1大衛問講，掃羅ê家iáu有chhun人無，我thang因為約拿單ê緣故來施恩hō͘伊？Tāi-pi̍t mn̄g kóng, Sò-lô ê ke iáu ū chhun lâng bô, góa thang in-ūi Iok-ná-tan ê iân-kò͘ lâi si-un hō͘ i?

2掃羅ê家有一個奴僕，名叫Sé-pa，人叫伊去大衛hia；王就kā伊講，你是Sé-pa mah？Sò-lô ê ke ū chi̍t ê lô͘-po̍k, miâ kiò Sé-pa, lâng kiò i khì Tāi-pi̍t hia; ông chiū kā i kóng, Lí sī Sé-pa mah?

3應講，你ê奴僕就是伊。王講，掃羅ê家iáu有人無，我thang將上帝ê恩施hō͘伊？Ìn kóng, Lí ê lô͘-po̍k chiū-sī i. Ông kóng, Sò-lô ê ke iáu ū lâng bô, góa thang chiong Siōng-tè ê un si hō͘ i?

4Sé-pa對王講，約拿單iáu有一個kiáⁿ，是跛腳ê。王kā伊講，伊tī toh落？Sé-pa應王講，伊tī Lô-tí-pa A-bí-lī ê kiáⁿ Má-kiat ê家。Sé-pa tùi ông kóng, Iok-ná-tan iáu ū chi̍t ê kiáⁿ, sī pái-kha ê. Ông kā i kóng, I tī toh-lo̍h? Sé-pa ìn ông kóng, I tī Lô-tí-pa A-bí-lī ê kiáⁿ Má-kiat ê ke.

5大衛王就差人去，tùi Lô-tí-pa A-bí-lī ê kiáⁿ Má-kiat ê家帶伊來。Tāi-pi̍t ông chiū chhe lâng khì, tùi Lô-tí-pa A-bí-lī ê kiáⁿ Má-kiat ê ke tòa i lâi.

6掃羅ê孫，約拿單ê kiáⁿ，Bí-hui-pho-siat來見大衛，仆落去拜。大衛講，Bí-hui-pho-siat ah。伊應講，你ê奴僕tī-chia。Sò-lô ê sun, Iok-ná-tan ê kiáⁿ, Bí-hui-pho-siat lâi kìⁿ Tāi-pi̍t, phak--lo̍h-khì pài. Tāi-pi̍t kóng, Bí-hui-pho-siat ah. I ìn kóng, Lí ê lô͘-po̍k tī-chia.

7大衛講，你莫得驚，我beh 因為你ê父約拿單ê緣故施恩hō͘你；我beh將你ê公掃羅一切ê田園lóng還你；你也beh常常tī我ê桌相kap食。Tāi-pi̍t kóng, Lí bo̍h-tit kiaⁿ, góa beh in-ūi lí ê pē Iok-ná-tan ê iân-kò͘ si-un hō͘ lí; góa beh chiong lí ê kong Sò-lô it-chhè ê chhân-hn̂g lóng hêng lí; lí iā beh siông-siông tī góa ê toh saⁿ-kap chia̍h.

8伊koh仆teh拜伊，講，你ê奴僕是甚麼ah？是親像一隻死狗，你竟然看顧我ah。I koh phak--teh pài i, kóng, Lí ê lô͘-po̍k sī sím-mi̍h ah? sī chhin-chhiūⁿ chi̍t chiah sí-káu, lí kéng-jiân khòaⁿ-kò͘ góa ah.

9王叫掃羅ê奴僕Sé-pa來，kā伊講，我已經將屬掃羅kap伊全家-ê lóng hō͘你ê主人ê kiáⁿ。Ông kiò Sò-lô ê lô͘-po̍k Sé-pa lâi, kā i kóng, Góa í-keng chiong sio̍k Sò-lô kap i choân-ke--ê lóng hō͘ lí ê chú-lâng ê kiáⁿ.

10你kap你hiah-ê kiáⁿ，你hiah-ê奴僕，tio̍h kā伊種作田園，帶所出產ê hō͘你ê主ê kiáⁿ有物thang食；總是你ê主人ê kiáⁿ Bí-hui-pho-siat beh常常tī我ê桌相kap食。Lí kap lí hiah ê kiáⁿ, lí hiah ê lô͘-po̍k, tio̍h kā i chèng-choh chhân-hn̂g, tòa só͘ chhut-sán-ê hō͘ lí ê chú ê kiáⁿ ū mi̍h thang chia̍h; chóng-sī lí ê chú-lâng ê kiáⁿ Bí-hui-pho-siat beh siông-siông tī góa ê toh saⁿ-kap chia̍h.

11Sé-pa有十五ê kiáⁿ，二十個奴僕。Sé-pa對王講，見我ê主我ê王所吩咐奴僕ê，你ê奴僕lóng beh照án-ni行。王koh講，Bí-hui-pho-siat beh tī我ê桌相kap食，親像王ê kiáⁿ一樣。Sé-pa ū cha̍p-gō͘ ê kiáⁿ, jī-cha̍p ê lô͘-po̍k. Sé-pa tùi ông kóng, Kìⁿ góa ê chú góa ê ông só͘ hoan-hù lô͘-po̍k ê, lí ê lô͘-po̍k lóng beh chiàu án-ni kiâⁿ. Ông koh kóng, Bí-hui-pho-siat beh tī góa ê toh saⁿ-kap chia̍h, chhin-chhiūⁿ ông ê kiáⁿ chi̍t-iūⁿ.

12Bí-hui-pho-siat有一個kiáⁿ iáu細漢，名叫Bí-ka。見若tòa tī Sé-pa ê家ê人，lóng做Bí-hui-pho-siat ê奴僕。Bí-hui-pho-siat ū chi̍t ê kiáⁿ iáu sòe-hàn, miâ kiò Bí-ka. Kìⁿ-nā tòa tī Sé-pa ê ke ê lâng, lóng chòe Bí-hui-pho-siat ê lô͘-po̍k.

13Tùi án-ni，Bí-hui-pho-siat tiàm tī耶路撒冷；因為伊常常tī王ê桌相kap食；koh伊兩腳lóng跛(pái)。Tùi án-ni Bí-hui-pho-siat tiàm tī Iâ-lō͘-sat-léng; in-ūi i siông-siông tī ông ê toh saⁿ-kap chia̍h; koh i nn̄g-kha lóng pái.

1Chit-tia̍p以後，A-bûn人ê王死，伊ê kiáⁿ Hap-lùn續接伊做王。Chit-tia̍p í-āu, A-bûn lâng ê ông sí, i ê kiáⁿ Hap-lùn sòa-chiap i chòe ông.

2大衛講，我beh施恩hō͘ Ná-hat ê kiáⁿ Hap-lùn，親像伊ê老父施恩hō͘我一樣。大衛就差人臣，託重in安慰伊死老父。大衛ê人臣到A-bûn人ê境內。Tāi-pi̍t kóng, Góa beh si-un hō͘ Ná-hat ê kiáⁿ Hap-lùn, chhin-chhiūⁿ i ê lāu-pē si-un hō͘ góa chi̍t-iūⁿ. Tāi-pi̍t chiū chhe jîn-sîn, thok-tiōng in an-ùi i sí lāu-pē. Tāi-pi̍t ê jîn-sîn kàu A-bûn lâng ê kéng-lāi.

3總是A-bûn人ê首領差人kā in ê主Hap-lùn講，大衛差人來你chia慰問你，你phah算伊是尊敬你ê父mah？大衛差伊ê人臣，kiám m̄是beh偵探chit-ê城，詳細看來chhia倒伊mah？Chóng-sī A-bûn lâng ê siú-léng chhe lâng kā in ê chú Hap-lùn kóng, Tāi-pi̍t chhe lâng lâi lí chia ùi-būn lí, lí phah-sǹg i sī chun-kèng lí ê pē mah? Tāi-pi̍t chhe i ê jîn-sîn, kiám-m̄-sī beh cheng-thàm chit ê siâⁿ, siông-sè khòaⁿ lâi chhia-tó i mah?

4Hap-lùn就將大衛ê人臣ê嘴鬚剃一半，koh對中割斷伊ê衫，到大腿頂，差in tò去。Hap-lùn chiū chiong Tāi-pi̍t ê jîn-sîn ê chhùi-chhiu thì chi̍t-pòaⁿ, koh tùi-tiong koah-tn̄g i ê saⁿ, kàu tōa-thúi-téng, chhe in tò--khì.

5有人kā大衛講。伊就差人去迎接in，因為hiah-ê人見笑到極。王講，Thang tiàm tī耶利哥thèng候嘴鬚發長，chiah tò來。Ū lâng kā Tāi-pi̍t kóng. I chiū chhe lâng khì ngiâ-chih in, in-ūi hiah ê lâng kiàn-siàu kàu-ke̍k. Ông kóng, Thang tiàm tī Iâ-lī-ko thèng-hāu chhùi-chhiu hoat-tn̂g, chiah tò--lâi.

6A-bûn人知in hō͘大衛厭惡；A-bûn人就差人去倩Pek-Lī-ha̍p ê A-lân人，kap Só-pa ê A-lân人，步兵兩萬，kap Má-ka王ê人一千，Tô-pek人一萬兩千。A-bûn lâng chai in hō͘ Tāi-pi̍t iàm-ò͘ⁿ; A-bûn lâng chiū chhe lâng khì chhiàⁿ Pek-lī-ha̍p ê A-lân lâng, kap Só-pa ê A-lân lâng, pō͘-peng nn̄g-bān, kap Má-ka ông ê lâng chi̍t-chheng, Tô-pek lâng chi̍t-bān nn̄g-chheng.

7大衛聽見，就差約押chhōa勇士全軍。Tāi-pi̍t thiaⁿ-kìⁿ, chiū chhe Iok-ap chhōa ióng-sū choân-kun.

8A-bûn人出來排陣tī城門口；Só-pa kap Lī-ha̍p ê A-lân人、Tô-pek人，kap Má-ka人，另外排陣tī郊野。A-bûn lâng chhut-lâi pâi-tīn tī siâⁿ-mn̂g-kháu; Só-pa kap Lī-ha̍p ê A-lân lâng, Tô-pek lâng, kap Má-ka lâng, lēng-gōa pâi-tīn tī kau-iá.

9約押看見前後有對敵排陣，就tùi以色列精兵ê中間koh再揀伊來排陣，抵敵A-lân人；Iok-ap khòaⁿ-kìⁿ chêng-āu ū tùi-te̍k pâi-tīn, chiū tùi Í-sek-lia̍t cheng-peng ê tiong-kan koh-chài kéng i lâi pâi-tīn, tí-te̍k A-lân lâng;

10其餘ê百姓交伊ê小弟A-pí-su，hō͘伊排陣抵敵A-bûn人。kî-û ê peh-sìⁿ kau i ê sió-tī A-pí-su, hō͘ i pâi-tīn tí-te̍k A-bûn lâng.

11Koh講，Nā A-lân人khah強我，你就來幫贊我；若A-bûn人khah強你，我就去幫贊你。Koh kóng, Nā A-lân lâng khah-kiông góa, lí chiū lâi pang-chān góa; nā A-bûn lâng khah-kiông lí, góa chiū khì pang-chān lí.

12Tio̍h勇敢，咱tio̍h為咱ê百姓kap咱上帝ê城做大丈夫；願耶和華照伊所看做好ê來行。Tio̍h ióng-kám, lán tio̍h ūi lán ê peh-sìⁿ kap lán Siōng-tè ê siâⁿ chòe tāi-tiōng-hu; goān Iâ-hô-hoa chiàu I só͘ khòaⁿ-chòe hó-ê lâi kiâⁿ.

13Tùi án-ni，約押kap tè伊ê百姓進前kap A-lân人交戰；in就tī伊ê面前逃走。Tùi án-ni Iok-ap kap tè i ê peh-sìⁿ chìn-chêng kap A-lân lâng kau-chiàn; in chiū tī i ê bīn-chêng tô-cháu.

14A-bûn人看見A-lân人逃走，in也tī A-pí-su ê面前走入城。約押就tùi A-bûn人hia tò去，到耶路撒冷。A-bûn lâng khòaⁿ-kìⁿ A-lân lâng tô-cháu, in iā tī A-pí-su ê bīn-chêng cháu ji̍p siâⁿ. Iok-ap chiū tùi A-bûn lâng hia tò-khì, kàu Iâ-lō͘-sat-léng.

15A-lân人看見in thâi輸tī以色列人ê面前，就koh聚集。A-lân lâng khòaⁿ-kìⁿ in thâi-su tī Í-sek-lia̍t lâng ê bīn-chêng, chiū koh chū-chi̍p.

16Hap-tāi-tí-siā差人召河外ê A-lân人出來；in到Hi-lân；Hap-tāi-tí-siā ê軍長Sok-hoat chhōa in。Hap-tāi-tí-siā chhe lâng tiàu Hô-gōa ê A-lân lâng chhut-lâi; in kàu Hi-lân; Hap-tāi-tí-siā ê kun-tiúⁿ Sok-hoat chhōa in.

17有人報大衛知；伊就聚集以色列眾人，過約旦河來到Hi-lân；A-lân人排陣攻擊大衛，kap伊交戰。Ū lâng pò Tāi-pi̍t chai; i chiū chū-chi̍p Í-sek-lia̍t chèng-lâng, kè Iok-tàn hô lâi kàu Hi-lân; A-lân lâng pâi-tīn kong-kek Tāi-pi̍t, kap i kau-chiàn.

18A-lân人逃走tī以色列ê面前；大衛thâi死A-lân七百張戰車ê兵，馬兵四萬；koh phah in ê軍長Sok-hoat，hō͘伊死tī-hia。A-lân lâng tô-cháu tī Í-sek-lia̍t ê bīn-chêng; Tāi-pi̍t thâi-sí A-lân chhit-pah tiuⁿ chiàn-chhia ê peng, bé-peng sì-bān; koh phah in ê kun-tiúⁿ Sok-hoat, hō͘ i sí tī-hia.

19降服Hap-tāi-tí-siā hiah-ê王看見in thâi輸tī以色列ê面前，就kap以色列和好，來降服in。Tùi án-ni，A-lân人m̄敢koh幫贊A-bûn人。Hâng-ho̍k Hap-tāi-tí-siā hiah ê ông khòaⁿ-kìⁿ in thâi-su tī Í-sek-lia̍t ê bīn-chêng, chiū kap Í-sek-lia̍t hô-hó, lâi hâng-ho̍k in. Tùi án-ni A-lân lâng m̄-káⁿ koh pang-chān A-bûn lâng.

1年頭，列王出戰ê時，大衛差約押kap伊ê人臣，kap以色列ê眾人，出去；in就thâi贏A-bûn人，圍攻La̍h-pa。大衛猶原tiàm tī耶路撒冷。Nî-thâu, lia̍t-ông chhut-chiàn ê sî, Tāi-pi̍t chhe Iok-ap kap i ê jîn-sîn, kap Í-sek-lia̍t ê chèng-lâng, chhut-khì; in chiū thâi-iâⁿ A-bûn lâng, ûi-kong La̍h-pa. Tāi-pi̍t iû-goân tiàm tī Iâ-lō͘-sat-léng.

2有一日beh暗ê時，大衛tùi床裡起來，tī王宮ê厝頂行來行去；tùi厝頂看見一個婦人人teh洗浴；婦人人生做真súi。Ū chi̍t-ji̍t beh àm ê sî, Tāi-pi̍t tùi chhn̂g--nih khí-lâi, tī ông-kiong ê chhù-téng kiâⁿ-lâi kiâⁿ-khì; tùi chhù-téng khòaⁿ-kìⁿ chi̍t ê hū-jîn-lâng teh sóe-e̍k; hū-jîn-lâng siⁿ-chòe chin-súi.

3大衛為tio̍h hit-ê婦人人就差人去探聽；有人講，伊kiám m̄是Í-liân ê cha-bó͘-kiáⁿ，Hek人烏利亞ê bó͘，Poa̍t-sī-pa mah？Tāi-pi̍t ūi-tio̍h hit ê hū-jîn-lâng chiū chhe lâng khì thàm-thiaⁿ; ū lâng kóng, I kiám-m̄-sī Í-liân ê cha-bó͘-kiáⁿ, Hek-lâng O͘-lī-à ê bó͘, Poa̍t-sī-pa mah?

4大衛差使者去chhōa伊來，伊就來到伊hia，大衛kap伊同房；(婦人人清氣伊ê無清氣)；就tò去in厝。Tāi-pi̍t chhe sù-chiá khì chhōa i lâi, i chiū lâi kàu i hia, Tāi-pi̍t kap i tâng-pâng; (hū-jîn-lâng chheng-khì i ê bô chheng-khì;) chiū tò-khì in chhù.

5婦人人懷孕，差人kā大衛講，我已經懷孕。Hū-jîn-lâng hoâi-īn, chhe lâng kā Tāi-pi̍t kóng, Góa í-keng hoâi-īn.

6大衛差人到約押hia，講，你差 Hek人烏利亞來我chia。約押就差烏利亞去見大衛。Tāi-pi̍t chhe lâng kàu Iok-ap hia, kóng, Lí chhe Hek-lâng O͘-lī-à lâi góa chia. Iok-ap chiū chhe O͘-lī-à khì kìⁿ Tāi-pi̍t.

7烏利亞已經來伊hia，大衛問看約押好mah？百姓好mah？交戰好勢mah？O͘-lī-à í-keng lâi i hia, Tāi-pi̍t mn̄g-khòaⁿ Iok-ap hó mah? peh-sìⁿ hó mah? kau-chiàn hó-sè mah?

8大衛kā烏利亞講，你落去lín tau洗腳。烏利亞出王宮了後，王就送一份食物hō͘伊。Tāi-pi̍t kā O͘-lī-à kóng, Lí lo̍h--khì lín tau sóe-kha. O͘-lī-à chhut ông-kiong liáu-āu, ông chiū sàng chi̍t-hūn chia̍h-mi̍h hō͘ i.

9總是烏利亞kap伊主人ê奴僕相kap睏tī王宮ê門口，無落去in tau。Chóng-sī O͘-lī-à kap i chú-lâng ê lô͘-po̍k saⁿ-kap khùn tī ông-kiong ê mn̂g-kháu, bô lo̍h-khì in tau.

10有人kā大衛講，烏利亞無落去伊ê厝。大衛就問烏利亞講，你kiám m̄是tùi遠路來mah？啥事m̄落去你ê家ah？Ū lâng kā Tāi-pi̍t kóng, O͘-lī-à bô lo̍h-khì i ê chhù. Tāi-pi̍t chiū mn̄g O͘-lī-à kóng, Lí kiám-m̄-sī tùi hn̄g-lō͘ lâi mah? siáⁿ-sū m̄ lo̍h-khì lí ê ke ah?

11烏利亞對大衛講，約櫃kap以色列kap猶大lóng tiàm tī草寮á；我ê主約押，kap我ê主ê奴僕，lóng紮營tī田野；我kiám thang tò去我ê家lim食，kap我ê bó͘相kap睏mah？我chí你ê活，kap你靈魂ê活來chiù-chōa，我決斷無beh行一個事。O͘-lī-à tùi Tāi-pi̍t kóng, Iok-kūi kap Í-sek-lia̍t kap Iû-tāi lóng tiàm tī chháu-liâu-á; góa ê chú Iok-ap, kap góa ê chú ê lô͘-po̍k, lóng chat-iâⁿ tī chhân-iá; góa kiám thang tò--khì góa ê ke lim-chia̍h, kap góa ê bó͘ saⁿ-kap khùn mah? góa chí lí ê oa̍h, kap lí lêng-hûn ê oa̍h lâi chiù-chōa, góa koat-toàn bô beh kiâⁿ chi̍t ê sū.

12大衛kā烏利亞講，你今á日猶原tòa chia，明á載我hō͘你去。烏利亞就tī hit日kap 第二日tòa tī耶路撒冷。Tāi-pi̍t kā O͘-lī-à kóng, Lí kin-á-ji̍t iû-goân tòa chia, bîn-á-chài góa hō͘ lí khì. O͘-lī-à chiū tī hit-ji̍t kap tē-jī ji̍t tòa tī Iâ-lō͘-sat-léng.

13大衛叫烏利亞來，伊就tī伊ê面前lim食；伊hō͘伊醉；已經暗，烏利亞出去伊ê床裡睏，kap伊ê主chiah-ê奴僕相kap做伴；也無落去in tau。Tāi-pi̍t kiò O͘-lī-à lâi, i chiū tī i ê bīn-chêng lim-chia̍h; i hō͘ i chùi; í-keng àm, O͘-lī-à chhut-khì i ê chhn̂g--nih khùn, kap i ê chú chiah ê lô͘-po̍k saⁿ-kap chòe-phōaⁿ; iā bô lo̍h-khì in tau.

14隔早起，大衛寫一張phoe hō͘約押，託烏利亞ê手帶去。Keh chá-khí Tāi-pi̍t siá chi̍t tiuⁿ phoe hō͘ Iok-ap, thok O͘-lī-à ê chhiú tòa--khì.

15Phoe內寫講，Tio̍h派烏利亞tī陣前極危急ê所在，lín就對伊ê後面退來，hō͘伊受phah死。Phoe-lāi siá kóng, Tio̍h phài O͘-lī-à tī tīn-chêng ke̍k gûi-kip ê só͘-chāi, lín chiū tùi i ê āu-bīn thè--lâi, hō͘ i siū phah-sí.

16約押圍城ê時，tī i所知有勇士ê所在，就派烏利亞tī-hia。Iok-ap ûi-siâⁿ ê sî, tī i só͘ chai ū ióng-sū ê só͘-chāi, chiū phài O͘-lī-à tī-hia.

17城內ê人有出來kap約押交戰；大衛ê奴僕死kúi-nā人，Hek人烏利亞也死。Siâⁿ-lāi ê lâng ū chhut-lâi kap Iok-ap kau-chiàn; Tai-pi̍t ê lô͘-po̍k sí kúi-nā lâng, Hek-lâng O͘-lī-à iā sí.

18約押差人用交戰ê事lóng kā大衛講；Iok-ap chhe lâng ēng kau-chiàn ê sū lóng kā Tāi-pi̍t kóng;

19就吩咐使者講，你用交戰一切ê事kā王講明白，chiū hoan-hù sù-chiá kóng, Lí ēng kau-chiàn it-chhè ê sū kā ông kóng bêng-pe̍k,

20王若受氣，kā lín講，Lín交戰ê時，啥事逼近城牆？kiám m̄知in會tùi城頂射箭mah？ông nā siū-khì, kā lín kóng, Lín kau-chiàn ê sî, siáⁿ-sū pek-kūn siâⁿ-chhiûⁿ? kiám m̄-chai in ōe tùi siâⁿ-téng siā-chìⁿ mah?

21前phah死Iâ-lō͘-pí-siat ê kiáⁿ A-pí-bí-le̍k-ê是是誰？kiám m̄是一個婦人人，tùi牆頂hiat石磨ê頂tún tī伊ê頂面，hō͘伊死tī Thê-pī-su mah？lín啥事逼近城ah？你tio̍h講，你ê奴僕Hek人烏利亞也死。Chêng phah-sí Iâ-lō͘-pí-siat ê kiáⁿ A-pí-bí-le̍k-ê sī chī-chūi? kiám-m̄-sī chi̍t ê hū-jîn-lâng, tùi chhiûⁿ-téng hiat chio̍h-bō ê téng-tún tī i ê téng-bīn, hō͘ i sí tī Thê-pī-su mah? lín siáⁿ-sū pek-kūn siâⁿ ah? lí tio̍h kóng, Lí ê lô͘-po̍k Hek-lâng O͘-lī-à iā sí.

22使者去，照約押一切所命令ê來kā大衛講。Sù-chiá khì, chiàu Iok-ap it-chhè só͘ bēng-lēng-ê lâi kā Tāi-pi̍t kóng.

23使者kā大衛講，對敵比阮khah強，出來郊野攻擊阮，阮phah伊到城門口。Sù-chiá kā Tāi-pi̍t kóng, Tùi-te̍k pí goán khah-kiông, chhut-lâi kau-iá kong-kek goán, goán phah i kàu siâⁿ-mn̂g-kháu.

24射箭ê人tùi牆頂射你ê奴僕；王ê奴僕死kúi-nā人，你ê奴僕Hek人烏利亞也死。Siā-chìⁿ ê lâng tùi chhiûⁿ-téng siā lí ê lô͘-po̍k; ông ê lô͘-po̍k sí kúi-nā lâng, lí ê lô͘-po̍k Hek-lâng O͘-lī-à iā sí.

25大衛kā hit-ê使者講，你tio̍h án-ni kā約押講，m̄免掛慮chit-ê事，因為刀劍thâi死人，chit-ê hit-ê無一定；你tio̍h koh-khah盡力攻城，來chhia倒伊；tio̍h án-ni勉勵伊。Tāi-pi̍t kā hit ê sù-chiá kóng, Lí tio̍h án-ni kā Iok-ap kóng, M̄-bián khòa-lū chit ê sū, in-ūi to-kiàm thâi-sí lâng, chit-ê hit-ê bô it-tēng; lí tio̍h koh-khah chīn-la̍t kong-siâⁿ, lâi chhia-tó i; tio̍h án-ni bián-lē i.

26烏利亞ê bó͘聽見丈夫烏利亞已經死，就為伊ê丈夫啼哭。O͘-lī-à ê bó͘ thiaⁿ-kìⁿ tiōng-hu O͘-lī-à í-keng sí, chiū ūi i ê tiōng-hu thî-khàu.

27Teng-iu已經明白，大衛差人chhōa伊到宮內；伊就做伊ê bó͘，kā伊生一個kiáⁿ。總是大衛所行ê事，耶和華真無歡喜。Teng-iu í-keng bêng-pe̍k, Tāi-pi̍t chhe lâng chhōa i kàu kiong-lāi; i chiū chòe i ê bó͘, kā i siⁿ chi̍t ê kiáⁿ. Chóng-sī Tāi-pi̍t só͘ kiâⁿ ê sū, Iâ-hô-hoa chin bô hoaⁿ-hí.