1Tī大衛ê時有飢荒，連連三年；大衛就問耶和華。耶和華講，是因為掃羅kap伊ê家，流人ê血ê，因為伊thâi死Ki-piàn人。Tī Tāi-pi̍t ê sî ū ki-hng, liân-liân saⁿ-nî; Tāi-pi̍t chiū mn̄g Iâ-hô-hoa. Iâ-hô-hoa kóng, Sī in-ūi Sò-lô kap i ê ke, lâu lâng ê huih ê, in-ūi i thâi-sí Ki-piàn lâng.

2Ki-piàn人本m̄是以色列人，就是A-mô͘-lī人所chhun ê；以色列人bat對in chiù-chōa，m̄ thâi in；總是掃羅為tio̍h以色列人kap猶大人熱心，想計謀thâi in；王就召Ki-piàn人來，kā in講。Ki-piàn lâng pún m̄-sī Í-sek-lia̍t lâng, chiū-sī A-mô͘-lī lâng só͘ chhun ê; Í-sek-lia̍t lâng bat tùi in chiù-chōa, m̄ thâi in; chóng-sī Sò-lô ūi-tio̍h Í-sek-lia̍t lâng kap Iû-tāi lâng jia̍t-sim, siūⁿ kè-bô͘ thâi in; ông chiū tiàu Ki-piàn lâng lâi, kā in kóng.

3大衛kā Ki-piàn人講，我tio̍h為lín做甚麼？我tio̍h用甚麼來替贖，hō͘ lín祝福耶和華ê產業ah？Tāi-pi̍t kā Ki-piàn lâng kóng, Góa tio̍h ūi lín chòe sím-mi̍h? góa tio̍h ēng sím-mi̍h lâi thòe-sio̍k, hō͘ lín chiok-hok Iâ-hô-hoa ê sán-gia̍p ah?

4Ki-piàn人講，阮kap掃羅kap伊ê家ê事無關係金銀，也m̄-thang為tio̍h阮ê緣故害死一個以色列人。伊講，Lín所講怎樣，我beh為lín行伊。Ki-piàn lâng kóng, Goán kap Sò-lô kap i ê ke ê sū bô koan-hē kim-gûn, iā m̄-thang ūi-tio̍h goán ê iân-kò͘ hāi-sí chi̍t ê Í-sek-lia̍t lâng. I kóng, Lín só͘ kóng cháiⁿ-iūⁿ, góa beh ūi lín kiâⁿ i.

5In對王講，hit-ê從前毀壞阮，謀害阮，beh滅阮，hō͘阮bōe得thang khiā起tī以色列ê境內ê；In tùi ông kóng, Hit ê chiông-chêng húi-hoāi goán, bô͘-hāi goán, beh bia̍t goán, hō͘ goán bōe-tit-thang khiā-khí tī Í-sek-lia̍t ê kéng-lāi ê;

6taⁿ願用伊ê後裔七人交付阮，阮beh tī耶和華ê面前，將in召tī耶和華所揀掃羅ê Ki-pí-a。王講，我beh交hō͘ lín。taⁿ goān ēng i ê hō͘-è chhit-lâng kau-hù goán, goán beh tī Iâ-hô-hoa ê bīn-chêng, chiong in tiàu tī Iâ-hô-hoa só͘ kéng Sò-lô ê Ki-pí-a. Ông kóng, Góa beh kau-hō͘ lín.

7掃羅ê kiáⁿ約拿單，伊ê kiáⁿ Bí-hui-pho-siat王保惜，因為大衛kap掃羅ê kiáⁿ約拿單前bat kí耶和華ê名來chiù-chōa。Sò-lô ê kiáⁿ Iok-ná-tan, i ê kiáⁿ Bí-hui-pho-siat ông pó-sioh, in-ūi Tāi-pi̍t kap Sò-lô ê kiáⁿ Iok-ná-tan chêng bat kí Iâ-hô-hoa ê miâ lâi chiù-chōa.

8總是王將Ài-ngá ê cha-bó͘-kiáⁿ Lī-su-pa kā掃羅所生兩個kiáⁿ，A-mô͘-nî、Bí-hui-pho-siat；kap掃羅ê cha-bó͘-kiáⁿ Bí-kah kā Bí-hô-la̍h人Pa-Se-lâi ê kiáⁿ A-tek-lia̍t所生ê五個kiáⁿ，Chóng-sī ông chiong Ài-ngá ê cha-bó͘-kiáⁿ Lī-su-pa kā Sò-lô só͘ siⁿ nn̄g ê kiáⁿ, A-mô͘-nî, Bí-hui--pho-siat; kap Sò-lô ê cha-bó͘-kiáⁿ Bí-kah kā Bí-hô-la̍h lâng Pa-se-lâi ê kiáⁿ A-tek-lia̍t só͘ siⁿ ê gō͘ ê kiáⁿ,

9lóng交tī Ki-piàn人ê手，in就吊in tī山裡，tī耶和華ê面前；chit七人lóng做一下倒落來，lóng總死tī起頭收割ê時，就是起頭割大麥ê時。lóng kau tī Ki-piàn lâng ê chhiú, in chiū tiàu in tī soaⁿ--nih, tī Iâ-hô-hoa ê bīn-chêng; chí(**chit) chhit-lâng lóng chòe chi̍t-ē tó--lo̍h-lâi, lóng-chóng sí tī khí-thâu siu-koah ê sî, chiū-sī khí-thâu koah tōa-be̍h ê sî.

10Ài-ngá ê cha-bó͘-kiáⁿ Lī-su-pa the̍h 粗麻布，為家己chhu tī石磐頂，tùi起頭收割ê時，到天落雨水tī身屍ê時；m̄准日時空中ê鳥，kap暝時ê走獸，到tī hiah-ê身屍。Ài-ngá ê chá-bó͘-kiáⁿ Lī-su-pa the̍h chho͘-môa-pò͘, ūi ka-kī chhu tī chio̍h-pôaⁿ-téng, tùi khí-thâu siu-koah ê sî, kàu thiⁿ lo̍h hō͘-chúi tī sin-si ê sî; m̄-chún ji̍t-sî khong-tiong ê chiáu, kap mî-sî ê cháu-siù, kàu tī hiah ê sin-si.

11有人將掃羅ê妃Ài-ngá ê cha-bó͘-kiáⁿ Lī-su-pa所做ê事kā大衛講。Ū lâng chiong Sò-lô ê hui Ài-ngá ê cha-bó͘-kiáⁿ Lī-su-pa só͘ chòe ê sū kā Tāi-pi̍t kóng.

12大衛就去，tùi Ki-lia̍t-ngá-pí人the̍h掃羅ê骨，kap伊ê kiáⁿ約拿單ê骨，in bat tùi Pek-san ê街路偷the̍h，因為腓利士人前tī Ki-lī-pho thâi死掃羅ê時，腓利士人有召in tī-hia。Tāi-pi̍t chiū khì, tùi Ki-lia̍t-ngá-pí lâng the̍h Sò-lô ê kut, kap i ê kiáⁿ Iok-ná-tan ê kut, in bat tùi Pek-san ê ke-lō͘ thau-the̍h, in-ūi Hui-lī-sū lâng chêng tī Ki-lī-pho thâi-sí Sò-lô ê sî, Hui-lī-sū lâng ū tiàu in tī-hia.

13伊就tùi hia帶掃羅ê骨，kap伊ê kiáⁿ約拿單ê骨，tò來；人就收拾hiah-ê受吊死ê ê骨。I chiū tùi hia tòa Sò-lô ê kut, kap i ê kiáⁿ Iok-ná-tan ê kut, tò-lâi; lâng chiū siu-si̍p hiah-ê siū tiàu-sí-ê ê kut.

14就埋葬掃羅kap伊ê kiáⁿ約拿單ê骨tī便雅憫地ê Sé-la̍h，tī掃羅ê父Ki-su7e5墓；照王一切所命令ê去行；chit-tia̍p了後，上帝為tio̍h hit-ê地方聽in ê祈禱。Chiū bâi-chòng Sò-lô kap i ê kiáⁿ Iok-ná-tan ê kut tī Piān-ngá-bín tōe ê Sé-la̍h, tī Sò-lô ê pē Ki-sū ê bōng; chiàu ông it-chhè só͘ bēng-lēng ê khì kiâⁿ; chit-tia̍p liáu-āu Siōng-tè ūi-tio̍h hit ê tōe-hng thiaⁿ in ê kî-tó.

15腓利士人koh kap以色列人交戰。大衛kap伊ê奴僕落去，kap腓利士人交戰；大衛真厭倦。Hui-lī-sū lâng koh kap Í-sek-lia̍t lâng kau-chiàn. Tāi-pi̍t kap i ê lô͘-po̍k lo̍h-khì, kap Hui-lī-sū lâng kau-chiàn; Tāi-pi̍t chin ià-siān.

16有大漢族ê一人名叫Í-si̍t-pí-lo̍k，伊ê鎗ê銅重三百sià-khek-le̍k，koh背新ê刀，beh thâi大衛。Ū tōa-hàn-cho̍k ê chi̍t-lâng miâ-kiò Í-si̍t-pí-lo̍k, i ê chhiuⁿ ê tâng tāng saⁿ-pah sià-khek-le̍k, koh pē sin ê to, beh thâi Tāi-pi̍t.

17總是Sé-ló͘-ngá ê kiáⁿ A-pí-su保護大衛，phah死hit-ê腓利士人。當時tè大衛ê人對伊chiù-chōa，講，Chit-tia̍p了後，你m̄-thang koh kap阮出戰，驚了phah-hoa以色列ê燈。Chóng-sī Sé-ló͘-ngá ê kiáⁿ A-pí-su pó-hō͘ Tāi-pi̍t, phah-sí hit ê Hui-lī-sū lâng. Tng-sî tè Tāi-pi̍t ê lâng tùi i chiù-chōa, kóng, Chit-tia̍p liáu-āu lí m̄-thang koh kap goán chhut-chiàn, kiaⁿ-liáu phah-hoa Í-sek-lia̍t ê teng.

18後來koh kap腓利士人交戰tī Ko-pek；hit時有Hō͘-sa人Se-pí-kai thâi死一個大漢族ê人，名做Sat-hut。Āu-lâi koh kap Hui-lī-sū lâng kau-chiàn tī Ko-pek; hit-sî ū Hō͘-sa lâng Se-pí-kai thâi-sí chi̍t ê tōa-hàn-cho̍k ê lâng, miâ-chòe Sat-hut.

19koh再tī Ko-pek kap腓利士人交戰；伯利恆人Ngá-lûi-gô-jíⁿ-kim ê kiáⁿ I-le̍k-hap-lân thâi死Ka-te̍k人Ko-lī-à；伊ê鎗柄親像布機ê軸心。Koh-chài tī Ko-pek kap Hui-lī-sū lâng kau-chiàn; Pek-lī-hêng lâng Ngá-lûi-gô-jíⁿ-kim ê kiáⁿ I-le̍k-hap-lân thâi-sí Ka-te̍k lâng Ko-lī-à; i ê chhiuⁿ-pìⁿ chhin-chhiūⁿ pò͘-kui(**ki) ê te̍k-sim.

20Koh tī Ka-te̍k交戰；tī-hia有一個大漢人，兩支手各有六支指頭á，兩支腳各有六支指頭á，共有二十四支；伊也是大漢族人ê kiáⁿ。Koh tī Ka-te̍k kau-chiàn; tī-hia ū chi̍t ê tōa-hàn lâng, nn̄g ki chhiú kok ū la̍k ki chńg-thâu-á, nn̄g ki kha kok ū la̍k ki chńg--thâu-á, kiōng ū jī-cha̍p-sì ki; i iā sī tōa-hàn-cho̍k lâng ê kiáⁿ.

21Chit人藐視以色列ê時，大衛ê兄Sī-bí-a ê kiáⁿ約拿單就kā伊thâi死。Chit-lâng biáu-sī Í-sek-lia̍t ê sî, Tāi-pi̍t ê hiaⁿ Sī-bí-a ê kiáⁿ Iok-ná-tan chiū kā i thâi-sí.

22Chit四人是Ka-te̍k大漢人所生ê；lóng死tī大衛ê手，kap伊ê奴僕ê手。Chí(**Chit) sì-lâng sī Ka-te̍k tōa-hàn lâng só͘ siⁿ ê; lóng sí tī Tāi-pi̍t ê chhiú, kap i ê lô͘-po̍k ê chhiú.

1當耶和華救大衛脫離一切ê對敵ê手，kap掃羅ê手ê日，伊ǹg耶和華念chit-ê詩ê話，講，Tng Iâ-hô-hoa kiù Tāi-pi̍t thoat-lī it-chhè ê tùi-te̍k ê chhiú, kap Sò-lô ê chhiú ê ji̍t, i ǹg Iâ-hô-hoa liām chit ê si ê ōe, kóng,

2耶和華是我ê山巖，我ê營寨，拯救我ê。Iâ-hô-hoa sī góa ê soaⁿ-giâm, góa ê iâⁿ-chē, chín-kiù góa ê.

3上帝是我ê石磐，我beh óa靠伊； 伊是藤牌，是拯救我ê角，是我ê高台，是我ê避難所； 拯救我ê ah，你是救我脫離強暴ê。Siōng-tè sī góa ê chio̍h-pôaⁿ, góa beh óa-khò I; I sī tîn-pâi, sī chín-kiù góa ê kak, sī góa ê koâiⁿ-tâi, sī góa ê pī-lān-só͘; Chín-kiù góa ê ah, Lí sī kiù góa thoat-lī kiông-pō ê.

4我beh求叫耶和華，伊是應該o-ló ê； Án-ni我beh得tio̍h救，脫離我ê對敵。Góa beh kiû-kiò Iâ-hô-hoa, I sī eng-kai o-ló ê; Án-ni góa beh tit-tio̍h kiù, thoat-lī góa ê tùi-te̍k.

5死無ê水湧圍我， 匪類ê氾濫hō͘我驚。Sí-bô ê chúi-éng ûi góa, Húi-lūi ê hoàn-lām hō͘ góa kiaⁿ.

6陰間ê索纏我， 死無ê活tauh到tī我。Im-kan ê soh tîⁿ góa, Sí-bô ê oa̍h-tauh kàu tī góa.

7我tī患難中求叫耶和華， 我求叫我ê上帝。 伊tùi殿裡聽我ê聲， 我ê求叫入伊ê耳孔。Góa tī hoān-lān tiong kiû-kiò Iâ-hô-hoa, Góa kiû-kiò góa ê Siōng-tè. I tùi tiān--nih thiaⁿ góa ê siaⁿ, Góa ê kiû-kiò ji̍p I ê hī-khang.

8地就振動搖choah， 天ê根基也gī-gī顫， 為tio̍h伊ê受氣來振動。Tōe chiū tín-tāng iô-choah, Thiⁿ ê kun-ki iā gī-gī-chùn, Ūi-tio̍h I ê siū-khì lâi tín-tāng.

9Tùi伊ê鼻孔有煙chhèng上去， Tùi伊ê嘴有出燒滅ê火， 碳tùi án-ni to̍h。Tùi I ê phīⁿ-khang ū ian chhèng chiūⁿ-khì, Tùi I ê chhùi ū chhut sio-bia̍t ê hé, Thòaⁿ tùi án-ni to̍h.

10伊hō͘天低落來，就降臨， Tī伊ê腳下有烏雲。I hō͘ thiⁿ kē--lo̍h-lâi, chiū kàng-lîm, Tī I ê kha-ē ū o͘-hûn.

11伊騎ki-lō͘兵teh飛， Tī風ê翼頂顯現。I khiâ ki-lō͘-peng teh pe, Tī hong ê si̍t-téng hián-hiān.

12伊用烏暗做周圍ê帳房， 就是聚集ê水，kap空中ê密雲。I ēng o͘-àm chòe chiu-ûi ê tiùⁿ-pâng, Chiū-sī chū-chi̍p ê chúi, kap khong-tiong ê ba̍t-hûn.

13因為伊面前ê光， 火炭就to̍h起來。In-ūi I bīn-chêng ê kng, Hé-thòaⁿ chiū to̍h--khí-lâi.

14耶和華tùi天起雷， 至koânê發出伊ê聲。Iâ-hô-hoa tùi thiⁿ khí lûi, Chì-koâiⁿ--ê hoat-chhut I ê siaⁿ.

15伊射箭來趕散in， Sih-nà來hō͘ in亂。I siā chìⁿ lâi kóaⁿ-sòaⁿ in, Sih-nà lâi hō͘ in loān.

16海底就出現， 大地ê根基也露現， 是因為耶和華ê責備， 也因為伊ê鼻孔pûn出ê氣。Hái-tóe chiū chhut-hiān, Tōa-tōe ê kun-ki iā lō͘-hiān, Sī in-ūi Iâ-hô-hoa ê chek-pī, Iā in-ūi I ê phīⁿ-khang pûn-chhut ê khì.

17伊tùi頂面伸手khiú我， Tùi大水中牽我出；I tùi téng-bīn chhun-chhiú khiú góa, Tùi tōa-chúi-tiong khan góa chhut;

18伊救我脫離勇猛ê對敵， Kap hiah-ê怨恨我ê人， 因為in比我khah有力。I kiù góa thoat-lī ióng-béng ê tùi-te̍k, Kap hiah ê oàn-hūn góa ê lâng, In-ūi in pí góa khah ū la̍t.

19我tú-tio̍h患難ê日，in來窘迫我， 總是耶和華是我所óa靠ê。Góa tú-tio̍h hoān-lān ê ji̍t, in lâi khún-pek góa, Chóng-sī Iâ-hô-hoa sī góa só͘ óa-khò ê.

20伊chhōa我到開闊ê所在； 伊救我，因為伊歡喜我。I chhōa góa kàu khui-khoah ê só͘-chāi; I kiù góa, in-ūi I hoaⁿ-hí góa.

21耶和華照我ê公義報答我， 照我ê手ê清氣報賞我。Iâ-hô-hoa chiàu góa ê kong-gī pò-tap góa, Chiàu góa ê chhiú ê chheng-khì pò-siúⁿ góa.

22因為我守耶和華ê道路， Bē-bat做pháiⁿ，離開我ê上帝。In-ūi góa siú Iâ-hô-hoa ê tō-lō͘, Bē-bat chòe pháiⁿ, lī-khui góa ê Siōng-tè.

23伊一切ê法度tī我ê面前， 伊ê律例，我也無悖逆。I it-chhè ê hoat-tō͘ tī góa ê bīn-chêng, I ê lu̍t-lē, góa iā bô pōe-ge̍k.

24我對tī伊是完全， 我也守本身無行我ê pháiⁿ。Góa tùi-tī I sī oân-choân, Góa iā siú pún-sin bô kiâⁿ góa ê pháiⁿ.

25所以耶和華報賞我，是照我ê公義， 也照我tī伊ê目睭前ê清氣。Só͘-í Iâ-hô-hoa pò-siúⁿ góa, sī chiàu góa ê kong-gī, Iā chiàu góa tī I ê ba̍k-chiu-chêng ê chheng-khì.

26對tī仁慈ê人，你顯明家己是仁慈， 對tī完全ê人，你顯明家己是完全；Tùi-tī jîn-chû ê lâng, Lí hián-bêng ka-kī sī jîn-chû, Tùi-tī oân-choân ê lâng, Lí hián-bêng ka-kī sī oân-choân;

27對tī清氣ê人，你顯明家己是清氣； 對tī乖癖ê人，你顯明家己是彎曲。Tùi-tī chheng-khì ê lâng, Lí hián-bêng ka-kī sī chheng-khì; Tùi-tī koai-phiah ê lâng, Lí hián-bêng ka-kī sī oan-khiau.

28困苦ê百姓，你救伊。 你ê目睭看驕傲ê人，hō͘伊降低。Khùn-khó͘ ê peh-sìⁿ, Lí kiù i. Lí ê ba̍k-chiu khòaⁿ kiau-ngō͘ ê lâng, hō͘ i kàng-kē.

29耶和華ah，你是我ê燈， 耶和華beh照光我ê烏暗。Iâ-hô-hoa ah, Lí sī góa ê teng, Iâ-hô-hoa beh chiò-kng góa ê o͘-àm.

30因為我óa靠你衝入軍隊， óa靠我ê上帝，就跳過牆。In-ūi góa óa-khò Lí chhiong-ji̍p kun-tūi, Óa-khò góa ê Siōng-tè, chiū thiàu-kè chhiûⁿ.

31論到上帝，伊ê道路是完全ê， 耶和華ê話，是過鍛鍊ê； 見若óa靠伊ê，伊就做in ê藤牌。Lūn-kàu Siōng-tè, I ê tō-lō͘ sī oân-choân ê, Iâ-hô-hoa ê ōe, sī kè thoàn-liān ê; Kìⁿ-nā óa-khò I ê, I chiū chòe in ê tîn-pâi.

32耶和華以外，是誰是上帝ah？ 咱ê上帝以外，是誰是石磐ah？Iâ-hô-hoa í-gōa, chī-chūi sī Siōng-tè ah? Lán ê Siōng-tè í-gōa, chī-chūi sī chio̍h-pôaⁿ ah?

33上帝是我堅固ê營寨， 伊引chhōa完全ê人行伊ê路。Siōng-tè sī góa kian-kò͘ ê iâⁿ-chē, I ín-chhōa oân-choân ê lâng kiâⁿ I ê lō͘.

34伊hō͘我ê腳親像鹿母， hō͘我khiā tī我高ê所在。I hō͘ góa ê kha chhin-chhiūⁿ lo̍k-bú, Hō͘ góa khiā tī góa koâiⁿ ê só͘-chāi.

35伊教示我ê手能交戰， 致到我ê手骨能開銅弓。I kà-sī góa ê chhiú ōe kau-chiàn, Tì-kàu góa ê chhiú-kut ōe khui tâng-keng.

36你用你ê拯救hō͘我做藤牌， 你ê溫柔hō͘我做大。Lí ēng Lí ê chín-kiù hō͘ góa chòe tîn-pâi, Lí ê un-jiû hō͘ góa chòe tōa.

37你hō͘我ê腳所踏ê地開闊， 我ê腳也bē-bat踏thu̍t。Lí hō͘ góa ê kha só͘ ta̍h ê tōe khui-khoah, Góa ê kha iā bē-bat ta̍h-thu̍t.

38我追jip我ê對敵，來剪除in； In bē剿滅ê事先，我無倒tńg來。Góa tui-jip góa ê tùi-te̍k, lâi chián-tû in; In bē châu-bia̍t ê tāi-seng, góa bô tò-tńg-lâi.

39我剿滅in，phah傷in， Hō͘ in bōe起來，倒tī我ê腳下。Góa châu-bia̍t in, phah-siong in, Hō͘ in bōe khí-lâi, tó tī góa ê kha-ē.

40因為你bat用氣力hâ我，hō͘我能交戰， 你hō͘ hiah-ê起來攻擊我ê，lóng降服我。In-ūi Lí bat ēng khùi-la̍t hâ góa, hō͘ góa ōe kau-chiàn, Lí hō͘ hiah ê khí-lâi kong-kek góa ê, lóng hâng-ho̍k góa.

41你hō͘我ê對敵ǹg我oa̍t-tńg身， hō͘我thang剪除hiah-ê怨恨我ê人。Lí hō͘ góa ê tùi-te̍k ǹg góa oa̍t-tńg-sin, Hō͘ góa thang chián-tû hiah ê oàn-hūn góa ê lâng.

42In四界看，也無拯救in ê， 就ǹg望耶和華，伊也m̄應伊。In sì-kòe khòaⁿ, iā bô chín-kiù in ê, Chiū ǹg-bāng Iâ-hô-hoa, I iā m̄ ìn i.

43我搥in幼幼，親像地上ê塵埃， 我踏in親像街路ê土糜，hō͘ in四散。Góa tûi in iù-iù, chhin-chhiūⁿ tōe-chiūⁿ ê tîn-ai, Góa ta̍h in chhin-chhiūⁿ ke-lō͘ ê thô͘-bê, hō͘ in sì-sòaⁿ.

44你救我脫離我ê百姓ê相爭， 保存我做列國ê頭目； 我所m̄-bat ê百姓beh服事我。Lí kiù góa thoat-lī góa ê peh-sìⁿ ê saⁿ-chiⁿ, Pó-chûn góa chòe lia̍t-kok ê thâu-ba̍k; Góa só͘ m̄-bat ê peh-sìⁿ beh ho̍k-sāi góa.

45外邦人beh投降我， 一下聽見，就beh遵thàn我。Gōa-pang lâng beh tâu-hâng góa, Chi̍t-ē thiaⁿ-kìⁿ, chiū beh chun-thàn góa.

46外邦人beh衰敗， Tùi in秘密ê所在ngia̍uh-ngia̍uh-chhoah出來。Gōa-pang lâng beh soe-pāi, Tùi in pì-ba̍t ê só͘-chāi ngia̍uh-ngia̍uh-chhoah chhut-lâi.

47耶和華是活ê，願我ê石磐得tio̍h o-ló， 願上帝，就是救我ê石磐ê，得tio̍h尊做高；Iâ-hô-hoa sī oa̍h ê, goān góa ê chio̍h-pôaⁿ tit-tio̍h o-ló, Goān Siōng-tè, chiū-sī kiù góa ê Chio̍h-pôaⁿ--ê, tit-tio̍h chun-chòe koâiⁿ;

48就是替我伸冤ê上帝， Hō͘ hiah-ê百姓降服我ê；Chiū-sī thòe góa sin-oan ê Siōng-tè, Hō͘ hiah ê peh-sìⁿ hâng-ho̍k góa ê;

49救我脫離我ê對敵ê； Koh舉起我khah高hiah-ê起來攻擊我ê。 你救我脫離強暴ê人。Kiù góa thoat-lī góa ê tùi-te̍k ê; Koh kú-khí góa khah koâiⁿ hiah ê khí-lâi kong-kek góa ê. Lí kiù góa thoat-lī kiông-pō ê lâng.

50耶和華ah，因為án-ni我beh tī列邦感謝你， 也beh唱歌o-ló你ê名。Iâ-hô-hoa ah, in-ūi án-ni góa beh tī lia̍t-pang kám-siā Lí, Iā beh chhiùⁿ-koa o-ló Lí ê miâ.

51耶和華大大拯救伊所設立ê王， 施慈愛hō͘伊所抹油ê， 就是hō͘大衛kap伊ê後裔，到永遠。Iâ-hô-hoa tōa-tōa chín-kiù I só͘ siat-li̍p ê ông, Si chû-ài hō͘ I só͘ boah-iû-ê, Chiū-sī hō͘ Tāi-pi̍t kap i ê hō͘-è, kàu éng-oán.

1大衛結尾ê話，排列tī下底。耶西ê kiáⁿ大衛講， 得tio̍h升高ê人， 是雅各ê上帝所抹油ê， Tī以色列gâu做歌ê講：Tāi-pi̍t kiat-bé ê ōe, pâi-lia̍t tī ē-tóe. Iâ-se ê kiáⁿ Tāi-pi̍t kóng, Tit-tio̍h seng-koâiⁿ ê lâng, Sī Ngá-kok ê Siōng-tè só͘ boah-iû ê, Tī Í-sek-lia̍t gâu chòe-koa--ê kóng:

2耶和華ê神用我來講， 伊ê話tī我ê舌。Iâ-hô-hoa ê Sîn ēng góa lâi kóng, I ê ōe tī góa ê chi̍h.

3以色列ê上帝有講， 以色列ê石磐對我講： 用公義治理人， 敬畏上帝來治理ê，Í-sek-lia̍t ê Siōng-tè ū kóng, Í-sek-lia̍t ê Chio̍h-pôaⁿ tùi góa kóng: Ēng kong-gī tī-lí lâng, Kèng-ùi Siōng-tè lâi tī-lí ê,

4伊beh親像透早日tú-á出ê光， 無雲ê清早， 雨落過身ê光彩； Hō͘地發幼幼ê草。I beh chhin-chhiūⁿ thàu-chá ji̍t tú-á chhut ê kng, Bô hûn ê chheng-chá, Hō͘ lo̍h kè-sin ê kng-chhái; Hō͘ tōe hoat iù-iù ê chháu.

5我ê家tī上帝ê面前m̄是án-ni； Iáu-kú伊有kap我立永遠ê約， 無m̄照次序排列koh堅固； 雖然伊無hō͘伊生長， 這就是我一切ê拯救，一切ê意願。Góa ê ke tī Siōng-tè ê bīn-chêng m̄-sī án-ni; Iáu-kú I ū kap góa li̍p éng-oán ê iok, Bô m̄ chiàu chhù-sū pâi-lia̍t koh kian-kò͘; Sui-jiân I bô hō͘ i seng-tióng, Che chiū-sī góa it-chhè ê chín-kiù, it-chhè ê ì-goān.

6總是匪類lóng親像刺á beh受割sak， 人m̄敢用手the̍h伊；Chóng-sī húi-lūi lóng chhin-chhiūⁿ chhì-á beh siū koah-sak, Lâng m̄-káⁿ ēng chhiú the̍h i;

7Beh摸伊ê人， tio̍h用鐵器kap鎗柄， Tī伊ê所在beh hō͘火一盡燒去。Beh bong i ê lâng, Tio̍h ēng thih-khì kap chhiuⁿ-pìⁿ, Tī i ê só͘-chāi beh hō͘ hé it-chīn sio-khì.

8大衛勇士ê名記tī下底；軍長ê頭，Tha-kek-bûn人Iok-siat-pa-siat；就是I-su-nî人A-tí-lô，一時phah死八百人。Tāi-pi̍t ióng-sū ê miâ kì tī ē-tóe; kun-tiúⁿ ê thâu, Tha-kek-bûn lâng Iok-siat-pa-siat; chiū-sī I-su-nî lâng A-tí-lô, chi̍t-sî phah-sí poeh-pah lâng.

9Koh一個是A-ha̍p人Tó-to ê kiáⁿ Í-lī-a-sat；前腓利士人聚集beh交戰，以色列人已經去，有三個勇士tè大衛，對腓利士人討戰；伊是in中間ê一個。Koh chi̍t-ê sī A-ha̍p lâng Tó-to ê kiáⁿ Í-lī-a-sat; chêng Hui-lī-sū lâng chū-chi̍p beh kau-chiàn, Í-sek-lia̍t lâng í-keng khì, ū saⁿ ê ióng-sū tè Tāi-pi̍t, tùi Hui-lī-sū lâng thó-chiàn; i sī in tiong-kan ê chi̍t-ê.

10伊起來phah腓利士人，到手酸，手kap劍相liâm。Hit日耶和華大大khah贏，眾百姓oa̍t-tńg tī伊ê後面，顧搶物nā-tiāⁿ。I khí-lâi phah Hui-lī-sū lâng, kàu chhiú sng, chhiú kap kiàm saⁿ-liâm. Hit-ji̍t Iâ-hô-hoa tōa-tōa khah-iâⁿ, chèng peh-sìⁿ oa̍t-tńg tī i ê āu-bīn, kò͘ chhiúⁿ-mi̍h nā-tiāⁿ.

11Koh一個是Ha̍p-la̍h人A-ki ê kiáⁿ Sa-má；有一日腓利士人聚集成陣，tī一坵紅豆ê園；百姓就tī腓利士人ê面前逃走。Koh chi̍t-ê sī Ha̍p-la̍h lâng A-ki ê kiáⁿ Sa-má; ū chi̍t-ji̍t Hui-lī-sū lâng chū-chi̍p chiâⁿ-tīn, tī chi̍t-khu âng-tāu ê hn̂g; peh-sìⁿ chiū tī Hui-lī-sū lâng ê bīn-chêng tô-cháu.

12伊擋tiâu tī hit坵園，來保守伊，phah腓利士人；耶和華大大khah贏。I tòng-tiâu tī hit khu hn̂g, lâi pó-siú i, phah Hui-lī-sū lâng; Iâ-hô-hoa tōa-tōa khah-iâⁿ.

13收割ê時，三十個首領中有三人落去到A-tō͘-lân洞，見大衛。腓利士人軍兵紮營tī Lī-hoa̍t-im ê山谷。Siu-koah ê sî, saⁿ-cha̍p ê siú-léng tiong ū saⁿ lâng lo̍h-khì kàu A-tō͘-lân tōng, kìⁿ Tāi-pi̍t. Hui-lī-sū lâng kun-peng chat-iâⁿ tī Lī-hoa̍t-im ê soaⁿ-kok.

14Hit時大衛tī山寨；腓利士人防守ê兵tī伯利恆。Hit-sî Tāi-pi̍t tī soaⁿ-chē; Hui-lī-sū lâng hông-siú ê peng tī Pek-lī-hêng.

15大衛欣羨講，Chī-chūi會用伯利恆城門邊ê井水hō͘我lim？Tāi-pi̍t him-soān kóng, Chī-chūi ōe ēng Pek-lī-hêng siâⁿ-mn̂g-piⁿ ê chíⁿ-chúi hō͘ góa lim?

16Chit三個勇士就衝過腓利士人ê營盤，tùi伯利恆城門邊ê井chhiūⁿ水，kōaⁿ來hō͘大衛；總是伊m̄甘lim，就piàⁿ tī耶和華ê面前，講，Chí(**Chit) saⁿ ê ióng-sū chiū chhiong-kè Hui-lī-sū lâng ê iâⁿ-pôaⁿ, tùi Pek-lī-hêng siâⁿ-mn̂g-piⁿ ê chíⁿ chhiūⁿ-chúi, kōaⁿ lâi hō͘ Tāi-pi̍t; chóng-sī i m̄-kam lim, chiū piàⁿ tī Iâ-hô-hoa ê bīn-chêng, kóng,

17耶和華ah，我決斷m̄做án-ni；這kiám m̄是phe命去ê人ê血？所以伊m̄-lim。Chit三個大勇士有做chiah-ê tāi-chì。Iâ-hô-hoa ah, góa koat-toàn m̄-chòe án-ni; che kiám m̄-sī phe-miā khì ê lâng ê huih? Só͘-í i m̄-lim. Chí(**Chit) saⁿ ê tōa ióng-sū ū chòe chiah ê tāi-chì.

18Sé-ló͘-ngá ê kiáⁿ約押ê小弟A-pí-su是做三個勇士ê頭人；伊kia̍h伊ê鎗phah死三百人，就tī三個勇士中有名。Sé-ló͘-ngá ê kiáⁿ Iok-ap ê sió-tī A-pí-su sī chòe saⁿ ê ióng-sū ê thâu-lâng; i kia̍h i ê chhiuⁿ phah-sí saⁿ-pah lâng, chiū tī saⁿ ê ióng-sū tiong ū miâ.

19伊 kiám m̄是三個勇士中ê第一尊貴ê mah？所以做in ê頭；總是不及前三個勇士。I kiám m̄-sī saⁿ ê ióng-sū tiong ê tē-it chun-kùi-ê mah? só͘-í chòe in ê thâu; chóng-sī put-ki̍p chêng saⁿ ê ióng-sū.

20Koh有Kah-siat人大勇士Iâ-hô-iâ-tāi ê kiáⁿ Pí-ná-ngá；伊有行出chōe-chōe大事；伊thâi死Mô͘-ap人A-lī-i-le̍k兩個kiáⁿ；koh tī落雪ê時落坑內，thâi死一隻獅。Koh ū Kah-siat lâng tōa ióng-sū Iâ-hô-iâ-tāi ê kiáⁿ Pí-ná-ngá; i ū kiâⁿ-chhut chōe-chōe tōa-sū; i thâi-sí Mô͘-ap lâng A-lī-i-le̍k nn̄g ê kiáⁿ; koh tī lo̍h-seh ê sî lo̍h khiⁿ-lāi, thâi-sí chi̍t chiah sai.

21Koh thâi死埃及一個大漢人；埃及人手裡kia̍h鎗，Pí-ná-ngá只有kia̍h錘落去伊hia，搶埃及人手裡ê鎗，用hit支鎗kā伊chân死。Koh thâi-sí Ai-ki̍p chi̍t ê tōa-hàn lâng; Ai-ki̍p lâng chhiú--nih kia̍h chhiuⁿ, Pí-ná-ngá chí-ū kia̍h thûi lo̍h-khì i hia, chhiúⁿ Ai-ki̍p lâng chhiú--nih ê chhiuⁿ, ēng hit ki chhiuⁿ kā i chân--sí.

22這是Iâ-hô-iâ-tāi ê kiáⁿ Pí-ná-ngá所行ê事；就tī三個勇士中得tio̍h名。Che sī Iâ-hô-iâ-tāi ê kiáⁿ Pí-ná-ngá só͘ kiâⁿ ê sū; chiū tī saⁿ ê ióng-sū tiong tit-tio̍h miâ.

23伊比三十個勇士khah尊貴；總是不及前三個勇士。大衛設立伊做伊ê侍衛長。I pí saⁿ-cha̍p ê ióng-sū khah chun-kùi; chóng-sī put-ki̍p chêng saⁿ ê ióng-sū. Tāi-pi̍t siat-li̍p i chòe i ê sī-ōe-tiúⁿ.

24三十個勇士中有約押ê小弟A-sat-hek；koh有伯利恆人Tó-to ê kiáⁿ Í-le̍k-hap-lân；Saⁿ-cha̍p ê ióng-sū tiong ū Iok-ap ê sió-tī A-sat-hek; koh ū Pek-lī-hêng lâng Tó-to ê kiáⁿ Í-le̍k-hap-lân;

25Hap-lu̍t人Sa-má，Hap-lu̍t人Í-lī-ka；Hap-lu̍t lâng Sa-má, Hap-lu̍t lâng Í-lī-ka;

26Phaⁿ-le̍k-thê人Hi-lī-su，Thê-ko-a人Ek-kiat ê kiáⁿ Í-la̍h；Phaⁿ-le̍k-thê lâng Hi-lī-su, Thê-ko-a lâng Ek-kiat ê kiáⁿ Í-la̍h;

27A-ná-tu̍t人A-pí-í-siā，Hō͘-sa人Bí-pún-nái；A-ná-tu̍t lâng A-pí-í-siā, Hō͘-sa lâng Bí-pún-nái;

28A-ha̍p人Sat-bûn，Nî-tô-hoat人Má-hap-lâi；A-ha̍p lâng Sat-bûn, Nî-tô-hoat lâng Má-hap-lâi;

29Nî-tô-hoat人Pa-ná ê kiáⁿ Hi-li̍p，便雅憫族Ki-pí-a人Lī-pài ê kiáⁿ Í-thài；Nî-tô-hoat lâng Pa-ná ê kiáⁿ Hi-li̍p, Piān-ngá-bín cho̍k Ki-pí-a lâng Lī-pài ê kiáⁿ Í-thài;

30Pí-la̍h-tùn人Pí-ná-ngá，Ka-si̍t溪人Hi-thài；Pí-la̍h-tùn lâng Pí-ná-ngá, Ka-si̍t khoe lâng Hi-thài;

31Pek-a-la̍h-pa人A-pí-a-pún，Pa-ló͘-bí人Ap-su-má-hut；Pek-a-la̍h-pa lâng A-pí-a-pún, Pa-ló͘-bí lâng Ap-su-má-hut;

32Sa-pún人Í-lī-ngá-hap-pa，Ngá-siān chiah-ê kiáⁿ中ê約拿單；Sa-pún lâng Í-lī-ngá-hap-pa, Ngá-siān chiah ê kiáⁿ tiong ê Iok-ná-tan;

33Hap-la̍h人Sa-má，Hap-la̍h人Sa-la̍h ê kiáⁿ A-hi-àm；Hap-la̍h lâng Sa-má, Hap-la̍h lâng Sa-la̍h ê kiáⁿ A-hi-àm;

34Má-ka人A-hap-pài ê kiáⁿ Í-lī-hoat-lia̍t，Ki-lô人A-hi-to-hut ê kiáⁿ Í-liân ；Má-ka lâng A-hap-pài ê kiáⁿ Í-lī-hoat-lia̍t, Ki-lô lâng A-hi-to-hut ê kiáⁿ Í-liân;

35Ka-bi̍t人Hi-su-lâi，A-pa人Phàⁿ-lâi；Ka-bi̍t lâng Hi-su-lâi, A-pa lâng Phàⁿ-lâi;

36Só-pa人Ná-tan ê kiáⁿ Í-kah，Ka-te̍k人Pa-nî；Só-pa lâng Ná-tan ê kiáⁿ Í-kah, Ka-te̍k lâng Pa-nî;

37A-bûn人Sé-le̍k，Pí-lio̍k人Ná-hap-lâi，是kā Sé-ló͘-ngá ê kiáⁿ約押kia̍h軍器ê；A-bûn lâng Sé-le̍k, Pí-lio̍k lâng Ná-hap-lâi, sī kā Sé-ló͘-ngá ê kiáⁿ Iok-ap kia̍h kun-khì ê;

38Í-thiap人Í-la̍h，Í-thiap人Ka-li̍p；Í-thiap lâng Í-la̍h, Í-thiap lâng Ka-li̍p;

39Hek人烏利亞；共三十七人。Hek lâng O͘-lī-à; kiōng saⁿ-cha̍p-chhit lâng.