1以色列眾人就聚集到Hi-pek-lûn見大衛講，看ah，阮是你ê骨肉。Í-sek-lia̍t chèng-lâng chiū chū-chi̍p kàu Hi-pek-lûn kìⁿ Tāi-pi̍t kóng, Khòaⁿ ah, goán sī lí ê kut-jio̍k.

2從前掃羅做王ê時，chhōa以色列人出入ê，也是你；koh耶和華你ê上帝bat對你講，你beh照顧我ê百姓以色列，也beh做我ê百姓以色列ê人君。Chiông-chêng Sò-lô chòe ông ê sî, chhōa Í-sek-lia̍t lâng chhut-ji̍p--ê, iā sī lí; koh Iâ-hô-hoa lí ê Siōng-tè bat tùi lí kóng, Lí beh chiàu-kò͘ Góa ê peh-sìⁿ Í-sek-lia̍t, iā beh chòe Góa ê peh-sìⁿ Í-sek-lia̍t ê jîn-kun.

3Tùi án-ni，以色列眾長老到Hi-pek-lûn見王；大衛就tī Hi-pek-lûn，tī耶和華ê面前，kap in立約；in就用油抹大衛做以色列王，照耶和華託重撒母耳所講ê。Tùi án-ni Í-sek-lia̍t chèng tiúⁿ-ló kàu Hi-pek-lûn kìⁿ ông; Tāi-pi̍t chiū tī Hi-pek-lûn, tī Iâ-hô-hoa ê bīn-chêng, kap in li̍p-iok; in chiū ēng iû boah Tāi-pi̍t chòe Í-sek-lia̍t ông, chiàu Iâ-hô-hoa thok-tiōng Sat-bó͘-jíⁿ só͘ kóng--ê.

4大衛kap以色列人去到耶路撒冷，就是Iâ-pò͘-su。Hit時本地ê Iâ-pò͘-su人khiā起tī-hia。Tāi-pi̍t kap Í-sek-lia̍t lâng khì kàu Iâ-lō͘-sat-léng, chiū-sī Iâ-pò͘-su. Hit-sî pún-tōe ê Iâ-pò͘-su lâng khiā-khí tī-hia.

5Khiā起tī Iâ-pò͘-su ê人kā大衛講，你bōe能入chia。總是大衛攻取錫安ê衛所，做大衛ê城。Khiā-khí tī Iâ-pò͘-su ê lâng kā Tāi-pi̍t kóng, Lí bōe-ōe ji̍p chia. Chóng-sī Tāi-pi̍t kong-chhú Sek-an ê ōe-só͘, chòe Tāi-pi̍t ê siâⁿ.

6大衛講，做頭攻擊Iâ-pò͘-su人ê，beh做首領，做元帥；Sé-ló͘-ngá ê kiáⁿ Iok-ap事先上去，就做首領。Tāi-pi̍t kóng, Chòe-thâu kong-kek Iâ-pò͘-su lâng--ê, beh chòe siú-léng, chòe goân-sòe; Sé-ló͘-ngá ê kiáⁿ Iok-ap tāi-seng chiūⁿ-khì, chiū chòe siú-léng.

7大衛khiā起tī衛所，所以in叫伊做大衛ê城。Tāi-pi̍t khiā-khí tī ōe-só͘, só͘-í in kiò i chòe Tāi-pi̍t ê siâⁿ.

8伊起城ê四圍，就是tùi Bí-lô 起到伊ê四圍；其餘ê，Iok-ap修理伊。I khí siâⁿ ê sì-ûi, chiū-sī tùi Bí-lô khí kàu i ê sì-ûi; kî-û--ê, Iok-ap siu-lí--i.

9大衛直直khah強大，因為萬軍ê耶和華kap伊tī-teh。Tāi-pi̍t ti̍t-ti̍t khah kiông-tōa, in-ūi bān-kun ê Iâ-hô-hoa kap i tī-teh.

10下底所記是大衛勇士ê頭人；in kap以色列眾人奮勇，幫贊伊得tio̍h 國，設立伊做王，照耶和華所論以色列ê話。Ē-tóe só͘ kì sī Tāi-pi̍t ióng-sū ê thâu-lâng; in kap Í-sek-lia̍t chèng-lâng hùn-ióng, pang-chān i tit-tio̍h kok, siat-li̍p i chòe-ông, chiàu Iâ-hô-hoa só͘ lūn Í-sek-lia̍t ê ōe.

11大衛勇士ê數額記tī下底；Hap-kek-mô͘-nî人Ngá-sok-pan，伊是chiah-ê將ê首領，伊bat做一時kia̍h鎗thâi死三百人。Tāi-pi̍t ióng-sū ê siàu-gia̍h kì tī ē-tóe; Hap-kek-mô͘-nî lâng Ngá-sok-pan, i sī chiah ê chiòng ê siú-léng, i bat chòe chi̍t-sî kia̍h-chhiuⁿ thâi-sí saⁿ-pah lâng.

12第二是A-ha̍p人，To-to ê kiáⁿ Í-lī-a-sat；伊是三個勇士ê一個。Tē-jī sī A-ha̍p lâng, To-to ê kiáⁿ Í-lī-a-sat; i sī saⁿ ê ióng-sū ê chi̍t-ê.

13伊bat kap大衛tī Pa-su-ta̍t-bín，腓利士人聚集tī-hia beh交戰，tī-hia有一坵園大麥滿滿；眾百姓就tī腓利士人ê面前逃走。I bat kap Tāi-pi̍t tī Pa-su-ta̍t-bín, Hui-lī-sū lâng chū-chi̍p tī-hia beh kau-chiàn, tī-hia ū chi̍t khu hn̂g tōa-be̍h móa-móa; chèng peh-sìⁿ chiū tī Hui-lī-sū lâng ê bīn-chêng tô-cháu.

14In khiā tī hit 坵園中來保護伊。續phah死腓利士人；耶和華拯救in，hō͘ in大khah贏。In khiā tī hit khu hn̂g-tiong lâi pó-hō͘--i. sòa phah-sí Hui-lī-sū lâng; Iâ-hô-hoa chín-kiù in, hō͘ in tōa khah-iâⁿ.

15三十個頭人中有三人落去石磐hia，入A-thó͘-lân ê洞見大衛；腓利士ê軍隊紮營tī Lī-hoa̍t-im ê山谷。Saⁿ-cha̍p ê thâu-lâng tiong ū saⁿ-lâng lo̍h-khì chio̍h-pôaⁿ hia, ji̍p A-thó͘-lân ê tōng kìⁿ Tāi-pi̍t; Hui-lī-sū ê kun-tūi chat-iâⁿ tī Lī-hoa̍t-im ê soaⁿ-kok.

16Hit時大衛tī衛所，腓利士人ê兵營tī伯利恆。Hit-sî Tāi-pi̍t tī ōe-só͘, Hui-lī-sū lâng ê peng-iâⁿ tī Pek-lī-hêng.

17大衛欣羨講，甚麼人會將伯利恆城門邊ê井水，chhiūⁿ來hō͘我lim？Tāi-pi̍t him-soān kóng, Sím-mi̍h lâng ōe chiong Pek-lī-hêng siâⁿ-mn̂g-piⁿ ê chíⁿ-chúi, chhiūⁿ lâi hō͘ góa lim?

18Chit三人就tùi腓利士ê軍營衝過去，tùi伯利恆城門邊ê井chhiūⁿ水，帶來hō͘大衛；伊m̄ lim，piàⁿ tī耶和華面前，講，Chí(**Chit) saⁿ-lâng chiū tùi Hui-lī-sū ê kun-iâⁿ chhiong--kè-khì, tùi Pek-lī-hêng siâⁿ-mn̂g-piⁿ ê chíⁿ chhiūⁿ-chúi, tòa lâi hō͘ Tāi-pi̍t; i m̄ lim, piàⁿ tī Iâ-hô-hoa bīn-chêng, kóng,

19我ê上帝ah，我決斷m̄-thang做án-ni；chiah-ê人無顧性命，我kiám敢lim in ê血mah？因為in無顧性命去chhiūⁿ來。所以伊m̄ lim伊。Chiah-ê事是指三個勇士做ê。Góa ê Siōng-tè ah, góa koat-toàn m̄-thang chòe án-ni; chiah ê lâng bô kò͘ sìⁿ-miā, góa kiám káⁿ lim in ê huih mah? In-ūi in bô kò͘ sìⁿ-miā khì chhiūⁿ--lâi. Só͘-í i m̄ lim--i. Chiah ê sū sī chí(**chit) saⁿ ê ióng-sū chòe--ê.

20Iok-ap ê兄弟A-pí-su是hit三個勇士中ê頭；因為伊kia̍h鎗攻擊三百人來thâi死，就tī chit三人中得tio̍h名。Iok-ap ê hiaⁿ-tī A-pí-su sī hit saⁿ ê ióng-sū tiong ê thâu; in-ūi i kia̍h-chhiuⁿ kong-kek saⁿ-pah lâng lâi thâi-sí, chiū tī chí(**chit) saⁿ-lâng tiong tit-tio̍h miâ.

21三人中伊比hit兩個khah出tioh，就做in ê頭；總是bōe比得起頭ê三人。Saⁿ-lâng tiong i pí hit nn̄g-ê khah chhut-tioh, chiū chòe in ê thâu; chóng-sī bōe pí-tit khí-thâu ê saⁿ-lâng.

22有Kah-siat人Iâ-hô-iâ-tāi ê kiáⁿ，Pí-ná-ngá，bat做出chōe-chōe大事ê，thâi死Mô͘-ap人A-lī-i-le̍k ê兩個kiáⁿ；koh tī落雪ê時，落坑內thâi死一隻獅。Ū Kah-siat lâng Iâ-hô-iâ-tāi ê kiáⁿ, Pí-ná-ngá, bat chòe-chhut chōe-chōe tōa-sū--ê, thâi-sí Mô͘-ap lâng A-lī-i-le̍k ê nn̄g ê kiáⁿ; koh tī lo̍h-seh ê sî, lo̍h khiⁿ-lāi thâi-sí chi̍t chiah sai.

23Koh thâi死一個埃及ê大漢人，有五肘ê高；埃及人手裡有鎗，大親像布機ê樑；Pí-ná-ngá kia̍h柺落去接伊，搶埃及人手內ê鎗，chiah用伊ê鎗thâi死伊。Koh thâi-sí chi̍t ê Ai-ki̍p ê tōa-hàn lâng, ū gō͘ tiú ê koâiⁿ; Ai-ki̍p lâng chhiú--nih ū chhiuⁿ, tōa chhin-chhiūⁿ pò͘-kui(**ki) ê niû; Pí-ná-ngá kia̍h-koáiⁿ lo̍h-khì chih--i, chhiúⁿ Ai-ki̍p lâng chhiú-lāi ê chhiuⁿ, chiah ēng i ê chhiuⁿ thâi-sí i.

24Chiah-ê是Iâ-hô-iâ-tāi ê kiáⁿ Pí-ná-ngá所行ê事，就tī三個勇士中得tio̍h名。Chiah-ê sī Iâ-hô-iâ-tāi ê kiáⁿ Pí-ná-ngá só͘ kiâⁿ ê sū, chiū tī saⁿ ê ióng-sū tiong tit-tio̍h miâ.

25伊比三十個勇士khah出tioh；總是bōe比得前三個勇士；大衛設立伊做侍衛長。I pí saⁿ-cha̍p ê ióng-sū khah chhut-tioh; chóng-sī bōe pí-tit chêng saⁿ ê ióng-sū; Tāi-pi̍t siat-li̍p i chòe sī-ōe-tiúⁿ.

26軍隊中ê勇士，有Iok-ap ê兄弟A-sat-hek，伯利恆人，To-to ê kiáⁿ I-le̍k-hap-lân；Kun-tūi tiong ê ióng-sū, ū Iok-ap ê hiaⁿ-tī A-sat-hek, Pek-lī-hêng lâng, To-to ê kiáⁿ I-le̍k-hap-lân;

27Hap-lu̍t人Sa-má，Pí-lûn人Hi-lī-su；Hap-lu̍t lâng Sa-má, Pí-lûn lâng Hi-lī-su;

28Thê-ko-a人Ek-kiat ê kiáⁿ Í-la̍h，A-ná-tu̍t人A-pí-í-siā；Thê-ko-a lâng Ek-kiat ê kiáⁿ Í-la̍h, A-ná-tu̍t lâng A-pí-í-siā;

29Hō͘-sa人Se-pí-kai，A-ha̍p人Í-lâi；Hō͘-sa lâng Se-pí-kai, A-ha̍p lâng Í-lâi;

30Nî-to-hoat人Má-khap-lâi，Nî-to-hoat人Pa-ná ê kiáⁿ Hi-li̍p；Nî-to-hoat lâng Má-khap-lâi, Nî-to-hoat lâng Pa-ná ê kiáⁿ Hi-li̍p;

31便雅憫族，Ki-pí-a人Lī-pài ê kiáⁿ Í-thài，Pí-la̍h-tùn人Pí-ná-ngá；Piān-ngá-bín cho̍k, Ki-pí-a lâng Lī-pài ê kiáⁿ Í-thài, Pí-la̍h-tùn lâng Pí-ná-ngá;

32屬Ka-si̍t chiah-ê溪ê人Hō͘-lâi，A-la̍h-pa人A-pí；sio̍k Ka-si̍t chiah ê khoe ê lâng Hō͘-lâi, A-la̍h-pa lâng A-pí;

33Pa-lō͘-bí人A-su-má-hut，Sa-pún人I-lī-ngá-hap-pa；Pa-lō͘-bí lâng A-su-má-hut, Sa-pún lâng I-lī-ngá-hap-pa;

34Ki-sun人Hap-chhim ê眾kiáⁿ，Hap-la̍h人Sa-ki ê kiáⁿ約拿單；Ki-sun lâng Hap-chhim ê chèng-kiáⁿ, Hap-la̍h lâng Sa-ki ê kiáⁿ Iok-ná-tan;

35Hap-la̍h人Sa-kah ê kiáⁿ A-hi-àm，Ngô͘-jíⁿ ê kiáⁿ Í-lī-hoat-le̍k；Hap-la̍h lâng Sa-kah ê kiáⁿ A-hi-àm, Ngô͘-jíⁿ ê kiáⁿ Í-lī-hoat-le̍k;

36Bí-ki-la̍h人Hi-hut，Pí-lûn人A-hi-ngá；Bí-ki-la̍h lâng Hi-hut, Pí-lûn lâng A-hi-ngá;

37Ka-bi̍t人Hi-su-lô，I-su-pài ê kiáⁿ Ná-lâi；Ka-bi̍t lâng Hi-su-lô, I-su-pài ê kiáⁿ Ná-lâi;

38Ná-tan ê兄弟約珥，Hap-ki-lī ê kiáⁿ Bî-pek-hap；Ná-tan ê hiaⁿ-tī Iok-jíⁿ, Hap-ki-lī ê kiáⁿ Bî-pek-hap;

39A-bûn人Sé-le̍k，Pí-lio̍k人Ná-hap-lâi，Ná-hap-lâi是kā Sé-ló͘-ngá ê kiáⁿ Iok-ap kia̍h戰器ê；A-bûn lâng Sé-le̍k, Pí-lio̍k lâng Ná-hap-lâi, Ná-hap-lâi sī kā Sé-ló͘-ngá ê kiáⁿ Iok-ap kia̍h chiàn-khì--ê;

40Í-thiap人Í-la̍h，Í-thiap人Ka-li̍p；Í-thiap lâng Í-la̍h, Í-thiap lâng Ka-li̍p;

41Hek人烏利亞，A-lâi ê kiáⁿ Sat-poa̍t；Hek-lâng O͘-lī-à, A-lâi ê kiáⁿ Sat-poa̍t;

42Liû-piān人Sī-sat ê kiáⁿ，A-tē-ná，伊是Liû-piān支派中一個族長，chhōa三十人；Liû-piān lâng Sī-sat ê kiáⁿ, A-tē-ná, i sī Liû-piān chi-phài tiong chi̍t-ê cho̍k-tiúⁿ, chhōa saⁿ-cha̍p lâng;

43Má-ka ê kiáⁿ哈蘭，Bî-te̍k-nî人Iok-sa-hoat；Má-ka ê kiáⁿ Hap-lân, Bî-te̍k-nî lâng Iok-sa-hoat;

44A-si-tha-la̍h人O͘-se-a，A-lô-jíⁿ人，Hô-thán ê kiáⁿ Sa-má，Iâ-lī；A-si-tha-la̍h lâng O͘-se-a, A-lô-jíⁿ lâng, Hô-thán ê kiáⁿ Sa-má, Iâ-lī;

45Thê-sé人Sin-lī ê kiáⁿ Iâ-tia̍p，kap伊ê兄弟Iok-hap；Thê-sé lâng Sin-lī ê kiáⁿ Iâ-tia̍p, kap i ê hiaⁿ-tī Iok-hap;

46Má-hap-bī人Í-lī-gia̍p，I-lī-ná-an ê kiáⁿ Iâ-lī-pài，Iok-sa-bī-ngá，Mô͘-ap人I-te̍k-má；Má-hap-bī lâng Í-lī-gia̍p, I-lī-ná-an ê kiáⁿ Iâ-lī-pài, Iok-sa-bī-ngá, Mô͘-ap lâng I-te̍k-má;

47Í-lī-gia̍p，Gô-pī-tek，kap Bí-só-pat人Ngá-se-gia̍p。Í-lī-gia̍p, Gô-pī-tek, kap Bí-só-pat lâng Ngá-se-gia̍p.

1大衛因為驚Ki-sū ê kiáⁿ掃羅，守teh m̄敢出去ê時，有chiah-ê勇士來到Sé-kek-la̍h chhē伊，幫贊伊交戰。Tāi-pi̍t in-ūi kiaⁿ Ki-sū ê kiáⁿ Sò-lô, siú-teh m̄-káⁿ chhut-khì ê sî, ū chiah ê ióng-sū lâi kàu Sé-kek-la̍h chhē--i, pang-chān i kau-chiàn.

2In gâu開弓，能用tò手chiàⁿ手hiat石頭射箭；lóng是便雅憫人掃羅ê同族。In gâu khui-keng, ōe ēng tò-chhiú chiàⁿ-chhiú hiat chio̍h-thâu siā-chìⁿ; lóng sī Piān-ngá-bín lâng Sò-lô ê tâng-cho̍k.

3頭一個是A-hi-í-siā，koh有Iok-a-si，lóng是Ki-pí-a人Sī-má ê kiáⁿ；koh有Iâ-siat kap Pí-le̍k，是A-su-má-ui ê kiáⁿ；koh有Pí-la̍h-ka kap A-ná-tu̍t人Iâ-hō͘；Thâu-chi̍t-ê sī A-hi-í-siā, koh ū Iok-a-si, lóng sī Ki-pí-a lâng Sī-má ê kiáⁿ; koh ū Iâ-siat kap Pí-le̍k, sī A-su-má-ui ê kiáⁿ; koh ū Pí-la̍h-ka kap A-ná-tu̍t lâng Iâ-hō͘;

4Ki-piàn人Í-si̍t-mái-ngá，tī三十人中是勇士，也teh管hit三十人。Koh有耶利米、Ngá-hap-sek、Iok-hap-lân，kap Ki-tek-la̍h人Iok-sat-poa̍t；Ki-piàn lâng Í-si̍t-mái-ngá, tī saⁿ-cha̍p lâng tiong sī ióng-sū, iā teh koán hit saⁿ-cha̍p lâng. Koh ū Iâ-lī-bí, Ngá-hap-sek, Iok-hap-lân, kap Ki-tek-la̍h lâng Iok-sat-poa̍t;

5I-lī-o͘-sài、Iâ-lī-mô͘、Pí-a-lī-ngá、Sī-má-lī-ngá，Hap-lu̍t-hut人Sī-hoat-thê-ngá；I-lī-o͘-sài, Iâ-lī-mô͘, Pí-a-lī-ngá, Sī-má-lī-ngá, Hap-lu̍t-hut lâng Sī-hoat-thê-ngá;

6Khó-la̍h人Í-lī-ka-ná、Iâ-se-a、A-sat-lia̍t、Iok-í-siā、Ngá-sok-pan；Khó-la̍h lâng Í-lī-ka-ná, Iâ-se-a, A-sat-lia̍t, Iok-í-siā, Ngá-sok-pan;

7Ki-to人Iâ-lô-hán ê kiáⁿ Iû-la̍h，kap Se-pa-tē-ngá。Ki-to lâng Iâ-lô-hán ê kiáⁿ Iû-la̍h, kap Se-pa-tē-ngá.

8Ka-tek支派有kúi-nā人到曠野ê衛所，歸óa大衛；in lóng是勇士戰士，能出陣，giâ屏牌，kia̍h鎗，in ê面親像獅ê面，gâu走親像山裡ê鹿。Ka-tek chi-phài ū kúi-nā lâng kàu khòng-iá ê ōe-só͘, kui-óa Tāi-pi̍t; in lóng sī ióng-sū chiàn-sū, ōe chhut-tīn, giâ pîn-pâi, kia̍h chhiuⁿ, in ê bīn chhin-chhiūⁿ sai ê bīn, gâu cháu chhin-chhiūⁿ soaⁿ--nih ê lo̍k.

9頭一個Í-siat，第二Gô-pa-tí-ná，第三Í-lī-ap；Thâu-chi̍t-ê Í-siat, tē-jī Gô-pa-tí-ná, tē-saⁿ Í-lī-ap;

10第四Bî-si-má-ná，第五耶利米；tē-sì Bî-si-má-ná, tē-gō͘ Iâ-lī-bí;

11第六A-thài，第七Í-lī-gia̍p；tē-la̍k A-thài, tē-chhit Í-lī-gia̍p;

12第八Iok-hap-lân，第九 Í-lī-sat-pa；tē-poeh Iok-hap-lân, tē-káu Í-lī-sat-pa;

13第十耶利米，第十一Boa̍t-pa-nāi。tē-cha̍p Iâ-lī-bí, tē-cha̍p-it Boa̍t-pa-nāi.

14Chiah-ê lóng是Ka-tek人，也lóng是軍長；siōng-bōe-ê能抵擋一百人，siōng能ê能抵擋一千人。Chiah-ê lóng sī Ka-tek lâng, iā lóng sī kun-tiúⁿ; siōng-bōe--ê ōe tí-tng chi̍t-pah lâng, siōng-ōe--ê ōe tí-tng chi̍t-chheng lâng.

15正月約旦河水漲滿雙pêng岸ê時，in過河，hō͘一切tiàm tī山谷ê人走東走西。Chiaⁿ-ge̍h Iok-tàn hô-chúi tiòng-móa siang-pêng hōaⁿ ê sî, in kè-hô, hō͘ it-chhè tiàm tī soaⁿ-kok ê lâng cháu-tang cháu-sai.

16Koh有便雅憫猶大人來到衛所，chhē大衛。Koh ū Piān-ngá-bín Iû-tāi lâng lâi kàu ōe-só͘, chhē Tāi-pi̍t.

17大衛出去迎接in；對in講，Lín若是為tio̍h平安來幫贊我，我kap lín ê心就相契合；總是lín若beh將我無罪ê人，賣tī對敵ê手，願咱列祖ê上帝鑑察責罰。Tāi-pi̍t chhut-khì ngiâ-chih in; tùi in kóng, Lín nā sī ūi-tio̍h pêng-an lâi pang-chān góa, góa kap lín ê sim chiū saⁿ-khè-ha̍p; chóng-sī lín nā beh chiong góa bô-chōe ê lâng, bōe tī tùi-te̍k ê chhiú, goān lán lia̍t-chó͘ ê Siōng-tè kàm-chhat chek-hoa̍t.

18Hit時上帝ê神臨到chiah-ê將ê頭人A-má-sat，伊就講，大衛ah，阮是歸tī你ê，耶西ê kiáⁿ ah，阮是幫贊你ê；願你平平安安，願幫贊你ê，也得tio̍h平安；因為你ê上帝幫贊你。大衛就收留in，設立in做軍長。Hit-sî Siōng-tè ê Sîn lîm-kàu chiah ê chiòng ê thâu-lâng A-má-sat, i chiū kóng, Tāi-pi̍t ah, goán sī kui tī lí--ê, Iâ-se ê kiáⁿ ah, goán sī pang-chān lí--ê; goān lí pêng-pêng an-an, goān pang-chān lí--ê, iā tit-tio̍h pêng-an; in-ūi lí ê Siōng-tè pang-chān lí. Tāi-pi̍t chiū siu-liû in, siat-li̍p in chòe kun-tiúⁿ.

19大衛從前kap腓利士出陣beh攻擊掃羅ê時，有Má-ná-se支派kúi-nā人來歸óa伊，總是到尾in無幫贊in，因為腓利士ê頭人有議論tio̍h hō͘伊tò去，講，伊的確歸伊ê主人掃羅，致到咱ê頭殼危險。Tāi-pi̍t chiông-chêng kap Hui-lī-sū chhut-tīn beh kong-kek Sò-lô ê sî, ū Má-ná-se chi-phài kúi-nā lâng lâi kui-óa--i, chóng-sī kàu-bé in bô pang-chān in, in-ūi Hui-lī-sū ê thâu-lâng ū gī-lūn tio̍h hō͘ i tò--khì, kóng, I tek-khak kui i ê chú-lâng Sò-lô, tì-kàu lán ê thâu-khak gûi-hiám.

20Hit時大衛去Sé-kek-la̍h，有Má-ná-se人ê千總，Ap-ná、Iok-sat-poa̍t、Iâ-tia̍p、Bí-ka-le̍k、Iok-sat-poa̍t、Í-lī-hō͘、Sé-le̍k-thài，lóng來歸óa伊。Hit-sî Tāi-pi̍t khì Sé-kek-la̍h, ū Má-ná-se lâng ê chhian-chóng, Ap-ná, Iok-sat-poa̍t, Iâ-tia̍p, Bí-ka-le̍k, Iok-sat-poa̍t, Í-lī-hō͘, Sé-le̍k-thài, lóng lâi kui-óa i.

21Chiah-ê人幫贊大衛攻擊土匪，in lóng是大氣力ê勇士，koh做軍長。Chiah ê lâng pang-chān Tāi-pi̍t kong-kek thó͘-húi, in lóng sī tōa khùi-la̍t ê ióng-sū, koh chòe kun-tiúⁿ.

22Hit時日日有人歸óa大衛，beh幫贊伊，就成做大軍隊，親像上帝ê軍隊一樣。Hit-sî ji̍t-ji̍t ū lâng kui-óa Tāi-pi̍t, beh pang-chān i, chiū chiâⁿ-chòe tōa kun-tūi, chhin-chhiūⁿ Siōng-tè ê kun-tūi chi̍t-iūⁿ.

23備辦交戰ê軍隊到Hi-pek-lûn見大衛，beh照耶和華ê話移徙掃羅ê國位hō͘大衛，in ê數額記tī下面。Pī-pān kau-chiàn ê kun-tūi kàu Hi-pek-lûn kìⁿ Tāi-pi̍t, beh chiàu Iâ-hô-hoa ê ōe î-sóa Sò-lô ê kok-ūi hō͘ Tāi-pi̍t, in ê siàu-gia̍h kì tī ē-bīn.

24猶大支派，giâ屏牌kia̍h鎗備辦交戰ê，有六千八百人。Iû-tāi chi-phài, giâ pîn-pâi kia̍h chhiuⁿ pī-pān kau-chiàn ê, ū la̍k-chheng poeh-pah lâng.

25西門ê支派，能出陣ê勇士，有七千一百人。Se-biān ê chi-phài, ōe chhut-tīn ê ióng-sū, ū chhit-chheng chi̍t-pah lâng.

26利未支派四千六百人。Lī-bī chi-phài sì-chheng la̍k-pah lâng.

27Iâ-hô-iâ-tāi是亞倫ê家ê首領，tè伊ê有三千七百人。Iâ-hô-iâ-tāi sī A-lûn ê ke ê siú-léng, tè-i--ê ū saⁿ-chheng chhit-pah lâng.

28Koh有少年人Sat-tok是大勇士，kap伊本家ê族長二十二人。Koh ū siàu-liân lâng Sat-tok sī tōa ióng-sū, kap i pún-ke ê cho̍k-tiúⁿ jī-cha̍p-jī lâng.

29便雅憫ê支派，就是掃羅ê同族，三千人；因為到hit時，chit族大半iáu-kú擁護掃羅ê家。Piān-ngá-bín ê chi-phài, chiū-sī Sò-lô ê tâng-cho̍k, saⁿ-chheng lâng; in-ūi kàu hit-sî, chit-cho̍k tōa-pòaⁿ iáu-kú iòng-hō͘ Sò-lô ê ke.

30Í-hoat-liân支派ê大勇士，tī本族出名ê，有兩萬連八百人。Í-hoat-liân chi-phài ê tōa ióng-sū, tī pún-cho̍k chhut-miâ--ê, ū nn̄g-bān liân poeh-pah lâng.

31Má-ná-se半支派記名ê，共一萬八千，lóng來設立大衛做王。Má-ná-se pòaⁿ-chi-phài kì-miâ--ê, kiōng chi̍t-bān poeh-chheng, lóng lâi siat-li̍p Tāi-pi̍t chòe-ông.

32Í-sat-ka支派有知識，bat時勢，知以色列所tio̍h行ê，in ê頭人有兩百；in ê兄弟lóng thàn in ê命令。Í-sat-ka chi-phài ū tì-sek, bat sî-sè, chai Í-sek-lia̍t só͘ tio̍h kiâⁿ--ê, in ê thâu-lâng ū nn̄g-pah; in ê hiaⁿ-tī lóng thàn in ê bēng-lēng.

33Se-pò͘-lûn有能出陣ê，lóng gâu交戰，能用ta̍k樣ê軍器ê，有五萬人；in能排隊伍，無兩樣心。Se-pò͘-lûn ū ōe-chhut-tīn--ê, lóng gâu kau-chiàn, ōe ēng ta̍k-iūⁿ ê kun-khì--ê, ū gō͘-bān lâng; in ōe pâi tūi-ngó͘, bô nn̄g-iūⁿ sim.

34屬Ná-hut-tha-lī-ê，有一千ê軍長；giâ屏牌kia̍h鎗來tè in ê，有三萬七千人。Sio̍k Ná-hut-tha-lī--ê, ū chi̍t-chheng ê kun-tiúⁿ; giâ pîn-pâi kia̍h chhiuⁿ lâi tè in ê, ū saⁿ-bān chhit-chheng lâng.

35Tàn ê支派，能排陣ê，兩萬八千六百人。Tàn ê chi-phài, ōe pâi-tīn ê, nn̄g-bān poeh-chheng la̍k-pah lâng.

36屬A-siat-ê，能出軍排陣ê，有四萬人。Sio̍k A-siat--ê, ōe chhut-kun pâi-tīn--ê, ū sì-bān lâng.

37約旦河ê東pêng，Liû-piān人、Ka-tek人、Má-ná-se半支派ê人，kia̍h ta̍k樣ê軍器來交戰ê，有十二萬人。Iok-tàn-hô ê tang-pêng, Liû-piān lâng, Ka-tek lâng, Má-ná-se pòaⁿ-chi-phài ê lâng, kia̍h ta̍k-iūⁿ ê kun-khì lâi kau-chiàn--ê, ū cha̍p-jī-bān lâng.

38Chiah-ê戰士lóng能排隊伍，誠實心到Hi-pek-lûn，beh設立大衛做以色列全國ê王；以色列其餘ê人，也同一樣ê心，beh設立大衛做王。Chiah ê chiàn-sū lóng ōe pâi tūi-ngó͘, sêng-si̍t sim kàu Hi-pek-lûn, beh siat-li̍p Tāi-pi̍t chòe Í-sek-lia̍t choân-kok ê ông; Í-sek-lia̍t kî-û ê lâng, iā tâng chi̍t-iūⁿ ê sim, beh siat-li̍p Tāi-pi̍t chòe-ông.

39In tiàm hia三日久，kap大衛相kap tiàm，也lim也食，因為in ê兄弟kā in備辦便便。In tiàm hia saⁿ-ji̍t kú, kap Tāi-pi̍t saⁿ-kap tiàm, iā lim iā chia̍h, in-ūi in ê hiaⁿ-tī kā in pī-pān piān-piān.

40óa近in ê人，直到Í-sat-ka、Se-pò͘-lûn、Ná-hut-tha-lī ê人，將驢、駱駝、騾、牛，載麵粉食物，kap無花果餅、葡萄干、酒、油，來hia；也有帶牛羊，lóng真chōe；因為tī以色列中有大歡喜。Óa-kūn in ê lâng, ti̍t kàu Í-sat-ka, Se-pò͘-lûn, Ná-hut-tha-lī ê lâng, chiong lû, lo̍k-tô, lô, gû, chài mī-hún chia̍h-mi̍h, kap bû-hoa-kó-piáⁿ, phû-tô-koaⁿ, chiú, iû, lâi hia; iā ū tòa gû iûⁿ, lóng chin-chōe; in-ūi tī Í-sek-lia̍t tiong ū tōa hoaⁿ-hí.

1大衛kap chiah-ê千總百總，kap chiah-ê頭人參詳。Tāi-pi̍t kap chiah ê chhian-chóng pé-chóng, kap chiah ê thâu-lâng chham-siông.

2大衛對以色列全會講，Lín若掠做好，koh是出tī耶和華咱ê上帝ê意思，taⁿ咱就差人遍行以色列全地，見咱hiah-ê iáu-chhun ê兄弟，kap tiàm-tī有郊野ê城ê祭司利未人，hō͘ in lóng聚集到咱chia。Tāi-pi̍t tùi Í-sek-lia̍t choân-hōe kóng, Lín nā lia̍h-chòe hó, koh sī chhut tī Iâ-hô-hoa lán ê Siōng-tè ê ì-sù, taⁿ lán chiū chhe lâng piàn kiâⁿ Í-sek-lia̍t choân-tōe, kìⁿ lán hiah-ê iáu-chhun ê hiaⁿ-tī, kap tiàm-tī ū kau-iá ê siâⁿ ê chè-si Lī-bī lâng, hō͘ in lóng chū-chi̍p kàu lán chia.

3咱就thang帶咱ê上帝ê約櫃到咱chia；因為掃羅ê時chūn，咱無用hit-ê來問上帝。Lán chiū thang tòa lán ê Siōng-tè ê iok-kūi kàu lán chia; in-ūi Sò-lô ê sî-chūn, lán bô ēng hit-ê lâi mn̄g Siōng-tè.

4全會lóng講，Thang án-ni行；眾百姓lóng看chit-ê tāi-chì做好。Choân-hōe lóng kóng, Thang án-ni kiâⁿ; chèng peh-sìⁿ lóng khòaⁿ chit ê tāi-chì chòe hó.

5Tùi án-ni，大衛召以色列人，tùi埃及Se-hat ê溪，直到Hap-má出入ê所在，beh帶上帝ê約櫃，tùi Ki-lia̍t-iâ-lîm來。Tùi án-ni Tāi-pi̍t tiàu Í-sek-lia̍t lâng, tùi Ai-ki̍p Se-hat ê khoe, ti̍t-kàu Hap-má chhut-ji̍p ê só͘-chāi, beh tòa Siōng-tè ê iok-kūi, tùi Ki-lia̍t-iâ-lîm lâi.

6大衛kap以色列眾人就到Pa-la̍h，就是屬猶大ê Ki-lia̍t-iâ-lîm，ài beh tùi hia 帶hit-ê tiàm tī ki-lō͘兵中間耶和華上帝ê約櫃，就是用伊名來稱呼ê。Tāi-pi̍t kap Í-sek-lia̍t chèng-lâng chiū kàu Pa-la̍h, chiū-sī sio̍k Iû-tāi ê Ki-lia̍t-iâ-lîm, ài beh tùi hia tòa hit-ê tiàm tī ki-lō͘-peng tiong-kan Iâ-hô-hoa Siōng-tè ê iok-kūi, chiū-sī ēng I miâ lâi chheng-ho͘--ê.

7In用新ê車載上帝ê約櫃，tùi A-pí-ná-ta̍t ê厝出來，O͘-sat kap A-hi-iok趕車。In ēng sin ê chhia chài Siōng-tè ê iok-kūi, tùi A-pí-ná-ta̍t ê chhù chhut-lâi, O͘-sat kap A-hi-iok kóaⁿ-chhia.

8大衛kap以色列眾人tī上帝ê面前盡力唱歌，用琴、瑟、鑼、鼓、號頭，作樂跳舞。Tāi-pi̍t kap Í-sek-lia̍t chèng-lâng tī Siōng-tè ê bīn-chêng chīn-la̍t chhiùⁿ-koa, ēng khîm, sek, lô, kó͘, hō-thâu, chok-ga̍k thiàu-bú.

9到Ki-tùn ê五穀場，因為牛tio̍h-tak，O͘-sat伸手hōaⁿ hit-ê櫃。Kàu Ki-tùn ê gō͘-kak-tiûⁿ, in-ūi gû tio̍h-tak, O͘-sat chhun-chhiú hōaⁿ hit ê kūi.

10耶和華受氣O͘-sat，因為伊伸手hōaⁿ約櫃，就phah伊；伊就死tī-hia，tī上帝ê面前。Iâ-hô-hoa siū-khì O͘-sat, in-ūi i chhun-chhiú hōaⁿ iok-kūi, chiū phah i; i chiū sí tī-hia, tī Siōng-tè ê bīn-chêng.

11大衛因為耶和華phah O͘-sat，就無歡喜，號hit-ê所在做Pí-lia̍t-su-o͘-sat，直到今á日。Tāi-pi̍t in-ūi Iâ-hô-hoa phah O͘-sat, chiū bô hoaⁿ-hí, hō hit ê só͘-chāi chòe Pí-lia̍t-su-o͘-sat, ti̍t-kàu kin-á-ji̍t.

12Hit日大衛驚上帝，就講，我thái-thó thang 帶上帝ê約櫃到我ê所在？Hit-ji̍t Tāi-pi̍t kiaⁿ Siōng-tè, chiū kóng, Góa thái-thó thang tòa Siōng-tè ê iok-kūi kàu góa ê só͘-chāi?

13Tùi án-ni，大衛無帶約櫃到大衛ê城，家己ê所在；就轉到Ka-te̍k人Gô-pia̍t-í-tong ê家。Tùi án-ni Tāi-pi̍t bô tòa iok-kūi kàu Tāi-pi̍t ê siâⁿ, ka-kī ê só͘-chāi; chiū choán kàu Ka-te̍k lâng Gô-pia̍t-í-tong ê ke.

14上帝ê約櫃tī Gô-pia̍t-í-tong ê家，tī伊ê厝三月日久；耶和華賜福tī Gô͘-pia̍t-í-tong ê家，kap伊一切所有ê。Siōng-tè ê iok-kūi tī Gô-pia̍t-í-tong ê ke, tī i ê chhù saⁿ-ge̍h-ji̍t kú; Iâ-hô-hoa sù-hok tī Gô͘-pia̍t-í-tong ê ke, kap i it-chhè só͘-ū--ê.