1撒旦起來ài害以色列，引誘大衛算以色列人ê數額。Sat-tàn khí-lâi ài hāi Í-sek-lia̍t, ín-iú Tāi-pi̍t sǹg Í-sek-lia̍t lâng ê siàu-gia̍h.

2大衛kā Iok-ap kap百姓中ê首領講，lín去算以色列人，tùi別是巴到Tàn，tò來kā我講，hō͘我知in ê數額。Tāi-pi̍t kā Iok-ap kap peh-sìⁿ-tiong ê siú-léng kóng, Lín khì sǹg Í-sek-lia̍t lâng, tùi Pia̍t-sī-pa kàu Tàn, tò-lâi kā góa kóng, hō͘ góa chai in ê siàu-gia̍h.

3Iok-ap講，願耶和華hō͘伊ê百姓比現今加添百倍，我ê主我ê王ah，in kiám無lóng是我ê主ê百姓mah？我ê主啥事命令chit-ê tāi-chì？啥事hō͘以色列犯罪ah？Iok-ap kóng, Goān Iâ-hô-hoa hō͘ I ê peh-sìⁿ pí hiān-kim ke-thiⁿ pah-pē, góa ê chú góa ê ông ah, in kiám bô lóng sī góa ê chú ê peh-sìⁿ mah? góa ê chú siáⁿ-sū bēng-lēng chit ê tāi-chì? siáⁿ-sū hō͘ Í-sek-lia̍t hoān-chōe ah?

4總是王ê話贏過Iok-ap。Iok-ap就出去遍行以色列地，koh tò來耶路撒冷。Chóng-sī ông ê ōe iâⁿ-kè Iok-ap. Iok-ap chiū chhut-khì piàn-kiâⁿ Í-sek-lia̍t tōe, koh tò-lâi Iâ-lō͘-sat-léng.

5Iok-ap就將所算百姓ê總額，報告大衛。以色列人會kia̍h刀ê，一百十萬；猶大人會kia̍h刀ê，四十七萬。Iok-ap chiū chiong só͘ sǹg peh-sìⁿ ê chóng-gia̍h, pò-kò Tāi-pi̍t. Í-sek-lia̍t lâng ōe kia̍h-to--ê, chi̍t-pah-cha̍p-bān; Iû-tāi lâng ōe kia̍h-to--ê, sì-cha̍p-chhit-bān.

6獨獨利未人kap便雅憫人伊無算在內，因為Iok-ap厭惡王chit-ê命令。To̍k-to̍k Lī-bī lâng kap Piān-ngá-bín lâng i bô sǹg chāi-lāi, in-ūi Iok-ap iàm-ò͘ⁿ ông chit ê bēng-lēng.

7Chit-ê事上帝看做m̄好，就phah以色列。Chit ê sū Siōng-tè khòaⁿ-chòe m̄-hó, chiū phah Í-sek-lia̍t.

8大衛對上帝講，我行chit-ê事，大大有罪，taⁿ求你除去你ê奴僕ê罪，因為我所做ê真戇。Tāi-pi̍t tùi Siōng-tè kóng, Góa kiâⁿ chit ê sū, tōa-tōa ū chōe, taⁿ kiû Lí tû-khì Lí ê lô͘-po̍k ê chōe, in-ūi góa só͘ chòe--ê chin gōng.

9耶和華吩咐大衛ê先見ê Ka-tek，講，Iâ-hô-hoa hoan-hù Tāi-pi̍t ê sian-kiàn--ê Ka-tek, kóng,

10你tio̍h去kā大衛講，耶和華án-ni講，Taⁿ我用三項排tī你面前，你揀一項，我thang行tī你。Lí tio̍h khì kā Tāi-pi̍t kóng, Iâ-hô-hoa án-ni kóng, Taⁿ Góa ēng saⁿ-hāng pâi tī lí bīn-chêng, lí kéng chi̍t-hāng, Góa thang kiâⁿ tī lí.

11Ka-tek就來見大衛，kā伊講，耶和華án-ni講，你tio̍h家己揀；Ka-tek chiū lâi kìⁿ Tāi-pi̍t, kā i kóng, Iâ-hô-hoa án-ni kóng, Lí tio̍h ka-kī kéng;

12Kiám-chhái三年ê飢荒，á是三月日久tú-tio̍h損害tī你ê對敵ê面前，hō͘仇讎ê刀劍jip-tio̍h你，á是三日久耶和華ê劍，就是瘟疫tī你ê國內，耶和華ê使者tī以色列ê遍境teh毀滅；taⁿ你tio̍h想看，我thang用甚麼話 回覆差我ê。kiám-chhái saⁿ-nî ê ki-hng, á-sī saⁿ-ge̍h-ji̍t kú tú-tio̍h sún-hāi tī lí ê tùi-te̍k ê bīn-chêng, hō͘ kiû-siû ê to-kiàm jip-tio̍h lí, á-sī saⁿ-ji̍t kú Iâ-hô-hoa ê kiàm, chiū-sī un-e̍k tī lí ê kok-lāi, Iâ-hô-hoa ê sù-chiá tī Í-sek-lia̍t ê piàn-kéng teh húi-bia̍t; taⁿ lí tio̍h siūⁿ-khòaⁿ, góa thang ēng sím-mi̍h ōe hê-hok chhe góa--ê.

13大衛kā Ka-tek講，我困迫到極；我願陷落tī耶和華ê手，因為伊ê憐憫真大，我m̄願陷落tī人ê手。Tāi-pi̍t kā Ka-tek kóng, Góa khùn-pek kàu-ke̍k; góa goān hām-lo̍h tī Iâ-hô-hoa ê chhiú, in-ūi I ê lîn-bín chin-tōa, góa m̄-goān hām-lo̍h tī lâng ê chhiú.

14Tùi án-ni，耶和華就降瘟疫tī以色列；以色列人死ê七萬。Tùi án-ni Iâ-hô-hoa chiū kàng un-e̍k tī Í-sek-lia̍t; Í-sek-lia̍t lâng sí--ê chhit-bān.

15上帝差一個使者到耶路撒冷滅伊；beh滅伊ê時，耶和華看見，就退悔chit-ê災厄，就kā毀滅ê使者講，夠額lah，taⁿ thang停你ê手；hit時耶和華ê使者khiā tī Iâ-pò͘-su人O-jíⁿ-lâm ê五穀場。Siōng-tè chhe chi̍t ê sù-chiá kàu Iâ-lō͘-sat-léng bia̍t i; beh bia̍t i ê sî, Iâ-hô-hoa khòaⁿ-kìⁿ, chiū thè-hóe chit ê chai-ē, chiū kā húi-bia̍t ê sù-chiá kóng, Kàu-gia̍h lah, taⁿ thang thêng lí ê chhiú; hit-sî Iâ-hô-hoa ê sù-chiá khiā tī Iâ-pò͘-su lâng O-jíⁿ-lâm ê gō͘-kak-tiûⁿ.

16大衛kia̍h目看見耶和華ê使者khiā tī半空中，拔刀tī手裡，伸tī耶路撒冷ê頂面。大衛kap chiah-ê長老lóng穿麻衫，面仆tī地裡。Tāi-pi̍t kia̍h-ba̍k khòaⁿ-kìⁿ Iâ-hô-hoa ê sù-chiá khiā tī pòaⁿ-khong-tiong, pu̍ih-to tī chhiú--nih, chhun tī Iâ-lō͘-sat-léng ê téng-bīn. Tāi-pi̍t kap chiah ê tiúⁿ-ló lóng chhēng môa-saⁿ, bīn phak tī tōe--nih.

17大衛對上帝講，吩咐算百姓ê，kiám m̄是我mah？我犯罪行大pháiⁿ；總是chiah-ê羊群有做甚麼ah？求耶和華我ê上帝，伸手tī我kap我ê父ê家；m̄-thang攻擊你ê百姓，降瘟疫hō͘ in。Tāi-pi̍t tùi Siōng-tè kóng, Hoan-hù sǹg peh-sìⁿ--ê, kiám m̄-sī góa mah? góa hoān-chōe kiâⁿ tōa-pháiⁿ; chóng-sī chiah ê iûⁿ-kûn ū chòe sím-mi̍h ah? Kiû Iâ-hô-hoa góa ê Siōng-tè, chhun-chhiú tī góa kap góa ê pē ê ke; m̄-thang kong-kek Lí ê peh-sìⁿ, kàng un-e̍k hō͘ in.

18當hit時耶和華ê使者命令Ka-tek去kā大衛講，大衛tio̍h上去，tī Iâ-pò͘-su人O-jíⁿ-lâm ê五穀場，kā耶和華起一座壇。Tng hit-sî Iâ-hô-hoa ê sù-chiá bēng-lēng Ka-tek khì kā Tāi-pi̍t kóng, Tāi-pi̍t tio̍h chiūⁿ-khì, tī Iâ-pò͘-su lâng O-jíⁿ-lâm ê gō͘-kak-tiûⁿ, kā Iâ-hô-hoa khí chi̍t chō tôaⁿ.

19大衛就照Ka-tek奉耶和華ê名所講ê話上去。Tāi-pi̍t chiū chiàu Ka-tek hōng Iâ-hô-hoa ê miâ só͘ kóng ê ōe chiūⁿ-khì.

20Hit時O-jíⁿ-lâm teh phah麥，oa̍t頭看見天使；kap伊tī-teh四個kiáⁿ走去bih。Hit-sî O-jíⁿ-lâm teh phah-be̍h, oa̍t-thâu khòaⁿ-kìⁿ thiⁿ-sài; kap i tī-teh sì ê kiáⁿ cháu khì bih.

21大衛到O-jíⁿ-lâm hia；O-jíⁿ-lâm看見大衛，就出五穀場，àⁿ頭拜大衛。Tāi-pi̍t kàu O-jíⁿ-lâm hia; O-jíⁿ-lâm khòaⁿ-kìⁿ Tāi-pi̍t, chiū chhut gō͘-kak-tiûⁿ, àⁿ-thâu pài Tāi-pi̍t.

22大衛對O-jíⁿ-lâm講，你用chit-ê五穀場ê地hō͘我，hō͘我tī-hia thang kā耶和華起一座壇；你tio̍h照足額ê價錢賣我，hō͘瘟疫soah，無害百姓。Tāi-pi̍t tùi O-jíⁿ-lâm kóng, Lí ēng chit ê gō͘-kak-tiûⁿ ê tōe hō͘ góa, hō͘ góa tī-hia thang kā Iâ-hô-hoa khí chi̍t chō tôaⁿ; lí tio̍h chiàu chiok-gia̍h ê kè-chîⁿ bōe góa, hō͘ un-e̍k soah, bô hāi peh-sìⁿ.

23O-jíⁿ-lâm kā大衛講，你thang用伊，願我ê主我ê王，照你所看做好ê去行；你看，我用牛hō͘你做燒祭，用phah五穀ê器具做柴，亦用麥做素祭，chiah-ê我lóng hō͘你。O-jíⁿ-lâm kā Tāi-pi̍t kóng, Lí thang ēng i, goān góa ê chú góa ê ông, chiàu lí só͘ khòaⁿ-chòe hó-ê khì kiâⁿ; lí khòaⁿ, góa ēng gû hō͘ lí chòe sio-chè, ēng phah gō͘-kak ê khì-kū chòe chhâ, ia̍h ēng be̍h chòe sò͘-chè, chiah-ê góa lóng hō͘ lí.

24大衛王kā O-jíⁿ-lâm講，m̄是án-ni，我決斷beh用足額ê價錢來買；因為我m̄-ài the̍h你ê物hō͘耶和華，m̄-ài用無開費來獻燒祭。Tāi-pi̍t ông kā O-jíⁿ-lâm kóng, M̄-sī án-ni, góa koat-toàn beh ēng chiok-gia̍h ê kè-chîⁿ lâi bóe; in-ūi góa m̄-ài the̍h lí ê mi̍h hō͘ Iâ-hô-hoa, m̄-ài ēng bô khai-hùi lâi hiàn sio-chè.

25Tùi án-ni，大衛為tio̍h hit塊地秤(phêng)六百sià-khek-le̍k ê金hō͘ O-jíⁿ-lâm。Tùi án-ni Tāi-pi̍t ūi-tio̍h hit tè tōe phêng la̍k-pah sià-khek-le̍k ê kim hō͘ O-jíⁿ-lâm.

26大衛tī-hia kā耶和華起一座壇，獻燒祭kap平安祭；koh求叫耶和華；伊tùi天降火tī 祭壇頂來應伊。Tāi-pi̍t tī-hia kā Iâ-hô-hoa khí chi̍t chō tôaⁿ, hiàn sio-chè kap pêng-an-chè; koh kiû-kiò Iâ-hô-hoa; I tùi thiⁿ kàng-hé tī chè-tôaⁿ-téng lâi ìn i.

27耶和華命令使者，伊就收伊ê刀入鞘。Iâ-hô-hoa bēng-lēng sù-chiá, i chiū siu i ê to ji̍p siù.

28Hit時大衛看見耶和華tī Iâ-pò͘-su人O-jíⁿ-lâm ê五穀場應伊，就tī-hia獻祭。Hit-sî Tāi-pi̍t khòaⁿ-kìⁿ Iâ-hô-hoa tī Iâ-pò͘-su lâng O-jíⁿ-lâm ê gō͘-kak-tiûⁿ ìn i, chiū tī-hia hiàn-chè.

29因為摩西tī曠野所造耶和華ê會幕kap燒祭ê壇，hit時lóng tī Ki-piàn高ê所在。In-ūi Mô͘-se tī khòng-iá só͘ chō Iâ-hô-hoa ê hōe-bō͘ kap sio-chè ê tôaⁿ, hit-sî lóng tī Ki-piàn koâiⁿ ê só͘-chāi.

30總是大衛bōe會上到伊ê面前來問上帝，因為伊驚耶和華使者ê刀。Chóng-sī Tāi-pi̍t bōe-ōe chiūⁿ kàu i ê bīn-chêng lâi mn̄g Siōng-tè, in-ūi i kiaⁿ Iâ-hô-hoa sù-chiá ê to.

1大衛講，這是耶和華上帝ê厝；chit-ê是以色列燒祭ê壇。Tāi-pi̍t kóng, Che sī Iâ-hô-hoa Siōng-tè ê chhù; chit-ê sī Í-sek-lia̍t sio-chè ê tôaⁿ.

2大衛命令聚集khiā起以色列地ê出外人；koh派phah石ê師傅phah石；ài beh起上帝ê殿。Tāi-pi̍t bēng-lēng chū-chi̍p khiā-khí Í-sek-lia̍t tōe ê chhut-gōa lâng; koh phài phah-chio̍h ê sai-hū phah-chio̍h; ài beh khí Siōng-tè ê tiān.

3大衛備辦鐵真chōe，做門扇ê燈kap相連ê路用；koh備辦銅真chōe，到bōe秤得。Tāi-pi̍t pī-pān thih chin-chōe, chòe mn̂g-sìⁿ ê teng kap saⁿ-liân ê lō͘-ēng; koh pī-pān tâng chin-chōe, kàu bōe chhìn--tit.

4亦備辦bōe算得ê柏香柴；因為Se-tùn人kap Chhui-lô人載chōe-chōe柏香柴到大衛hia。Ia̍h pī-pān bōe-sǹg--tit ê pek-hiuⁿ-chhâ; in-ūi Se-tùn lâng kap Chhui-lô lâng chài chōe-chōe pek-hiuⁿ-chhâ kàu Tāi-pi̍t hia.

5大衛講，我ê kiáⁿ所羅門iáu-kú細漢koh軟chiáⁿ；beh kā耶和華起ê殿tio̍h真súi到極，hō͘伊名聲榮光到tī萬國；所以我taⁿ tio̍h kā伊備辦。大衛就tī未死ê事先備辦chōe-chōe材料。Tāi-pi̍t kóng, Góa ê kiáⁿ Só͘-lô-bûn iáu-kú sòe-hàn koh nńg-chiáⁿ; beh kā Iâ-hô-hoa khí ê tiān tio̍h chin súi kàu-ke̍k, hō͘ i miâ-siaⁿ êng-kng kàu tī bān-kok; só͘-í góa taⁿ tio̍h kā i pī-pān. Tāi-pi̍t chiū tī bē sí ê tāi-seng pī-pān chōe-chōe chhâi-liāu.

6大衛就叫伊ê kiáⁿ所羅門來，吩咐伊tio̍h kā以色列ê上帝起殿。Tāi-pi̍t chiū kiò i ê kiáⁿ Só͘-lô-bûn lâi, hoan-hù i tio̍h kā Í-sek-lia̍t ê Siōng-tè khí tiān.

7Kā所羅門講，我ê kiáⁿ ah，我心內本想，beh為耶和華我ê上帝ê名起殿。Kā Só͘-lô-bûn kóng, Góa ê kiáⁿ ah, góa sim-lāi pún siūⁿ, beh ūi Iâ-hô-hoa góa ê Siōng-tè ê miâ khí tiān.

8總是耶和華ê話臨到我講，你流chōe-chōe人ê血，大大交戰，你bōe得thang為我ê名起殿，因為你tī我ê目睭前hō͘ chōe-chōe人ê血流tī地裡。Chóng-sī Iâ-hô-hoa ê ōe lîm-kàu góa kóng, Lí lâu chōe-chōe lâng ê huih, tōa-tōa kau-chiàn, lí bōe-tit-thang ūi Góa ê miâ khí tiān, in-ūi lí tī Góa ê ba̍k-chiu chêng hō͘ chōe-chōe lâng ê huih lâu tī tōe--nih.

9看ah，你beh生一個kiáⁿ，伊beh做太平ê人，我beh hō͘伊太平，hō͘四圍chiah-ê對敵無攪擾伊；伊ê名beh叫所羅門；tī伊坐位ê日，我beh賞賜安靜和平hō͘以色列。Khòaⁿ ah, lí beh siⁿ chi̍t ê kiáⁿ, i beh chòe thài-pêng ê lâng, Góa beh hō͘ i thài-pêng, hō͘ sì-ûi chiah ê tùi-te̍k bô kiáu-jiáu i; i ê miâ beh kiò Só͘-lô-bûn; tī i chē-ūi ê ji̍t, Góa beh siúⁿ-sù an-chēng hô-pêng hō͘ Í-sek-lia̍t.

10伊beh為我ê名起殿；伊beh做我ê kiáⁿ，我beh做伊ê父；我beh堅固伊ê國位tī以色列到永遠。I beh ūi Góa ê miâ khí tiān; i beh chòe Góa ê kiáⁿ, Góa beh chòe i ê pē; Góa beh kian-kò͘ i ê kok-ūi tī Í-sek-lia̍t kàu éng-oán.

11我ê kiáⁿ ah，taⁿ願耶和華kap你tī-teh，hō͘你興通，起你ê上帝耶和華ê殿，照伊所論到你ê。Góa ê kiáⁿ ah, taⁿ goān Iâ-hô-hoa kap lí tī-teh, hō͘ lí heng-thong, khí lí ê Siōng-tè Iâ-hô-hoa ê tiān, chiàu I só͘ lūn-kàu lí--ê.

12獨獨願耶和華賞賜你聰明智慧，hō͘你治理以色列，來遵thàn耶和華你ê上帝ê律法。To̍k-to̍k goān Iâ-hô-hoa siúⁿ-sù lí chhang-miâ tì-hūi, hō͘ lí tī-lí Í-sek-lia̍t, lâi chun-thàn Iâ-hô-hoa lí ê Siōng-tè ê lu̍t-hoat.

13你若謹慎遵thàn耶和華所命令摩西教示以色列chiah-ê律例法度，就你beh興通；你tio̍h奮志好膽，莫得驚莫得忍。Lí nā kín-sīn chun-thàn Iâ-hô-hoa só͘ bēng-lēng Mô͘-se kà-sī Í-sek-lia̍t chiah ê lu̍t-lē hoat-tō͘, chiū lí beh heng-thong; lí tio̍h hùn-chì hó-táⁿ, bo̍h-tit kiaⁿ bo̍h-tit lún.

14我tī困苦中，為耶和華ê殿，備辦金十萬tha-liân-tek，銀一百萬tha-liân-tek，銅kap鐵重到bōe秤得，因為真chōe；我也有備辦柴kap石，你thang koh加添伊。Góa tī khùn-khó͘ tiong, ūi Iâ-hô-hoa ê tiān, pī-pān kim cha̍p-bān tha-liân-tek, gûn chi̍t-pah-bān tha-liân-tek, tâng kap thih tāng kàu bōe chhìn--tit, in-ūi chin-chōe; góa iā ū pī-pān chhâ kap chio̍h, lí thang koh ke-thiⁿ i.

15Koh你也有chōe-chōe師傅，phah石ê，做木ê，kap ta̍k號工程師，thang做ta̍k號ê工。Koh lí iā ū chōe-chōe sai-hū, phah-chio̍h--ê, chòe-ba̍k--ê, kap ta̍k-hō kang-tiâⁿ-su, thang chòe ta̍k-hō ê kang.

16金、銀、銅、鐵，chōe到bōe算得；你tio̍h 起來做；願耶和華kap你tī-teh。Kim, gûn, tâng, thih, chōe kàu bōe sǹg--tit; lí tio̍h khí-lâi chòe; goān Iâ-hô-hoa kap lí tī-teh.

17大衛koh吩咐以色列ê眾首領幫贊伊ê kiáⁿ所羅門，講，Tāi-pi̍t koh hoan-hù Í-sek-lia̍t ê chèng siú-léng pang-chān i ê kiáⁿ Só͘-lô-bûn, kóng,

18耶和華lín ê上帝kiám無kap lín tī-teh mah？ kiám無tī四圍賞賜lín平安mah？因為伊已經將chit-ê地khiā起ê百姓交tī我ê手，chit-ê地就降服tī耶和華kap伊ê百姓ê面前。Iâ-hô-hoa lín ê Siōng-tè kiám bô kap lín tī-teh mah? kiám bô tī sì-ûi siúⁿ-sù lín pêng-an mah? in-ūi I í-keng chiong chit ê tōe khiā-khí ê peh-sìⁿ kau tī góa ê chhiú, chit ê tōe chiū hâng-ho̍k tī Iâ-hô-hoa kap I ê peh-sìⁿ ê bīn-chêng.

19Taⁿ lín tio̍h定tio̍h lín ê心，lín ê意思，chhē耶和華lín ê上帝；亦tio̍h起來，起造耶和華上帝ê聖所，thang將耶和華ê約櫃，kap上帝聖ê器具，搬入為耶和華ê名所beh 起ê殿。Taⁿ lín tio̍h tiāⁿ-tio̍h lín ê sim, lín ê ì-sù, chhē Iâ-hô-hoa lín ê Siōng-tè; ia̍h tio̍h khí--lâi, khí-chō Iâ-hô-hoa Siōng-tè ê sèng-só͘, thang chiong Iâ-hô-hoa ê iok-kūi, kap Siōng-tè sèng ê khì-kū, poaⁿ-ji̍p ūi Iâ-hô-hoa ê miâ só͘ beh khí ê tiān.

1大衛年老，日子滿足，就設立伊ê kiáⁿ所羅門做以色列王。Tāi-pi̍t nî lāu, ji̍t-chí móa-chiok, chiū siat-li̍p i ê kiáⁿ Só͘-lô-bûn chòe Í-sek-lia̍t ông.

2大衛聚集以色列ê眾首領，kap chiah-ê祭司，以及利未人。Tāi-pi̍t chū-chi̍p Í-sek-lia̍t ê chèng siú-léng, kap chiah ê chè-si, í-ki̍p Lī-bī lâng.

3利未人tùi三十歲以上ê，lóng計算；照所算ta-po͘人ê額數，共三萬八千。Lī-bī lâng tùi saⁿ-cha̍p hè í-chiūⁿ--ê, lóng kè-sǹg; chiàu só͘ sǹg ta-po͘-lâng ê gia̍h-sò͘, kiōng saⁿ-bān poeh-chheng.

4其中兩萬四千人管理耶和華殿ê工，有六千人做職員kap士師。Kî-tiong nn̄g-bān sì-chheng lâng koán-lí Iâ-hô-hoa tiān ê kang, ū la̍k-chheng lâng chòe chit-oân kap sū-su.

5有四千人做顧門ê；koh四千人將我大衛所做用teh o-ló ê樂器o-ló耶和華。Ū sì-chheng lâng chòe kò͘-mn̂g--ê; koh sì-chheng lâng chiong góa Tāi-pi̍t só͘ chòe ēng teh o-ló ê ga̍k-khì o-ló Iâ-hô-hoa.

6大衛照利未ê kiáⁿ，Kek-sūn、Ko-hat、Bí-la̍h-lī，來分in ê kiáⁿ孫ê班列。Tāi-pi̍t chiàu Lī-bī ê kiáⁿ, Kek-sūn, Ko-hat, Bí-la̍h-lī, lâi pun in ê kiáⁿ-sun ê pan-lia̍t.

7屬Kek-sūn ê人，La̍h-tàn kap Sī-múi。Sio̍k Kek-sūn ê lâng, La̍h-tàn kap Sī-múi.

8La̍h-tàn ê kiáⁿ，大ê是Iâ-iat，koh有Sè-tàn kap約珥，共三人。La̍h-tàn ê kiáⁿ, tōa-ê sī Iâ-iat, koh ū Sè-tàn kap Iok-jíⁿ, kiōng saⁿ-lâng.

9Sī-múi ê kiáⁿ，Sī-lô-bi̍t、Hap-siat、哈蘭，共三人；這是La̍h-tàn族ê族長。Sī-múi ê kiáⁿ, Sī-lô-bi̍t, Hap-siat, Hap-lân, kiōng saⁿ-lâng; che sī La̍h-tàn cho̍k ê cho̍k-tiúⁿ.

10Sī-múi ê kiáⁿ，Ngá-hap、Sè-ná、Iâ-o͘-si、Pí-lī-a，chit四人就是Sī-múi ê kiáⁿ。Sī-múi ê kiáⁿ, Ngá-hap, Sè-ná, Iâ-o͘-si, Pí-lī-a, chí(**chit) sì-lâng chiū-sī Sī-múi ê kiáⁿ.

11Ngá-hap是大kiáⁿ，第二個 Se-sat；獨獨Iâ-o͘-si、Pí-lī-a ê kiáⁿ孫無jōa-chōe，所以算做一族。Ngá-hap sī tōa-kiáⁿ, tē-jī-ê Se-sat; to̍k-to̍k Iâ-o͘-si, Pí-lī-a ê kiáⁿ-sun bô jōa-chōe, só͘-í sǹg-chòe chi̍t-cho̍k.

12Ko-hat ê kiáⁿ是Àm-lân、Í-su-hap、Hi-pek-lûn、O͘-siat，共四人。Ko-hat ê kiáⁿ sī Àm-lân, Í-su-hap, Hi-pek-lûn, O͘-siat, kiōng sì-lâng.

13Àm-lân ê kiáⁿ，亞倫、摩西；亞倫kap伊ê kiáⁿ孫是分別到tī永遠，來分別至聖ê物做聖，tī耶和華ê面前燒香，來服事伊，奉伊ê名祝福，到tī永遠。Àm-lân ê kiáⁿ, A-lûn, Mô͘-se; A-lûn kap i ê kiáⁿ-sun sī hun-piat kàu tī éng-oán, lâi hun-piat chì-sèng ê mi̍h chòe-sèng, tī Iâ-hô-hoa ê bīn-chêng sio-hiuⁿ, lâi ho̍k-sāi I, hōng I ê miâ chiok-hok, kàu tī éng-oán.

14論到上帝ê奴僕摩西，伊ê kiáⁿ名字記tī利未ê支派中。Lūn-kàu Siōng-tè ê lô͘-po̍k Mô͘-se, i ê kiáⁿ miâ-jī kì tī Lī-bī ê chi-phài tiong.

15摩西ê kiáⁿ是Kek-sūn kap Í-lī-í-siā。Mô͘-se ê kiáⁿ sī Kek-sūn kap Í-lī-í-siā.

16Kek-sūn ê kiáⁿ，大ê是Sè-pò͘-gia̍p。Kek-sūn ê kiáⁿ, tōa-ê sī Sè-pò͘-gia̍p.

17Í-lī-í-siā ê kiáⁿ，Lī-hap-pí-ngá是大ê；Í-lī-í-siā無別ê kiáⁿ；總是Lī-hap-pí-ngá ê kiáⁿ真chōe。Í-lī-í-siā ê kiáⁿ, Lī-hap-pí-ngá sī tōa-ê; Í-lī-í-siā bô pa̍t ê kiáⁿ; chóng-sī Lī-hap-pí-ngá ê kiáⁿ chin-chōe.

18Í-su-hap ê kiáⁿ，大ê Sī-lô-bi̍t。Í-su-hap ê kiáⁿ, tōa-ê Sī-lô-bi̍t.

19Hi-pek-lûn ê kiáⁿ，大ê Iâ-lī-ngá，第二個是A-má-lī-a，第三個是Ngá-hap-sek，第四是Iâ-ka-biān。Hi-pek-lûn ê kiáⁿ, tōa-ê Iâ-lī-ngá, tē-jī-ê sī A-má-lī-a, tē-saⁿ-ê sī Ngá-hap-sek, tē-sì sī Iâ-ka-biān.

20O͘-siat ê kiáⁿ，大ê是Bí-ka，第二ê是Iâ-se-ngá。O͘-siat ê kiáⁿ, tōa-ê sī Bí-ka, tē-jī-ê sī Iâ-se-ngá.

21Bí-la̍h-lī ê kiáⁿ；Boa̍t-lī、Bó͘-sī；Boa̍t-lī ê kiáⁿ；Í-lī-a-sat、Ki-sū。Bí-la̍h-lī ê kiáⁿ; Boa̍t-lī, Bó͘-sī; Boa̍t-lī ê kiáⁿ; Í-lī-a-sat, Ki-sū.

22Í-lī-a-sat死，無kiáⁿ，只有cha-bó͘-kiáⁿ，in ê兄弟Ki-sū ê kiáⁿ 娶in。Í-lī-a-sat sí, bô kiáⁿ, chí-ū cha-bó͘-kiáⁿ, in ê hiaⁿ-tī Ki-sū ê kiáⁿ chhōa in.

23Bó͘-sī ê kiáⁿ是Boa̍t-le̍k、Í-tek、Iâ-lī-mô͘，共三人。Bó͘-sī ê kiáⁿ sī Boa̍t-le̍k, Í-tek, Iâ-lī-mô͘, kiōng saⁿ-lâng.

24頂面所記lóng是利未ê kiáⁿ孫，照in老父ê家來做族長，為耶和華ê厝來做差用ê工；ta̍k人tùi二十歲以上受算，lóng照in ê名ê數額來計算。Téng-bīn só͘ kì lóng sī Lī-bī ê kiáⁿ-sun, chiàu in lāu-pē ê ke lâi chòe cho̍k-tiúⁿ, ūi Iâ-hô-hoa ê chhù lâi chòe chhe-ēng ê kang; ta̍k-lâng tùi jī-cha̍p hè í-chiūⁿ siū-sǹg, lóng chiàu in ê miâ ê siàu-gia̍h lâi kè-sǹg.

25因為大衛講，耶和華以色列ê上帝，已經hō͘伊ê百姓平安，koh伊永遠tiàm-tī耶路撒冷。In-ūi Tāi-pi̍t kóng, Iâ-hô-hoa Í-sek-lia̍t ê Siōng-tè, í-keng hō͘ I ê peh-sìⁿ pêng-an, koh I éng-oán tiàm-tī Iâ-lō͘-sat-léng.

26利未人也m̄免koh 扛會幕，kap其中所用lóng總ê器具。Lī-bī lâng iā m̄-bián koh kng hōe-bō͘, kap kî-tiong só͘ ēng lóng-chóng ê khì-kū.

27因為照大衛臨終ê時所吩咐ê，利未人tùi二十歲以上lóng受算。In-ūi chiàu Tāi-pi̍t lîm-chiong ê sî só͘ hoan-hù--ê, Lī-bī lâng tùi jī-cha̍p hè í-chiūⁿ lóng siū-sǹg.

28因為伊ê職是跟隨亞倫ê kiáⁿ孫，來做耶和華殿ê工，就是tī chiah-ê院kap chiah-ê房來做工，亦hō͘ chiah-ê聖物清氣，來做耶和華殿ê工；In-ūi i ê chit sī kun-sûi A-lûn ê kiáⁿ-sun, lâi chòe Iâ-hô-hoa tiān ê kang, chiū-sī tī chiah ê īⁿ kap chiah ê pâng lâi chòe kang, ia̍h hō͘ chiah ê sèng-mi̍h chheng-khì, lâi chòe Iâ-hô-hoa tiān ê kang;

29料理排列ê餅，素祭ê麵粉，或是無酵ê薄餅，kap鼎內所pek，以及調和ê物；koh管理秤、量ê事。liāu-lí pâi-lia̍t ê piáⁿ, sò͘-chè ê mī-hún, he̍k-sī bô-kàⁿ ê po̍h-piáⁿ, kap tiáⁿ-lāi só͘ pek, í-ki̍p tiau-hô ê mi̍h; koh koán-lí chhìn, niû ê sū.

30Ta̍k早起khiā-teh來感謝o-ló耶和華，ta̍k-ê-hng也是án-ni。Ta̍k chá-khí khiā-teh lâi kám-siā o-ló Iâ-hô-hoa, ta̍k ê-hng iā sī án-ni.

31Koh tī安歇日，月ê初一，kap節期，獻chiah-ê燒祭hō͘耶和華，照物ê數額，照所定tio̍h ê例，常常獻tī耶和華ê面前。Koh tī an-hioh-ji̍t, ge̍h ê chhoe-it, kap choeh-kî, hiàn chiah ê sio-chè hō͘ Iâ-hô-hoa, chiàu mi̍h ê siàu-gia̍h, chiàu só͘ tiāⁿ-tio̍h ê lē, siông-siông hiàn tī Iâ-hô-hoa ê bīn-chêng.

32Koh hō͘伊顧守會幕ê責成，kap聖所ê責成，以及伊ê兄弟亞倫ê kiáⁿ孫所hō͘伊做ê責成，來服事tī耶和華ê厝。Koh hō͘ i kò͘-siú hōe-bō͘ ê chek-sêng, kap sèng-só͘ ê chek-sêng, í-ki̍p i ê hiaⁿ-tī A-lûn ê kiáⁿ-sun só͘ hō͘ i chòe ê chek-sêng, lâi ho̍k-sāi tī Iâ-hô-hoa ê chhù.