1大衛結尾ê話，排列tī下底。耶西ê kiáⁿ大衛講， 得tio̍h升高ê人， 是雅各ê上帝所抹油ê， Tī以色列gâu做歌ê講：Tāi-pi̍t kiat-bé ê ōe, pâi-lia̍t tī ē-tóe. Iâ-se ê kiáⁿ Tāi-pi̍t kóng, Tit-tio̍h seng-koâiⁿ ê lâng, Sī Ngá-kok ê Siōng-tè só͘ boah-iû ê, Tī Í-sek-lia̍t gâu chòe-koa--ê kóng:

2耶和華ê神用我來講， 伊ê話tī我ê舌。Iâ-hô-hoa ê Sîn ēng góa lâi kóng, I ê ōe tī góa ê chi̍h.

3以色列ê上帝有講， 以色列ê石磐對我講： 用公義治理人， 敬畏上帝來治理ê，Í-sek-lia̍t ê Siōng-tè ū kóng, Í-sek-lia̍t ê Chio̍h-pôaⁿ tùi góa kóng: Ēng kong-gī tī-lí lâng, Kèng-ùi Siōng-tè lâi tī-lí ê,

4伊beh親像透早日tú-á出ê光， 無雲ê清早， 雨落過身ê光彩； Hō͘地發幼幼ê草。I beh chhin-chhiūⁿ thàu-chá ji̍t tú-á chhut ê kng, Bô hûn ê chheng-chá, Hō͘ lo̍h kè-sin ê kng-chhái; Hō͘ tōe hoat iù-iù ê chháu.

5我ê家tī上帝ê面前m̄是án-ni； Iáu-kú伊有kap我立永遠ê約， 無m̄照次序排列koh堅固； 雖然伊無hō͘伊生長， 這就是我一切ê拯救，一切ê意願。Góa ê ke tī Siōng-tè ê bīn-chêng m̄-sī án-ni; Iáu-kú I ū kap góa li̍p éng-oán ê iok, Bô m̄ chiàu chhù-sū pâi-lia̍t koh kian-kò͘; Sui-jiân I bô hō͘ i seng-tióng, Che chiū-sī góa it-chhè ê chín-kiù, it-chhè ê ì-goān.

6總是匪類lóng親像刺á beh受割sak， 人m̄敢用手the̍h伊；Chóng-sī húi-lūi lóng chhin-chhiūⁿ chhì-á beh siū koah-sak, Lâng m̄-káⁿ ēng chhiú the̍h i;

7Beh摸伊ê人， tio̍h用鐵器kap鎗柄， Tī伊ê所在beh hō͘火一盡燒去。Beh bong i ê lâng, Tio̍h ēng thih-khì kap chhiuⁿ-pìⁿ, Tī i ê só͘-chāi beh hō͘ hé it-chīn sio-khì.

8大衛勇士ê名記tī下底；軍長ê頭，Tha-kek-bûn人Iok-siat-pa-siat；就是I-su-nî人A-tí-lô，一時phah死八百人。Tāi-pi̍t ióng-sū ê miâ kì tī ē-tóe; kun-tiúⁿ ê thâu, Tha-kek-bûn lâng Iok-siat-pa-siat; chiū-sī I-su-nî lâng A-tí-lô, chi̍t-sî phah-sí poeh-pah lâng.

9Koh一個是A-ha̍p人Tó-to ê kiáⁿ Í-lī-a-sat；前腓利士人聚集beh交戰，以色列人已經去，有三個勇士tè大衛，對腓利士人討戰；伊是in中間ê一個。Koh chi̍t-ê sī A-ha̍p lâng Tó-to ê kiáⁿ Í-lī-a-sat; chêng Hui-lī-sū lâng chū-chi̍p beh kau-chiàn, Í-sek-lia̍t lâng í-keng khì, ū saⁿ ê ióng-sū tè Tāi-pi̍t, tùi Hui-lī-sū lâng thó-chiàn; i sī in tiong-kan ê chi̍t-ê.

10伊起來phah腓利士人，到手酸，手kap劍相liâm。Hit日耶和華大大khah贏，眾百姓oa̍t-tńg tī伊ê後面，顧搶物nā-tiāⁿ。I khí-lâi phah Hui-lī-sū lâng, kàu chhiú sng, chhiú kap kiàm saⁿ-liâm. Hit-ji̍t Iâ-hô-hoa tōa-tōa khah-iâⁿ, chèng peh-sìⁿ oa̍t-tńg tī i ê āu-bīn, kò͘ chhiúⁿ-mi̍h nā-tiāⁿ.

11Koh一個是Ha̍p-la̍h人A-ki ê kiáⁿ Sa-má；有一日腓利士人聚集成陣，tī一坵紅豆ê園；百姓就tī腓利士人ê面前逃走。Koh chi̍t-ê sī Ha̍p-la̍h lâng A-ki ê kiáⁿ Sa-má; ū chi̍t-ji̍t Hui-lī-sū lâng chū-chi̍p chiâⁿ-tīn, tī chi̍t-khu âng-tāu ê hn̂g; peh-sìⁿ chiū tī Hui-lī-sū lâng ê bīn-chêng tô-cháu.

12伊擋tiâu tī hit坵園，來保守伊，phah腓利士人；耶和華大大khah贏。I tòng-tiâu tī hit khu hn̂g, lâi pó-siú i, phah Hui-lī-sū lâng; Iâ-hô-hoa tōa-tōa khah-iâⁿ.

13收割ê時，三十個首領中有三人落去到A-tō͘-lân洞，見大衛。腓利士人軍兵紮營tī Lī-hoa̍t-im ê山谷。Siu-koah ê sî, saⁿ-cha̍p ê siú-léng tiong ū saⁿ lâng lo̍h-khì kàu A-tō͘-lân tōng, kìⁿ Tāi-pi̍t. Hui-lī-sū lâng kun-peng chat-iâⁿ tī Lī-hoa̍t-im ê soaⁿ-kok.

14Hit時大衛tī山寨；腓利士人防守ê兵tī伯利恆。Hit-sî Tāi-pi̍t tī soaⁿ-chē; Hui-lī-sū lâng hông-siú ê peng tī Pek-lī-hêng.

15大衛欣羨講，Chī-chūi會用伯利恆城門邊ê井水hō͘我lim？Tāi-pi̍t him-soān kóng, Chī-chūi ōe ēng Pek-lī-hêng siâⁿ-mn̂g-piⁿ ê chíⁿ-chúi hō͘ góa lim?

16Chit三個勇士就衝過腓利士人ê營盤，tùi伯利恆城門邊ê井chhiūⁿ水，kōaⁿ來hō͘大衛；總是伊m̄甘lim，就piàⁿ tī耶和華ê面前，講，Chí(**Chit) saⁿ ê ióng-sū chiū chhiong-kè Hui-lī-sū lâng ê iâⁿ-pôaⁿ, tùi Pek-lī-hêng siâⁿ-mn̂g-piⁿ ê chíⁿ chhiūⁿ-chúi, kōaⁿ lâi hō͘ Tāi-pi̍t; chóng-sī i m̄-kam lim, chiū piàⁿ tī Iâ-hô-hoa ê bīn-chêng, kóng,

17耶和華ah，我決斷m̄做án-ni；這kiám m̄是phe命去ê人ê血？所以伊m̄-lim。Chit三個大勇士有做chiah-ê tāi-chì。Iâ-hô-hoa ah, góa koat-toàn m̄-chòe án-ni; che kiám m̄-sī phe-miā khì ê lâng ê huih? Só͘-í i m̄-lim. Chí(**Chit) saⁿ ê tōa ióng-sū ū chòe chiah ê tāi-chì.

18Sé-ló͘-ngá ê kiáⁿ約押ê小弟A-pí-su是做三個勇士ê頭人；伊kia̍h伊ê鎗phah死三百人，就tī三個勇士中有名。Sé-ló͘-ngá ê kiáⁿ Iok-ap ê sió-tī A-pí-su sī chòe saⁿ ê ióng-sū ê thâu-lâng; i kia̍h i ê chhiuⁿ phah-sí saⁿ-pah lâng, chiū tī saⁿ ê ióng-sū tiong ū miâ.

19伊 kiám m̄是三個勇士中ê第一尊貴ê mah？所以做in ê頭；總是不及前三個勇士。I kiám m̄-sī saⁿ ê ióng-sū tiong ê tē-it chun-kùi-ê mah? só͘-í chòe in ê thâu; chóng-sī put-ki̍p chêng saⁿ ê ióng-sū.

20Koh有Kah-siat人大勇士Iâ-hô-iâ-tāi ê kiáⁿ Pí-ná-ngá；伊有行出chōe-chōe大事；伊thâi死Mô͘-ap人A-lī-i-le̍k兩個kiáⁿ；koh tī落雪ê時落坑內，thâi死一隻獅。Koh ū Kah-siat lâng tōa ióng-sū Iâ-hô-iâ-tāi ê kiáⁿ Pí-ná-ngá; i ū kiâⁿ-chhut chōe-chōe tōa-sū; i thâi-sí Mô͘-ap lâng A-lī-i-le̍k nn̄g ê kiáⁿ; koh tī lo̍h-seh ê sî lo̍h khiⁿ-lāi, thâi-sí chi̍t chiah sai.

21Koh thâi死埃及一個大漢人；埃及人手裡kia̍h鎗，Pí-ná-ngá只有kia̍h錘落去伊hia，搶埃及人手裡ê鎗，用hit支鎗kā伊chân死。Koh thâi-sí Ai-ki̍p chi̍t ê tōa-hàn lâng; Ai-ki̍p lâng chhiú--nih kia̍h chhiuⁿ, Pí-ná-ngá chí-ū kia̍h thûi lo̍h-khì i hia, chhiúⁿ Ai-ki̍p lâng chhiú--nih ê chhiuⁿ, ēng hit ki chhiuⁿ kā i chân--sí.

22這是Iâ-hô-iâ-tāi ê kiáⁿ Pí-ná-ngá所行ê事；就tī三個勇士中得tio̍h名。Che sī Iâ-hô-iâ-tāi ê kiáⁿ Pí-ná-ngá só͘ kiâⁿ ê sū; chiū tī saⁿ ê ióng-sū tiong tit-tio̍h miâ.

23伊比三十個勇士khah尊貴；總是不及前三個勇士。大衛設立伊做伊ê侍衛長。I pí saⁿ-cha̍p ê ióng-sū khah chun-kùi; chóng-sī put-ki̍p chêng saⁿ ê ióng-sū. Tāi-pi̍t siat-li̍p i chòe i ê sī-ōe-tiúⁿ.

24三十個勇士中有約押ê小弟A-sat-hek；koh有伯利恆人Tó-to ê kiáⁿ Í-le̍k-hap-lân；Saⁿ-cha̍p ê ióng-sū tiong ū Iok-ap ê sió-tī A-sat-hek; koh ū Pek-lī-hêng lâng Tó-to ê kiáⁿ Í-le̍k-hap-lân;

25Hap-lu̍t人Sa-má，Hap-lu̍t人Í-lī-ka；Hap-lu̍t lâng Sa-má, Hap-lu̍t lâng Í-lī-ka;

26Phaⁿ-le̍k-thê人Hi-lī-su，Thê-ko-a人Ek-kiat ê kiáⁿ Í-la̍h；Phaⁿ-le̍k-thê lâng Hi-lī-su, Thê-ko-a lâng Ek-kiat ê kiáⁿ Í-la̍h;

27A-ná-tu̍t人A-pí-í-siā，Hō͘-sa人Bí-pún-nái；A-ná-tu̍t lâng A-pí-í-siā, Hō͘-sa lâng Bí-pún-nái;

28A-ha̍p人Sat-bûn，Nî-tô-hoat人Má-hap-lâi；A-ha̍p lâng Sat-bûn, Nî-tô-hoat lâng Má-hap-lâi;

29Nî-tô-hoat人Pa-ná ê kiáⁿ Hi-li̍p，便雅憫族Ki-pí-a人Lī-pài ê kiáⁿ Í-thài；Nî-tô-hoat lâng Pa-ná ê kiáⁿ Hi-li̍p, Piān-ngá-bín cho̍k Ki-pí-a lâng Lī-pài ê kiáⁿ Í-thài;

30Pí-la̍h-tùn人Pí-ná-ngá，Ka-si̍t溪人Hi-thài；Pí-la̍h-tùn lâng Pí-ná-ngá, Ka-si̍t khoe lâng Hi-thài;

31Pek-a-la̍h-pa人A-pí-a-pún，Pa-ló͘-bí人Ap-su-má-hut；Pek-a-la̍h-pa lâng A-pí-a-pún, Pa-ló͘-bí lâng Ap-su-má-hut;

32Sa-pún人Í-lī-ngá-hap-pa，Ngá-siān chiah-ê kiáⁿ中ê約拿單；Sa-pún lâng Í-lī-ngá-hap-pa, Ngá-siān chiah ê kiáⁿ tiong ê Iok-ná-tan;

33Hap-la̍h人Sa-má，Hap-la̍h人Sa-la̍h ê kiáⁿ A-hi-àm；Hap-la̍h lâng Sa-má, Hap-la̍h lâng Sa-la̍h ê kiáⁿ A-hi-àm;

34Má-ka人A-hap-pài ê kiáⁿ Í-lī-hoat-lia̍t，Ki-lô人A-hi-to-hut ê kiáⁿ Í-liân ；Má-ka lâng A-hap-pài ê kiáⁿ Í-lī-hoat-lia̍t, Ki-lô lâng A-hi-to-hut ê kiáⁿ Í-liân;

35Ka-bi̍t人Hi-su-lâi，A-pa人Phàⁿ-lâi；Ka-bi̍t lâng Hi-su-lâi, A-pa lâng Phàⁿ-lâi;

36Só-pa人Ná-tan ê kiáⁿ Í-kah，Ka-te̍k人Pa-nî；Só-pa lâng Ná-tan ê kiáⁿ Í-kah, Ka-te̍k lâng Pa-nî;

37A-bûn人Sé-le̍k，Pí-lio̍k人Ná-hap-lâi，是kā Sé-ló͘-ngá ê kiáⁿ約押kia̍h軍器ê；A-bûn lâng Sé-le̍k, Pí-lio̍k lâng Ná-hap-lâi, sī kā Sé-ló͘-ngá ê kiáⁿ Iok-ap kia̍h kun-khì ê;

38Í-thiap人Í-la̍h，Í-thiap人Ka-li̍p；Í-thiap lâng Í-la̍h, Í-thiap lâng Ka-li̍p;

39Hek人烏利亞；共三十七人。Hek lâng O͘-lī-à; kiōng saⁿ-cha̍p-chhit lâng.

1耶和華koh受氣以色列人，激動大衛來害in，就講，Tio̍h去算以色列kap猶大人。Iâ-hô-hoa koh siū-khì Í-sek-lia̍t lâng, kek-tōng Tāi-pi̍t lâi hāi in, chiū kóng, Tio̍h khì sǹg Í-sek-lia̍t kap Iû-tāi lâng.

2王吩咐kap伊tī-teh ê軍長約押講，你taⁿ去遍行以色列眾支派，tùi Tàn到別是巴，點算百姓，hō͘我知百姓ê數額。Ông hoan-hù kap i tī-teh ê kun-tiúⁿ Iok-ap kóng, Lí taⁿ khì piàn-kiâⁿ Í-sek-lia̍t chèng chi-phài, tùi Tàn kàu Pia̍t-sī-pa, tiám-sǹg peh-sìⁿ, hō͘ góa chai peh-sìⁿ ê siàu-gia̍h.

3約押kā王講，無論百姓jōa-chōe，願耶和華你ê上帝加添百倍，koh hō͘我ê主我ê王親目看見；總是我ê主我ê王啥事歡喜chit-ê事ah？Iok-ap kā ông kóng, Bô-lūn peh-sìⁿ jōa-chōe, goān Iâ-hô-hoa lí ê Siōng-tè ke-thiⁿ pah-pē, koh hō͘ góa ê chú góa ê ông chhin-ba̍k khòaⁿ-kìⁿ; chóng-sī góa ê chú góa ê ông siáⁿ-sū hoaⁿ-hí chit ê sū ah?

4總是王ê話贏過約押kap hiah-ê軍長。約押kap hiah-ê軍長就tùi王ê面前出去，點算以色列ê百姓。Chóng-sī ông ê ōe iâⁿ-kè Iok-ap kap hiah ê kun-tiúⁿ. Iok-ap kap hiah ê kun-tiúⁿ chiū tùi ông ê bīn-chêng chhut-khì, tiám-sǹg Í-sek-lia̍t ê peh-sìⁿ.

5In過約旦，紮營tī A-lô-jíⁿ，tī Ka-tek山谷中ê城ê chiàⁿ-pêng，kap Ngá-siā相近；In kè Iok-tàn, chat-iâⁿ tī A-lô-jíⁿ, tī Ka-tek soaⁿ-kok tiong ê siâⁿ ê chiàⁿ-pêng, kap Ngá-siā saⁿ-kūn;

6koh到Ki-lia̍t，kap Tha-thêng-ha̍p-sī ê地，koh到Tàn-ngá-an，se̍h到Se-tùn；koh kàu Ki-lia̍t, kap Tha-thêng-ha̍p-sī ê tōe, koh kàu Tàn-ngá-an, se̍h kàu Se-tùn;

7koh到Chhui-lô堅固ê城，kap Hi-bī人以及迦南人一切ê城；koh出去到猶大南方ê別是巴。koh kàu Chhui-lô kian-kò͘ ê siâⁿ, kap Hi-bī lâng í-ki̍p Ka-lâm lâng it-chhè ê siâⁿ; koh chhut-khì kàu Iû-tāi lâm-hng ê Pia̍t-sī-pa.

8In遍行全地，歷過九月日koh二十日；就倒tńg到耶路撒冷。In piàn-kiâⁿ choân-tōe, le̍k-kè káu-ge̍h-ji̍t koh jī-cha̍p ji̍t; chiū tò-tńg kàu Iâ-lō͘-sat-léng.

9約押用算百姓ê數額晉(chìn)hō͘王知。以色列人kia̍h刀ê勇士八十萬，猶大人有五十萬。Iok-ap ēng sǹg peh-sìⁿ ê siàu-gia̍h chìn hō͘ ông chai. Í-sek-lia̍t lâng kia̍h to ê ióng-sū poeh-cha̍p bān, Iû-tāi lâng ū gō͘-cha̍p bān.

10大衛算百姓ê數額了後，心就家己責備。大衛kā耶和華講，我行chit-ê事大大有犯罪。耶和華ah，求你除去你ê奴僕ê過失，因為我所行ê真戇。Tāi-pi̍t sǹg peh-sìⁿ ê siàu-gia̍h liáu-āu, sim chiū ka-kī chek-pī. Tāi-pi̍t kā Iâ-hô-hoa kóng, Góa kiâⁿ chit ê sū tōa-tōa ū hoān-chōe. Iâ-hô-hoa ah, kiû Lí tû-khì Lí ê lô͘-po̍k ê kè-sit, in-ūi góa só͘-kiâⁿ-ê chin gōng.

11大衛天光早起來ê時，耶和華ê話臨到先知Ka-tek，就是大衛ê先見ê，講，Tāi-pi̍t thiⁿ-kng-chá khí-lâi ê sî, Iâ-hô-hoa ê ōe lîm-kàu sian-ti Ka-tek, chiū-sī Tāi-pi̍t ê sian-kiàn ê, kóng,

12你去kā大衛講，耶和華án-ni講，Taⁿ我用三項hō͘你，你揀一項，我thang行tī你。Lí khì kā Tāi-pi̍t kóng, Iâ-hô-hoa án-ni kóng, Taⁿ Góa ēng saⁿ-hāng hō͘ lí, lí kéng chi̍t-hāng, Góa thang kiâⁿ tī lí.

13Ka-tek就來通知大衛，對伊講，你ài你ê地飢荒七年久mah？á是ài你ê對敵追jip你，你逃走tī伊ê面前三月日久ah？á是ài瘟疫tī你ê地三日久ah？Taⁿ你tio̍h chim-chiok想看cheh，我thang用甚麼話回覆差我ê。Ka-tek chiū lâi thong-ti Tāi-pi̍t, tùi i kóng, Lí ài lí ê tōe ki-hng chhit-nî kú mah? á-sī ài lí ê tùi-te̍k tui-jip lí, lí tô-cháu tī i ê bīn-chêng saⁿ-ge̍h-ji̍t kú ah? á-sī ài un-e̍k tī lí ê tōe saⁿ-ji̍t kú ah? Taⁿ lí tio̍h chim-chiok siūⁿ-khòaⁿ cheh, góa thang ēng sím-mi̍h ōe hê-hok chhe góa ê.

14大衛kā Ka-tek講，我真為難，咱寧可陷落tī耶和華ê手，因為伊有豐盛ê憐憫；我m̄願陷落tī人ê手。Tāi-pi̍t kā Ka-tek kóng, Góa chin ûi-lân, lán lêng-khó͘ hām-lo̍h tī Iâ-hô-hoa ê chhiú, in-ūi I ū hong-sēng ê lîn-bín; góa m̄-goān hām-lo̍h tī lâng ê chhiú.

15耶和華就降瘟疫hō͘以色列，tùi清早到所定tio̍h ê時，tùi Tàn到別是巴；百姓間死七萬人。Iâ-hô-hoa chiū kàng un-e̍k hō͘ Í-sek-lia̍t, tùi chheng-chá kàu só͘ tiāⁿ-tio̍h ê sî, tùi Tàn kàu Pia̍t-sī-pa; peh-sìⁿ-kan sí chhit-bān lâng.

16當天使伸手tī耶路撒冷，beh滅伊ê時，耶和華就退悔降落chit-ê災厄，就kā滅百姓ê天使講，夠額lah，kiu你ê手；hit時耶和華ê使者tī Iâ-pò͘-su人A-lô-ná ê五穀場。Tng thiⁿ-sài chhun-chhiú tī Iâ-lō͘-sat-léng, beh bia̍t i ê sî, Iâ-hô-hoa chiū thè-hóe kàng-lo̍h chit ê chai-ē, chiū kā bia̍t peh-sìⁿ ê thiⁿ-sài kóng, Kàu-gia̍h lah, kiu lí ê chhiú; hit-sî Iâ-hô-hoa ê sù-chiá tī Iâ-pò͘-su lâng A-lô-ná ê gō͘-kak-tiûⁿ.

17大衛看見phah百姓ê天使，就kā耶和華講，看ah，犯罪ê是我，悖逆ê也是我；總是chiah-ê kui群ê羊有做甚麼ah？願你ê手攻擊我，kap我父ê家。Tāi-pi̍t khòaⁿ-kìⁿ phah peh-sìⁿ ê thiⁿ-sài, chiū kā Iâ-hô-hoa kóng, Khòaⁿ ah, hoān-chōe-ê sī góa, pōe-ge̍k-ê iā sī góa; chóng-sī chiah ê kui-kûn ê iûⁿ ū chòe sím-mi̍h ah? goān Lí ê chhiú kong-kek góa, kap góa pē ê ke.

18Hit日Ka-tek來見大衛，kā伊講，你上去，tī Iâ-pò͘-su人A-lô-ná ê五穀場，kā耶和華起一座壇。Hit-ji̍t Ka-tek lâi kìⁿ Tāi-pi̍t, kā i kóng, Lí chiūⁿ-khì, tī Iâ-pò͘-su lâng A-lô-ná ê gō͘-kak-tiûⁿ, kā Iâ-hô-hoa khí chi̍t chō tôaⁿ.

19大衛照Ka-tek ê話上去，照耶和華ê命令。Tāi-pi̍t chiàu Ka-tek ê ōe chiūⁿ-khì, chiàu Iâ-hô-hoa ê bēng-lēng.

20A-lô-ná teh看，看見王kap伊ê人臣對面來；A-lô-ná就出去，仆tī地裡拜王。A-lô-ná teh khòaⁿ, khòaⁿ-kìⁿ ông kap i ê jîn-sîn tùi-bīn lâi; A-lô-ná chiū chhut-khì, phak tī tōe--nih pài ông.

21A-lô-ná講，我ê主我ê王來奴僕chia啥事？大衛講，我來beh買你chit-ê五穀場，kā耶和華起一座壇，hō͘百姓間ê瘟疫soah。A-lô-ná kóng, Góa ê chú góa ê ông lâi lô͘-po̍k chia siáⁿ-sū? Tāi-pi̍t kóng, Góa lâi beh bóe lí chit ê gō͘-kak-tiûⁿ, kā Iâ-hô-hoa khí chi̍t chō tôaⁿ, hō͘ peh-sìⁿ-kan ê un-e̍k soah.

22A-lô-ná kā大衛講，我ê主我ê王，照你所看做好ê the̍h來獻伊；看ah，chia有牛，thang做燒祭，有phah五穀ê器具，kap套牛ê ka-chhia，thang做柴。A-lô-ná kā Tāi-pi̍t kóng, Góa ê chú góa ê ông, chiàu lí só͘ khòaⁿ-chòe hó-ê the̍h-lâi hiàn i; khòaⁿ ah, chia ū gû, thang chòe sio-chè, ū phah gō͘-kak ê khì-kū, kap thò gû ê ka-chhia, thang chòe chhâ.

23王ah，A-lô-ná用這一切送hō͘王。A-lô-ná koh kā王講，願耶和華你ê上帝接納你。Ông ah, A-lô-ná ēng che it-chhè sàng hō͘ ông. A-lô-ná koh kā ông kóng, Goān Iâ-hô-hoa lí ê Siōng-tè chiap-la̍p lí.

24王kā A-lô-ná講，M̄-thang ah，我beh照價錢kā你買；我m̄肯用白白得tio̍h ê物做燒祭，獻hō͘耶和華我ê上帝。大衛就用五十sià-khek-le̍k ê銀，買hit-ê五穀場kap牛。Ông kā A-lô-ná kóng, M̄-thang ah, góa beh chiàu kè-chîⁿ kā lí bóe; góa m̄-khéng ēng pe̍h-pe̍h tit-tio̍h ê mi̍h chòe sio-chè, hiàn hō͘ Iâ-hô-hoa góa ê Siōng-tè. Tāi-pi̍t chiū ēng gō͘-cha̍p sià-khek-le̍k ê gûn, bóe hit ê gō͘-kak-tiûⁿ kap gû.

25大衛tī-hia kā耶和華起一座壇，獻燒祭kap謝恩祭；án-ni耶和華聽in為地方所求ê，瘟疫tī以色列中就soah。Tāi-pi̍t tī-hia kā Iâ-hô-hoa khí chi̍t chō tôaⁿ, hiàn sio-chè kap siā-un-chè; án-ni Iâ-hô-hoa thiaⁿ in ūi tōe-hng só͘ kiû ê, un-e̍k tī Í-sek-lia̍t tiong chiū soah.

1大衛王歲chōe年老，雖然kā伊蓋被，猶原bōe燒。Tāi-pi̍t ông hè-chōe nî-lāu, sui-jiân kā i kah-phē, iû-goân bōe sio.

2伊hiah-ê奴僕就kā伊講，Tio̍h kā我ê主我ê王chhē一個在室女，hō͘伊khiā tī王ê面前來奉承伊；koh睏tī你ê胸前，thang hō͘我ê主我ê王得tio̍h燒。I hiah ê lô͘-po̍k chiū kā i kóng, Tio̍h kā góa ê chú góa ê ông chhē chi̍t ê chāi-sek-lú, hō͘ i khiā tī ông ê bīn-chêng lâi hōng-sêng i; koh khùn tī lí ê heng-chêng, thang hō͘ góa ê chú góa ê ông tit-tio̍h sio.

3就tī以色列ê四境chhē súi ê cha-bó͘-gín-ná；chhē-tio̍h Su-liām一個女子，名A-pí-soah，帶到王hia。Chiū tī Í-sek-lia̍t ê sì-kéng chhē súi ê cha-bó͘-gín-ná; chhē--tio̍h Su-liām chi̍t ê lú-chú, miâ A-pí-soah, tòa kàu ông hia.

4Chit-ê cha-bó͘-gín-ná súi到極；伊奉承王，伺候伊。總是王無親近伊。Chit ê cha-bó͘-gín-ná súi kàu-ke̍k; i hōng-sêng ông, su-hāu i. Chóng-sī ông bô chhin-kūn i.

5Hit時Hap-ki̍p ê kiáⁿ A-to-nî-ngá自高，講，我beh做王；就為家己備辦車，馬兵koh五十人走tī伊ê頭前。Hit-sî Hap-ki̍p ê kiáⁿ A-to-nî-ngá chū-ko, kóng, Góa beh chòe-ông; chiū ūi ka-kī pī-pān chhia, bé-peng koh gō͘-cha̍p lâng cháu tī i ê thâu-chêng.

6伊ê老父平時m̄-bat hō͘伊憂悶，m̄-bat對伊講，你怎樣án-ni做？伊生做不止好；伊出世tī Ap-sa-li王ê尾後。I ê lāu-pē pêng-sî m̄-bat hō͘ i iu-būn, m̄-bat tùi i kóng, Lí cháiⁿ-iūⁿ án-ni chòe? I siⁿ-chòe put-chí hó; i chhut-sì tī Ap-sa-liông ê bé-āu.

7伊kap Sé-ló͘-ngá ê kiáⁿ Iok-ap，kap祭司A-pí-a-tha參詳；in就tè A-to-nî-ngá，來幫贊伊。I kap Sé-ló͘-ngá ê kiáⁿ Iok-ap, kap chè-si A-pí-a-tha chham-siông; in chiū tè A-to-nî-ngá, lâi pang-chān i.

8總是祭司Sat-tok，kap Iâ-hô-iâ-tāi ê kiáⁿ Pí-ná-ngá，先知Ná-tan，kap Sī-múi，Lī-í，kap大衛ê勇士，lóng無為A-to-nî-ngá。Chóng-sī chè-si Sat-tok, kap Iâ-hô-iâ-tāi ê kiáⁿ Pí-ná-ngá, sian-ti Ná-tan, kap Sī-múi, Lī-í, kap Tāi-pi̍t ê ióng-sū, lóng bô ūi A-to-nî-ngá.

9A-to-nî-ngá tī近Ún-lô-kiat、Só-hi-lia̍t ê石磐邊，thâi羊、牛，kap肥ê cheng-siⁿ，請伊ê眾兄弟，就是王ê kiáⁿ，以及猶大所有做王ê人臣ê眾人。A-to-nî-ngá tī kūn Ún-lô-kiat, Só-hi-lia̍t ê chio̍h-pôaⁿ piⁿ, thâi iûⁿ, gû, kap pûi ê cheng-siⁿ, chhiáⁿ i ê chèng hiaⁿ-tī, chiū-sī ông ê kiáⁿ, í-ki̍p Iû-tāi só͘ ū chòe ông ê jîn-sîn ê chèng-lâng.

10獨獨先知Ná-tan，kap Pí-ná-ngá，以及勇士，kap伊ê小弟所羅門，伊lóng無請in。To̍k-to̍k sian-ti Ná-tan, kap Pí-ná-ngá, í-ki̍p ióng-sū, kap i ê sió-tī Só͘-lô-bûn, i lóng bô chhiáⁿ in.

11Ná-tan kā所羅門ê老母Poa̍t-sī-pa講，Hap-ki̍p ê kiáⁿ A-to-nî-ngá做王lah，你無聽見mah？咱ê主大衛也m̄知。Ná-tan kā Só͘-lô-bûn ê lāu-bú Poa̍t-sī-pa kóng, Hap-ki̍p ê kiáⁿ A-to-nî-ngá chòe-ông lah, lí bô thiaⁿ-kìⁿ mah? Lán ê chú Tāi-pi̍t iā m̄-chai.

12Taⁿ你來，我替你打算，thang保全你ê性命，kap你ê kiáⁿ所羅門ê性命。Taⁿ lí lâi, góa thòe lí táⁿ-sǹg, thang pó-choân lí ê sìⁿ-miā, kap lí ê kiáⁿ Só͘-lô-bûn ê sìⁿ-miā.

13你入去見大衛王，kā伊講，我ê主我ê王ah，你kiám m̄-bat對你ê女婢chiù-chōa講，你ê kiáⁿ所羅門beh續接我做王，伊beh坐我ê位mah？怎樣A-to-nî-ngá做王ah？Lí ji̍p--khì kìⁿ Tāi-pi̍t ông, kā i kóng, Góa ê chú góa ê ông ah, lí kiám m̄-bat tùi lí ê lú-pī chiù-chōa kóng, Lí ê kiáⁿ Só͘-lô-bûn beh sòa-chiap góa chòe-ông, i beh chē góa ê ūi mah? cháiⁿ-iūⁿ A-to-nî-ngá chòe-ông ah?

14你tī-hia kap王講話ê時，我也tè你ê ka-chiah後入去，來干證你ê話是實。Lí tī-hia kap ông kóng-ōe ê sî, góa iā tè lí ê ka-chiah-āu ji̍p--khì, lâi kan-chèng lí ê ōe sī si̍t.

15Poa̍t-sī-pa入去房內見王，王真老；Su-liām ê cha-bó͘-gín-ná A-pí-soah teh伺候王。Poa̍t-sī-pa ji̍p--khì pâng-lāi kìⁿ ông, ông chin lāu; Su-liām ê cha-bó͘-gín-ná A-pí-soah teh su-hāu ông.

16Poa̍t-sī-pa鞠躬拜王；王講，你beh甚麼？Poa̍t-sī-pa kiok-kiong pài ông; ông kóng, Lí beh sím-mi̍h?

17伊kā伊講，我ê主ah，你bat kí耶和華你ê上帝，來對你ê女婢chiù-chōa，講，你ê kiáⁿ所羅門beh續接我做王，伊beh坐tī我ê位。I kā i kóng, Góa ê chú ah, lí bat kí Iâ-hô-hoa lí ê Siōng-tè, lâi tùi lí ê lú-pī chiù-chōa, kóng, Lí ê kiáⁿ Só͘-lô-bûn beh sòa-chiap góa chòe-ông, i beh chē tī góa ê ūi.

18看ah，taⁿ A-to-nî-ngá做王，我ê主我ê王你也m̄知。Khòaⁿ ah, taⁿ A-to-nî-ngá chòe-ông, góa ê chú góa ê ông lí iā m̄-chai.

19伊有thâi chōe-chōe牛，肥ê cheng-siⁿ，kap羊，請王ê眾kiáⁿ，kap祭司A-pí-a-tha，kap軍長Iok-ap；獨獨你ê奴僕所羅門，伊無請。I ū thâi chōe-chōe gû, pûi ê cheng-siⁿ, kap iûⁿ, chhiáⁿ ông ê chèng-kiáⁿ, kap chè-si A-pí-a-tha, kap kun-tiúⁿ Iok-ap; to̍k-to̍k lí ê lô͘-po̍k Só͘-lô-bûn, i bô chhiáⁿ.

20我ê主我ê王ah，以色列眾人ê目睭lóng teh看你，thèng候你kā in講，是誰 beh續接我ê主我ê王，來坐伊ê位。Góa ê chú góa ê ông ah, Í-sek-lia̍t chèng-lâng ê ba̍k-chiu lóng teh khòaⁿ lí, thèng-hāu lí kā in kóng, chī-chūi beh sòa-chiap góa ê chú góa ê ông, lâi chē i ê ūi.

21若無，到我ê主我ê王kap列祖相kap睏了後，我kap我ê kiáⁿ所羅門beh算做有罪ê人。Nā bô, kàu góa ê chú góa ê ông kap lia̍t-chó͘ saⁿ-kap khùn liáu-āu, góa kap góa ê kiáⁿ Só͘-lô-bûn beh sǹg-chòe ū-chōe ê lâng.

22看ah，伊iáu teh kap王講話ê時，先知Ná-tan也入來。Khòaⁿ ah, i iáu teh kap ông kóng-ōe ê sî, sian-ti Ná-tan iā ji̍p-lâi.

23有人kā王講，先知Ná-tan tī-chia。Ná-tan入去王ê面前，仆tī地裡拜王。Ū lâng kā ông kóng, Sian-ti Ná-tan tī-chia. Ná-tan ji̍p-khì ông ê bīn-chêng, phak tī tōe--nih pài ông.

24Ná-tan講，我ê主我ê王，你kiám有講，A-to-nî-ngá beh續接我做王，beh坐我ê位mah？Ná-tan kóng, Góa ê chú góa ê ông, lí kiám ū kóng, A-to-nî-ngá beh sòa-chiap góa chòe-ông, beh chē góa ê ūi mah?

25因為今á日伊落去，thâi chōe-chōe牛，kap肥ê cheng-siⁿ，kap羊，請王ê眾kiáⁿ，kap chiah-ê軍長，kap祭司A-pí-a-tha；看ah，in tī伊ê面前lim食，就講，願A-to-nî-ngá王萬歲。In-ūi kin-á-ji̍t i lo̍h--khì, thâi chōe-chōe gû, kap pûi ê cheng-siⁿ, kap iûⁿ, chhiáⁿ ông ê chèng-kiáⁿ, kap chiah ê kun-tiúⁿ, kap chè-si A-pí-a-tha; khòaⁿ ah, in tī i ê bīn-chêng lim-chia̍h, chiū kóng, Goān A-to-nî-ngá ông bān-sòe.

26獨獨我，就是你ê奴僕，kap祭司Sat-tok，kap Iâ-hô-iâ-tāi ê kiáⁿ Pí-ná-ngá，以及你ê奴僕所羅門，伊lóng無請。To̍k-to̍k góa, chiū-sī lí ê lô͘-po̍k, kap chè-si Sat-tok, kap Iâ-hô-iâ-tāi ê kiáⁿ Pí-ná-ngá, í-ki̍p lí ê lô͘-po̍k Só͘-lô-bûn, i lóng bô chhiáⁿ.

27這是我ê主我ê王所做，也無kā你ê奴僕講，是誰 beh續接我ê主我ê王，坐伊ê位mah？Che sī góa ê chú góa ê ông só͘ chòe, iā bô kā lí ê lô͘-po̍k kóng, chī-chūi beh sòa-chiap góa ê chú góa ê ông, chē i ê ūi mah?

28大衛王應講，Kā我叫Poa̍t-sī-pa來。伊就入來王ê面前，tī王ê面前khiā-teh。Tāi-pi̍t ông ìn kóng, Kā góa kiò Poa̍t-sī-pa lâi. I chiū ji̍p-lâi ông ê bīn-chêng, tī ông ê bīn-chêng khiā--teh.

29王chiù-chōa講，我kí救我ê性命脫離一切ê患難，永活ê耶和華來講，Ông chiù-chōa kóng, Góa kí kiù góa ê sìⁿ-miā thoat-lī it-chhè ê hoān-lān, éng-oa̍h ê Iâ-hô-hoa lâi kóng,

30我既然kí耶和華以色列ê上帝對你chiù-chōa，講，你ê kiáⁿ所羅門beh續接我做王，伊beh坐我ê位來替我，我今á日beh照án-ni行。Góa kì-jiân kí Iâ-hô-hoa Í-sek-lia̍t ê Siōng-tè tùi lí chiù-chōa, kóng, Lí ê kiáⁿ Só͘-lô-bûn beh sòa-chiap góa chòe-ông, i beh chē góa ê ūi lâi thòe góa, góa kin-á-ji̍t beh chiàu án-ni kiâⁿ.

31Poa̍t-sī-pa就鞠躬仆tī地裡，拜王，講，願我ê主大衛王萬萬歲。Poa̍t-sī-pa chiū kiok-kiong phak tī tōe--nih, pài ông, kóng, Goān góa ê chú Tāi-pi̍t ông bān-bān-sòe.

32大衛王koh講，Kā我叫祭司Sat-tok，先知Ná-tan，kap Iâ-hô-iâ-tāi ê kiáⁿ Pí-ná-ngá來；in就lóng來王ê面前。Tāi-pi̍t ông koh kóng, Kā góa kiò chè-si Sat-tok, sian-ti Ná-tan, kap Iâ-hô-iâ-tāi ê kiáⁿ Pí-ná-ngá lâi; in chiū lóng lâi ông ê bīn-chêng.

33王kā in講，Tio̍h chhōa lín ê主hiah-ê奴僕kap lín去，hō͘我ê kiáⁿ所羅門騎我ê騾，hō͘伊落去到Ki-hùn；Ông kā in kóng, Tio̍h chhōa lín ê chú hiah ê lô͘-po̍k kap lín khì, hō͘ góa ê kiáⁿ Só͘-lô-bûn khiâ góa ê lô, hō͘ i lo̍h-khì kàu Ki-hùn;

34tī-hia祭司Sat-tok，kap先知Ná-tan，tio̍h用油抹伊做以色列王；lín也tio̍h pûn哨角，講，願所羅門王萬歲。tī-hia chè-si Sat-tok, kap sian-ti Ná-tan, tio̍h ēng iû boah i chòe Í-sek-lia̍t ông; lín iā tio̍h pûn sàu-kak, kóng, Goān Só͘-lô-bûn ông bān-sòe.

35然後tè伊上來，伊beh來坐我ê位，續接我做王；因為我設立伊做以色列kap猶大ê君王。Jiân-āu tè i chiūⁿ-lâi, i beh lâi chē góa ê ūi, sòa-chiap góa chòe-ông; in-ūi góa siat-li̍p i chòe Í-sek-lia̍t kap Iû-tāi ê kun-ông.

36Iâ-hô-iâ-tāi ê kiáⁿ Pí-ná-ngá 應王講，A-bēng，願耶和華我ê主我ê王ê上帝也án-ni講。Iâ-hô-iâ-tāi ê kiáⁿ Pí-ná-ngá ìn ông kóng, A-bēng, goān Iâ-hô-hoa góa ê chú góa ê ông ê Siōng-tè iā án-ni kóng.

37耶和華怎樣kap我ê主我ê王tī-teh，願伊照án-ni kap所羅門tī-teh，koh hō͘伊ê國位比我ê主大衛王ê國位koh-khah大。Iâ-hô-hoa cháiⁿ-iūⁿ kap góa ê chú góa ê ông tī-teh, goān I chiàu án-ni kap Só͘-lô-bûn tī-teh, koh hō͘ i ê kok-ūi pí góa ê chú Tāi-pi̍t ông ê kok-ūi koh khah tōa.

38Tùi án-ni，祭司Sat-tok，先知Ná-tan，Iâ-hô-iâ-tāi ê kiáⁿ Pí-ná-ngá，kap Ki-lī-thê人、Pí-lī-thê人，lóng落去，hō͘所羅門騎大衛王ê騾，送伊到Ki-hùn。Tùi án-ni chè-si Sat-tok, sian-ti Ná-tan, Iâ-hô-iâ-tāi ê kiáⁿ Pí-ná-ngá, kap Ki-lī-thê lâng, Pí-lī-thê lâng, lóng lo̍h-khì, hō͘ Só͘-lô-bûn khiâ Tāi-pi̍t ông ê lô, sàng i kàu Ki-hùn.

39祭司Sat-tok就tùi布棚內the̍h貯油ê角，用油抹所羅門；人就pûn哨角，眾百姓lóng講，願所羅門王萬歲。Chè-si Sat-tok chiū tùi Pò͘-pîⁿ-lāi the̍h tóe-iû ê kak, ēng iû boah Só͘-lô-bûn; lâng chiū pûn sàu-kak, chèng peh-sìⁿ lóng kóng, Goān Só͘-lô-bûn ông bān-sòe.

40眾百姓tè伊上來，koh pûn笛á，大大歡喜，致到地因為in ê聲到beh裂開。Chèng peh-sìⁿ tè i chiūⁿ--lâi, koh pûn ta̍t-á, tōa-tōa hoaⁿ-hí, tì-kàu tōe in-ūi in ê siaⁿ kàu beh li̍h-khui.

41A-to-nî-ngá以及kap伊tī-teh hiah-ê人客tú-á食桌 soah聽見。Iok-ap聽見哨角ê聲就講，城內怎樣有hōa-hōa哮ê聲ah？伊iáu teh講ê時，看ah，祭司A-pí-a-tha ê kiáⁿ約拿單來。A-to-nî-ngá í-ki̍p kap i tī-teh hiah ê lâng-kheh tú-á chia̍h-toh soah thiaⁿ-kìⁿ. Iok-ap thiaⁿ-kìⁿ sàu-kak ê siaⁿ chiū kóng, Siâⁿ-lāi cháiⁿ-iūⁿ ū hōa-hōa-háu ê siaⁿ ah? I iáu teh kóng ê sî, khòaⁿ ah, chè-si A-pí-a-tha ê kiáⁿ Iok-ná-tan lâi.

42A-to-nî-ngá kā伊講，入來，你是妥當人，必定是報好消息。A-to-nî-ngá kā i kóng, Ji̍p-lâi, lí sī thò-tòng lâng, pit-tiāⁿ sī pò hó siau-sit.

43約拿單應A-to-nî-ngá講，有影咱ê主大衛王已經設立所羅門做王；Iok-ná-tan ìn A-to-nî-ngá kóng, Ū-iáⁿ lán ê chú Tāi-pi̍t ông í-keng siat-li̍p Só͘-lô-bûn chòe-ông;

44王差祭司Sat-tok，先知Ná-tan，Iâ-hô-iâ-tāi ê kiáⁿ Pí-ná-ngá，kap Ki-lī-thê人，Pí-lī-thê人，kap所羅門去，in hō͘伊騎王ê騾；ông chhe chè-si Sat-tok, sian-ti Ná-tan, Iâ-hô-iâ-tāi ê kiáⁿ Pí-ná-ngá, kap Ki-lī-thê lâng, Pí-lī-thê lâng, kap Só͘-lô-bûn khì, in hō͘ i khiâ ông ê lô;

45祭司Sat-tok kap先知Ná-tan，tī Ki-hùn已經抹伊做王；in lóng tùi hia上來真歡喜，致到城應聲；這就是lín所聽見ê聲；chè-si Sat-tok kap sian-ti Ná-tan, tī Ki-hùn í-keng boah i chòe-ông; in lóng tùi hia chiūⁿ-lâi chin hoaⁿ-hí, tì-kàu siâⁿ ìn siaⁿ; che chiū-sī lín só͘ thiaⁿ-kìⁿ ê siaⁿ;

46koh所羅門已經坐國位。koh Só͘-lô-bûn í-keng chē kok-ūi.

47王ê人臣也來kā咱ê主大衛王祝福，講，願你ê上帝hō͘所羅門ê名，比你ê名，khah贏，hō͘伊ê國位，比你ê國位，khah大；王就tī床裡àⁿ落去拜。Ông ê jîn-sîn iā lâi kā lán ê chú Tāi-pi̍t ông chiok-hok, kóng, Goān lí ê Siōng-tè hō͘ Só͘-lô-bûn ê miâ, pí lí ê miâ, khah-iâⁿ, hō͘ i ê kok-ūi, pí lí ê kok-ūi, khah-tōa; ông chiū tī chhn̂g--nih àⁿ--lo̍h-khì pài.

48王也án-ni講，耶和華以色列ê上帝是應該o-ló ê，因為伊賞賜我有一人今á日坐我ê位，我也親目看見。Ông iā án-ni kóng, Iâ-hô-hoa Í-sek-lia̍t ê Siōng-tè sī eng-kai o-ló--ê, in-ūi I siúⁿ-sù góa ū chi̍t-lâng kin-á-ji̍t chē góa ê ūi, góa iā chhin-ba̍k khòaⁿ-kìⁿ.

49Hiah-ê kap A-to-nî-ngá tī-teh ê人客lóng驚惶起來，ta̍k人行伊n ê路。Hiah-ê kap A-to-nî-ngá tī-teh ê lâng-kheh lóng kiaⁿ-hiâⁿ khí-lâi, ta̍k-lâng kiâⁿ in ê lō͘.

50A-to-nî-ngá為tio̍h所羅門就驚，起來去擒壇角。A-to-nî-ngá ūi-tio̍h Só͘-lô-bûn chiū kiaⁿ, khí-lâi khì khîⁿ tôaⁿ-kak.

51有人kā所羅門講，看ah，A-to-nî-ngá驚所羅門王，因為伊擒壇角，講，願所羅門王今á日對我chiù-chōa，的確無用刀thâi死伊ê奴僕。Ū lâng kā Só͘-lô-bûn kóng, Khòaⁿ ah, A-to-nî-ngá kiaⁿ Só͘-lô-bûn ông, in-ūi i khîⁿ tôaⁿ-kak, kóng, Goān Só͘-lô-bûn ông kin-á-ji̍t tùi góa chiù-chōa, tek-khak bô ēng to thâi-sí i ê lô͘-po̍k.

52所羅門講，伊若beh做好人，一支頭毛也bōe ka-la̍uh tī地裡；若看伊有pháiⁿ，就的確tio̍h死。Só͘-lô-bûn kóng, I nā beh chòe hó-lâng, chi̍t ki thâu-mn̂g iā bōe ka-la̍uh tī tōe--nih; nā khòaⁿ i ū pháiⁿ, chiū tek-khak tio̍h sí.

53所羅門王就差人去，in就帶伊tùi壇裡落來。伊就來拜tī所羅門王ê面前。所羅門kā伊講，你tò去你ê厝。Só͘-lô-bûn ông chiū chhe lâng khì, in chiū tòa i tùi tôaⁿ--nih lo̍h-lâi. I chiū lâi pài tī Só͘-lô-bûn ông ê bīn-chêng. Só͘-lô-bûn kā i kóng, Lí tò-khì lí ê chhù.