1Chit-ê以後，大衛ê kiáⁿ Ap-sa-li王有一個真súi ê小妹，名叫Tha-má；大衛ê kiáⁿ Àm-lùn疼伊。Chit-ê í-āu Tāi-pi̍t ê kiáⁿ Ap-sa-liông ū chi̍t-ê chin-súi ê sió-bē, miâ kiò Tha-má; Tāi-pi̍t ê kiáⁿ Àm-lùn thiàⁿ i.

2Àm-lùn為tio̍h伊ê小妹Tha-má鬱卒到破病；因為伊是在室女，Àm-lùn家己知oh得對伊做甚麼tāi-chì。Àm-lùn ūi-tio̍h i ê sió-bē Tha-má ut-chut kàu phòa-pīⁿ; in-ūi i sī chāi-sek-lú, Àm-lùn ka-kī chai oh-tit tùi i chòe sím-mi̍h tāi-chì.

3Àm-lùn有一個朋友，名叫Iok-ná-ta̍t，是大衛ê兄Sī-bí-a ê kiáⁿ。Iok-ná-ta̍t是真靈竅ê人。Àm-lùn ū chi̍t ê pêng-iú, miâ kiò Iok-ná-ta̍t, sī Tāi-pi̍t ê hiaⁿ Sī-bí-a ê kiáⁿ. Iok-ná-ta̍t sī chin lêng-khiàu ê lâng.

4伊對Àm-lùn講，王ê kiáⁿ ah，你啥事一日一日khah消瘦ah？啥事m̄ kā我講？ Àm-lùn kā伊講，我疼我ê小弟押沙龍ê小妹Tha-má。I tùi Àm-lùn kóng, Ông ê kiáⁿ ah, lí siáⁿ-sū chi̍t-ji̍t chi̍t-ji̍t khah siau-sán ah? siáⁿ-sū m̄ kā góa kóng? Àm-lùn kā i kóng, Góa thiàⁿ góa ê sió-tī Ap-sa-liông ê sió-bē Tha-má.

5Iok-ná-ta̍t kā伊講，你tio̍h倒tī眠床裡，假做破病；你ê老父來看你，就對伊講，求你准我ê小妹Tha-má來我chia，用食物hō͘我，備辦tī我ê面前，hō͘我看見，對伊ê手接來食。Iok-ná-ta̍t kā i kóng, Lí tio̍h tó tī bîn-chhn̂g--nih, ké-chòe phòa-pīⁿ; lí ê lāu-pē lâi khòaⁿ lí, chiū tùi i kóng, Kiû lí chún góa ê sió-bē Tha-má lâi góa chia, ēng chia̍h-mi̍h hō͘ góa, pī-pān tī góa ê bīn-chêng, hō͘ góa khòaⁿ-kìⁿ, tùi i ê chhiú chih lâi chia̍h.

6Àm-lùn就倒teh假破病；王來bāi伊。 Àm-lùn就對王講，求你hō͘我ê小妹Tha-má來，tī我ê面前kā我做兩塊餅，我thang對伊ê手接來食伊。Àm-lùn chiū tó-teh ké phòa-pīⁿ; ông lâi bāi i. Àm-lùn chiū tùi ông kóng, Kiû lí hō͘ góa ê sió-bē Tha-má lâi, tī góa ê bīn-chêng kā góa chòe nn̄g tè piáⁿ, góa thang tùi i ê chhiú chih lâi chia̍h i.

7大衛就差人到Tha-má ê厝，kā伊講，Taⁿ你去你ê兄 Àm-lùn ê厝，kā伊備辦食物。Tāi-pi̍t chiū chhe lâng kàu Tha-má ê chhù, kā i kóng, Taⁿ lí khì lí ê hiaⁿ Àm-lùn ê chhù, kā i pī-pān chia̍h-mi̍h.

8Tha-má就到伊ê兄 Àm-lùn ê厝；Àm-lùn倒teh。Tha-má the̍h麵粉，tī伊ê面前chhiau做餅，koh pek hiah-ê餅；Tha-má chiū kàu i ê hiaⁿ Àm-lùn ê chhù; Àm-lùn tó-teh. Tha-má the̍h mī-hún, tī i ê bīn-chêng chhiau chòe piáⁿ, koh pek hiah ê piáⁿ;

9就將煎盤piàⁿ tī伊ê面前。 Àm-lùn m̄食，就講，眾人tio̍h離開我出去；眾人就離開伊出去。chiū chiong chian-pôaⁿ piàⁿ tī i ê bīn-chêng. Àm-lùn m̄-chia̍h, chiū kóng, Chèng-lâng tio̍h lī-khui góa chhut-khì; chèng-lâng chiū lī-khui i chhut-khì.

10Àm-lùn kā Tha-má講你捧食物入睏房，我thang對你ê手接來食。Tha-má就捧所做ê餅入睏房到伊ê兄 Àm-lùn hia。Àm-lùn kā Tha-má kóng Lí phâng chia̍h-mi̍h ji̍p khùn-pâng, góa thang tùi lí ê chhiú chih lâi chia̍h. Tha-má chiū phâng só͘ chòe ê piáⁿ ji̍p khùn-pâng kàu i ê hiaⁿ Àm-lùn hia.

11伊捧去hō͘伊食，伊就khiú伊，kā伊講，我ê小妹ah，你來kap我相kap睏。I phâng khì hō͘ i chia̍h, i chiū khiú i, kā i kóng, Góa ê sió-bē ah, lí lâi kap góa saⁿ-kap khùn.

12伊kā伊講，我ê兄，m̄-thang，莫得凌辱我，因為tī以色列中m̄應該án-ni行；你莫得做chit-ê戇事；I kā i kóng, Góa ê hiaⁿ, m̄-thang, bo̍h-tit lêng-jio̍k góa, in-ūi tī Í-sek-lia̍t tiong m̄-eng-kai án-ni kiâⁿ; lí bo̍h-tit chòe chit ê gōng-sū;

13也我，我beh怎樣洗我ê見笑？也你，你tī以色列做戇人ê一個；taⁿ請你對王講，伊無beh禁止我嫁hō͘你。iā góa, góa beh cháiⁿ-iūⁿ sóe góa ê kiàn-siàu? iā lí, lí tī Í-sek-lia̍t chòe gōng-lâng ê chi̍t-ê; taⁿ chhiáⁿ lí tùi ông kóng, i bô beh kìm-chí góa kè hō͘ lí.

14總是Àm-lùn m̄肯聽伊ê話；因為伊比伊khah有力，就凌辱伊，kap伊相kap睏。Chóng-sī Àm-lùn m̄-khéng thiaⁿ i ê ōe; in-ūi i pí i khah ū la̍t, chiū lêng-jio̍k i, kap i saⁿ-kap khùn.

15以後Àm-lùn極其怨恨伊；hit-ê怨恨伊ê怨恨，比前疼伊ê疼koh khah大。 Àm-lùn就kā伊講，起來，去ah。Í-āu Àm-lùn ke̍k-kî oàn-hūn i; hit ê oàn-hūn i ê oàn-hūn, pí chêng thiàⁿ i ê thiàⁿ koh khah-tōa. Àm-lùn chiū kā i kóng, Khí-lâi, khì ah.

16伊kā伊講，M̄-thang án-ni，你趕我出去ê害tio̍h我，比你前款待我ê khah-thiám。總是Àm-lùn m̄肯聽伊；I kā i kóng, M̄-thang án-ni, lí kóaⁿ góa chhut-khì ê hāi-tio̍h góa, pí lí chêng khoán-thāi góa-ê khah-thiám. Chóng-sī Àm-lùn m̄-khéng thiaⁿ i;

17就叫hit-ê伺候伊ê奴僕講，Tio̍h趕chit-ê cha-bó͘-gín-ná tùi我chia出去；伊出去，門就tio̍h chhòaⁿ。chiū kiò hit ê su-hāu i ê lô͘-po̍k kóng, Tio̍h kóaⁿ chit ê cha-bó͘-gín-ná tùi góa chia chhut-khì; i chhut-khì, mn̂g chiū tio̍h chhòaⁿ.

18Hit時Tha-má穿彩色ê衫，因為王ê cha-bó͘-kiáⁿ，iáu未出嫁ê，lóng穿chit號衫；Àm-lùn ê奴僕就牽伊出去；出去了，門就chhòaⁿ-teh。Hit-sî Tha-má chhēng chhái-sek ê saⁿ, in-ūi ông ê cha-bó͘-kiáⁿ, iáu-bē chhut-kè ê, lóng chhēng chit hō saⁿ; Àm-lùn ê lô͘-po̍k chiū khan i chhut-khì; chhut-khì liáu, mn̂g chiū chhòaⁿ--teh.

19Tha-má sám火灰tī頭殼，拆裂所穿彩色ê衫，用手抱頭殼來行；ná行ná哮。Tha-má sám hé-hu tī thâu-khak, thiah-li̍h só͘ chhēng chhái-sek ê saⁿ, ēng chhiú phō thâu-khak lâi kiâⁿ; ná-kiâⁿ ná-háu.

20伊ê兄押沙龍問伊講，你ê兄 Àm-lùn bat kap你做堆mah？我ê小妹ah，taⁿ無做聲，伊是你ê兄，莫得掛意chit-ê事。Tha-má就單身tiàm tī伊ê兄押沙龍ê厝。I ê hiaⁿ Ap-sa-liông mn̄g i kóng, Lí ê hiaⁿ Àm-lùn bat kap lí chòe-tui mah? Góa ê sió-bē ah, taⁿ bô chòe siaⁿ, i sī lí ê hiaⁿ, bo̍h-tit khòa-ì chit ê sū. Tha-má chiū toaⁿ-sin tiàm tī i ê hiaⁿ Ap-sa-liông ê chhù.

21大衛王聽見chiah-ê事，就不止受氣。Tāi-pi̍t ông thiaⁿ-kìⁿ chiah ê sū, chiū put-chí siū-khì.

22押沙龍無kap Àm-lùn講好講pháiⁿ；因為押沙龍怨恨Àm-lùn，是伊有凌辱伊ê小妹Tha-má。Ap-sa-liông bô kap Àm-lùn kóng-hó kóng-pháiⁿ; in-ūi Ap-sa-liông oàn-hūn Àm-lùn, sī i ū lêng-jio̍k i ê sió-bē Tha-má.

23過兩年，押沙龍tī近Í-hoat-liân ê Pa-le̍k-hā-só，有人kā伊剪羊毛；押沙龍請王ê眾kiáⁿ lóng總去。Kè nn̄g-nî, Ap-sa-liông tī kūn Í-hoat-liân ê Pa-le̍k-hā-só, ū lâng kā i chián iûⁿ-mn̂g; Ap-sa-liông chhiáⁿ ông ê chèng-kiáⁿ lóng-chóng khì.

24押沙龍來見王，講，Taⁿ你ê奴僕有用人teh剪羊毛，請王，kap王ê人臣，kap奴僕，相kap去。Ap-sa-liông lâi kìⁿ ông, kóng, Taⁿ lí ê lô͘-po̍k ū ēng lâng teh chián iûⁿ-mn̂g, chhiáⁿ ông, kap ông ê jîn-sîn, kap lô͘-po̍k, saⁿ-kap khì.

25王kā押沙龍講，我ê kiáⁿ ah，m̄-thang，阮m̄-thang lóng去，驚了你開費siuⁿ傷重。押沙龍逼伊，總是伊m̄去；kan-ta kā伊祝福。Ông kā Ap-sa-liông kóng, Góa ê kiáⁿ ah, m̄-thang, goán m̄-thang lóng khì, kiaⁿ-liáu lí khai-hùi siuⁿ siong-tiōng. Ap-sa-liông pek i, chóng-sī i m̄-khì; kan-ta kā i chiok-hok.

26押沙龍講，若無，就hō͘我ê兄 Àm-lùn kap阮去。王講，啥事tio̍h伊kap你去ah？Ap-sa-liông kóng, Nā bô, chiū hō͘ góa ê hiaⁿ Àm-lùn kap goán khì. Ông kóng, Siáⁿ-sū tio̍h i kap lí khì ah?

27押沙龍逼伊。王就允准Àm-lùn kap王ê眾kiáⁿ相kap去。Ap-sa-liông pek i. Ông chiū ún-chún Àm-lùn kap ông ê chèng-kiáⁿ saⁿ-kap khì.

28押沙龍吩咐伊ê奴僕講，Lín tio̍h注意，看Àm-lùn lim酒tek-kái ê時，我kā lín講，Phah Àm-lùn，lín就tio̍h thâi死伊，莫得驚；這kiám m̄是我吩咐lín-ê mah？Lín做lín好膽勇敢。Ap-sa-liông hoan-hù i ê lô͘-po̍k kóng, Lín tio̍h chù-ì, khòaⁿ Àm-lùn lim-chiú tek-kái ê sî, góa kā lín kóng, Phah Àm-lùn, lín chiū tio̍h thâi-sí i, bo̍h-tit kiaⁿ; che kiám-m̄-sī góa hoan-hù lín--ê mah? Lín chòe lín hó-táⁿ ióng-kám.

29押沙龍ê奴僕就照押沙龍所吩咐ê，來行tī Àm-lùn；王ê眾kiáⁿ lóng peh起來，ta̍k人騎伊ê騾逃走。Ap-sa-liông ê lô͘-po̍k chiū chiàu Ap-sa-liông só͘ hoan-hù ê, lâi kiâⁿ tī Àm-lùn; ông ê chèng-kiáⁿ lóng peh--khí-lâi, ta̍k-lâng khiâ i ê lô tô-cháu.

30In iáu tī路裡有風聲傳到大衛，講，押沙龍有thâi死王ê眾kiáⁿ，無留一個。In iáu tī lō͘--nih ū hong-siaⁿ thoân kàu Tāi-pi̍t, kóng, Ap-sa-liông ū thâi-sí ông ê chèng-kiáⁿ, bô lâu chi̍t-ê.

31王就起來拆裂衫，倒tī地裡；王ê人臣也拆裂衫，khiā tī伊ê身邊。Ông chiū khí--lâi thiah-li̍h saⁿ, tó tī tōe--nih; ông ê jîn-sîn iā thiah-li̍h saⁿ, khiā tī i ê sin-piⁿ.

32大衛ê兄Sī-bí-a ê kiáⁿ，Iok-ná-ta̍t應講，我ê主，莫得phah算王ê眾kiáⁿ，hiah-ê少年人lóng hō͘伊thâi死；只有Àm-lùn死nā-tiāⁿ；因為tùi Àm-lùn凌辱伊ê小妹Tha-má hit日，押沙龍就已經有chit-ê意思。Tāi-pi̍t ê hiaⁿ Sī-bí-a ê kiáⁿ, Iok-ná-ta̍t ìn kóng, Góa ê chú, bo̍h-tit phah-sǹg ông ê chèng-kiáⁿ, hiah ê siàu-liân lâng lóng hō͘ i thâi-sí; chí-ū Àm-lùn sí nā-tiāⁿ; in-ūi tùi Àm-lùn lêng-jio̍k i ê sió-bē Tha-má hit-ji̍t, Ap-sa-liông chiū í-keng ū chit ê ì-sù.

33Taⁿ我ê主我ê王，莫得掛意chit-ê事，phah算王ê眾kiáⁿ lóng死；其實只有Àm-lùn死nā-tiāⁿ。Taⁿ góa ê chú góa ê ông, bo̍h-tit khòa-ì chit ê sū, phah-sǹg ông ê chèng-kiáⁿ lóng sí; kî-si̍t chí-ū Àm-lùn sí nā-tiāⁿ.

34押沙龍就逃走。守望ê少年人kia̍h目看，看見chōe-chōe百姓tùi伊ê後面，tùi山邊ê路來。Ap-sa-liông chiū tô-cháu. Siú-bāng ê siàu-liân lâng kia̍h-ba̍k khòaⁿ, khòaⁿ-kìⁿ chōe-chōe peh-sìⁿ tùi i ê āu-bīn, tùi soaⁿ-piⁿ ê lō͘ lâi.

35Iok-ná-ta̍t kā王講，看ah，王ê眾kiáⁿ lóng來lah，果然照你ê奴僕所講ê。Iok-ná-ta̍t kā ông kóng, Khòaⁿ ah, ông ê chèng-kiáⁿ lóng lâi lah, kó-jiân chiàu lí ê lô͘-po̍k só͘ kóng ê.

36話tú-á講soah，王hiah-ê kiáⁿ就到，開聲啼哭；王kap人臣也lóng大啼哭到極。Ōe tú-á kóng-soah, ông hiah ê kiáⁿ chiū kàu, khui-siaⁿ thî-khàu; ông kap jîn-sîn iā lóng tōa thî-khàu kàu-ke̍k.

37押沙龍走到Ki-su̍t王A-bí-hut ê kiáⁿ Ta̍t-mái hia；大衛日日為tio̍h伊ê kiáⁿ悲哀。Ap-sa-liông cháu kàu Ki-su̍t ông A-bí-hut ê kiáⁿ Ta̍t-mái hia; Tāi-pi̍t ji̍t-ji̍t ūi-tio̍h i ê kiáⁿ pi-ai.

38押沙龍走到Ki-su̍t，tiàm hia三年。Ap-sa-liông cháu kàu Ki-su̍t, tiàm hia saⁿ-nî.

39大衛王ê心切切siàu念押沙龍；因為Àm-lùn已經死，就受安慰。Tāi-pi̍t ông ê sim chhiat-chhiat siàu-liām Ap-sa-liông; in-ūi Àm-lùn í-keng sí, chiū siū an-ùi.

1Sé-ló͘-ngá ê kiáⁿ約押知王ê心意向押沙龍；Sé-ló͘-ngá ê kiáⁿ Iok-ap chai ông ê sim ì-hiòng Ap-sa-liông;

2就差人去Thê-ko-a，tùi hia叫一個聰明ê婦人人來，kā伊講，請你假做khiā孝(hà)ê，穿孝衫，莫得用油抹身軀，tio̍h裝做為tio̍h死人久久悲哀ê婦人人；chiū chhe lâng khì Thê-ko-a, tùi hia kiò chi̍t ê chhang-miâ ê hū-jîn-lâng lâi, kā i kóng, Chhiáⁿ lí ké-chòe khiā-hà-ê, chhēng hà-saⁿ, bo̍h-tit ēng iû boah seng-khu, tio̍h chng-chòe ūi-tio̍h sí-lâng kú-kú pi-ai ê hū-jîn-lâng;

3入去見王，照chit-ê款對伊án-ni講。約押就將所tio̍h講ê話kà婦人人講。ji̍p-khì kìⁿ ông, chiàu chit ê khoán tùi i án-ni kóng. Iok-ap chiū chiong só͘ tio̍h kóng ê ōe kà hū-jîn-lâng kóng.

4Thê-ko-a ê婦人人對王講ê時，面仆tī地裡，拜講，王ah，救我。Thê-ko-a ê hū-jîn-lâng tùi ông kóng ê sî, bīn phak tī tōe--nih, pài kóng, Ông ah, kiù góa.

5王問伊講，你有甚麼tāi-chì ah？伊應講，我實在是寡婦，我ê丈夫已經死。Ông mn̄g i kóng, Lí ū sím-mi̍h tāi-chì ah? I ìn kóng, Góa si̍t-chāi sī kóaⁿ-hū, góa ê tiōng-hu í-keng sí.

6女婢有兩個kiáⁿ，in兩個tī田裡相phah，無人tī in中間排解；chit-ê phah hit-ê hō͘伊死。Lú-pī ū nn̄g ê kiáⁿ, in nn̄g-ê tī chhân--nih saⁿ-phah, bô lâng tī in tiong-kan pâi-kái; chit-ê phah hit-ê hō͘ i sí.

7Taⁿ全家ê人lóng起來攻擊你ê女婢，講，你tio̍h將hit-ê phah死兄弟ê交出來，阮thang hō͘伊死，賠伊phah死兄弟ê性命，絕伊ê後嗣；án-ni in beh將我chhun ê火炭phah-hoa，無hō͘我ê丈夫留名留後裔tī世間。Taⁿ choân-ke ê lâng lóng khí-lâi kong-kek lí ê lú-pī, kóng, Lí tio̍h chiong hit ê phah-sí hiaⁿ-tī-ê kau--chhut-lâi, goán thang hō͘ i sí, pê i phah-sí hiaⁿ-tī ê sìⁿ-miā, choa̍t i ê hō͘-sû; án-ni in beh chiong góa chhun ê hé-thòaⁿ phah-hoa, bô hō͘ góa ê tiōng-hu lâu-miâ lâu hō͘-è tī sè-kan.

8王kā婦人人講，你thang tò去lín tau，我beh為tio̍h你出命令。Ông kā hū-jîn-lâng kóng, Lí thang tò-khì lín tau, góa beh ūi-tio̍h lí chhut bēng-lēng.

9Thê-ko-a ê婦人人koh kā王講，我ê主我ê王，願chit-ê罪歸tī我，kap我ê父ê家；王kap伊ê位lóng無罪。Thê-ko-a ê hū-jîn-lâng koh kā ông kóng, Góa ê chú góa ê ông, goān chit ê chōe kui tī góa, kap góa ê pē ê ke; ông kap i ê ūi lóng bô chōe.

10王講，見若有kap你加講話ê，你就chhōa伊到我chia，伊就無koh來kāng你。Ông kóng, Kìⁿ-nā ū kap lí ke-kóng ōe ê, lí chiū chhōa i kàu góa chia, i chiū bô koh lâi kāng lí.

11婦人人講，願王記念耶和華你ê上帝，m̄-thang准報人命ê行滅絕，驚了in滅絕我ê kiáⁿ。王講，我kí永活ê耶和華來chiù-chōa，你ê kiáⁿ，連一支頭毛也bōe ka-la̍uh tī地裡。Hū-jîn-lâng kóng, Goān ông kì-liām Iâ-hô-hoa lí ê Siōng-tè, m̄-thang chún pò-jîn-bēng-ê kiâⁿ bia̍t-choa̍t, kiaⁿ-liáu in bia̍t-choa̍t góa ê kiáⁿ. Ông kóng, góa kí éng-oa̍h ê Iâ-hô-hoa lâi chiù-chōa, lí ê kiáⁿ, liân chi̍t ki thâu-mn̂g iā bōe ka-la̍uh tī tōe--nih.

12婦人人講，求你容允你ê女婢對我ê主我ê王koh講一句話。王講，做你講。Hū-jîn-lâng kóng, Kiû lí iông-ún lí ê lú-pī tùi góa ê chú góa ê ông koh kóng chi̍t kù ōe. Ông kóng, Chòe lí kóng.

13婦人人講，你啥事想án-ni來攻擊上帝ê百姓ah？王講chit-ê話，親像有罪，因為王無hō͘伊ê逃命ê tò來。Hū-jîn-lâng kóng, Lí siáⁿ-sū siūⁿ án-ni lâi kong-kek Siōng-tè ê peh-sìⁿ ah? Ông kóng chit ê ōe, chhin-chhiūⁿ ū-chōe, in-ūi ông bô hō͘ i ê tô-miā-ê tò--lâi.

14因為咱lóng的確tio̍h死，親像水潑tī地裡，bōe能koh收倒tńg；總是上帝無搶人ê性命，是設法hō͘逃命ê人免受革逐離開伊。In-ūi lán lóng tek-khak tio̍h sí, chhin-chhiūⁿ chúi phoah tī tōe--nih, bōe-ōe koh siu tò-tńg; chóng-sī Siōng-tè bô chhiúⁿ lâng ê sìⁿ-miā, sī siat-hoat hō͘ tô-miā ê lâng bián siū kek-tio̍k lī-khui I.

15我來將chit-ê話kā我ê主我ê王講，是因為百姓hō͘我驚惶，所以女婢講，Taⁿ我beh kā王講，kiám-chhái王beh成女婢ê所求。Góa lâi chiong chit ê ōe kā góa ê chú góa ê ông kóng, sī in-ūi peh-sìⁿ hō͘ góa kiaⁿ-hiâⁿ, só͘-í lú-pī kóng, Taⁿ góa beh kā ông kóng, kiám-chhái ông beh chiâⁿ lú-pī ê só͘ kiû.

16人beh將我kap我ê kiáⁿ tùi上帝ê業做一下除滅；總是王beh聽，救伊ê女婢脫離hit人ê手。Lâng beh chiong góa kap góa ê kiáⁿ tùi Siōng-tè ê gia̍p chòe chi̍t-ē tû-bia̍t; chóng-sī ông beh thiaⁿ, kiù i ê lú-pī thoat-lī hit-lâng ê chhiú.

17女婢koh講，願我ê主我ê王ê話來安慰；因為我ê主我ê王能分別是非，親像上帝ê使者一樣；獨獨願耶和華你ê上帝kap你tī-teh。Lú-pī koh kóng, Goān góa ê chú góa ê ông ê ōe lâi an-ùi; in-ūi góa ê chú góa ê ông ōe hun-piat sī-hui, chhin-chhiūⁿ Siōng-tè ê sù-chiá chi̍t-iūⁿ; to̍k-to̍k goān Iâ-hô-hoa lí ê Siōng-tè kap lí tī-teh.

18王應婦人人kā伊講，我見若所beh問你ê，lóng m̄-thang對我khǹg密。婦人人講，願我ê主我ê王講伊。Ông ìn hū-jîn-lâng kā i kóng, góa kìⁿ-nā só͘ beh mn̄g lí ê, lóng m̄-thang tùi góa khǹg-ba̍t. Hū-jîn-lâng kóng, Goān góa ê chú góa ê ông kóng i.

19王講，Chiah-ê kiám m̄是約押kap你通套ê mah？婦人人講，我ê主我ê王ah，我kí你ê活命來chiù-chōa，我ê主我ê王所講ê，無人會偏左á偏右來閃避伊。因為你ê奴僕約押吩咐我，用chiah-ê話lóng教你ê女婢講。Ông kóng, Chiah-ê kiám-m̄-sī Iok-ap kap lí thong-thò-ê mah? Hū-jîn-lâng kóng, Góa ê chú góa ê ông ah, góa kí lí ê oa̍h-miā lâi chiù-chōa, góa ê chú góa ê ông só͘ kóng--ê, bô lâng ōe phian-chó á phian-iū lâi siám-pī i. In-ūi lí ê lô͘-po̍k Iok-ap hoan-hù góa, ēng chiah ê ōe lóng kà lí ê lú-pī kóng.

20你ê奴僕約押做án-ni，是beh hō͘ chit-ê事勢轉彎；我ê主有智慧，親像上帝使者ê智慧，能透徹世上一切ê事。Lí ê lô͘-po̍k Iok-ap chòe án-ni, sī beh hō͘ chit ê sū-sè choán-oan; góa ê chú ū tì-hūi, chhin-chhiūⁿ Siōng-tè sù-chiá ê tì-hūi, ōe thàu-thiat sè-chiūⁿ it-chhè ê sū.

21王kā約押講，我的確行chit-ê事；taⁿ你tio̍h去，chhōa hit-ê少年人押沙龍tò來。Ông kā Iok-ap kóng, Góa tek-khak kiâⁿ chit ê sū; taⁿ lí tio̍h khì, chhōa hit ê siàu-liân lâng Ap-sa-liông tò--lâi.

22約押仆tī地裡來拜，祝謝王；約押講，我ê主我ê王ah，王既然行你ê奴僕所求ê，今á日你ê奴僕知我有得tio̍h恩典tī你ê目睭前。Iok-ap phak tī tōe--nih lâi pài, chiok-siā ông; Iok-ap kóng, Góa ê chú góa ê ông ah, ông kì-jiân kiâⁿ lí ê lô͘-po̍k só͘ kiû--ê, kin-á-ji̍t lí ê lô͘-po̍k chai góa ū tit-tio̍h un-tián tī lí ê ba̍k-chiu-chêng.

23Tùi án-ni，約押起身去Ki-su̍t，chhōa Ap-sa-li王到耶路撒冷。Tùi án-ni Iok-ap khí-sin khì Ki-su̍t, chhōa Ap-sa-liông kàu Iâ-lō͘-sat-léng.

24王講，Kah伊tò去伊ê厝，m̄-thang見我ê面。押沙龍就tò去伊ê厝，無見王ê面。Ông kóng, Kah i tò-khì i ê chhù, m̄-thang kìⁿ góa ê bīn. Ap-sa-liông chiū tò-khì i ê chhù, bô kìⁿ ông ê bīn.

25押沙龍生做真好看，thong以色列中無人親像伊得tio̍h人o-ló；tùi kha-chiah底到頭殼頂lóng無瑕疵。Ap-sa-liông siⁿ-chòe chin hó-khòaⁿ, thong Í-sek-lia̍t tiong bô lâng chhin-chhiūⁿ i tit-tio̍h lâng o-ló; tùi kha-chiah-tóe kàu thâu-khak-téng lóng bô hâ-chhû.

26伊剪頭毛ê時，秤(chhìn)伊ê頭毛，照王ê秤，重兩百sià-khek-le̍k；伊剪髮是tī ta̍k-ê年尾，因為伊ê頭毛真重，所以tio̍h剪伊。I chián thâu-mn̂g ê sî, chhìn i ê thâu-mn̂g, chiàu ông ê chhìn, tāng nn̄g-pah sià-khek-le̍k; i chián-hoat sī tī ta̍k ê nî-bé, in-ūi i ê thâu-mn̂g chin-tāng, só͘-í tio̍h chián i.

27押沙龍生三個kiáⁿ，一個cha-bó͘-kiáⁿ；cha-bó͘-kiáⁿ名叫Tha-má，是一個面貌真súi ê cha-bó͘-gín-ná。Ap-sa-liông siⁿ saⁿ ê kiáⁿ, chi̍t ê cha-bó͘-kiáⁿ; cha-bó͘-kiáⁿ miâ kiò Tha-má, sī chi̍t-ê bīn-māu chin-súi ê cha-bó͘-gín-ná.

28押沙龍tòa tī耶路撒冷滿兩年，無見王ê面。Ap-sa-liông tòa tī Iâ-lō͘-sat-léng móa nn̄g-nî, bô kìⁿ ông ê bīn.

29押沙龍差人叫約押，beh 差伊去見王。總是約押m̄肯來伊hia；伊第二pái差人去叫伊，伊猶原m̄來。Ap-sa-liông chhe lâng kiò Iok-ap, beh chhe i khì kìⁿ ông. Chóng-sī Iok-ap m̄-khéng lâi i hia; i tē-jī pái chhe lâng khì kiò i, i iû-goân m̄-lâi.

30所以押沙龍對伊ê奴僕講，Lín看，約押ê園近我ê園，伊有大麥tī-hia；lín去放火燒伊。押沙龍ê奴僕就去放火燒伊。Só͘-í Ap-sa-liông tùi i ê lô͘-po̍k kóng, Lín khòaⁿ, Iok-ap ê hn̂g kūn góa ê hn̂g, i ū tōa-be̍h tī-hia; lín khì pàng-hé sio i. Ap-sa-liông ê lô͘-po̍k chiū khì pàng-hé sio i.

31約押就起來到押沙龍ê厝，問伊講，你ê奴僕啥事放火燒我ê園？Iok-ap chiū khí-lâi kàu Ap-sa-liông ê chhù, mn̄g i kóng, Lí ê lô͘-po̍k siáⁿ-sū pàng-hé sio góa ê hn̂g?

32押沙龍應約押講，我差人kā你講，來chia，hō͘我thang 差你去見王，kā伊講，我啥事tùi Ki-su̍t tò來ah？我m̄值tio̍h猶原tòa hia；taⁿ tio̍h准我見王ê面，我若有罪，伊thang thâi我。Ap-sa-liông ìn Iok-ap kóng, Góa chhe lâng kā lí kóng, Lâi chia, hō͘ góa thang chhe lí khì kìⁿ ông, kā i kóng, Góa siáⁿ-sū tùi Ki-su̍t tò-lâi ah? góa m̄-ta̍t-tio̍h iû-goân tòa hia; taⁿ tio̍h chún góa kìⁿ ông ê bīn, góa nā ū chōe, i thang thâi góa.

33約押就去見王kā伊講。伊叫押沙龍；押沙龍就來見王，tī王ê面前仆tī地裡。王就chim押沙龍。Iok-ap chiū khì kìⁿ ông kā i kóng. I kiò Ap-sa-liông; Ap-sa-liông chiū lâi kìⁿ ông, tī ông ê bīn-chêng phak tī tōe--nih. Ông chiū chim Ap-sa-liông.

1Chit-tia̍p了後，押沙龍為家己備辦車馬，koh五十人走tī伊ê頭前。Chit-tia̍p liáu-āu Ap-sa-liông ūi ka-kī pī-pān chhia-bé, koh gō͘-cha̍p lâng cháu tī i ê thâu-chêng.

2押沙龍早早起來，khiā tī城門ê路邊；若有人來，有案件tio̍h hō͘王判斷ê，押沙龍就叫伊來，問伊講，你是toh落一個城ê人？伊應講，奴僕是以色列一個支派ê人。Ap-sa-liông chá-chá khí-lâi, khiā tī siâⁿ-mn̂g ê lō͘-piⁿ; nā ū lâng lâi, ū àn-kiāⁿ tio̍h hō͘ ông phòaⁿ-toàn ê, Ap-sa-liông chiū kiò i lâi, mn̄g i kóng, Lí sī toh-lo̍h chi̍t ê siâⁿ ê lâng? I ìn kóng, Lô͘-po̍k sī Í-sek-lia̍t chi̍t ê chi-phài ê lâng.

3押沙龍kā伊講，你ê tāi-chì是好，是有情理；總是王無交代人聽你ê話。Ap-sa-liông kā i kóng, Lí ê tāi-chì sī hó, sī ū chêng-lí; chóng-sī ông bô kau-tài lâng thiaⁿ lí ê ōe.

4押沙龍koh講，可惜無設立我做chit-ê地方ê審判司；見有相告tio̍h判斷ê事ê，來到我chia，我beh照公義判決伊。Ap-sa-liông koh kóng, Khó-sioh bô siat-li̍p góa chòe chit ê tōe-hng ê sím-phòaⁿ-si; kìⁿ-ū saⁿ-kò tio̍h phòaⁿ-toàn ê sū ê, lâi kàu góa chia, góa beh chiàu kong-gī phòaⁿ-koat i.

5見有人近óa來拜伊，伊就伸手牽伊，kā伊chim。Kìⁿ-ū lâng kūn-óa lâi pài i, i chiū chhun-chhiú khan i, kā i chim.

6以色列人ê中間，見若beh去見王求判斷ê，押沙龍lóng án-ni款待in。Án-ni押沙龍暗靜得tio̍h以色列人ê心。Í-sek-lia̍t lâng ê tiong-kan, kìⁿ-nā beh khì kìⁿ ông kiû phòaⁿ-toàn ê, Ap-sa-liông lóng án-ni khoán-thāi in. Án-ni Ap-sa-liông àm-chīⁿ tit-tio̍h Í-sek-lia̍t lâng ê sim.

7過四年，押沙龍對王講，求你准我去Hi-pek-lûn，還我對耶和華所hē ê願。Kè sì-nî, Ap-sa-liông tùi ông kóng, Kiû lí chún góa khì Hi-pek-lûn, hêng góa tùi Iâ-hô-hoa só͘ hē ê goān.

8因為奴僕tiàm tī A-lân ê Ki-su̍t bat hē願講，耶和華若果然hō͘我koh tò來耶路撒冷，我beh服事耶和華。In-ūi lô͘-po̍k tiàm tī A-lân ê Ki-su̍t bat hē goān kóng, Iâ-hô-hoa nā kó-jiân hō͘ góa koh tò-lâi Iâ-lō͘-sat-léng, góa beh ho̍k-sāi Iâ-hô-hoa.

9王kā伊講，你thang平安去。押沙龍就起來，去Hi-pek-lûn。Ông kā i kóng, Lí thang pêng-an khì. Ap-sa-liông chiū khí-lâi, khì Hi-pek-lûn.

10押沙龍差偵探行遍以色列ta̍k支派，講，Lín一下聽見哨角ê聲，就講，押沙龍tī Hi-pek-lûn做王lah。Ap-sa-liông chhe cheng-thàm kiâⁿ piàn Í-sek-lia̍t ta̍k chi-phài, kóng, Lín chi̍t-ē thiaⁿ-kìⁿ sàu-kak ê siaⁿ, chiū kóng, Ap-sa-liông tī Hi-pek-lûn chòe-ông lah.

11押沙龍所請hí兩百人kap伊tùi耶路撒冷去；hiah-ê人lóng是bû-ì中去，m̄知hit-ê事。Ap-sa-liông só͘ chhiáⁿ hí(**hit) nn̄g-pah lâng kap i tùi Iâ-lō͘-sat-léng khì; hiah ê lâng lóng sī bû-ì-tiong khì, m̄-chai hit ê sū.

12大衛ê 謀士A-hi-to-hut是Ki-lô人，當獻祭ê時，押沙龍差人召伊，對伊ê本城Ki-lô來；tùi án-ni，叛逆ê勢面ná 強；因為tè押沙龍ê百姓日日ná-chōe。Tāi-pi̍t ê bô͘-sū A-hi-to-hut sī Ki-lô lâng, tng hiàn-chè ê sî, Ap-sa-liông chhe lâng tiàu i, tùi i ê pún-siâⁿ Ki-lô lâi; tùi án-ni poān-ge̍k ê sè-bīn ná kiông; in-ūi tè Ap-sa-liông ê peh-sìⁿ ji̍t-ji̍t ná-chōe.

13有人來報大衛講，以色列人ê心lóng歸向押沙龍lah。Ū lâng lâi pò Tāi-pi̍t kóng, Í-sek-lia̍t lâng ê sim lóng kui-ǹg Ap-sa-liông lah.

14大衛kā hiah-ê kap伊tī耶路撒冷ê人臣講，起來，咱tio̍h逃走；若無，lóng bōe能閃避押沙龍；tio̍h緊緊去，驚了伊緊緊到來jip-tio̍h咱，陷害咱，用刀thâi死城內ê人。Tāi-pi̍t kā hiah ê kap i tī Iâ-lō͘-sat-léng ê jîn-sîn kóng, Khí-lâi, lán tio̍h tô-cháu; nā bô, lóng bōe-ōe siám-pī Ap-sa-liông; tio̍h kín-kín khì, kiaⁿ-liáu i kín-kín kàu lâi jip-tio̍h lán, hām-hāi lán, ēng to thâi-sí siâⁿ-lāi ê lâng.

15王ê人臣kā王講，看ah，我ê主我ê王所主意ê，你ê奴僕lóng beh行。Ông ê jîn-sîn kā ông kóng, Khòaⁿ ah, góa ê chú góa ê ông só͘ chú-ì ê, lí ê lô͘-po̍k lóng beh kiâⁿ.

16王出去，伊ê家眷lóng tè伊；王留十個嬪妃顧厝。Ông chhut-khì, i ê ke-koàn lóng tè i; ông lâu cha̍p ê pìn-hui kò͘ chhù.

17王出去，眾百姓lóng tè伊；到Pek-be̍k-hap就歇。Ông chhut-khì, chèng peh-sìⁿ lóng tè i; kàu Pek-be̍k-hap chiū hioh.

18王ê人臣lóng tī伊ê面前行過去，一切ê Ki-lī-thê人、Pí-lī-thê人，kap Ka-te̍k人，就是tùi Ka-te̍k tè伊來ê六百人，也lóng tī王ê面前行過去。Ông ê jîn-sîn lóng tī i ê bīn-chêng kiâⁿ-kè--khì, it-chhè ê Ki-lī-thê lâng, Pí-lī-thê lâng, kap Ka-te̍k lâng, chiū-sī tùi Ka-te̍k tè i lâi ê la̍k-pah lâng, iā lóng tī ông ê bīn-chêng kiâⁿ-kè--khì.

19王kā Ka-te̍k人Í-thài講，你啥事kap阮去？thang tò去kap王相kap tòa；你是外邦人，遷徙tī外面，thang tò去本所在。Ông kā Ka-te̍k lâng Í-thài kóng, Lí siáⁿ-sū kap goán khì? thang tò-khì kap ông saⁿ-kap tòa; lí sī gōa-pang lâng, chhian-sóa tī gōa-bīn, thang tò-khì pún só͘-chāi.

20你昨日chiah來，我今á日kiám thang勞煩你kap阮漂流ah？我去我所去ê所在；你thang tò去，帶你ê兄弟相kap tò去；願恩典誠實kap你tī-teh。Lí chā-ji̍t chiah lâi, góa kin-á-ji̍t kiám thang lô-hoân lí kap goán phiau-liû ah? góa khì góa só͘ khì ê só͘-chāi; lí thang tò-khì, tòa lí ê hiaⁿ-tī saⁿ-kap tò-khì; goān un-tián sêng-si̍t kap lí tī-teh.

21Í-thài ìn王講，我kí永活ê耶和華，kap我ê主我ê王ê活命，來chiù-chōa，我ê主我ê王或活或死，見所tī-teh ê所在，你ê奴僕也tī-hia。Í-thài ìn ông kóng, Góa kí éng-oa̍h ê Iâ-hô-hoa, kap góa ê chú góa ê ông ê oa̍h-miā, lâi chiù-chōa, góa ê chú góa ê ông he̍k-oa̍h he̍k-sí, kìⁿ só͘ tī-teh ê só͘-chāi, lí ê lô͘-po̍k iā tī-hia.

22大衛kā Í-thài講，你去，過去。Ka-te̍k人Í-thài kap hiah-ê tè伊ê人，kap所有ê gín-ná就lóng過去。Tāi-pi̍t kā Í-thài kóng, Lí khì, kè--khì. Ka-te̍k lâng Í-thài kap hiah ê tè i ê lâng, kap só͘ ū ê gín-ná chiū lóng kè--khì.

23遍地大聲啼哭；眾百姓lóng過去，王也過Khip-lûn溪；眾百姓過去，ǹg曠野teh行。Piàn-tōe tōa-siaⁿ thî-khàu; chèng peh-sìⁿ lóng kè--khì, ông iā kè Khip-lûn khoe; chèng peh-sìⁿ kè--khì, ǹg khòng-iá teh-kiâⁿ.

24Sat-tok kap lóng總tè伊ê利未人扛上帝ê約櫃來；in hē上帝ê櫃tī-hia。A-pí-a-tha上來，thèng候眾百姓tùi城內出來，lóng過去。Sat-tok kap lóng-chóng tè i ê Lī-bī lâng kng Siōng-tè ê iok-kūi lâi; in hē Siōng-tè ê kūi tī-hia. A-pí-a-tha chiūⁿ--lâi, thèng-hāu chèng peh-sìⁿ tùi siâⁿ-lāi chhut-lâi, lóng kè--khì.

25王kā Sat-tok講，你扛上帝ê櫃tò去城內；我若得tio̍h恩典tī耶和華ê目前，伊beh hō͘我tò來，hō͘我koh看見伊，kap伊khiā起ê所在。Ông kā Sat-tok kóng, Lí kng Siōng-tè ê kūi tò-khì siâⁿ-lāi; góa nā tit-tio̍h un-tián tī Iâ-hô-hoa ê ba̍k-chêng, I beh hō͘ góa tò-lâi, hō͘ góa koh khòaⁿ-kìⁿ i, kap I khiā-khí ê só͘-chāi.

26設使伊講，我無歡喜你；看ah，我tī-chia，願伊照伊看做好ê行tī我。Siat-sú I kóng, Góa bô hoaⁿ-hí lí; khòaⁿ ah, góa tī-chia, goān I chiàu I khòaⁿ-chòe hó-ê kiâⁿ tī góa.

27王koh kā祭司Sat-tok講，你kiám m̄是先見mah？你thang安然tò去城內；你ê kiáⁿ A-hi-má-su，kap A-pí-a-tha ê kiáⁿ約拿單，lín chit兩個kiáⁿ lóng thang kap你去。Ông koh kā chè-si Sat-tok kóng, Lí kiám m̄-sī sian-kiàn mah? Lí thang an-jiân tò-khì siâⁿ-lāi; lí ê kiáⁿ A-hi-má-su, kap A-pí-a-tha ê kiáⁿ Iok-ná-tan, lín chit nn̄g ê kiáⁿ lóng thang kap lí khì.

28看ah，我tī曠野ê渡口thèng候tùi你hia有消息來，報我知實情。Khòaⁿ ah, góa tī khòng-iá ê tō͘-kháu thèng-hāu tùi lí hia ū siau-sit lâi, pò góa chai si̍t-chêng.

29Tùi án-ni，Sat-tok kap A-pí-a-tha扛上帝ê櫃tò去耶路撒冷；in就tòa tī-hia。Tùi án-ni Sat-tok kap A-pí-a-tha kng Siōng-tè ê kūi tò-khì Iâ-lō͘-sat-léng; in chiū tòa tī-hia.

30大衛tùi上橄欖山ê路上去，ná上去ná哮；罩頭殼thǹg赤腳來行；tè伊去ê眾百姓也罩頭殼上去，ná上去ná哮。Tāi-pi̍t tùi chiūⁿ Kaⁿ-ná soaⁿ ê lō͘ chiūⁿ-khì, ná chiūⁿ-khì ná-háu; tà thâu-khak thǹg-chiah-kha lâi kiâⁿ; tè i khì ê chèng peh-sìⁿ iā tà thâu-khak chiūⁿ--khì, ná chiūⁿ-khì ná-háu.

31有人報大衛講，A-hi-to-hut也tè押沙龍tī叛黨 ê中間。大衛講，耶和華ah，求你hō͘ A-hi-to-hut ê計謀變做戇。Ū lâng pò Tāi-pi̍t kóng, A-hi-to-hut iā tè Ap-sa-liông tī poān-tóng ê tiong-kan. Tāi-pi̍t kóng, Iâ-hô-hoa ah, kiû Lí hō͘ A-hi-to-hut ê kè-bô͘ pìⁿ-chòe gōng.

32大衛上到山頂，敬拜上帝ê所在，看見A-ki人Hō͘-su，衫拆裂，頭殼sám塵埃，來迎接伊。Tāi-pi̍t chiūⁿ kàu soaⁿ-téng, kèng-pài Siōng-tè ê só͘-chāi, khòaⁿ-kìⁿ A-ki lâng Hō͘-su, saⁿ thiah-li̍h, thâu-khak sám tîn-ai, lâi ngiâ-chih i.

33大衛kā伊講，你若kap我去，會拖thūi我；Tāi-pi̍t kā i kóng, Lí nā kap góa khì, ōe thoa-thūi góa;

34你若tò去城內，kā押沙龍講，王ah，我beh做你ê奴僕；我前做你ê父ê奴僕，taⁿ我也beh án-ni做你ê奴僕，你就thang kā我破壞A-hi-to-hut ê計謀。lí nā tò-khì siâⁿ-lāi, kā Ap-sa-liông kóng, Ông ah, góa beh chòe lí ê lô͘-po̍k; góa chêng chòe lí ê pē ê lô͘-po̍k, taⁿ góa iā beh án-ni chòe lí ê lô͘-po̍k, lí chiū thang kā góa phò-hoāi A-hi-to-hut ê kè-bô͘.

35祭司Sat-tok kap A-pí-a-tha kiám無kap你tī-hia mah？你tùi王宮內所聽見ê，就tio̍h kā祭司Sat-tok kap A-pí-a-tha講。Chè-si Sat-tok kap A-pí-a-tha kiám bô kap lí tī-hia mah? Lí tùi ông-kiong-lāi só͘ thiaⁿ-kìⁿ-ê, chiū tio̍h kā chè-si Sat-tok kap A-pí-a-tha kóng.

36Sat-tok ê kiáⁿ A-hi-má-su，A-pí-a-tha ê kiáⁿ約拿單，chit兩個kiáⁿ也kap in tī-hia；見若lín所聽見ê，thang託重in來報我。Sat-tok ê kiáⁿ A-hi-má-su, A-pí-a-tha ê kiáⁿ Iok-ná-tan, chí(**chit) nn̄g ê kiáⁿ iā kap in tī-hia; kìⁿ-nā lín só͘ thiaⁿ-kìⁿ ê, thang thok-tiōng in lâi pò góa.

37Tùi án-ni，大衛ê朋友Hō͘-su入城。押沙龍也入耶路撒冷。Tùi án-ni, Tāi-pi̍t ê pêng-iú Hō͘-su ji̍p siâⁿ. Ap-sa-liông iā ji̍p Iâ-lō͘-sat-léng.