1兄弟ah，論到咱ê主耶穌基督ê臨到，kap咱chiah-ê聚集歸伊，阮求lín，Hiaⁿ-tī ah, lūn-kàu lán ê Chú Iâ-so͘ Ki-tok ê lîm-kàu, kap lán chiah-ê chū-chi̍p kui I, goán kiû lín,

2無論tùi神，á是tùi話，á是tùi phoe假冒阮ê名ê，講主ê日現在到lah，lín ê心志莫得快快搖動，也莫得驚惶；bô lūn tùi sîn, á-sī tùi ōe, á-sī tùi phoe ká-mō͘ goán ê miâ ê, kóng Chú ê ji̍t hiān-chāi kàu lah, lín ê sim-chì bo̍h-tit khoài-khoài iô-tāng, iā bo̍h-tit kiaⁿ-hiâⁿ;

3無論用甚麼法，一概莫得hō͘人引誘；因為hit日猶未到，的確事先有背教ê事，kap hit-ê罪惡ê人，就是沉淪ê人，出現；bô lūn ēng sím-mi̍h hoat, it-khài bo̍h-tit hō͘ lâng ín-iú; in-ūi hit ji̍t iáu-bē kàu, tek-khak tāi-seng ū pōe-kàu ê sū, kap hit ê chōe-ok ê lâng, chiū-sī tîm-lûn ê lâng, chhut-hiān;

4伊是做對敵，也自高pôaⁿ過一切稱做上帝kap受敬拜ê；甚至坐tī上帝ê殿，表明做上帝。i sī chòe tùi-te̍k, iā chū-ko pôaⁿ-kè it-chhè chheng chòe Siōng-tè kap siū kèng-pài ê; sīm-chì chē tī Siōng-tè ê tiān, piáu-bêng chòe Siōng-tè.

5我iáu kap lín tī-teh ê時，bat將chiah-ê事kā lín講，lín kiám bōe記得mah？Góa iáu kap lín tī-teh ê sî, bat chiong chiah ê sū kā lín kóng, lín kiám bōe kì-tit mah?

6Taⁿ hit-ê阻擋伊，hō͘伊到伊ê期chiah出現ê，lín也知。Taⁿ hit ê chó͘-tòng i, hō͘ i kàu i ê kî chiah chhut-hiān ê, lín iā chai.

7因為不法ê祕密已經teh運動，獨獨現今有一個阻擋伊ê，直到hit-ê阻擋ê tùi中央除去。In-ūi put-hoat ê pì-bi̍t í-keng teh ūn-tōng, to̍k-to̍k hiān-kim ū chi̍t ê chó͘-tòng i ê, ti̍t-kàu hit ê chó͘-tòng ê tùi tiong-ng tû-khì.

8Hit時hit-ê不法ê beh出現，主耶穌beh用伊ê 口氣來滅伊，用伊臨到ê顯現來廢無伊。Hit sî hit ê put-hoat ê beh chhut-hiān, Chú Iâ-so͘ beh ēng I ê kháu-khì lâi bia̍t i, ēng I lîm-kàu ê hián-hiān lâi hòe-bô i.

9Hit-ê不法ê臨到，是照撒旦ê運行，用一切ê權能、神蹟，kap假 ê兆頭，Hit ê put-hoat ê lîm-kàu sī chiàu Sat-tàn ê ūn-hêng, ēng it-chhè ê koân-lêng, sîn-jiah, kap ké ê tiāu-thâu,

10koh用一切不義ê詭譎行tī hiah-ê teh沉淪ê，因為in無接納真理ê疼來得救。koh ēng it-chhè put-gī ê khúi-khiat kiâⁿ tī hiah ê teh tîm-lûn ê, in-ūi in bô chiap-la̍p chin-lí ê thiàⁿ lâi tit kiù.

11為tio̍h án-ni，上帝將差謬ê運行降hō͘ in，hō͘ in信白賊；Ūi-tio̍h án-ni Siōng-tè chiong chha-biū ê ūn-hêng kàng hō͘ in, hō͘ in sìn pe̍h-chha̍t;

12hō͘見若m̄信真理，去歡喜不義ê，lóng受擬斷。hō͘ kìⁿ-nā m̄ sìn chin-lí, khì hoaⁿ-hí put-gī ê, lóng siū gí-toàn.

13但是主所疼ê兄弟ah，阮應該替lín常常感謝上帝，因為上帝tùi起頭揀lín，beh hō͘ lín得救，是在tī神ê成聖kap信真理。Nā-sī Chú só͘ thiàⁿ ê hiaⁿ-tī ah, goán eng-kai thòe lín siông-siông kám-siā Siōng-tè, in-ūi Siōng-tè tùi khí-thâu kéng lín, beh hō͘ lín tit kiù, sī chāi-tī Sîn(*sim-sîn) ê chiâⁿ-sèng kap sìn chin-lí.

14為tio̍h chit-ê，伊對阮所傳ê福音bat召lín，來得tio̍h咱ê主耶穌基督ê榮光。Ūi-tio̍h chit-ê, I tùi goán só͘ thoân ê hok-im bat tiàu lín, lâi tit-tio̍h lán ê Chú Iâ-so͘ Ki-tok ê êng-kng.

15所以，兄弟ah，tio̍h khiā在；lín所得tio̍h ê傳授，無論是tùi嘴講ê，á是tùi阮ê phoe，凡所學習ê，tio̍h執守伊。Só͘-í, hiaⁿ-tī ah, tio̍h khiā-chāi; lín só͘ tit-tio̍h ê thoân-siū, bô lūn sī tùi chhùi kóng ê, á-sī tùi goán ê phoe, hoān só͘ ha̍k-si̍p ê, tio̍h chip-siú i.

16咱ê主耶穌基督，kap咱ê父上帝，就是疼咱，也tī恩典將永遠ê安慰kap好ê ǹg望賞賜咱ê，Lán ê Chú Iâ-so͘ Ki-tok, kap lán ê Pē Siōng-tè, chiū-sī thiàⁿ lán, iā tī un-tián chiong éng-oán ê an-ùi kap hó ê ǹg-bāng siúⁿ-sù lán ê,

17願伊安慰lín ê心，堅固lín tī一切好ê所行，好ê所講。goān I an-ùi lín ê sim, kian-kò͘ lín tī it-chhè hó ê só͘ kiâⁿ, hó ê só͘ kóng.

1兄弟ah，結尾來講，lín tio̍h替阮祈禱，hō͘主ê道理流行得tio̍h榮光，親像tī lín中間一樣；Hiaⁿ-tī ah, kiat-bé lâi kóng, lín tio̍h thòe goán kî-tó, hō͘ Chú ê tō-lí liû-hêng tit-tio̍h êng-kng, chhin-chhiūⁿ tī lín tiong-kan chi̍t iūⁿ;

2koh hō͘阮得tio̍h脫離tī無理e5phaiN2人；因為人無lóng有信。koh hō͘ goán tit-tio̍h thoat-lī tī bô lí ê pháiⁿ lâng; in-ūi lâng bô lóng ū sìn.

3主就是信實，伊beh堅固lín，koh保護lín免hō͘ hit-ê pháiⁿ ê陷害。Chú chiū-sī sìn-si̍t, I beh kian-kò͘ lín, koh pó-hō͘ lín bián hō͘ hit ê pháiⁿ ê hām-hāi.

4論到lín，阮tī主深信，阮所命令ê，lín現今有teh行，後來也beh行伊。Lūn-kàu lín, goán tī Chú chhim sìn, goán só͘ bēng-lēng ê, lín hiān-kim ū teh kiâⁿ, āu-lâi iā beh kiâⁿ i.

5願主chhōa lín ê心入tī上帝ê疼kap基督ê吞忍。Goān Chú chhōa lín ê sim ji̍p tī Siōng-tè ê thiàⁿ kap Ki-tok ê thun-lún.

6兄弟ah，阮tī咱ê主耶穌基督ê名命令lín，見若兄弟無法度，無照阮所傳授ê來行，lín tio̍h離開伊。Hiaⁿ-tī ah, goán tī lán ê Chú Iâ-so͘ Ki-tok ê miâ bēng-lēng lín, kìⁿ-nā hiaⁿ-tī bô hoat-tō͘, bô chiàu goán só͘ thoân-siū ê lâi kiâⁿ, lín tio̍h lī-khui i.

7因為lín家己知tio̍h怎樣學阮；因為阮tī lín中間未bat無法度；In-ūi lín ka-kī chai tio̍h cháiⁿ-iūⁿ o̍h goán; in-ūi goán tī lín tiong-kan bē bat bô hoat-tō͘;

8也m̄-bat白白食人；反tńg是tio̍h磨艱苦，暝日做工，免得拖累lín中間一人。iā m̄ bat pe̍h-pe̍h chia̍h lâng; hoán-tńg sī tio̍h-bôa kan-khó͘, mî-ji̍t chòe kang, bián-tit thoa-lūi lín tiong-kan chi̍t lâng.

9m̄是因為阮無權，獨獨是ài用本身做lín ê模樣，hō͘ lín學阮。M̄ sī in-ūi goán bô koân, to̍k-to̍k sī ài ēng pún-sin chòe lín ê bô͘-iūⁿ, hō͘ lín o̍h goán.

10因為阮iáu kap lín tī-teh ê時，bat án-ni命令lín講，若有人無beh做工，伊也tio̍h m̄-thang食。In-ūi goán iáu kap lín tī-teh ê sî, bat án-ni bēng-lēng lín kóng, Nā ū lâng bô beh chòe kang, i iā tio̍h m̄ thang chia̍h.

11是阮聽見lín中間有人所行無法度，lóng無做工，kan-ta做份外ê事。Sī goán thiaⁿ-kìⁿ lín tiong-kan ū lâng só͘ kiâⁿ bô hoat-tō͘, lóng bô chòe kang, kan-ta chòe hūn-gōa ê sū.

12親像chit號人，阮tiàm-tī主耶穌基督命令in，koh勸in，tio̍h恬靜做工，家己thàn食。Chhin-chhiūⁿ chit hō lâng goán tiàm-tī Chú Iâ-so͘ Ki-tok bēng-lēng in, koh khǹg in, tio̍h thiâm-chēng chòe kang, ka-kī thàn chia̍h.

13兄弟ah，lín行好事，m̄-thang厭倦。Hiaⁿ-tī ah, lín kiâⁿ hó sū, m̄ thang ià-siān.

14若有人無順服阮chit張phoe所講ê，lín tio̍h kā伊記teh，也m̄-thang kap伊交陪，hō͘伊家己見笑。Nā ū lâng bô sūn-ho̍k goán chit tiuⁿ phoe só͘ kóng ê, lín tio̍h kā i kì-teh, iā m̄ thang kap i kau-pôe, hō͘ i ka-kī kiàn-siàu.

15總是莫得看伊做仇讎，tio̍h警戒伊親像兄弟。Chóng-sī bo̍h-tit khòaⁿ i chòe kiû-siû, tio̍h kéng-kài i chhin-chhiūⁿ hiaⁿ-tī.

16願平安ê主，ta̍k時ta̍k項事，本身賞賜lín平安。願主kap lín眾人tī-teh。Goān pêng-an ê Chú, ta̍k sî ta̍k hāng sū, pún-sin siúⁿ-sù lín pêng-an. Goān Chú kap lín chèng lâng tī-teh.

17我保羅親筆請安lín；tī ta̍k張phoe用chit-ê做記號；我就是án-ni寫。Góa Pó-lô chhin-pit chhéng-an lín; tī ta̍k tiuⁿ phoe ēng chit-ê chòe kì-hō; góa chiū-sī án-ni siá.

18願咱ê主耶穌基督ê恩典kap lín眾人tī-teh。Goān lán ê Chú Iâ-so͘ Ki-tok ê un-tián kap lín chèng lâng tī-teh.

1保羅做基督耶穌ê使徒，照救咱ê上帝kap hō͘咱有ǹg望ê基督耶穌所命令ê，phoe寄hō͘提摩太，Pó-lô chòe Ki-tok Iâ-so͘ ê sù-tô͘, chiàu kiù lán ê Siōng-tè kap hō͘ lán ū ǹg-bāng ê Ki-tok Iâ-so͘ só͘ bēng-lēng ê, phoe kià hō͘ Thê-mô͘-thài,

2就是tī信做我真ê kiáⁿ ê；願你tùi父上帝kap咱ê主基督耶穌得tio̍h恩典、憐憫、平安。chiū-sī tī sìn chòe góa chin ê kiáⁿ ê; goān lí tùi Pē Siōng-tè kap lán ê Chú Ki-tok Iâ-so͘ tit-tio̍h un-tián, lîn-bín, pêng-an.

3我去馬其頓ê時，bat勸你猶原tòa以弗所，hō͘你thang吩咐kúi-nā人莫得傳別號ê教，Góa khì Má-kî-tùn ê sî bat khǹg lí iû-goân tòa Í-hut-só͘, hō͘ lí thang hoan-hù kúi-nā lâng bo̍h-tit thoân pa̍t hō ê kàu,

4也莫得ài聽無影跡ê話，kap無窮盡ê族譜；凡若chit號是生出辯論，m̄是hō͘上帝tī信所安排ê得tio̍h成。iā bo̍h-tit ài thiaⁿ bô iáⁿ-chiah ê ōe, kap bû-kiông-chīn ê cho̍k-phó͘; hoān-nā chit hō sī siⁿ-chhut piān-lūn, m̄ sī hō͘ Siōng-tè tī sìn só͘ an-pâi ê tit-tio̍h chiâⁿ.

5但是誡命ê宗旨是仁愛，chit-ê仁愛是tùi清氣ê心，kap無thang責備ê良心，kap無假ê信生出，Nā-sī kài-bēng ê chong-chí sī jîn-ài, chit ê jîn-ài sī tùi chheng-khì ê sim, kap bô thang chek-pī ê liông-sim, kap bô ké ê sìn siⁿ-chhut,

6有人失落chiah-ê，反tńg ǹg浮漂ê談論；ū lâng sit-lo̍h chiah-ê, hoán-tńg ǹg phû-phiò ê tâm-lūn;

7in ài做教法師，也bōe曉得家己所講ê，以及所執ê言論，是為tio̍h甚麼。in ài chòe kàu-hoat-su, iā bōe hiáu-tit ka-kī só͘ kóng ê, í-ki̍p só͘ chip ê giân-lūn, sī ūi-tio̍h sím-mi̍h.

8咱知律法是好，獨獨人tio̍h合法來用伊，Lán chai lu̍t-hoat sī hó, to̍k-to̍k lâng tio̍h ha̍p-hoat lâi ēng i,

9也tio̍h知律法ê設立m̄是為tio̍h義ê人，就是為tio̍h不法kap無順服ê，無敬虔kap犯罪ê，無聖潔kap粗俗ê，phah死父phah死母ê，thâi死人ê，iā tio̍h chai lu̍t-hoat ê siat-li̍p m̄ sī ūi-tio̍h gī ê lâng, chiū-sī ūi-tio̍h put-hoat kap bô sūn-ho̍k ê, bô kèng-khiân kap hoān-chōe ê, bô sèng-kiat kap chho͘-sio̍k ê, phah-sí pē phah-sí bú ê, thâi-sí lâng ê,

10行淫ê，好男色ê，做販俏ê，講白賊ê，lām-sám chiù-chōa ê，á是有甚麼別項逆正教ê事，kiâⁿ-îm ê, hò͘ⁿ lâm-sek ê, chòe hoàn-sau ê, kóng pe̍h-chha̍t ê, lām-sám chiù-chōa ê, á-sī ū sím-mi̍h pa̍t hāng ge̍k chèng-kàu ê sū,

11這是照大福氣ê上帝交託我榮光ê福音所講ê。che sī chiàu tōa hok-khì ê Siōng-tè kau-thok góa êng-kng ê hok-im só͘ kóng ê.

12我感謝hō͘我有氣力ê，就是咱ê主基督耶穌，因為伊掠我做盡忠，設立我做差用；Góa kám-siā hō͘ góa ū khùi-la̍t ê, chiū-sī lán ê Chú Ki-tok Iâ-so͘, in-ūi I lia̍h góa chòe chīn-tiong, siat-li̍p góa chòe chhe-ēng;

13我前是謗瀆ê，khún-tio̍k ê，侮慢ê，總是我chit號所做是出tī m̄知m̄信，chiah得tio̍h憐憫。góa chêng sī pòng-to̍k ê, khún-tio̍k ê, bú-bān ê, chóng-sī góa chit hō só͘ chòe sī chhut tī m̄ chai m̄ sìn, chiah tit-tio̍h lîn-bín.

14Koh咱ê主ê恩典是格外豐盛，hō͘我tī基督耶穌有信有疼ê心。Koh lán ê Chú ê un-tián sī kek-gōa hong-sēng, hō͘ góa tī Ki-tok Iâ-so͘ ū sìn ū thiàⁿ ê sim.

15有一句話thang信thang齊全接納ê，就是基督耶穌臨到世間，beh救有罪ê人，其中我是第一pháiⁿ。Ū chi̍t kù ōe thang sìn thang chiâu-chn̂g chiap-la̍p ê, chiū-sī Ki-tok Iâ-so͘ lîm-kàu sè-kan, beh kiù ū chōe ê lâng, kî-tiong góa sī tē it pháiⁿ.

16但是我得tio̍h憐憫，是因為耶穌基督beh tī我，第一pháiⁿ ê人，顯明伊一切ê吞忍，來做後來信靠伊得tio̍h永活ê人ê模樣。Nā-sī góa tit-tio̍h lîn-bín, sī in-ūi Iâ-so͘ Ki-tok beh tī góa, tē-it pháiⁿ ê lâng, hián-bêng I it-chhè ê thun-lún, lâi chòe āu-lâi sìn-khò I tit-tio̍h éng-oa̍h ê lâng ê bô͘-iūⁿ.

17願尊貴榮光歸tī bōe毀壞，看bōe tio̍h，萬世代ê王，獨一ê上帝，到代代無盡。À-bēng。Goān chun-kùi êng-kng kui tī bōe húi-hoāi, khòaⁿ bōe tio̍h, bān sè-tāi ê ông, to̍k-it ê Siōng-tè, kàu tāi-tāi bô chīn. À-bēng.

18我ê kiáⁿ提摩太ah，我照前所論到你ê讖語，將chit-ê誡命交託你，hō͘你用chiah-ê讖語來爭戰hit-ê好ê爭戰；Góa ê kiáⁿ Thê-mô͘-thài ah, góa chiàu chêng só͘ lūn-kàu lí ê chhàm-gú, chiong chit ê kài-bēng kau-thok lí, hō͘ lí ēng chiah ê chhàm-gú lâi cheng-chiàn hit ê hó ê cheng-chiàn;

19tio̍h存信kap無thang責備ê良心，有人放sak chit-ê，論到信in就失落伊，親像kòng破船。tio̍h chûn sìn kap bô thang chek-pī ê liông-sim, ū lâng pàng-sak chit-ê, lūn-kàu sìn in chiū sit-lo̍h i, chhin-chhiūⁿ kòng-phòa chûn.

20其中有Hú-bí-nái kap亞力山大，我已經將in交hō͘撒旦，hō͘ in受警戒m̄-thang譭謗。Kî-tiong ū Hú-bí-nái kap A-le̍k-san-tāi, góa í-keng chiong in kau hō͘ Sat-tàn, hō͘ in siū kéng-kài m̄ thang húi-pòng.