1見若tī人ê轄下做奴僕ê，tio̍h看家己ê主人堪得受齊全ê尊敬，免得上帝ê名kap道理tú-tio̍h譭謗。Kìⁿ-nā tī lâng ê hat-ē chòe lô͘-po̍k ê, tio̍h khòaⁿ ka-kī ê chú-lâng kham-tit siū chiâu-chn̂g ê chun-kèng, bián-tit Siōng-tè ê miâ kap tō-lí tú-tio̍h húi-pòng.

2設使伊ê主人是信道理ê，就m̄-thang因為伊是兄弟來看輕伊；反tńg koh-khah tio̍h服事伊，因為受利益ê就是信kap得tio̍h疼ê。你tio̍h用chiah-ê教示來苦勸in。Siat-sú i ê chú-lâng sī sìn tō-lí ê, chiū m̄ thang in-ūi i sī hiaⁿ-tī lâi khòaⁿ-khin i; hoán-tńg koh khah tio̍h ho̍k-sāi i, in-ūi siū lī-ek ê chiū-sī sìn kap tit-tio̍h thiàⁿ ê. Lí tio̍h ēng chiah-ê kà-sī lâi khó͘-khǹg in.

3若有人傳別樣ê教，無順服咱ê主耶穌基督端正ê話，kap照敬虔ê教訓ê；Nā ū lâng thoân pa̍t iūⁿ ê kàu, bô sūn-ho̍k lán ê Chú Iâ-so͘ Ki-tok toan-chèng ê ōe, kap chiàu kèng-khiân ê kàu-hùn ê;

4伊是家己phòng-hong，m̄知半項，有好辯論kap相chìⁿ話ê弊病；i sī ka-kī phòng-hong, m̄ chai pòaⁿ-hāng, ū hò͘ⁿ piān-lūn kap saⁿ-chìⁿ ōe ê pē-pēng;

5tùi án-ni就生起怨妒、相爭、譭謗、pháiⁿ念頭，以及心志敗壞喪失真理ê人ê冤家；in掠敬虔做lī-lō͘。tùi án-ni chiū siⁿ-khí oàn-tò͘, saⁿ-chiⁿ, húi-pòng, pháiⁿ liām-thâu, í-ki̍p sim-chì pāi-hoāi sòng-sit chin-lí ê lâng ê oan-ke; in lia̍h kèng-khiân chòe lī-lō͘.

6但是敬虔kiam知足就是大利路。Nā-sī kèng-khiân kiam ti-chiok chiū-sī tōa lī-lō͘.

7因為咱出世無帶甚麼來，過世也bōe-ōe帶甚麼去。In-ūi lán chhut-sì bô tòa sím-mi̍h lâi, kè-sì iā bōe-ōe tòa sím-mi̍h khì.

8但是有thang食穿，咱就beh知足。Nā-sī ū thang chia̍h chhēng, lán chiū beh ti-chiok.

9獨獨hiah-ê想beh發財ê，就陷落迷惑kap羅網，以及chōe-chōe戇戇有損害ê私慾，就是hō͘人沉落tī敗壞kap滅無ê。To̍k-to̍k hiah ê siūⁿ beh hoat-châi ê, chiū hām-lo̍h bê-he̍k kap lô-bāng, í-ki̍p chōe-chōe gōng-gōng ū sún-hāi ê su-io̍k, chiū-sī hō͘ lâng tîm-lo̍h tī pāi-hoāi kap bia̍t-bô ê.

10因為貪財是萬惡ê根源；有人戀慕伊，就受迷惑來離開道理，用chōe-chōe艱苦家己刺鑿。In-ūi tham-châi sī bān ok ê kun-goân; ū lâng loân-bō͘ i, chiū siū bê-he̍k lâi lī-khui tō-lí, ēng chōe-chōe kan-khó͘ ka-kī chhì-chha̍k.

11獨獨你，屬上帝ê人ah，tio̍h閃避chiah-ê；來追jip義、敬虔、信、仁愛、吞忍、溫柔。To̍k-to̍k lí, sio̍k Siōng-tè ê lâng ah, tio̍h siám-pī chiah-ê; lâi tui-jip gī, kèng-khiân, sìn, jîn-ài, thun-lún, un-jiû.

12Tio̍h爭戰信ê好爭戰；將永活擒tiâu-tiâu，你ê受召就是為tio̍h chit-ê；你也bat承認好ê志願tī chōe-chōe干證ê人ê面前。Tio̍h cheng-chiàn sìn ê hó cheng-chiàn; chiong éng-oa̍h khîⁿ tiâu-tiâu, lí ê siū tiàu chiū-sī ūi-tio̍h chit-ê; lí iā bat sêng-jīn hó ê chì-goān tī chōe-chōe kan-chèng ê lâng ê bīn-chêng.

13我tī賞賜活命hō͘萬項有ê上帝ê面前，以及對本丟彼拉多做好ê干證ê基督耶穌ê面前，吩咐你，Góa tī siúⁿ-sù oa̍h-miā hō͘ bān-hāng-ū ê Siōng-tè ê bīn-chêng, í-ki̍p tùi Pún-tiu Pí-lia̍p-to chòe hó ê kan-chèng ê Ki-tok Iâ-so͘ ê bīn-chêng, hoan-hù lí,

14tio̍h守chit-ê命令，無瑕疵，無thang嫌，到咱ê主耶穌基督ê顯現。tio̍h siú chit ê bēng-lēng, bô hâ-chhû, bô thang hiâm, kàu lán ê Chú Iâ-so͘ Ki-tok ê hián-hiān.

15到期大福氣，獨一有權能，萬王ê王，萬主ê主，beh顯明伊，Kàu kî tōa hok-khì, to̍k-it ū koân-lêng, bān ông ê Ông, bān chú ê Chú, beh hián-bêng i,

16就是獨一bōe死，tiàm-tī bōe-thang近óa ê光，人所未bat看見，也bōe-ōe看見ê；願尊貴kap永遠ê權勢歸tī伊。À-bēng。chiū-sī to̍k-it bōe sí, tiàm-tī bōe thang kūn-óa ê kng, lâng só͘ bē bat khòaⁿ-kìⁿ, iā bōe-ōe khòaⁿ-kìⁿ ê; goān chun-kùi kap éng-oán ê koân-sè kui tī I. À-bēng.

17今世好額ê人，你tio̍h吩咐in，心志莫得自高，莫得hē in ê ǹg望tī無定tio̍h ê錢財，tio̍h hē tī將萬物滿滿hō͘咱享受ê上帝；Kim-sè hó-gia̍h ê lâng lí tio̍h hoan-hù in, sim-chì bo̍h-tit chū-ko, bo̍h-tit hē in ê ǹg-bāng tī bô tiāⁿ-tio̍h ê chîⁿ-châi, tio̍h hē tī chiong bān mi̍h móa-móa hō͘ lán hióng-siū ê Siōng-tè;

18koh吩咐in行好事，好額tī好所行，歡喜賑濟，甘願分hō͘人，koh hoan-hù in kiâⁿ hó sū, hó-gia̍h tī hó só͘ kiâⁿ, hoaⁿ-hí chín-chè, kam-goān pun hō͘ lâng,

19為tio̍h家己積聚好ê地基，備辦後來ê事，hō͘ in擒tiâu真ê活命。ūi-tio̍h ka-kī chek-chū hó ê tōe-ki, pī-pān āu-lâi ê sū, hō͘ in khîⁿ-tiâu chin ê oa̍h-miā.

20提摩太ah，所交託你ê，你tio̍h保守伊，離開有名無實ê智慧chiah-ê粗俗ê虛詞，kap相比較ê辯論，Thê-mô͘-thài ah, só͘ kau-thok lí ê, lí tio̍h pó-siú i, lī-khui ū miâ bô si̍t ê tì-hūi chiah ê chho͘-sio̍k ê hu-sû, kap saⁿ pí-kàu ê piān-lūn,

21有人自稱有chit號智慧，就已經差謬道理lah。 願恩典kap lín tī-teh。ū lâng chū-chheng ū chit hō tì-hūi, chiū í-keng chha-biū tō-lí lah. Goān un-tián kap lín tī-teh.

1Tùi上帝ê旨意，照tī基督耶穌活命ê應允，做基督耶穌ê使徒保羅，Tùi Siōng-tè ê chí-ì, chiàu tī Ki-tok Iâ-so͘ oa̍h-miā ê èng-ún, chòe Ki-tok Iâ-so͘ ê sù-tô͘ Pó-lô,

2phoe寄hō͘我所疼ê kiáⁿ提摩太；願你tùi父上帝kap咱ê主基督耶穌得tio̍h恩典、憐憫、平安。phoe kià hō͘ góa só͘ thiàⁿ ê kiáⁿ Thê-mô͘-thài; goān lí tùi Pē Siōng-tè kap lán ê Chú Ki-tok Iâ-so͘ tit-tio̍h un-tián, lîn-bín, pêng-an.

3我感謝上帝，就是我續接列祖，用清氣ê良心所服事ê，tī祈禱ê時我siàu念你無soah，Góa kám-siā Siōng-tè, chiū-sī góa sòa-chiap lia̍t-chó͘, ēng chheng-khì ê liông-sim só͘ ho̍k-sāi ê, tī kî-tó ê sî góa siàu-liām lí bô soah,

4記得你ê流目屎，暝日欣慕見tio̍h你，hō͘我滿心歡喜；kì-tit lí ê lâu ba̍k-sái, mî-ji̍t him-bō͘ kìⁿ-tio̍h lí, hō͘ góa móa-sim hoaⁿ-hí;

5念tio̍h你心內無假ê信，chit-ê信是事先tiàm-tī你ê外媽Lô-í，kap你ê老母Iú-nî-ki，我深信chit-ê信也是tiàm-tī你。liām-tio̍h lí sim-lāi bô ké ê sìn, chit ê sìn sī tāi-seng tiàm-tī lí ê gōa-má Lô-í, kap lí ê lāu-bú Iú-nî-ki, góa chhim sìn chit ê sìn iā sī tiàm-tī lí.

6為tio̍h chit-ê緣故我點醒你，ài你將上帝tùi我ê按手所hō͘你ê恩賜koh奮志，親像hō͘火koh燄一樣。Ūi-tio̍h chit ê iân-kò͘ góa tiám-chhíⁿ lí, ài lí chiong Siōng-tè tùi góa ê hōaⁿ chhiú só͘ hō͘ lí ê un-sù koh hùn-chì, chhin-chhiūⁿ hō͘ hé koh iām chi̍t iūⁿ.

7因為上帝所賞賜咱ê，m̄是驚惶ê心神，就是權能、仁愛、守己ê心神。In-ūi Siōng-tè só͘ siúⁿ-sù lán ê, m̄ sī kiaⁿ-hiâⁿ ê sim-sîn, chiū-sī koân-lêng, jîn-ài, siú-kí ê sim-sîn.

8所以kā咱ê主做干證，莫得掠做見笑，也莫得掠我做主ê囚犯來見笑；tio̍h照上帝ê權能為tio̍h福音saⁿ-kap受苦；Só͘-í kā lán ê Chú chòe kan-chèng, bo̍h-tit lia̍h-chòe kiàn-siàu, iā bo̍h-tit lia̍h góa chòe Chú ê siû-hoān lâi kiàn-siàu; tio̍h chiàu Siōng-tè ê koân-lêng ūi-tio̍h hok-im saⁿ-kap siū-khó͘;

9伊救咱，用聖ê召召咱，m̄是照咱ê行做，是照伊家己ê旨意kap恩典，chit-ê恩典就是永世代ê事先tī基督耶穌賞賜咱ê，I kiù lán, ēng sèng ê tiàu tiàu lán, m̄ sī chiàu lán ê kiâⁿ-chòe, sī chiàu I ka-kī ê chí-ì kap un-tián, chit ê un-tián chiū-sī éng sè-tāi ê tāi-seng tī Ki-tok Iâ-so͘ siúⁿ-sù lán ê,

10但是現今對咱ê救主基督耶穌ê顯現來表明ê。伊已經廢無死，koh tùi福音hō͘活命kap bōe敗壞ê lóng顯明；nā-sī hiān-kim tùi lán ê Kiù-chú Ki-tok Iâ-so͘ ê hián-hiān lâi piáu-bêng ê. I í-keng hòe-bô sí, koh tùi hok-im hō͘ oa̍h-miā kap bōe pāi-hoāi ê lóng hián-bêng;

11我為tio̍h chit-ê受設立做宣傳ê，做使徒，做教師。góa ūi-tio̍h chit-ê siū siat-li̍p chòe soan-thoân ê, chòe sù-tô͘, chòe kàu-su.

12為tio̍h chit-ê緣故我也受chiah-ê艱苦；但是我無掠做見笑；因為我bat我所信ê，也深信伊會保守我所交託伊ê，到tī hit日。Ūi-tio̍h chit ê iân-kò͘ góa iā siū chiah ê kan-khó͘; nā-sī góa bô lia̍h-chòe kiàn-siàu; in-ūi góa bat góa só͘ sìn ê, iā chhim sìn I ōe pó-siú góa só͘ kau-thok I ê, kàu tī hit ji̍t.

13你tùi我所聽見hiah-ê端正ê話ê模樣，tio̍h用tī基督耶穌ê信kap仁愛來執守伊。Lí tùi góa só͘ thiaⁿ-kìⁿ hiah ê toan-chèng ê ōe ê bô͘-iūⁿ, tio̍h ēng tī Ki-tok Iâ-so͘ ê sìn kap jîn-ài lâi chip-siú i.

14所交託你ê好事，你tio̍h óa靠tiàm-tī咱ê聖神來顧守伊。Só͘ kau-thok lí ê hó-sū, lí tio̍h óa-khò tiàm-tī lán ê Sèng Sîn lâi kò͘-siú i.

15凡若tī亞西亞ê人已經背我，這是你所知；其中有Hui-kiat-lō͘、Hek-mô͘-kî-nî。Hoān-nā tī A-se-a ê lâng í-keng pōe góa, che sī lí só͘ chai; kî-tiong ū Hui-kiat-lō͘ Hek-mô͘-kî-nî.

16願主憐憫O-nî-sek-hut ê家，因為伊ta̍uh-ta̍uh補我ê精神，也無掠我掛鐵鍊做見笑。Goān Chú lîn-bín O-nî-sek-hut ê ke, in-ūi i ta̍uh-ta̍uh pó͘ góa ê cheng-sîn, iā bô lia̍h góa kòa thih-liān chòe kiàn-siàu.

17伊tī羅馬ê時，慇勤chhē我到見tio̍h，I tī Lô-má ê sî un-khûn chhē góa kàu kìⁿ-tio̍h,

18(願主hō͘伊tī hit日tùi主來得tio̍h憐憫) ；也伊tī以弗所用jōa-chōe項服事我，你也明明知。(goān Chú hō͘ i tī hit ji̍t tùi Chú lâi tit-tio̍h lîn-bín); iā i tī Í-hut-só͘ ēng jōa chōe hāng ho̍k-sāi góa, lí iā bêng-bêng chai.

1所以，我ê kiáⁿ ah，你tiàm-tī基督耶穌ê恩，tio̍h勇健。Só͘-í, góa ê kiáⁿ ah, lí tiàm-tī Ki-tok Iâ-so͘ ê un, tio̍h ióng-kiāⁿ.

2你tī chōe-chōe干證ê人ê面前所tùi我聽見chiah-ê事，tio̍h交託忠信ê人，將來堪得教示別人ê。Lí tī chōe-chōe kan-chèng ê lâng ê bīn-chêng só͘ tùi góa thiaⁿ-kìⁿ chiah ê sū, tio̍h kau-thok tiong-sìn ê lâng, chiong-lâi kham-tit kà-sī pa̍t lâng ê.

3你tio̍h親像基督耶穌精練ê兵kap我受苦。Lí tio̍h chhin-chhiūⁿ Ki-tok Iâ-so͘ cheng-liān ê peng kap góa siū-khó͘.

4見若出軍ê兵，無hō͘世事纏絆，thang hō͘招募伊ê歡喜。Kìⁿ-nā chhut-kun ê peng bô hō͘ sè-sū tîⁿ-pòaⁿ, thang hō͘ chio-bō͘ i ê hoaⁿ-hí.

5鬥力ê若無照法度來鬥力，就bōe得tio̍h冕旒。Tàu-la̍t ê nā bô chiàu hoat-tō͘ lâi tàu-la̍t, chiū bōe tit-tio̍h bián-liû.

6出力tio̍h磨ê作穡人khah事先得tio̍h土產是合宜。Chhut-la̍t tio̍h-bôa ê choh-sit lâng khah tāi-seng tit-tio̍h thó͘-sán sī ha̍p-gî.

7我所講ê你tio̍h想伊；因為主beh hō͘你tī ta̍k項tāi-chì聰明。Góa só͘ kóng ê lí tio̍h siūⁿ i; in-ūi Chú beh hō͘ lí tī ta̍k hāng tāi-chì chhang-miâ.

8你tio̍h記得tùi大衛ê後裔所出ê耶穌基督，伊tùi死人中koh活，tú-tú照我ê福音；Lí tio̍h kì-tit tùi Tāi-pi̍t ê hō͘-è só͘ chhut ê Iâ-so͘ Ki-tok, I tùi sí-lâng tiong koh-oa̍h, tú-tú chiàu góa ê hok-im;

9我為tio̍h chit-ê受苦，甚至受縛，親像行pháiⁿ ê人一樣；總是上帝ê道理無受縛。góa ūi-tio̍h chit-ê siū khó͘, sīm-chì siū pa̍k, chhin-chhiūⁿ kiâⁿ pháiⁿ ê lâng chi̍t iūⁿ; chóng-sī Siōng-tè ê tō-lí bô siū pa̍k.

10所以我因為受揀ê人來吞忍一切ê事，hō͘ in也有份tī基督耶穌ê拯救，kap永世代ê榮光。Só͘-í góa in-ūi siū kéng ê lâng lâi thun-lún it-chhè ê sū, hō͘ in iā ū hūn tī Ki-tok Iâ-so͘ ê chín-kiù, kap éng sè-tāi ê êng-kng.

11有一句thang信ê話，就是講，咱若kap伊同死，也beh kap伊同活；Ū chi̍t kù thang sìn ê ōe, chiū-sī kóng, Lán nā kap I tâng sí, iā beh kap I tâng oa̍h;

12咱若吞忍，也beh kap伊saⁿ-kap做王；咱若m̄認伊，伊也beh m̄認咱；lán nā thun-lún, iā beh kap I saⁿ-kap chòe ông; lán nā m̄ jīn I, I iā beh m̄ jīn lán;

13咱若失信，伊猶原是信實，因為伊bōe會背家己。lán nā sit sìn, I iû-goân sī sìn-si̍t, in-ūi I bōe-ōe pōe ka-kī.

14你tio̍h將chiah-ê tāi-chì hō͘人記得，也tī主ê面前吩咐in m̄-thang因為言語來相chìⁿ；這是無利益，koh會敗壞聽ê人。Lí tio̍h chiong chiah ê tāi-chì hō͘ lâng kì-tit, iā tī Chú ê bīn-chêng hoan-hù in m̄ thang in-ūi giân-gú lâi saⁿ-chìⁿ; che sī bô lī-ek, koh ōe pāi-hoāi thiaⁿ ê lâng.

15你tio̍h致意hō͘上帝看你做可取ê，做免見笑ê做工人，照正意來開拆真理ê道。Lí tio̍h tì-ì hō͘ Siōng-tè khòaⁿ lí chòe khó-chhú ê, chòe bián kiàn-siàu ê chòe-kang lâng, chiàu chiàⁿ-ì lâi khui-thiah chin-lí ê tō.

16Tio̍h閃避粗俗ê虛詞，因為in beh ná致到不虔，Tio̍h siám-pī chho͘-sio̍k ê hu-sû, in-ūi in beh ná tì-kàu put-khiân,

17in ê話beh生湠親像瘡毒；其中有Hú-bí-nái kap Hui-lí-tô͘，in ê ōe beh siⁿ-thòaⁿ chhin-chhiūⁿ chhng-to̍k; kî-tiong ū Hú-bí-nái kap Hui-lí-tô͘,

18論到真理in已經差謬，講koh活ê事已經過身，就敗壞kúi-nā人ê信。lūn-kàu chin-lí in í-keng chha-biū, kóng koh-oa̍h ê sū í-keng kè-sin, chiū pāi-hoāi kúi-nā lâng ê sìn.

19總是上帝堅固ê地基khiā在，有蓋印講，主bat伊家己ê人；koh講，凡若稱呼主ê名ê tio̍h離開不義。Chóng-sī Siōng-tè kian-kò͘ ê tōe-ki khiā-chāi, ū khàm-ìn kóng, Chú bat I ka-kī ê lâng; koh kóng, Hoān-nā chheng-ho͘ Chú ê miâ ê tio̍h lī-khui put-gī.

20Taⁿ tī大厝內，伊ê器具m̄-nā有金ê銀-ê，也有柴ê土ê，有ê做貴氣ê路用，有ê做下賤ê路用。Taⁿ tī tōa chhù-lāi, i ê khì-kū m̄ nā ū kim-ê gûn-ê, iā ū chhâ-ê thô͘-ê, ū-ê chòe kùi-khì ê lō͘-ēng, ū-ê chòe hā-chiān ê lō͘-ēng.

21所以人若清氣家己脫離chiah-ê，就beh做貴氣ê器具，成聖，合tī主人ê路用，便便thang做ta̍k項好ê事。Só͘-í lâng nā chheng-khì ka-kī thoat-lī chiah-ê, chiū beh chòe kùi-khì ê khì-kū, chiâⁿ-sèng, ha̍p tī chú-lâng ê lō͘-ēng, piān-piān thang chòe ta̍k hāng hó ê sū.

22Tio̍h閃避少年人ê私慾，來kap hiah-ê出tī清氣心求叫主ê人saⁿ-kap追jip義、信、仁愛、和平。Tio̍h siám-pī siàu-liân lâng ê su-io̍k, lâi kap hiah ê chhut tī chheng-khì sim kiû-kiò Chú ê lâng saⁿ-kap tui-jip gī, sìn, jîn-ài, hô-pêng.

23但是愚戇無學問ê辯論，你tio̍h離開in；因為知tùi chiah-ê話生出冤家。Nā-sī gû-gōng bô ha̍k-būn ê piān-lūn, lí tio̍h lī-khui in; in-ūi chai tùi chiah-ê ōe siⁿ-chhut oan-ke.

24獨獨主ê奴僕m̄-thang冤家，tio̍h溫柔來款待眾人，gâu教示，忍受侮慢，To̍k-to̍k Chú ê lô͘-po̍k m̄ thang oan-ke, tio̍h un-jiû lâi khoán-thāi chèng lâng, gâu kà-sī, jím-siū bú-bān,

25用溫柔警戒hiah-ê逆理ê人，kiám-chhái上帝hō͘ in反悔，thang來bat真理；ēng un-jiû kéng-kài hiah ê ge̍k-lí ê lâng, kiám-chhái Siōng-tè hō͘ in hoán-hóe, thang lâi bat chin-lí;

26也家己醒悟，來脫離魔鬼ê活tauh，因為hō͘主ê奴僕活活掠tio̍h，來成上帝ê旨意。iā ka-kī chhíⁿ-gō͘, lâi thoat-lī Mô͘-kúi ê oa̍h-tauh, in-ūi hō͘ Chú ê lô͘-po̍k oa̍h-oa̍h lia̍h-tio̍h, lâi chiâⁿ Siōng-tè ê chí-ì.