1大衛就為家己起kúi-nā間厝tī大衛ê城；koh為上帝ê約櫃備辦一所在kā伊搭布棚。Tāi-pi̍t chiū ūi ka-kī khí kúi-nā keng chhù tī Tāi-pi̍t ê siâⁿ; koh ūi Siōng-tè ê iok-kūi pī-pān chi̍t só͘-chāi kā i tah pò͘-pîⁿ.

2Hit時大衛講，除去利未人以外，無人thang扛上帝ê約櫃，因為耶和華揀in扛上帝ê約櫃，koh服事伊直到永遠。Hit-sî Tāi-pi̍t kóng, Tû--khì Lī-bī lâng í-gōa, bô lâng thang kng Siōng-tè ê iok-kūi, in-ūi Iâ-hô-hoa kéng in kng Siōng-tè ê iok-kūi, koh ho̍k-sāi I ti̍t-kàu éng-oán.

3大衛聚集以色列眾人到耶路撒冷，ài將耶和華ê約櫃扛到伊所kā伊備辦ê所在。Tāi-pi̍t chū-chi̍p Í-sek-lia̍t chèng-lâng kàu Iâ-lō͘-sat-léng, ài chiong Iâ-hô-hoa ê iok-kūi kng kàu i só͘ kā i pī-pān ê só͘-chāi.

4大衛koh聚集亞倫ê kiáⁿ孫kap利未人。Tāi-pi̍t koh chū-chi̍p A-lûn ê kiáⁿ-sun kap Lī-bī lâng.

5Ko-hat ê kiáⁿ孫中有頭人，O͘-lia̍t，kap伊ê兄弟一百二十人。Ko-hat ê kiáⁿ-sun tiong ū thâu-lâng, O͘-lia̍t, kap i ê hiaⁿ-tī chi̍t-pah jī-cha̍p lâng.

6Bí-la̍h-lī ê kiáⁿ孫中有頭人A-sòe-ngá，kap伊ê兄弟Nńg-pah二十人。Bí-la̍h-lī ê kiáⁿ-sun tiong ū thâu-lâng A-sòe-ngá, kap i ê hiaⁿ-tī nńg-pah jī-cha̍p lâng.

7Kek-sūn ê kiáⁿ孫中有頭人約珥，kap伊ê兄弟一百三十人。Kek-sūn ê kiáⁿ-sun tiong ū thâu-lâng Iok-jíⁿ, kap i ê hiaⁿ-tī chi̍t-pah saⁿ-cha̍p lâng.

8Í-lī-sat-hoán ê kiáⁿ孫中有頭人Sī-má-ngá，kap伊ê兄弟兩百人。Í-lī-sat-hoán ê kiáⁿ-sun tiong ū thâu-lâng Sī-má-ngá, kap i ê hiaⁿ-tī nn̄g-pah lâng.

9Hi-pek-lûn kiáⁿ孫中有頭人Í-lia̍t，kap伊ê兄弟八十人。Hi-pek-lûn kiáⁿ-sun tiong ū thâu-lâng Í-lia̍t, kap i ê hiaⁿ-tī poeh-cha̍p lâng.

10O͘-siat ê kiáⁿ孫中，有頭人A-bí-ná-ta̍t，kap伊ê兄弟一百十二人。O͘-siat ê kiáⁿ-sun tiong, ū thâu-lâng A-bí-ná-ta̍t, kap i ê hiaⁿ-tī chi̍t-pah cha̍p-jī lâng.

11大衛召祭司Sat-tok kap A-pí-a-tha，以及利未人O͘-lia̍t、A-sòe-ngá、約珥、Sī-má-ngá、Í-lia̍t、A-bí-ná-ta̍t chiah-ê人來。Tāi-pi̍t tiàu chè-si Sat-tok kap A-pí-a-tha, í-ki̍p Lī-bī lâng O͘-lia̍t, A-sòe-ngá, Iok-jíⁿ, Sī-má-ngá, Í-lia̍t, A-bí-ná-ta̍t chiah ê lâng lâi.

12對in講，Lín是利未人ê族長，lín kap lín ê兄弟tio̍h家己清氣，chiah thang將耶和華以色列上帝ê約櫃，扛到我所kā伊備辦ê所在。Tùi in kóng, Lín sī Lī-bī lâng ê cho̍k-tiúⁿ, lín kap lín ê hiaⁿ-tī tio̍h ka-kī chheng-khì, chiah thang chiong Iâ-hô-hoa Í-sek-lia̍t Siōng-tè ê iok-kūi, kng kàu góa só͘ kā i pī-pān ê só͘-chāi.

13因為lín從前無án-ni做，咱ê上帝耶和華已經責罰咱，因為咱無照定tio̍h ê例chhē伊。In-ūi lín chiông-chêng bô án-ni chòe, lán ê Siōng-tè Iâ-hô-hoa í-keng chek-hoa̍t lán, in-ūi lán bô chiàu tiāⁿ-tio̍h ê lē chhē I.

14Tùi án-ni，祭司kap利未人清氣家己，beh將以色列ê上帝耶和華ê約櫃扛上來。Tùi án-ni chè-si kap Lī-bī lâng chheng-khì ka-kī, beh chiong Í-sek-lia̍t ê Siōng-tè Iâ-hô-hoa ê iok-kūi kng chiūⁿ--lâi.

15利未ê kiáⁿ孫就用kǹg 扛上帝ê約櫃tī肩頭頂，照摩西thàn耶和華ê話所命令ê。Lī-bī ê kiáⁿ-sun chiū ēng kǹg kng Siōng-tè ê iok-kūi tī keng-thâu-téng, chiàu Mô͘-se thàn Iâ-hô-hoa ê ōe só͘ bēng-lēng--ê.

16大衛kah利未ê族長，分派in唱歌ê兄弟作樂，用瑟kap琴kap鐃鈸(nâ-poa̍h)，歡喜出聲來唱。Tāi-pi̍t kah Lī-bī ê cho̍k-tiúⁿ, hun-phài in chhiùⁿ-koa ê hiaⁿ-tī chok-ga̍k, ēng sek kap khîm kap nâ-poa̍h, hoaⁿ-hí chhut-siaⁿ lâi chhiùⁿ.

17Tùi án-ni，利未人分派約珥ê kiáⁿ Hi-bān，kap伊兄弟中Pí-lī-ka ê kiáⁿ A-sat，kap in同族ê兄弟Bí-la̍h-lī ê kiáⁿ孫中Kó͘-sa-ngá ê kiáⁿ Í-thàm。Tùi án-ni, Lī-bī lâng hun-phài Iok-jíⁿ ê kiáⁿ Hi-bān, kap i hiaⁿ-tī tiong Pí-lī-ka ê kiáⁿ A-sat, kap in tâng-cho̍k ê hiaⁿ-tī Bí-la̍h-lī ê kiáⁿ-sun tiong Kó͘-sa-ngá ê kiáⁿ Í-thàm.

18Koh有第二班ê兄弟Sat-ka-lī-ngá、Piān、Ngá-siat、Sī-bí-la̍h-boa̍t、Iâ-iat、O͘-nî、Í-lī-ap、Pí-ná-ngá、Má-se-ngá、Má-tha-thê-ngá、Í-lī-hui-lī-hō͘、Bî-khek-nî-ngá，kap顧門ê Gô-pia̍t-í-tong kap Iâ-lī。Koh ū tē-jī pan ê hiaⁿ-tī Sat-ka-lī-ngá, Piān, Ngá-siat, Sī-bí-la̍h-boa̍t, Iâ-iat, O͘-nî, Í-lī-ap, Pí-ná-ngá, Má-se-ngá, Má-tha-thê-ngá, Í-lī-hui-lī-hō͘, Bî-khek-nî-ngá, kap kò͘-mn̂g ê Gô-pia̍t-í-tong kap Iâ-lī.

19Án-ni派唱歌ê Hi-bān、A-sat、Í-thàm，phah鐃鈸出大聲。Án-ni phài chhiùⁿ-koa ê Hi-bān, A-sat, Í-thàm, phah nâ-poa̍h chhut tōa-siaⁿ.

20派Sat-ka-lī-ngá、Ngá-siat、Sī-bí-la̍h-boa̍t、Iâ-iat、O͘-nî、Í-lī-ap、Má-se-ngá、Pí-ná-ngá、彈瑟，伊ê聲音清亮。Phài Sat-ka-lī-ngá, Ngá-siat, Sī-bí-la̍h-boa̍t, Iâ-iat, O͘-nî, Í-lī-ap, Má-se-ngá, Pí-ná-ngá, tôaⁿ-sek, i ê siaⁿ-im chheng-liāng.

21Koh派Má-tha-thê-ngá、Í-lī-hui-lī-hō͘、Bî-khek-nî-ngá、Gô-pia̍t-í-tong、Iâ-lī、A-sat-se-ngá，做頭彈琴，調用第八。Koh phài Má-tha-thê-ngá, Í-lī-hui-lī-hō͘, Bî-khek-nî-ngá, Gô-pia̍t-í-tong, Iâ-lī, A-sat-se-ngá, chòe-thâu tôaⁿ-khîm, tiāu ēng tē-poeh.

22利未人ê頭人Ki-ná-nî-ngá是管理唱歌；koh教人唱歌，因為伊精通chit-ê。Lī-bī lâng ê thâu-lâng Ki-ná-nî-ngá sī koán-lí chhiùⁿ-koa; koh kà lâng chhiùⁿ-koa, in-ūi i cheng-thong chit-ê.

23Pí-lī-ka、Í-lī-ka-ná，是約櫃前顧門ê。Pí-lī-ka, Í-lī-ka-ná, sī iok-kūi chêng kò͘-mn̂g--ê.

24祭司Si-pa-nî、Iok-sa-hoat、那但業、A-má-sài、Sat-ka-lī-ngá、Pí-ná-a、I-lī-í-siā，tī上帝ê約櫃前pûn號頭；Gô-pia̍t-í-tong kap Iâ-hi-a也是約櫃前顧門ê。Chè-si Si-pa-nî, Iok-sa-hoat, Ná-tàn-gia̍p, A-má-sài, Sat-ka-lī-ngá, Pí-ná-a, I-lī-í-siā, tī Siōng-tè ê iok-kūi chêng pûn hō-thâu; Gô-pia̍t-í-tong kap Iâ-hi-a iā sī iok-kūi chêng kò͘-mn̂g--ê.

25Tùi án-ni，大衛kap以色列ê長老kap千總，lóng去Gô-pia̍t-í-tong ê家，歡喜扛耶和華ê約櫃tùi hia上來。Tùi án-ni Tāi-pi̍t kap Í-sek-lia̍t ê tiúⁿ-ló kap chhian-chóng, lóng khì Gô-pia̍t-í-tong ê ke, hoaⁿ-hí kng Iâ-hô-hoa ê iok-kūi tùi hia chiūⁿ-lâi.

26上帝幫贊扛耶和華約櫃ê利未人，in就獻公ê牛七隻，公ê羊七隻。Siōng-tè pang-chān kng Iâ-hô-hoa iok-kūi ê Lī-bī lâng, in chiū hiàn kang ê gû chhit-chiah, kang ê iûⁿ chhit-chiah.

27大衛穿幼苧布ê長衫；扛約櫃ê利未人，kap唱歌ê，以及管理唱歌ê Ki-ná-nî-ngá，連唱歌ê人lóng是án-ni；大衛koh穿幼苧布ê í-hut-tek。Tāi-pi̍t chhēng iù-tōe-pò͘ ê tn̂g-saⁿ; kng iok-kūi ê Lī-bī lâng, kap chhiùⁿ-koa ê, í-ki̍p koán-lí chhiùⁿ-koa ê Ki-ná-nî-ngá, liân chhiùⁿ-koa ê lâng lóng sī án-ni; Tāi-pi̍t koh chhēng iù-tōe-pò͘ ê í-hut-tek.

28Án-ni以色列眾人出大聲，pûn哨角，pûn號頭，phah鐃鈸，彈琴kap瑟，扛耶和華ê約櫃上來。Án-ni Í-sek-lia̍t chèng-lâng chhut tōa-siaⁿ, pûn sàu-kak, pûn hō-thâu, phah nâ-poa̍h, tôaⁿ-khîm kap sek, kng Iâ-hô-hoa ê iok-kūi chiūⁿ--lâi.

29耶和華ê約櫃到大衛城ê時，掃羅ê cha-bó͘-kiáⁿ Bí-kah tùi窗á內teh看，看見大衛王tiô跳跳舞；心內就看輕伊。Iâ-hô-hoa ê iok-kūi kàu Tāi-pi̍t siâⁿ ê sî, Sò-lô ê cha-bó͘-kiáⁿ Bí-kah tùi thang-á-lāi teh-khòaⁿ, khòaⁿ-kìⁿ Tāi-pi̍t ông tiô-thiàu thiàu-bú; sim-lāi chiū khòaⁿ-khin i.

1In扛上帝ê約櫃，hē tī大衛所kā伊tah ê布棚內；也獻燒祭kap平安祭tī上帝ê面前。In kng Siōng-tè ê iok-kūi, hē tī Tāi-pi̍t só͘ kā i tah ê pò͘-pîⁿ-lāi; iā hiàn sio-chè kap pêng-an-chè tī Siōng-tè ê bīn-chêng.

2大衛獻燒祭kap平安祭明白，就用耶和華ê名kā百姓祝福。Tāi-pi̍t hiàn sio-chè kap pêng-an-chè bêng-pe̍k, chiū ēng Iâ-hô-hoa ê miâ kā peh-sìⁿ chiok-hok.

3Koh分hō͘以色列ê眾人，無論男女，ta̍k人hō͘ in一個餅，一塊肉，一個葡萄餅。Koh pun hō͘ Í-sek-lia̍t ê chèng-lâng, bô-lūn lâm-lú, ta̍k-lâng hō͘ in chi̍t ê piáⁿ, chi̍t tè bah, chi̍t ê phû-tô-piáⁿ.

4大衛派kúi-nā ê利未人tī耶和華ê約櫃前服事，來記念稱謝o-ló耶和華以色列ê上帝。Tāi-pi̍t phài kúi-nā ê Lī-bī lâng tī Iâ-hô-hoa ê iok-kūi chêng ho̍k-sāi, lâi kì-liām chheng-siā o-ló Iâ-hô-hoa Í-sek-lia̍t ê Siōng-tè.

5做頭ê是A-sat，第二個是Sat-ka-lī-ngá，koh有Ngá-siat、Sī-bí-la̍h-boa̍t、Iâ-iat、Má-tha-thê-ngá、Í-lī-ap、Pí-ná-ngá、Gô-pia̍t-í-tong、Iâ-lī，彈瑟彈琴；只有A-sat phah大聲ê鐃鈸。Chòe-thâu-ê sī A-sat, tē-jī-ê sī Sat-ka-lī-ngá, koh ū Ngá-siat, Sī-bí-la̍h-boa̍t, Iâ-iat, Má-tha-thê-ngá, Í-lī-ap, Pí-ná-ngá, Gô-pia̍t-í-tong, Iâ-lī, tôaⁿ-sek tôaⁿ-khîm; chí-ū A-sat phah tōa-siaⁿ ê nâ-poa̍h.

6祭司Pí-ná-ngá kap Ngá-khap-sek常常tī上帝ê約櫃前pûn號頭。Chè-si Pí-ná-ngá kap Ngá-khap-sek siông-siông tī Siōng-tè ê iok-kūi chêng pûn hō-thâu.

7Hit日大衛起頭定tio̍h用A-sat kap伊ê兄弟感謝耶和華。Hit-ji̍t Tāi-pi̍t khí-thâu tiāⁿ-tio̍h ēng A-sat kap i ê hiaⁿ-tī kám-siā Iâ-hô-hoa.

8Lín tio̍h感謝耶和華，求叫伊ê名；Tī萬百姓ê中間報揚伊ê所做。Lín tio̍h kám-siā Iâ-hô-hoa, kiû-kiò I ê miâ; Tī bān peh-sìⁿ ê tiong-kan pò-iông I ê só͘-chòe.

9Tio̍h ǹg伊吟詩，ǹg伊唱歌o-ló，談論伊一切奇妙ê所行。Tio̍h ǹg I gîm-si, ǹg I chhiùⁿ-koa o-ló, Tâm-lūn I it-chhè kî-biāu ê só͘-kiâⁿ.

10Tio̍h因為伊聖名來誇口；chhē耶和華ê人，心內tio̍h歡喜。Tio̍h in-ūi I sèng-miâ lâi khoa-kháu; Chhē Iâ-hô-hoa ê lâng, sim-lāi tio̍h hoaⁿ-hí.

11Tio̍h chhē耶和華kap伊ê權能；常常chhē見伊ê面。Tio̍h chhē Iâ-hô-hoa kap I ê koân-lêng; Siông-siông chhē kìⁿ I ê bīn.

12伊ê奴僕以色列ê後裔，伊所揀雅各ê kiáⁿ孫ah，Lín tio̍h siàu念伊所做奇妙ê事，kap伊ê神跡，kap伊ê嘴判斷ê話。伊ê奴僕以色列ê後裔，伊所揀雅各ê kiáⁿ孫ah，Lín tio̍h siàu念伊所做奇妙ê事，kap伊ê神跡，kap伊ê嘴判斷ê話。

13I ê lô͘-po̍k Í-sek-lia̍t ê hō͘-è, I só͘ kéng Ngá-kok ê kiáⁿ-sun ah, Lín tio̍h siàu-liām I só͘ chòe kî-biāu ê sū, Kap I ê sîn-jiah, kap I ê chhùi phòaⁿ-toàn ê ōe.I ê lô͘-po̍k Í-sek-lia̍t ê hō͘-è, I só͘ kéng Ngá-kok ê kiáⁿ-sun ah, Lín tio̍h siàu-liām I só͘ chòe kî-biāu ê sū, Kap I ê sîn-jiah, kap I ê chhùi phòaⁿ-toàn ê ōe.

14伊是耶和華，咱ê上帝，全地lóng有伊ê判斷。I sī Iâ-hô-hoa, lán ê Siōng-tè, Choân-tōe lóng ū I ê phòaⁿ-toàn.

15Tio̍h記念伊ê約直到永遠，伊所吩咐ê話直到萬代；Tio̍h kì-liām I ê iok ti̍t-kàu éng-oán, I só͘ hoan-hù ê ōe ti̍t-kàu bān-tāi;

16就是kap亞伯拉罕所立ê約，對以撒所chiù ê chōa；Chiū-sī kap A-pek-la̍h-hán só͘ li̍p ê iok, Tùi Í-sat só͘ chiù ê chōa;

17伊koh將chit-ê約對雅各定tio̍h做律例，對以色列定tio̍h做永遠ê約，I koh chiong chit ê iok tùi Ngá-kok tiāⁿ-tio̍h chòe lu̍t-lē, Tùi Í-sek-lia̍t tiāⁿ-tio̍h chòe éng-oán ê iok,

18講，我beh將迦南地賞賜你，做lín產業ê份額。Kóng, Góa beh chiong Ka-lâm tōe siúⁿ-sù lí, Chòe lín sán-gia̍p ê hūn-gia̍h.

19當時lín ê人丁有限；數額少少，koh tī-hia做出外；Tng-sî lín ê jîn-teng iú-hān; Siàu-gia̍h chió-chió, koh tī-hia chòe chhut-gōa;

20In tùi chit族行到hit族，tùi chit國到別ê百姓。In tùi chit-cho̍k kiâⁿ kàu hit-cho̍k, Tùi chit-kok kàu pa̍t ê peh-sìⁿ.

21伊無容允甚麼人欺負in；為tioh8in ê緣故譴責君王；I bô iông-ún sím-mi̍h lâng khi-hū in; Ūi-tio̍h in ê iân-kò͘ khiàn-chek kun-ông;

22講，M̄-thang摸tio̍h我受抹油ê，也m̄-thang pháiⁿ款待我ê先知。Kóng, M̄-thang bong-tio̍h Góa siū-boah-iû-ê, Iā m̄-thang pháiⁿ khoán-thāi Góa ê sian-ti.

23全地lóng tio̍h ǹg耶和華唱歌，日日傳報伊ê救恩。Choân-tōe lóng tio̍h ǹg Iâ-hô-hoa chhiùⁿ-koa, Ji̍t-ji̍t thoân-pò I ê kiù-un.

24Tī列邦ê中間講起伊ê榮光，tī萬百姓ê中間講起伊奇妙ê所做。Tī lia̍t-pang ê tiong-kan kóng-khí I ê êng-kng, Tī bān peh-sìⁿ ê tiong-kan kóng-khí I kî-biāu ê só͘-chòe.

25因為耶和華做大，應該受極大ê o-ló；伊tī眾上帝ê頂面應該受敬畏。In-ūi Iâ-hô-hoa chòe tōa, eng-kai siū ke̍k-tōa ê o-ló; I tī chèng siōng-tè ê téng-bīn eng-kai siū kèng-ùi.

26因為列邦ê上帝 lóng是虛假，獨獨耶和華創造chiah-ê天。In-ūi lia̍t-pang ê siōng-tè lóng sī hu-ké, To̍k-to̍k Iâ-hô-hoa chhòng-chō chiah ê thiⁿ.

27Tī伊ê面前有尊貴kap威嚴；tī伊ê所在有權能kap歡喜。Tī I ê bīn-chêng ū chun-kùi kap ui-giâm; Tī I ê só͘-chāi ū koân-lêng kap hoaⁿ-hí.

28百姓中ê ta̍k族ah，lín tio̍h將權能榮光，歸hō͘耶和華，歸hō͘耶和華。Peh-sìⁿ-tiong ê ta̍k-cho̍k ah, lín tio̍h chiong koân-lêng êng-kng, Kui hō͘ Iâ-hô-hoa, kui hō͘ Iâ-hô-hoa.

29用伊ê名所應該得tio̍h ê榮光歸hō͘耶和華；帶禮物來到伊ê面前；tio̍h用聖潔ê裝飾敬拜耶和華。Ēng I ê miâⁿ só͘ eng-kai tit-tio̍h ê êng-kng kui hō͘ Iâ-hô-hoa; Tòa lé-mi̍h lâi kàu I ê bīn-chêng; Tio̍h ēng sèng-kiat ê chng-thāⁿ kèng-pài Iâ-hô-hoa.

30全地tī伊ê面前ngia̍uh-ngia̍uh-chhoah；世界堅固bōe搖動。Choân-tōe tī I ê bīn-chêng ngia̍uh-ngia̍uh-chhoah; Sè-kài kian-kò͘ bōe iô-tāng.

31願天歡喜，地快樂；tī列邦中tio̍h講，耶和華做王。Goān thiⁿ hoaⁿ-hí, tōe khoài-lo̍k; Tī lia̍t-pang-tiong tio̍h kóng, Iâ-hô-hoa chòe-ông.

32願海kap其中所充滿ê lóng出大聲；願田園kap其中所有ê lóng快樂；Goān hái kap kî-tiong só͘ chhiong-móa--ê lóng chhut tōa-siaⁿ; Goān chhân-hn̂g kap kî-tiong só͘-ū-ê lóng khoài-lo̍k;

33Hit時樹林內ê樹木beh tī耶和華ê面前出歡喜ê聲，因為伊來beh審判全地。Hit-sî chhiū-nâ-lāi ê chhiū-ba̍k beh tī Iâ-hô-hoa ê bīn-chêng chhut hoaⁿ-hí ê siaⁿ, In-ūi I lâi beh sím-phòaⁿ choân-tōe.

34Lín tio̍h感謝耶和華；因為伊是好；伊ê慈愛永遠tī-teh。Lín tio̍h kám-siā Iâ-hô-hoa; in-ūi I sī hó; I ê chû-ài éng-oán tī-teh.

35Tio̍h講，拯救阮ê上帝，求你救阮，聚集阮，救阮脫離列邦人，thang hō͘阮祝謝你ê聖名，掠你ê受o-ló做大悅。Tio̍h kóng, Chín-kiù goán ê Siōng-tè, kiû Lí kiù goán, Chū-chi̍p goán, kiù goán thoat-lī lia̍t-pang lâng, Thang hō͘ goán chiok-siā Lí ê sèng-miâ, Lia̍h Lí ê siū o-ló chòe tāi-ia̍t.

36Tio̍h o-ló耶和華，以色列ê上帝；tùi永遠到永遠。 眾百姓lóng講，A-bēng，koh o-ló耶和華。Tio̍h o-ló Iâ-hô-hoa, Í-sek-lia̍t ê Siōng-tè; Tùi éng-oán kàu éng-oán. Chèng peh-sìⁿ lóng kóng, A-bēng, koh o-ló Iâ-hô-hoa.

37大衛留A-sat kap伊ê兄弟tī耶和華ê約櫃前，常常服事tī約櫃前，照ta̍k日ê工所tio̍h做ê。Tāi-pi̍t lâu A-sat kap i ê hiaⁿ-tī tī Iâ-hô-hoa ê iok-kūi chêng, siông-siông ho̍k-sāi tī iok-kūi chêng, chiàu ta̍k-ji̍t ê kang só͘ tio̍h chòe--ê.

38Koh留Gô-pia̍t-í-tong kap in ê兄弟六十八人，以及Iâ-tō͘-tùn ê kiáⁿ Gô-pia̍t-í-tong kap Hô-sat做顧門ê。Koh lâu Gô-pia̍t-í-tong kap in ê hiaⁿ-tī la̍k-cha̍p-poeh lâng, í-ki̍p Iâ-tō͘-tùn ê kiáⁿ Gô-pia̍t-í-tong kap Hô-sat chòe kò͘-mn̂g--ê.

39也留祭司Sat-tok kap伊ê兄弟眾祭司，tī Ki-piàn高ê所在，耶和華ê會幕前；Iā lâu chè-si Sat-tok kap i ê hiaⁿ-tī chèng chè-si, tī Ki-piàn koâiⁿ ê só͘-chāi, Iâ-hô-hoa ê hōe-bō͘ chêng;

40thang tī燒祭ê壇頂，ta̍k日早暗獻燒祭hō͘耶和華，照耶和華命令以色列人ê律法一切所記載ê。thang tī sio-chè ê tôaⁿ téng, ta̍k-ji̍t chá-àm hiàn sio-chè hō͘ Iâ-hô-hoa, chiàu Iâ-hô-hoa bēng-lēng Í-sek-lia̍t lâng ê lu̍t-hoat it-chhè só͘ kì-chài--ê.

41Kap in做陣ê，有Hi-bān、Iâ-tō͘-tùn，kap其餘受揀選記名ê，thang感謝耶和華，因為伊ê慈愛永遠tī-teh。Kap in chòe-tīn ê, ū Hi-bān, Iâ-tō͘-tùn, kap kî-û siū kéng-soán kì-miâ--ê, thang kám-siā Iâ-hô-hoa, in-ūi I ê chû-ài éng-oán tī-teh.

42Kap in做陣ê有Hi-bān、Iâ-tō͘-tùn，是用號頭kap鐃鈸，以及上帝ê樂器，來hō͘ hiah-ê唱歌ê；Iâ-tō͘-tùn ê kiáⁿ孫是做顧門ê。Kap in chòe-tīn-ê ū Hi-bān, Iâ-tō͘-tùn, sī ēng hō-thâu kap nâ-poa̍h, í-ki̍p Siōng-tè ê ga̍k-khì, lâi hō͘ hiah ê chhiùⁿ-koa--ê; Iâ-tō͘-tùn ê kiáⁿ-sun sī chòe kò͘-mn̂g--ê.

43Tùi án-ni，眾百姓ta̍k人tò去in ê家；大衛也tò去，kā伊ê家祝福。Tùi án-ni chèng peh-sìⁿ ta̍k-lâng tò-khì in ê ke; Tāi-pi̍t iā tò-khì, kā i ê ke chiok-hok.

1大衛tiàm tī伊ê宮內；大衛對先知Ná-tan講，看ah，我tiàm tī柏香柴ê宮內，總是耶和華ê約櫃tī帳房內。Tāi-pi̍t tiàm tī i ê kiong-lāi; Tāi-pi̍t tùi sian-ti Ná-tan kóng, Khòaⁿ ah, góa tiàm tī pek-hiuⁿ-chhâ ê kiong-lāi, chóng-sī Iâ-hô-hoa ê iok-kūi tī tiùⁿ-pâng lāi.

2Ná-tan kā大衛講，見若tī你心內所想ê，thang行伊，因為上帝kap你tī-teh。Ná-tan kā Tāi-pi̍t kóng, Kìⁿ-nā tī lí sim-lāi só͘ siūⁿ--ê, thang kiâⁿ i, in-ūi Siōng-tè kap lí tī-teh.

3Hit暝上帝ê話臨到Ná-tan講，Hit-mî Siōng-tè ê ōe lîm-kàu Ná-tan kóng,

4你去kā我ê奴僕大衛講，耶和華án-ni講，你bōe得thang起厝hō͘我tiàm。Lí khì kā Góa ê lô͘-po̍k Tāi-pi̍t kóng, Iâ-hô-hoa án-ni kóng, Lí bōe-tit-thang khí chhù hō͘ Góa tiàm.

5因為tùi我chhōa以色列上來ê日到今á日，我bē-bat khiā起厝內，是tùi chit-ê布棚到hit-ê布棚，tùi chit-ê帳房到hit-ê帳房。In-ūi tùi Góa chhōa Í-sek-lia̍t chiūⁿ-lâi ê ji̍t kàu kin-á-ji̍t, Góa bē-bat khiā-khí chhù-lāi, sī tùi chit ê pò͘-pîⁿ kàu hit ê pò͘-pîⁿ, tùi chit ê tiùⁿ-pâng kàu hit ê tiùⁿ-pâng.

6見若我kap以色列人所到ê所在，tī我所吩咐照顧我ê百姓以色列ê士師中，我kiám bat對in一人講，你啥事無kā我起柏香柴ê厝ah？Kìⁿ-nā Góa kap Í-sek-lia̍t lâng só͘ kàu ê só͘-chāi, tī Góa só͘ hoan-hù chiàu-kò͘ Góa ê peh-sìⁿ Í-sek-lia̍t ê sū-su tiong, Góa kiám bat tùi in chi̍t-lâng kóng, Lí siáⁿ-sū bô kā Góa khí pek-hiuⁿ-chhâ ê chhù ah?

7Taⁿ你tio̍h去kā我ê奴僕大衛講，萬軍ê耶和華án-ni講，我bat tī羊寮，對你teh顧羊來召你，做我ê百姓以色列ê人君。Taⁿ lí tio̍h khì kā Góa ê lô͘-po̍k Tāi-pi̍t kóng, Bān-kun ê Iâ-hô-hoa án-ni kóng, Góa bat tī iûⁿ-tiâu, tùi lí teh kò͘-iûⁿ lâi tiàu lí, chòe Góa ê peh-sìⁿ Í-sek-lia̍t ê jîn-kun.

8見若你所bat去ê所在，我常常kap你tī-teh，tī你ê面前剿滅你lóng總ê對敵；我beh hō͘你大出名，親像地上chiah-ê偉人ê名聲。Kìⁿ-nā lí só͘ bat khì ê só͘-chāi, Góa siông-siông kap lí tī-teh, tī lí ê bīn-chêng châu-bia̍t lí lóng-chóng ê tùi-te̍k; Góa beh hō͘ lí tōa chhut-miâ, chhin-chhiūⁿ tōe-chiūⁿ chiah ê úi-jîn ê miâ-siaⁿ.

9Koh我beh kā我ê百姓以色列定tio̍h一個所在，來栽培in，hō͘ in khiā起家己ê所在，無koh遷徙；兇惡ê人也無親像起頭陷害in；Koh Góa beh kā Góa ê peh-sìⁿ Í-sek-lia̍t tiāⁿ-tio̍h chi̍t ê só͘-chāi, lâi chai-pôe in, hō͘ in khiā-khí ka-kī ê só͘-chāi, bô koh chhian-sóa; hiong-ok ê lâng iā bô chhin-chhiūⁿ khí-thâu hām-hāi in;

10亦無親像我命令士師治理我ê百姓以色列ê時一樣；我beh hō͘你ê對敵lóng降服。Koh我kā你講，耶和華beh kā你建立一個家。ia̍h bô chhin-chhiūⁿ Góa bēng-lēng sū-su tī-lí Góa ê peh-sìⁿ Í-sek-lia̍t ê sî chi̍t-iūⁿ; Góa beh hō͘ lí ê tùi-te̍k lóng hâng-ho̍k. Koh góa kā lí kóng, Iâ-hô-hoa beh kā lí kiàn-li̍p chi̍t ê ke.

11到你ê日子滿足，tò去你ê列祖hia，我beh hō͘你ê後裔續接你ê位；我也beh堅固伊ê國位。Kàu lí ê ji̍t-chí móa-chiok, tò-khì lí ê lia̍t-chó͘ hia, Góa beh hō͘ lí ê hō͘-è sòa-chiap lí ê ūi; Góa iā beh kian-kò͘ i ê kok-ūi.

12伊beh kā我起厝；我beh堅固伊ê座位到永遠。I beh kā Góa khí chhù; Góa beh kian-kò͘ i ê chō-ūi kàu éng-oán.

13我beh做伊ê父，伊beh做我ê kiáⁿ；我無beh hō͘我ê慈愛離開伊，親像我前hō͘伊離開hit-ê你以上ê王。Góa beh chòe i ê Pē, i beh chòe Góa ê kiáⁿ; Góa bô beh hō͘ Góa ê chû-ài lī-khui i, chhin-chhiūⁿ Góa chêng hō͘ i lī-khui hit ê lí í-chiūⁿ ê ông.

14我也beh永遠堅固伊tī我ê家，tī我ê國；伊ê座位也beh堅固到永遠。Góa iā beh éng-oán kian-kò͘ i tī Góa ê ke, tī Góa ê kok; i ê chō-ūi iā beh kian-kò͘ kàu éng-oán.

15Ná-tan就照chiah-ê話，chiah-ê默示，去kā大衛講。Ná-tan chiū chiàu chiah ê ōe, chiah ê be̍k-sī, khì kā Tāi-pi̍t kóng.

16大衛王就入去，坐tī耶和華ê面前，講，耶和華上帝ah，我是甚麼人，我是甚麼號ê家，你chiah chhōa我到chit-ê地步ah？Tāi-pi̍t ông chiū ji̍p-khì, chē tī Iâ-hô-hoa ê bīn-chêng, kóng, Iâ-hô-hoa Siōng-tè ah, góa sī sím-mi̍h lâng, góa sī sím-mi̍h hō ê ke, Lí chiah chhōa góa kàu chit ê tē-pō͘ ah?

17上帝ah，你看chit-ê，iáu掠做小khóa，因為你koh論到你ê奴僕ê家到tī久長；耶和華上帝ah，你款待我親像尊貴ê人ê地位。Siōng-tè ah, Lí khòaⁿ chit-ê, iáu lia̍h-chòe sió-khóa, in-ūi Lí koh lūn-kàu Lí ê lô͘-po̍k ê ke kàu tī kú-tn̂g; Iâ-hô-hoa Siōng-tè ah, Lí khoán-thāi góa chhin-chhiūⁿ chun-kùi ê lâng ê tē-ūi.

18大衛iáu有甚麼話thang對你講到你ê奴僕所得tio̍h ê尊貴？因為你知你ê奴僕。Tāi-pi̍t iáu ū sím-mi̍h ōe thang tùi Lí kóng kàu Lí ê lô͘-po̍k só͘ tit-tio̍h ê chun-kùi? in-ūi Lí chai Lí ê lô͘-po̍k.

19耶和華ah，因為你ê奴僕ê緣故，koh照你ê心意，你有行chit-ê大事，koh顯出chiah-ê大事。Iâ-hô-hoa ah, in-ūi Lí ê lô͘-po̍k ê iân-kò͘, koh chiàu Lí ê sim-ì, Lí ū kiâⁿ chit ê tōa-sū, koh hián-chhut chiah ê tōa-sū.

20耶和華ah，照阮ê耳孔所聽見ê，無一個親像你，你以外無別ê上帝。Iâ-hô-hoa ah, chiàu goán ê hī-khang só͘ thiaⁿ-kìⁿ--ê, bô chi̍t-ê chhin-chhiūⁿ Lí, Lí í-gōa bô pa̍t ê Siōng-tè.

21地上有toh落一國親像你ê百姓以色列，就是上帝早日去救贖伊做家己ê百姓，hō͘你tùi極大koh thang驚ê事得tio̍h名，因為趕逐列國離開你ê百姓，就是你所救贖出埃及ê，ê面前。Tōe-chiūⁿ ū toh-lo̍h chi̍t-kok chhin-chhiūⁿ Lí ê peh-sìⁿ Í-sek-lia̍t, chiū-sī Siōng-tè chá-ji̍t khì kiù-sio̍k i chòe ka-kī ê peh-sìⁿ, hō͘ Lí tùi ke̍k-tōa koh thang kiaⁿ ê sū tit-tio̍h miâ, in-ūi kóaⁿ-tio̍k lia̍t-kok lī-khui Lí ê peh-sìⁿ, chiū-sī Lí só͘ kiù-sio̍k chhut Ai-ki̍p--ê, ê bīn-chêng.

22因為你hō͘你ê百姓以色列做你ê百姓，直到永遠；耶和華ah，你也做in ê上帝。In-ūi Lí hō͘ Lí ê peh-sìⁿ Í-sek-lia̍t chòe Lí ê peh-sìⁿ, ti̍t-kàu éng-oán; Iâ-hô-hoa ah, Lí iā chòe in ê Siōng-tè.

23耶和華ah，taⁿ你所論到你ê奴僕kap伊ê家ê話，願伊堅固到永遠；求你照你所講來行。Iâ-hô-hoa ah, taⁿ Lí só͘ lūn-kàu Lí ê lô͘-po̍k kap i ê ke ê ōe, goān i kian-kò͘ kàu éng-oán; kiû Lí chiàu Lí só͘ kóng lâi kiâⁿ.

24願你ê名永遠堅固，受尊做大，講，萬軍ê耶和華是以色列ê上帝，是做以色列ê上帝；你ê奴僕大衛ê家beh tī你ê面前堅固。Goān Lí ê miâ éng-oán kian-kò͘, siū chun chòe-tōa, kóng, Bān-kun ê Iâ-hô-hoa sī Í-sek-lia̍t ê Siōng-tè, sī chòe Í-sek-lia̍t ê Siōng-tè; Lí ê lô͘-po̍k Tāi-pi̍t ê ke beh tī Lí ê bīn-chêng kian-kò͘.

25我ê上帝ah，因為你有啟示你ê奴僕知，你beh kā伊建立一個家，所以你ê奴僕好膽tī你ê面前祈禱。Góa ê Siōng-tè ah, in-ūi Lí ū khé-sī Lí ê lô͘-po̍k chai, Lí beh kā i kiàn-li̍p chi̍t ê ke, só͘-í Lí ê lô͘-po̍k hó-táⁿ tī Lí ê bīn-chêng kî-tó.

26耶和華ah，只有你是上帝；你用chit-ê福氣應允你ê奴僕。Iâ-hô-hoa ah, chí-ū Lí sī Siōng-tè; Lí ēng chit ê hok-khì èng-ún Lí ê lô͘-po̍k.

27Taⁿ你歡喜賜福你ê奴僕ê家，hō͘伊永遠tī你ê面前。耶和華ah，因為你已經賜福，的確永遠得tio̍h福氣。Taⁿ Lí hoaⁿ-hí sù-hok Lí ê lô͘-po̍k ê ke, hō͘ i éng-oán tī Lí ê bīn-chêng. Iâ-hô-hoa ah, in-ūi Lí í-keng sù-hok, tek-khak éng-oán tit-tio̍h hok-khì.