1掃羅死了，也大衛thâi死A-má-le̍k人tò來ê時，大衛tòa tī Sé-kek-la̍h兩日。Sò-lô sí-liáu, iā Tāi-pi̍t thâi-sí A-má-le̍k lâng tò-lâi ê sî, Tāi-pi̍t tòa tī Sé-kek-la̍h nn̄g-ji̍t.

2到第三日，看ah，有一人tùi營盤，tùi掃羅hia，來，衣裳拆裂，頭殼sám土粉，到大衛hia，就仆tī地裡拜伊。Kàu tē-saⁿ ji̍t, khòaⁿ ah, ū chi̍t-lâng tùi iâⁿ-pôaⁿ, tùi Sò-lô hia, lâi, i-chiûⁿ thiah-li̍h, thâu-khak sám thô͘-hún, kàu Tāi-pi̍t hia, chiū phak tī tōe--nih pài i.

3大衛問伊講，你tùi toh落來？伊應講，我tùi以色列ê軍營走來。Tāi-pi̍t mn̄g i kóng, Lí tùi toh-lo̍h lâi? I ìn kóng, Góa tùi Í-sek-lia̍t ê kun-iâⁿ cháu-lâi.

4大衛koh問伊，講，Tāi-chì怎樣？請你kā我講。伊應講，百姓tùi戰陣逃走，百姓chōe-chōe倒teh死去；掃羅kap伊ê kiáⁿ約拿單也死。Tāi-pi̍t koh mn̄g i, kóng, Tāi-chì cháiⁿ-iūⁿ? chhiáⁿ lí kā góa kóng. I ìn kóng, Peh-sìⁿ tùi chiàn-tīn tô-cháu, peh-sìⁿ chōe-chōe tó-teh sí--khì; Sò-lô kap i ê kiáⁿ Iok-ná-tan iā sí.

5大衛kā對伊講ê少年人講，你怎樣知掃羅kap伊ê kiáⁿ約拿單死ah？Tāi-pi̍t kā tùi i kóng ê siàu-liân lâng kóng, Lí cháiⁿ-iūⁿ chai Sò-lô kap i ê kiáⁿ Iok-ná-tan sí ah?

6kā伊講ê少年人講，我偶然到Ki-lī-pho山，看見掃羅óa tī伊ê鎗，有戰車馬兵jip-óa伊。Kā i kóng ê siàu-liân lâng kóng, Góa ngó͘-jiân kàu Ki-lī-pho soaⁿ, khòaⁿ-kìⁿ Sò-lô òa(**óa) tī i ê chhiuⁿ, ū chiàn-chhia bé-peng jip-óa i.

7伊oa̍t頭看我，就叫我；我應講，我tī-chia。I oa̍t-thâu khòaⁿ góa, chiū kiò góa; góa ìn kóng, Góa tī-chia.

8伊問我講，你是甚麼人？我應講，我是A-má-le̍k人。I mn̄g góa kóng, Lí sī sím-mi̍h lâng? Góa ìn kóng, Góa sī A-má-le̍k lâng.

9伊koh kā我講，請你近óa我來thâi死我，因為我真痛苦，我ê性命iáu好好。I koh kā góa kóng, Chhiáⁿ lí kūn-óa góa lâi thâi-sí góa, in-ūi góa chin thòng-khó͘, góa ê sìⁿ-miā iáu hó-hó.

10我就近óa伊，來thâi死伊，因為我知伊倒落去了，的確bōe活；我就the̍h伊頭殼裡ê冕旒，kap伊ê手環，帶到我ê主chia。Góa chiū kūn-óa i, lâi thâi-sí i, in-ūi góa chai i tó--lo̍h-khì liáu, tek-khak bōe oa̍h; góa chiū the̍h i thâu-khak--nih ê bián-liû, kap i ê chhiú-khoân, tòa kàu góa ê chú chia.

11大衛就拆裂衫，跟tè伊ê人也是án-ni。Tāi-pi̍t chiū thiah-li̍h saⁿ, kun-tè i ê lâng iā sī án-ni.

12為tio̍h掃羅kap伊ê kiáⁿ約拿單kap耶和華ê百姓，kap以色列家，悲哀啼哭禁食到日暗，因為in倒tī刀下。Ūi-tio̍h Sò-lô kap i ê kiáⁿ Iok-ná-tan kap Iâ-hô-hoa ê peh-sìⁿ, kap Í-sek-lia̍t ke, pi-ai thî-khàu kìm-chia̍h kàu ji̍t-àm, in-ūi in tó tī to-ē.

13大衛kā對伊講ê少年人講，你tùi toh落來？應講，我是出外人ê kiáⁿ，A-má-le̍k人。Tāi-pi̍t kā tùi i kóng ê siàu-liân lâng kóng, Lí tùi toh-lo̍h lâi? Ìn kóng, Góa sī chhut-gōa lâng ê kiáⁿ, A-má-le̍k lâng.

14大衛對伊講，你伸手thâi死耶和華所抹油ê，怎樣無驚ah？Tāi-pi̍t tùi i kóng, Lí chhun-chhiú thâi-sí Iâ-hô-hoa só͘ boah-iû-ê, cháiⁿ-iūⁿ bô kiaⁿ ah?

15大衛叫一個少年人，講，你近óa去thâi死伊。伊就去phah hō͘伊死。Tāi-pi̍t kiò chi̍t ê siàu-liân lâng, kóng, Lí kūn-óa khì thâi-sí i. I chiū khì phah hō͘ i sí.

16大衛kā伊講，你ê血歸tī你ê頭殼，因為你ê嘴家己干證你講，我thâi死耶和華所抹油ê。Tāi-pi̍t kā i kóng, Lí ê huih kui tī lí ê thâu-khak, in-ūi lí ê chhùi ka-kī kan-chèng lí kóng, Góa thâi-sí Iâ-hô-hoa só͘ boah-iû-ê.

17大衛做哀歌，追悼掃羅kap伊ê kiáⁿ約拿單。Tāi-pi̍t chòe ai-ko, tui-tō Sò-lô kap i ê kiáⁿ Iok-ná-tan.

18Koh講，將chit-ê 哀歌教示猶大人；chit-ê哀歌名叫弓歌，寫tī Ngá-soah-jíⁿ ê冊。歌講，Koh kóng, Chiong chit ê ai-ko kà-sī Iû-tāi lâng; chit ê ai-ko miâ kiò Keng-ko, siá tī Ngá-soah-jíⁿ ê chheh. Koa kóng,

19以色列ah，你ê榮顯ê受thâi tī山頭； 害ah，英雄ê死到án-ni ah！Í-sek-lia̍t ah, lí ê êng-hián--ê siū thâi tī soaⁿ-thâu; Hāi ah, eng-hiông-ê sí kàu án-ni ah!

20莫得tī Ka-te̍k報告， 莫得tī A-si̍t-ki-lûn ê街路報揚， 驚了腓利士ê cha-bó͘-gín-ná歡喜。 驚了無受割禮ê人ê cha-bó͘-gín-ná大悅。Bo̍h-tit tī Ka-te̍k pò-kò, Bo̍h-tit tī A-si̍t-ki-lûn ê ke-lō͘ pò-iông, Kiaⁿ-liáu Hui-lī-sū ê cha-bó͘-gín-ná hoaⁿ-hí. Kiaⁿ-liáu bô siū kat-lé ê lâng ê cha-bó͘-gín-ná tāi-ia̍t.

21Ki-lī-pho山ah， 願無露水，無雨，tī你hia，也無出禮物ê田； 因為tī-hia勇士ê藤牌受hiat-ka̍k， 掃羅ê藤牌，親像無受抹油ê。Ki-lī-pho soaⁿ ah, Goān bô lō͘-chúi, bô hō͘, tī lí hia, iā bô chhut lé-mi̍h ê chhân; In-ūi tī-hia ióng-sū ê tîn-pâi siū hiat-ka̍k, Sò-lô ê tîn-pâi, chhin-chhiūⁿ bô siū boah-iû ê.

22Tùi受thâi-ê ê血，tùi勇士ê油， 約拿單ê弓無倒退， 掃羅ê刀無空空倒tńg。Tùi siū-thâi-ê ê huih, tùi ióng-sū ê iû, Iok-ná-tan ê keng bô tò-thè, Sò-lô ê to bô khang-khang tò-tńg.

23掃羅kap約拿單活ê時thang疼，thang歡喜ê； 死ê時也無分離； In比鷹鳥khah緊， 比獅khah強。Sò-lô kap Iok-ná-tan oa̍h ê sî thang thiàⁿ, thang hoaⁿ-hí ê; Sí ê sî iā bô pun-lī; In pí eng-chiáu khah-kín, Pí sai khah-kiông.

24以色列ê cha-bó͘-kiáⁿ ah，tio̍h為tio̍h掃羅啼哭， 伊bat hō͘ lín穿朱紅色來歡喜； Hō͘ lín ê衣服有黃金ê裝飾。Í-sek-lia̍t ê cha-bó͘-kiáⁿ ah, tio̍h ūi-tio̍h Sò-lô thî-khàu, I bat hō͘ lín chhēng chu-âng-sek lâi hoaⁿ-hí; Hō͘ lín ê i-ho̍k ū n̂g-kim ê chng-thāⁿ.

25勇士怎樣倒tī戰陣！ 約拿單受thâi tī你ê山頭。Ióng-sū cháiⁿ-iūⁿ tó tī chiàn-tīn! Iok-ná-tan siū-thâi tī lí ê soaⁿ-thâu.

26我ê兄約拿單ah，我為你傷心； 我盡在歡喜你； 你ê疼我真奇妙， 贏過婦人人ê疼。Góa ê hiaⁿ Iok-ná-tan ah, góa ūi lí siong-sim; Góa chīn-chāi hoaⁿ-hí lí; Lí ê thiàⁿ góa chin kî-biāu, Iâⁿ-kè hū-jîn-lâng ê thiàⁿ.

27勇士死到án-ni， 戰器毀滅到án-ni！Ióng-sū sí kàu án-ni, Chiàn-khì húi-bia̍t kàu án-ni!

1後來大衛問耶和華講，我上去猶大一個城thang mah？耶和華kā伊講，Thang上去。大衛講，我tio̍h上去toh落？伊講，到Hi-pek-lûn。Āu-lâi Tāi-pi̍t mn̄g Iâ-hô-hoa kóng, Góa chiūⁿ-khì Iû-tāi chi̍t ê siâⁿ thang mah? Iâ-hô-hoa kā i kóng, Thang chiūⁿ khì. Tāi-pi̍t kóng, Góa tio̍h chiūⁿ-khì toh-lo̍h? I kóng, Kàu Hi-pek-lûn.

2大衛就kap伊兩個bó͘，就是Iâ-su-lia̍t人A-hi-loán，kap Ka-bi̍t人bat做Ná-pat ê bó͘，名A-pí-kai，lóng上去hia。Tāi-pi̍t chiū kap i nn̄g ê bó͘, chiū-sī Iâ-su-lia̍t lâng A-hi-loán, kap Ka-bi̍t lâng bat chòe Ná-pat ê bó͘, miâ A-pí-kai, lóng chiūⁿ-khì hia.

3大衛也hō͘跟tè伊ê人，kap in ta̍k人ê家眷，lóng上去；in就tiàm tī Hi-pek-lûn hiah-ê城。Tāi-pi̍t iā hō͘ kun-tè i ê lâng, kap in ta̍k-lâng ê ke-koàn, lóng chiūⁿ-khì; in chiū tiàm tī Hi-pek-lûn hiah ê siâⁿ.

4猶大人到，tī-hia用油抹大衛做猶大家ê王。 有人kā大衛講，埋葬掃羅ê是Ki-lia̍t Ngá-pí ê人。Iû-tāi lâng kàu, tī-hia ēng iû boah Tāi-pi̍t chòe Iû-tāi ke ê ông. Ū lâng kā Tāi-pi̍t kóng, Bâi-chòng Sò-lô--ê sī Ki-lia̍t Ngá-pí ê lâng.

5大衛就差使者去見Ki-lia̍t Ngá-pí ê人，kā in講，願耶和華賜福lín，因為lín用chit-ê仁慈款待你ê主掃羅，kā伊埋葬。Tāi-pi̍t chiū chhe sù-chiá khì kìⁿ Ki-lia̍t Ngá-pí ê lâng, kā in kóng, Goān Iâ-hô-hoa sù-ho̍k lín, in-ūi lín ēng chit ê jîn-chû khoán-thāi lí ê chú Sò-lô, kā i bâi-chòng.

6願耶和華用仁慈誠實款待lín；我也beh答lín chit-ê仁慈，因為lín有行chit-ê事。Goān Iâ-hô-hoa ēng jîn-chû sêng-si̍t khoán-thāi lín; góa iā beh tap lín chit ê jîn-chû, in-ūi lín ū kiâⁿ chit ê sū.

7Lín ê手tio̍h giám硬，lín tio̍h勇敢，因為lín ê主掃羅已經死，猶大族也有用油抹我做in ê王。Lín ê chhiú tio̍h giám-ngī, lín tio̍h ióng-kám, in-ūi lín ê chú Sò-lô í-keng sí, Iû-tāi cho̍k iā ū ēng iû boah góa chòe in ê ông.

8掃羅ê軍長Nî-jíⁿ ê kiáⁿ Ap-nî-jíⁿ bat將掃羅ê kiáⁿ I-si-pho-siat帶伊過去Má-hap-liām，Sò-lô ê kun-tiúⁿ Nî-jíⁿ ê kiáⁿ Ap-nî-jíⁿ bat chiong Sò-lô ê kiáⁿ I-si-pho-siat tòa i kè--khì Má-hap-liām,

9設立伊做王治理Ki-lia̍t、A-su-lī、Iâ-su-lia̍t、Í-hoat-liân、便雅憫，kap以色列ê眾人。siat-li̍p i chòe-ông tī-lí Ki-lia̍t, A-su-lī, Iâ-su-lia̍t, Í-hoat-liân, Piān-ngá-bín, kap Í-sek-lia̍t ê chèng-lâng.

10掃羅ê kiáⁿ I-si-pho-siat起頭做以色列王，hit時四十歲；坐位兩年。獨獨猶大族tè大衛。Sò-lô ê kiáⁿ I-si-pho-siat khí-thâu chòe Í-sek-lia̍t ông, hit-sî sì-cha̍p hè; chē-ūi nn̄g-nî. To̍k-to̍k Iû-tāi cho̍k tè Tāi-pi̍t.

11大衛tī Hi-pek-lûn做猶大族ê王，歷過七年koh六月日。Tāi-pi̍t tī Hi-pek-lûn chòe Iû-tāi cho̍k ê ông, le̍k-kè chhit-nî koh la̍k-ge̍h-ji̍t.

12Nî-jíⁿ ê kiáⁿ Ap-nî-jíⁿ，kap掃羅ê kiáⁿ I-si-pho-siat ê人臣，tùi Má-hap-liām出來去Ki-piàn。Nî-jíⁿ ê kiáⁿ Ap-nî-jíⁿ, kap Sò-lô ê kiáⁿ I-si-pho-siat ê jîn-sîn, tùi Má-hap-liām chhut-lâi khì Ki-piàn.

13Sé-ló͘-ngá ê kiáⁿ約押kap大衛ê人臣，也出來，tī Ki-piàn ê池邊相tú-tio̍h；in就坐teh，一隊坐tī池ê chit-pêng，一隊坐tī池ê hit-pêng。Sé-ló͘-ngá ê kiáⁿ Iok-ap kap Tāi-pi̍t ê jîn-sîn, iā chhut-lâi, tī Ki-piàn ê tî-piⁿ saⁿ tú-tio̍h; in chiū chē--teh, chi̍t-tūi chē tī tî ê chit-pêng, chi̍t-tūi chē tī tî ê hit-pêng.

14Ap-nî-jíⁿ對約押講，請你hō͘少年人起來，tī咱ê面前kún笑。約押講，Thang hō͘伊起來。Ap-nî-jíⁿ tùi Iok-ap kóng, Chhiáⁿ lí hō͘ siàu-liân lâng khí-lâi, tī lán ê bīn-chêng kún-chhiò. Iok-ap kóng, Thang hō͘ i khí-lâi.

15In就起來照數額過去；屬掃羅ê kiáⁿ I-si-pho-siat ê便雅憫人十二名，大衛ê人臣也有十二名。In chiū khí-lâi chiàu siàu-gia̍h kè-khì; sio̍k Sò-lô ê kiáⁿ I-si-pho-siat ê Piān-ngá-bín lâng cha̍p-jī miâ, Tāi-pi̍t ê jîn-sîn iā ū cha̍p-jī miâ.

16Ta̍k-ê khiú伊ê對面hit人ê頭殼，用刀鑿伊對面hit人ê hia̍p，做一下倒落去死；所以hit所在叫做Hi-lī-kah-hap-sò͘-lîm，就是tī Ki-piàn。Ta̍k-ê khiú i ê tùi-bīn hit-lâng ê thâu-khak, ēng to chha̍k i tùi-bīn hit-lâng ê hia̍p, chòe chi̍t-ē tó--lo̍h-khì sí; só͘-í hit só͘-chāi kiò-chòe Hi-lī-kah-hap-sò͘-lîm, chiū-sī tī Ki-piàn.

17Hit日ê交戰真雄；Ap-nî-jíⁿ kap以色列人khah輸tī大衛ê兵ê面前。Hit-ji̍t ê kau-chiàn chin-hiông; Ap-nî-jíⁿ kap Í-sek-lia̍t lâng khah-su tī Tāi-pi̍t ê peng ê bīn-chêng.

18Tī-hia有Sé-ló͘-ngá三個kiáⁿ，約押、A-pí-su、A-sat-hek；A-sat-hek ê腳gâu走，親像野鹿一般。Tī-hia ū Sé-ló͘-ngá saⁿ ê kiáⁿ, Iok-ap, A-pí-su, A-sat-hek; A-sat-hek ê kha gâu cháu, chhin-chhiūⁿ iá-lo̍k chi̍t-poaⁿ.

19A-sat-hek追jip Ap-nî-jíⁿ；無偏左右，直直jip Ap-nî-jíⁿ。A-sat-hek tui-jip Ap-nî-jíⁿ; bô phian chó-iū, ti̍t-ti̍t jip Ap-nî-jíⁿ.

20Ap-nî-jíⁿ oa̍t頭看講，A-sat-hek ah，是你á m̄是？應講，是我。Ap-nî-jíⁿ oa̍t-thâu khòaⁿ kóng, A-sat-hek ah, sī lí á m̄-sī? Ìn kóng, Sī góa.

21Ap-nî-jíⁿ kā伊講，你tio̍h oa̍t-tńg chiàⁿ-pêng，á是tò-pêng，掠一個少年人，為你本身剝(pak)伊ê戰衫；總是A-sat-hek直直追伊，m̄肯oa̍t-tńg。Ap-nî-jíⁿ kā i kóng, Lí tio̍h oa̍t-tńg chiàⁿ-pêng, á-sī tò-pêng, lia̍h chi̍t ê siàu-liân lâng, ūi lí pún-sin pak i ê chiàn-saⁿ; chóng-sī A-sat-hek ti̍t-ti̍t tui i, m̄-khéng oa̍t-tńg.

22Ap-nî-jíⁿ koh kā A-sat-hek講，你oa̍t-tńg莫得追jip我；我啥事tio̍h phah你倒地？若án-ni，我有甚麼面目thang去見你ê兄約押。Ap-nî-jíⁿ koh kā A-sat-hek kóng, Lí oa̍t-tńg bo̍h--tit tui-jip góa; góa siáⁿ-sū tio̍h phah lí tó-tōe? nā án-ni, góa ū sím-mi̍h bīn-ba̍k thang khì kìⁿ lí ê hiaⁿ Iok-ap.

23伊猶原m̄肯oa̍t-tńg；Ap-nî-jíⁿ chiah用鎗柄後ê刀鑿入伊ê腹肚；鎗就thàng過伊ê ka-chiah後，伊就倒tī-hia死；見若來到A-sat-hek倒teh死ê所在，就lóng停腳。I iû-goân m̄-khéng oa̍t-tńg; Ap-nî-jíⁿ chiah ēng chhiuⁿ-pìⁿ-āu ê to chha̍k-ji̍p i ê pak-tó͘; chhiuⁿ chiū thàng-kè i ê ka-chiah-āu, i chiū tó tī-hia sí; kìⁿ-nā lâi kàu A-sat-hek tó-teh sí ê só͘-chāi, chiū lóng thêng-kha.

24約押kap A-pí-su追jip Ap-nî-jíⁿ；in到Ki-a相對面ê A-má山，tī Ki-piàn曠野ê路，日就落。Iok-ap kap A-pí-su tui-jip Ap-nî-jíⁿ; in kàu Ki-a saⁿ tùi-bīn ê A-má soaⁿ, tī Ki-piàn khòng-iá ê lō͘, ji̍t chiū lo̍h.

25便雅憫人聚集tè Ap-nî-jíⁿ做一陣，khiā tī山頂。Piān-ngá-bín lâng chū-chi̍p tè Ap-nî-jíⁿ chòe chi̍t-tīn, khiā tī soaⁿ-téng.

26Ap-nî-jíⁿ叫約押講，刀劍thâi人永無soah mah？你kiám m̄知到尾有艱苦mah？你beh到甚麼時hō͘百姓tò去，無jip in ê兄弟ah？Ap-nî-jíⁿ kiò Iok-ap kóng, To-kiàm thâi lâng éng bô soah mah? Lí kiám m̄-chai kàu-bé ū kan-khó͘ mah? lí beh kàu sím-mi̍h sî hō͘ peh-sìⁿ tò-khì, bô jip in ê hiaⁿ-tī ah?

27約押講，我kí永活ê上帝來chiù-chōa，若m̄是你講，早起百姓就tò去，無jip伊ê兄弟。Iok-ap kóng, Góa kí éng-oa̍h ê Siōng-tè lâi chiù-chōa, nā m̄-sī lí kóng, chá-khí peh-sìⁿ chiū tò-khì, bô jip i ê hiaⁿ-tī.

28Tùi án-ni，約押pûn哨角，眾百姓就khiā-teh，無koh追jip以色列人，也無koh交戰。Tùi án-ni, Iok-ap pûn sàu-kak, chèng peh-sìⁿ chiū khiā-teh, bô koh tui-jip Í-sek-lia̍t lâng, iā bô koh kau-chiàn.

29Ap-nî-jíⁿ kap tè伊ê人thong暝行，經過A-la̍h-pa，過約旦，tùi Pit-lûn 過去到Má-hap-liām。Ap-nî-jíⁿ kap tè i ê lâng thong-mî kiâⁿ, keng-kè A-la̍h-pa, kè Iok-tàn, tùi Pit-lûn kè-khì kàu Má-hap-liām.

30約押無koh jip Ap-nî-jíⁿ，就tò來，聚集眾百姓；大衛ê兵減十九人，kap A-sat-hek。Iok-ap bô koh jip Ap-nî-jíⁿ, chiū tò-lâi, chū-chi̍p chèng peh-sìⁿ; Tāi-pi̍t ê pêng kiám cha̍p-káu lâng, kap A-sat-hek.

31總是大衛ê兵phah死便雅憫人，kap tè Ap-nî-jíⁿ ê人，共三百六十人。Chóng-sī Tāi-pi̍t ê peng phah-sí Piān-ngá-bín lâng, kap tè Ap-nî-jíⁿ ê lâng, kiōng saⁿ-pah la̍k-cha̍p lâng.

32In扛A-sat-hek去伯利恆，埋葬tī in老父ê墓。約押kap tè伊ê人thong暝行，到Hi-pek-lûn ê時，天tú-á光。In kng A-sat-hek khì Pek-lī-hêng, bâi-chòng tī in lāu-pē ê bōng. Iok-ap kap tè i ê lâng thong-mî kiâⁿ, kàu Hi-pek-lûn ê sî, thiⁿ tú-á kng.

1掃羅ê家kap大衛ê家交戰久久；大衛ná強盛，掃羅ê家ná衰弱。Sò-lô ê ke kap Tāi-pi̍t ê ke kau-chiàn kú-kú; Tāi-pi̍t ná kiông-sēng, Sò-lô ê ke ná soe-jio̍k.

2大衛tī Hi-pek-lûn生kúi-nā ê kiáⁿ；大kiáⁿ Àm-lùn，是Iâ-su-lia̍t人A-hi-loán所生ê；Tāi-pi̍t tī Hi-pek-lûn siⁿ kui-nā ê kiáⁿ; toa-kiáⁿ Àm-lùn, sī Iâ-su-lia̍t lâng A-hi-loán só͘ siⁿ ê;

3第二個Ki-lī-ap，是bat做Ka-bi̍t人Ná-pat ê bó͘ A-pí-kai所生ê；第三個，押沙龍，是Ki-su̍t王Ta̍t-mái ê cha-bó͘-kiáⁿ Má-ka ê kiáⁿ；tē-jī-ê Ki-lī-ap, sī bat chòe Ka-bi̍t lâng Ná-pat ê bó͘ A-pí-kai só͘ siⁿ ê; tē-saⁿ-ê, Ap-sa-liông, sī Ki-su̍t ông Ta̍t-mái ê cha-bó͘-kiáⁿ Má-ka ê kiáⁿ;

4第四個，A-to-nî-ngá，是Hap-ki̍p ê kiáⁿ；第五個，Sī-hoat-thê-ngá，是A-pí-tha ê kiáⁿ；tē-sì-ê, A-to-nî-ngá, sī Hap-ki̍p ê kiáⁿ; tē-gō͘-ê, Sī-hoat-thê-ngá, sī A-pí-tha ê kiáⁿ;

5第六個，Í-te̍k-liām，是大衛ê bó͘ Í-kek-la̍h所生ê；chiah-ê是大衛tī Hi-pek-lûn所生ê。tē-la̍k-ê, Í-te̍k-liām, sī Tāi-pi̍t ê bó͘ Í-kek-la̍h só͘ siⁿ ê; chiah-ê sī Tāi-pi̍t tī Hi-pek-lûn só͘ siⁿ ê.

6掃羅ê家kap大衛ê家交戰ê時，Ap-nî-jíⁿ tī掃羅ê家家己強。Sò-lô ê ke kap Tāi-pi̍t ê ke kau-chiàn ê sî, Ap-nî-jíⁿ tī Sò-lô ê ke ka-kī kiông.

7掃羅有一個妃，名叫Lī-su-pa，是Ài-a ê cha-bó͘-kiáⁿ。I-si-pho-siat對Ap-nî-jíⁿ講，你啥事kap我老父ê妃同房ah？Sò-lô ū chi̍t ê hui, miâ kiò Lī-su-pa, sī Ài-a ê cha-bó͘-kiáⁿ. I-si-pho-siat tùi Ap-nî-jíⁿ kóng, Lí siáⁿ-sū kap góa lāu-pē ê hui tâng-pâng ah?

8Ap-nî-jíⁿ因為I-si-pho-siat ê話，就真受氣，講，我kiám是猶大ê狗頭mah？我好款待你ê老父掃羅ê家，kap伊ê兄弟朋友，無將你交tī大衛ê手，你今á日竟然因為chit-ê婦人人責備我mah？Ap-nî-jíⁿ in-ūi I-si-pho-siat ê ōe, chiū chin siū-khì, kóng, Góa kiám-sī Iû-tāi ê káu-thâu mah? góa hó khoán-thāi lí ê lāu-pē Sò-lô ê ke, kap i ê hiaⁿ-tī pêng-iú, bô chiong lí kau tī Tāi-pi̍t ê chhiú, lí kin-á-ji̍t kéng-jiân in-ūi chit ê hū-jîn-lâng chek-pī góa mah?

9我若無照耶和華所對大衛chiù-chōa-ê來行tī伊，就願上帝加倍責罰。Góa nā bô chiàu Iâ-hô-hoa só͘ tùi Tāi-pi̍t chiù-chōa-ê lâi kiâⁿ tī i, chiū goān Siōng-tè ka-pē chek-hoa̍t.

10Ap-nî-jíⁿ，beh tùi掃羅ê家移徙國位，來建立大衛ê位，hō͘伊治理以色列kap猶大，tùi Tàn到別是巴。Ap-nî-jíⁿ, beh tùi Sò-lô ê ke î-sóa kok-ūi, lâi kiàn-li̍p Tāi-pi̍t ê ūi, hō͘ i tī-lí Í-sek-lia̍t kap Iû-tāi, tùi Tàn kàu Pia̍t-sī-pa.

11I-si-pho-siat，因為驚Ap-nî-jíⁿ，bōe應一句話。I-si-pho-siat, in-ūi kiaⁿ Ap-nî-jíⁿ, bōe ìn chi̍t-kù-ōe.

12Ap-nî-jíⁿ為tio̍h本身差使者去見大衛講，chit-ê地方屬是誰 ah？Koh講，你kap我立約，我ê手beh幫贊你，hō͘以色列lóng歸你。Ap-nî-jíⁿ ūi-tio̍h pún-sin chhe sù-chiá khì kìⁿ Tāi-pi̍t kóng, Chit ê tōe-hng sio̍k chī-chūi ah? Koh kóng, Lí kap góa li̍p-iok, góa ê chhiú beh pang-chān lí, hō͘ Í-sek-lia̍t lóng kui lí.

13大衛講，好，我kap你立約；總是我beh對你討一項，就是你來見我ê面hit時，若無將掃羅ê cha-bó͘-kiáⁿ Bí-kah chhōa來，的確bōe見我ê面。Tāi-pi̍t kóng, Hó, góa kap lí li̍p-iok; chóng-sī góa beh tùi lí thó chi̍t-hāng, chiū-sī lí lâi kìⁿ góa ê bīn hit-sî, nā bô chiong Sò-lô ê cha-bó͘-kiáⁿ Bí-kah chhōa-lâi, tek-khak bōe kìⁿ góa ê bīn.

14大衛就差使者去見掃羅ê kiáⁿ I-si-pho-siat，講，你tio̍h將我ê bó͘ Bí-kah還我，伊就是我bat用腓利士人一百陽物ê皮所聘定ê。Tāi-pi̍t chiū chhe sù-chiá khì kìⁿ Sò-lô ê kiáⁿ I-si-pho-siat, kóng, Lí tio̍h chiong góa ê bó͘ Bí-kah hêng góa, i chiū-sī góa bat ēng Hui-lī-sū lâng chi̍t-pah iông-bu̍t ê phê só͘ phèng-tiāⁿ ê.

15I-si-pho-siat就差人對伊ê丈夫La̍h-ek ê kiáⁿ Phàⁿ-thiat hia，帶伊來。I-si-pho-siat chiū chhe lâng tùi i ê tiōng-hu La̍h-ek ê kiáⁿ Phàⁿ-thiat hia, tòa i lâi.

16伊ê丈夫tè伊ê後面，ná行ná哮，kap伊到Pa-hō͘-lîm。Ap-nî-jíⁿ kā伊講，tò去ah。伊就tò去。I ê tiōng-hu tè i ê āu-bīn, ná-kiâⁿ ná-háu, kap i kàu Pa-hō͘-lîm. Ap-nî-jíⁿ kā i kóng, Tò--khì ah. I chiū tò--khì.

17Ap-nî-jíⁿ kap以色列ê長老參詳，講，Lín前欣慕大衛做王治理lín；taⁿ tio̍h行伊；Ap-nî-jíⁿ kap Í-sek-lia̍t ê tióng-ló chham-siông, kóng, Lín chêng him-bō͘ Tāi-pi̍t chòe ông tī-lí lín; taⁿ tio̍h kiâⁿ i;

18因為耶和華bat論到大衛講，我beh用我ê奴僕大衛ê手救我ê百姓以色列脫離腓利士人ê手，kap眾對敵ê手。in-ūi Iâ-hô-hoa bat lūn-kàu Tāi-pi̍t kóng, Góa beh ēng Góa ê lô͘-po̍k Tāi-pi̍t ê chhiú kiù Góa ê peh-sìⁿ Í-sek-lia̍t thoat-lī Hui-lī-sū lâng ê chhiú, kap chèng tùi-tek ê chhiú.

19Ap-nî-jíⁿ也講hō͘便雅憫人聽；koh到Hi-pek-lûn，將以色列人，kap便雅憫全家，一切所看做好ê，講hō͘大衛聽。Ap-nî-jíⁿ iā kóng hō͘ Piān-ngá-bín lâng thiaⁿ; koh kàu Hi-pek-lûn, chiong Í-sek-lia̍t lâng, kap Piān-ngá-bín choân-ke, it-chhè só͘ khòaⁿ-chòe hó ê, kóng hō͘ Tāi-pi̍t thiaⁿ.

20Ap-nî-jíⁿ kap二十人到Hi-pek-lûn見大衛。大衛為tio̍h Ap-nî-jíⁿ，以及kap伊來ê人，設筵席。Ap-nî-jíⁿ kap jī-cha̍p lâng kàu Hi-pek-lûn kìⁿ Tāi-pi̍t. Tāi-pi̍t ūi-tio̍h Ap-nî-jíⁿ, í-ki̍p kap i lâi ê lâng, siat iân-sia̍h.

21Ap-nî-jíⁿ kā大衛講，我beh起來，去招集以色列眾人來見我ê主我ê王，hō͘ in thang kap你立約，你就thang做王，照心所ài來管理。大衛就送Ap-nî-jíⁿ去；伊就平安去。Ap-nî-jíⁿ kā Tāi-pi̍t kóng, Góa beh khí--lâi, khì chio-chi̍p Í-sek-lia̍t chèng-lâng lâi kìⁿ góa ê chú góa ê ông, hō͘ in thang kap lí li̍p-iok, lí chiū thang chòe-ông, chiàu sim só͘ ài lâi koán-lí. Tāi-pi̍t chiū sàng Ap-nî-jíⁿ khì; i chiū pêng-an khì.

22大衛ê兵kap約押出軍tò來，帶chōe-chōe搶ê物來；hit時Ap-nî-jíⁿ無tī Hi-pek-lûn大衛hia，因為大衛已經送伊去，伊也平安去。Tāi-pi̍t ê peng kap Iok-ap chhut-kun tò--lâi, tòa chōe-chōe chhiúⁿ ê mi̍h lâi; hit-sî Ap-nî-jíⁿ bô tī Hi-pek-lûn Tāi-pi̍t hia, in-ūi Tāi-pi̍t í-keng sàng i khì, i iā pêng-an khì.

23約押kap tè伊ê全軍已經到，有人通知約押講，Nî-jíⁿ ê kiáⁿ Ap-nî-jíⁿ來見王，王送伊去，伊也平安去。Iok-ap kap tè i ê choân-kun í-keng kàu, ū lâng thong-ti Iok-ap kóng, Nî-jíⁿ ê kiáⁿ Ap-nî-jíⁿ lâi kìⁿ ông, ông sàng i khì, i iā pêng-an khì.

24約押去見王講，你做甚麼ah？看ah，Ap-nî-jíⁿ來見你，你啥事送伊去？taⁿ伊去了lah；Iok-ap khì kìⁿ ông kóng, Lí chòe sím-mi̍h ah? Khòaⁿ ah, Ap-nî-jíⁿ lâi kìⁿ lí, lí siáⁿ-sū sàng i khì? taⁿ i khì-liáu lah;

25你知Nî-jíⁿ ê kiáⁿ Ap-nî-jíⁿ來，是beh騙你，ài知你ê出kap你ê入，kap你一切所做ê事。lí chai Nî-jíⁿ ê kiáⁿ Ap-nî-jíⁿ lâi, sī beh phiàn lí, ài chai lí ê chhut kap lí ê ji̍p, kap lí it-chhè só͘ chòe ê sū.

26約押tùi大衛hia出來，就差使者去jip Ap-nî-jíⁿ；in就tùi Se-la̍h ê井帶伊來；總是大衛m̄知。Iok-ap tùi Tāi-pi̍t hia chhut-lâi, chiū chhe sù-chiá khì jip Ap-nî-jíⁿ; in chiū tùi Se-la̍h ê chíⁿ tòa i lâi; chóng-sī Tāi-pi̍t m̄-chai.

27Ap-nî-jíⁿ 倒tńg來到Hi-pek-lûn，約押chhōa伊到城門口，假beh暗靜kap伊講話，就tī-hia鑿透伊ê腹肚，伊就死；這是為tio̍h伊ê小弟A-sat-hek hō͘伊thâi死。Ap-nî-jíⁿ tò-tńg-lâi kàu Hi-pek-lûn, Iok-ap chhōa i kàu siâⁿ-mn̂g-kháu, ké beh àm-chīⁿ kap i kóng-ōe, chiū tī-hia chha̍k-thàu i ê pak-tó͘, i chiū sí; che sī ūi-tio̍h i ê sió-tī A-sat-hek hō͘ i thâi-sí.

28後來大衛聽見，就講，流Nî-jíⁿ ê kiáⁿ Ap-nî-jíⁿ ê血，chit-ê罪tī耶和華ê面前的確永遠無歸tī我，kap我ê國。Āu-lâi Tāi-pi̍t thiaⁿ-kìⁿ, chiū kóng, Lâu Nî-jíⁿ ê kiáⁿ Ap-nî-jíⁿ ê huih, chit ê chōe tī Iâ-hô-hoa ê bīn-chêng tek-khak éng-oán bô kui tī góa, kap góa ê kok.

29願hit-ê歸tī約押ê頭殼，kap伊ê老父全家；koh願約押ê家患tio̍h下痟-ê，thái-ko-ê，á是óa柺á ê，hō͘刀thâi死ê，無thang食ê，永無斷。Goān hit-ê kui tī Iok-ap ê thâu-khak, kap i ê lāu-pē choân-ke; koh goān Iok-ap ê ke hoān-tio̍h hā-siau-ê, thái-ko-ê, á-sī òa koáiⁿ-á ê, hō͘ to thâi-sí-ê, bô thang chia̍h ê, éng bô tn̄g.

30約押kap伊ê小弟A-pí-su thâi死Ap-nî-jíⁿ，是因為伊tī Ki-piàn交戰ê時，thâi死in ê小弟A-sat-hek。Iok-ap kap i ê sió-tī A-pí-su thâi-sí Ap-nî-jíⁿ, sī in-ūi i tī Ki-piàn kau-chiàn ê sî, thâi-sí in ê sió-tī A-sat-hek.

31大衛kā約押kap tè伊ê眾百姓講，Lín tio̍h拆裂衫，hâ麻布，tī Ap-nî-jíⁿ面前啼哭。大衛王也tè tī伊ê棺材後。Tāi-pi̍t kā Iok-ap kap tè i ê chèng peh-sìⁿ kóng, Lín tio̍h thiah-li̍h saⁿ, hâ môa-pò͘, tī Ap-nî-jíⁿ bīn-chêng thî-khàu. Tāi-pi̍t ông iā tè tī i ê koaⁿ-chhâ-āu.

32In埋葬Ap-nî-jíⁿ tī Hi-pek-lûn；王óa Ap-nî-jíⁿ ê墓來啼哭，眾百姓也啼哭。In bâi-chòng Ap-nî-jíⁿ tī Hi-pek-lûn; ông óa Ap-nî-jíⁿ ê bōng lâi thî-khàu, chèng peh-sìⁿ iā thî-khàu.

33王為tio̍h Ap-nî-jíⁿ悲哀講， Ap-nî-jíⁿ怎樣親像戇人ê死ah？Ông ūi-tio̍h Ap-nî-jíⁿ pi-ai kóng, Ap-nî-jíⁿ cháiⁿ-iūⁿ chhin-chhiūⁿ gōng-lâng ê sí ah?

34你ê手無綑縛，你ê腳無鎖鏈； 你死親像人死tī pháiⁿ人ê面前。Lí ê chhiú bô khún-pa̍k, lí ê kha bô só-liān; Lí sí chhin-chhiūⁿ lâng sí tī pháiⁿ-lâng ê bīn-chêng.

35Tùi án-ni，眾百姓koh為tio̍h伊哀哭。日未落ê時，眾百姓來勸大衛食餅；總是大衛chiù-chōa講，我若tī日未落ê事先食淡薄餅，á是食別項物，願上帝加倍責罰我。Tùi án-ni chèng peh-sìⁿ koh ūi-tio̍h i ai-khàu. Ji̍t bē lo̍h ê sî, chèng peh-sìⁿ lâi khǹg Tāi-pi̍t chia̍h piáⁿ; chóng-sī Tāi-pi̍t chiù-chōa kóng, Góa nā tī ji̍t bē lo̍h ê tāi-seng chia̍h tām-po̍h piáⁿ, á-sī chia̍h pa̍t hāng mi̍h, goān Siōng-tè ka-pē chek-hoa̍t góa.

36眾百姓注意看，lóng看做好，親像王凡所做ê，眾百姓lóng看做好。Chèng peh-sìⁿ chù-ì khòaⁿ, lóng khòaⁿ-chòe hó, chhin-chhiūⁿ ông hoān só͘ chòe ê, chèng peh-sìⁿ lóng khòaⁿ-chòe hó.

37Hit日眾百姓kap以色列眾人chiah知thâi死Nî-jíⁿ ê kiáⁿ Ap-nî-jíⁿ，lóng m̄是出tī王ê意思。Hit-ji̍t chèng peh-sìⁿ kap Í-sek-lia̍t chèng-lâng chiah chai thâi-sí Nî-jíⁿ ê kiáⁿ Ap-nî-jíⁿ, lóng m̄-sī chhut tī ông ê ì-sù.

38王kā伊ê人臣講，Lín kiám m̄知今á日tī以色列中，死一個豪傑ê大偉人mah？Ông kā i ê jîn-sîn kóng, Lín kiám m̄-chai kin-á-ji̍t tī Í-sek-lia̍t tiong, sí chi̍t ê hô-kia̍t ê tāi úi-jîn mah?

39我雖然受抹油做王，今á日iáu是軟弱；Sé-ló͘-ngá ê kiáⁿ，chiah-ê人比我khah強；行pháiⁿ ê人，願耶和華照伊ê pháiⁿ報應伊。Góa sui-jiân siū boah-iû chòe ông, kin-á-ji̍t iáu sī loán-jio̍k; Sé-ló͘-ngá ê kiáⁿ, chiah ê lâng pí góa khah-kiông; kiâⁿ-pháiⁿ ê lâng, goān Iâ-hô-hoa chiàu i ê pháiⁿ pò-èng i.