1有一個婦人人，以利沙bat hō͘伊ê kiáⁿ koh活ê，也bat kā伊講，起來，你kap你ê全家去tòa你所thang tòa ê所在；因為耶和華命令飢荒臨到，beh tī chit-ê所在七年久。Ū chi̍t ê hū-jîn-lâng, Í-lī-sa bat hō͘ i ê kiáⁿ koh-oa̍h ê, iā bat kā i kóng, Khí-lâi, lí kap lí ê choân-ke khì tòa lí só͘ thang tòa ê só͘-chāi; in-ūi Iâ-hô-hoa bēng-lēng ki-hng lîm-kàu, beh tī chit ê só͘-chāi chhit-nî kú.

2婦人人就起來，照上帝ê奴僕ê話去行；伊kap伊ê家去腓利士人ê地，tòa七年久。Hū-jîn-lâng chiū khí-lâi, chiàu Siōng-tè ê lô͘-po̍k ê ōe khì kiâⁿ; i kap i ê ke khì Hui-lī-sū lâng ê tōe, tòa chhit-nî kú.

3七年滿，hit-ê婦人人tùi腓利士地tò來；就出去，beh為家己ê厝宅田園求叫王。Chhit-nî móa, hit ê hū-jîn-lâng tùi Hui-lī-sū tōe tò-lâi; chiū chhut-khì, beh ūi ka-kī ê chhù-the̍h chhân-hn̂g kiû-kiò ông.

4Hit時王kap上帝ê奴僕ê差用Ki-hap-se講話，講，請你將以利沙所行一切ê大事kā我講。Hit-sî ông kap Siōng-tè ê lô͘-po̍k ê chhe-ēng Ki-hap-se kóng-ōe, kóng, Chhiáⁿ lí chiong Í-lī-sa só͘ kiâⁿ it-chhè ê tōa-sū kā góa kóng.

5Ki-hap-se teh kā王講以利沙怎樣hō͘死ê人koh活；chhàu-khám hit-ê婦人人，就是伊hō͘伊ê kiáⁿ koh活ê，為tio̍h伊ê厝宅田園來求叫王。Ki-hap-se講，我ê主我ê王，chit-ê是hit-ê婦人人，chit-ê是伊ê kiáⁿ，就是以利沙hō͘伊koh活ê。Ki-hap-se teh kā ông kóng Í-lī-sa cháiⁿ-iūⁿ hō͘ sí ê lâng koh-oa̍h; chhàu-khám hit ê hū-jîn-lâng, chiū-sī i hō͘ i ê kiáⁿ koh-oa̍h-ê, ūi-tio̍h i ê chhù-the̍h chhân-hn̂g lâi kiû-kiò ông. Ki-hap-se kóng, Góa ê chú góa ê ông, chit-ê sī hit ê hū-jîn-lâng, chit-ê sī i ê kiáⁿ, chiū-sī Í-lī-sa hō͘ i koh-oa̍h ê.

6王問hit-ê婦人人，伊就kā伊講；王就為tio̍h伊派一個官員講，見若屬chit-ê婦人人ê，lóng tio̍h還伊；tùi伊離開本所在到今á日，伊ê田園所出產ê，也lóng tio̍h還伊。Ông mn̄g hit ê hū-jîn-lâng, i chiū kā i kóng; ông chiū ūi-tio̍h i phài chi̍t ê koaⁿ-oân kóng, Kìⁿ-nā sio̍k chit ê hū-jîn-lâng ê, lóng tio̍h hêng i; tùi i lī-khui pún só͘-chāi kàu kin-á-ji̍t, i ê chhân-hn̂g só͘ chhut-sán ê, iā lóng tio̍h hêng i.

7以利沙來到大馬色；A-lân王Piān-hap-ta̍t teh破病；有人kā王講，上帝ê奴僕來到chia。Í-lī-sa lâi kàu Tāi-má-sek; A-lân ông Piān-hap-ta̍t teh phòa-pīⁿ; ū lâng kā ông kóng, Siōng-tè ê lô͘-po̍k lâi kàu chia.

8王就kā Hap-siat講，你帶禮物去見上帝ê奴僕，拜託伊問耶和華看我chit-ê病會活á-bōe？Ông chiū kā Hap-siat kóng, Lí tòa lé-mi̍h khì kìⁿ Siōng-tè ê lô͘-po̍k, pài-thok i mn̄g Iâ-hô-hoa khòaⁿ góa chit ê pīⁿ ōe oa̍h á-bōe?

9Hap-siat就去見伊，用四十隻駱駝載大馬色ta̍k號ê好物做禮物，去khiā tī伊ê面前，講，你ê kiáⁿ A-lân王Piān-hap-ta̍t差我來你chia，講，我chit-ê病會活á-bōe？Hap-siat chiū khì kìⁿ i, ēng sì-cha̍p chiah lo̍k-tô chài Tāi-má-sek ta̍k-hō ê hó-mi̍h chòe lé-mi̍h, khì khiā tī i ê bīn-chêng, kóng, Lí ê kiáⁿ A-lân ông Piān-hap-ta̍t chhe góa lâi lí chia, kóng, Góa chit ê pīⁿ ōe oa̍h á-bōe?

10以利沙kā伊講，你去回覆伊，講，你的確會活；總是耶和華指示我，伊的確beh死。Í-lī-sa kā i kóng, Lí khì hê-hok i, kóng, Lí tek-khak ōe oa̍h; chóng-sī Iâ-hô-hoa chí-sī góa, i tek-khak beh sí.

11以利沙注目看伊，致到伊見笑；上帝ê奴僕就流目屎。Í-lī-sa chù-ba̍k khòaⁿ i, tì-kàu i kiàn-siàu; Siōng-tè ê lô͘-po̍k chiū lâu ba̍k-sái.

12Hap-siat講，我ê主啥事流目屎？應講，因為我知你所beh苦楚以色列人ê；用火燒in險要ê所在，用刀thâi死in ê壯丁，siak死in ê嬰á，破開in有身孕ê婦人人。Hap-siat kóng, Góa ê chú siáⁿ-sū lâu ba̍k-sái? Ìn kóng, In-ūi góa chai lí só͘ beh khó͘-chhó͘ Í-sek-lia̍t lâng ê; ēng hé sio in hiám-iàu ê só͘-chāi, ēng to thâi-sí in ê chòng-teng, siak-sí in ê eⁿ-á, phòa-khui in ū sin-īn ê hū-jîn-lâng.

13Hap-siat講，你ê奴僕是甚麼，不過是一隻狗，thái-thó能行chit-ê大事ah？以利沙應講，耶和華指示我，你beh做A-lân王。Hap-siat kóng, Lí ê lô͘-po̍k sī sím-mi̍h, put-kò sī chi̍t chiah káu, thái-thó ōe kiâⁿ chit ê tōa-sū ah? Í-lī-sa ìn kóng, Iâ-hô-hoa chí-sī góa, lí beh chòe A-lân ông.

14伊離開以利沙，tò去伊ê主人hia；主人問伊講，以利沙kā你講甚麼？應講，伊kā我講，你的確會活。I lī-khui Í-lī-sa, tò-khì i ê chú-lâng hia; chú-lâng mn̄g i kóng, Í-lī-sa kā lí kóng sím-mi̍h? Ìn kóng, I kā góa kóng, lí tek-khak ōe oa̍h.

15隔日伊the̍h厚ê布ùn水，蓋王ê面，王就死。Hap-siat就替伊做王。Keh-ji̍t i the̍h kāu ê pò͘ ùn chúi, khàm ông ê bīn, ông chiū sí. Hap-siat chiū thòe i chòe ông.

16以色列王A-hap ê kiáⁿ Iok-lâm第五年，Iok-sa-hoat做猶大王ê時，猶大王Iok-sa-hoat ê kiáⁿ Iâ-hô-lâm起頭坐位。Í-sek-lia̍t ông A-hap ê kiáⁿ Iok-lâm tē-gō͘ nî, Iok-sa-hoat chòe Iû-tāi ông ê sî, Iû-tāi ông Iok-sa-hoat ê kiáⁿ Iâ-hô-lâm khí-thâu chē-ūi.

17Iâ-hô-lâm坐位ê時，三十二歲，tī耶路撒冷做王歷過八年。Iâ-hô-lâm chē-ūi ê sî, saⁿ-cha̍p-jī hè, tī Iâ-lō͘-sat-léng chòe-ông le̍k-kè poeh-nî.

18伊行以色列王ê路，kap A-hap ê家無各樣；因為伊娶A-hap ê cha-bó͘-kiáⁿ做bó͘，行耶和華所看做pháiⁿ ê事。I kiâⁿ Í-sek-lia̍t ông ê lō͘, kap A-hap ê ke bô koh-iūⁿ; in-ūi i chhōa A-hap ê cha-bó͘-kiáⁿ chòe-bó͘, kiâⁿ Iâ-hô-hoa só͘ khòaⁿ-chòe pháiⁿ ê sū.

19總是耶和華，因為伊ê奴僕大衛ê緣故，m̄甘滅猶大，照伊所應允大衛ê話，永遠賞賜一pha燈hō͘伊ê kiáⁿ孫。Chóng-sī Iâ-hô-hoa, in-ūi I ê lô͘-po̍k Tāi-pi̍t ê iân-kò͘, m̄-kam bia̍t Iû-tāi, chiàu I só͘ èng-ún Tāi-pi̍t ê ōe, éng-oán siúⁿ-sù chi̍t pha teng hō͘ i ê kiáⁿ-sun.

20當Iok-lâm ê年間，Í-tong背叛猶大，脫離伊ê手頭，家己設立王。Tng Iok-lâm ê nî-kan, Í-tong pōe-poān Iû-tāi, thoat-lī i ê chhiú-thâu, ka-kī siat-li̍p ông.

21Iok-lâm帶所有ê戰車，過去Sat-ek，透暝起來，phah圍困伊ê Í-tong人kap hiah-ê車長；百姓就逃走，ta̍k-ê tò去伊ê布棚。Iok-lâm tòa só͘ ū ê chiàn-chhia, kè-khì Sat-ek, thàu-mî khí-lâi, phah ûi-khùn i ê Í-tong lâng kap hiah ê chhia-tiúⁿ; peh-sìⁿ chiū tô-cháu, ta̍k-ê tò-khì i ê pò͘-pîⁿ.

22Án-ni，Í-tong人背叛猶大，脫離伊ê手頭，到今á日。Siâng hit時，Li̍p-ná人也背叛。Án-ni, Í-tong lâng pōe-poān Iû-tāi, thoat-lī i ê chhiú-thâu, kàu kin-á-ji̍t. Siâng hit-sî, Li̍p-ná lâng iā pōe-poān.

23Iok-lâm其餘ê事，見伊所行ê，kiám無lóng記tī猶大列王ê記錄mah？Iok-lâm kî-û ê sū, kìⁿ i só͘ kiâⁿ ê, kiám bô lóng kì tī Iû-tāi lia̍t-ông ê kì-lio̍k mah?

24Iok-lâm kap伊ê列祖同睏，tī大衛城kap伊ê祖同埋葬。伊ê kiáⁿ A-hap-siā續接伊做王。Iok-lâm kap i ê lia̍t-chó͘ tâng-khùn, tī Tāi-pi̍t siâⁿ kap i ê chó͘ tâng bâi-chòng. I ê kiáⁿ A-hap-siā sòa-chiap i chòe-ông.

25以色列王A-hap ê kiáⁿ Iok-lâm十二年，猶大王Iâ-hô-lâm ê kiáⁿ A-hap-siā起頭坐位。Í-sek-lia̍t ông A-hap ê kiáⁿ Iok-lâm cha̍p-jī nî, Iû-tāi ông Iâ-hô-lâm ê kiáⁿ A-hap-siā khí-thâu chē-ūi.

26A-hap-siā坐位ê時，二十二歲，tī耶路撒冷做王一年；伊ê老母名叫A-tha-lī-ngá，是以色列王Àm-lī ê cha-bó͘孫。A-hap-siā chē-ūi ê sî, jī-cha̍p-jī hè, tī Iâ-lō͘-sat-léng chòe ông chi̍t-nî; i ê lāu-bú miâ kiò A-tha-lī-ngá, sī Í-sek-lia̍t ông Àm-lī ê cha-bó͘-sun.

27伊行A-hap ê家ê路，行耶和華所看做pháiⁿ ê事，kap A-hap ê家無各樣。因為伊是A-hap ê家ê kiáⁿ婿。I kiâⁿ A-hap ê ke ê lō͘, kiâⁿ Iâ-hô-hoa só͘ khòaⁿ-chòe pháiⁿ ê sū, kap A-hap ê ke bô koh-iūⁿ. In-ūi i sī A-hap ê ke ê kiáⁿ-sài.

28伊kap A-hap ê kiáⁿ Iok-lâm相kap去Ki-lia̍t ê La̍h-boa̍t，kap A-lân王Hap-siat交戰；A-lân人phah傷Iok-lâm。I kap A-hap ê kiáⁿ Iok-lâm saⁿ-kap khì Ki-lia̍t ê La̍h-boa̍t, kap A-lân ông Hap-siat kau-chiàn; A-lân lâng phah-siong Iok-lâm.

29Iok-lâm王tò去Iâ-su-lia̍t，beh醫治伊ê傷，就是伊tī La̍h-boa̍t kap A-lân王Hap-siat交戰ê時，A-lân人phah-tio̍h伊ê。猶大王Iâ-hô-lâm ê kiáⁿ A-hap-siā落去Iâ-su-lia̍t，beh覓(bāi) A-hap ê kiáⁿ Iok-lâm，因為伊有破病。Iok-lâm ông tò-khì Iâ-su-lia̍t, beh i-tī i ê siong, chiū-sī i tī La̍h-boa̍t kap A-lân ông Hap-siat kau-chiàn ê sî, A-lân lâng phah--tio̍h i--ê. Iû-tāi ông Iâ-hô-lâm ê kiáⁿ A-hap-siā lo̍h-khì Iâ-su-lia̍t, beh bāi A-hap ê kiáⁿ Iok-lâm, in-ūi i ū phòa-pīⁿ.

1先知以利沙叫先知ê學生一個，kā伊講，你hâ腰，the̍h一瓶油，去Ki-lia̍t ê La̍h-boa̍t。Sian-ti Í-lī-sa kiò sian-ti ê ha̍k-seng chi̍t-ê, kā i kóng, Lí hâ-io, the̍h chi̍t-pân iû, khì Ki-lia̍t ê La̍h-boa̍t.

2到hia，tio̍h chhē Lêng-sī ê孫，Iok-sa-hoat ê kiáⁿ，Iâ-hō͘，入去，hō͘伊對伊ê兄弟中起來，chhōa伊入內房；Kàu hia, tio̍h chhē Lêng-sī ê sun, Iok-sa-hoat ê kiáⁿ, Iâ-hō͘, ji̍p-khì, hō͘ i tùi i ê hiaⁿ-tī-tiong khí-lâi, chhōa i ji̍p lāi-pâng;

3將瓶內ê油thîn tī伊ê頭殼，講，耶和華án-ni講，我用油抹你做以色列ê王。你就tio̍h開門逃走，m̄-thang 延chhiân。chiong pân-lāi ê iû thîn tī i ê thâu-khak, kóng, Iâ-hô-hoa án-ni kóng, Góa ēng iû boah lí chòe Í-sek-lia̍t ê ông. Lí chiū tio̍h khui-mn̂g tô-cháu, m̄-thang iân-chhiân.

4Chit-ê少年人，就是少年ê先知，去Ki-lia̍t ê La̍h-boa̍t。Chit ê siàu-liân lâng, chiū-sī siàu-liân ê sian-ti, khì Ki-lia̍t ê La̍h-boa̍t.

5到hia，看見眾軍長teh坐；伊就講，軍長ah，我有tāi-chì beh kā你講。Iâ-hō͘講，Beh kā阮中間甚麼人講？應講，軍長ah，就是你。Kàu hia, khòaⁿ-kìⁿ chèng kun-tiúⁿ teh chē; i chiū kóng, Kun-tiúⁿ ah, góa ū tāi-chì beh kā lí kóng. Iâ-hō͘ kóng, Beh kā goán tiong-kan sím-mi̍h lâng kóng? Ìn kóng, Kun-tiúⁿ ah, chiū-sī lí.

6伊就起來，入去厝內；少年人用油thîn tī伊ê頭殼，kā伊講，耶和華以色列ê上帝án-ni講，我用油抹你，做耶和華ê百姓以色列ê王。I chiū khí-lâi, ji̍p-khì chhù-lāi; siàu-liân lâng ēng iû thîn tī i ê thâu-khak, kā i kóng, Iâ-hô-hoa Í-sek-lia̍t ê Siōng-tè án-ni kóng, Góa ēng iû boah lí, chòe Iâ-hô-hoa ê peh-sìⁿ Í-sek-lia̍t ê ông.

7你tio̍h phah滅你ê主人A-hap ê家，hō͘我thang報應我ê奴僕chiah-ê先知ê血，以及耶和華眾奴僕ê血，就是tī Iâ-sé-piat ê手所做ê。Lí tio̍h phah-bia̍t lí ê chú-lâng A-hap ê ke, hō͘ Góa thang pò-èng Góa ê lô͘-po̍k chiah ê sian-ti ê huih, í-ki̍p Iâ-hô-hoa chèng lô͘-po̍k ê huih, chiū-sī tī Iâ-sé-piat ê chhiú só͘ chòe ê.

8因為A-hap全家beh lóng滅無；我beh剪除屬A-hap ê ta-po͘丁，無論受拘束ê，á是自由ê，tī以色列中。In-ūi A-hap choân-ke beh lóng bia̍t-bô; Góa beh chián-tû sio̍k A-hap ê ta-po͘-teng, bô-lūn siū khu-sok-ê, á-sī chū-iû-ê, tī Í-sek-lia̍t tiong.

9我beh hō͘ A-hap ê家親像Nî-pat ê kiáⁿ Iâ-lô-phò-àm ê家，也親像A-hi-ngá ê kiáⁿ Pa-sa ê家。Góa beh hō͘ A-hap ê ke chhin-chhiūⁿ Nî-pat ê kiáⁿ Iâ-lô-phò-àm ê ke, iā chhin-chhiūⁿ A-hi-ngá ê kiáⁿ Pa-sa ê ke.

10Tī Iâ-su-lia̍t ê園，狗beh食Iâ-sé-piat，無人埋葬伊。少年人就開門逃走。Tī Iâ-su-lia̍t ê hn̂g, káu beh chia̍h Iâ-sé-piat, bô lâng bâi-chòng i. Siàu-liân lâng chiū khui-mn̂g tô-cháu.

11Iâ-hō͘出去，到伊ê主人ê奴僕hia；有一人問伊講，Lóng平安無？chit-ê siáu-ê來chhē你甚麼tāi-chì ah？伊kā in講，Lín bat hit-ê人，也知伊所講ê。Iâ-hō͘ chhut-khì, kàu i ê chú-lâng ê lô͘-po̍k hia; ū chi̍t-lâng mn̄g i kóng, Lóng pêng-an bô? chit ê siáu-ê lâi chhē lí sím-mi̍h tāi-chì ah? I kā in kóng, Lín bat hit ê lâng, iā chai i só͘ kóng ê.

12In講，無影，你tio̍h kā阮講。應講，伊án-ni，án-ni kā我講；伊講，耶和華án-ni講，我用油抹你做以色列ê王。In kóng, Bô-iáⁿ, lí tio̍h kā goán kóng. Ìn kóng, I án-ni, án-ni kā góa kóng; i kóng, Iâ-hô-hoa án-ni kóng, Góa ēng iû boah lí chòe Í-sek-lia̍t ê ông.

13In趕緊，ta̍k人用家己ê衫鋪tī崎á ê 頂層，hē tī Iâ-hō͘ ê下面；in pûn哨角講，Iâ-hō͘做王lah。In kóaⁿ-kín, ta̍k-lâng ēng ka-kī ê saⁿ pho͘ tī kiā-á ê téng-chân, hē tī Iâ-hō͘ ê ē-bīn; in pûn sàu-kak kóng, Iâ-hō͘ chòe-ông lah.

14Án-ni Lêng-sī ê孫，Iok-sa-hoat ê kiáⁿ，Iâ-hō͘背叛Iok-lâm。(Iok-lâm kap以色列眾人bat把守Ki-lia̍t ê La̍h-boa̍t，因為A-lân王Hap-siat ê緣故。Án-ni Lêng-sī ê sun, Iok-sa-hoat ê kiáⁿ, Iâ-hō͘ pōe-poān Iok-lâm. (Iok-lâm kap Í-sek-lia̍t chèng-lâng bat pé-siú Ki-lia̍t ê La̍h-boa̍t, in-ūi A-lân ông Hap-siat ê iân-kò͘.

15總是Iok-lâm王tò去Iâ-su-lia̍t，醫治伊ê傷，就是伊tī kap A-lân王Hap-siat交戰ê時，A-lân人phah-tio̍h伊ê。) Iâ-hō͘講，Lín ê意思若是án-ni，就m̄-thang容允人走出城，去Iâ-su-lia̍t報消息。Chóng-sī Iok-lâm ông tò-khì Iâ-su-lia̍t, i-tī i ê siong, chiū-sī i tī kap A-lân ông Hap-siat kau-chiàn ê sî, A-lân lâng phah-tio̍h i--ê.) Iâ-hō͘ kóng, Lín ê ì-sù nā sī án-ni, chiū m̄-thang iông-ún lâng cháu chhut-siâⁿ, khì Iâ-su-lia̍t pò siau-sit.

16Iâ-hō͘就坐車，去Iâ-su-lia̍t，因為Iok-lâm倒tī-hia。猶大王A-hap-siā已經落去覓Iok-lâm。Iâ-hō͘ chiū chē-chhia, khì Iâ-su-lia̍t, in-ūi Iok-lâm tó tī-hia. Iû-tāi ông A-hap-siā í-keng lo̍h-khì bāi Iok-lâm.

17有一個守望ê khiā tī Iâ-su-lia̍t ê樓頂，看見Iâ-hō͘ ê軍隊來，就講，我看見一陣軍隊。Iok-lâm講，差一個騎馬ê去接伊，續問伊講，平安mah？Ū chi̍t ê siú-bāng-ê khiā tī Iâ-su-lia̍t ê lâu-téng, khòaⁿ-kìⁿ Iâ-hō͘ ê kun-tūi lâi, chiū kóng, Góa khòaⁿ-kìⁿ chi̍t-tīn kun-tūi. Iok-lâm kóng, Chhe chi̍t ê khiâ-bé--ê khì chih i, sòa mn̄g i kóng, Pêng-an mah?

18騎馬ê去接伊講，王án-ni講，是平安mah？Iâ-hō͘講，平安á無，kap你甚麼干涉？你oat來tè我ê後面。守望ê koh講，使者到in hia，總是無倒tńg來。Khiâ-bé--ê khì chih i kóng, Ông án-ni kóng, Sī pêng-an mah? Iâ-hō͘ kóng, Pêng-an á-bô, kap lí sím-mi̍h kan-sia̍p? lí oat-lâi tè góa ê āu-bīn. Siú-bāng--ê koh kóng, Sù-chiá kàu in hia, chóng-sī bô tò-tńg-lâi.

19王koh 差一個騎馬ê去，伊到in hia，講，王án-ni講，是平安mah？Iâ-hō͘講，平安á無，kap你甚麼干涉？你oat來tè我ê後面。Ông koh chhe chi̍t ê khiâ-bé--ê khì, i kàu in hia, kóng, Ông án-ni kóng, Sī pêng-an mah? Iâ-hō͘ kóng, Pêng-an á-bô, kap lí sím-mi̍h kan-sia̍p? lí oat-lâi tè góa ê āu-bīn.

20守望ê koh講，伊到in hia，也無倒tńg來；趕車ê款親像Lêng-sī ê孫Iâ-hō͘ teh趕；因為伊趕真狂。Siú-bāng--ê koh kóng, I kàu in hia, iā bô tò-tńg--lâi; kóaⁿ-chhia ê khoán chhin-chhiūⁿ Lêng-sī ê sun Iâ-hō͘ teh kóaⁿ; in-ūi i kóaⁿ chin kông.

21Iok-lâm講，套車；就套伊ê車。以色列王Iok-lâm kap猶大王A-hap-siā出去；ta̍k-ê坐家己ê車出去接Iâ-hō͘；tī Iâ-su-lia̍t人Ná-po̍k ê園tú-tio̍h伊。Iok-lâm kóng, Thò chhia; chiū thò i ê chhia. Í-sek-lia̍t ông Iok-lâm kap Iû-tāi ông A-hap-siā chhut-khì; ta̍k-ê chē ka-kī ê chhia chhut-khì chih Iâ-hō͘; tī Iâ-su-lia̍t lâng Ná-po̍k ê hn̂g tú-tio̍h i.

22Iok-lâm見tio̍h Iâ-hō͘就講，Iâ-hō͘ ah，是平安mah？伊應講，你ê老母Iâ-sé-piat ê淫行邪術hiah-chōe iáu tī-teh，thái會平安？Iok-lâm kìⁿ-tio̍h Iâ-hō͘ chiū kóng, Iâ-hō͘ ah, sī pêng-an mah? I ìn kóng, Lí ê lāu-bú Iâ-sé-piat ê îm-hēng siâ-su̍t hiah-chōe iáu tī-teh, thái ōe pêng-an?

23Iok-lâm就oa̍t-tńg伊ê車走，kā A-hap-siā講，A-hap-siā ah，有謀反lah。Iok-lâm chiū oa̍t-tńg i ê chhia cháu, kā A-hap-siā kóng, A-hap-siā ah, ū bô͘-hoán lah.

24Iâ-hō͘盡力開弓，射tio̍h Iok-lâm ê飯匙骨中；箭對伊ê心thàng出去。伊就lek落車內。Iâ-hō͘ chīn-la̍t khui-keng, siā-tio̍h Iok-lâm ê pn̄g-sî-kut tiong; chìⁿ tùi i ê sim thàng--chhut khì. I chiū lek--lo̍h chhia-lāi.

25Iâ-hō͘ kā伊ê軍長Pit-kah講，你將伊hiat tī Iâ-su-lia̍t人Ná-po̍k ê園裡；你tio̍h記得你我相kap坐車tè伊ê老父A-hap ê時，耶和華對伊所讖語ê；Iâ-hō͘ kā i ê kun-tiúⁿ Pit-kah kóng, Lí chiong i hiat tī Iâ-su-lia̍t lâng Ná-po̍k ê hn̂g--nih; lí tio̍h kì-tit lí góa saⁿ-kap chē-chhia tè i ê lāu-pē A-hap ê sî, Iâ-hô-hoa tùi i só͘ chhàm-gú-ê;

26耶和華講，我昨日有看見Ná-po̍k ê血，kap伊ê kiáⁿ ê血；耶和華koh講，Tī chit坵園我beh報應你。Taⁿ tio̍h將伊hiat tī hit坵園，照耶和華所講ê。Iâ-hô-hoa kóng, Góa chā-ji̍t ū khòaⁿ-kìⁿ Ná-po̍k ê huih, kap i ê kiáⁿ ê huih; Iâ-hô-hoa koh kóng, Tī chit khu hn̂g Góa beh pò-èng lí. Taⁿ tio̍h chiong i hiat tī hit khu hn̂g, chiàu Iâ-hô-hoa só͘ kóng ê.

27猶大王A-hap-siā看見án-ni，就tùi園ê厝ê路逃走。Iâ-hō͘ jip伊，講，也tio̍h phah死伊tī車內；到óa近Í-pek-liân上Ko-jíⁿ ê山坪phah傷伊。伊走到Bí-kiat-to，就死tī-hia。Iû-tāi ông A-hap-siā khòaⁿ-kìⁿ án-ni, chiū tùi hn̂g ê chhù ê lō͘ tô-cháu. Iâ-hō͘ jip i, kóng, Iā tio̍h phah-sí i tī chhia-lāi; kàu óa-kūn Í-pek-liân chiūⁿ Ko-jíⁿ ê soaⁿ-phiâⁿ phah-siong i. I cháu kàu Bí-kiat-to, chiū sí tī-hia.

28伊ê奴僕用車載伊到耶路撒冷，葬tī伊ê墓，kap伊ê列祖，tī大衛ê城。I ê lô͘-po̍k ēng chhia chài i kàu Iâ-lō͘-sat-léng, chòng tī i ê bōng, kap i ê lia̍t-chó͘, tī Tāi-pi̍t ê siâⁿ.

29Tī A-hap ê kiáⁿ Iok-lâm十一年，A-hap-siā起頭做猶大王。Tī A-hap ê kiáⁿ Iok-lâm cha̍p-it nî, A-hap-siā khí-thâu chòe Iû-tāi ông.

30Iâ-hō͘到Iâ-su-lia̍t，Iâ-sé-piat聽見，就畫目眉、梳頭，àⁿ tī窗á teh看。Iâ-hō͘ kàu Iâ-su-lia̍t, Iâ-sé-piat thiaⁿ-kìⁿ, chiū ūi ba̍k-bâi, soe-thâu, àⁿ tī thang-á teh-khòaⁿ.

31Iâ-hō͘入門ê時，Iâ-sé-piat講，thâi死主人ê Sim-lī ah，平安mah？Iâ-hō͘ ji̍p-mn̂g ê sî, Iâ-sé-piat kóng, Thâi-sí chú-lâng ê Sim-lī ah, pêng-an mah?

32Iâ-hō͘ kia̍h頭ǹg窗á看，講，Chī-chūi為我，是誰 ah？有兩三個太監àⁿ落看伊。Iâ-hō͘ kia̍h-thâu ǹg thang-á khòaⁿ, kóng, Chī-chūi ūi góa, chī-chūi ah? Ū nn̄g-saⁿ ê thài-kàm àⁿ-lo̍h khòaⁿ i.

33Iâ-hō͘講，kā伊chhia落來；in就chhia伊落來；伊ê血chōaⁿ-tio̍h牆壁kap馬；就用腳踏伊。Iâ-hō͘ kóng, Kā i chhia--lo̍h-lâi; in chiū chhia i lo̍h-lâi; i ê huih chōaⁿ-tio̍h chhiûⁿ-piah kap bé; chiū ēng kha ta̍h i.

34Iâ-hō͘入去，也食也lim，講，lín去看hit-ê受咒詛ê婦人人，續埋葬伊，因為伊是王ê cha-bó͘-kiáⁿ。Iâ-hō͘ ji̍p-khì, iā chia̍h iā lim, kóng, Lín khì khòaⁿ hit ê siū chiù-chó͘ ê hū-jîn-lâng, sòa bâi-chòng i, in-ūi i sī ông ê cha-bó͘-kiáⁿ.

35In去beh葬伊；kan-ta chhē-tio̍h伊ê頭殼骨，kap腳，kap手掌nā-tiāⁿ。In khì beh chòng i; kan-ta chhē-tio̍h i ê thâu-khak-kut, kap kha, kap chhiú-chiúⁿ nā-tiāⁿ.

36In tò來回覆伊；Iâ-hō͘就講，這就是耶和華託伊ê奴僕Thê-su-pí人以利亞所講ê話，講，Tī Iâ-su-lia̍t ê園，狗beh食Iâ-sé-piat ê肉。In tò-lâi hê-hok i; Iâ-hō͘ chiū kóng, Che chiū-sī Iâ-hô-hoa thok I ê lô͘-po̍k Thê-su-pí lâng Í-lī-a só͘ kóng ê ōe, kóng, Tī Iâ-su-lia̍t ê hn̂g, káu beh chia̍h Iâ-sé-piat ê bah.

37Koh Iâ-sé-piat ê身屍beh tī Iâ-su-lia̍t ê園親像糞tī土面，致到人無beh講，這是Iâ-sé-piat。Koh Iâ-sé-piat ê sin-si beh tī Iâ-su-lia̍t ê hn̂g chhin-chhiūⁿ pùn tī thô͘-bīn, tì-kàu lâng bô beh kóng, Che sī Iâ-sé-piat.

1A-hap有七十個kiáⁿ tī撒馬利亞。Iâ-hō͘寫phoe寄去撒馬利亞，hō͘ Iâ-su-lia̍t hiah-ê首領，長老，kap hiah-ê撫養A-hap ê眾kiáⁿ ê；A-hap ū chhit-cha̍p ê kiáⁿ tī Sat-má-lī-a. Iâ-hō͘ siá-phoe kià khì Sat-má-lī-a, hō͘ Iâ-su-lia̍t hiah ê siú-léng, tiúⁿ-ló, kap hiah-ê bú-ióng A-hap ê chèng-kiáⁿ ê;

2phoe講，Lín ê主人hiah-ê kiáⁿ kap lín tī-hia，lín koh有車馬kap堅固ê城，kap器械；phoe kóng, Lín ê chú-lâng hiah ê kiáⁿ kap lín tī-hia, lín koh ū chhia bé kap kian-kò͘ ê siâⁿ, kap khì-hâi;

3chit張phoe到lín hia ê時，就tio̍h tī lín主人hiah-ê kiáⁿ ê中間，揀一個gâu koh妥當ê，hō͘伊坐in老父ê位，lín也thang為lín主人ê家交戰。chi̍t tiuⁿ phoe kàu lín hia ê sî, chiū tio̍h tī lín chú-lâng hiah ê kiáⁿ ê tiong-kan, kéng chi̍t ê gâu koh thò-tòng ê, hō͘ i chē in lāu-pē ê ūi, lín iā thang ūi lín chú-lâng ê ke kau-chiàn.

4In真驚，相kap講，看ah，兩個王tī伊ê面前尚且khiā-bōe-tiâu，咱thái-thó khiā-ōe-tiâu？In chin kiaⁿ, saⁿ-kap kóng, Khòaⁿ ah, nn̄g ê ông tī i ê bīn-chêng siōng-chhiáⁿ khiā-bōe-tiâu, lán thái-thó khiā-ōe-tiâu?

5管家ê，kap城守，kap hiah-ê長老，kap撫養hiah-ê kiáⁿ ê，差人去見伊â-hō͘，講，阮是你ê奴僕，見你所kā阮講ê，阮beh行，阮無beh設立人做王，你所看做好ê，thang行伊。Koán-ke--ê, kap siâⁿ-siú, kap hiah ê tiúⁿ-ló, kap bú-ióng hiah ê kiáⁿ ê, chhe lâng khì kìⁿ Iâ-hō͘, kóng, Goán sī lí ê lô͘-po̍k, kìⁿ lí só͘ kā goán kóng ê, goán beh kiâⁿ, goán bô beh siat-li̍p lâng chòe ông, lí só͘ khòaⁿ-chòe hó ê, thang kiâⁿ i.

6伊koh寫phoe hō͘ in講，Lín若為我，聽thàn我ê話，tio̍h取lín ê主人hiah-ê kiáⁿ ê頭殼，明á日chit時，　來Iâ-su-lia̍t我chia。王ê kiáⁿ七十人kap城內尊貴ê人，就是撫養in ê，相kap tòa。I koh siá phoe hō͘ in kóng, Lín nā ūi góa, thiaⁿ-thàn góa ê ōe, tio̍h chhú lín ê chú-lâng hiah ê kiáⁿ ê thâu-khak, bîn-á-ji̍t chit-sî lâi Iâ-su-lia̍t góa chia. Ông ê kiáⁿ chhit-cha̍p lâng kap siâⁿ-lāi chun-kùi ê lâng, chiū-sī bú-ióng in ê, saⁿ-kap tòa.

7Phoe一下到，in就掠王ê kiáⁿ七十人，一盡thâi死，將頭殼hē tī筐裡，送到Iâ-su-lia̍t Iâ-hō͘ hia。Phoe chi̍t-ē kàu, in chiū lia̍h ông ê kiáⁿ chhit-cha̍p lâng, it-chīn thâi-sí, chiong thâu-khak hē tī kheng--nih, sàng kàu Iâ-su-lia̍t Iâ-hō͘ hia.

8有一個使者來kā伊講，In帶王hiah-ê kiáⁿ ê頭殼來。Iâ-hō͘講，將in疊做兩堆，hē tī城門口，到明á早起。Ū chi̍t ê sù-chiá lâi kā i kóng, In tòa ông hiah ê kiáⁿ ê thâu-khak lâi. Iâ-hō͘ kóng, Chiong in thia̍p chòe nn̄g-tui, hē tī siâⁿ-mn̂g-kháu, kàu bîn-á-chá-khí.

9隔早起，Iâ-hō͘出來，khiā-teh，kā眾百姓講，Lín lóng是公義；看ah，我背叛我ê主人，thâi死伊，總是thâi死chiah-ê眾人ê是是誰 ah？Keh chá-khí, Iâ-hō͘ chhut-lâi, khiā-teh, kā chèng peh-sìⁿ kóng, Lín lóng sī kong-gī; khòaⁿ ah, góa pōe-poān góa ê chú-lâng, thâi-sí i, chóng-sī thâi-sí chiah ê chèng-lâng--ê sī chī-chūi ah?

10Taⁿ thang知耶和華ê話，就是耶和華論A-hap ê家所講ê，無一句phah ka-la̍uh；因為耶和華託伊ê奴僕以利亞所講ê話，lóng有做成。Taⁿ thang chai Iâ-hô-hoa ê ōe, chiū-sī Iâ-hô-hoa lūn A-hap ê ke só͘ kóng ê, bô chi̍t kù phah ka-la̍uh; in-ūi Iâ-hô-hoa thok I ê lô͘-po̍k Í-lī-a só͘ kóng ê ōe, lóng ū chòe-chiâⁿ.

11屬A-hap ê家，tī Iâ-su-lia̍t所chhun ê人，kap伊ê 大臣、親密ê朋友、祭司，Iâ-hō͘一盡thâi in，無留一個。Sio̍k A-hap ê ke, tī Iâ-su-lia̍t só͘ chhun ê lâng, kap i ê tāi-sîn, chhin-bi̍t ê pêng-iú, chè-si, Iâ-hō͘ it-chīn thâi in, bô lâu chi̍t-ê.

12Iâ-hō͘起來，去到撒馬利亞。Iâ-hō͘ khí-lâi, khì kàu Sat-má-lī-a.

13Tī路裡到牧者剪羊毛ê厝，tú-tio̍h猶大王A-hap-siā ê兄弟，問in講，Lín是甚麼人？應講，阮是A-hap-siā ê兄弟；taⁿ落去beh請安王ê kiáⁿ kap王后ê kiáⁿ。Tī lō͘--nih kàu bo̍k-chiá chián iûⁿ-mn̂g ê chhù, tú-tio̍h Iû-tāi ông A-hap-siā ê hiaⁿ-tī, mn̄g in kóng, Lín sī sím-mi̍h lâng? Ìn kóng, Goán sī A-hap-siā ê hiaⁿ-tī; taⁿ lo̍h--khì beh chhéng-an ông ê kiáⁿ kap ông-hō͘ ê kiáⁿ.

14伊講，活活掠in。In就活活掠in，tī剪羊毛ê厝ê坑á邊thâi死in，共四十二人，無留一個。I kóng, Oa̍h-oa̍h lia̍h in. In chiū oa̍h-oa̍h lia̍h in, tī chián iûⁿ-mn̂g ê chhù ê khiⁿ-á piⁿ thâi-sí in, kiōng sì-cha̍p-jī lâng, bô lâu chi̍t-ê.

15Iâ-hō͘ tùi hia去，tú-tio̍h Lī-kah ê kiáⁿ，Iok-ná-ta̍t，來接伊；Iâ-hō͘請安伊，對伊講，你ê心正直ǹg我，親像我ê心ǹg你ê心á無？Iok-ná-ta̍t應講，是。Iâ-hō͘講，若是án-ni，伸你ê手hō͘我。伊就伸手hō͘伊。伊就牽伊上車。Iâ-hō͘ tùi hia khì, tú-tio̍h Lī-kah ê kiáⁿ, Iok-ná-ta̍t, lâi chih i; Iâ-hō͘ chhéng-an i, tùi i kóng, Lí ê sim chèng-ti̍t ǹg góa, chhin-chhiūⁿ góa ê sim ǹg lí ê sim á-bô? Iok-ná-ta̍t ìn kóng, Sī. Iâ-hō͘ kóng, Nā-sī án-ni, chhun lí ê chhiú hō͘ góa. I chiū chhun-chhiú hō͘ i. I chiū khan i chiūⁿ-chhia.

16Iâ-hō͘講，你kap我相kap去，看我為tio̍h耶和華ê熱心。就hō͘伊坐tī伊ê車。Iâ-hō͘ kóng, Lí kap góa saⁿ-kap khì, khòaⁿ góa ūi-tio̍h Iâ-hô-hoa ê jia̍t-sim. Chiū hō͘ i chē tī i ê chhia.

17到撒馬利亞就thâi死見若屬A-hap所chhun tī撒馬利亞ê，一盡滅伊，照耶和華對以利亞所講ê話。Kàu Sat-má-lī-a chiū thâi-sí kìⁿ-nā sio̍k A-hap só͘ chhun tī Sat-má-lī-a ê, it-chīn bia̍t i, chiàu Iâ-hô-hoa tùi Í-lī-a só͘ kóng ê ōe.

18Iâ-hō͘招集眾百姓，kā in講，A-hap服事Pa-le̍k iáu是小khóa，Iâ-hō͘ beh大大服事伊。Iâ-hō͘ chio-chi̍p chèng peh-sìⁿ, kā in kóng, A-hap ho̍k-sāi Pa-le̍k iáu sī sió-khóa, Iâ-hō͘ beh tōa-tōa ho̍k-sāi i.

19所以tio̍h召Pa-le̍k眾先知，kap一切服事Pa-le̍k ê，kap伊lóng總ê祭司，來我chia，m̄-thang kiám一人，因為我beh獻大ê祭祀hō͘ Pa-le̍k；見若無來ê，bōe得tio̍h活。Iâ-hō͘ án-ni行是用詭計，beh一盡thâi死拜Pa-le̍k ê人。Só͘-í tio̍h tiàu Pa-le̍k chèng sian-ti, kap it-chhè ho̍k-sāi Pa-le̍k ê, kap i lóng-chóng ê chè-si, lâi góa chia, m̄-thang kiám chi̍t-lâng, in-ūi góa beh hiàn tōa ê chè-sū hō͘ Pa-le̍k; kìⁿ-nā bô lâi ê, bōe tit-tio̍h oa̍h. Iâ-hō͘ án-ni kiâⁿ sī ēng khúi-kè, beh it-chīn thâi-sí pài Pa-le̍k ê lâng.

20Iâ-hō͘講，Tio̍h為Pa-le̍k宣布嚴肅會。In就宣布。Iâ-hō͘ kóng, Tio̍h ūi Pa-le̍k soan-pò͘ giâm-siok-hōe. In chiū soan-pò͘.

21Iâ-hō͘差人遍行以色列地；拜Pa-le̍k ê人lóng chiâu到，無一個無來。In就入Pa-le̍k ê廟；Pa-le̍k ê廟內，tùi chit-pêng到hit-pêng，人滿滿。Iâ-hō͘ chhe lâng piàn-kiâⁿ Í-sek-lia̍t tōe; pài Pa-le̍k ê lâng lóng chiâu kàu, bô chi̍t-ê bô lâi. In chiū ji̍p Pa-le̍k ê biō; Pa-le̍k ê biō-lāi, tùi chit-pêng kàu hit-pêng, lâng móa-móa.

22Iâ-hō͘吩咐掌禮服ê人講，The̍h禮服出來hō͘一切拜Pa-le̍k ê人穿。伊就the̍h禮服出來hō͘ in。Iâ-hō͘ hoan-hù chiáng lé-ho̍k ê lâng kóng, The̍h lé-ho̍k chhut-lâi hō͘ it-chhè pài Pa-le̍k ê lâng chhēng. I chiū the̍h lé-ho̍k chhut-lâi hō͘ in.

23Iâ-hō͘ kap Lī-kah ê kiáⁿ，Iok-ná-ta̍t，入Pa-le̍k ê廟；kā拜Pa-le̍k ê人講，Lín tio̍h查看，tī lín ê中間m̄-thang有服事耶和華ê人，kan-ta拜Pa-le̍k ê人nā-tiāⁿ。Iâ-hō͘ kap Lī-kah ê kiáⁿ, Iok-ná-ta̍t, ji̍p Pa-le̍k ê biō; kā pài Pa-le̍k ê lâng kóng, Lín tio̍h chhâ-khòaⁿ, tī lín ê tiong-kan m̄-thang ū ho̍k-sāi Iâ-hô-hoa ê lâng, kan-ta pài Pa-le̍k ê lâng nā-tiāⁿ.

24In入去beh獻祭祀燒祭。Iâ-hō͘事先安置八十人tī外面，講，我將chiah-ê人交tī lín ê手，若一人走去，放伊走ê人伊ê命tio̍h賠命。In ji̍p--khì beh hiàn chè-sū sio-chè. Iâ-hō͘ tāi-seng an-tì poeh-cha̍p lâng tī gōa-bīn, kóng, Góa chiong chiah ê lâng kau tī lín ê chhiú, nā chi̍t-lâng cháu--khì, pàng i cháu ê lâng i ê miā tio̍h pê miā.

25Iâ-hō͘獻燒祭明白就kā後衛兵kap hiah-ê軍長講，Lín入去thâi in，m̄-thang容允一人出來。In就用刀thâi in；後衛兵kap軍長hiat身屍出去；就去到Pa-le̍k廟ê城。Iâ-hō͘ hiàn sio-chè bêng-pe̍k chiū kā hō͘-ōe-peng kap hiah ê kun-tiúⁿ kóng, Lín ji̍p--khì thâi in, m̄-thang iông-ún chi̍t-lâng chhut-lâi. In chiū ēng to thâi in; hō͘-ōe-peng kap kun-tiúⁿ hiat sin-si chhut--khì; chiū khì kàu Pa-le̍k biō ê siâⁿ.

26In將Pa-le̍k廟內ê柱像the̍h出來燒。In chiong Pa-le̍k biō-lāi ê thiāu-siōng the̍h--chhut-lâi sio.

27In毀壞Pa-le̍k ê柱像，毀壞Pa-le̍k ê廟，用伊做廁池到今á日。In húi-hoāi Pa-le̍k ê thiāu-siōng, húi-hoāi Pa-le̍k ê biō, ēng i chòe chhè-tî kàu kin-á-ji̍t.

28Án-ni Iâ-hō͘ tī以色列中滅無Pa-le̍k。Án-ni Iâ-hō͘ tī Í-sek-lia̍t tiong bia̍t-bô Pa-le̍k.

29總是Iâ-hō͘無離開Nî-pat ê kiáⁿ Iâ-lô-phò-àm ê罪，就是伊所用hō͘以色列犯罪ê，就是拜Pek-te̍k-lī kap Tàn所有金ê牛á。Chóng-sī Iâ-hō͘ bô lī-khui Nî-pat ê kiáⁿ Iâ-lô-phò-àm ê chōe, chiū-sī i só͘ ēng hō͘ Í-sek-lia̍t hoān-chōe ê, chiū-sī pài Pek-te̍k-lī kap Tàn só͘ ū kim ê gû-á.

30耶和華kā Iâ-hō͘講，因為你行好成我所看做好ê，照我ê心意款待A-hap ê家，你ê kiáⁿ孫beh坐以色列ê國位歷過四代。Iâ-hô-hoa kā Iâ-hō͘ kóng, In-ūi lí kiâⁿ-hó chiâⁿ Góa só͘ khòaⁿ-chòe hó ê, chiàu Góa ê sim-ì khoán-thāi A-hap ê ke, lí ê kiáⁿ-sun beh chē Í-sek-lia̍t ê kok-ūi le̍k-kè sì-tāi.

31總是Iâ-hō͘無專心遵守來行耶和華以色列ê上帝ê律法，無離開Iâ-lô-phò-àm ê罪，就是所用來hō͘以色列人犯罪ê。Chóng-sī Iâ-hō͘ bô choan-sim chun-siú lâi kiâⁿ Iâ-hô-hoa Í-sek-lia̍t ê Siōng-tè ê lu̍t-hoat, bô lī-khui Iâ-lô-phò-àm ê chōe, chiū-sī só͘ ēng lâi hō͘ Í-sek-lia̍t lâng hoān-chōe ê.

32Hit-tia̍p耶和華起頭割以色列國，hō͘伊khah細；Hap-siat攻擊以色列ê四境；Hit-tia̍p Iâ-hô-hoa khí-thâu koah Í-sek-lia̍t kok, hō͘ i khah sòe; Hap-siat kong-kek Í-sek-lia̍t ê sì-kéng;

33tùi約旦河東勢，Ki-lia̍t ê全地，Ka-tek人，Liû-piān人，Má-ná-se人ê地，tùi近A-lùn山谷ê A-lô-jíⁿ，就是Ki-lia̍t kap Pa-san。tùi Iok-tàn hô tang--sì, Ki-lia̍t ê choân-tōe, Ka-tek lâng, Liû-piān lâng, Má-ná-se lâng ê tōe, tùi kūn A-lùn soaⁿ-kok ê A-lô-jíⁿ, chiū-sī Ki-lia̍t kap Pa-san.

34Iâ-hō͘其餘ê事，見伊所行ê，kap伊ê能力，kiám無lóng記tī以色列chiah-ê王ê記錄mah？Iâ-hō͘ kî-û ê sū, kìⁿ i só͘ kiâⁿ ê, kap i ê lêng-le̍k, kiám bô lóng kì tī Í-sek-lia̍t chiah ê ông ê kì-lio̍k mah?

35Iâ-hō͘ kap伊ê列祖同睏；in埋葬伊tī撒馬利亞。伊ê kiáⁿ Iok-hap-su續接伊做王。Iâ-hō͘ kap i ê lia̍t-chó͘ tâng-khùn; in bâi-chòng i tī Sat-má-lī-a. I ê kiáⁿ Iok-hap-su sòa-chiap i chòe ông.

36Iâ-hō͘ tī撒馬利亞做以色列王ê時歷過二十八年。Iâ-hō͘ tī Sat-má-lī-a chòe Í-sek-lia̍t ông ê sî le̍k-kè jī-cha̍p-poeh nî.