ê時，願耶和華tī chit件事赦免你ê奴僕。To̍k-to̍k ū chi̍t-hāng sū, goān Iâ-hô-hoa sià-bián lí ê lô͘-po̍k, chiū-sī góa ê chú ji̍p Lîm-bûn ê biō, tī-hia kèng-pài, òa(**óa)--tio̍h góa ê chhiú ê sî, koh góa tī Lîm-bûn ê biō àⁿ-io; chiū-sī góa tī Lîm-bûn ê biō àⁿ-io ê sî, goān Iâ-hô-hoa tī chí(**chit) chit kiāⁿ sū sià-bián lí ê lô͘-po̍k.

19伊就kā伊講，你thang平安去。伊就離開伊去，行一chām-á。I chiū kā i kóng, Lí thang pêng-an khì. I chiū lī-khui i khì, kiâⁿ chi̍t chām-á.

20上帝ê奴僕以利沙ê差用Ki-hap-se，心內講，我ê主人體貼chit-ê A-lân人Nái-bān，無beh對伊ê手收伊所帶來ê；我kí永活ê耶和華來講，我beh走去jip伊，對伊the̍h淡薄。Siōng-tè ê lô͘-po̍k Í-lī-sa ê chhe-ēng Ki-hap-se, sim-lāi kóng, Góa ê chú-lâng thé-thiap chit ê A-lân lâng Nái-bān, bô beh tùi i ê chhiú siu i só͘ tòa--lâi-ê; góa kí éng-oa̍h ê Iâ-hô-hoa lâi kóng, góa beh cháu-khì jip i, tùi i the̍h tām-po̍h.

21Ki-hap-se就去jip Nái-bān ê後面。Nái-bān看見有人走來jip伊，就落車迎接伊，講，Lóng平安mah？Ki-hap-se chiū khì jip Nái-bān ê āu-bīn. Nái-bān khòaⁿ-kìⁿ ū lâng cháu lâi jip--i, chiū lo̍h-chhia ngiâ-chih i, kóng, Lóng pêng-an mah?

22講，Lóng平安；我ê主差我來講，Tú-chiah有兩個少年人，是先知ê學生，tùi Í-hoat-liân山地來見我；請你用銀一tha-liân-tek，衣裳兩套，hō͘伊。Kóng, Lóng pêng-an; góa ê chú chhe góa lâi kóng, Tú-chiah ū nn̄g ê siàu-liân lâng, sī sian-ti ê ha̍k-seng, tùi Í-hoat-liân soaⁿ-tōe lâi kìⁿ góa; chhiáⁿ lí ēng gûn chi̍t tha-liân-tek, i-chiûⁿ nn̄g thò, hō͘ i.

23Nái-bān講，M̄-thang 推(the)，請收兩tha-liân-tek；強迫伊，就將兩tha-liân-tek銀裝tī兩個布袋，kap兩套衣裳，交伊兩個奴僕；兩個奴僕背伊，行tī伊ê頭前。Nái-bān kóng, M̄-thang the, chhiáⁿ siu nn̄g tha-liân-tek; kiông-pek i, chiū chiong nn̄g tha-liân-tek gûn chng tī nn̄g ê pò͘-tē, kap nn̄g thò i-chiûⁿ, kau i nn̄g ê lô͘-po̍k; nn̄g ê lô͘-po̍k pē i, kiâⁿ tī i ê thâu-chêng.

24到山裡ê時，Ki-hap-se tùi in ê手接來，hē tī厝內；差in去，in就去。Kàu soaⁿ--nih ê sî, Ki-hap-se tùi in ê chhiú chih--lâi, hē tī chhù-lāi; chhe in khì, in chiū khì.

25伊就入去khiā tī伊ê主人ê面前。以利沙問伊講，Ki-hap-se，你tùi toh落來？伊應伊講，你ê奴僕無去toh落。I chiū ji̍p-khì khiā tī i ê chú-lâng ê bīn-chêng. Í-lī-sa mn̄g i kóng, Ki-hap-se, lí tùi toh-lo̍h lâi? I ìn i kóng, Lí ê lô͘-po̍k bô khì toh-lo̍h.

26以利沙kā伊講，hit人落車 倒tńg來迎接你ê時，我ê心kiám無kap你去mah？這kiám是受銀，受衣裳、橄欖園、葡萄園、牛、羊、奴僕、女婢ê時mah？Í-lī-sa kā i kóng, Hit-lâng lo̍h-chhia tò-tńg--lâi ngiâ-chih lí ê sî, góa ê sim kiám bô kap lí khì mah? Che kiám sī siū gûn, siū i-chiûⁿ, kaⁿ-ná-hn̂g, phû-tô-hn̂g, gû, iûⁿ, lô͘-po̍k, lú-pī ê sî mah?

27Tùi án-ni，Nái-bān ê thái-ko beh傳hō͘你，kap你ê後裔，直到永遠。Ki-hap-se tùi以利沙ê面前退出去，就起thái-ko，白親像雪。Tùi án-ni Nái-bān ê thái-ko beh thoân hō͘ lí, kap lí ê hō͘-è, ti̍t-kàu éng-oán. Ki-hap-se tùi Í-lī-sa ê bīn-chêng thè--chhut-khì, chiū khí thái-ko, pe̍h chhin-chhiūⁿ seh.

1先知ê學生kā以利沙講，看ah，阮kap你所tòa ê所在siuⁿ狹。Sian-ti ê ha̍k-seng kā Í-lī-sa kóng, Khòaⁿ ah, goán kap lí só͘ tòa ê só͘-chāi siuⁿ oe̍h.

2求你准阮去約旦，ta̍k人tùi-hia取一支柴料，hō͘阮tī-hia起一所在thang khiā。伊講，Lín thang去ah。Kiû lí chún goán khì Iok-tàn, ta̍k-lâng tùi-hia chhú chi̍t ki chhâ-liāu, hō͘ goán tī-hia khí chi̍t só͘-chāi thang khiā. I kóng, Lín thang khì ah.

3有一個講，莫得推，求你kap奴僕去。應講，我beh去。Tùi án-ni，就kap in去。Ū chi̍t-ê kóng, Bo̍h-tit the, kiû lí kap lô͘-po̍k khì. Ìn kóng, Góa beh khì. Tùi án-ni chiū kap in khì.

4In到約旦，就剉樹。In kàu Iok-tàn, chiū chhò-chhiū.

5有一人剉樹ê時，斧頭肉ka-la̍uh tī水裡。伊就叫講，慘ah！我ê主ah，chit支斧頭是借ê。Ū chi̍t-lâng chhò-chhiū ê sî, pó͘-thâu-bah ka-la̍uh tī chúi--nih. I chiū kiò kóng, Chhám--ah! Góa ê chú ah, chit ki pó͘-thâu sī chioh--ê.

6上帝ê奴僕講，Ka-la̍uh tī toh落？伊就報伊看hit所在。伊就剉一支柴，hiat tī-hia；斧頭肉就浮起來。Siōng-tè ê lô͘-po̍k kóng, Ka-la̍uh tī toh-lo̍h? I chiū pò i khòaⁿ hit só͘-chāi. I chiū chhò chi̍t ki chhâ, hiat tī-hia; pó͘-thâu-bah chiū phû--khí-lâi.

7伊講，Kia̍h起來；hit人就伸手kia̍h起來。I kóng, Kia̍h--khí-lâi; hit-lâng chiū chhun-chhiú kia̍h--khí-lâi.

8A-lân王kap以色列交戰，kap伊ê人臣議論講，我tio̍h紮營tī 某所在，某所在。A-lân ông kap Í-sek-lia̍t kau-chiàn, kap i ê jîn-sîn gī-lūn kóng, Góa tio̍h chat-iâⁿ tī bó͘ só͘-chāi, bó͘ só͘-chāi.

9上帝ê奴僕差人去見以色列王，講，你tio̍h謹慎，m̄-thang tùi某所在經過，因為A-lân人落來tī-hia。Siōng-tè ê lô͘-po̍k chhe lâng khì kìⁿ Í-sek-lia̍t ông, kóng, Lí tio̍h kín-sīn, m̄-thang tùi bó͘ só͘-chāi keng-kè, in-ūi A-lân lâng lo̍h-lâi tī-hia.

10以色列王差人到上帝ê奴僕所講tio̍h持防ê所在。Tùi án-ni，無受害，m̄-nā一pái，兩pái。Í-sek-lia̍t ông chhe lâng kàu Siōng-tè ê lô͘-po̍k só͘ kóng tio̍h tî-hông ê só͘-chāi. Tùi án-ni bô siū-hāi, m̄-nā chi̍t-pái, nn̄g-pái.

11A-lân王因為chit-ê事心內真擘腹，召伊ê人臣來，kā in講，咱中間是誰為以色列王，lín無來kā我講mah？A-lân ông in-ūi chit ê sū sim-lāi chin peh-pak, tiàu i ê jîn-sîn lâi, kā in kóng, Lán tiong-kan chī-chūi ūi Í-sek-lia̍t ông, lín bô lâi kā góa kóng mah?

12有一個人臣講，我ê主，我ê王ah，m̄是án-ni；就是以色列中ê先知以利沙將你tī睏房所講ê話，kā以色列王講。Ū chi̍t ê jîn-sîn kóng, Góa ê chú, góa ê ông ah, m̄-sī án-ni; chiū-sī Í-sek-lia̍t tiong ê sian-ti Í-lī-sa chiong lí tī khùn-pâng só͘ kóng ê ōe, kā Í-sek-lia̍t ông kóng.

13王講，lín去探看伊tī toh落，我thang差人去掠伊。有人kā王講，看ah，伊tī To-tan。Ông kóng, Lín khì thàm-khòaⁿ i tī toh-lo̍h, góa thang chhe lâng khì lia̍h i. Ū lâng kā ông kóng, Khòaⁿ ah, i tī To-tan.

14王就差馬、車，kap大隊兵去hia。In透暝到，圍困hit-ê城。Ông chiū chhe bé, chhia, kap tōa-tūi peng khì hia. In thàu-mî kàu, ûi-khùn hit ê siâⁿ.

15上帝ê奴僕ê差用清早起來出去，看見有軍兵，馬kap車，圍困城。差用kā伊講，慘ah！我ê主ah，咱beh怎樣？Siōng-tè ê lô͘-po̍k ê chhe-ēng chheng-chá khí-lâi chhut khì, khòaⁿ-kìⁿ ū kun-peng, bé kap chhia, ûi-khùn siâⁿ. Chhe-ēng kā i kóng, Chhám--ah! góa ê chú ah, lán beh cháiⁿ-iūⁿ?

16上帝ê奴僕講，m̄免驚；因為kap咱tī-teh-ê，比kap in tī-teh-ê，koh-khah chōe。Siōng-tè ê lô͘-po̍k kóng, M̄-bián kiaⁿ; in-ūi kap lán tī-teh-ê, pí kap in tī-teh-ê, koh khah chōe.

17以利沙祈禱講，耶和華ah，求你開伊ê目睭，hō͘伊能看見。耶和華就開少年人ê目睭，伊就看見；看ah，遍山火尾火車圍以利沙。Í-lī-sa kî-tó kóng, Iâ-hô-hoa ah, kiû Lí khui i ê ba̍k-chiu, hō͘ i ōe khòaⁿ-kìⁿ. Iâ-hô-hoa chiū khui siàu-liân lâng ê ba̍k-chiu, i chiū khòaⁿ-kìⁿ; khòaⁿ ah, piàn-soaⁿ hé-bé hé-chhia ûi Í-lī-sa.

18In落去到伊hia，以利沙祈禱講，耶和華ah，求你phah chiah-ê百姓，hō͘ in chhiⁿ-mî。伊就phah hō͘ in chhiⁿ-mî，照以利沙ê話。In lo̍h-khì kàu i hia, Í-lī-sa kî-tó kóng, Iâ-hô-hoa ah, kiû Lí phah chiah ê peh-sìⁿ, hō͘ in chhiⁿ-mî. I chiū phah hō͘ in chhiⁿ-mî, chiàu Í-lī-sa ê ōe.

19以利沙kā in講，Chit-ê m̄是hit-ê路，chit-ê也m̄是hit-ê城；lín tè我，我beh chhōa lín到lín所chhē ê人hia。就chhōa in到撒馬利亞。Í-lī-sa kā in kóng, Chit-ê m̄-sī hit ê lō͘, chit-ê iā m̄-sī hit ê siâⁿ; lín tè góa, góa beh chhōa lín kàu lín só͘ chhē ê lâng hia. Chiū chhōa in kàu Sat-má-lī-a.

20In入撒馬利亞，以利沙講，耶和華ah，求你開chiah-ê人ê目睭，hō͘ in看見。耶和華開in ê目睭，in就看見；無phah算，是tī撒馬利亞ê城內。In ji̍p Sat-má-lī-a, Í-lī-sa kóng, Iâ-hô-hoa ah, kiû Lí khui chiah ê lâng ê ba̍k-chiu, hō͘ in khòaⁿ-kìⁿ. Iâ-hô-hoa khui in ê ba̍k-chiu, in chiū khòaⁿ-kìⁿ; bô phah-sǹg, sī tī Sat-má-lī-a ê siâⁿ-lāi.

21以色列王看見伊n，就問以利沙講，我ê父ah，我tio̍h phah伊mah？tio̍h phah伊mah？Í-sek-lia̍t ông khòaⁿ-kìⁿ in, chiū mn̄g Í-lī-sa kóng, Góa ê pē ah, góa tio̍h phah i mah? tio̍h phah i mah?

22應講，M̄-thang phah in；你用刀用弓所掠來ê，kiám thang phah伊mah？tio̍h hē餅kap水tī in ê面前，hō͘ in lim食，tò去in ê主人hia。Ìn kóng, M̄-thang phah in; lí ēng to ēng keng só͘ lia̍h--lâi-ê, kiám thang phah i mah? tio̍h hē piáⁿ kap chúi tī in ê bīn-chêng, hō͘ in lim-chia̍h, tò-khì in ê chú-lâng hia.

23王替in備辦chōe-chōe食物；in lim食明白，就kah伊n去；就tò去in ê主人hia。Tùi án-ni，A-lân ê軍兵無koh侵犯以色列ê境界。Ông thòe in pī-pān chōe-chōe chia̍h-mi̍h; in lim-chia̍h bêng-pe̍k, chiū kah in khì; chiū tò-khì in ê chú-lâng hia. Tùi án-ni A-lân ê kun-peng bô koh chhim-hoān Í-sek-lia̍t ê kéng-kài.

24後來A-lân王Piān-hap-ta̍t聚集伊ê全軍，上來圍困撒馬利亞。Āu-lâi A-lân ông Piān-hap-ta̍t chū-chi̍p i ê choân-kun, chiūⁿ-lâi ûi-khùn Sat-má-lī-a.

25撒馬利亞大飢荒；in圍困城，致到一個驢頭值銀八十sià-khek-le̍k，鴿糞一khap ê四份一值銀五sià-khek-le̍k。Sat-má-lī-a tōa ki-hng; in ûi-khùn siâⁿ, tì-kàu chi̍t ê lû-thâu ta̍t gûn poeh-cha̍p sià-khek-le̍k, kap-pùn chi̍t-khap ê sì-hūn-chi̍t ta̍t gûn gō͘ sià-khek-le̍k.

26以色列王tùi城牆經過ê時，有一個婦人人對伊求叫，講，我ê主，我ê王ah，幫贊我。Í-sek-lia̍t ông tùi siâⁿ-chhiûⁿ keng-kè ê sî, ū chi̍t ê hū-jîn-lâng tùi i kiû-kiò, kóng, Góa ê chú, góa ê ông ah, pang-chān góa.

27王講，耶和華無幫贊你，我beh tùi toh落幫贊你？是tùi五穀場，á是tùi酒窟ah？Ông kóng, Iâ-hô-hoa bô pang-chān lí, góa beh tùi toh-lo̍h pang-chān lí? sī tùi gō͘-kak-tiûⁿ, á-sī tùi chiú-khut ah?

28王koh講，你有甚麼艱苦？伊應講，chit-ê婦人人對我講，交出你ê kiáⁿ，咱今á日thang食伊，明á日咱食我ê kiáⁿ；Ông koh kóng, Lí ū sím-mi̍h kan-khó͘? I ìn kóng, Chit ê hū-jîn-lâng tùi góa kóng, Kau-chhut lí ê kiáⁿ, lán kin-á-ji̍t thang chia̍h i, bîn-á-ji̍t lán chia̍h góa ê kiáⁿ;

29阮就煮我ê kiáⁿ食伊；隔日我對伊講，交出你ê kiáⁿ，咱thang食伊，總是伊khǹg密伊ê kiáⁿ。goán chiū chú góa ê kiáⁿ chia̍h i; keh-ji̍t góa tùi i kóng, Kau-chhut lí ê kiáⁿ, lán thang chia̍h i, chóng-sī i khǹg-ba̍t i ê kiáⁿ.

30王聽見婦人人ê話，就拆裂衫，tī城牆頂經過；百姓看見伊，看見伊 身底衫是粗麻布。Ông thiaⁿ-kìⁿ hū-jîn-lâng ê ōe, chiū thiah-li̍h saⁿ, tī siâⁿ-chhiûⁿ-téng keng-kè; peh-sìⁿ khòaⁿ-kìⁿ i, khòaⁿ-kìⁿ i sin-tóe-saⁿ sī chho͘-môa-pò͘.

31王講，Sa-hoat ê kiáⁿ以利沙ê頭殼今á日若猶原連tī伊ê身軀，願上帝加倍責罰我。Ông kóng, Sa-hoat ê kiáⁿ Í-lī-sa ê thâu-khak kin-á-ji̍t nā iû-goân liân tī i ê sin-khu, goān Siōng-tè ka-pē chek-hoa̍t góa.

32Hit時以利沙坐tī厝內，長老也kap伊teh坐；王差一人做頭去；使者iáu未到伊hia，以利沙kā長老講，Lín看chit-ê兇手ê kiáⁿ，怎樣差人取我ê頭殼；lín看，使者若來，就tio̍h關門，阻止伊tī門外；tī伊ê後面kiám無有伊ê主人ê腳步聲？Hit-sî Í-lī-sa chē tī chhù-lāi, tióng-ló iā kap i teh chē; ông chhe chi̍t-lâng chòe-thâu khì; sù-chiá iáu-bē kàu i hia, Í-lī-sa kā tiúⁿ-ló kóng, Lín khòaⁿ chit ê hiong-siú ê kiáⁿ, cháiⁿ-iūⁿ chhe lâng chhú góa ê thâu-khak; lín khòaⁿ, sù-chiá nā lâi, chiū tio̍h koaiⁿ-mn̂g, chó͘-chí i tī mn̂g-gōa; tī i ê āu-bīn kiám bô ū i ê chú-lâng ê kha-pō͘ siaⁿ?

33伊iáu kap in講話ê時，看ah，使者落去伊hia；講，看ah，chit-ê災厄tùi耶和華，我啥事tio̍h koh thèng候耶和華ah？I iáu kap in kóng-ōe ê sî, khòaⁿ ah, sù-chiá lo̍h-khì i hia; kóng, Khòaⁿ ah, chit ê chai-ē tùi Iâ-hô-hoa, góa siáⁿ-sū tio̍h koh thèng-hāu Iâ-hô-hoa ah?