1當王tiàm tī厝內，耶和華也已經hō͘伊脫離四圍ê對敵，得tio̍h安靜ê時，Tng ông tiàm tī chhù-lāi, Iâ-hô-hoa iā í-keng hō͘ i thoat-lī sì-ûi ê tùi-te̍k, tit-tio̍h an-chēng ê sî,

2王kā先知Ná-tan講，看ah，我tiàm tī柏香柴ê厝內，總是上帝ê櫃tiàm tī帳籬內。ông kā sian-ti Ná-tan kóng, Khòaⁿ ah, góa tiàm tī pek-hiuⁿ-chhâ ê chhù-lāi, chóng-sī Siōng-tè ê kūi tiàm tī tiùⁿ-lî-lāi.

3Ná-tan對王講，見若你ê心所想ê，thang去做；因為耶和華kap你tī-teh。Ná-tan tùi ông kóng, Kìⁿ-nā lí ê sim só͘-siūⁿ-ê, thang khì chòe; in-ūi Iâ-hô-hoa kap lí tī-teh.

4Hit暝耶和華ê話臨到Ná-tan講，Hit-mî Iâ-hô-hoa ê ōe lîm-kàu Ná-tan kóng,

5你去kā我ê奴僕大衛講，耶和華án-ni講，你beh起厝hō͘我khiā起mah？Lí khì kā Góa ê lô͘-po̍k Tāi-pi̍t kóng, Iâ-hô-hoa án-ni kóng, Lí beh khí chhù hō͘ Góa khiā-khí mah?

6Tùi我chhōa以色列人出埃及ê日到今á日，我bē-bat tiàm tī厝裡，常常行tī布棚kap會幕。Tùi Góa chhōa Í-sek-lia̍t lâng chhut Ai-ki̍p ê ji̍t kàu kin-á-ji̍t, Góa bē-bat tiàm tī chhù--nih, siông-siông kiâⁿ tī pò͘-pîⁿ kap hōe-bō͘.

7見我kap以色列人所行到ê所在，kiám bat對以色列一支派ê士師，就是我命令照顧我ê百姓以色列ê，講，Lín啥事無kā我起柏香柴ê厝ah？Kìⁿ góa kap Í-sek-lia̍t lâng só͘ kiâⁿ-kàu ê só͘-chāi, kiám bat tùi Í-sek-lia̍t chi̍t chi-phài ê sū-su, chiū-sī Góa bēng-lēng chiàu-kò͘ Góa ê peh-sìⁿ Í-sek-lia̍t ê, kóng, Lín siáⁿ-sū bô kā Góa khí pek-hiuⁿ-chhâ ê chhù ah?

8Taⁿ你tio̍h kā我ê奴僕大衛講，萬軍ê耶和華án-ni講，我tùi羊寮中，你teh thàn羊群，揀你，做我ê百姓以色列ê君王。Taⁿ lí tio̍h kā Góa ê lô͘-po̍k Tāi-pi̍t kóng, Bān-kun ê Iâ-hô-hoa án-ni kóng, Góa tùi iûⁿ-tiâu-tiong, lí teh thàn iûⁿ-kûn, kéng lí, chòe Góa ê peh-sìⁿ Í-sek-lia̍t ê kun-ông.

9你無論去toh落，我常常kap你tī-teh，tī你ê面前剪除你一切ê對敵。我的確hō͘你得tio̍h大名，親像世上hiah-ê偉人ê大名一樣。Lí bô-lūn khì toh-lo̍h, Góa siông-siông kap lí tī-teh, tī lí ê bīn-chêng chián-tû lí it-chhè ê tùi-te̍k. Góa tek-khak hō͘ lí tit-tio̍h tōa-miâ, chhin-chhiūⁿ sè-chiūⁿ hiah ê úi-jîn ê tōa-miâ chi̍t-iūⁿ.

10我beh為tio̍h我ê百姓以色列定tio̍h一個所在，栽培in，hō͘ in tiàm tī家己ê所在，無koh遷徙，兇惡ê類無親像早前攪擾in，Góa beh ūi-tio̍h Góa ê peh-sìⁿ Í-sek-lia̍t tiāⁿ-tio̍h chi̍t ê só͘-chāi, chai-pôe in, hō͘ in tiàm tī ka-kī ê só͘-chāi, bô koh chhian-sóa, hiong-ok ê lūi bô chhin-chhiūⁿ chá-chêng kiáu-jiáu in,

11也無親像對我命令士師管理我ê百姓以色列ê日；我beh hō͘你脫離一切ê對敵，得tio̍h安靜。Koh耶和華kā你講，耶和華beh kā你建立家。iā bô chhin-chhiūⁿ tùi Góa bēng-lēng sū-su koán-lí Góa ê peh-sìⁿ Í-sek-lia̍t ê ji̍t; Góa beh hō͘ lí thoat-lī it-chhè ê tùi-te̍k, tit-tio̍h an-chēng. Koh Iâ-hô-hoa kā lí kóng, Iâ-hô-hoa beh kā lí kiàn-li̍p ke.

12到你ê日子已經滿，你kap你ê列祖相kap睏ê時，我beh設立你所出ê後裔來續接你，我也beh堅固伊ê國；Kàu lí ê ji̍t-chí í-keng móa, lí kap lí ê lia̍t-chó͘ saⁿ-kap khùn ê sî, Góa beh siat-li̍p lí só͘ chhut ê hō͘-è lâi sòa-chiap lí, Góa iā beh kian-kò͘ i ê kok;

13伊beh為我ê名起殿；我beh堅固伊ê國位，直到永遠。i beh ūi Góa ê miâ khí tiān; Góa beh kian-kò͘ i ê kok-ūi, ti̍t-kàu éng-oán.

14我beh做伊ê父，伊beh做我ê kiáⁿ；伊若犯罪，我beh用人ê柺，世間人ê鞭，責督伊。Góa beh chòe i ê pē, i beh chòe Góa ê kiáⁿ; i nā hoān-chōe, Góa beh ēng lâng ê koáiⁿ, sè-kan lâng ê piⁿ, chek-tok i.

15總是我ê慈愛無beh離開伊，親像我hō͘伊離開掃羅，就是我所棄sak tī你ê面前ê。Chóng-sī Góa ê chû-ài bô beh lī-khui i, chhin-chhiūⁿ Góa hō͘ i lī-khui Sò-lô, chiū-sī Góa só͘ khì-sak tī lí ê bīn-chêng ê.

16你ê家kap你ê國，beh永遠建立tī你ê面前；你ê國位也beh堅固到永遠。Lí ê ke kap lí ê kok, beh éng-oán kiàn-li̍p tī lí ê bīn-chêng; lí ê kok-ūi iā beh kian-kò͘ kàu éng-oán.

17Ná-tan就照這一切ê話，照這一切ê啟示，án-ni kā大衛講。Ná-tan chiu chiàu che it-chhè ê ōe, chiàu che it-chhè ê khé-sī, án-ni kā Tāi-pi̍t kóng.

18大衛王就入去，坐tī耶和華ê面前，講，主耶和華ah，我是是誰，我ê家算做甚麼，你竟然chhōa我到chit-ê地位ah？Tāi-pi̍t ông chiū ji̍p--khì, chē tī Iâ-hô-hoa ê bīn-chêng, kóng, Chú Iâ-hô-hoa ah, góa sī chī-chūi, góa ê ke sǹg-chòe sím-mi̍h, Lí kèng-jiân chhōa góa kàu chit ê tōe-ūi ah?

19主耶和華ah，這你iáu看做小khóa，你koh論到你ê奴僕ê家到tī久長；主耶和華ah，這是人間ê例。Chú Iâ-hô-hoa ah, che Lí iáu khòaⁿ-chòe sió-khóa, Lí koh lūn-kàu Lí ê lô͘-po̍k ê ke kàu tī kú-tn̂g; Chú Iâ-hô-hoa ah, che sī jîn-kan ê lē.

20大衛iáu有甚麼話thang對你講ah？主耶和華ah，你知你ê奴僕。Tāi-pi̍t iáu ū sím-mi̍h ōe thang tùi Lí kóng ah? Chú Iâ-hô-hoa ah, Lí chai Lí ê lô͘-po̍k.

21為tio̍h你ê話，koh照你ê心，你行這一切ê大事，hō͘你ê奴僕知；Ūi-tio̍h Lí ê ōe, koh chiàu Lí ê sim, Lí kiâⁿ che it-chhè ê tōa-sū, hō͘ Lí ê lô͘-po̍k chai;

22耶和華上帝ah，你是至大；照阮ê耳孔所聽見ê，無一個能比得你，你以外無有上帝。Iâ-hô-hoa Siōng-tè ah, Lí sī chì-tōa; chiàu goán ê hī-khang só͘ thiaⁿ-kìⁿ ê, bô chi̍t-ê ōe pí-tit Lí, Lí í-gōa bô ū Siōng-tè.

23地上有甚麼國親像你ê百姓以色列ah？就是上帝去救贖伊，歸tī家己做百姓，hō͘伊有名聲，koh tī你ê百姓ê面前，就是你tùi埃及，kap列邦，以及in hiah-ê上帝所救贖出來ê，為tio̍h lín行大ê tāi-chì，為tio̍h你ê地做thang驚ê事ah？Tōe-chiūⁿ ū sím-mi̍h kok chhin-chhiūⁿ Lí ê peh-sìⁿ Í-sek-lia̍t ah? chiū-sī Siōng-tè khì kiù-sio̍k i, kui tī ka-kī chòe peh-sìⁿ, hō͘ I ū miâ-siaⁿ, koh tī Lí ê peh-sìⁿ ê bīn-chêng, chiū-sī Lí tùi Ai-ki̍p, kap lia̍t-pang, í-ki̍p in hiah ê siōng-tè só͘ kiù-sio̍k chhut-lâi ê, ūi-tio̍h lín kiâⁿ tōa ê tāi-chì, ūi-tio̍h Lí ê tōe chòe thang kiaⁿ ê sū ah?

24你bat為家己建立你ê百姓以色列永遠做你ê百姓；耶和華ah，你也做in ê上帝。Lí bat ūi ka-kī kiàn-li̍p Lí ê peh-sìⁿ Í-sek-lia̍t éng-oán chòe Lí ê peh-sìⁿ; Iâ-hô-hoa ah, Lí iā chòe in ê Siōng-tè.

25耶和華上帝ah，taⁿ你所論到你ê奴僕，kap你ê奴僕ê家，願你永遠堅固伊，照你所講ê來行。Iâ-hô-hoa Siōng-tè ah, taⁿ Lí só͘ lūn-kàu Lí ê lô͘-po̍k, kap Lí ê lô͘-po̍k ê ke, goān Lí éng-oán kian-kò͘ i, chiàu Lí só͘-kóng-ê lâi kiâⁿ.

26願人永永尊你ê名做大，講，萬軍ê耶和華是管理以色列ê上帝；koh你ê奴僕大衛ê家beh tī你ê面前堅固。Goān lâng éng-éng chun Lí ê miâ chòe-tōa, kóng, Bān-kun ê Iâ-hô-hoa sī koán-lí Í-sek-lia̍t ê Siōng-tè; koh Lí ê lô͘-po̍k Tāi-pi̍t ê ke beh tī Lí ê bīn-chêng kian-kò͘.

27萬軍ê耶和華，以色列ê上帝ah，因為你啟示你ê奴僕，講，我beh kā你建立家，所以你ê奴僕好膽用chit-ê祈禱來對你祈禱。Bān-kun ê Iâ-hô-hoa, Í-sek-lia̍t ê Siōng-tè ah, in-ūi Lí khé-sī Lí ê lô͘-po̍k, kóng, Góa beh kā lí kiàn-li̍p ke, só͘-í Lí ê lô͘-po̍k hó-táⁿ ēng chit ê kî-tó lâi tùi Lí kî-tó.

28Taⁿ主耶和華ah，你是上帝ah，你ê話是真實，你也用chit-ê福氣應允你ê奴僕；Taⁿ Chú Iâ-hô-hoa ah, Lí sī Siōng-tè ah, Lí ê ōe sī chin-si̍t, Lí iā ēng chit ê hok-khì èng-ún Lí ê lô͘-po̍k;

29taⁿ求你賜福你ê奴僕ê家，hō͘伊永遠tī你ê面前；主耶和華ah，因為你有講伊，願你ê奴僕ê家tùi你ê賜福來得tio̍h福氣，到永遠。taⁿ kiû Lí sù-hok Lí ê lô͘-po̍k ê ke, hō͘ i éng-oán tī Lí ê bīn-chêng; Chú Iâ-hô-hoa ah, in-ūi Lí ū kóng i, goān Lí ê lô͘-po̍k ê ke tùi Lí ê sù-ho̍k lâi tit-tio̍h hok-khì, kàu éng-oán.

1Chit-tia̍p了後，大衛phah腓利士人，hō͘ in降服；大衛koh tùi腓利士人ê手取Bí-tek-an-má。Chit-tia̍p liáu-āu Tāi-pi̍t phah Hui-lī-sū lâng, hō͘ in hâng-ho̍k; Tāi-pi̍t koh tùi Hui-lī-sū lâng ê chhiú chhú Bí-tek-an-má.

2Koh phah Mô͘-ap，hō͘ in倒tī地裡，用索量伊，量兩條索ê hō͘伊死，量滿一條索ê hō͘伊活；Mô͘-ap人就歸服大衛，來進貢。Koh phah Mô͘-ap, hō͘ in tó tī tōe--nih, ēng soh niû i, niû nn̄g tiâu soh-ê hō͘ i sí, niû móa chi̍t tiâu soh-ê hō͘ i oa̍h; Mô͘-ap lâng chiū kui-ho̍k Tāi-pi̍t, lâi chìn-kòng.

3大衛phah Só-pa王Lī-ha̍p ê kiáⁿ Hap-tāi-tí-siā，tī伊去大河，beh恢(khoe)復伊ê權ê時。Tāi-pi̍t phah Só-pa ông Lī-ha̍p ê kiáⁿ Hap-tāi-tí-siā, tī i khì Tōa-hô, beh khoe-ho̍k i ê koân ê sî.

4大衛掠伊ê馬兵一千七百，步兵兩萬；大衛將伊戰車ê馬割斷伊ê腳筋；只有留一百張車ê馬。Tāi-pi̍t lia̍h i ê bé-peng chi̍t-chheng chhit pah, pō͘-peng nn̄g-bān; Tāi-pi̍t chiong i chiàn-chhia ê bé koah-tn̄g i ê kha-kun; chí-ū lâu chi̍t-pah tiuⁿ chhia ê bé.

5大馬色ê A-lân人來幫贊Só-pa王Hap-tāi-tí-siā，大衛就thâi死A-lân人兩萬兩千。Tāi-má-sek ê A-lân lâng lâi pang-chān Só-pa ông Hap-tāi-tí-siā, Tāi-pi̍t chiū thâi-sí A-lân lâng nn̄g-bān nn̄g-chheng.

6Tùi án-ni，大衛tī大馬色ê A-lân設立軍營。A-lân人就歸服大衛，來進貢。大衛無論去toh落，耶和華lóng hō͘伊khah贏。Tùi án-ni Tāi-pi̍t tī Tāi-má-sek ê A-lân siat-li̍p kun-iâⁿ. A-lân lâng chiū kui-ho̍k Tāi-pi̍t, lâi chìn-kòng. Tāi-pi̍t bô-lūn khì toh-lo̍h, Iâ-hô-hoa lóng hō͘ i khah-iâⁿ.

7大衛取Hap-tāi-tí-siā hiah-ê人臣所kōaⁿ金ê屏牌，帶到耶路撒冷。Tāi-pi̍t chhú Hap-tāi-tí-siā hiah ê jîn-sîn só͘ kōaⁿ kim ê pîn-pâi, tòa kàu Iâ-lō͘-sat-léng.

8大衛王koh tùi屬Hap-tāi-tí-siā ê Pí-tha kap Pí-lô-tha ê城，得tio̍h chōe-chōe銅。Tāi-pi̍t ông koh tùi sio̍k Hap-tāi-tí-siā ê Pí-tha kap Pí-lô-tha ê siâⁿ, tit-tio̍h chōe-chōe tâng.

9Hap-ná王Tô-í聽見大衛phah贏Hap-tāi-tí-siā ê全軍；Hap-ná ông Tô-í thiaⁿ-kìⁿ Tāi-pi̍t phah-iâⁿ Hap-tāi-tí-siā ê choân-kun;

10Tô-í就差伊ê kiáⁿ Iok-lân去見大衛王，請安伊，kā伊祝福，因為伊phah贏Hap-tāi-tí-siā；因為Hap-tāi-tí-siā kap Tô-í常常交戰。Iok-lân ê手也帶銀器、金器、銅器。Tô-í chiū chhe i ê kiáⁿ Iok-lân khì kìⁿ Tāi-pi̍t ông, chhéng-an i, kā i chiok-hok, in-ūi i phah-iâⁿ Hap-tāi-tí-siā; in-ūi Hap-tāi-tí-siā kap Tô-í siông-siông kau-chiàn. Iok-lân ê chhiú iā tòa gûn-khì, kim-khì, tâng-khì.

11大衛王就用chiah-ê物做聖，獻hō͘耶和華，親像前用伊所khah贏列國ê金銀做聖來獻一樣；Tāi-pi̍t ông chiū ēng chiah ê mi̍h chòe-sèng, hiàn hō͘ Iâ-hô-hoa, chhin-chhiūⁿ chêng ēng i só͘ khah-iâⁿ lia̍t-kok ê kim-gûn chòe-sèng lâi hiàn chi̍t-iūⁿ;

12就是tùi A-lân、Mô͘-ap、A-bûn人、腓利士人、A-má-le̍k，所得tio̍h ê，以及tùi Só-pa王Lī-ha̍p ê kiáⁿ Hap-tāi-tí-siā所搶ê。chiū-sī tùi A-lân, Mô͘-ap, A-bûn lâng, Hui-lī-sū lâng, A-má-le̍k, só͘ tit-tio̍h ê, í-ki̍p tùi Só-pa ông Lī-ha̍p ê kiáⁿ Hap-tāi-tí-siā só͘ chhiúⁿ ê.

13大衛tī鹽ê山谷phah死A-lân一萬八千人；tò來ê時，就得tio̍h大名聲。Tāi-pi̍t tī Iâm ê soaⁿ-kok phah-sí A-lân chi̍t-bān poeh-chheng lâng; tò--lâi ê sî, chiū tit-tio̍h tōa miâ-siaⁿ.

14Koh 伊tī Í-tong設軍營；就是tī Í-tong全地設軍營。Í-tong人就lóng 歸服大衛。大衛無論去toh落，耶和華lóng hō͘伊khah贏。Koh i tī Í-tong siat kun-iâⁿ; chiū-sī tī Í-tong choân-tōe siat kun-iâⁿ. Í-tong lâng chiū lóng kui-ho̍k Tāi-pi̍t. Tāi-pi̍t bô-lūn khì toh-lo̍h, Iâ-hô-hoa lóng hō͘ i khah-iâⁿ.

15大衛做以色列眾人ê王。大衛秉公行義tī伊ê眾百姓。Tāi-pi̍t chòe Í-sek-lia̍t chèng-lâng ê ông. Tāi-pi̍t péng-kong kiâⁿ-gī tī i ê chèng peh-sìⁿ.

16Sé-ló͘-ngá ê kiáⁿ約押做軍長；A-hi-lu̍t ê kiáⁿ Iok-sa-hoat做史官。Sé-ló͘-ngá ê kiáⁿ Iok-ap chòe kun-tiúⁿ; A-hi-lu̍t ê kiáⁿ Iok-sa-hoat chòe sú-koaⁿ.

17A-hi-tu̍t ê kiáⁿ Sat-tok kap A-pí-a-tha ê kiáⁿ A-hi-bí-le̍k做祭司；Se-lâi-ngá做書記；A-hi-tu̍t ê kiáⁿ Sat-tok kap A-pí-a-tha ê kiáⁿ A-hi-bí-le̍k chòe chè-si; Se-lâi-ngá chòe su-kì;

18Iâ-hô-iâ-tāi ê kiáⁿ Pí-ná-ngá統轄 Ki-lī-thê人，kap Pí-lí-thê人；大衛hiah-ê kiáⁿ做領袖。Iâ-hô-iâ-tāi ê kiáⁿ Pí-ná-ngá thóng-hat Ki-lī-thê lâng, kap Pí-lí-thê lâng; Tāi-pi̍t hiah ê kiáⁿ chòe léng-siù.

1大衛問講，掃羅ê家iáu有chhun人無，我thang因為約拿單ê緣故來施恩hō͘伊？Tāi-pi̍t mn̄g kóng, Sò-lô ê ke iáu ū chhun lâng bô, góa thang in-ūi Iok-ná-tan ê iân-kò͘ lâi si-un hō͘ i?

2掃羅ê家有一個奴僕，名叫Sé-pa，人叫伊去大衛hia；王就kā伊講，你是Sé-pa mah？Sò-lô ê ke ū chi̍t ê lô͘-po̍k, miâ kiò Sé-pa, lâng kiò i khì Tāi-pi̍t hia; ông chiū kā i kóng, Lí sī Sé-pa mah?

3應講，你ê奴僕就是伊。王講，掃羅ê家iáu有人無，我thang將上帝ê恩施hō͘伊？Ìn kóng, Lí ê lô͘-po̍k chiū-sī i. Ông kóng, Sò-lô ê ke iáu ū lâng bô, góa thang chiong Siōng-tè ê un si hō͘ i?

4Sé-pa對王講，約拿單iáu有一個kiáⁿ，是跛腳ê。王kā伊講，伊tī toh落？Sé-pa應王講，伊tī Lô-tí-pa A-bí-lī ê kiáⁿ Má-kiat ê家。Sé-pa tùi ông kóng, Iok-ná-tan iáu ū chi̍t ê kiáⁿ, sī pái-kha ê. Ông kā i kóng, I tī toh-lo̍h? Sé-pa ìn ông kóng, I tī Lô-tí-pa A-bí-lī ê kiáⁿ Má-kiat ê ke.

5大衛王就差人去，tùi Lô-tí-pa A-bí-lī ê kiáⁿ Má-kiat ê家帶伊來。Tāi-pi̍t ông chiū chhe lâng khì, tùi Lô-tí-pa A-bí-lī ê kiáⁿ Má-kiat ê ke tòa i lâi.

6掃羅ê孫，約拿單ê kiáⁿ，Bí-hui-pho-siat來見大衛，仆落去拜。大衛講，Bí-hui-pho-siat ah。伊應講，你ê奴僕tī-chia。Sò-lô ê sun, Iok-ná-tan ê kiáⁿ, Bí-hui-pho-siat lâi kìⁿ Tāi-pi̍t, phak--lo̍h-khì pài. Tāi-pi̍t kóng, Bí-hui-pho-siat ah. I ìn kóng, Lí ê lô͘-po̍k tī-chia.

7大衛講，你莫得驚，我beh 因為你ê父約拿單ê緣故施恩hō͘你；我beh將你ê公掃羅一切ê田園lóng還你；你也beh常常tī我ê桌相kap食。Tāi-pi̍t kóng, Lí bo̍h-tit kiaⁿ, góa beh in-ūi lí ê pē Iok-ná-tan ê iân-kò͘ si-un hō͘ lí; góa beh chiong lí ê kong Sò-lô it-chhè ê chhân-hn̂g lóng hêng lí; lí iā beh siông-siông tī góa ê toh saⁿ-kap chia̍h.

8伊koh仆teh拜伊，講，你ê奴僕是甚麼ah？是親像一隻死狗，你竟然看顧我ah。I koh phak--teh pài i, kóng, Lí ê lô͘-po̍k sī sím-mi̍h ah? sī chhin-chhiūⁿ chi̍t chiah sí-káu, lí kéng-jiân khòaⁿ-kò͘ góa ah.

9王叫掃羅ê奴僕Sé-pa來，kā伊講，我已經將屬掃羅kap伊全家-ê lóng hō͘你ê主人ê kiáⁿ。Ông kiò Sò-lô ê lô͘-po̍k Sé-pa lâi, kā i kóng, Góa í-keng chiong sio̍k Sò-lô kap i choân-ke--ê lóng hō͘ lí ê chú-lâng ê kiáⁿ.

10你kap你hiah-ê kiáⁿ，你hiah-ê奴僕，tio̍h kā伊種作田園，帶所出產ê hō͘你ê主ê kiáⁿ有物thang食；總是你ê主人ê kiáⁿ Bí-hui-pho-siat beh常常tī我ê桌相kap食。Lí kap lí hiah ê kiáⁿ, lí hiah ê lô͘-po̍k, tio̍h kā i chèng-choh chhân-hn̂g, tòa só͘ chhut-sán-ê hō͘ lí ê chú ê kiáⁿ ū mi̍h thang chia̍h; chóng-sī lí ê chú-lâng ê kiáⁿ Bí-hui-pho-siat beh siông-siông tī góa ê toh saⁿ-kap chia̍h.

11Sé-pa有十五ê kiáⁿ，二十個奴僕。Sé-pa對王講，見我ê主我ê王所吩咐奴僕ê，你ê奴僕lóng beh照án-ni行。王koh講，Bí-hui-pho-siat beh tī我ê桌相kap食，親像王ê kiáⁿ一樣。Sé-pa ū cha̍p-gō͘ ê kiáⁿ, jī-cha̍p ê lô͘-po̍k. Sé-pa tùi ông kóng, Kìⁿ góa ê chú góa ê ông só͘ hoan-hù lô͘-po̍k ê, lí ê lô͘-po̍k lóng beh chiàu án-ni kiâⁿ. Ông koh kóng, Bí-hui-pho-siat beh tī góa ê toh saⁿ-kap chia̍h, chhin-chhiūⁿ ông ê kiáⁿ chi̍t-iūⁿ.

12Bí-hui-pho-siat有一個kiáⁿ iáu細漢，名叫Bí-ka。見若tòa tī Sé-pa ê家ê人，lóng做Bí-hui-pho-siat ê奴僕。Bí-hui-pho-siat ū chi̍t ê kiáⁿ iáu sòe-hàn, miâ kiò Bí-ka. Kìⁿ-nā tòa tī Sé-pa ê ke ê lâng, lóng chòe Bí-hui-pho-siat ê lô͘-po̍k.

13Tùi án-ni，Bí-hui-pho-siat tiàm tī耶路撒冷；因為伊常常tī王ê桌相kap食；koh伊兩腳lóng跛(pái)。Tùi án-ni Bí-hui-pho-siat tiàm tī Iâ-lō͘-sat-léng; in-ūi i siông-siông tī ông ê toh saⁿ-kap chia̍h; koh i nn̄g-kha lóng pái.