1大衛講，這是耶和華上帝ê厝；chit-ê是以色列燒祭ê壇。Tāi-pi̍t kóng, Che sī Iâ-hô-hoa Siōng-tè ê chhù; chit-ê sī Í-sek-lia̍t sio-chè ê tôaⁿ.

2大衛命令聚集khiā起以色列地ê出外人；koh派phah石ê師傅phah石；ài beh起上帝ê殿。Tāi-pi̍t bēng-lēng chū-chi̍p khiā-khí Í-sek-lia̍t tōe ê chhut-gōa lâng; koh phài phah-chio̍h ê sai-hū phah-chio̍h; ài beh khí Siōng-tè ê tiān.

3大衛備辦鐵真chōe，做門扇ê燈kap相連ê路用；koh備辦銅真chōe，到bōe秤得。Tāi-pi̍t pī-pān thih chin-chōe, chòe mn̂g-sìⁿ ê teng kap saⁿ-liân ê lō͘-ēng; koh pī-pān tâng chin-chōe, kàu bōe chhìn--tit.

4亦備辦bōe算得ê柏香柴；因為Se-tùn人kap Chhui-lô人載chōe-chōe柏香柴到大衛hia。Ia̍h pī-pān bōe-sǹg--tit ê pek-hiuⁿ-chhâ; in-ūi Se-tùn lâng kap Chhui-lô lâng chài chōe-chōe pek-hiuⁿ-chhâ kàu Tāi-pi̍t hia.

5大衛講，我ê kiáⁿ所羅門iáu-kú細漢koh軟chiáⁿ；beh kā耶和華起ê殿tio̍h真súi到極，hō͘伊名聲榮光到tī萬國；所以我taⁿ tio̍h kā伊備辦。大衛就tī未死ê事先備辦chōe-chōe材料。Tāi-pi̍t kóng, Góa ê kiáⁿ Só͘-lô-bûn iáu-kú sòe-hàn koh nńg-chiáⁿ; beh kā Iâ-hô-hoa khí ê tiān tio̍h chin súi kàu-ke̍k, hō͘ i miâ-siaⁿ êng-kng kàu tī bān-kok; só͘-í góa taⁿ tio̍h kā i pī-pān. Tāi-pi̍t chiū tī bē sí ê tāi-seng pī-pān chōe-chōe chhâi-liāu.

6大衛就叫伊ê kiáⁿ所羅門來，吩咐伊tio̍h kā以色列ê上帝起殿。Tāi-pi̍t chiū kiò i ê kiáⁿ Só͘-lô-bûn lâi, hoan-hù i tio̍h kā Í-sek-lia̍t ê Siōng-tè khí tiān.

7Kā所羅門講，我ê kiáⁿ ah，我心內本想，beh為耶和華我ê上帝ê名起殿。Kā Só͘-lô-bûn kóng, Góa ê kiáⁿ ah, góa sim-lāi pún siūⁿ, beh ūi Iâ-hô-hoa góa ê Siōng-tè ê miâ khí tiān.

8總是耶和華ê話臨到我講，你流chōe-chōe人ê血，大大交戰，你bōe得thang為我ê名起殿，因為你tī我ê目睭前hō͘ chōe-chōe人ê血流tī地裡。Chóng-sī Iâ-hô-hoa ê ōe lîm-kàu góa kóng, Lí lâu chōe-chōe lâng ê huih, tōa-tōa kau-chiàn, lí bōe-tit-thang ūi Góa ê miâ khí tiān, in-ūi lí tī Góa ê ba̍k-chiu chêng hō͘ chōe-chōe lâng ê huih lâu tī tōe--nih.

9看ah，你beh生一個kiáⁿ，伊beh做太平ê人，我beh hō͘伊太平，hō͘四圍chiah-ê對敵無攪擾伊；伊ê名beh叫所羅門；tī伊坐位ê日，我beh賞賜安靜和平hō͘以色列。Khòaⁿ ah, lí beh siⁿ chi̍t ê kiáⁿ, i beh chòe thài-pêng ê lâng, Góa beh hō͘ i thài-pêng, hō͘ sì-ûi chiah ê tùi-te̍k bô kiáu-jiáu i; i ê miâ beh kiò Só͘-lô-bûn; tī i chē-ūi ê ji̍t, Góa beh siúⁿ-sù an-chēng hô-pêng hō͘ Í-sek-lia̍t.

10伊beh為我ê名起殿；伊beh做我ê kiáⁿ，我beh做伊ê父；我beh堅固伊ê國位tī以色列到永遠。I beh ūi Góa ê miâ khí tiān; i beh chòe Góa ê kiáⁿ, Góa beh chòe i ê pē; Góa beh kian-kò͘ i ê kok-ūi tī Í-sek-lia̍t kàu éng-oán.

11我ê kiáⁿ ah，taⁿ願耶和華kap你tī-teh，hō͘你興通，起你ê上帝耶和華ê殿，照伊所論到你ê。Góa ê kiáⁿ ah, taⁿ goān Iâ-hô-hoa kap lí tī-teh, hō͘ lí heng-thong, khí lí ê Siōng-tè Iâ-hô-hoa ê tiān, chiàu I só͘ lūn-kàu lí--ê.

12獨獨願耶和華賞賜你聰明智慧，hō͘你治理以色列，來遵thàn耶和華你ê上帝ê律法。To̍k-to̍k goān Iâ-hô-hoa siúⁿ-sù lí chhang-miâ tì-hūi, hō͘ lí tī-lí Í-sek-lia̍t, lâi chun-thàn Iâ-hô-hoa lí ê Siōng-tè ê lu̍t-hoat.

13你若謹慎遵thàn耶和華所命令摩西教示以色列chiah-ê律例法度，就你beh興通；你tio̍h奮志好膽，莫得驚莫得忍。Lí nā kín-sīn chun-thàn Iâ-hô-hoa só͘ bēng-lēng Mô͘-se kà-sī Í-sek-lia̍t chiah ê lu̍t-lē hoat-tō͘, chiū lí beh heng-thong; lí tio̍h hùn-chì hó-táⁿ, bo̍h-tit kiaⁿ bo̍h-tit lún.

14我tī困苦中，為耶和華ê殿，備辦金十萬tha-liân-tek，銀一百萬tha-liân-tek，銅kap鐵重到bōe秤得，因為真chōe；我也有備辦柴kap石，你thang koh加添伊。Góa tī khùn-khó͘ tiong, ūi Iâ-hô-hoa ê tiān, pī-pān kim cha̍p-bān tha-liân-tek, gûn chi̍t-pah-bān tha-liân-tek, tâng kap thih tāng kàu bōe chhìn--tit, in-ūi chin-chōe; góa iā ū pī-pān chhâ kap chio̍h, lí thang koh ke-thiⁿ i.

15Koh你也有chōe-chōe師傅，phah石ê，做木ê，kap ta̍k號工程師，thang做ta̍k號ê工。Koh lí iā ū chōe-chōe sai-hū, phah-chio̍h--ê, chòe-ba̍k--ê, kap ta̍k-hō kang-tiâⁿ-su, thang chòe ta̍k-hō ê kang.

16金、銀、銅、鐵，chōe到bōe算得；你tio̍h 起來做；願耶和華kap你tī-teh。Kim, gûn, tâng, thih, chōe kàu bōe sǹg--tit; lí tio̍h khí-lâi chòe; goān Iâ-hô-hoa kap lí tī-teh.

17大衛koh吩咐以色列ê眾首領幫贊伊ê kiáⁿ所羅門，講，Tāi-pi̍t koh hoan-hù Í-sek-lia̍t ê chèng siú-léng pang-chān i ê kiáⁿ Só͘-lô-bûn, kóng,

18耶和華lín ê上帝kiám無kap lín tī-teh mah？ kiám無tī四圍賞賜lín平安mah？因為伊已經將chit-ê地khiā起ê百姓交tī我ê手，chit-ê地就降服tī耶和華kap伊ê百姓ê面前。Iâ-hô-hoa lín ê Siōng-tè kiám bô kap lín tī-teh mah? kiám bô tī sì-ûi siúⁿ-sù lín pêng-an mah? in-ūi I í-keng chiong chit ê tōe khiā-khí ê peh-sìⁿ kau tī góa ê chhiú, chit ê tōe chiū hâng-ho̍k tī Iâ-hô-hoa kap I ê peh-sìⁿ ê bīn-chêng.

19Taⁿ lín tio̍h定tio̍h lín ê心，lín ê意思，chhē耶和華lín ê上帝；亦tio̍h起來，起造耶和華上帝ê聖所，thang將耶和華ê約櫃，kap上帝聖ê器具，搬入為耶和華ê名所beh 起ê殿。Taⁿ lín tio̍h tiāⁿ-tio̍h lín ê sim, lín ê ì-sù, chhē Iâ-hô-hoa lín ê Siōng-tè; ia̍h tio̍h khí--lâi, khí-chō Iâ-hô-hoa Siōng-tè ê sèng-só͘, thang chiong Iâ-hô-hoa ê iok-kūi, kap Siōng-tè sèng ê khì-kū, poaⁿ-ji̍p ūi Iâ-hô-hoa ê miâ só͘ beh khí ê tiān.

1大衛年老，日子滿足，就設立伊ê kiáⁿ所羅門做以色列王。Tāi-pi̍t nî lāu, ji̍t-chí móa-chiok, chiū siat-li̍p i ê kiáⁿ Só͘-lô-bûn chòe Í-sek-lia̍t ông.

2大衛聚集以色列ê眾首領，kap chiah-ê祭司，以及利未人。Tāi-pi̍t chū-chi̍p Í-sek-lia̍t ê chèng siú-léng, kap chiah ê chè-si, í-ki̍p Lī-bī lâng.

3利未人tùi三十歲以上ê，lóng計算；照所算ta-po͘人ê額數，共三萬八千。Lī-bī lâng tùi saⁿ-cha̍p hè í-chiūⁿ--ê, lóng kè-sǹg; chiàu só͘ sǹg ta-po͘-lâng ê gia̍h-sò͘, kiōng saⁿ-bān poeh-chheng.

4其中兩萬四千人管理耶和華殿ê工，有六千人做職員kap士師。Kî-tiong nn̄g-bān sì-chheng lâng koán-lí Iâ-hô-hoa tiān ê kang, ū la̍k-chheng lâng chòe chit-oân kap sū-su.

5有四千人做顧門ê；koh四千人將我大衛所做用teh o-ló ê樂器o-ló耶和華。Ū sì-chheng lâng chòe kò͘-mn̂g--ê; koh sì-chheng lâng chiong góa Tāi-pi̍t só͘ chòe ēng teh o-ló ê ga̍k-khì o-ló Iâ-hô-hoa.

6大衛照利未ê kiáⁿ，Kek-sūn、Ko-hat、Bí-la̍h-lī，來分in ê kiáⁿ孫ê班列。Tāi-pi̍t chiàu Lī-bī ê kiáⁿ, Kek-sūn, Ko-hat, Bí-la̍h-lī, lâi pun in ê kiáⁿ-sun ê pan-lia̍t.

7屬Kek-sūn ê人，La̍h-tàn kap Sī-múi。Sio̍k Kek-sūn ê lâng, La̍h-tàn kap Sī-múi.

8La̍h-tàn ê kiáⁿ，大ê是Iâ-iat，koh有Sè-tàn kap約珥，共三人。La̍h-tàn ê kiáⁿ, tōa-ê sī Iâ-iat, koh ū Sè-tàn kap Iok-jíⁿ, kiōng saⁿ-lâng.

9Sī-múi ê kiáⁿ，Sī-lô-bi̍t、Hap-siat、哈蘭，共三人；這是La̍h-tàn族ê族長。Sī-múi ê kiáⁿ, Sī-lô-bi̍t, Hap-siat, Hap-lân, kiōng saⁿ-lâng; che sī La̍h-tàn cho̍k ê cho̍k-tiúⁿ.

10Sī-múi ê kiáⁿ，Ngá-hap、Sè-ná、Iâ-o͘-si、Pí-lī-a，chit四人就是Sī-múi ê kiáⁿ。Sī-múi ê kiáⁿ, Ngá-hap, Sè-ná, Iâ-o͘-si, Pí-lī-a, chí(**chit) sì-lâng chiū-sī Sī-múi ê kiáⁿ.

11Ngá-hap是大kiáⁿ，第二個 Se-sat；獨獨Iâ-o͘-si、Pí-lī-a ê kiáⁿ孫無jōa-chōe，所以算做一族。Ngá-hap sī tōa-kiáⁿ, tē-jī-ê Se-sat; to̍k-to̍k Iâ-o͘-si, Pí-lī-a ê kiáⁿ-sun bô jōa-chōe, só͘-í sǹg-chòe chi̍t-cho̍k.

12Ko-hat ê kiáⁿ是Àm-lân、Í-su-hap、Hi-pek-lûn、O͘-siat，共四人。Ko-hat ê kiáⁿ sī Àm-lân, Í-su-hap, Hi-pek-lûn, O͘-siat, kiōng sì-lâng.

13Àm-lân ê kiáⁿ，亞倫、摩西；亞倫kap伊ê kiáⁿ孫是分別到tī永遠，來分別至聖ê物做聖，tī耶和華ê面前燒香，來服事伊，奉伊ê名祝福，到tī永遠。Àm-lân ê kiáⁿ, A-lûn, Mô͘-se; A-lûn kap i ê kiáⁿ-sun sī hun-piat kàu tī éng-oán, lâi hun-piat chì-sèng ê mi̍h chòe-sèng, tī Iâ-hô-hoa ê bīn-chêng sio-hiuⁿ, lâi ho̍k-sāi I, hōng I ê miâ chiok-hok, kàu tī éng-oán.

14論到上帝ê奴僕摩西，伊ê kiáⁿ名字記tī利未ê支派中。Lūn-kàu Siōng-tè ê lô͘-po̍k Mô͘-se, i ê kiáⁿ miâ-jī kì tī Lī-bī ê chi-phài tiong.

15摩西ê kiáⁿ是Kek-sūn kap Í-lī-í-siā。Mô͘-se ê kiáⁿ sī Kek-sūn kap Í-lī-í-siā.

16Kek-sūn ê kiáⁿ，大ê是Sè-pò͘-gia̍p。Kek-sūn ê kiáⁿ, tōa-ê sī Sè-pò͘-gia̍p.

17Í-lī-í-siā ê kiáⁿ，Lī-hap-pí-ngá是大ê；Í-lī-í-siā無別ê kiáⁿ；總是Lī-hap-pí-ngá ê kiáⁿ真chōe。Í-lī-í-siā ê kiáⁿ, Lī-hap-pí-ngá sī tōa-ê; Í-lī-í-siā bô pa̍t ê kiáⁿ; chóng-sī Lī-hap-pí-ngá ê kiáⁿ chin-chōe.

18Í-su-hap ê kiáⁿ，大ê Sī-lô-bi̍t。Í-su-hap ê kiáⁿ, tōa-ê Sī-lô-bi̍t.

19Hi-pek-lûn ê kiáⁿ，大ê Iâ-lī-ngá，第二個是A-má-lī-a，第三個是Ngá-hap-sek，第四是Iâ-ka-biān。Hi-pek-lûn ê kiáⁿ, tōa-ê Iâ-lī-ngá, tē-jī-ê sī A-má-lī-a, tē-saⁿ-ê sī Ngá-hap-sek, tē-sì sī Iâ-ka-biān.

20O͘-siat ê kiáⁿ，大ê是Bí-ka，第二ê是Iâ-se-ngá。O͘-siat ê kiáⁿ, tōa-ê sī Bí-ka, tē-jī-ê sī Iâ-se-ngá.

21Bí-la̍h-lī ê kiáⁿ；Boa̍t-lī、Bó͘-sī；Boa̍t-lī ê kiáⁿ；Í-lī-a-sat、Ki-sū。Bí-la̍h-lī ê kiáⁿ; Boa̍t-lī, Bó͘-sī; Boa̍t-lī ê kiáⁿ; Í-lī-a-sat, Ki-sū.

22Í-lī-a-sat死，無kiáⁿ，只有cha-bó͘-kiáⁿ，in ê兄弟Ki-sū ê kiáⁿ 娶in。Í-lī-a-sat sí, bô kiáⁿ, chí-ū cha-bó͘-kiáⁿ, in ê hiaⁿ-tī Ki-sū ê kiáⁿ chhōa in.

23Bó͘-sī ê kiáⁿ是Boa̍t-le̍k、Í-tek、Iâ-lī-mô͘，共三人。Bó͘-sī ê kiáⁿ sī Boa̍t-le̍k, Í-tek, Iâ-lī-mô͘, kiōng saⁿ-lâng.

24頂面所記lóng是利未ê kiáⁿ孫，照in老父ê家來做族長，為耶和華ê厝來做差用ê工；ta̍k人tùi二十歲以上受算，lóng照in ê名ê數額來計算。Téng-bīn só͘ kì lóng sī Lī-bī ê kiáⁿ-sun, chiàu in lāu-pē ê ke lâi chòe cho̍k-tiúⁿ, ūi Iâ-hô-hoa ê chhù lâi chòe chhe-ēng ê kang; ta̍k-lâng tùi jī-cha̍p hè í-chiūⁿ siū-sǹg, lóng chiàu in ê miâ ê siàu-gia̍h lâi kè-sǹg.

25因為大衛講，耶和華以色列ê上帝，已經hō͘伊ê百姓平安，koh伊永遠tiàm-tī耶路撒冷。In-ūi Tāi-pi̍t kóng, Iâ-hô-hoa Í-sek-lia̍t ê Siōng-tè, í-keng hō͘ I ê peh-sìⁿ pêng-an, koh I éng-oán tiàm-tī Iâ-lō͘-sat-léng.

26利未人也m̄免koh 扛會幕，kap其中所用lóng總ê器具。Lī-bī lâng iā m̄-bián koh kng hōe-bō͘, kap kî-tiong só͘ ēng lóng-chóng ê khì-kū.

27因為照大衛臨終ê時所吩咐ê，利未人tùi二十歲以上lóng受算。In-ūi chiàu Tāi-pi̍t lîm-chiong ê sî só͘ hoan-hù--ê, Lī-bī lâng tùi jī-cha̍p hè í-chiūⁿ lóng siū-sǹg.

28因為伊ê職是跟隨亞倫ê kiáⁿ孫，來做耶和華殿ê工，就是tī chiah-ê院kap chiah-ê房來做工，亦hō͘ chiah-ê聖物清氣，來做耶和華殿ê工；In-ūi i ê chit sī kun-sûi A-lûn ê kiáⁿ-sun, lâi chòe Iâ-hô-hoa tiān ê kang, chiū-sī tī chiah ê īⁿ kap chiah ê pâng lâi chòe kang, ia̍h hō͘ chiah ê sèng-mi̍h chheng-khì, lâi chòe Iâ-hô-hoa tiān ê kang;

29料理排列ê餅，素祭ê麵粉，或是無酵ê薄餅，kap鼎內所pek，以及調和ê物；koh管理秤、量ê事。liāu-lí pâi-lia̍t ê piáⁿ, sò͘-chè ê mī-hún, he̍k-sī bô-kàⁿ ê po̍h-piáⁿ, kap tiáⁿ-lāi só͘ pek, í-ki̍p tiau-hô ê mi̍h; koh koán-lí chhìn, niû ê sū.

30Ta̍k早起khiā-teh來感謝o-ló耶和華，ta̍k-ê-hng也是án-ni。Ta̍k chá-khí khiā-teh lâi kám-siā o-ló Iâ-hô-hoa, ta̍k ê-hng iā sī án-ni.

31Koh tī安歇日，月ê初一，kap節期，獻chiah-ê燒祭hō͘耶和華，照物ê數額，照所定tio̍h ê例，常常獻tī耶和華ê面前。Koh tī an-hioh-ji̍t, ge̍h ê chhoe-it, kap choeh-kî, hiàn chiah ê sio-chè hō͘ Iâ-hô-hoa, chiàu mi̍h ê siàu-gia̍h, chiàu só͘ tiāⁿ-tio̍h ê lē, siông-siông hiàn tī Iâ-hô-hoa ê bīn-chêng.

32Koh hō͘伊顧守會幕ê責成，kap聖所ê責成，以及伊ê兄弟亞倫ê kiáⁿ孫所hō͘伊做ê責成，來服事tī耶和華ê厝。Koh hō͘ i kò͘-siú hōe-bō͘ ê chek-sêng, kap sèng-só͘ ê chek-sêng, í-ki̍p i ê hiaⁿ-tī A-lûn ê kiáⁿ-sun só͘ hō͘ i chòe ê chek-sêng, lâi ho̍k-sāi tī Iâ-hô-hoa ê chhù.

1亞倫kiáⁿ孫ê班列記tī下底：亞倫ê kiáⁿ Ná-tap、A-pí-hō͘、Í-lī-a-sat、Í-tha-má。A-lûn kiáⁿ-sun ê pan-lia̍t kì tī ē-tóe: A-lûn ê kiáⁿ Ná-tap, A-pí-hō͘, Í-lī-a-sat, Í-tha-má.

2Ná-tap、A-pí-hō͘比in老父khah事先死，koh無kiáⁿ；所以Í-lī-a-sat、Í-tha-má擔當祭司ê職。Ná-tap, A-pí-hō͘ pí in lāu-pē khah tāi-seng sí, koh bô kiáⁿ; só͘-í Í-lī-a-sat, Í-tha-má tam-tng chè-si ê chit.

3大衛kap Í-lī-a-sat kiáⁿ孫中ê Sat-tok，kap Í-tha-má kiáⁿ孫中ê A-hi-bí-le̍k，照in ê次序分in ê班列。Tāi-pi̍t kap Í-lī-a-sat kiáⁿ-sun tiong ê Sat-tok, kap Í-tha-má kiáⁿ-sun tiong ê A-hi-bí-le̍k, chiàu in ê chhù-sū pun in ê pan-lia̍t.

4Í-lī-a-sat kiáⁿ孫中ê頭人，比Í-tha-má kiáⁿ孫中所有ê khah-chōe，就分伊ê班tī下底。Í-lī-a-sat ê kiáⁿ孫中做族長ê有十六人；Í-tha-má ê kiáⁿ孫中，照伊ê老父ê家，有八人。Í-lī-a-sat kiáⁿ-sun tiong ê thâu-lâng, pí Í-tha-má kiáⁿ-sun tiong só͘-ū--ê khah-chōe, chiū pun i ê pan tī ē-tóe. Í-lī-a-sat ê kiáⁿ-sun tiong chòe cho̍k-tiúⁿ--ê ū cha̍p-la̍k lâng; Í-tha-má ê kiáⁿ-sun tiong, chiàu i ê lāu-pē ê ke, ū poeh-lâng.

5Í-lī-a-sat ê kiáⁿ孫，Í-tha-má ê kiáⁿ孫，lóng照抽籤分派，無分chit-ê hit-ê；有ê tī聖所做首領，有ê tī上帝面前做首領。Í-lī-a-sat ê kiáⁿ-sun, Í-tha-má ê kiáⁿ-sun, lóng chiàu thiu-chhiam hun-phài, bô hun chit-ê hit-ê; ū-ê tī Sèng-só͘ chòe siú-léng, ū-ê tī Siōng-tè bīn-chêng chòe siú-léng.

6做書記ê利未人，那但業ê kiáⁿ Sī-má-ngá，tī王kap hiah-ê首領kap祭司Sat-tok，A-pí-a-tha ê kiáⁿ A-hi-bí-le̍k，以及祭司kap利未人hiah-ê族長ê面前，記in ê名字；tī Í-lī-a-sat ê kiáⁿ孫中取一族，tī Í-tha-má ê kiáⁿ孫中取一族。Chòe su-kì ê Lī-bī lâng, Ná-tàn-gia̍p ê kiáⁿ Sī-má-ngá, tī ông kap hiah ê siú-léng kap chè-si Sat-tok, A-pí-a-tha ê kiáⁿ A-hi-bí-le̍k, í-ki̍p chè-si kap Lī-bī lâng hiah ê cho̍k-tiúⁿ ê bīn-chêng, kì in ê miâ-jī; tī Í-lī-a-sat ê kiáⁿ-sun tiong chhú chi̍t-cho̍k, tī Í-tha-má ê kiáⁿ-sun tiong chhú chi̍t-cho̍k.

7抽籤得tio̍h第一個，是Iâ-hô-ngá-li̍p，第二個是Iâ-tāi-ngá；Thiu-chhiam tit-tio̍h tē-it--ê, sī Iâ-hô-ngá-li̍p, tē-jī--ê sī Iâ-tāi-ngá;

8第三Hap-lîm，第四So-lîm；tē-saⁿ Hap-lîm, tē-sì So-lîm;

9第五Má-ki-ngá，第六Bí-ngá-bîn；tē-gō͘ Má-ki-ngá, tē-la̍k Bí-ngá-bîn;

10第七Hap-ko-su，第八A-pí-ngá；tē-chhit Hap-ko-su, tē-poeh A-pí-ngá;

11第九Iâ-su-a，第十Sī-ka-nî；tē-káu Iâ-su-a, tē-cha̍p Sī-ka-nî;

12第十一Í-lī-a-si̍t，第十二Ngá-kim；tē-cha̍p-it Í-lī-a-si̍t, tē-cha̍p-jī Ngá-kim;

13第十三Ô͘-pa，第十四Iâ-sī-pí-ap；tē-cha̍p-saⁿ Ô͘-pa, tē-cha̍p-sì Iâ-sī-pí-ap;

14第十五Phek-ka，第十六Im-be̍k；tē-cha̍p-gō͘ Phek-ka, tē-cha̍p-la̍k Im-be̍k;

15第十七Hi-sek，第十八Hap-pi̍t-sek；tē-cha̍p-chhit Hi-sek, tē-cha̍p-poeh Hap-pi̍t-sek;

16第十九Pí-tha-hi-ngá，第二十以西結；tē-cha̍p-káu Pí-tha-hi-ngá, tē-jī-cha̍p Í-se-kiat;

17第二十一Ngá-kun，第二十二Ka-boa̍t；tē-jī-cha̍p-it Ngá-kun, tē-jī-cha̍p-jī Ka-boa̍t;

18第二十三Tē-lâi-ngá，第二十四Má-se-a。tē-jī-cha̍p-saⁿ Tē-lâi ngá, tē-jī-cha̍p-sì Má-se-a.

19這是in做工ê班列，thang入耶和華ê厝，照in ê祖亞倫遵thàn耶和華以色列ê上帝所吩咐ê例。Che sī in chòe-kang ê pan-lia̍t, thang ji̍p Iâ-hô-hoa ê chhù, chiàu in ê chó͘ A-lûn chun-thàn Iâ-hô-hoa Í-sek-lia̍t ê Siōng-tè só͘ hoan-hù ê lē.

20利未其餘ê kiáⁿ孫記tī下底：Àm-lân ê kiáⁿ孫中有Su-pa-gia̍p，Su-pa-gia̍p ê kiáⁿ孫中有Iâ-hi-tí-a。Lī-bī kî-û ê kiáⁿ-sun kì tī ē-tóe: Àm-lân ê kiáⁿ-sun tiong ū Su-pa-gia̍p, Su-pa-gia̍p ê kiáⁿ-sun tiong ū Iâ-hi-tí-a.

21論到Lī-hap-pí-ngá，Lī-hap-pí-ngá ê kiáⁿ孫中，有I-sī-ngá做頭。Lūn-kàu Lī-hap-pí-ngá, Lī-hap-pí-ngá ê kiáⁿ-sun tiong, ū I-sī-ngá chòe-thâu.

22Í-su-hap ê kiáⁿ孫中有Sī-lô-mô͘；Sī-lô-mô͘ ê kiáⁿ孫中Ngá-hap。Í-su-hap ê kiáⁿ-sun tiong ū Sī-lô-mô͘; Sī-lô-mô͘ ê kiáⁿ-sun tiong Ngá-hap.

23Hi-pek-lûn ê kiáⁿ孫中，大ê Iâ-lī-ngá，第二個A-má-lī-a，第三個Ngá-hap-sek，第四個Iâ-ka-biān。Hi-pek-lûn ê kiáⁿ-sun tiong, tōa-ê Iâ-lī-ngá, tē-jī-ê A-má-lī-a, tē-saⁿ-ê Ngá-hap-sek, tē-sì-ê Iâ-ka-biān.

24O͘-siat ê kiáⁿ孫中有Bí-ka；Bí-ka ê kiáⁿ孫中有Sa-bi̍t。O͘-siat ê kiáⁿ-sun tiong ū Bí-ka; Bí-ka ê kiáⁿ-sun tiong ū Sa-bi̍t.

25Bí-ka ê兄弟是I-sī-ngá；I-sī-ngá ê kiáⁿ孫中有Sat-ka-lī-ngá。Bí-ka ê hiaⁿ-tī sī I-sī-ngá; I-sī-ngá ê kiáⁿ-sun tiong ū Sat-ka-lī-ngá.

26Bí-la̍h-lī ê kiáⁿ是Boa̍t-lī、Bó͘-sī；Ngá-se-ngá ê kiáⁿ有Pí-ná。Bí-la̍h-lī ê kiáⁿ sī Boa̍t-lī, Bó͘-sī; Ngá-se-ngá ê kiáⁿ ū Pí-ná.

27Bí-la̍h-lī ê kiáⁿ孫中，有Ngá-se-ngá ê kiáⁿ Pí-ná、Sok-hâm、Sat-khek、I-pí-lī。Bí-la̍h-lī ê kiáⁿ-sun tiong, ū Ngá-se-ngá ê kiáⁿ Pí-ná, Sok-hâm, Sat-khek, I-pí-lī.

28Boa̍t-lī ê kiáⁿ是Í-lī-a-sat，Í-lī-a-sat無kiáⁿ。Boa̍t-lī ê kiáⁿ sī Í-lī-a-sat, Í-lī-a-sat bô kiáⁿ.

29論到Ki-sū，Ki-sū ê kiáⁿ孫中有Iâ-la̍h-bia̍t。Lūn-kàu Ki-sū, Ki-sū ê kiáⁿ-sun tiong ū Iâ-la̍h-bia̍t.

30Bó͘-sī ê kiáⁿ是Boa̍t-le̍k、Í-tek、Iâ-lī-mô͘。Chiah-ê是利未ê kiáⁿ孫，照in ê宗族。Bó͘-sī ê kiáⁿ sī Boa̍t-le̍k, Í-tek, Iâ-lī-mô͘. chiah-ê sī Lī-bī ê kiáⁿ-sun, chiàu in ê chong-cho̍k.

31In tī大衛王kap Sat-tok、A-hi-bí-le̍k，kap祭司，以及利未人chiah-ê族長ê面前抽籤，親像in ê兄弟亞倫ê kiáⁿ孫一樣；ta̍k族ê做頭ê kap伊ê小弟lóng平平。In tī Tāi-pi̍t ông kap Sat-tok, A-hi-bí-le̍k, kap chè-si, í-ki̍p Lī-bī lâng chiah ê cho̍k-tiúⁿ ê bīn-chêng thiu-chhiam, chhin-chhiūⁿ in ê hiaⁿ-tī A-lûn ê kiáⁿ-sun chi̍t-iūⁿ; ta̍k-cho̍k ê chòe-thâu--ê kap i ê sió-tī lóng pîⁿ-pîⁿ.