1所以，我ê kiáⁿ ah，你tiàm-tī基督耶穌ê恩，tio̍h勇健。Só͘-í, góa ê kiáⁿ ah, lí tiàm-tī Ki-tok Iâ-so͘ ê un, tio̍h ióng-kiāⁿ.

2你tī chōe-chōe干證ê人ê面前所tùi我聽見chiah-ê事，tio̍h交託忠信ê人，將來堪得教示別人ê。Lí tī chōe-chōe kan-chèng ê lâng ê bīn-chêng só͘ tùi góa thiaⁿ-kìⁿ chiah ê sū, tio̍h kau-thok tiong-sìn ê lâng, chiong-lâi kham-tit kà-sī pa̍t lâng ê.

3你tio̍h親像基督耶穌精練ê兵kap我受苦。Lí tio̍h chhin-chhiūⁿ Ki-tok Iâ-so͘ cheng-liān ê peng kap góa siū-khó͘.

4見若出軍ê兵，無hō͘世事纏絆，thang hō͘招募伊ê歡喜。Kìⁿ-nā chhut-kun ê peng bô hō͘ sè-sū tîⁿ-pòaⁿ, thang hō͘ chio-bō͘ i ê hoaⁿ-hí.

5鬥力ê若無照法度來鬥力，就bōe得tio̍h冕旒。Tàu-la̍t ê nā bô chiàu hoat-tō͘ lâi tàu-la̍t, chiū bōe tit-tio̍h bián-liû.

6出力tio̍h磨ê作穡人khah事先得tio̍h土產是合宜。Chhut-la̍t tio̍h-bôa ê choh-sit lâng khah tāi-seng tit-tio̍h thó͘-sán sī ha̍p-gî.

7我所講ê你tio̍h想伊；因為主beh hō͘你tī ta̍k項tāi-chì聰明。Góa só͘ kóng ê lí tio̍h siūⁿ i; in-ūi Chú beh hō͘ lí tī ta̍k hāng tāi-chì chhang-miâ.

8你tio̍h記得tùi大衛ê後裔所出ê耶穌基督，伊tùi死人中koh活，tú-tú照我ê福音；Lí tio̍h kì-tit tùi Tāi-pi̍t ê hō͘-è só͘ chhut ê Iâ-so͘ Ki-tok, I tùi sí-lâng tiong koh-oa̍h, tú-tú chiàu góa ê hok-im;

9我為tio̍h chit-ê受苦，甚至受縛，親像行pháiⁿ ê人一樣；總是上帝ê道理無受縛。góa ūi-tio̍h chit-ê siū khó͘, sīm-chì siū pa̍k, chhin-chhiūⁿ kiâⁿ pháiⁿ ê lâng chi̍t iūⁿ; chóng-sī Siōng-tè ê tō-lí bô siū pa̍k.

10所以我因為受揀ê人來吞忍一切ê事，hō͘ in也有份tī基督耶穌ê拯救，kap永世代ê榮光。Só͘-í góa in-ūi siū kéng ê lâng lâi thun-lún it-chhè ê sū, hō͘ in iā ū hūn tī Ki-tok Iâ-so͘ ê chín-kiù, kap éng sè-tāi ê êng-kng.

11有一句thang信ê話，就是講，咱若kap伊同死，也beh kap伊同活；Ū chi̍t kù thang sìn ê ōe, chiū-sī kóng, Lán nā kap I tâng sí, iā beh kap I tâng oa̍h;

12咱若吞忍，也beh kap伊saⁿ-kap做王；咱若m̄認伊，伊也beh m̄認咱；lán nā thun-lún, iā beh kap I saⁿ-kap chòe ông; lán nā m̄ jīn I, I iā beh m̄ jīn lán;

13咱若失信，伊猶原是信實，因為伊bōe會背家己。lán nā sit sìn, I iû-goân sī sìn-si̍t, in-ūi I bōe-ōe pōe ka-kī.

14你tio̍h將chiah-ê tāi-chì hō͘人記得，也tī主ê面前吩咐in m̄-thang因為言語來相chìⁿ；這是無利益，koh會敗壞聽ê人。Lí tio̍h chiong chiah ê tāi-chì hō͘ lâng kì-tit, iā tī Chú ê bīn-chêng hoan-hù in m̄ thang in-ūi giân-gú lâi saⁿ-chìⁿ; che sī bô lī-ek, koh ōe pāi-hoāi thiaⁿ ê lâng.

15你tio̍h致意hō͘上帝看你做可取ê，做免見笑ê做工人，照正意來開拆真理ê道。Lí tio̍h tì-ì hō͘ Siōng-tè khòaⁿ lí chòe khó-chhú ê, chòe bián kiàn-siàu ê chòe-kang lâng, chiàu chiàⁿ-ì lâi khui-thiah chin-lí ê tō.

16Tio̍h閃避粗俗ê虛詞，因為in beh ná致到不虔，Tio̍h siám-pī chho͘-sio̍k ê hu-sû, in-ūi in beh ná tì-kàu put-khiân,

17in ê話beh生湠親像瘡毒；其中有Hú-bí-nái kap Hui-lí-tô͘，in ê ōe beh siⁿ-thòaⁿ chhin-chhiūⁿ chhng-to̍k; kî-tiong ū Hú-bí-nái kap Hui-lí-tô͘,

18論到真理in已經差謬，講koh活ê事已經過身，就敗壞kúi-nā人ê信。lūn-kàu chin-lí in í-keng chha-biū, kóng koh-oa̍h ê sū í-keng kè-sin, chiū pāi-hoāi kúi-nā lâng ê sìn.

19總是上帝堅固ê地基khiā在，有蓋印講，主bat伊家己ê人；koh講，凡若稱呼主ê名ê tio̍h離開不義。Chóng-sī Siōng-tè kian-kò͘ ê tōe-ki khiā-chāi, ū khàm-ìn kóng, Chú bat I ka-kī ê lâng; koh kóng, Hoān-nā chheng-ho͘ Chú ê miâ ê tio̍h lī-khui put-gī.

20Taⁿ tī大厝內，伊ê器具m̄-nā有金ê銀-ê，也有柴ê土ê，有ê做貴氣ê路用，有ê做下賤ê路用。Taⁿ tī tōa chhù-lāi, i ê khì-kū m̄ nā ū kim-ê gûn-ê, iā ū chhâ-ê thô͘-ê, ū-ê chòe kùi-khì ê lō͘-ēng, ū-ê chòe hā-chiān ê lō͘-ēng.

21所以人若清氣家己脫離chiah-ê，就beh做貴氣ê器具，成聖，合tī主人ê路用，便便thang做ta̍k項好ê事。Só͘-í lâng nā chheng-khì ka-kī thoat-lī chiah-ê, chiū beh chòe kùi-khì ê khì-kū, chiâⁿ-sèng, ha̍p tī chú-lâng ê lō͘-ēng, piān-piān thang chòe ta̍k hāng hó ê sū.

22Tio̍h閃避少年人ê私慾，來kap hiah-ê出tī清氣心求叫主ê人saⁿ-kap追jip義、信、仁愛、和平。Tio̍h siám-pī siàu-liân lâng ê su-io̍k, lâi kap hiah ê chhut tī chheng-khì sim kiû-kiò Chú ê lâng saⁿ-kap tui-jip gī, sìn, jîn-ài, hô-pêng.

23但是愚戇無學問ê辯論，你tio̍h離開in；因為知tùi chiah-ê話生出冤家。Nā-sī gû-gōng bô ha̍k-būn ê piān-lūn, lí tio̍h lī-khui in; in-ūi chai tùi chiah-ê ōe siⁿ-chhut oan-ke.

24獨獨主ê奴僕m̄-thang冤家，tio̍h溫柔來款待眾人，gâu教示，忍受侮慢，To̍k-to̍k Chú ê lô͘-po̍k m̄ thang oan-ke, tio̍h un-jiû lâi khoán-thāi chèng lâng, gâu kà-sī, jím-siū bú-bān,

25用溫柔警戒hiah-ê逆理ê人，kiám-chhái上帝hō͘ in反悔，thang來bat真理；ēng un-jiû kéng-kài hiah ê ge̍k-lí ê lâng, kiám-chhái Siōng-tè hō͘ in hoán-hóe, thang lâi bat chin-lí;

26也家己醒悟，來脫離魔鬼ê活tauh，因為hō͘主ê奴僕活活掠tio̍h，來成上帝ê旨意。iā ka-kī chhíⁿ-gō͘, lâi thoat-lī Mô͘-kúi ê oa̍h-tauh, in-ūi hō͘ Chú ê lô͘-po̍k oa̍h-oa̍h lia̍h-tio̍h, lâi chiâⁿ Siōng-tè ê chí-ì.

1但是你tio̍h知，tī chiah-ê路尾ê日有危險ê時beh到。Nā-sī lí tio̍h chai tī chiah ê lō͘-bé ê ji̍t ū gûi-hiám ê sî beh kàu.

2因為人beh顧家己、貪財、誇口、驕傲、謗瀆、悖逆父母、忘恩、無聖潔；In-ūi lâng beh kò͘ ka-kī, tham-châi, khoa-kháu, kiau-ngō͘, pòng-to̍k, pōe-ge̍k pē-bú, bōng-un, bô sèng-kiat;

3不情、背約、譭謗、無家己約束、殘忍、怨恨好、put-chêng, pōe-iok, húi-pòng, bô ka-kī iok-sok, chân-jím, oàn-hūn hó,

4奸詭、執癖、phòng-hong，ài快樂khah過頭tī疼上帝；kan-kúi, chip-phiah, phòng-hong, ài khoài-lo̍k khah kè-thâu tī thiàⁿ Siōng-tè;

5有敬虔ê外貌，但是已經棄sak敬虔ê權能；親像chit號人，你tio̍h離開in。ū kèng-khiân ê gōa-māu, nā-sī í-keng khì-sak kèng-khiân ê koân-lêng; chhin-chhiūⁿ chit hō lâng lí tio̍h lī-khui in.

6因為in中間有人暗靜入人ê家，迷惑戇戇ê婦女，就是hō͘重ê罪所teh，hō͘ chōe-chōe情慾所引誘ê；In-ūi in tiong-kan ū lâng àm-chīⁿ ji̍p lâng ê ke, bê-he̍k gōng-gōng ê hū-lú, chiū-sī hō͘ tāng ê chōe só͘ teh, hō͘ chōe-chōe chêng-io̍k só͘ ín-iú ê;

7chiah-ê婦女常常teh學習，也到尾bōe會明白真理。chiah ê hū-lú siông-siông teh ha̍k-si̍p, iā kàu bé bōe-ōe bêng-pe̍k chin-lí.

8早Ngá-nî、Iông-pì對敵摩西，chit號人也親像án-ni對敵真理，in ê心志已經敗壞，論到道理in是不重用ê。Chá Ngá-nî Iông-pì tùi-te̍k Mô͘-se, chit hō lâng iā chhin-chhiūⁿ án-ni tùi-te̍k chin-lí, in ê sim-chì í-keng pāi-hoāi, lūn-kàu tō-lí in sī put-tiòng-iōng ê.

9但是in bōe會koh進步，因為in ê愚戇beh露現tī眾人ê面前親像hit兩人一樣。Nā-sī in bōe-ōe koh chìn-pō͘, in-ūi in ê gû-gōng beh lō͘-hiān tī chèng lâng ê bīn-chêng chhin-chhiūⁿ hit nn̄g lâng chi̍t iūⁿ.

10獨獨你有順thàn我ê教示，品行、志向、信靠、寬容、仁愛、吞忍，kap chiah-ê khún-tio̍k，以及苦難；To̍k-to̍k lí ū sūn-thàn góa ê kà-sī, phín-hēng, chì-hiòng, sìn-khò, khoan-iông, jîn-ài, thun-lún, kap chiah ê khún-tio̍k, í-ki̍p khó͘-lān;

11也知我tī安提阿、Í-ko-liām、Lō͘-sū-tek所tú-tio̍h甚麼事，kap受甚麼khún-tio̍k；總是主lóng救我脫離。iā chai góa tī An-thê-o, Í-ko-liām, Lō͘-sū-tek só͘ tú-tio̍h sím-mi̍h sū, kap siū sím-mi̍h khún-tio̍k; chóng-sī Chú lóng kiù góa thoat-lī.

12Koh見若ài得tiàm-tī基督耶穌敬虔來過日ê beh受khún-tio̍k。Koh kìⁿ-nā ài tit tiàm-tī Ki-tok Iâ-so͘ kèng-khiân lâi kè-ji̍t ê beh siū khún-tio̍k.

13獨獨pháiⁿ人kap phah騙人ê beh ná久ná pháiⁿ，迷惑人，家己也受迷惑。To̍k-to̍k pháiⁿ lâng kap phah-phiàn lâng ê beh ná kú ná pháiⁿ, bê-he̍k lâng, ka-kī iā siū bê-he̍k.

14但是你tio̍h長長tòa tī所學習、所深信hiah-ê事，因為知是tùi甚麼人學ê；Nā-sī lí tio̍h tn̂g-tn̂g tòa tī só͘ ha̍k-si̍p só͘ chhim sìn hiah ê sū, in-ūi chai sī tùi sím-mi̍h lâng o̍h ê;

15也知你tùi細漢已經bat hiah-ê聖冊，就是會hō͘你有智慧，tùi信基督耶穌來得tio̍h救ê。iā chai lí tùi sòe-hàn í-keng bat hiah ê sèng-chheh, chiū-sī ōe hō͘ lí ū tì-hūi, tùi sìn Ki-tok Iâ-so͘ lâi tit-tio̍h kiù ê.

16見若hō͘上帝默示ê經也有利益tī教示，tī督責，hō͘人歸正，引chhōa人學義理，Kìⁿ-nā hō͘ Siōng-tè be̍k-sī ê keng iā ū lī-ek tī kà-sī, tī tok-chek, hō͘ lâng kui-chèng, ín-chhōa lâng o̍h gī-lí,

17hō͘服事上帝ê人練達，便便來行lóng總ê好事。hō͘ ho̍k-sāi Siōng-tè ê lâng liān-ta̍t, piān-piān lâi kiâⁿ lóng-chóng ê hó sū.

1我tī上帝ê面前kap beh審判活人死人ê基督耶穌ê面前，為tio̍h伊ê顯現kap伊ê koh來，Góa tī Siōng-tè ê bīn-chêng kap beh sím-phòaⁿ oa̍h-lâng sí-lâng ê Ki-tok Iâ-so͘ ê bīn-chêng, ūi-tio̍h I ê hián-hiān kap I ê koh-lâi,

2吩咐你tio̍h傳道理，無論得時不得時，tio̍h專務伊，用百般ê寬容教示來責備、警戒、勸勉。hoan-hù lí tio̍h thoân tō-lí, bô lūn tek-sî put-tek-sî, tio̍h choan-bū i, ēng pah-poaⁿ ê khoan-iông kà-sī lâi chek-pī, kéng-kài, khoàn-bián.

3因為時日beh到，人beh m̄容允端正ê教示，beh耳孔chiūⁿ，ài聽chōe-chōe先生，照家己ê私慾；In-ūi sî-ji̍t beh kàu lâng beh m̄ iông-ún toan-chiàⁿ ê kà-sī, beh hī-khang chiūⁿ, ài thiaⁿ chōe-chōe sian-siⁿ, chiàu ka-kī ê su-io̍k;

4koh oa̍t頭m̄聽真理，去ǹg無影ê話。koh oa̍t thâu m̄ thiaⁿ chin-lí, khì ǹg bô iáⁿ ê ōe.

5獨獨你凡事tio̍h節制，忍受艱苦，行傳福音ê ê工，來盡你ê職份。To̍k-to̍k lí hoān sū tio̍h chiat-chè, jím-siū kan-khó͘, kiâⁿ thoân hok-im ê ê kang, lâi chīn lí ê chit-hūn.

6因為taⁿ我ê血teh做灌奠，我過世ê期到lah。In-ūi taⁿ góa ê huih teh chòe koàn-tiān, góa kè-sì ê kî kàu lah.

7我已經爭戰好ê爭戰，已經盡跑走ê路站，已經守所信ê道理。Góa í-keng cheng-chiàn hó ê cheng-chiàn, í-keng chīn pháu-cháu ê lō͘-chām, í-keng siú só͘ sìn ê tō-lí.

8Taⁿ了後有義ê冕旒kā我備辦hē-teh，就是主做公義ê審判司tī hit日beh hō͘我；m̄-nā hō͘我，也beh hō͘見若欣慕伊顯現ê人。Taⁿ liáu-āu ū gī ê bián-liû kā góa pī-pān hē-teh, chiū-sī Chú chòe kong-gī ê sím-phòaⁿ-si tī hit ji̍t beh hō͘ góa; m̄ nā hō͘ góa, iā beh hō͘ kìⁿ-nā him-bō͘ I hián-hiān ê lâng.

9你tio̍h致意緊緊來chhē我。Lí tio̍h tì-ì kín-kín lâi chhē góa.

10因為Tí-má欣慕chit-ê世間，就離開我，去帖撒羅尼迦；Kek-le̍k-sū去加拉太，提多去That-má-thài。In-ūi Tí-má him-bō͘ chit ê sè-kan, chiū lī-khui góa, khì Thiap-sat-lô-nî-ka; Kek-le̍k-sū khì Ka-lia̍p-thài, Thê-to khì That-má-thài.

11只有路加kap我tī-teh。Tio̍h chhōa馬可kap你saⁿ-kap來，因為伊tī服事ê工有利益我。Chí-ū Lō͘-ka kap góa tī-teh. Tio̍h chhōa Má-khó kap lí saⁿ-kap lâi, in-ūi i tī ho̍k-sāi ê kang ū lī-ek góa.

12Chhui-ki-kó͘我已經差伊去以弗所。Chhui-ki-kó͘ góa í-keng chhe i khì Í-hut-só͘.

13我tī Te̍k-lô-a留tī Ka-pò͘ in tau ê外衫，你來ê時tio̍h續帶來，亦tio̍h帶hiah-ê冊，hiah-ê羊皮ê koh-khah要緊。Góa tī Te̍k-lô-a lâu tī Ka-pò͘ in tau ê gōa-saⁿ, lí lâi ê sî tio̍h sòa tòa lâi, ia̍h tio̍h tòa hiah ê chheh, hiah ê iûⁿ-phê ê koh khah iàu-kín.

14Phah銅師傅亞力山大chōe-chōe項害我，主beh照伊ê所行來報應伊。Phah-tâng sai-hū A-le̍k-san-tāi chōe-chōe hāng hāi góa, Chú beh chiàu i ê só͘ kiâⁿ lâi pò-èng i.

15你也tio̍h tiuⁿ-tî伊，因為伊不止對敵阮ê話。Lí iā tio̍h tiuⁿ-tî i, in-ūi i put-chí tùi-te̍k goán ê ōe.

16我頭一pái分訴ê時，無人óa近我，眾人lóng離開我；願chit-ê罪無歸tī in。Góa thâu chi̍t pái hun-sò͘ ê sî bô lâng óa-kūn góa, chèng lâng lóng lī-khui góa; goān chit ê chōe bô kui tī in.

17但是主khiā tī我身邊，hō͘我勇健，hō͘所tio̍h宣傳ê tùi我來一盡報揚，koh hō͘外邦lóng聽見；我也得tio̍h救出tī獅ê嘴。Nā-sī Chú khiā tī góa sin-piⁿ, hō͘ góa ióng-kiāⁿ, hō͘ só͘ tio̍h soan-thoân ê tùi góa lâi it-chīn pò-iông, koh hō͘ gōa-pang lóng thiaⁿ-kìⁿ; góa iā tit-tio̍h kiù chhut tī sai ê chhùi.

18主beh救我脫離lóng總ê pháiⁿ-tāi，也beh救我入tī伊天裡ê國；願榮光歸伊到代代無盡。À-bēng。Chú beh kiù góa thoat-lī lóng-chóng ê pháiⁿ-tāi, iā beh kiù góa ji̍p tī I thiⁿ-ni̍h ê kok; goān êng-kng kui I kàu tāi-tāi bô chīn. À-bēng.

19請安百基拉、亞居拉，kap O-nî-sek-hut ê家。Chhéng-an Pek-ki-lah A-ku-lah, kap O-nî-sek-hut ê ke.

20Í-lah-to͘ tiàm-tī哥林多；Tek-lô-hui-mô͘破病，我留伊tī Bí-lī-to͘。Í-lah-to͘ tiàm-tī Ko-lîm-to; Tek-lô-hui-mô͘ phòa-pīⁿ, góa lâu i tī Bí-lī-to͘.

21Tio̍h致意tī冬天前來。Iú-pò͘-lô、Po͘-tiân、Lī-lô͘、Kek-ló-tia，kap眾兄弟lóng請安你。Tio̍h tì-ì tī tang-thiⁿ chêng lâi. Iú-pò͘-lô, Po͘-tiân, Lī-lô͘, Kek-ló-tia, kap chèng hiaⁿ-tī lóng chhéng-an lí.

22願主kap你ê神tī-teh；願恩典kap lín tī-teh。Goān Chú kap lí ê sîn tī-teh; goān un-tián kap lín tī-teh.