1大衛tiàm tī伊ê宮內；大衛對先知Ná-tan講，看ah，我tiàm tī柏香柴ê宮內，總是耶和華ê約櫃tī帳房內。Tāi-pi̍t tiàm tī i ê kiong-lāi; Tāi-pi̍t tùi sian-ti Ná-tan kóng, Khòaⁿ ah, góa tiàm tī pek-hiuⁿ-chhâ ê kiong-lāi, chóng-sī Iâ-hô-hoa ê iok-kūi tī tiùⁿ-pâng lāi.

2Ná-tan kā大衛講，見若tī你心內所想ê，thang行伊，因為上帝kap你tī-teh。Ná-tan kā Tāi-pi̍t kóng, Kìⁿ-nā tī lí sim-lāi só͘ siūⁿ--ê, thang kiâⁿ i, in-ūi Siōng-tè kap lí tī-teh.

3Hit暝上帝ê話臨到Ná-tan講，Hit-mî Siōng-tè ê ōe lîm-kàu Ná-tan kóng,

4你去kā我ê奴僕大衛講，耶和華án-ni講，你bōe得thang起厝hō͘我tiàm。Lí khì kā Góa ê lô͘-po̍k Tāi-pi̍t kóng, Iâ-hô-hoa án-ni kóng, Lí bōe-tit-thang khí chhù hō͘ Góa tiàm.

5因為tùi我chhōa以色列上來ê日到今á日，我bē-bat khiā起厝內，是tùi chit-ê布棚到hit-ê布棚，tùi chit-ê帳房到hit-ê帳房。In-ūi tùi Góa chhōa Í-sek-lia̍t chiūⁿ-lâi ê ji̍t kàu kin-á-ji̍t, Góa bē-bat khiā-khí chhù-lāi, sī tùi chit ê pò͘-pîⁿ kàu hit ê pò͘-pîⁿ, tùi chit ê tiùⁿ-pâng kàu hit ê tiùⁿ-pâng.

6見若我kap以色列人所到ê所在，tī我所吩咐照顧我ê百姓以色列ê士師中，我kiám bat對in一人講，你啥事無kā我起柏香柴ê厝ah？Kìⁿ-nā Góa kap Í-sek-lia̍t lâng só͘ kàu ê só͘-chāi, tī Góa só͘ hoan-hù chiàu-kò͘ Góa ê peh-sìⁿ Í-sek-lia̍t ê sū-su tiong, Góa kiám bat tùi in chi̍t-lâng kóng, Lí siáⁿ-sū bô kā Góa khí pek-hiuⁿ-chhâ ê chhù ah?

7Taⁿ你tio̍h去kā我ê奴僕大衛講，萬軍ê耶和華án-ni講，我bat tī羊寮，對你teh顧羊來召你，做我ê百姓以色列ê人君。Taⁿ lí tio̍h khì kā Góa ê lô͘-po̍k Tāi-pi̍t kóng, Bān-kun ê Iâ-hô-hoa án-ni kóng, Góa bat tī iûⁿ-tiâu, tùi lí teh kò͘-iûⁿ lâi tiàu lí, chòe Góa ê peh-sìⁿ Í-sek-lia̍t ê jîn-kun.

8見若你所bat去ê所在，我常常kap你tī-teh，tī你ê面前剿滅你lóng總ê對敵；我beh hō͘你大出名，親像地上chiah-ê偉人ê名聲。Kìⁿ-nā lí só͘ bat khì ê só͘-chāi, Góa siông-siông kap lí tī-teh, tī lí ê bīn-chêng châu-bia̍t lí lóng-chóng ê tùi-te̍k; Góa beh hō͘ lí tōa chhut-miâ, chhin-chhiūⁿ tōe-chiūⁿ chiah ê úi-jîn ê miâ-siaⁿ.

9Koh我beh kā我ê百姓以色列定tio̍h一個所在，來栽培in，hō͘ in khiā起家己ê所在，無koh遷徙；兇惡ê人也無親像起頭陷害in；Koh Góa beh kā Góa ê peh-sìⁿ Í-sek-lia̍t tiāⁿ-tio̍h chi̍t ê só͘-chāi, lâi chai-pôe in, hō͘ in khiā-khí ka-kī ê só͘-chāi, bô koh chhian-sóa; hiong-ok ê lâng iā bô chhin-chhiūⁿ khí-thâu hām-hāi in;

10亦無親像我命令士師治理我ê百姓以色列ê時一樣；我beh hō͘你ê對敵lóng降服。Koh我kā你講，耶和華beh kā你建立一個家。ia̍h bô chhin-chhiūⁿ Góa bēng-lēng sū-su tī-lí Góa ê peh-sìⁿ Í-sek-lia̍t ê sî chi̍t-iūⁿ; Góa beh hō͘ lí ê tùi-te̍k lóng hâng-ho̍k. Koh góa kā lí kóng, Iâ-hô-hoa beh kā lí kiàn-li̍p chi̍t ê ke.

11到你ê日子滿足，tò去你ê列祖hia，我beh hō͘你ê後裔續接你ê位；我也beh堅固伊ê國位。Kàu lí ê ji̍t-chí móa-chiok, tò-khì lí ê lia̍t-chó͘ hia, Góa beh hō͘ lí ê hō͘-è sòa-chiap lí ê ūi; Góa iā beh kian-kò͘ i ê kok-ūi.

12伊beh kā我起厝；我beh堅固伊ê座位到永遠。I beh kā Góa khí chhù; Góa beh kian-kò͘ i ê chō-ūi kàu éng-oán.

13我beh做伊ê父，伊beh做我ê kiáⁿ；我無beh hō͘我ê慈愛離開伊，親像我前hō͘伊離開hit-ê你以上ê王。Góa beh chòe i ê Pē, i beh chòe Góa ê kiáⁿ; Góa bô beh hō͘ Góa ê chû-ài lī-khui i, chhin-chhiūⁿ Góa chêng hō͘ i lī-khui hit ê lí í-chiūⁿ ê ông.

14我也beh永遠堅固伊tī我ê家，tī我ê國；伊ê座位也beh堅固到永遠。Góa iā beh éng-oán kian-kò͘ i tī Góa ê ke, tī Góa ê kok; i ê chō-ūi iā beh kian-kò͘ kàu éng-oán.

15Ná-tan就照chiah-ê話，chiah-ê默示，去kā大衛講。Ná-tan chiū chiàu chiah ê ōe, chiah ê be̍k-sī, khì kā Tāi-pi̍t kóng.

16大衛王就入去，坐tī耶和華ê面前，講，耶和華上帝ah，我是甚麼人，我是甚麼號ê家，你chiah chhōa我到chit-ê地步ah？Tāi-pi̍t ông chiū ji̍p-khì, chē tī Iâ-hô-hoa ê bīn-chêng, kóng, Iâ-hô-hoa Siōng-tè ah, góa sī sím-mi̍h lâng, góa sī sím-mi̍h hō ê ke, Lí chiah chhōa góa kàu chit ê tē-pō͘ ah?

17上帝ah，你看chit-ê，iáu掠做小khóa，因為你koh論到你ê奴僕ê家到tī久長；耶和華上帝ah，你款待我親像尊貴ê人ê地位。Siōng-tè ah, Lí khòaⁿ chit-ê, iáu lia̍h-chòe sió-khóa, in-ūi Lí koh lūn-kàu Lí ê lô͘-po̍k ê ke kàu tī kú-tn̂g; Iâ-hô-hoa Siōng-tè ah, Lí khoán-thāi góa chhin-chhiūⁿ chun-kùi ê lâng ê tē-ūi.

18大衛iáu有甚麼話thang對你講到你ê奴僕所得tio̍h ê尊貴？因為你知你ê奴僕。Tāi-pi̍t iáu ū sím-mi̍h ōe thang tùi Lí kóng kàu Lí ê lô͘-po̍k só͘ tit-tio̍h ê chun-kùi? in-ūi Lí chai Lí ê lô͘-po̍k.

19耶和華ah，因為你ê奴僕ê緣故，koh照你ê心意，你有行chit-ê大事，koh顯出chiah-ê大事。Iâ-hô-hoa ah, in-ūi Lí ê lô͘-po̍k ê iân-kò͘, koh chiàu Lí ê sim-ì, Lí ū kiâⁿ chit ê tōa-sū, koh hián-chhut chiah ê tōa-sū.

20耶和華ah，照阮ê耳孔所聽見ê，無一個親像你，你以外無別ê上帝。Iâ-hô-hoa ah, chiàu goán ê hī-khang só͘ thiaⁿ-kìⁿ--ê, bô chi̍t-ê chhin-chhiūⁿ Lí, Lí í-gōa bô pa̍t ê Siōng-tè.

21地上有toh落一國親像你ê百姓以色列，就是上帝早日去救贖伊做家己ê百姓，hō͘你tùi極大koh thang驚ê事得tio̍h名，因為趕逐列國離開你ê百姓，就是你所救贖出埃及ê，ê面前。Tōe-chiūⁿ ū toh-lo̍h chi̍t-kok chhin-chhiūⁿ Lí ê peh-sìⁿ Í-sek-lia̍t, chiū-sī Siōng-tè chá-ji̍t khì kiù-sio̍k i chòe ka-kī ê peh-sìⁿ, hō͘ Lí tùi ke̍k-tōa koh thang kiaⁿ ê sū tit-tio̍h miâ, in-ūi kóaⁿ-tio̍k lia̍t-kok lī-khui Lí ê peh-sìⁿ, chiū-sī Lí só͘ kiù-sio̍k chhut Ai-ki̍p--ê, ê bīn-chêng.

22因為你hō͘你ê百姓以色列做你ê百姓，直到永遠；耶和華ah，你也做in ê上帝。In-ūi Lí hō͘ Lí ê peh-sìⁿ Í-sek-lia̍t chòe Lí ê peh-sìⁿ, ti̍t-kàu éng-oán; Iâ-hô-hoa ah, Lí iā chòe in ê Siōng-tè.

23耶和華ah，taⁿ你所論到你ê奴僕kap伊ê家ê話，願伊堅固到永遠；求你照你所講來行。Iâ-hô-hoa ah, taⁿ Lí só͘ lūn-kàu Lí ê lô͘-po̍k kap i ê ke ê ōe, goān i kian-kò͘ kàu éng-oán; kiû Lí chiàu Lí só͘ kóng lâi kiâⁿ.

24願你ê名永遠堅固，受尊做大，講，萬軍ê耶和華是以色列ê上帝，是做以色列ê上帝；你ê奴僕大衛ê家beh tī你ê面前堅固。Goān Lí ê miâ éng-oán kian-kò͘, siū chun chòe-tōa, kóng, Bān-kun ê Iâ-hô-hoa sī Í-sek-lia̍t ê Siōng-tè, sī chòe Í-sek-lia̍t ê Siōng-tè; Lí ê lô͘-po̍k Tāi-pi̍t ê ke beh tī Lí ê bīn-chêng kian-kò͘.

25我ê上帝ah，因為你有啟示你ê奴僕知，你beh kā伊建立一個家，所以你ê奴僕好膽tī你ê面前祈禱。Góa ê Siōng-tè ah, in-ūi Lí ū khé-sī Lí ê lô͘-po̍k chai, Lí beh kā i kiàn-li̍p chi̍t ê ke, só͘-í Lí ê lô͘-po̍k hó-táⁿ tī Lí ê bīn-chêng kî-tó.

26耶和華ah，只有你是上帝；你用chit-ê福氣應允你ê奴僕。Iâ-hô-hoa ah, chí-ū Lí sī Siōng-tè; Lí ēng chit ê hok-khì èng-ún Lí ê lô͘-po̍k.

27Taⁿ你歡喜賜福你ê奴僕ê家，hō͘伊永遠tī你ê面前。耶和華ah，因為你已經賜福，的確永遠得tio̍h福氣。Taⁿ Lí hoaⁿ-hí sù-hok Lí ê lô͘-po̍k ê ke, hō͘ i éng-oán tī Lí ê bīn-chêng. Iâ-hô-hoa ah, in-ūi Lí í-keng sù-hok, tek-khak éng-oán tit-tio̍h hok-khì.

1Chit-tia̍p了後，大衛phah腓利士人，hō͘ in降服；koh tùi腓利士人ê手取Ka-te̍k kap伊ê鄉里。Chit-tia̍p liáu-āu Tāi-pi̍t phah Hui-lī-sū lâng, hō͘ in hâng-ho̍k; koh tùi Hui-lī-sū lâng ê chhiú chhú Ka-te̍k kap i ê hiuⁿ-lí.

2Koh phah Mô͘-ap，Mô͘-ap人就服事大衛，來進貢伊。Koh phah Mô͘-ap, Mô͘-ap lâng chiū ho̍k-sāi Tāi-pi̍t, lâi chìn-kòng i.

3Só-pa王Hap-tāi-lī-siā去Pek-la̍h河，beh堅固伊ê國權，大衛就phah伊，直到Hap-má。Só-pa ông Hap-tāi-lī-siā khì Pek-la̍h hô, beh kian-kò͘ i ê kok-koân, Tāi-pi̍t chiū phah i, ti̍t-kàu Hap-má.

4大衛搶伊ê戰車一千張，馬兵七千，步兵兩萬；拖車ê馬，大衛就割伊大腿ê筋；其中只有留一百張車ê馬。Tāi-pi̍t chhiúⁿ i ê chiàn-chhia chi̍t-chheng tiuⁿ, bé-peng chhit-chheng, pō͘-peng nn̄g-bān; thoa-chhia ê bé, Tāi-pi̍t chiū koah i tōa-thúi ê kun; kî-tiong chí-ū lâu chi̍t-pah tiuⁿ chhia ê bé.

5大馬色ê A-lân人來幫贊Só-pa王Hap-tāi-lī-siā，大衛就thâi A-lân人，兩萬兩千人。Tāi-má-sek ê A-lân lâng lâi pang-chān Só-pa ông Hap-tāi-lī-siā, Tāi-pi̍t chiū thâi A-lân lâng, nn̄g-bān nn̄g-chheng lâng.

6Tùi án-ni，大衛tī大馬色ê A-lân地設立防守ê兵營；A-lân人就降服大衛來進貢伊。大衛無論toh落去，耶和華lóng hō͘伊得勝。Tùi án-ni Tāi-pi̍t tī Tāi-má-sek ê A-lân tōe siat-li̍p hông-siú ê peng-iâⁿ; A-lân lâng chiū hâng-ho̍k Tāi-pi̍t lâi chìn-kòng i. Tāi-pi̍t bô-lūn toh-lo̍h khì, Iâ-hô-hoa lóng hō͘ i tek-sèng.

7大衛搶Hap-tāi-lī-siā chiah-ê奴僕金ê屏牌，帶到耶路撒冷。Tāi-pi̍t chhiúⁿ Hap-tāi-lī-siā chiah ê lô͘-po̍k kim ê pîn-pâi, tòa-kàu Iâ-lō͘-sat-léng.

8大衛koh tùi Hap-tāi-lī-siā所管ê Thê-pa kap Kun兩個城，搶chōe-chōe銅，就是所羅門所用來造銅海kap柱，以及chiah-ê銅器ê。Tāi-pi̍t koh tùi Hap-tāi-lī-siā só͘ koán ê Thê-pa kap Kun nn̄g ê siâⁿ, chhiúⁿ chōe-chōe tâng, chiū-sī Só͘-lô-bûn só͘ ēng lâi chō tâng-hái kap thiāu, í-ki̍p chiah ê tâng-khì--ê.

9Hap-má王To-o͘聽見大衛phah贏Hap-tāi-lī-siā ê全軍，Hap-má ông To-o͘ thiaⁿ-kìⁿ Tāi-pi̍t phah-iâⁿ Hap-tāi-lī-siā ê choân-kun,

10就差伊ê kiáⁿ Hap-to-lân去見大衛王，kā伊請安，也kā伊祝福，因為伊有kap Hap-tāi-lī-siā交戰來khah贏伊；本然Hap-tāi-lī-siā kap To-o͘常常有交戰ê緣故。Hap-to-lân續帶金、銀、銅，chiah-ê器具。chiū chhe i ê kiáⁿ Hap-to-lân khì kìⁿ Tāi-pi̍t ông, kā i chhéng-an, iā kā i chiok-hok, in-ūi i ū kap Hap-tāi-lī-siā kau-chiàn lâi khah-iâⁿ i; pún-jiân Hap-tāi-lī-siā kap To-o͘ siông-siông ū kau-chiàn ê iân-kò͘. Hap-to-lân sòa tòa kim, gûn, tâng, chiah ê khì-kū.

11大衛王將chiah-ê器具，kap tùi ta̍k國帶來ê金銀，lóng分別做聖獻hō͘耶和華，就是伊tùi Í-tong、Mô͘-ap、A-bûn族，腓利士人，A-má-le̍k所搶來ê。Tāi-pi̍t ông chiong chiah ê khì-kū, kap tùi ta̍k-kok tòa-lâi ê kim gûn, lóng hun-piat chòe-sèng hiàn-hō͘ Iâ-hô-hoa, chiū-sī i tùi Í-tong, Mô͘-ap, A-bûn cho̍k, Hui-lī-sū lâng, A-má-le̍k só͘ chhiúⁿ-lâi--ê.

12Sé-ló͘-ngá ê kiáⁿ A-pí-su tī鹽ê山谷thâi Í-tong人一萬八千。Sé-ló͘-ngá ê kiáⁿ A-pí-su tī Iâm ê soaⁿ-kok thâi Í-tong lâng chi̍t-bān poeh-chheng.

13伊tī Í-tong地設立防守ê兵營；Í-tong人就lóng降服大衛。大衛無論toh落去，耶和華lóng hō͘伊得勝。I tī Í-tong tōe siat-li̍p hông-siú ê peng-iâⁿ; Í-tong lâng chiū lóng hâng-ho̍k Tāi-pi̍t. Tāi-pi̍t bô-lūn toh-lo̍h khì, Iâ-hô-hoa lóng hō͘ i tek-sèng.

14大衛做以色列全國ê王，koh tī眾百姓ê中間秉公行義。Tāi-pi̍t chòe Í-sek-lia̍t choân-kok ê ông, koh tī chèng peh-sìⁿ ê tiong-kan péng-kong kiâⁿ-gī.

15Sé-ló͘-ngá ê kiáⁿ Iok-ap做元帥，A-hi-lu̍t ê kiáⁿ Iok-sa-hoat做史官。Sé-ló͘-ngá ê kiáⁿ Iok-ap chòe goân-sòe, A-hi-lu̍t ê kiáⁿ Iok-sa-hoat chòe sú-koaⁿ.

16A-hi-tu̍t ê kiáⁿ Sat-tok，kap A-pí-a-tha ê kiáⁿ A-hi-bí-le̍k做祭司；Sa-ui-sa做書記官。A-hi-tu̍t ê kiáⁿ Sat-tok, kap A-pí-a-tha ê kiáⁿ A-hi-bí-le̍k chòe chè-si; Sa-ui-sa chòe su-kì-koaⁿ.

17Iâ-hô-iâ-tāi ê kiáⁿ Pí-ná-ngá管轄Ki-lī-thê人kap Pí-lī-thê人。大衛ê眾kiáⁿ lóng tī王ê身邊做頭人。Iâ-hô-iâ-tāi ê kiáⁿ Pí-ná-ngá koán-hat Ki-lī-thê lâng kap Pí-lī-thê lâng. Tāi-pi̍t ê chèng-kiáⁿ lóng tī ông ê sin-piⁿ chòe thâu-lâng.

1Chit-tia̍p了後，A-bûn人ê王Ná-hat死，伊ê kiáⁿ續接伊做王。Chit-tia̍p liáu-āu, A-bûn lâng ê ông Ná-hat sí, i ê kiáⁿ sòa-chiap i chòe-ông.

2大衛講，我beh好款待Ná-hat ê kiáⁿ Hap-lùn，因為伊ê老父從前好款待我；大衛就差 kúi-nā ê使者，為tio̍h伊死老父去安慰伊。大衛ê人臣到A-bûn人ê地見Hap-lùn beh安慰伊。Tāi-pi̍t kóng, Góa beh hó khoán-thāi Ná-hat ê kiáⁿ Hap-lùn, in-ūi i ê lāu-pē chiông-chêng hó khoán-thāi góa; Tāi-pi̍t chiū chhe kúi-nā ê sù-chiá, ūi-tio̍h i sí lāu-pē khì an-ùi i. Tāi-pi̍t ê jîn-sîn kàu A-bûn lâng ê tōe kìⁿ Hap-lùn beh an-ùi i.

3總是A-bûn人ê貴族對Hap-lùn講，大衛差人來安慰你，phah算伊是尊敬你ê老父mah？伊ê人臣來見你，kiám m̄是beh詳細查、毀滅、探聽chit-ê地mah？Chóng-sī A-bûn lâng ê kùi-cho̍k tùi Hap-lùn kóng, Tāi-pi̍t chhe lâng lâi an-ùi lí, phah-sǹg i sī chun-kèng lí ê lāu-pē mah? i ê jîn-sîn lâi kìⁿ lí, kiám m̄-sī beh siông-sè chhâ, húi-bia̍t, thàm-thiaⁿ chit ê tōe mah?

4Hap-lùn就將大衛ê人臣thì伊ê嘴鬚，剪斷伊ê衣服ê一半，露現伊ê下體，chiah hō͘伊去。Hap-lùn chiū chiong Tāi-pi̍t ê jîn-sîn thì i ê chhùi-chhiu, chián-tn̄g i ê i-ho̍k ê chi̍t-pòaⁿ, lō͘-hiān i ê ē-thé, chiah hō͘ i khì.

5有人用chiah-ê人所tú-tio̍h-ê氣kā大衛講；伊就差人去接in，因為hiah-ê人真見笑；王吩咐講，Tio̍h請tiàm耶利哥，thèng候嘴鬚發長，chiah tò來。Ū lâng ēng chiah ê lâng só͘ tú-tio̍h--ê khì kā Tāi-pi̍t kóng; i chiū chhe lâng khì chih in, in-ūi hiah ê lâng chin kiàn-siàu; ông hoan-hù kóng, Tio̍h chhiáⁿ tiàm Iâ-lī-ko, thèng-hāu chhùi-chhiu hoat-tn̂g, chiah tò-lâi.

6A-bûn人知對in ê所做有hō͘大衛厭惡in；Hap-lùn kap A-bûn人，就寄銀一千tha-liân-tek，tùi Bí-só͘-phō-tāi-bí、A-lân-má-ka、Só-pa，倩戰車kap馬兵。A-bûn lâng chai tùi in ê só͘-chòe ū hō͘ Tāi-pi̍t iàm-ò͘ⁿ in; Hap-lùn kap A-bûn lâng, chiū kià gûn chi̍t-chheng tha-liân-tek, tùi Bí-só͘-phō-tāi-bí, A-lân-má-ka, Só-pa, chhiàⁿ chiàn-chhia kap bé-peng.

7Tùi án-ni，倩三萬兩千張ê戰車，kap Má-ka王以及伊ê百姓；in就來紮營tī Bí-tí-pa ê頭前；A-bûn人也tùi in hiah-ê城出來，聚集beh交戰。Tùi án-ni chhiàⁿ saⁿ-bān nn̄g-chheng tiuⁿ ê chiàn-chhia, kap Má-ka ông í-ki̍p i ê peh-sìⁿ; in chiū lâi chat-iâⁿ tī Bí-tí-pa ê thâu-chêng; A-bûn lâng iā tùi in hiah ê siâⁿ chhut-lâi, chū-chi̍p beh kau-chiàn.

8大衛聽見，就差Iok-ap kap勇猛ê全軍出去。Tāi-pi̍t thiaⁿ-kìⁿ, chiū chhe Iok-ap kap ióng-béng ê choân-kun chhut-khì.

9A-bûn人出來，排陣tī城門前；所來chiah-ê王另外排陣tī郊野。A-bûn lâng chhut-lâi, pâi-tīn tī siâⁿ-mn̂g chêng; só͘ lâi chiah ê ông lēng-gōa pâi-tīn tī kau-iá.

10Iok-ap看見對敵tī伊ê前後排陣，就tùi以色列軍中揀選精兵，hō͘ in排陣來對A-lân人。Iok-ap khòaⁿ-kìⁿ tùi-te̍k tī i ê chêng-āu pâi-tīn, chiū tùi Í-sek-lia̍t kun-tiong kéng-soán cheng-peng, hō͘ in pâi-tīn lâi tùi A-lân lâng.

11其餘ê兵交hō͘伊ê小弟A-pí-su，hō͘伊排陣對A-bûn人。Kî-û ê peng kau hō͘ i ê sió-tī A-pí-su, hō͘ i pâi-tīn tùi A-bûn lâng.

12Koh講，A-lân人若khah強我，你tio̍h來幫贊我；A-bûn人若khah強你，我就幫贊你。Koh kóng, A-lân lâng nā khah-kiông góa, lí tio̍h lâi pang-chān góa; A-bûn lâng nā khah-kiông lí, góa chiū pang-chān lí.

13Tio̍h好膽，咱tio̍h為咱ê百姓kap咱ê上帝chiah-ê城，做大丈夫；願耶和華照伊所看做好ê來行。Tio̍h hó-táⁿ, lán tio̍h ūi lán ê peh-sìⁿ kap lán ê Siōng-tè chiah ê siâⁿ, chòe tāi-tiōng-hu; goān Iâ-hô-hoa chiàu I só͘ khòaⁿ-chòe hó--ê lâi kiâⁿ.

14Iok-ap就kap tè伊ê人進前，排陣tī A-lân ê面前；A-lân人就tī伊ê面前逃走。Iok-ap chiū kap tè i ê lâng chìn-chêng, pâi-tīn tī A-lân ê bīn-chêng; A-lân lâng chiū tī i ê bīn-chêng tô-cháu.

15A-bûn人看見A-lân人逃走，in亦tī Iok-ap ê小弟A-pí-su面前逃走入城。Iok-ap就倒tńg去耶路撒冷。A-bûn lâng khòaⁿ-kìⁿ A-lân lâng tô-cháu, in ia̍h tī Iok-ap ê sió-tī A-pí-su bīn-chêng tô-cháu ji̍p siâⁿ. Iok-ap chiū tò-tńg khì Iâ-lō͘-sat-léng.

16A-lân人看見in thâi輸以色列人，就差使者聚集大河hit-pêng ê A-lân人；Hap-tāi-lī-siā ê將軍Sok-hoat chhōa in來。A-lân lâng khòaⁿ-kìⁿ in thâi-su Í-sek-lia̍t lâng, chiū chhe sù-chiá chū-chi̍p Tōa-hô hit-pêng ê A-lân lâng; Hap-tāi-lī-siā ê chiong-kun Sok-hoat chhōa in lâi.

17有人通知大衛，伊就聚集以色列眾人，過約旦河，來到A-lân人hia，排陣抵敵in；大衛已經排陣攻擊A-lân人，in就kap伊交戰。Ū lâng thong-ti Tāi-pi̍t, i chiū chū-chi̍p Í-sek-lia̍t chèng-lâng, kè Iok-tàn hô, lâi kàu A-lân lâng hia, pâi-tīn tí-te̍k in; Tāi-pi̍t í-keng pâi-tīn kong-kek A-lân lâng, in chiū kap i kau-chiàn.

18A-lân人tī以色列人ê面前逃走；大衛thâi A-lân人，七千張車ê兵，koh步兵四萬；亦thâi死將軍Sok-hoat。A-lân lâng tī Í-sek-lia̍t lâng ê bīn-chêng tô-cháu; Tāi-pi̍t thâi A-lân lâng, chhit-chheng tiuⁿ chhia ê peng, koh pō͘-peng sì-bān; ia̍h thâi-sí chiong-kun Sok-hoat.

19Hap-tāi-lī-siā chiah-ê人臣，看見in thâi輸以色列人，就kap大衛講和，來服事伊；Tùi án-ni， A-lân人無koh幫贊A-bûn人。Hap-tāi-lī-siā chiah ê jîn-sîn, khòaⁿ-kìⁿ in thâi-su Í-sek-lia̍t lâng, chiū kap Tāi-pi̍t káng-hô, lâi ho̍k-sāi i; tùi án-ni A-lân lâng bô koh pang-chān A-bûn lâng.