1兄弟ah，論到時期，m̄免寫phoe hō͘ lín。Hiaⁿ-tī ah, lūn-kàu sî-kî m̄ bián siá phoe hō͘ lín.

2因為lín家己詳細知，主ê日到親像賊透暝來。In-ūi lín ka-kī siông-sè chai, Chú ê ji̍t kàu chhin-chhiūⁿ chha̍t thàu mî lâi.

3人當teh講，平安穩當ê時，災禍忽然到tī in，親像生kiáⁿ ê艱苦到tī有身孕ê婦人人一樣，in hiah-ê人bōe會走離。Lâng tng teh kóng, Pêng-an ún-tàng ê sî, chai-ē hut-jiân kàu tī in, chhin-chhiūⁿ siⁿ kiáⁿ ê kan-khó͘ kàu tī ū sin-īn ê hū-jîn-lâng chi̍t iūⁿ, in hiah ê lâng bōe-ōe cháu-lī.

4但是兄弟ah，lín m̄是tī暗ê中間，致到hit日親像賊來jip-tio̍h lín。Nā-sī hiaⁿ-tī ah, lín m̄ sī tī àm ê tiong-kan, tì-kàu hit ji̍t chhin-chhiūⁿ chha̍t lâi jip-tio̍h lín.

5因為lín lóng是光明ê人，日時ê人；咱m̄是屬tī暝時ê，也m̄是烏暗ê。In-ūi lín lóng sī kng-bêng ê lâng, ji̍t-sî ê lâng; lán m̄ sī sio̍k tī mî-sî ê, iā m̄ sī o͘-àm ê.

6所以咱m̄- thang親像其餘ê人teh睏；tio̍h警醒節制。Só͘-í lán m̄ thang chhin-chhiūⁿ kî-û ê lâng teh khùn; tio̍h kéng-séng chiat-chè.

7因為睏ê人是暝時睏，酒醉ê人是暝時醉。In-ūi khùn ê lâng sī mî-sî khùn, chiú-chùi ê lâng sī mî-sî chùi.

8但是咱屬日時ê tio̍h節制，穿信kap仁愛做護心鏡，用得救ê ǹg望做頭盔。Nā-sī lán sio̍k ji̍t-sî ê tio̍h chiat-chè, chhēng sìn kap jîn-ài chòe hō͘-sim-kiàⁿ, ēng tit kiù ê ǹg-bāng chòe thâu-khoe.

9因為上帝定tio̍h咱m̄是來tú-tio̍h受氣，就是beh tùi咱ê主耶穌基督來得tio̍h救。In-ūi Siōng-tè tiāⁿ-tio̍h lán m̄ sī lâi tú-tio̍h siū-khì, chiū-sī beh tùi lán ê Chú Iâ-so͘ Ki-tok lâi tit-tio̍h kiù.

10伊替咱死，hō͘咱或是醒或是睏，kap伊同活。I thòe lán sí, hō͘ lán he̍k-sī chhíⁿ he̍k-sī khùn, kap I tâng oa̍h.

11所以tio̍h相安慰，大家相建立德行，照lín所teh做ê。Só͘-í tio̍h saⁿ an-ùi, tāi-ke saⁿ kiàn-li̍p tek-hēng, chiàu lín só͘ teh chòe ê.

12兄弟ah，阮求lín，凡若tī lín中間tio̍h磨，tiàm-tī主治理lín，警戒lín ê，lín tio̍h bat伊，Hiaⁿ-tī ah, goán kiû lín, hoān-nā tī lín tiong-kan tio̍h-bôa, tiàm-tī Chú tī-lí lín, kéng-kài lín ê, lín tio̍h bat i,

13為tio̍h in所做ê工，lín tio̍h tī仁愛大大尊敬in。Lín大家tio̍h和睦。ūi-tio̍h in só͘ chòe ê kang, lín tio̍h tī jîn-ài tōa-tōa chun-kèng in. Lín tāi-ke tio̍h hô-bo̍k.

14兄弟ah，阮勸lín tio̍h警戒hiah-ê無法度ê，安慰hiah-ê餒志ê，扶持hiah-ê軟弱ê，用寬容款待眾人。Hiaⁿ-tī ah, goán khǹg lín tio̍h kéng-kài hiah ê bô hoat-tō͘ ê, an-ùi hiah ê lóe-chì ê, hû-chhî hiah ê loán-jio̍k ê, ēng khoan-iông khoán-thāi chèng lâng.

15謹慎莫得用pháiⁿ報pháiⁿ；或是大家相款待，á是款待眾人，tio̍h常常追jip hit-ê好。Kín-sīn bo̍h-tit ēng pháiⁿ pò pháiⁿ; he̍k-sī tāi-ke saⁿ khoán-thāi, á-sī khoán-thāi chèng lâng, tio̍h siông-siông tui-jip hit ê hó.

16Tio̍h常常歡喜；Tio̍h siông-siông hoaⁿ-hí;

17tio̍h祈禱無soah；tio̍h kî-tó bô soah;

18凡事感謝，因為chit-ê是上帝tiàm-tī基督耶穌ǹg lín ê旨意。hoān sū kám-siā, in-ūi chit-ê sī Siōng-tè tiàm-tī Ki-tok Iâ-so͘ ǹg lín ê chí-ì.

19M̄-thang phah-hoa聖神；M̄ thang phah-hoa Sèng Sîn;

20m̄-thang看輕先知ê話，m̄ thang khòaⁿ-khin sian-ti ê ōe,

21凡事tio̍h察驗；hoān sū tio̍h chhat-giām;

22好ê tio̍h執守；tio̍h離開ta̍k樣ê pháiⁿ。hó-ê tio̍h chip-siú; tio̍h lī-khui ta̍k iūⁿ ê pháiⁿ.

23願平安ê上帝家己hō͘ lín一盡成聖；koh願lín ê神kap魂以及身軀tī咱ê主耶穌基督koh來ê時，lóng得tio̍h保全，無thang嫌。Goān pêng-an ê Siōng-tè ka-kī hō͘ lín it-chīn chiâⁿ-sèng; koh goān lín ê sîn kap hûn í-ki̍p seng-khu tī lán ê Chú Iâ-so͘ Ki-tok koh-lâi ê sî, lóng tit-tio̍h pó-choân, bô thang hiâm.

24召lín ê是信實，伊也beh成伊。Tiàu lín ê sī sìn-si̍t, I iā beh chiâⁿ i.

25兄弟ah，tio̍h替阮祈禱。Hiaⁿ-tī ah, tio̍h thòe goán kî-tó.

26tio̍h用聖ê相chim來請安lóng總ê兄弟。Tio̍h ēng sèng ê saⁿ-chim lâi chhéng-an lóng-chóng ê hiaⁿ-tī.

27我kí主來吩咐lín，用chit張phoe讀hō͘眾兄弟聽。Góa kí Chú lâi hoan-hù lín, ēng chit tiuⁿ phoe tha̍k hō͘ chèng hiaⁿ-tī thiaⁿ.

28願咱ê主耶穌基督ê恩典kap lín tī-teh。Goān lán ê Chú Iâ-so͘ Ki-tok ê un-tián kap lín tī-teh.

1保羅kap西拉以及提摩太，phoe寄hō͘帖撒羅尼迦人ê教會，就是tiàm-tī咱ê父上帝kap主耶穌基督ê：Pó-lô kap Se-lah í-ki̍p Thê-mô͘-thài phoe kià hō͘ Thiap-sat-lô-nî-ka lâng ê kàu-hōe, chiū-sī tiàm-tī lán ê Pē Siōng-tè kap Chú Iâ-so͘ Ki-tok ê:

2願lín tùi父上帝kap主耶穌基督得tio̍h恩典平安。goān lín tùi Pē Siōng-tè kap Chú Iâ-so͘ Ki-tok tit-tio̍h un-tián pêng-an.

3兄弟ah，阮應該為tio̍h lín常常感謝上帝，這本是合宜ê，因為lín ê信益發長大，koh lín眾人ta̍k ê相疼ê心lóng充足；Hiaⁿ-tī ah, goán eng-kai ūi-tio̍h lín siông-siông kám-siā Siōng-tè, che pún sī ha̍p-gî ê, in-ūi lín ê sìn it-hoat tióng-tōa, koh lín chèng lâng ta̍k ê saⁿ-thiàⁿ ê sim lóng chhiong-chiok;

4致到阮tī上帝chiah-ê教會將lín來誇口，因為lín tī一切ê khún-tio̍k kap所受ê患難中，有存吞忍kap信ê心；tì-kàu goán tī Siōng-tè chiah ê kàu-hōe chiong lín lâi khoa-kháu, in-ūi lín tī it-chhè ê khún-tio̍k kap só͘ siū ê hoān-lān tiong, ū chûn thun-lún kap sìn ê sim;

5這就是上帝公義審判bêng ê憑據，hō͘ lín thang算做能堪得tī上帝ê 國，就是lín為tio̍h伊受苦ê。che chiū-sī Siōng-tè kong-gī sím-phòaⁿ bêng ê pîn-kù, hō͘ lín thang sǹg chòe ōe kham-tit tī Siōng-tè ê kok, chiū-sī lín ūi-tio̍h i siū-khó͘ ê.

6因為上帝照公義，beh用患難報應hiah-ê hō͘ lín tú-tio̍h患難ê人，In-ūi Siōng-tè chiàu kong-gī, beh ēng hoān-lān pò-èng hiah ê hō͘ lín tú-tio̍h hoān-lān ê lâng,

7也beh hō͘ lín chiah-ê受患難ê人kap阮同得tio̍h安歇，就是tī主耶穌kap伊有權能ê天使，tī火燄中，iā beh hō͘ lín chiah ê siū hoān-lān ê lâng kap goán tâng tit-tio̍h an-hioh, chiū-sī tī Chú Iâ-so͘ kap I ū koân-lêng ê thiⁿ-sài, tī hé-iām tiong,

8tùi天顯現ê時，來報冤tī hiah-ê m̄-bat上帝kap m̄順服咱ê主耶穌ê福音ê；tùi thiⁿ hián-hiān ê sî, lâi pò-oan tī hiah ê m̄ bat Siōng-tè kap m̄ sūn-ho̍k lán ê Chú Iâ-so͘ ê hok-im ê;

9chit號人beh受刑罰，就是永遠ê滅無，離開主ê面前kap伊權能ê榮光，chit hō lâng beh siū hêng-hoa̍t, chiū-sī éng-oán ê bia̍t-bô, lī-khui Chú ê bīn-chêng kap I koân-lêng ê êng-kng,

10當主臨到ê日，就是伊beh tī chiah-ê聖徒得tio̍h榮光，也tī hit日伊beh tī lóng總信ê人得tio̍h o-ló，因為阮tùi lín所干證ê lín有信。tng Chú lîm-kàu ê ji̍t, chiū-sī I beh tī chiah ê sèng-tô͘ tit-tio̍h êng-kng, iā tī hit ji̍t I beh tī lóng-chóng sìn ê lâng tit-tio̍h o-ló, in-ūi goán tùi lín só͘ kan-chèng ê lín ū sìn.

11為tio̍h án-ni阮也常常替lín祈禱，願咱ê上帝看lín做能堪得tī所受ê召，koh用權能來完滿一切所欣慕ê好，kap tùi信所做ê 工，Ūi-tio̍h án-ni goán iā siông-siông thòe lín kî-tó, goān lán ê Siōng-tè khòaⁿ lín chòe ōe kham-tit tī só͘ siū ê tiàu, koh ēng koân-lêng lâi oân-móa it-chhè só͘ him-bō͘ ê hó, kap tùi sìn só͘ chòe ê kang,

12hō͘咱ê主耶穌ê名tī lín得tio̍h榮光，lín也tī伊得tio̍h榮光，照咱ê上帝kap主耶穌基督ê恩。hō͘ lán ê Chú Iâ-so͘ ê miâ tī lín tit-tio̍h êng-kng, lín iā tī I tit-tio̍h êng-kng, chiàu lán ê Siōng-tè kap Chú Iâ-so͘ Ki-tok ê un.

1兄弟ah，論到咱ê主耶穌基督ê臨到，kap咱chiah-ê聚集歸伊，阮求lín，Hiaⁿ-tī ah, lūn-kàu lán ê Chú Iâ-so͘ Ki-tok ê lîm-kàu, kap lán chiah-ê chū-chi̍p kui I, goán kiû lín,

2無論tùi神，á是tùi話，á是tùi phoe假冒阮ê名ê，講主ê日現在到lah，lín ê心志莫得快快搖動，也莫得驚惶；bô lūn tùi sîn, á-sī tùi ōe, á-sī tùi phoe ká-mō͘ goán ê miâ ê, kóng Chú ê ji̍t hiān-chāi kàu lah, lín ê sim-chì bo̍h-tit khoài-khoài iô-tāng, iā bo̍h-tit kiaⁿ-hiâⁿ;

3無論用甚麼法，一概莫得hō͘人引誘；因為hit日猶未到，的確事先有背教ê事，kap hit-ê罪惡ê人，就是沉淪ê人，出現；bô lūn ēng sím-mi̍h hoat, it-khài bo̍h-tit hō͘ lâng ín-iú; in-ūi hit ji̍t iáu-bē kàu, tek-khak tāi-seng ū pōe-kàu ê sū, kap hit ê chōe-ok ê lâng, chiū-sī tîm-lûn ê lâng, chhut-hiān;

4伊是做對敵，也自高pôaⁿ過一切稱做上帝kap受敬拜ê；甚至坐tī上帝ê殿，表明做上帝。i sī chòe tùi-te̍k, iā chū-ko pôaⁿ-kè it-chhè chheng chòe Siōng-tè kap siū kèng-pài ê; sīm-chì chē tī Siōng-tè ê tiān, piáu-bêng chòe Siōng-tè.

5我iáu kap lín tī-teh ê時，bat將chiah-ê事kā lín講，lín kiám bōe記得mah？Góa iáu kap lín tī-teh ê sî, bat chiong chiah ê sū kā lín kóng, lín kiám bōe kì-tit mah?

6Taⁿ hit-ê阻擋伊，hō͘伊到伊ê期chiah出現ê，lín也知。Taⁿ hit ê chó͘-tòng i, hō͘ i kàu i ê kî chiah chhut-hiān ê, lín iā chai.

7因為不法ê祕密已經teh運動，獨獨現今有一個阻擋伊ê，直到hit-ê阻擋ê tùi中央除去。In-ūi put-hoat ê pì-bi̍t í-keng teh ūn-tōng, to̍k-to̍k hiān-kim ū chi̍t ê chó͘-tòng i ê, ti̍t-kàu hit ê chó͘-tòng ê tùi tiong-ng tû-khì.

8Hit時hit-ê不法ê beh出現，主耶穌beh用伊ê 口氣來滅伊，用伊臨到ê顯現來廢無伊。Hit sî hit ê put-hoat ê beh chhut-hiān, Chú Iâ-so͘ beh ēng I ê kháu-khì lâi bia̍t i, ēng I lîm-kàu ê hián-hiān lâi hòe-bô i.

9Hit-ê不法ê臨到，是照撒旦ê運行，用一切ê權能、神蹟，kap假 ê兆頭，Hit ê put-hoat ê lîm-kàu sī chiàu Sat-tàn ê ūn-hêng, ēng it-chhè ê koân-lêng, sîn-jiah, kap ké ê tiāu-thâu,

10koh用一切不義ê詭譎行tī hiah-ê teh沉淪ê，因為in無接納真理ê疼來得救。koh ēng it-chhè put-gī ê khúi-khiat kiâⁿ tī hiah ê teh tîm-lûn ê, in-ūi in bô chiap-la̍p chin-lí ê thiàⁿ lâi tit kiù.

11為tio̍h án-ni，上帝將差謬ê運行降hō͘ in，hō͘ in信白賊；Ūi-tio̍h án-ni Siōng-tè chiong chha-biū ê ūn-hêng kàng hō͘ in, hō͘ in sìn pe̍h-chha̍t;

12hō͘見若m̄信真理，去歡喜不義ê，lóng受擬斷。hō͘ kìⁿ-nā m̄ sìn chin-lí, khì hoaⁿ-hí put-gī ê, lóng siū gí-toàn.

13但是主所疼ê兄弟ah，阮應該替lín常常感謝上帝，因為上帝tùi起頭揀lín，beh hō͘ lín得救，是在tī神ê成聖kap信真理。Nā-sī Chú só͘ thiàⁿ ê hiaⁿ-tī ah, goán eng-kai thòe lín siông-siông kám-siā Siōng-tè, in-ūi Siōng-tè tùi khí-thâu kéng lín, beh hō͘ lín tit kiù, sī chāi-tī Sîn(*sim-sîn) ê chiâⁿ-sèng kap sìn chin-lí.

14為tio̍h chit-ê，伊對阮所傳ê福音bat召lín，來得tio̍h咱ê主耶穌基督ê榮光。Ūi-tio̍h chit-ê, I tùi goán só͘ thoân ê hok-im bat tiàu lín, lâi tit-tio̍h lán ê Chú Iâ-so͘ Ki-tok ê êng-kng.

15所以，兄弟ah，tio̍h khiā在；lín所得tio̍h ê傳授，無論是tùi嘴講ê，á是tùi阮ê phoe，凡所學習ê，tio̍h執守伊。Só͘-í, hiaⁿ-tī ah, tio̍h khiā-chāi; lín só͘ tit-tio̍h ê thoân-siū, bô lūn sī tùi chhùi kóng ê, á-sī tùi goán ê phoe, hoān só͘ ha̍k-si̍p ê, tio̍h chip-siú i.

16咱ê主耶穌基督，kap咱ê父上帝，就是疼咱，也tī恩典將永遠ê安慰kap好ê ǹg望賞賜咱ê，Lán ê Chú Iâ-so͘ Ki-tok, kap lán ê Pē Siōng-tè, chiū-sī thiàⁿ lán, iā tī un-tián chiong éng-oán ê an-ùi kap hó ê ǹg-bāng siúⁿ-sù lán ê,

17願伊安慰lín ê心，堅固lín tī一切好ê所行，好ê所講。goān I an-ùi lín ê sim, kian-kò͘ lín tī it-chhè hó ê só͘ kiâⁿ, hó ê só͘ kóng.