1掃羅ê家kap大衛ê家交戰久久；大衛ná強盛，掃羅ê家ná衰弱。Sò-lô ê ke kap Tāi-pi̍t ê ke kau-chiàn kú-kú; Tāi-pi̍t ná kiông-sēng, Sò-lô ê ke ná soe-jio̍k.

2大衛tī Hi-pek-lûn生kúi-nā ê kiáⁿ；大kiáⁿ Àm-lùn，是Iâ-su-lia̍t人A-hi-loán所生ê；Tāi-pi̍t tī Hi-pek-lûn siⁿ kui-nā ê kiáⁿ; toa-kiáⁿ Àm-lùn, sī Iâ-su-lia̍t lâng A-hi-loán só͘ siⁿ ê;

3第二個Ki-lī-ap，是bat做Ka-bi̍t人Ná-pat ê bó͘ A-pí-kai所生ê；第三個，押沙龍，是Ki-su̍t王Ta̍t-mái ê cha-bó͘-kiáⁿ Má-ka ê kiáⁿ；tē-jī-ê Ki-lī-ap, sī bat chòe Ka-bi̍t lâng Ná-pat ê bó͘ A-pí-kai só͘ siⁿ ê; tē-saⁿ-ê, Ap-sa-liông, sī Ki-su̍t ông Ta̍t-mái ê cha-bó͘-kiáⁿ Má-ka ê kiáⁿ;

4第四個，A-to-nî-ngá，是Hap-ki̍p ê kiáⁿ；第五個，Sī-hoat-thê-ngá，是A-pí-tha ê kiáⁿ；tē-sì-ê, A-to-nî-ngá, sī Hap-ki̍p ê kiáⁿ; tē-gō͘-ê, Sī-hoat-thê-ngá, sī A-pí-tha ê kiáⁿ;

5第六個，Í-te̍k-liām，是大衛ê bó͘ Í-kek-la̍h所生ê；chiah-ê是大衛tī Hi-pek-lûn所生ê。tē-la̍k-ê, Í-te̍k-liām, sī Tāi-pi̍t ê bó͘ Í-kek-la̍h só͘ siⁿ ê; chiah-ê sī Tāi-pi̍t tī Hi-pek-lûn só͘ siⁿ ê.

6掃羅ê家kap大衛ê家交戰ê時，Ap-nî-jíⁿ tī掃羅ê家家己強。Sò-lô ê ke kap Tāi-pi̍t ê ke kau-chiàn ê sî, Ap-nî-jíⁿ tī Sò-lô ê ke ka-kī kiông.

7掃羅有一個妃，名叫Lī-su-pa，是Ài-a ê cha-bó͘-kiáⁿ。I-si-pho-siat對Ap-nî-jíⁿ講，你啥事kap我老父ê妃同房ah？Sò-lô ū chi̍t ê hui, miâ kiò Lī-su-pa, sī Ài-a ê cha-bó͘-kiáⁿ. I-si-pho-siat tùi Ap-nî-jíⁿ kóng, Lí siáⁿ-sū kap góa lāu-pē ê hui tâng-pâng ah?

8Ap-nî-jíⁿ因為I-si-pho-siat ê話，就真受氣，講，我kiám是猶大ê狗頭mah？我好款待你ê老父掃羅ê家，kap伊ê兄弟朋友，無將你交tī大衛ê手，你今á日竟然因為chit-ê婦人人責備我mah？Ap-nî-jíⁿ in-ūi I-si-pho-siat ê ōe, chiū chin siū-khì, kóng, Góa kiám-sī Iû-tāi ê káu-thâu mah? góa hó khoán-thāi lí ê lāu-pē Sò-lô ê ke, kap i ê hiaⁿ-tī pêng-iú, bô chiong lí kau tī Tāi-pi̍t ê chhiú, lí kin-á-ji̍t kéng-jiân in-ūi chit ê hū-jîn-lâng chek-pī góa mah?

9我若無照耶和華所對大衛chiù-chōa-ê來行tī伊，就願上帝加倍責罰。Góa nā bô chiàu Iâ-hô-hoa só͘ tùi Tāi-pi̍t chiù-chōa-ê lâi kiâⁿ tī i, chiū goān Siōng-tè ka-pē chek-hoa̍t.

10Ap-nî-jíⁿ，beh tùi掃羅ê家移徙國位，來建立大衛ê位，hō͘伊治理以色列kap猶大，tùi Tàn到別是巴。Ap-nî-jíⁿ, beh tùi Sò-lô ê ke î-sóa kok-ūi, lâi kiàn-li̍p Tāi-pi̍t ê ūi, hō͘ i tī-lí Í-sek-lia̍t kap Iû-tāi, tùi Tàn kàu Pia̍t-sī-pa.

11I-si-pho-siat，因為驚Ap-nî-jíⁿ，bōe應一句話。I-si-pho-siat, in-ūi kiaⁿ Ap-nî-jíⁿ, bōe ìn chi̍t-kù-ōe.

12Ap-nî-jíⁿ為tio̍h本身差使者去見大衛講，chit-ê地方屬是誰 ah？Koh講，你kap我立約，我ê手beh幫贊你，hō͘以色列lóng歸你。Ap-nî-jíⁿ ūi-tio̍h pún-sin chhe sù-chiá khì kìⁿ Tāi-pi̍t kóng, Chit ê tōe-hng sio̍k chī-chūi ah? Koh kóng, Lí kap góa li̍p-iok, góa ê chhiú beh pang-chān lí, hō͘ Í-sek-lia̍t lóng kui lí.

13大衛講，好，我kap你立約；總是我beh對你討一項，就是你來見我ê面hit時，若無將掃羅ê cha-bó͘-kiáⁿ Bí-kah chhōa來，的確bōe見我ê面。Tāi-pi̍t kóng, Hó, góa kap lí li̍p-iok; chóng-sī góa beh tùi lí thó chi̍t-hāng, chiū-sī lí lâi kìⁿ góa ê bīn hit-sî, nā bô chiong Sò-lô ê cha-bó͘-kiáⁿ Bí-kah chhōa-lâi, tek-khak bōe kìⁿ góa ê bīn.

14大衛就差使者去見掃羅ê kiáⁿ I-si-pho-siat，講，你tio̍h將我ê bó͘ Bí-kah還我，伊就是我bat用腓利士人一百陽物ê皮所聘定ê。Tāi-pi̍t chiū chhe sù-chiá khì kìⁿ Sò-lô ê kiáⁿ I-si-pho-siat, kóng, Lí tio̍h chiong góa ê bó͘ Bí-kah hêng góa, i chiū-sī góa bat ēng Hui-lī-sū lâng chi̍t-pah iông-bu̍t ê phê só͘ phèng-tiāⁿ ê.

15I-si-pho-siat就差人對伊ê丈夫La̍h-ek ê kiáⁿ Phàⁿ-thiat hia，帶伊來。I-si-pho-siat chiū chhe lâng tùi i ê tiōng-hu La̍h-ek ê kiáⁿ Phàⁿ-thiat hia, tòa i lâi.

16伊ê丈夫tè伊ê後面，ná行ná哮，kap伊到Pa-hō͘-lîm。Ap-nî-jíⁿ kā伊講，tò去ah。伊就tò去。I ê tiōng-hu tè i ê āu-bīn, ná-kiâⁿ ná-háu, kap i kàu Pa-hō͘-lîm. Ap-nî-jíⁿ kā i kóng, Tò--khì ah. I chiū tò--khì.

17Ap-nî-jíⁿ kap以色列ê長老參詳，講，Lín前欣慕大衛做王治理lín；taⁿ tio̍h行伊；Ap-nî-jíⁿ kap Í-sek-lia̍t ê tióng-ló chham-siông, kóng, Lín chêng him-bō͘ Tāi-pi̍t chòe ông tī-lí lín; taⁿ tio̍h kiâⁿ i;

18因為耶和華bat論到大衛講，我beh用我ê奴僕大衛ê手救我ê百姓以色列脫離腓利士人ê手，kap眾對敵ê手。in-ūi Iâ-hô-hoa bat lūn-kàu Tāi-pi̍t kóng, Góa beh ēng Góa ê lô͘-po̍k Tāi-pi̍t ê chhiú kiù Góa ê peh-sìⁿ Í-sek-lia̍t thoat-lī Hui-lī-sū lâng ê chhiú, kap chèng tùi-tek ê chhiú.

19Ap-nî-jíⁿ也講hō͘便雅憫人聽；koh到Hi-pek-lûn，將以色列人，kap便雅憫全家，一切所看做好ê，講hō͘大衛聽。Ap-nî-jíⁿ iā kóng hō͘ Piān-ngá-bín lâng thiaⁿ; koh kàu Hi-pek-lûn, chiong Í-sek-lia̍t lâng, kap Piān-ngá-bín choân-ke, it-chhè só͘ khòaⁿ-chòe hó ê, kóng hō͘ Tāi-pi̍t thiaⁿ.

20Ap-nî-jíⁿ kap二十人到Hi-pek-lûn見大衛。大衛為tio̍h Ap-nî-jíⁿ，以及kap伊來ê人，設筵席。Ap-nî-jíⁿ kap jī-cha̍p lâng kàu Hi-pek-lûn kìⁿ Tāi-pi̍t. Tāi-pi̍t ūi-tio̍h Ap-nî-jíⁿ, í-ki̍p kap i lâi ê lâng, siat iân-sia̍h.

21Ap-nî-jíⁿ kā大衛講，我beh起來，去招集以色列眾人來見我ê主我ê王，hō͘ in thang kap你立約，你就thang做王，照心所ài來管理。大衛就送Ap-nî-jíⁿ去；伊就平安去。Ap-nî-jíⁿ kā Tāi-pi̍t kóng, Góa beh khí--lâi, khì chio-chi̍p Í-sek-lia̍t chèng-lâng lâi kìⁿ góa ê chú góa ê ông, hō͘ in thang kap lí li̍p-iok, lí chiū thang chòe-ông, chiàu sim só͘ ài lâi koán-lí. Tāi-pi̍t chiū sàng Ap-nî-jíⁿ khì; i chiū pêng-an khì.

22大衛ê兵kap約押出軍tò來，帶chōe-chōe搶ê物來；hit時Ap-nî-jíⁿ無tī Hi-pek-lûn大衛hia，因為大衛已經送伊去，伊也平安去。Tāi-pi̍t ê peng kap Iok-ap chhut-kun tò--lâi, tòa chōe-chōe chhiúⁿ ê mi̍h lâi; hit-sî Ap-nî-jíⁿ bô tī Hi-pek-lûn Tāi-pi̍t hia, in-ūi Tāi-pi̍t í-keng sàng i khì, i iā pêng-an khì.

23約押kap tè伊ê全軍已經到，有人通知約押講，Nî-jíⁿ ê kiáⁿ Ap-nî-jíⁿ來見王，王送伊去，伊也平安去。Iok-ap kap tè i ê choân-kun í-keng kàu, ū lâng thong-ti Iok-ap kóng, Nî-jíⁿ ê kiáⁿ Ap-nî-jíⁿ lâi kìⁿ ông, ông sàng i khì, i iā pêng-an khì.

24約押去見王講，你做甚麼ah？看ah，Ap-nî-jíⁿ來見你，你啥事送伊去？taⁿ伊去了lah；Iok-ap khì kìⁿ ông kóng, Lí chòe sím-mi̍h ah? Khòaⁿ ah, Ap-nî-jíⁿ lâi kìⁿ lí, lí siáⁿ-sū sàng i khì? taⁿ i khì-liáu lah;

25你知Nî-jíⁿ ê kiáⁿ Ap-nî-jíⁿ來，是beh騙你，ài知你ê出kap你ê入，kap你一切所做ê事。lí chai Nî-jíⁿ ê kiáⁿ Ap-nî-jíⁿ lâi, sī beh phiàn lí, ài chai lí ê chhut kap lí ê ji̍p, kap lí it-chhè só͘ chòe ê sū.

26約押tùi大衛hia出來，就差使者去jip Ap-nî-jíⁿ；in就tùi Se-la̍h ê井帶伊來；總是大衛m̄知。Iok-ap tùi Tāi-pi̍t hia chhut-lâi, chiū chhe sù-chiá khì jip Ap-nî-jíⁿ; in chiū tùi Se-la̍h ê chíⁿ tòa i lâi; chóng-sī Tāi-pi̍t m̄-chai.

27Ap-nî-jíⁿ 倒tńg來到Hi-pek-lûn，約押chhōa伊到城門口，假beh暗靜kap伊講話，就tī-hia鑿透伊ê腹肚，伊就死；這是為tio̍h伊ê小弟A-sat-hek hō͘伊thâi死。Ap-nî-jíⁿ tò-tńg-lâi kàu Hi-pek-lûn, Iok-ap chhōa i kàu siâⁿ-mn̂g-kháu, ké beh àm-chīⁿ kap i kóng-ōe, chiū tī-hia chha̍k-thàu i ê pak-tó͘, i chiū sí; che sī ūi-tio̍h i ê sió-tī A-sat-hek hō͘ i thâi-sí.

28後來大衛聽見，就講，流Nî-jíⁿ ê kiáⁿ Ap-nî-jíⁿ ê血，chit-ê罪tī耶和華ê面前的確永遠無歸tī我，kap我ê國。Āu-lâi Tāi-pi̍t thiaⁿ-kìⁿ, chiū kóng, Lâu Nî-jíⁿ ê kiáⁿ Ap-nî-jíⁿ ê huih, chit ê chōe tī Iâ-hô-hoa ê bīn-chêng tek-khak éng-oán bô kui tī góa, kap góa ê kok.

29願hit-ê歸tī約押ê頭殼，kap伊ê老父全家；koh願約押ê家患tio̍h下痟-ê，thái-ko-ê，á是óa柺á ê，hō͘刀thâi死ê，無thang食ê，永無斷。Goān hit-ê kui tī Iok-ap ê thâu-khak, kap i ê lāu-pē choân-ke; koh goān Iok-ap ê ke hoān-tio̍h hā-siau-ê, thái-ko-ê, á-sī òa koáiⁿ-á ê, hō͘ to thâi-sí-ê, bô thang chia̍h ê, éng bô tn̄g.

30約押kap伊ê小弟A-pí-su thâi死Ap-nî-jíⁿ，是因為伊tī Ki-piàn交戰ê時，thâi死in ê小弟A-sat-hek。Iok-ap kap i ê sió-tī A-pí-su thâi-sí Ap-nî-jíⁿ, sī in-ūi i tī Ki-piàn kau-chiàn ê sî, thâi-sí in ê sió-tī A-sat-hek.

31大衛kā約押kap tè伊ê眾百姓講，Lín tio̍h拆裂衫，hâ麻布，tī Ap-nî-jíⁿ面前啼哭。大衛王也tè tī伊ê棺材後。Tāi-pi̍t kā Iok-ap kap tè i ê chèng peh-sìⁿ kóng, Lín tio̍h thiah-li̍h saⁿ, hâ môa-pò͘, tī Ap-nî-jíⁿ bīn-chêng thî-khàu. Tāi-pi̍t ông iā tè tī i ê koaⁿ-chhâ-āu.

32In埋葬Ap-nî-jíⁿ tī Hi-pek-lûn；王óa Ap-nî-jíⁿ ê墓來啼哭，眾百姓也啼哭。In bâi-chòng Ap-nî-jíⁿ tī Hi-pek-lûn; ông óa Ap-nî-jíⁿ ê bōng lâi thî-khàu, chèng peh-sìⁿ iā thî-khàu.

33王為tio̍h Ap-nî-jíⁿ悲哀講， Ap-nî-jíⁿ怎樣親像戇人ê死ah？Ông ūi-tio̍h Ap-nî-jíⁿ pi-ai kóng, Ap-nî-jíⁿ cháiⁿ-iūⁿ chhin-chhiūⁿ gōng-lâng ê sí ah?

34你ê手無綑縛，你ê腳無鎖鏈； 你死親像人死tī pháiⁿ人ê面前。Lí ê chhiú bô khún-pa̍k, lí ê kha bô só-liān; Lí sí chhin-chhiūⁿ lâng sí tī pháiⁿ-lâng ê bīn-chêng.

35Tùi án-ni，眾百姓koh為tio̍h伊哀哭。日未落ê時，眾百姓來勸大衛食餅；總是大衛chiù-chōa講，我若tī日未落ê事先食淡薄餅，á是食別項物，願上帝加倍責罰我。Tùi án-ni chèng peh-sìⁿ koh ūi-tio̍h i ai-khàu. Ji̍t bē lo̍h ê sî, chèng peh-sìⁿ lâi khǹg Tāi-pi̍t chia̍h piáⁿ; chóng-sī Tāi-pi̍t chiù-chōa kóng, Góa nā tī ji̍t bē lo̍h ê tāi-seng chia̍h tām-po̍h piáⁿ, á-sī chia̍h pa̍t hāng mi̍h, goān Siōng-tè ka-pē chek-hoa̍t góa.

36眾百姓注意看，lóng看做好，親像王凡所做ê，眾百姓lóng看做好。Chèng peh-sìⁿ chù-ì khòaⁿ, lóng khòaⁿ-chòe hó, chhin-chhiūⁿ ông hoān só͘ chòe ê, chèng peh-sìⁿ lóng khòaⁿ-chòe hó.

37Hit日眾百姓kap以色列眾人chiah知thâi死Nî-jíⁿ ê kiáⁿ Ap-nî-jíⁿ，lóng m̄是出tī王ê意思。Hit-ji̍t chèng peh-sìⁿ kap Í-sek-lia̍t chèng-lâng chiah chai thâi-sí Nî-jíⁿ ê kiáⁿ Ap-nî-jíⁿ, lóng m̄-sī chhut tī ông ê ì-sù.

38王kā伊ê人臣講，Lín kiám m̄知今á日tī以色列中，死一個豪傑ê大偉人mah？Ông kā i ê jîn-sîn kóng, Lín kiám m̄-chai kin-á-ji̍t tī Í-sek-lia̍t tiong, sí chi̍t ê hô-kia̍t ê tāi úi-jîn mah?

39我雖然受抹油做王，今á日iáu是軟弱；Sé-ló͘-ngá ê kiáⁿ，chiah-ê人比我khah強；行pháiⁿ ê人，願耶和華照伊ê pháiⁿ報應伊。Góa sui-jiân siū boah-iû chòe ông, kin-á-ji̍t iáu sī loán-jio̍k; Sé-ló͘-ngá ê kiáⁿ, chiah ê lâng pí góa khah-kiông; kiâⁿ-pháiⁿ ê lâng, goān Iâ-hô-hoa chiàu i ê pháiⁿ pò-èng i.

1掃羅ê kiáⁿ聽見Ap-nî-jíⁿ死tī Hi-pek-lûn，手就軟落去。以色列眾人也lóng gāng-gāng。Sò-lô ê kiáⁿ thiaⁿ-kìⁿ Ap-nî-jíⁿ sí tī Hi-pek-lûn, chhiú chiū nńg--lo̍h-khì. Í-sek-lia̍t chèng-lâng iā lóng gāng-gāng.

2掃羅ê kiáⁿ有兩個隊長，一個名Pa-ná，一個名Lī-kah，是便雅憫支派，Pí-lio̍k人Lîm-bûn ê kiáⁿ；因為Pí-lio̍k也屬tī便雅憫。Sò-lô ê kiáⁿ ū nn̄g ê tūi-tiúⁿ, chi̍t-ê miâ Pa-ná, chi̍t-ê miâ Lī-kah, sī Piān-ngá-bín chi-phài, Pí-lio̍k lâng Lîm-bûn ê kiáⁿ; in-ūi Pí-lio̍k iā sio̍k tī Piān-ngá-bín.

3Pí-lio̍k人早前走到Ki-tha-im，出外tī-hia，到今á日。Pí-lio̍k lâng chá-chêng cháu kàu Ki-tha-im, chhut-gōa tī-hia, kàu kin-á-ji̍t.

4掃羅ê kiáⁿ約拿單有一個kiáⁿ兩腳lóng 跛，名叫Bí-hui-pho-siat；當掃羅kap約拿單ê消息tùi Iâ-su-lia̍t傳來ê時，伊tú-á五歲；伊ê奶母抱伊走；因為走真緊，gín-ná跋落來，就致跛腳。Sò-lô ê kiáⁿ Iok-ná-tan ū chi̍t ê kiáⁿ nn̄g-kha lóng pái, miâ-kiò Bí-hui-pho-siat; tng Sò-lô kap Iok-ná-tan ê siau-sit tùi Iâ-su-lia̍t thoân-lâi ê sî, i tú-á gō͘-hè; i ê ni-bú phō i cháu; in-ūi cháu chin-kín, gín-ná poa̍h--lo̍h-lâi, chiū tì pái-kha.

5Pí-lio̍k人，Lîm-bûn ê kiáⁿ Lī-kah kap Pa-ná，出去，約略日燒lō ê時，到I-si-pho-siat ê厝。伊tī中晝tú-á teh睏。Pí-lio̍k lâng, Lîm-bûn ê kiáⁿ Lī-kah kap Pa-ná, chhut-khì, iok-lio̍k ji̍t sio-lō ê sî, kàu I-si-pho-siat ê chhù. I tī tiong-tàu tú-á teh khùn.

6In入厝內假影beh put麥，就刺透I-si-pho-siat ê腹肚；Lī-kah kap伊ê兄弟Pa-ná就逃走。In ji̍p chhù-lāi ké-iáⁿ beh put be̍h, chiū chhì-thàu I-si-pho-siat ê pak-tó͘; Lī-kah kap i ê hiaⁿ-tī Pa-ná chiū tô-cháu.

7In入房內ê時，I-si-pho-siat tú-á tī房內倒tī床裡teh睏；in就phah伊，thâi死伊，割伊ê頭殼，帶伊去，tùi A-la̍h-pa ê路透暝行。In ji̍p pâng-lâi ê sî, I-si-pho-siat tú-á tī pâng-lāi tó tī chhn̂g--nih teh khùn; in chiū phah i, thâi-sí i, koah i ê thâu-khak, tòa i khì, tùi A-la̍h-pa ê lō͘ thàu-mî kiâⁿ.

8In帶I-si-pho-siat ê頭殼到Hi-pek-lûn大衛hia，kā王講，你ê對敵掃羅bat siàu想你ê性命ê，看ah，這是伊ê kiáⁿ I-si-pho-siat ê頭殼。耶和華今á日為tio̍h我ê主我ê王報仇tī掃羅kap伊ê後裔。In tòa I-si-pho-siat ê thâu-khak kàu Hi-pek-lûn Tāi-pi̍t hia, kā ông kóng, Lí ê tùi-te̍k Sò-lô bat siàu-siūⁿ lí ê sìⁿ-miā ê, khòaⁿ ah, che sī i ê kiáⁿ I-si-pho-siat ê thâu-khak. Iâ-hô-hoa kin-á-ji̍t ūi-tio̍h góa ê chú góa ê ông pò-siû tī Sò-lô kap i ê hō͘-è.

9大衛應Pí-lio̍k人Lîm-bûn ê kiáⁿ Lī-kah kap伊ê兄弟Pa-ná，kā伊講，耶和華救贖我ê性命脫離lóng總ê苦難；我kí伊ê永活來chiù-chōa；Tāi-pi̍t ìn Pí-lio̍k lâng Lîm-bûn ê kiáⁿ Lī-kah kap i ê hiaⁿ-tī Pa-ná, kā i kóng, Iâ-hô-hoa kiù-sio̍k góa ê sìⁿ-miā thoat-lī lóng-chóng ê khó͘-lān; góa kí I ê éng-oa̍h lâi chiù-chōa;

10前有人報我講，掃羅已經死，伊家己掠做是報好消息，我就掠伊tī Sé-keh-la̍h kā伊thâi死，這是我hō͘伊做傳消息ê報賞；chêng ū lâng pò góa kóng, Sò-lô í-keng sí, i kā-kī lia̍h-chòe sī pò hó siau-sit, góa chiū lia̍h i tī Sé-keh-la̍h kā i thâi-sí, che sī góa hō͘ i chòe thoân siau-sit ê pò-siúⁿ;

11何況pháiⁿ人入義人ê厝，thâi伊tī眠床裡，我kiám無beh tùi lín ê手討伊ê血，除滅lín tī地上mah？hô-hòng pháiⁿ-lâng ji̍p gī-lâng ê chhù, thâi i tī bîn-chhn̂g--nih, góa kiám bô beh tùi lín ê chhiú thó i ê huih, tû-bia̍t lín tī tōe-chiūⁿ mah?

12大衛命令伊ê少年人，in就thâi死in，斬斷in ê腳手，吊tī Hi-pek-lûn ê池邊；也將I-si-pho-siat ê頭殼埋葬tī Hi-pek-lûn Ap-nî-jíⁿ ê墓。Tāi-pi̍t bēng-lēng i ê siàu-liân lâng, in chiū thâi-sí in, chām-tn̄g in ê kha-chhiú, tiàu tī Hi-pek-lûn ê tî-piⁿ; iā chiong I-si-pho-siat ê thâu-khak bâi-chòng tī Hi-pek-lûn Ap-nî-jíⁿ ê bōng.

1當時以色列眾支派到Hi-pek-lûn，見大衛講，看ah，阮是你ê骨肉。Tng-sî Í-sek-lia̍t chèng chi-phài kàu Hi-pek-lûn, kìⁿ Tāi-pi̍t kóng, Khòaⁿ ah, goán sī lí ê kut-jio̍k.

2前掃羅做阮ê王ê時，chhōa以色列出入ê是你；耶和華也bat kā你講，你beh照顧我ê百姓以色列，也beh做以色列ê君王。Chêng Sò-lô chòe goán ê ông ê sî, chhōa Í-sek-lia̍t chhut-ji̍p-ê sī lí; Iâ-hô-hoa iā bat kā lí kóng, Lí beh chiàu-kò͘ Góa ê peh-sìⁿ Í-sek-lia̍t, iā beh chòe Í-sek-lia̍t ê kun-ông.

3Tùi án-ni，以色列ê長老lóng來Hi-pek-lûn見王。大衛王tī Hi-pek-lûn耶和華ê面前kap in立約。In就用油抹大衛做以色列ê王。Tùi án-ni Í-sek-lia̍t ê tióng-ló lóng lâi Hi-pek-lûn kìⁿ ông. Tāi-pi̍t ông tī Hi-pek-lûn Iâ-hô-hoa ê bīn-chêng kap in li̍p-iok. In chiū ēng iû boah Tāi-pi̍t chòe Í-sek-lia̍t ê ông.

4大衛坐位ê時三十歲，伊坐位四十年。Tāi-pi̍t chē-ūi ê sî saⁿ-cha̍p hè, i chē-ūi sì-cha̍p nî.

5Tī Hi-pek-lûn做猶大王七年koh六月日；tī耶路撒冷做thong以色列kap猶大ê王三十三年。Tī Hi-pek-lûn chòe Iû-tāi ông chhit-nî koh la̍k-ge̍h-ji̍t; tī Iâ-lō͘-sat-léng chòe thong Í-sek-lia̍t kap Iû-tāi ê ông saⁿ-cha̍p-saⁿ nî.

6王kap tè伊ê人來到耶路撒冷beh攻擊khiā起hit所在ê Iâ-pò͘-su人。In對大衛講，你若無除chiah-ê chhiⁿ-mî-ê、跛腳ê，就bōe入chit所在；in phah算大衛決斷bōe入chia。Ông kap tè i ê lâng lâi kàu Iâ-lō͘-sat-léng beh kong-kek khiā-khí hit só͘-chāi ê Iâ-pò͘-su lâng. In tùi Tāi-pi̍t kóng, Lí nā bô tû chiah ê chhiⁿ-mî-ê, pái-kha-ê, chiū bōe ji̍p chit só͘-chāi; in phah-sǹg Tāi-pi̍t koat-toàn bōe ji̍p chia.

7總是大衛攻擊錫安ê衛所，這就是大衛ê城。Chóng-sī Tāi-pi̍t kong-kek Sek-an ê ōe-só͘, che chiū-sī Tāi-pi̍t ê siâⁿ.

8當hit日，大衛講，Chī-chūi phah Iâ-pò͘-su人，tio̍h tùi水溝上去phah大衛ê心所怨恨跛腳ê、chhiⁿ-mî-ê。Tùi án-ni，有俗語講，有chhiⁿ-mî跛腳ê；人bōe能入厝。Tng hit-ji̍t Tāi-pi̍t kóng, Chī-chūi phah Iâ-pò͘-su lâng, tio̍h tùi chúi-kau chiūⁿ khì phah Tāi-pi̍t ê sim só͘ oàn-hūn pái-kha-ê, chhiⁿ-mî-ê. Tùi án-ni ū sio̍k-gú kóng, Ū chhiⁿ-mî pái-kha-ê; lâng bōe-ōe ji̍p chhù.

9大衛tiàm tī衛所，稱hit所在做大衛ê城。大衛tùi Bí-lô四圍起造，也ǹg內面。Tāi-pi̍t tiàm tī ōe-só͘, chheng hit só͘-chāi chòe Tāi-pi̍t ê siâⁿ. Tāi-pi̍t tùi Bí-lô sì-ûi khí-chō, iā ǹg lāi-bīn.

10大衛ná久ná強盛，因為耶和華萬軍ê上帝kap伊tī-teh。Tāi-pi̍t ná-kú ná kiông-sēng, in-ūi Iâ-hô-hoa bān-kun ê Siōng-tè kap i tī-teh.

11Chhui-lô王Hi-lân 差使者帶柏香柴kap木匠石匠到大衛hia。In kā大衛起厝。Chhui-lô ông Hi-lân chhe sù-chiá tòa pek-hiuⁿ-chhâ kap ba̍k-chhiūⁿ chio̍h-chhiūⁿ kàu Tāi-pi̍t hia. In kā Tāi-pi̍t khí chhù.

12大衛知耶和華定tio̍h設立伊做以色列王；koh為tio̍h伊ê百姓以色列來興起伊ê國。Tāi-pi̍t chai Iâ-hô-hoa tiāⁿ-tio̍h siat-li̍p i chòe Í-sek-lia̍t ông; koh ūi-tio̍h I ê peh-sìⁿ Í-sek-lia̍t lâi heng-khí i ê kok.

13大衛tùi Hi-pek-lûn來了後，tùi耶路撒冷koh立后妃。大衛koh生kiáⁿ，cha-bó͘-kiáⁿ。Tāi-pi̍t tùi Hi-pek-lûn lâi liáu-āu, tùi Iâ-lō͘-sat-léng koh li̍p hō͘-hui. Tāi-pi̍t koh siⁿ kiáⁿ, cha-bó͘-kiáⁿ.

14Tī耶路撒冷所生ê kiáⁿ就是Sa-bó͘-a、Sok-pā、Ná-tan、所羅門；Tī Iâ-lō͘-sat-léng só͘ siⁿ ê kiáⁿ chiū-sī Sa-bó͘-a, Sok-pā, Ná-tan, Só͘-lô-bûn;

15Ek-hat、Í-lī-su-a、Nî-húi、Ngá-hui-a；Ek-hat, Í-lī-su-a, Nî-húi, Ngá-hui-a;

16Í-lī-sa-má、Í-lī-ngá-tāi、Í-lī-hoat-lia̍t。Í-lī-sa-má, Í-lī-ngá-tāi, Í-lī-hoat-lia̍t.

17腓利士人聽見人用油抹大衛做以色列王；腓利士ê眾人就上來siàu想大衛。大衛聽見就落去到營寨。Hui-lī-sū lâng thiaⁿ-kìⁿ lâng ēng iû boah Tāi-pi̍t chòe Í-sek-lia̍t ông; Hui-lī-sū ê chèng-lâng chiū chiūⁿ-lâi siàu-siūⁿ Tāi-pi̍t. Tāi-pi̍t thiaⁿ-kìⁿ chiū lo̍h-khì kàu iâⁿ-chē.

18腓利士人已經來，布置tī Lī-hoa̍t-im ê山谷。Hui-lī-sū lâng í-keng lâi, pò͘-tì tī Lī-hoa̍t-im ê soaⁿ-kok.

19大衛問耶和華講，我thang上去攻腓利士人mah？你beh將in交tī我ê手mah？耶和華kā大衛講，你thang上去，因為我的確beh將腓利士人交tī你ê手。Tāi-pi̍t mn̄g Iâ-hô-hoa kóng, Góa thang chiūⁿ--khì kong Hui-lī-sū lâng mah? Lí beh chiong in kau tī góa ê chhiú mah? Iâ-hô-hoa kā Tāi-pi̍t kóng, Lí thang chiūⁿ--khì, in-ūi Góa tek-khak beh chiong Hui-lī-sū lâng kau tī lí ê chhiú.

20大衛來到Pa-le̍k-pí-la̍h-sim；大衛tī-hia phah in，講，耶和華tī我ê面前衝散我ê對敵，親像水ê衝散一樣；所以名hit所在做Pa-le̍k-pí-la̍h-sim。Tāi-pi̍t lâi kàu Pa-le̍k-pí-la̍h-sim; Tāi-pi̍t tī-hia phah in, kóng, Iâ-hô-hoa tī góa ê bīn-chêng chhiong-sòaⁿ góa ê tùi-te̍k, chhin-chhiūⁿ chúi ê chhiong-sòaⁿ chi̍t-iūⁿ; só͘-í miâ hit só͘-chāi chòe Pa-le̍k-pí-la̍h-sim.

21In棄sak in ê偶像tī-hia；大衛kap tè伊ê人拾伊去。In khì-sak in ê ngó͘-siōng tī-hia; Tāi-pi̍t kap tè i ê lâng khioh i khì.

22腓利士人koh上來，布置tī Lī-hoa̍t-im ê山谷。Hui-lī-sū lâng koh chiūⁿ--lâi, pò͘-tì tī Lī-hoa̍t-im ê soaⁿ-kok.

23大衛問耶和華；耶和華講，M̄-thang直直上去，tio̍h彎到in ê後面，tùi桑材樹對面phah in；Tāi-pi̍t mn̄g Iâ-hô-hoa; Iâ-hô-hoa kóng, M̄-thang ti̍t-ti̍t chiūⁿ--khì, tio̍h oan kàu in ê āu-bīn, tùi sng-châi-chhiū tùi-bīn phah in;

24你聽見tī桑材樹尾，有腳步聲，就tio̍h趕緊進行，因為hit時耶和華已經tùi lín ê頭前出去，攻擊腓利士人ê軍隊。lí thiaⁿ-kìⁿ tī sng-châi-chhiū bé, ū kha-pō͘ siaⁿ, chiū tio̍h kóaⁿ-kín chìn-hêng, in-ūi hit-sî Iâ-hô-hoa í-keng tùi lín ê thâu-chêng chhut-khì, kong-kek Hui-lī-sū lâng ê kun-tūi.

25大衛就照耶和華所吩咐ê去行，攻擊腓利士人，tùi Ka-pa到Ki-sek。Tāi-pi̍t chiū chiàu Iâ-hô-hoa só͘ hoan-hù-ê khì kiâⁿ, kong-kek Hui-lī-sū lâng, tùi Ka-pa kàu Ki-sek.