1當時以色列眾支派到Hi-pek-lûn，見大衛講，看ah，阮是你ê骨肉。Tng-sî Í-sek-lia̍t chèng chi-phài kàu Hi-pek-lûn, kìⁿ Tāi-pi̍t kóng, Khòaⁿ ah, goán sī lí ê kut-jio̍k.

2前掃羅做阮ê王ê時，chhōa以色列出入ê是你；耶和華也bat kā你講，你beh照顧我ê百姓以色列，也beh做以色列ê君王。Chêng Sò-lô chòe goán ê ông ê sî, chhōa Í-sek-lia̍t chhut-ji̍p-ê sī lí; Iâ-hô-hoa iā bat kā lí kóng, Lí beh chiàu-kò͘ Góa ê peh-sìⁿ Í-sek-lia̍t, iā beh chòe Í-sek-lia̍t ê kun-ông.

3Tùi án-ni，以色列ê長老lóng來Hi-pek-lûn見王。大衛王tī Hi-pek-lûn耶和華ê面前kap in立約。In就用油抹大衛做以色列ê王。Tùi án-ni Í-sek-lia̍t ê tióng-ló lóng lâi Hi-pek-lûn kìⁿ ông. Tāi-pi̍t ông tī Hi-pek-lûn Iâ-hô-hoa ê bīn-chêng kap in li̍p-iok. In chiū ēng iû boah Tāi-pi̍t chòe Í-sek-lia̍t ê ông.

4大衛坐位ê時三十歲，伊坐位四十年。Tāi-pi̍t chē-ūi ê sî saⁿ-cha̍p hè, i chē-ūi sì-cha̍p nî.

5Tī Hi-pek-lûn做猶大王七年koh六月日；tī耶路撒冷做thong以色列kap猶大ê王三十三年。Tī Hi-pek-lûn chòe Iû-tāi ông chhit-nî koh la̍k-ge̍h-ji̍t; tī Iâ-lō͘-sat-léng chòe thong Í-sek-lia̍t kap Iû-tāi ê ông saⁿ-cha̍p-saⁿ nî.

6王kap tè伊ê人來到耶路撒冷beh攻擊khiā起hit所在ê Iâ-pò͘-su人。In對大衛講，你若無除chiah-ê chhiⁿ-mî-ê、跛腳ê，就bōe入chit所在；in phah算大衛決斷bōe入chia。Ông kap tè i ê lâng lâi kàu Iâ-lō͘-sat-léng beh kong-kek khiā-khí hit só͘-chāi ê Iâ-pò͘-su lâng. In tùi Tāi-pi̍t kóng, Lí nā bô tû chiah ê chhiⁿ-mî-ê, pái-kha-ê, chiū bōe ji̍p chit só͘-chāi; in phah-sǹg Tāi-pi̍t koat-toàn bōe ji̍p chia.

7總是大衛攻擊錫安ê衛所，這就是大衛ê城。Chóng-sī Tāi-pi̍t kong-kek Sek-an ê ōe-só͘, che chiū-sī Tāi-pi̍t ê siâⁿ.

8當hit日，大衛講，Chī-chūi phah Iâ-pò͘-su人，tio̍h tùi水溝上去phah大衛ê心所怨恨跛腳ê、chhiⁿ-mî-ê。Tùi án-ni，有俗語講，有chhiⁿ-mî跛腳ê；人bōe能入厝。Tng hit-ji̍t Tāi-pi̍t kóng, Chī-chūi phah Iâ-pò͘-su lâng, tio̍h tùi chúi-kau chiūⁿ khì phah Tāi-pi̍t ê sim só͘ oàn-hūn pái-kha-ê, chhiⁿ-mî-ê. Tùi án-ni ū sio̍k-gú kóng, Ū chhiⁿ-mî pái-kha-ê; lâng bōe-ōe ji̍p chhù.

9大衛tiàm tī衛所，稱hit所在做大衛ê城。大衛tùi Bí-lô四圍起造，也ǹg內面。Tāi-pi̍t tiàm tī ōe-só͘, chheng hit só͘-chāi chòe Tāi-pi̍t ê siâⁿ. Tāi-pi̍t tùi Bí-lô sì-ûi khí-chō, iā ǹg lāi-bīn.

10大衛ná久ná強盛，因為耶和華萬軍ê上帝kap伊tī-teh。Tāi-pi̍t ná-kú ná kiông-sēng, in-ūi Iâ-hô-hoa bān-kun ê Siōng-tè kap i tī-teh.

11Chhui-lô王Hi-lân 差使者帶柏香柴kap木匠石匠到大衛hia。In kā大衛起厝。Chhui-lô ông Hi-lân chhe sù-chiá tòa pek-hiuⁿ-chhâ kap ba̍k-chhiūⁿ chio̍h-chhiūⁿ kàu Tāi-pi̍t hia. In kā Tāi-pi̍t khí chhù.

12大衛知耶和華定tio̍h設立伊做以色列王；koh為tio̍h伊ê百姓以色列來興起伊ê國。Tāi-pi̍t chai Iâ-hô-hoa tiāⁿ-tio̍h siat-li̍p i chòe Í-sek-lia̍t ông; koh ūi-tio̍h I ê peh-sìⁿ Í-sek-lia̍t lâi heng-khí i ê kok.

13大衛tùi Hi-pek-lûn來了後，tùi耶路撒冷koh立后妃。大衛koh生kiáⁿ，cha-bó͘-kiáⁿ。Tāi-pi̍t tùi Hi-pek-lûn lâi liáu-āu, tùi Iâ-lō͘-sat-léng koh li̍p hō͘-hui. Tāi-pi̍t koh siⁿ kiáⁿ, cha-bó͘-kiáⁿ.

14Tī耶路撒冷所生ê kiáⁿ就是Sa-bó͘-a、Sok-pā、Ná-tan、所羅門；Tī Iâ-lō͘-sat-léng só͘ siⁿ ê kiáⁿ chiū-sī Sa-bó͘-a, Sok-pā, Ná-tan, Só͘-lô-bûn;

15Ek-hat、Í-lī-su-a、Nî-húi、Ngá-hui-a；Ek-hat, Í-lī-su-a, Nî-húi, Ngá-hui-a;

16Í-lī-sa-má、Í-lī-ngá-tāi、Í-lī-hoat-lia̍t。Í-lī-sa-má, Í-lī-ngá-tāi, Í-lī-hoat-lia̍t.

17腓利士人聽見人用油抹大衛做以色列王；腓利士ê眾人就上來siàu想大衛。大衛聽見就落去到營寨。Hui-lī-sū lâng thiaⁿ-kìⁿ lâng ēng iû boah Tāi-pi̍t chòe Í-sek-lia̍t ông; Hui-lī-sū ê chèng-lâng chiū chiūⁿ-lâi siàu-siūⁿ Tāi-pi̍t. Tāi-pi̍t thiaⁿ-kìⁿ chiū lo̍h-khì kàu iâⁿ-chē.

18腓利士人已經來，布置tī Lī-hoa̍t-im ê山谷。Hui-lī-sū lâng í-keng lâi, pò͘-tì tī Lī-hoa̍t-im ê soaⁿ-kok.

19大衛問耶和華講，我thang上去攻腓利士人mah？你beh將in交tī我ê手mah？耶和華kā大衛講，你thang上去，因為我的確beh將腓利士人交tī你ê手。Tāi-pi̍t mn̄g Iâ-hô-hoa kóng, Góa thang chiūⁿ--khì kong Hui-lī-sū lâng mah? Lí beh chiong in kau tī góa ê chhiú mah? Iâ-hô-hoa kā Tāi-pi̍t kóng, Lí thang chiūⁿ--khì, in-ūi Góa tek-khak beh chiong Hui-lī-sū lâng kau tī lí ê chhiú.

20大衛來到Pa-le̍k-pí-la̍h-sim；大衛tī-hia phah in，講，耶和華tī我ê面前衝散我ê對敵，親像水ê衝散一樣；所以名hit所在做Pa-le̍k-pí-la̍h-sim。Tāi-pi̍t lâi kàu Pa-le̍k-pí-la̍h-sim; Tāi-pi̍t tī-hia phah in, kóng, Iâ-hô-hoa tī góa ê bīn-chêng chhiong-sòaⁿ góa ê tùi-te̍k, chhin-chhiūⁿ chúi ê chhiong-sòaⁿ chi̍t-iūⁿ; só͘-í miâ hit só͘-chāi chòe Pa-le̍k-pí-la̍h-sim.

21In棄sak in ê偶像tī-hia；大衛kap tè伊ê人拾伊去。In khì-sak in ê ngó͘-siōng tī-hia; Tāi-pi̍t kap tè i ê lâng khioh i khì.

22腓利士人koh上來，布置tī Lī-hoa̍t-im ê山谷。Hui-lī-sū lâng koh chiūⁿ--lâi, pò͘-tì tī Lī-hoa̍t-im ê soaⁿ-kok.

23大衛問耶和華；耶和華講，M̄-thang直直上去，tio̍h彎到in ê後面，tùi桑材樹對面phah in；Tāi-pi̍t mn̄g Iâ-hô-hoa; Iâ-hô-hoa kóng, M̄-thang ti̍t-ti̍t chiūⁿ--khì, tio̍h oan kàu in ê āu-bīn, tùi sng-châi-chhiū tùi-bīn phah in;

24你聽見tī桑材樹尾，有腳步聲，就tio̍h趕緊進行，因為hit時耶和華已經tùi lín ê頭前出去，攻擊腓利士人ê軍隊。lí thiaⁿ-kìⁿ tī sng-châi-chhiū bé, ū kha-pō͘ siaⁿ, chiū tio̍h kóaⁿ-kín chìn-hêng, in-ūi hit-sî Iâ-hô-hoa í-keng tùi lín ê thâu-chêng chhut-khì, kong-kek Hui-lī-sū lâng ê kun-tūi.

25大衛就照耶和華所吩咐ê去行，攻擊腓利士人，tùi Ka-pa到Ki-sek。Tāi-pi̍t chiū chiàu Iâ-hô-hoa só͘ hoan-hù-ê khì kiâⁿ, kong-kek Hui-lī-sū lâng, tùi Ka-pa kàu Ki-sek.

1大衛koh聚集以色列中所揀ê三萬人。Tāi-pi̍t koh chū-chi̍p Í-sek-lia̍t tiong só͘ kéng ê saⁿ-bān lâng.

2大衛起身chhōa tè伊ê眾百姓，tùi Pa-la̍h猶大去，beh tùi hia扛上帝ê櫃來；chit-ê櫃ê名是用坐tī兩個ki-lō͘兵ê中間萬軍ê耶和華ê名來稱ê。Tāi-pi̍t khí-sin chhōa tè i ê chèng peh-sìⁿ, tùi Pa-la̍h Iû-tāi khì, beh tùi hia kng Siōng-tè ê kūi lâi; chit ê kūi ê miâ sī ēng chē tī nn̄g ê ki-lō͘-peng ê tiong-kan bān-kun ê Iâ-hô-hoa ê miâ lâi chheng--ê.

3In hē上帝ê櫃tī新ê車，tùi山頂A-pí-ná-ta̍t ê家載出來；A-pí-ná-ta̍t兩個kiáⁿ，O͘-sat kap A-hi-iok，趕hit-ê新車。In hē Siōng-tè ê kūi tī sin ê chhia, tùi soaⁿ-téng A-pí-ná-ta̍t ê ke chài--chhut-lâi; A-pí-ná-ta̍t nn̄g ê kiáⁿ, O͘-sat kap A-hi-iok, kóaⁿ hit ê sin-chhia.

4In將伊kap上帝ê約櫃，tùi山頂A-pí-ná-ta̍t ê家載出來。A-hi-iok行tī櫃ê頭前。In chiong i kap Siōng-tè ê iok-kūi, tùi soaⁿ-téng A-pí-ná-ta̍t ê ke chài--chhut-lâi. A-hi-iok kiâⁿ tī kūi ê thâu-chêng.

5大衛kap以色列ê全家，tī耶和華ê面前用松柴所造ta̍k號ê樂器，kap琴、瑟、lin-long鼓、大鼓、鈸(poa̍t)，來作樂跳舞。Tāi-pi̍t kap Í-sek-lia̍t ê choân-ke, tī Iâ-hô-hoa ê bīn-chêng ēng siōng-chhâ só͘ cho ta̍k-hō ê ga̍k-khì, kap khîm, sek, lin-long-kó͘ tōa-kó͘, poa̍t, lâi chok-ga̍k thiàu-bú.

6In到Ná-kùn ê五穀場，O͘-sat伸手扶上帝ê約櫃，因為牛tio̍h-tak。In kàu Ná-kùn ê gō͘-kak-tiûⁿ, O͘-sat chhun-chhiú hû Siōng-tè ê iok-kūi, in-ūi gû tio̍h-tak.

7耶和華受氣O͘-sat；上帝tī-hia因為伊ê錯誤來phah伊，伊就死tī-hia，tī上帝ê櫃邊。Iâ-hô-hoa siū-khì O͘-sat; Siōng-tè tī-hia in-ūi i ê chhò-gō͘ lâi phah i, i chiū sí tī-hia, tī Siōng-tè ê kūi-piⁿ.

8因為耶和華忽然phah死O͘-sat，大衛無歡喜；就稱hit所在做Pí-lia̍t-su-o͘-sat，到今á日。In-ūi Iâ-hô-hoa hut-jiân phah-sí O͘-sat, Tāi-pi̍t bô hoaⁿ-hí; chiū chheng hit só͘-chāi chòe Pí-lia̍t-su-o͘-sat, kàu kin-á-ji̍t.

9當hit日大衛驚耶和華，講，耶和華ê櫃thái-thó thang到我ê所在。Tng hit-ji̍t Tāi-pi̍t kiaⁿ Iâ-hô-hoa, kóng, Iâ-hô-hoa ê kūi thái-thó thang kàu góa ê só͘-chāi.

10Tùi án-ni，大衛m̄肯將耶和華ê櫃扛入大衛ê城，到家己ê所在；大衛就扛伊oat入Ka-te̍k人Gô-piat-í-tong ê家。Tùi án-ni Tāi-pi̍t m̄-khéng chiong Iâ-hô-hoa ê kūi kng ji̍p Tāi-pi̍t ê siâⁿ, kàu ka-kī ê só͘-chāi; Tāi-pi̍t chiū kng i oat-ji̍p Ka-te̍k lâng Gô-piat-í-tong ê ke.

11耶和華ê櫃tiàm tī Ka-te̍k人Gô-piat-í-tong ê厝三月日，耶和華賜福氣hō͘ Gô-piat-í-tong kap伊ê全家。Iâ-hô-hoa ê kūi tiàm tī Ka-te̍k lâng Gô-piat-í-tong ê chhù saⁿ ge̍h-ji̍t, Iâ-hô-hoa sù hok-khì hō͘ Gô-piat-í-tong kap i ê choân-ke.

12有人kā大衛王講，耶和華因為上帝ê櫃，賜福tī Gô-piat-í-tong ê家，kap見若屬tī伊ê。大衛就去，歡喜扛上帝ê櫃tùi Gô-piat-í-tong ê厝，到大衛ê城。Ū lâng kā Tāi-pi̍t ông kóng, Iâ-hô-hoa in-ūi Siōng-tè ê kūi, sù-hok tī Gô-piat-í-tong ê ke, kap kìⁿ-nā sio̍k tī i ê. Tāi-pi̍t chiū khì, hoaⁿ-hí kng Siōng-tè ê kūi tùi Gô-piat-í-tong ê chhù, kàu Tāi-pi̍t ê siâⁿ.

13扛耶和華約櫃ê人行六步，大衛就獻一隻牛，kap一隻肥ê cheng-siⁿ，做祭祀。Kng Iâ-hô-hoa iok-kūi ê lâng kiâⁿ la̍k-pō͘, Tāi-pi̍t chiū hiàn chi̍t chiah gû, kap chi̍t chiah pûi ê cheng-siⁿ, chòe chè-sū.

14大衛tī耶和華ê面前盡力跳舞。大衛hâ幼苧布ê í-hut-tek。Tāi-pi̍t tī Iâ-hô-hoa ê bīn-chêng chīn-la̍t thiàu-bú. Tāi-pi̍t hâ iù-tōe-pò͘ ê í-hut-tek.

15Án-ni大衛kap以色列全家扛耶和華ê櫃上來，出歡喜ê聲，pûn哨角。Án-ni Tāi-pi̍t kap Í-sek-lia̍t choân-ke kng Iâ-hô-hoa ê kūi chiūⁿ--lâi, chhut hoaⁿ-hí ê siaⁿ, pûn sàu-kak.

16耶和華ê櫃入大衛城ê時，掃羅ê cha-bó͘-kiáⁿ Bí-kah tùi窗á門看，看見大衛chông起來跳舞tī耶和華ê面前，心就看輕伊。Iâ-hô-hoa ê kūi ji̍p Tāi-pi̍t siâⁿ ê sî, Sò-lô ê cha-bó͘-kiáⁿ Bí-kah tùi thang-á-mn̂g khòaⁿ, khòaⁿ-kìⁿ Tāi-pi̍t chông--khí-lâi thiàu-bú tī Iâ-hô-hoa ê bīn-chêng, sim chiū khòaⁿ-khin i.

17In扛耶和華ê櫃入去，hē tī伊ê所在，就是大衛所為伊搭ê布棚；大衛tī耶和華ê面前獻燒祭kap謝恩祭。In kng Iâ-hô-hoa ê kūi ji̍p--khì, hē tī i ê só͘-chāi, chiū-sī Tāi-pi̍t só͘ ūi i tah ê pò͘-pîⁿ; Tāi-pi̍t tī Iâ-hô-hoa ê bīn-chêng hiàn sio-chè kap siā-un-chè.

18大衛獻燒祭kap謝恩祭明白，就用萬軍耶和華ê名kā百姓祝福。Tāi-pi̍t hiàn sio-chè kap siā-un-chè bêng-pe̍k, chiū ēng bān-kun Iâ-hô-hoa ê miâ kā peh-sìⁿ chiok-hok.

19Koh tī hiah-ê眾百姓，就是以色列眾人，無論男女，每人分hō͘ in一個餅，一塊肉，一個葡萄干餅；眾百姓就去，ta̍k人tò去in ê厝。Koh tī hiah ê chèng peh-sìⁿ, chiū-sī Í-sek-lia̍t chèng-lâng, bô-lūn lâm-lú, múi-lâng pun hō͘ in chi̍t ê piáⁿ, chi̍t tè bah, chi̍t ê phû-tô-koaⁿ piáⁿ; chèng peh-sìⁿ chiū khì, ta̍k-lâng tò-khì in ê chhù.

20大衛tò去beh kā伊ê家眷祝福，掃羅ê cha-bó͘-kiáⁿ Bí-kah出來迎接大衛，講，以色列王今á日有jōa大榮光ah！今á日露體tī人臣ê女婢目睭前，親像一個無hē落人無畏見笑露體一樣。Tāi-pi̍t tò-khì beh kā i ê ke-koàn chiok-hok, Sò-lô ê cha-bó͘-kiáⁿ Bí-kah chhut-lâi ngiâ-chih Tāi-pi̍t, kóng, Í-sek-lia̍t ông kin-á-ji̍t ū jōa-tōa êng-kng ah! kin-á-ji̍t lō͘-thé tī jîn-sîn ê lú-pī ba̍k-chiu chêng, chhin-chhiūⁿ chi̍t ê bô hē-lo̍h lâng bô ùi kiàn-siàu lō͘-thé chi̍t-iūⁿ.

21大衛kā Bí-kah講，這是tī耶和華ê面前，伊揀我pôaⁿ過你ê老父kap伊ê全家，設立我做耶和華ê百姓以色列ê君王，所以我beh tī耶和華ê面前跳舞；Tāi-pi̍t kā Bí-kah kóng, Che sī tī Iâ-hô-hoa ê bīn-chêng, I kéng góa pôaⁿ-kè lí ê lāu-pē kap i ê choân-ke, siat-li̍p góa chòe Iâ-hô-hoa ê peh-sìⁿ Í-sek-lia̍t ê kun-ông, só͘-í góa beh tī Iâ-hô-hoa ê bīn-chêng thiàu-bú;

22我beh比chit-ê koh khah粗俗，家己看做卑賤；你所講hiah-ê女婢，我beh受in尊重。góa beh pí chit-ê koh khah chho͘-sio̍k, ka-kī khòaⁿ-chòe pi-chiān; lí só͘ kóng hiah ê lú-pī, góa beh siū in chun-tiōng.

23Tùi án-ni，掃羅ê cha-bó͘-kiáⁿ Bí-kah到死ê日無生kiáⁿ兒。Tùi án-ni Sò-lô ê cha-bó͘-kiáⁿ Bí-kah kàu sí ê ji̍t bô siⁿ kiáⁿ-jî.

1當王tiàm tī厝內，耶和華也已經hō͘伊脫離四圍ê對敵，得tio̍h安靜ê時，Tng ông tiàm tī chhù-lāi, Iâ-hô-hoa iā í-keng hō͘ i thoat-lī sì-ûi ê tùi-te̍k, tit-tio̍h an-chēng ê sî,

2王kā先知Ná-tan講，看ah，我tiàm tī柏香柴ê厝內，總是上帝ê櫃tiàm tī帳籬內。ông kā sian-ti Ná-tan kóng, Khòaⁿ ah, góa tiàm tī pek-hiuⁿ-chhâ ê chhù-lāi, chóng-sī Siōng-tè ê kūi tiàm tī tiùⁿ-lî-lāi.

3Ná-tan對王講，見若你ê心所想ê，thang去做；因為耶和華kap你tī-teh。Ná-tan tùi ông kóng, Kìⁿ-nā lí ê sim só͘-siūⁿ-ê, thang khì chòe; in-ūi Iâ-hô-hoa kap lí tī-teh.

4Hit暝耶和華ê話臨到Ná-tan講，Hit-mî Iâ-hô-hoa ê ōe lîm-kàu Ná-tan kóng,

5你去kā我ê奴僕大衛講，耶和華án-ni講，你beh起厝hō͘我khiā起mah？Lí khì kā Góa ê lô͘-po̍k Tāi-pi̍t kóng, Iâ-hô-hoa án-ni kóng, Lí beh khí chhù hō͘ Góa khiā-khí mah?

6Tùi我chhōa以色列人出埃及ê日到今á日，我bē-bat tiàm tī厝裡，常常行tī布棚kap會幕。Tùi Góa chhōa Í-sek-lia̍t lâng chhut Ai-ki̍p ê ji̍t kàu kin-á-ji̍t, Góa bē-bat tiàm tī chhù--nih, siông-siông kiâⁿ tī pò͘-pîⁿ kap hōe-bō͘.

7見我kap以色列人所行到ê所在，kiám bat對以色列一支派ê士師，就是我命令照顧我ê百姓以色列ê，講，Lín啥事無kā我起柏香柴ê厝ah？Kìⁿ góa kap Í-sek-lia̍t lâng só͘ kiâⁿ-kàu ê só͘-chāi, kiám bat tùi Í-sek-lia̍t chi̍t chi-phài ê sū-su, chiū-sī Góa bēng-lēng chiàu-kò͘ Góa ê peh-sìⁿ Í-sek-lia̍t ê, kóng, Lín siáⁿ-sū bô kā Góa khí pek-hiuⁿ-chhâ ê chhù ah?

8Taⁿ你tio̍h kā我ê奴僕大衛講，萬軍ê耶和華án-ni講，我tùi羊寮中，你teh thàn羊群，揀你，做我ê百姓以色列ê君王。Taⁿ lí tio̍h kā Góa ê lô͘-po̍k Tāi-pi̍t kóng, Bān-kun ê Iâ-hô-hoa án-ni kóng, Góa tùi iûⁿ-tiâu-tiong, lí teh thàn iûⁿ-kûn, kéng lí, chòe Góa ê peh-sìⁿ Í-sek-lia̍t ê kun-ông.

9你無論去toh落，我常常kap你tī-teh，tī你ê面前剪除你一切ê對敵。我的確hō͘你得tio̍h大名，親像世上hiah-ê偉人ê大名一樣。Lí bô-lūn khì toh-lo̍h, Góa siông-siông kap lí tī-teh, tī lí ê bīn-chêng chián-tû lí it-chhè ê tùi-te̍k. Góa tek-khak hō͘ lí tit-tio̍h tōa-miâ, chhin-chhiūⁿ sè-chiūⁿ hiah ê úi-jîn ê tōa-miâ chi̍t-iūⁿ.

10我beh為tio̍h我ê百姓以色列定tio̍h一個所在，栽培in，hō͘ in tiàm tī家己ê所在，無koh遷徙，兇惡ê類無親像早前攪擾in，Góa beh ūi-tio̍h Góa ê peh-sìⁿ Í-sek-lia̍t tiāⁿ-tio̍h chi̍t ê só͘-chāi, chai-pôe in, hō͘ in tiàm tī ka-kī ê só͘-chāi, bô koh chhian-sóa, hiong-ok ê lūi bô chhin-chhiūⁿ chá-chêng kiáu-jiáu in,

11也無親像對我命令士師管理我ê百姓以色列ê日；我beh hō͘你脫離一切ê對敵，得tio̍h安靜。Koh耶和華kā你講，耶和華beh kā你建立家。iā bô chhin-chhiūⁿ tùi Góa bēng-lēng sū-su koán-lí Góa ê peh-sìⁿ Í-sek-lia̍t ê ji̍t; Góa beh hō͘ lí thoat-lī it-chhè ê tùi-te̍k, tit-tio̍h an-chēng. Koh Iâ-hô-hoa kā lí kóng, Iâ-hô-hoa beh kā lí kiàn-li̍p ke.

12到你ê日子已經滿，你kap你ê列祖相kap睏ê時，我beh設立你所出ê後裔來續接你，我也beh堅固伊ê國；Kàu lí ê ji̍t-chí í-keng móa, lí kap lí ê lia̍t-chó͘ saⁿ-kap khùn ê sî, Góa beh siat-li̍p lí só͘ chhut ê hō͘-è lâi sòa-chiap lí, Góa iā beh kian-kò͘ i ê kok;

13伊beh為我ê名起殿；我beh堅固伊ê國位，直到永遠。i beh ūi Góa ê miâ khí tiān; Góa beh kian-kò͘ i ê kok-ūi, ti̍t-kàu éng-oán.

14我beh做伊ê父，伊beh做我ê kiáⁿ；伊若犯罪，我beh用人ê柺，世間人ê鞭，責督伊。Góa beh chòe i ê pē, i beh chòe Góa ê kiáⁿ; i nā hoān-chōe, Góa beh ēng lâng ê koáiⁿ, sè-kan lâng ê piⁿ, chek-tok i.

15總是我ê慈愛無beh離開伊，親像我hō͘伊離開掃羅，就是我所棄sak tī你ê面前ê。Chóng-sī Góa ê chû-ài bô beh lī-khui i, chhin-chhiūⁿ Góa hō͘ i lī-khui Sò-lô, chiū-sī Góa só͘ khì-sak tī lí ê bīn-chêng ê.

16你ê家kap你ê國，beh永遠建立tī你ê面前；你ê國位也beh堅固到永遠。Lí ê ke kap lí ê kok, beh éng-oán kiàn-li̍p tī lí ê bīn-chêng; lí ê kok-ūi iā beh kian-kò͘ kàu éng-oán.

17Ná-tan就照這一切ê話，照這一切ê啟示，án-ni kā大衛講。Ná-tan chiu chiàu che it-chhè ê ōe, chiàu che it-chhè ê khé-sī, án-ni kā Tāi-pi̍t kóng.

18大衛王就入去，坐tī耶和華ê面前，講，主耶和華ah，我是是誰，我ê家算做甚麼，你竟然chhōa我到chit-ê地位ah？Tāi-pi̍t ông chiū ji̍p--khì, chē tī Iâ-hô-hoa ê bīn-chêng, kóng, Chú Iâ-hô-hoa ah, góa sī chī-chūi, góa ê ke sǹg-chòe sím-mi̍h, Lí kèng-jiân chhōa góa kàu chit ê tōe-ūi ah?

19主耶和華ah，這你iáu看做小khóa，你koh論到你ê奴僕ê家到tī久長；主耶和華ah，這是人間ê例。Chú Iâ-hô-hoa ah, che Lí iáu khòaⁿ-chòe sió-khóa, Lí koh lūn-kàu Lí ê lô͘-po̍k ê ke kàu tī kú-tn̂g; Chú Iâ-hô-hoa ah, che sī jîn-kan ê lē.

20大衛iáu有甚麼話thang對你講ah？主耶和華ah，你知你ê奴僕。Tāi-pi̍t iáu ū sím-mi̍h ōe thang tùi Lí kóng ah? Chú Iâ-hô-hoa ah, Lí chai Lí ê lô͘-po̍k.

21為tio̍h你ê話，koh照你ê心，你行這一切ê大事，hō͘你ê奴僕知；Ūi-tio̍h Lí ê ōe, koh chiàu Lí ê sim, Lí kiâⁿ che it-chhè ê tōa-sū, hō͘ Lí ê lô͘-po̍k chai;

22耶和華上帝ah，你是至大；照阮ê耳孔所聽見ê，無一個能比得你，你以外無有上帝。Iâ-hô-hoa Siōng-tè ah, Lí sī chì-tōa; chiàu goán ê hī-khang só͘ thiaⁿ-kìⁿ ê, bô chi̍t-ê ōe pí-tit Lí, Lí í-gōa bô ū Siōng-tè.

23地上有甚麼國親像你ê百姓以色列ah？就是上帝去救贖伊，歸tī家己做百姓，hō͘伊有名聲，koh tī你ê百姓ê面前，就是你tùi埃及，kap列邦，以及in hiah-ê上帝所救贖出來ê，為tio̍h lín行大ê tāi-chì，為tio̍h你ê地做thang驚ê事ah？Tōe-chiūⁿ ū sím-mi̍h kok chhin-chhiūⁿ Lí ê peh-sìⁿ Í-sek-lia̍t ah? chiū-sī Siōng-tè khì kiù-sio̍k i, kui tī ka-kī chòe peh-sìⁿ, hō͘ I ū miâ-siaⁿ, koh tī Lí ê peh-sìⁿ ê bīn-chêng, chiū-sī Lí tùi Ai-ki̍p, kap lia̍t-pang, í-ki̍p in hiah ê siōng-tè só͘ kiù-sio̍k chhut-lâi ê, ūi-tio̍h lín kiâⁿ tōa ê tāi-chì, ūi-tio̍h Lí ê tōe chòe thang kiaⁿ ê sū ah?

24你bat為家己建立你ê百姓以色列永遠做你ê百姓；耶和華ah，你也做in ê上帝。Lí bat ūi ka-kī kiàn-li̍p Lí ê peh-sìⁿ Í-sek-lia̍t éng-oán chòe Lí ê peh-sìⁿ; Iâ-hô-hoa ah, Lí iā chòe in ê Siōng-tè.

25耶和華上帝ah，taⁿ你所論到你ê奴僕，kap你ê奴僕ê家，願你永遠堅固伊，照你所講ê來行。Iâ-hô-hoa Siōng-tè ah, taⁿ Lí só͘ lūn-kàu Lí ê lô͘-po̍k, kap Lí ê lô͘-po̍k ê ke, goān Lí éng-oán kian-kò͘ i, chiàu Lí só͘-kóng-ê lâi kiâⁿ.

26願人永永尊你ê名做大，講，萬軍ê耶和華是管理以色列ê上帝；koh你ê奴僕大衛ê家beh tī你ê面前堅固。Goān lâng éng-éng chun Lí ê miâ chòe-tōa, kóng, Bān-kun ê Iâ-hô-hoa sī koán-lí Í-sek-lia̍t ê Siōng-tè; koh Lí ê lô͘-po̍k Tāi-pi̍t ê ke beh tī Lí ê bīn-chêng kian-kò͘.

27萬軍ê耶和華，以色列ê上帝ah，因為你啟示你ê奴僕，講，我beh kā你建立家，所以你ê奴僕好膽用chit-ê祈禱來對你祈禱。Bān-kun ê Iâ-hô-hoa, Í-sek-lia̍t ê Siōng-tè ah, in-ūi Lí khé-sī Lí ê lô͘-po̍k, kóng, Góa beh kā lí kiàn-li̍p ke, só͘-í Lí ê lô͘-po̍k hó-táⁿ ēng chit ê kî-tó lâi tùi Lí kî-tó.

28Taⁿ主耶和華ah，你是上帝ah，你ê話是真實，你也用chit-ê福氣應允你ê奴僕；Taⁿ Chú Iâ-hô-hoa ah, Lí sī Siōng-tè ah, Lí ê ōe sī chin-si̍t, Lí iā ēng chit ê hok-khì èng-ún Lí ê lô͘-po̍k;

29taⁿ求你賜福你ê奴僕ê家，hō͘伊永遠tī你ê面前；主耶和華ah，因為你有講伊，願你ê奴僕ê家tùi你ê賜福來得tio̍h福氣，到永遠。taⁿ kiû Lí sù-hok Lí ê lô͘-po̍k ê ke, hō͘ i éng-oán tī Lí ê bīn-chêng; Chú Iâ-hô-hoa ah, in-ūi Lí ū kóng i, goān Lí ê lô͘-po̍k ê ke tùi Lí ê sù-ho̍k lâi tit-tio̍h hok-khì, kàu éng-oán.