1A-hi-to-hut koh kā押沙龍講，請你准我揀一萬兩千人，今暝我beh起身追jip大衛；A-hi-to-hut koh kā Ap-sa-liông kóng, chhiáⁿ lí chún góa kéng chi̍t-bān nn̄g-chheng lâng, kim-mî góa beh khí-sin tui-jip Tāi-pi̍t;

2趁thàn 伊厭倦手軟，我beh jip-tio̍h伊，hō͘伊驚惶，tè伊ê眾百姓beh lóng逃走；我就kan-ta thâi死王nā-tiāⁿ；thàn i ià-siān chhiú nńg, góa beh jip-tio̍h i, hō͘ i kiaⁿ-hiâⁿ, tè i ê chèng peh-sìⁿ beh lóng tô-cháu; góa chiū kan-ta thâi-sí ông nā-tiāⁿ;

3Hō͘眾百姓lóng 歸你；你所chhē hit人是親像眾人倒tńg來一樣；án-ni百姓lóng平安。hō͘ chèng peh-sìⁿ lóng kui lí; lí só͘ chhē hit-lâng sī chhin-chhiūⁿ chèng-lâng tò-tńg--lâi chi̍t-iūⁿ; án-ni peh-sìⁿ lóng pêng-an.

4押沙龍kap以色列ê長老lóng掠chit-ê話做好。Ap-sa-liông kap Í-sek-lia̍t ê tióng-ló lóng lia̍h chit ê ōe chòe hó.

5押沙龍講，Tio̍h叫A-ki人Hō͘-su來，咱也thang聽伊所講ê。Ap-sa-liông kóng, Tio̍h kiò A-ki lâng Hō͘-su lâi, lán iā thang thiaⁿ i só͘ kóng ê.

6Hō͘-su到押沙龍hia，押沙龍kā伊講，A-hi-to-hut講án-ni，咱tio̍h照伊ê話行mah？若無，你就tio̍h講。Hō͘-su kàu Ap-sa-liông hia, Ap-sa-liông kā i kóng, A-hi-to-hut kóng án-ni, lán tio̍h chiàu i ê ōe kiâⁿ mah? Nā bô, lí chiū tio̍h kóng.

7Hō͘-su kā押沙龍講，A-hi-to-hut chit-pái所計畫ê m̄好。Hō͘-su kā Ap-sa-liông kóng, A-hi-to-hut chit-pái só͘ kè-e̍k--ê m̄-hó.

8Hō͘-su koh講，你知你ê老父，kap tè伊ê人，lóng是勇士；taⁿ in ê心猛烈，親像田野失落kiáⁿ ê熊母一般。Koh你ê老父是戰士，的確無kap百姓相kap歇。Hō͘-su koh kóng, Lí chai lí ê lāu-pē, kap tè i ê lâng, lóng sī ióng-sū; taⁿ in ê sim béng-lia̍t, chhin-chhiūⁿ chhân-iá sit-lo̍h kiáⁿ ê hîm-bú chi̍t-poaⁿ. Koh lí ê lāu-pē sī chiàn-sū, tek-khak bô kap peh-sìⁿ saⁿ-kap hioh.

9看ah，伊taⁿ bih tī山坑á是別所在；若有kúi-nā人事先hō͘伊thâi死，見若聽見ê人beh講，Tè押沙龍ê百姓其中有受thâi。Khòaⁿ ah, i taⁿ bih tī soaⁿ-khiⁿ á-sī pa̍t só͘-chāi; nā ū kúi-nā lâng tāi-seng hō͘ i thâi-sí, kìⁿ-nā thiaⁿ-kìⁿ ê lâng beh kóng, Tè Ap-sa-liông ê peh-sìⁿ kî-tiong ū siū-thâi.

10雖然有人好膽，in ê心親像獅ê心，也beh lóng消溶；因為以色列人lóng知你ê父是勇士，tè伊ê人也lóng是好膽。Sui-jiân ū lâng hó-táⁿ, in ê sim chhin-chhiūⁿ sai ê sim, iā beh lóng siau-iûⁿ; in-ūi Í-sek-lia̍t lâng lóng chai lí ê pē sī ióng-sū, tè i ê lâng iā lóng sī hó-táⁿ.

11所以我舉議，tio̍h hō͘以色列眾人，tùi Tàn到別是巴，聚集來你chia，親像海邊ê沙hiah-chōe，你也親身督陣。Só͘-í góa kú-gī, tio̍h hō͘ Í-sek-lia̍t chèng-lâng, tùi Tàn kàu Pia̍t-sī-pa, chū-chi̍p lâi lí chia, chhin-chhiūⁿ hái-piⁿ ê soa hiah-chōe, lí iā chhin-sin tok-tīn.

12Án-ni，無論tī甚麼所在tú-tio̍h伊，咱beh攻擊伊，落tī伊ê頂面親像露水落tī地裡一般，hō͘伊kap tè ê人無留一個。Án-ni, bô-lūn tī sím-mi̍h só͘-chāi tú-tio̍h i, lán beh kong-kek i, lo̍h tī i ê téng-bīn chhin-chhiūⁿ lō͘-chúi lo̍h tī tōe--nih chi̍t-poaⁿ, hō͘ i kap tè ê lâng bô lâu chi̍t-ê.

13伊若入城，以色列眾人beh帶索到hit-ê城，咱beh kā伊拖落河，致到tī-hia無看見一塊石頭á。I nā ji̍p siâⁿ, Í-sek-lia̍t chèng-lâng beh tòa soh kàu hit ê siâⁿ, lán beh kā i thoa lo̍h hô, tì-kàu tī-hia bô khòaⁿ-kìⁿ chi̍t tè chio̍h-thâu-á.

14押沙龍kap以色列眾人講，A-ki人，Hō͘-su ê計畫，比A-hi-to-hut ê計畫khah好；因為耶和華定tio̍h beh破壞A-hi-to-hut ê好計畫，致到耶和華thang降災厄hō͘押沙龍。Ap-sa-liông kap Í-sek-lia̍t chèng-lâng kóng, A-ki lâng, Hō͘-su ê kè-e̍k, pí A-hi-to-hut ê kè-e̍k khah-hó; in-ūi Iâ-hô-hoa tiāⁿ-tio̍h beh phò-hoāi A-hi-to-hut ê hó kè-e̍k, tì-kàu Iâ-hô-hoa thang kàng chai-ē hō͘ Ap-sa-liông.

15Hō͘-su kā祭司Sat-tok kap A-pí-a-tha講，A-hi-to-hut kā押沙龍kap以色列ê長老所計畫ê是án-ni，án-ni，我所kā伊計畫ê是án-ni，án-ni。Hō͘-su kā chè-si Sat-tok kap A-pí-a-tha kóng, A-hi-to-hut kā Ap-sa-liông kap Í-sek-lia̍t ê tiúⁿ-ló só͘ kè-e̍k-ê sī án-ni, án-ni, góa só͘ kā i kè-e̍k ê sī àn(**án)-ni, àn(**án)-ni.

16Taⁿ lín tio̍h趕緊差人去，kā大衛講，今暝m̄-thang tiàm tī曠野ê渡口，的確tio̍h過河，免得王kap tè伊ê人lóng受吞滅。Taⁿ lín tio̍h kóaⁿ-kín chhe lâng khì, kā Tāi-pi̍t kóng, kim-mî m̄-thang tiàm tī khòng-iá ê tō͘-kháu, tek-khak tio̍h kè-hô, bián-tit ông kap tè i ê lâng lóng siū thun-bia̍t.

17Hit時約拿單kap A-hi-má-su tiàm tī Ún-lô-kiat teh thèng候，因為m̄敢hō͘人看見in入城。有一個女婢來kā in講，in就去kā大衛王講。Hit-sî Iok-ná-tan kap A-hi-má-su tiàm tī Ún-lô-kiat teh thèng-hāu, in-ūi m̄-káⁿ hō͘ lâng khòaⁿ-kìⁿ in ji̍p siâⁿ. Ū chi̍t ê lú-pī lâi kā in kóng, in chiū khì kā Tāi-pi̍t ông kóng.

18總是有一個gín-ná看見in，就去kā押沙龍講；in兩人趕緊走到Pa-hō͘-lîm，某人ê厝；hit人ê院內有井，in兩人就落去hia；Chóng-sī ū chi̍t ê gín-ná khòaⁿ-kìⁿ in, chiū khì kā Ap-sa-liông kóng; in nn̄g-lâng kóaⁿ-kín cháu kàu Pa-hō͘-lîm, bó͘-lâng ê chhù; hit-lâng ê īⁿ-lāi ū chíⁿ, in nn̄g lâng chiū lo̍h--khì hia;

19hit家ê婦人人用蓋(kòa)蓋井嘴，頂面舖麥屑，tāi-chì就無漏洩。hit-ke ê hū-jîn-lâng ēng kòa khàm chíⁿ-chhùi, téng-bīn pho͘ be̍h-sut, tāi-chì chiū bô lāu-siat.

20押沙龍ê奴僕來到婦人人hit間厝，問伊講，A-hi-má-su kap約拿單tī toh落？婦人人講，In過溪去lah。奴僕chhē in，chhē無tio̍h，就tò去耶路撒冷。Ap-sa-liông ê lô͘-po̍k lâi kàu hū-jîn-lâng hit keng chhù, mn̄g i kóng, A-hi-má-su kap Iok-ná-tan tī toh-lo̍h? Hū-jîn-lâng kóng, In kè-khoe khì lah. Lô͘-po̍k chhē in, chhē-bô-tio̍h, chiū tò-khì Iâ-lō͘-sat-léng.

21In tò去了，兩人tùi井裡起來，去kā大衛王講；in kā大衛講，Lín tio̍h起來，緊緊過水，因為A-hi-to-hut有án-ni，án-ni計畫，beh害你。In tò-khì liáu, nn̄g-lâng tùi chíⁿ--nih khí-lâi, khì kā Tāi-pi̍t ông kóng; in kā Tāi-pi̍t kóng, Lín tio̍h khí-lâi, kín-kín kè-chúi, in-ūi A-hi-to-hut ū án-ni, án-ni kè-e̍k, beh hāi lí.

22大衛kap tè伊ê人就起來，過約旦；到天光，無chhun一人無過約旦。Tāi-pi̍t kap tè i ê lâng chiū khí-lâi, kè Iok-tàn; kàu thiⁿ-kng, bô chhun chi̍t-lâng bô kè Iok-tàn.

23A-hi-to-hut看見無照伊ê計畫行，就備辦驢起身，tò去伊ê城，到伊ê家，吩咐伊ê家事，就家己吊死，埋葬tī伊ê老父ê墓。A-hi-to-hut khòaⁿ-kìⁿ bô chiàu i ê kè-e̍k kiâⁿ, chiū pī-pān lû khí-sin, tò-khì i ê siâⁿ, kàu i ê ke, hoan-hù i ê ke-sū, chiū ka-kī tiàu--sí, bâi-chòng tī i ê lāu-pē ê bōng.

24大衛到Má-hap-liām。押沙龍，kap tè伊ê以色列人，也lóng過約旦。Tāi-pi̍t kàu Má-hap-liām. Ap-sa-liông, kap tè i ê Í-sek-lia̍t lâng, iā lóng kè Iok-tàn.

25押沙龍設立A-má-sat做軍長替約押。 A-má-sat是以色列人，Í-te̍k-la̍h ê kiáⁿ；Í-te̍k-la̍h bat kap Ná-hat ê cha-bó͘-kiáⁿ A-pí-kai同房。Chit-ê A-pí-kai kap約押ê老母Sé-ló͘-ngá是姊妹。Ap-sa-liông siat-li̍p A-má-sat chòe kun-tiúⁿ thòe Iok-ap. A-má-sat sī Í-sek-lia̍t lâng, Í-te̍k-la̍h ê kiáⁿ; Í-te̍k-la̍h bat kap Ná-hat ê cha-bó͘-kiáⁿ A-pí-kai tâng-pâng. Chit ê A-pí-kai kap Iok-ap ê lāu-bú Sé-ló͘-ngá sī chí-bē.

26以色列人kap押沙龍紮營tī Ki-lia̍t地。Í-sek-lia̍t lâng kap Ap-sa-liông chat-iâⁿ tī Ki-lia̍t tōe.

27大衛到Má-hap-liām hit時，A-bûn族ê La̍h-pa人Ná-hat ê kiáⁿ Sok-pí，Lô-tí-pa人A-bí-lī ê kiáⁿ Má-kiat，Ki-lia̍t ê Lô-ki-lîm人Pa-Se-lâi，Tāi-pi̍t kàu Má-hap-liām hit-sî, A-bûn cho̍k ê La̍h-pa lâng Ná-hat ê kiáⁿ Sok-pí, Lô-tí-pa lâng A-bí-lī ê kiáⁿ Má-kiat, Ki-lia̍t ê Lô-ki-lîm lâng Pa-se-lâi,

28帶舖á、盆、磁器、小麥、大麥、麵粉、炒ê五穀、豆á、紅豆、炒豆、tòa pho͘-á, phûn, hûi-khì, sió-be̍h, tōa-be̍h, mī-hún, chhá ê gō͘-kak, tāu-á, âng-tāu, chhá-tāu,

29蜜、奶油、羊、牛奶餅，供給大衛kap tè伊ê人thang食；因為in講，百姓tī曠野必定會iau、厭倦、嘴乾。bi̍t, lin-iû, iûⁿ, gû-lin-piáⁿ, kiong-kip Tāi-pi̍t kap tè i ê lâng thang chia̍h; in-ūi in kóng, Peh-sìⁿ tī khòng-iá pit-tiāⁿ ōe iau, ià-siān, chhùi-ta.

1大衛算tè伊ê百姓，設立千總百總chhōa in。Tāi-pi̍t sǹg tè i ê peh-sìⁿ, siat-li̍p chhian-chóng peh-chóng chhōa in.

2大衛差百姓出去，三份一交約押ê手，三份一交Sé-ló͘-ngá ê kiáⁿ約押ê兄弟A-pí-su ê手，三份一交Ka-te̍k人Í-thài ê手。王kā百姓講，我的確kap lín出去。Tāi-pi̍t chhe peh-sìⁿ chhut-khì, saⁿ-hūn-chi̍t kau Iok-ap ê chhiú, saⁿ-hūn-chi̍t kau Sé-ló͘-ngá ê kiáⁿ Iok-ap ê hiaⁿ-tī A-pí-su ê chhiú, saⁿ-hūn-chi̍t kau Ka-te̍k lâng Í-thài ê chhiú. Ông kā peh-sìⁿ kóng, Góa tek-khak kap lín chhut-khì.

3總是百姓講，你m̄-thang出去；若阮逃走，對敵無掠阮做要緊；阮若陣亡一半，對敵也無掠阮做要緊，因為你一人擋得阮一萬人；你tùi城內幫贊阮khah好。Chóng-sī peh-sìⁿ kóng, Lí m̄-thang chhut-khì; nā goán tô-cháu, tùi-te̍k bô lia̍h goán chòe iàu-kín; goán nā tīn-bông chi̍t-pòaⁿ, tùi-te̍k iā bô lia̍h goán chòe iàu-kín, in-ūi lí chi̍t-lâng tòng-tit goán chi̍t-bān lâng; lí tùi siâⁿ-lāi pang-chān goán khah-hó.

4王kā in講，Lín所看做好ê，我beh行伊；Tùi án-ni，王khiā tī城門-邊，百姓有ê一百，有ê一千，照次序出去。Ông kā in kóng, Lín só͘ khòaⁿ-chòe hó-ê, góa beh kiâⁿ i; tùi án-ni ông khiā tī siâⁿ-mn̂g-piⁿ, peh-sìⁿ ū-ê chi̍t-pah, ū-ê chi̍t-chheng, chiàu chhù-sū chhut-khì.

5王命令約押、A-pí-su、Í-thài，講，Lín帶tio̍h我，款待hit-ê少年人押沙龍tio̍h khah寬。王為tio̍h押沙龍命令hiah-ê首領ê話，百姓lóng有聽見。Ông bēng-lēng Iok-ap, A-pí-su, Í-thài, kóng, Lín tòa-tio̍h góa, khoán-thāi hit ê siàu-liân lâng Ap-sa-liông tio̍h khah-khoan. Ông ūi-tio̍h Ap-sa-liông bēng-lēng hiah ê siú-léng ê ōe, peh-sìⁿ lóng ū thiaⁿ-kìⁿ.

6百姓就出去田野抵敵以色列人，tī Í-hoat-liân ê樹林交戰。Peh-sìⁿ chiū chhut-khì chhân-iá tí-te̍k Í-sek-lia̍t lâng, tī Í-hoat-liân ê chhiū-nâ kau-chiàn.

7Tī-hia以色列人thâi輸tī大衛hiah-ê奴僕ê面前；hit日陣亡ê真chōe，共有兩萬人。Tī-hia Í-sek-lia̍t lâng thâi-su tī Tāi-pi̍t hiah ê lô͘-po̍k ê bīn-chêng; hit-ji̍t tīn-bông-ê chin-chōe, kiōng ū nn̄g-bān lâng.

8因為戰陣線真開，遍遍tī hit所在；樹林所吞滅ê，比hō͘刀所吞滅ê khah-chōe。In-ūi chiàn-tīn-sòaⁿ chin khui, piàn-piàn tī hit só͘-chāi; chhiū-nâ só͘ thun-bia̍t-ê, pí hō͘ to só͘ thun-bia̍t-ê khah-chōe.

9押沙龍偶然tú-tio̍h大衛ê奴僕。押沙龍khiā伊ê騾(lô)，騾走tùi大叢橡樹ām ê樹枝下經過，伊ê頭殼kùi-tio̍h橡樹，吊tī半空中；所騎ê騾做伊去。Ap-sa-liông ngó͘-jiân tú-tio̍h Tāi-pi̍t ê lô͘-po̍k. Ap-sa-liông khiā i ê lô, lô cháu tùi tōa-châng siōng-chhiū ām ê chhiū-ki-ē keng-kè, i ê thâu-khak kùi--tio̍h siōng-chhiū, tiàu tī pòaⁿ-khong-tiong; só͘ khiâ ê lô chòe i khì.

10有一個人看見，就kā約押講，我看見押沙龍kùi tī橡樹裡。Ū chi̍t-ê lâng khòaⁿ-kìⁿ, chiū kā Iok-ap kóng, Góa khòaⁿ-kìⁿ Ap-sa-liông kùi tī siōng-chhiū--nih.

11約押kā報伊ê人講，你已經看見，啥事m̄ tùi-hia phah伊，hō͘伊墮落地ah？我就賞你十個銀，kap一條帶。Iok-ap kā pò i ê lâng kóng, Lí í-keng khòaⁿ-kìⁿ, siáⁿ-sū m̄ tùi-hia phah i, hō͘ i tūi-lo̍h tōe ah? Góa chiū siúⁿ lí cha̍p ê gûn, kap chi̍t tiâu tòa.

12Hit-ê人kā約押講，我就得tio̍h一千銀tī我ê手，也m̄敢伸手害王ê kiáⁿ；因為阮聽見王命令你kap A-pí-su Í-thài講，Lín tio̍h細膩m̄-thang害hit-ê少年人押沙龍。Hit ê lâng kā Iok-ap kóng, Góa chiū tit-tio̍h chi̍t-chheng gûn tī góa ê chhiú, iā m̄-káⁿ chhun-chhiú hāi ông ê kiáⁿ; in-ūi goán thiaⁿ-kìⁿ ông bēng-lēng lí kap A-pí-su Í-thài kóng, Lín tio̍h sòe-jī m̄-thang hāi hit ê siàu-liân lâng Ap-sa-liông.

13我若lām-sám做，來害伊ê性命，無一項能瞞得王，你就beh khiā tī邊á m̄-chhap我。Góa nā lām-sám chòe, lâi hāi i ê sìⁿ-miā, bô chi̍t-hāng ōe môa-tit ông, lí chiū beh khiā tī piⁿ-á m̄-chhap góa.

14約押講，我m̄-thang kap你延chhiân。約押手kia̍h三支短鎗，hit時押沙龍吊tī橡樹，iáu活teh，就鑿透伊ê心。Iok-ap kóng, Góa m̄-thang kap lí iân-chhiân. Iok-ap chhiú kia̍h saⁿ ki té-chhiuⁿ, hit-sî Ap-sa-liông tiàu tī siōng-chhiū, iáu oa̍h--teh, chiū chha̍k-thàu i ê sim.

15Kā約押kia̍h ke-si ê少年人十個，圍押沙龍phah hō͘伊死。Kā Iok-ap kia̍h ke-si ê siàu-liân lâng cha̍p-ê, ûi Ap-sa-liông phah hō͘ i sí.

16約押pûn哨角，百姓就tò來，無koh jip以色列人；因為約押阻止百姓。Iok-ap pûn sàu-kak, peh-sìⁿ chiū tò-lâi, bô koh jip Í-sek-lia̍t lâng; in-ūi Iok-ap chó͘-chí peh-sìⁿ.

17In將押沙龍hiat tī樹林內一個大深坑，頂面疊一大堆ê石頭；以色列眾人ta̍k-ê走tò去in ê布棚。In chiong Ap-sa-liông hiat tī chhiū-nâ-lāi chi̍t ê tōa chhim-khiⁿ, téng-bīn thia̍p chi̍t tōa tui ê chio̍h-thâu; Í-sek-lia̍t chèng-lâng ta̍k-ê cháu tò-khì in ê pò͘-pîⁿ.

18押沙龍活teh ê時，tī王ê山谷為家己khiā一支柱；因為伊講，我無kiáⁿ thang留我ê名；就用家己ê名稱hit支柱；到今á日稱做押沙龍ê號表。Ap-sa-liông oa̍h-teh ê sî, tī Ông ê soaⁿ-kok ūi ka-kī khiā chi̍t ki thiāu; in-ūi i kóng, Góa bô kiáⁿ thang lâu góa ê miâ; chiū ēng ka-kī ê miâ chheng hit ki thiāu; kàu kin-á-ji̍t chheng chòe Ap-sa-liông ê hō-piáu.

19Sat-tok ê kiáⁿ A-hi-má-su講，准我走去，報消息hō͘王，就是耶和華有怎樣對伊ê對敵報仇。Sat-tok ê kiáⁿ A-hi-má-su kóng, Chún góa cháu--khì, pò siau-sit hō͘ ông, chiū-sī Iâ-hô-hoa ū cháiⁿ-iūⁿ tùi i ê tùi-te̍k pò-siû.

20約押kā伊講，你今á日m̄-thang去報消息，別日你thang報消息；總是今á日你m̄-thang報消息，因為王ê kiáⁿ已經死。Iok-ap kā i kóng, Lí kin-á-ji̍t m̄-thang khì pò siau-sit, pa̍t-ji̍t lí thang pò siau-sit; chóng-sī kin-á-ji̍t lí m̄-thang pò siau-sit, in-ūi ông ê kiáⁿ í-keng sí.

21約押kā Kó͘-sī人講，你去將你所看見ê kā王講。Kó͘-sī人對約押鞠躬就走去。Iok-ap kā Kó͘-sī lâng kóng, Lí khì chiong lí só͘ khòaⁿ-kìⁿ-ê kā ông kóng. Kó͘-sī lâng tùi Iok-ap kiok-kiong chiū cháu--khì.

22Sat-tok ê kiáⁿ A-hi-má-su koh kā約押講，無論怎樣，求你准我tè Kó͘-sī人走去。約押講，我ê kiáⁿ，你報消息，既然bōe得tio̍h 賞，啥事ài走去ah？Sat-tok ê kiáⁿ A-hi-má-su koh kā Iok-ap kóng, Bô-lūn cháiⁿ-iūⁿ, kiû lí chún góa tè Kó͘-sī lâng cháu-khì. Iok-ap kóng, Góa ê kiáⁿ, lí pò siau-sit, kì-jiân bōe tit-tio̍h siúⁿ, siáⁿ-sū ài cháu--khì ah?

23伊koh講，無論怎樣，我beh走去。約押講，你走去。A-hi-má-su就tùi平洋ê路走去；走做Kó͘-sī人ê頭前。I koh kóng, Bô-lūn cháiⁿ-iūⁿ, góa beh cháu--khì. Iok-ap kóng, Lí cháu--khì. A-hi-má-su chiū tùi Pîⁿ-iûⁿ ê lō͘ cháu--khì; cháu chòe Kó͘-sī lâng ê thâu-chêng.

24大衛tú-á坐tī門ê城牆ê中間；守望ê人peh上城牆，到城門ê樓頂，kia̍h目觀看，看見一人單身走來。Tāi-pi̍t tú-á chē tī mn̂g ê siâⁿ-chhiûⁿ ê tiong-kan; siú-bāng ê lâng peh-chiūⁿ siâⁿ-chhiûⁿ, kàu siâⁿ-mn̂g ê lâu-téng, kia̍h-ba̍k koan-khòaⁿ, khòaⁿ-kìⁿ chi̍t-lâng toaⁿ-sin cháu--lâi.

25守望ê叫，來kā王講。王講，伊若家己來，的確有消息beh報。伊ná走ná近óa來。Siú-bāng-ê kiò, lâi kā ông kóng. Ông kóng, I nā ka-kī lâi, tek-khak ū siau-sit beh pò. I ná-cháu ná-kūn-óa lâi.

26守望ê人koh看見一人走來，守望ê kā顧城門ê人講，看ah，有一人單身走來。王講，這也是報消息ê。Siú-bāng ê lâng koh khòaⁿ-kìⁿ chi̍t-lâng cháu--lâi, siú-bāng-ê kā kò͘ siâⁿ-mn̂g ê lâng kóng, Khòaⁿ ah, ū chi̍t-lâng toaⁿ-sin cháu--lâi. Ông kóng, Che iā-sī pò siau-sit ê.

27守望ê講，我看見頭前teh走ê親像Sat-tok ê kiáⁿ A-hi-má-su teh走ê款。王講，伊是好人，來報好消息。Siú-bāng-ê kóng, Góa khòaⁿ-kìⁿ thâu-chêng teh-cháu-ê chhin-chhiūⁿ Sat-tok ê kiáⁿ A-hi-má-su teh-cháu ê khoán. Ông kóng, I sī hó lâng, lâi pò hó siau-sit.

28A-hi-má-su對王叫講，平安lah；就tī王ê面前仆tī地裡拜，講，耶和華你ê上帝是應該tio̍h o-ló ê；因為伊已經將hiah-ê起手攻擊我ê主我ê王ê人交hō͘你。A-hi-má-su tùi ông kiò kóng, Pêng-an lah; chiū tī ông ê bīn-chêng phak tī tōe--nih pài, kóng, Iâ-hô-hoa lí ê Siōng-tè sī eng-kai tio̍h o-ló ê; in-ūi I í-keng chiong hiah ê khí-chhiú kong-kek góa ê chú góa ê ông ê lâng kau hō͘ lí.

29王講，少年人押沙龍平安á無？A-hi-má-su應講，約押差王ê奴僕，kap你ê奴僕，hit時我看見大喊hōa，m̄知是甚麼tāi-chì。Ông kóng, Siàu-liân lâng Ap-sa-liông pêng-an á-bô? A-hi-má-su ìn kóng, Iok-ap chhe ông ê lô͘-po̍k, kap lí ê lô͘-po̍k, hit-sî góa khòaⁿ-kìⁿ tōa hán-hōa, m̄-chai sī sím-mi̍h tāi-chì.

30王講，你行開，khiā tī邊á。伊就行開，khiā-teh。Ông kóng, Lí kiâⁿ-khui, khiā tī piⁿ-á. I chiū kiâⁿ-khui, khiā-teh.

31Kó͘-sī人也到；Kó͘-sī人講，有消息報hō͘我ê主我ê王；耶和華今á日對一切興起攻擊你ê人kā你報仇。Kó͘-sī lâng iā kàu; Kó͘-sī lâng kóng, Ū siau-sit pò hō͘ góa ê chú góa ê ông; Iâ-hô-hoa kin-á-ji̍t tùi it-chhè heng-khí kong-kek lí ê lâng kā lí pò-siû.

32王kā Kó͘-sī人講，少年人押沙龍平安無？Kó͘-sī人應講，願我ê主我ê王ê對敵，kap一切興起攻擊你，beh害你ê人，lóng親像hit-ê少年人一樣。Ông kā Kó͘-sī lâng kóng, Siàu-liân lâng Ap-sa-liông pêng-an bô? Kó͘-sī lâng ìn kóng, Goān góa ê chú góa ê ông ê tùi-te̍k, kap it-chhè heng-khí kong-kek lí, beh hāi lí ê lâng, lóng chhin-chhiūⁿ hit ê siàu-liân lâng chi̍t-iūⁿ.

33王就不止傷心，上城門頂ê樓啼哭，ná行ná講，我ê kiáⁿ押沙龍ah，我ê kiáⁿ，我ê kiáⁿ，押沙龍ah；我恨bōe替你死，押沙龍ah，我ê kiáⁿ，我ê kiáⁿ。Ông chiū put-chí siong-sim, chiūⁿ siâⁿ-mn̂g-téng ê lâu thî-khàu, ná-kiâⁿ ná-kóng, Góa ê kiáⁿ Ap-sa-liông ah, góa ê kiáⁿ, góa ê kiáⁿ, Ap-sa-liông ah; góa hūn bōe thòe lí sí, Ap-sa-liông ah, góa ê kiáⁿ, góa ê kiáⁿ.

1有人kā約押講，看ah，王為tio̍h押沙龍啼哭悲哀。Ū lâng kā Iok-ap kóng, Khòaⁿ ah, ông ūi-tio̍h Ap-sa-liông thî-khàu pi-ai.

2Hit日ê得勝變做眾百姓ê悲哀；因為hit日百姓聽見講，王為tio̍h伊ê kiáⁿ憂悶。Hit-ji̍t ê tek-sèng piàn-chòe chèng peh-sìⁿ ê pi-ai; in-ūi hit-ji̍t peh-sìⁿ thiaⁿ-kìⁿ kóng, Ông ūi-tio̍h i ê kiáⁿ iu-būn.

3Hit日百姓暗靜入城，親像tī陣裡逃走見笑ê百姓暗靜入來一樣。Hit-ji̍t peh-sìⁿ àm-chīⁿ ji̍p siâⁿ, chhin-chhiūⁿ tī tīn--nih tô-cháu kiàn-siàu ê peh-sìⁿ àm-chīⁿ ji̍p-lâi chi̍t-iūⁿ.

4王罩伊ê面，王大聲哮，講，我ê kiáⁿ押沙龍ah，押沙龍，我ê kiáⁿ，我ê kiáⁿ ah。Ông tà i ê bīn, ông tōa-siaⁿ háu, kóng, Góa ê kiáⁿ Ap-sa-liông ah, Ap-sa-liông, góa ê kiáⁿ, góa ê kiáⁿ ah.

5約押入厝去見王講，你今á日hō͘你一切ê奴僕無體面；in今á日救你ê性命，kap你ê kiáⁿ cha-bó͘-kiáⁿ ê性命，你hiah-ê bó͘ ê性命，你hiah-ê細姨ê性命；Iok-ap ji̍p chhù khì kìⁿ ông kóng, Lí kin-á-ji̍t hō͘ lí it-chhè ê lô͘-po̍k bô thé-biān; in kin-á-ji̍t kiù lí ê sìⁿ-miā, kap lí ê kiáⁿ cha-bó͘-kiáⁿ ê sìⁿ-miā, lí hiah ê bó͘ ê sìⁿ-miā, lí hiah ê sòe-î ê sìⁿ-miā;

6因為怨恨你ê，你疼伊；疼你ê，你怨恨伊。你今á日已經顯明你無要緊hiah-ê首領kap人臣；我今á日看出，若押沙龍活teh，阮今á日lóng死，你就歡喜。in-ūi oàn-hūn lí ê, lí thiàⁿ i, thiàⁿ lí ê, lí oàn-hūn i. Lí kin-á-ji̍t í-keng hián-bêng lí bô iàu-kín hiah ê siú-léng kap jîn-sîn; góa kin-á-ji̍t khòaⁿ-chhut, nā Ap-sa-liông oa̍h-teh, goán kin-á-ji̍t lóng sí, lí chiū hoaⁿ-hí.

7Taⁿ你tio̍h起來出去，安慰你ê奴僕ê心；我kí耶和華來chiù-chōa，你若無出去，今暝無一人kap你tī-teh；這災厄比你tùi少年到taⁿ所tú-tio̍h-ê khah慘。Taⁿ lí tio̍h khí-lâi chhut-khì, an-ùi lí ê lô͘-po̍k ê sim; góa kí Iâ-hô-hoa lâi chiù-chōa, lí nā bô chhut-khì, kim-mî bô chi̍t-lâng kap lí tī-teh; che chai-ē pí lí tùi siàu-liân kàu taⁿ só͘ tú-tio̍h-ê khah-chhám.

8王就起來，坐tī城門裡；有人kā眾百姓講，看ah，王坐tī城門裡；百姓就lóng到王ê面前。 以色列人已經逃走，ta̍k人tò去伊ê布棚。Ông chiū khí-lâi, chē tī siâⁿ-mn̂g--nih; ū lâng kā chèng peh-sìⁿ kóng, Khòaⁿ ah, ông chē tī siâⁿ-mn̂g--nih; peh-sìⁿ chiū lóng kàu ông ê bīn-chêng. Í-sek-lia̍t lâng í-keng tô-cháu, ta̍k-lâng tò-khì i ê pò͘-pîⁿ.

9以色列眾支派ê人紛紛議論，講，王bat救咱脫離對敵ê手，koh救咱脫離腓利士人ê手；taⁿ伊閃避押沙龍走tī外面。Í-sek-lia̍t chèng chi-phài ê lâng hun-hun gī-lūn, kóng, Ông bat kiù lán thoat-lī tùi-te̍k ê chhiú, koh kiù lán thoat-lī Hui-lī-sū lâng ê chhiú; taⁿ i siám-pī Ap-sa-liông cháu tī gōa-bīn.

10咱用油抹押沙龍治理咱，伊已經陣亡。Lín taⁿ啥事m̄出一句，請王tò來ah？Lán ēng iû boah Ap-sa-liông tī-lí lán, i í-keng tīn-bông. Lín taⁿ siáⁿ-sū m̄ chhut chi̍t-kù, chhiáⁿ ông tò-lâi ah?

11大衛王差人去見祭司Sat-tok kap A-pí-a-tha，講，Lín tio̍h kā猶大ê長老講，以色列眾人已經有話到tī王，請王tò來伊ê厝；lín請王tò來，啥事做人ê路尾ah？Tāi-pi̍t ông chhe lâng khì kìⁿ chè-si Sat-tok kap A-pí-a-tha, kóng, Lín tio̍h kā Iû-tāi ê tióng-ló kóng, Í-sek-lia̍t chèng-lâng í-keng ū ōe kàu tī ông, chhiáⁿ ông tò-lâi i ê chhù; lín chhiáⁿ ông tò-lâi, siáⁿ-sū chòe lâng ê lō͘-bé ah?

12Lín是我ê兄弟，是我ê骨肉；請王tò來啥事做人ê路尾ah？Lín sī góa ê hiaⁿ-tī, sī góa ê kut-jio̍k; chhiáⁿ ông tò-lâi siáⁿ-sū chòe lâng ê lô͘-bé ah?

13也kā A-má-sat講，你kiám m̄是我ê骨肉mah？我若無設立你替約押長長tī我ê面前做軍長，願上帝加倍責罰我。Iā kā A-má-sat kóng, Lí kiám m̄-sī góa ê kut-jio̍k mah? Góa nā bô siat-li̍p lí thòe Iok-ap tn̂g-tn̂g tī góa ê bīn-chêng chòe kun-tiúⁿ, goān Siōng-tè ka-pē chek-hoa̍t góa.

14Tùi án-ni，伊就感激猶大眾人ê心，親像一人ê心；in就差人去見王講，願你kap你ê眾人臣tò來。Tùi án-ni, i chiū kám-kek Iû-tāi chèng-lâng ê sim, chhin-chhiūⁿ chi̍t-lâng ê sim; in chiū chhe lâng khì kìⁿ ông kóng, Goān lí kap lí ê chèng jîn-sîn tò-lâi.

15王就tò來，到約旦；猶大人來到Kiat-kah，beh迎接王，chhōa王過約旦。Ông chiū tò-lâi, kàu Iok-tàn; Iû-tāi lâng lâi kàu Kiat-kah, beh ngiâ-chih ông, chhōa ông kè Iok-tàn.

16Pa-hō͘-lîm ê便雅憫人，Ki-la̍h ê kiáⁿ Sī-múi趕緊kap猶大人落來迎接大衛王。Pa-hō͘-lîm ê Piān-ngá-bín lâng, Ki-la̍h ê kiáⁿ Sī-múi kóaⁿ-kín kap Iû-tāi lâng lo̍h--lâi ngiâ-chih Tāi-pi̍t ông.

17kap伊來ê，有一千ê便雅憫人，也有掃羅家ê奴僕Sé-pa，kap伊十五個kiáⁿ，二十個奴僕，in lóng tī王ê面前過約旦。Kap i lâi ê, ū chi̍t-chheng ê Piān-ngá-bín lâng, iā ū Sò-lô ke ê lô͘-po̍k Sé-pa, kap i cha̍p-gō͘ ê kiáⁿ, jī-cha̍p ê lô͘-po̍k, in lóng tī ông ê bīn-chêng kè Iok-tàn.

18有渡船過去，載王ê家眷，chhut-chāi王用。王過約旦ê時，Ki-la̍h ê kiáⁿ Sī-múi就仆tī王ê面前；U tō͘-chûn kè--khì, chài ông ê ke-koàn, chhut-chāi ông ēng. Ông kè Iok-tàn ê sî, Ki-la̍h ê kiáⁿ Sī-múi chiū phak tī ông ê bīn-chêng;

19kā王講，我ê主我ê王出耶路撒冷ê日，你ê奴僕行悖逆ê事；taⁿ求我ê主莫得責罪我，莫得記得，王也莫得hē tī心裡。kā ông kóng, Góa ê chú góa ê ông chhut Iâ-lō͘-sat-léng ê ji̍t, lí ê lô͘-po̍k kiâⁿ pōe-ge̍k ê sū; taⁿ kiû góa ê chú bo̍h-tit chek-chōe góa, bo̍h-tit kì-tit, ông iā bo̍h-tit hē tī sim--nih.

20你ê奴僕明明知家己有罪，所以約瑟全家今á日我第一事先落來迎接我ê主我ê王。Lí ê lô͘-po̍k bêng-bêng chai ka-kī ū chōe, só͘-í Iok-sek choân-ke kin-á-ji̍t góa tē-it tāi-seng lo̍h-lâi ngiâ-chih góa ê chú góa ê ông.

21Sé-ló͘-ngá ê kiáⁿ A-pí-su講，Sī-múi bat咒詛耶和華所抹油ê，kiám m̄-tio̍h因為án-ni hō͘伊死mah？Sé-ló͘-ngá ê kiáⁿ A-pí-su kóng, Sī-múi bat chiù-chó͘ Iâ-hô-hoa só͘ boah-iû--ê, kiám m̄-tio̍h in-ūi án-ni hō͘ i sí mah?

22大衛講，Sé-ló͘-ngá ê kiáⁿ ah，我kap lín甚麼干涉，hō͘ lín今á日反對我ah？今á日以色列中kiám thang hō͘人死mah？我kiám m̄知我今á日做以色列王mah？Tāi-pi̍t kóng, Sé-ló͘-ngá ê kiáⁿ ah, góa kap lín sím-mi̍h kan-sia̍p, hō͘ lín kin-á-ji̍t hoán-tùi góa ah? kin-á-ji̍t Í-sek-lia̍t tiong kiám thang hō͘ lâng sí mah? góa kiám m̄-chai góa kin-á-ji̍t chòe Í-sek-lia̍t ông mah?

23Tùi án-ni，王kā Sī-múi講，你m̄免死；王就對伊chiù-chōa。Tùi án-ni ông kā Sī-múi kóng, Lí m̄-bián sí; ông chiū tùi i chiù-chōa.

24掃羅ê孫，Bí-hui-pho-siat也落去迎接王；伊tùi王去ê日到王平安tò來ê日，伊無修整腳，也無修整嘴鬚，也無洗衫。Sò-lô ê sun, Bí-hui-pho-siat iā lo̍h-khì ngiâ-chih ông; i tùi ông khì ê ji̍t kàu ông pêng-an tò-lâi ê ji̍t, i bô siu-chéng kha, iā bô siu-chéng chhùi-chhiu, iā bô sóe-saⁿ.

25伊tī耶路撒冷迎接王ê時，王kā伊講，Bí-hui-pho-siat，你啥事無kap我落去？I tī Iâ-lō͘-sat-léng ngiâ-chih ông ê sî, ông kā i kóng, Bí-hui-pho-siat, lí siáⁿ-sū bô kap góa lo̍h--khì?

26伊應講，我ê主我ê王ah，當時你ê奴僕想講，我beh備辦驢，騎伊kap王相kap去；因為你ê奴僕是跛腳；總是我ê奴僕騙我；I ìn kóng, Góa ê chú góa ê ông ah, tng-sî lí ê lô͘-po̍k siūⁿ kóng, góa beh pī-pān lû, khiâ i kap ông saⁿ-kap khì; in-ūi lí ê lô͘-po̍k sī pái-kha; chóng-sī góa ê lô͘-po̍k phiàn góa;

27koh tī我ê主我ê王ê面前譭謗你ê奴僕；獨獨我ê主我ê王親像上帝ê使者，照你所看做好ê行伊。koh tī góa ê chú góa ê ông ê bīn-chêng húi-pòng lí ê lô͘-po̍k; to̍k-to̍k góa ê chú góa ê ông chhin-chhiūⁿ Siōng-tè ê sù-chiá, chiàu lí só͘ khòaⁿ-chòe hó-ê kiâⁿ i.

28因為我ê祖全家，tī我ê主我ê王ê面前，lóng是tio̍h死ê人；總是你hō͘你ê奴僕kap你一桌ê人相kap食，我iáu有甚麼理由thang koh對王求叫ah？In-ūi góa ê chó͘ choân-ke, tī góa ê chú góa ê ông ê bīn-chêng, lóng sī tio̍h sí ê lâng; chóng-sī lí hō͘ lí ê lô͘-po̍k kap lí chi̍t-toh ê lâng saⁿ-kap chia̍h, góa iáu ū sím-mi̍h lí-iû thang koh tùi ông kiû-kiò ah?

29王對伊講，你啥事koh講你ê tāi-chì ah？我講，你kap Sé-pa tio̍h平分hiah-ê業產。Ông tùi i kóng, Lí siáⁿ-sū koh kóng lí ê tāi-chì ah? Góa kóng, Lí kap Sé-pa tio̍h pîⁿ-pun hiah ê gia̍p-sán.

30Bí-hui-pho-siat kā王講，我ê主我ê王已經平安tò來宮內，kù-chāi伊lóng the̍h去，也thang。Bí-hui-pho-siat kā ông kóng, Góa ê chú góa ê ông í-keng pêng-an tò-lâi kiong-lāi, kù-chāi i lóng the̍h--khì, iā thang.

31Ki-lia̍t人Pa-Se-lai5tui3 Lô-ki-lîm落來，beh送王過約旦，就kap王過約旦。Ki-lia̍t lâng Pa-se-lâi tùi Lô-ki-lîm lo̍h-lâi, beh sàng ông kè Iok-tàn, chiū kap ông kè Iok-tàn.

32Pa-Se-lâi真老，已經八十歲；王tòa tī Má-hap-liam7e5時，伊用食物供給王；因為伊是大好額人。Pa-se-lâi chin-lāu, í-keng poeh-cha̍p hè; ông tòa tī Má-hap-liām ê sî, i ēng chia̍h-mi̍h kiong-kip ông; in-ūi i sī tōa hó-gia̍h lâng.

33王kā Pa-Se-lâi講，你kap我過去，kap我tòa耶路撒冷，我beh供給你。Ông kā Pa-se-lâi kóng, Lí kap góa kè--khì, kap góa tòa Iâ-lō͘-sat-léng, góa beh kiong-kip lí.

34Pa-Se-lai5ka7王講，我ê性命iáu有kúi nî，幾日，hō͘我kap王相kap上耶路撒冷ah？Pa-se-lâi kā ông kóng, Góa ê sìⁿ-miā iáu ū kúi nî, kúi ji̍t, hō͘ góa kap ông saⁿ-kap chiūⁿ Iâ-lō͘-sat-léng ah?

35我現今已經八-十歲 lah，iáu ōe分別好pháiⁿ mah？你ê奴僕iáu ōe chhì lim食ê滋味mah？唱歌ê男女我會曉聽伊ê聲音mah？奴僕啥事拖累我ê主我ê王ah？Góa hiān-kim í-keng poeh-cha̍p hè lah, iáu ōe hun-piat hó-pháiⁿ mah? Lí ê lô͘-po̍k iáu ōe chhì lim-chia̍h ê chu-bī mah? chhiùⁿ-koa ê lâm-lú góa ōe hiáu thiaⁿ i ê siaⁿ-im mah? Lô͘-po̍k siáⁿ-sū thoa-lūi góa ê chú góa ê ông ah?

36你ê奴僕只有是beh kap王過約旦一站á；王啥事tio̍h用chit-ê報賞報賞我ah？Lí ê lô͘-po̍k chí-ū sī beh kap ông kè Iok-tàn chi̍t-chām-á; ông siáⁿ-sū tio̍h ēng chit ê pò-siúⁿ pò-siúⁿ góa ah?

37求你准你ê奴僕tò去，hō͘我thang死tī我ê本城，我ê父母ê墓hia。看ah，你ê奴僕Kim-hán tī-chia；hō͘伊kap我ê主我ê王過去；照你所看做好ê款待伊。Kiû lí chún lí ê lô͘-po̍k tò-khì, hō͘ góa thang sí tī góa ê pún siâⁿ, góa ê pē-bú ê bōng hia. Khòaⁿ ah, lí ê lô͘-po̍k Kim-hán tī-chia; hō͘ i kap góa ê chú góa ê ông kè-khì; chiàu lí só͘ khòaⁿ-chòe hó-ê khoán-thāi i.

38王講，Kim-hán thang kap我去；我beh照你所看做好ê來款待伊；你見有對我求ê，我beh kā你成。Ông kóng, Kim-hán thang kap góa khì; góa beh chiàu lí só͘ khòaⁿ-chòe hó-ê lâi khoán-thāi i; lí kìⁿ-ū tùi góa kiû--ê, góa beh kā lí chiâⁿ.

39Tùi án-ni，眾百姓過約旦，王也過去；王就kap Pa-Se-lai5chim嘴，kā伊祝福；伊就tò去伊本所在。Tùi án-ni chèng peh-sìⁿ kè Iok-tàn, ông iā kè--khì; ông chiū kap Pa-se-lâi chim-chhùi, kā i chiok-hok; i chiū tò-khì i pún só͘-chāi.

40Tùi án-ni，王過去，到Kiat-kah；Kim-hán也kap伊過去；猶大眾百姓，kap以色列百姓ê一半，也lóng送王過去。Tùi án-ni ông kè-khì, kàu Kiat-kah; Kim-hán iā kap i kè-khì; Iû-tāi chèng peh-sìⁿ, kap Í-sek-lia̍t peh-sìⁿ ê chi̍t-pòaⁿ, iā lóng sàng ông kè-khì.

41以色列眾人來見王，kā伊講，阮ê兄弟猶大人啥事偷你去，來chhōa王kap伊ê家眷，kap跟tè大衛ê人，lóng相kap 過約旦？Í-sek-lia̍t chèng-lâng lâi kìⁿ ông, kā i kóng, Goán ê hiaⁿ-tī Iû-tāi lâng siáⁿ-sū thau lí khì, lâi chhōa ông kap i ê ke-koàn, kap kun-tè Tāi-pi̍t ê lâng, lóng saⁿ-kap kè Iok-tàn?

42猶大眾人應以色列人，講，因為王kap阮是同宗，lín啥事因為chit-ê事受氣ah？阮bat食tio̍h王甚麼ah？王bat用甚麼送阮mah？Iû-tāi chèng-lâng ìn Í-sek-lia̍t lâng, kóng, In-ūi ông kap goán sī tâng-chong, lín siáⁿ-sū in-ūi chit ê sū siū-khì ah? Goán bat chia̍h-tio̍h ông sím-mi̍h ah? ông bat ēng sím-mi̍h sàng goán mah?

43以色列人應猶大人講，照支派，chit-ê王阮有十份，阮對tī大衛比lín khah有關係；lín啥事看輕阮，chhōa阮ê王tò來，無事先kap阮參詳ah？獨獨猶大人ê話，比以色列人ê話，khah硬。Í-sek-lia̍t lâng ìn Iû-tāi lâng kóng, Chiàu chi-phài, chit ê ông goán ū cha̍p-hūn, goán tùi-tī Tāi-pi̍t pí lín khah ū koan-hē; lín siáⁿ-sū khòaⁿ-khin goán, chhōa goán ê ông tò-lâi, bô tāi-seng kap goán chham-siông ah? To̍k-to̍k Iû-tāi lâng ê ōe, pí Í-sek-lia̍t lâng ê ōe, khah-ngī.