1顧門ê班列記tī下底；Khó-la̍h族A-sat ê kiáⁿ孫中，有Khó-lī ê kiáⁿ Bí-si-lī-bí-ngá。Kò͘-mn̂g ê pan-lia̍t kì tī ē-tóe; Khó-la̍h cho̍k A-sat ê kiáⁿ-sun tiong, ū Khó-lī ê kiáⁿ Bí-si-lī-bí-ngá.

2Bí-si-lī-bí-ngá有kiáⁿ，大ê是撒迦利亞，第二個是Iâ-tia̍p，第三個Se-pa-tē-ngá，第四個 Iâ-thê-lia̍p；Bí-si-lī-bí-ngá ū kiáⁿ, tōa-ê sī Sat-ka-lī-a, tē-jī-ê sī Iâ-tia̍p, tē-saⁿ-ê Se-pa-tē-ngá, tē-sì-ê Iâ-thê-lia̍p;

3第五個Í-lân，第六個Iok-hap-lân，第七個Í-lī-iok-nái。tē-gō͘-ê Í-lân, tē-la̍k-ê Iok-hap-lân, tē-chhit-ê Í-lī-iok-nái.

4Gô-pia̍t-í-tong有kiáⁿ，大ê Sī-má-ngá，第二個Iok-sat-poa̍t，第三個Iok-a，第四個 Sa-kah，第五個那但業；Gô-pia̍t-í-tong ū kiáⁿ, tōa-ê Sī-má-ngá, tē-jī-ê Iok-sat-poa̍t, tē-saⁿ-ê Iok-a, tē-sì-ê Sa-kah, tē-gō͘-ê Ná-tàn-gia̍p;

5第六個A-bí-lī，第七個Í-sat-ka，第八個Pí-o͘-lī-thài；因為上帝賜福伊。tē-la̍k-ê A-bí-lī, tē-chhit-ê Í-sat-ka, tē-poeh-ê Pí-o͘-lī-thài; in-ūi Siōng-tè sù-hok i.

6伊ê kiáⁿ Sī-má-ngá有生kúi-nā ê kiáⁿ，是掌管in老父ê家，因為in是大勇士。I ê kiáⁿ Sī-má-ngá ū siⁿ kúi-nā ê kiáⁿ, sī chiáng-koán in lāu-pē ê ke, in-ūi in sī tōa ióng-sū.

7Sī-má-ngá ê kiáⁿ是Gô-tek-nî、Lī-hoat-ek、Gô-pī-tek、Í-lī-sat-pa，伊ê兄弟是勇士，koh有Í-lī-hō͘ kap Se-má-ka。Sī-má-ngá ê kiáⁿ sī Gô-tek-nî, Lī-hoat-ek, Gô-pī-tek, Í-lī-sat-pa, i ê hiaⁿ-tī sī ióng-sū, koh ū Í-lī-hō͘ kap Se-má-ka.

8Chiah-ê是Gô-pia̍t-í-tong ê kiáⁿ孫，in kap in ê kiáⁿ in ê兄弟，是勇士，有氣力gâu辦tāi-chì-ê，共六十二人，lóng是Gô-pia̍t-í-tong生ê。Chiah-ê sī Gô-pia̍t-í-tong ê kiáⁿ-sun, in kap in ê kiáⁿ in ê hiaⁿ-tī, sī ióng-sū, ū khùi-la̍t gâu pān tāi-chì--ê, kiōng la̍k-cha̍p-jī lâng, lóng sī Gô-pia̍t-í-tong siⁿ--ê.

9Bí-si-lī-bí-ngá ê kiáⁿ kap兄弟lóng是勇士，共十八人。Bí-si-lī-bí-ngá ê kiáⁿ kap hiaⁿ-tī lóng sī ióng-sū, kiōng cha̍p-poeh lâng.

10屬tī Bí-la̍h-lī ê kiáⁿ孫Hô-sat有kúi-nā ê kiáⁿ；大ê是Sin-lī，伊本m̄是大kiáⁿ，總是in老父設立伊做大；Sio̍k tī Bí-la̍h-lī ê kiáⁿ-sun Hô-sat ū kúi-nā ê kiáⁿ; tōa-ê sī Sin-lī, i pún m̄-sī tōa-kiáⁿ, chóng-sī in lāu-pē siat-li̍p i chòe-tōa;

11第二個是Hi-le̍k-ka，第三是Tí-pa-lī-ngá，第四是撒迦利亞；án-ni Hô-sat ê kiáⁿ kap兄弟共十三人。tē-jī-ê sī Hi-le̍k-ka, tē-saⁿ sī Tí-pa-lī-ngá, tē-sì sī Sat-ka-lī-a; án-ni Hô-sat ê kiáⁿ kap hiaⁿ-tī kiōng cha̍p-saⁿ lâng.

12Tī chiah-ê人，就是頭人ê中間，分派顧門ê班列，擔當職，親像伊ê兄弟一樣，tī耶和華ê殿來服事。Tī chiah ê lâng, chiū-sī thâu-lâng ê tiong-kan, hun-phài kò͘-mn̂g ê pan-lia̍t, tam-tng chit, chhin-chhiūⁿ i ê hiaⁿ-tī chi̍t-iūⁿ, tī Iâ-hô-hoa ê tiān lâi ho̍k-sāi.

13In無論大細，lóng照in ê宗族抽籤，顧守ta̍k-ê門。In bô-lūn tōa-sòe, lóng chiàu in ê chong-cho̍k thiu-chhiam, kò͘-siú ta̍k ê mn̂g.

14抽籤顧守東門ê是Sī-lī-bí-ngá；伊ê kiáⁿ撒迦利亞是精通ê謀士，人kā伊抽籤顧守北門。Thiu-chhiam kò͘-siú tang-mn̂g--ê sī Sī-lī-bí-ngá; i ê kiáⁿ Sat-ka-lī-a sī cheng-thong ê bô͘-sū, lâng kā i thiu-chhiam kò͘-siú pak-mn̂g.

15Gô-pia̍t-í-tong守南門；伊ê kiáⁿ守庫房。Gô-pia̍t-í-tong siú lâm-mn̂g; i ê kiáⁿ siú khò͘-pâng.

16Su-phèng kap Hô-sat顧守西門，tī óa近Sa-lī-ki門，透到上去ê街路，班kap班相對。Su-phèng kap Hô-sat kò͘-siú sai-mn̂g, tī óa-kūn Sa-lī-ki mn̂g, thàu-kàu chiūⁿ-khì ê ke-lō͘, pan kap pan saⁿ-tùi.

17Tī東pêng有六個利未人，tī北pêng ta̍k日有四人，tī南pêng ta̍k日有四人，tī庫房有兩人，koh有兩人相替換。Tī tang-pêng ū la̍k ê Lī-bī lâng, tī pak-pêng ta̍k-ji̍t ū sì-lâng, tī lâm-pêng ta̍k-ji̍t ū sì-lâng, tī khò͘-pâng ū nn̄g-lâng, koh ū nn̄g-lâng saⁿ thòe-ōaⁿ.

18Tī西勢tī Pa-pat，tī大街路有四個人，tī Pa-pat有兩人。Tī sai--sì tī Pa-pat, tī tōa ke-lō͘ ū sì ê lâng, tī Pa-pat ū nn̄g-lâng.

19Chiah-ê是Khó-la̍h kiáⁿ孫kap Bí-la̍h-lī ê kiáⁿ孫顧門ê班列。Chiah-ê sī Khó-la̍h kiáⁿ-sun kap Bí-la̍h-lī ê kiáⁿ-sun kò͘-mn̂g ê pan-lia̍t.

20利未人ê中間，A-hi-ngá管理上帝殿ê府庫，kap聖物ê府庫。Lī-bī lâng ê tiong-kan, A-hi-ngá koán-lí Siōng-tè tiān ê hú-khò͘, kap sèng-mi̍h ê hú-khò͘.

21論到La̍h-tàn ê kiáⁿ孫，就是Kek-sūn人La̍h-tàn ê kiáⁿ孫，lóng是族長，chit-ê La̍h-tàn是Kek-sūn人，伊ê kiáⁿ是Iâ-hi-i-lī。Lūn-kàu La̍h-tàn ê kiáⁿ-sun, chiū-sī Kek-sūn lâng La̍h-tàn ê kiáⁿ-sun, lóng sī cho̍k-tiúⁿ, chit ê La̍h-tàn sī Kek-sūn lâng, i ê kiáⁿ sī Iâ-hi-i-lī.

22Iâ-hi-i-lī ê kiáⁿ；Se-thán kap伊ê小弟約珥，掌管耶和華殿內ê府庫。Iâ-hi-i-lī ê kiáⁿ; Se-thán kap i ê sió-tī Iok-jíⁿ, chiáng-koán Iâ-hô-hoa tiān-lāi ê hú-khò͘.

23Àm-lâm族、Í-su-hap族、Hi-pek-lûn族、O͘-siat族，也有職份；Àm-lâm cho̍k, Í-su-hap cho̍k, Hi-pek-lûn cho̍k, O͘-siat cho̍k, iā ū chit-hūn;

24Koh有摩西ê孫，Kek-sūn ê kiáⁿ，Sè-pò͘-gia̍p管理府庫。koh ū Mô͘-se ê sun, Kek-sūn ê kiáⁿ, Sè-pò͘-gia̍p koán-lí hú-khò͘.

25iáu有伊ê兄弟Í-lī-í-siā。Í-lī-í-siā ê kiáⁿ Lī-hap-pí-ngá，Lī-hap-pí-ngá ê kiáⁿ是Iâ-su-a，Iâ-su-a ê kiáⁿ是Iok-lân，Iok-lân ê kiáⁿ是Sè-ki-lī，Sè-ki-lī ê kiáⁿ是Sī-lô-bi̍t。Iáu ū i ê hiaⁿ-tī Í-lī-í-siā. Í-lī-í-siā ê kiáⁿ Lī-hap-pí-ngá, Lī-hap-pí-ngá ê kiáⁿ sī Iâ-su-a, Iâ-su-a ê kiáⁿ sī Iok-lân, Iok-lân ê kiáⁿ sī Sè-ki-lī, Sè-ki-lī ê kiáⁿ sī Sī-lô-bi̍t.

26Chit-ê Sī-lô-bi̍t kap伊ê兄弟掌管聖物ê府庫，就是大衛王kap眾族長、千總、百總，kap軍長所獻ê。Chit ê Sī-lô-bi̍t kap i ê hiaⁿ-tī chiáng-koán sèng-mi̍h ê hú-khò͘, chiū-sī Tāi-pi̍t ông kap chèng cho̍k-tiúⁿ, chhian-chóng, pé-chóng, kap kun-tiúⁿ só͘ hiàn-ê.

27In用交戰ê時所搶ê物，取伊來獻，thang修整耶和華ê殿。In ēng kau-chiàn ê sî só͘ chhiúⁿ ê mi̍h, chhú i lâi hiàn, thang siu-chéng Iâ-hô-hoa ê tiān.

28先見ê撒母耳，Ki-sū ê kiáⁿ掃羅，Nî-jíⁿ ê kiáⁿ Ap-nî-jíⁿ，Sé-ló͘-ngá ê kiáⁿ Iok-ap所獻ê物，kap見有所獻ê物，lóng歸Sī-lô-bi̍t kap伊ê兄弟管理。Sian-kiàn ê Sat-bó͘-jíⁿ, Ki-sū ê kiáⁿ Sò-lô, Nî-jíⁿ ê kiáⁿ Ap-nî-jíⁿ, Sé-ló͘-ngá ê kiáⁿ Iok-ap só͘ hiàn ê mi̍h, kap kìⁿ-ū só͘ hiàn ê mi̍h, lóng kui Sī-lô-bi̍t kap i ê hiaⁿ-tī koán-lí.

29Í-su-hap族有Ki-ná-nî-ngá kap伊ê眾kiáⁿ做官長kap士師，管理以色列ê外事。Í-su-hap cho̍k ū Ki-ná-nî-ngá kap i ê chèng-kiáⁿ chòe koaⁿ-tiúⁿ kap sū-su, koán-lí Í-sek-lia̍t ê gōa-sū.

30Hi-pek-lûn族有Hap-sa-pí-ngá kap伊ê兄弟，一千七百人，lóng是勇士，治理約旦河外西勢ê以色列人，管理耶和華ê事，kap服事王ê職。Hi-pek-lûn cho̍k ū Hap-sa-pí-ngá kap i ê hiaⁿ-tī, chi̍t-chheng chhit-pah lâng, lóng sī ióng-sū, tī-lí Iok-tàn hô-gōa sai--sì ê Í-sek-lia̍t lâng, koán-lí Iâ-hô-hoa ê sū, kap ho̍k-sāi ông ê chit.

31Tī Hi-pek-lûn族中，有Iâ-lī-ngá做頭，就是tī Hi-pek-lûn族中照伊列祖ê世系，tī大衛坐位ê第四十年，tī Ki-lia̍t ê Ngá-siat，chhē-tio̍h in中間kúi-nā ê大勇士。Tī Hi-pek-lûn cho̍k tiong, ū Iâ-lī-ngá chòe-thâu, chiū-sī tī Hi-pek-lûn cho̍k-tiong chiàu i lia̍t-chó͘ ê sè-hē, tī Tāi-pi̍t chē-ūi ê tē sì-cha̍p nî, tī Ki-lia̍t ê Ngá-siat, chhē-tio̍h in tiong-kan kúi-nā ê tōa ióng-sū.

32伊ê兄弟有勇敢做族長，兩千七百人；大衛王派chiah-ê人管轄Liû-piān、Ka-tek、Má-ná-se半支派，來辨理上帝一切ê事kap王ê事。I ê hiaⁿ-tī ū ióng-kám chòe cho̍k-tiúⁿ, nn̄g-chheng chhit-pah lâng; Tāi-pi̍t ông phài chiah ê lâng koán-hat Liû-piān, Ka-tek, Má-ná-se pòaⁿ-chi-phài, lâi pān-lí Siōng-tè it-chhè ê sū kap ông ê sū.

1以色列人ê族長、千總、百總，kap官長，lóng有分班定tio̍h，ta̍k班有兩萬四千人，全年照月輪流，替換出入來服事王。Í-sek-lia̍t lâng ê cho̍k-tiúⁿ, chhian-chóng, pé-chóng, kap koaⁿ-tiúⁿ, lóng ū hun-pan tiāⁿ-tio̍h, ta̍k-pan ū nn̄g-bān sì-chheng lâng, choân-nî chiàu ge̍h lûn-liû, thòe-ōaⁿ chhut-ji̍p lâi ho̍k-sāi ông.

2正月第一班ê班長是Sat-pa-tē-gia̍p ê kiáⁿ Ngá-sok-pan；伊ê班內有兩萬四千人；Chiaⁿ-ge̍h tē-it pan ê pan-tiúⁿ sī Sat-pa-tē-gia̍p ê kiáⁿ Ngá-sok-pan; i ê pan-lāi ū nn̄g-bān sì-chheng lâng;

3伊是Hoat-le̍k-su ê kiáⁿ孫，管轄正月一切ê軍長。i sī Hoat-le̍k-su ê kiáⁿ-sun, koán-hat chiaⁿ-ge̍h it-chhè ê kun-tiúⁿ.

4二月ê班長是A-hap-hi人Tó-tāi，koh有Bi̍t-ki-lô也是hit班ê頭人；伊ê班內有兩萬四千人。Jī-ge̍h ê pan-tiúⁿ sī A-hap-hi lâng Tó-tāi, koh ū Bi̍t-ki-lô iā sī hit-pan ê thâu-lâng; i ê pan-lāi ū nn̄g-bān sì-chheng lâng.

5三月第三個軍長是祭司頭Iâ-hô-iâ-tāi ê kiáⁿ Pí-ná-ngá；伊ê班內有兩萬四千人。Saⁿ-ge̍h tē-saⁿ ê kun-tiúⁿ sī chè-si-thâu Iâ-hô-iâ-tāi ê kiáⁿ Pí-ná-ngá; i ê pan-lāi ū nn̄g-bān sì-chheng lâng.

6Chit-ê Pí-ná-ngá是三十人中ê勇士，管理hit三十人；伊ê班內koh有伊ê kiáⁿ Àm-bí-sat-poa̍t。Chit ê Pí-ná-ngá sī saⁿ-cha̍p lâng tiong ê ióng-sū, koán-lí hit saⁿ-cha̍p lâng; i ê pan-lāi koh ū i ê kiáⁿ Àm-bí-sat-poa̍t.

7四月第四個班長是Iok-ap ê小弟A-sat-hek；續接伊ê，是伊ê kiáⁿ Se-pa-tē-ngá；伊ê班內有兩萬四千人。Sì-ge̍h tē-sì ê pan-tiúⁿ sī Iok-ap ê sió-tī A-sat-hek; sòa-chiap i--ê, sī i ê kiáⁿ Se-pa-tē-ngá; i ê pan-lāi ū nn̄g-bān sì-chheng lâng.

8五月第五個班長是I-su-la̍h人San-ha̍p；伊ê班內有兩萬四千人。Gō͘-ge̍h tē-gō͘ ê pan-tiúⁿ sī I-su-la̍h lâng San-ha̍p; i ê pan-lāi ū nn̄g-bān sì-chheng lâng.

9六月第六個班長是Thê-ko-a人Ek-kiat ê kiáⁿ Í-la̍h；伊ê班內有兩萬四千人。La̍k-ge̍h tē-la̍k ê pan-tiúⁿ sī Thê-ko-a lâng Ek-kiat ê kiáⁿ Í-la̍h; i ê pan-lāi ū nn̄g-bān sì-chheng lâng.

10七月第七個班長是Í-hoat-liân族，Pí-lûn人Hi-lī-su；伊ê班內有兩萬四千人。Chhit-ge̍h tē-chhit ê pan-tiúⁿ sī Í-hoat-liân cho̍k, Pí-lûn lâng Hi-lī-su; i ê pan-lāi ū nn̄g-bān sì-chheng lâng.

11八月第八個班長是謝拉族Hō͘-sa人Se-pí-kai；伊ê班內有兩萬四千人。Poeh-ge̍h tē-poeh ê pan-tiúⁿ sī Siā-la̍h cho̍k Hō͘-sa lâng Se-pí-kai; i ê pan-lāi ū nn̄g-bān sì-chheng lâng.

12九月第九個班長是便雅憫族，A-ná-tu̍t人A-pí-í-siā；伊ê班內有兩萬四千人。Káu-ge̍h tē-káu ê pan-tiúⁿ sī Piān-ngá-bín cho̍k, A-ná-tu̍t lâng A-pí-í-siā; i ê pan-lāi ū nn̄g-bān sì-chheng lâng.

13十月第十個班長是謝拉族，Nî-tô-hoat人，Má-hap-lâi；伊ê班內有兩萬四千人。Cha̍p-ge̍h tē-cha̍p ê pan-tiúⁿ sī Siā-la̍h cho̍k, Nî-tô-hoat lâng, Má-hap-lâi; i ê pan-lāi ū nn̄g-bān sì-chheng lâng.

14十一月第十一個班長是Í-hoat-liân族，Pí-la̍h-tùn ê kiáⁿ Pí-ná-ngá；伊ê班內有兩萬四千人。Cha̍p-it-ge̍h tē-cha̍p-it ê pan-tiúⁿ sī Í-hoat-liân cho̍k, Pí-la̍h-tùn ê kiáⁿ Pí-ná-ngá; i ê pan-lāi ū nn̄g-bān sì-chheng lâng.

15十二月第十二個班長是Gô-to-lia̍p族，Nî-tô-hoat人Hek-tāi；伊ê班內有兩萬四千人。Cha̍p-jī-ge̍h tē-cha̍p-jī ê pan-tiúⁿ sī Gô-to-lia̍p cho̍k, Nî-tô-hoat lâng Hek-tāi; i ê pan-lāi ū nn̄g-bān sì-chheng lâng.

16管理以色列眾支派ê，記tī下底；管Liû-piān族ê，是Sè-ki-lī ê kiáⁿ，Í-lī-í-siā；管西門族ê，是Má-ka ê kiáⁿ Sī-hoat-thê-ngá；Koán-lí Í-sek-lia̍t chèng chi-phài--ê, kì tī ē-tóe; koán Liû-piān cho̍k--ê, sī Sè-ki-lī ê kiáⁿ, Í-lī-í-siā; koán Se-biān cho̍k--ê, sī Má-ka ê kiáⁿ Sī-hoat-thê-ngá;

17管利未人ê，是Ki-bó͘-lī ê kiáⁿ Hap-sa-pí-ngá；管亞倫ê族ê是Sat-tok；koán Lī-bī lâng--ê, sī Ki-bó͘-lī ê kiáⁿ Hap-sa-pí-ngá; koán A-lûn ê cho̍k--ê sī Sat-tok;

18管猶大人ê是大衛ê兄Í-lī-hō͘；管Í-sat-ka族ê，是Bí-ka-le̍k ê kiáⁿ Àm-lī；koán Iû-tāi lâng--ê sī Tāi-pi̍t ê hiaⁿ Í-lī-hō͘; koán Í-sat-ka cho̍k--ê, sī Bí-ka-le̍k ê kiáⁿ Àm-lī;

19管Se-pò͘-lûn族ê，是Gô-pa-tē-ngá ê kiáⁿ I-si-má-ngá；管Ná-hut-tha-lī人ê，是A-su-lia̍t ê kiáⁿ Iâ-lī-mô͘；koán Se-pò͘-lûn cho̍k--ê, sī Gô-pa-tē-ngá ê kiáⁿ I-si-má-ngá; koán Ná-hut-tha-lī lâng--ê, sī A-su-lia̍t ê kiáⁿ Iâ-lī-mô͘;

20管Í-hoat-liân族ê，是O-sat-sè-ngá ê kiaN2Ho5-sè-a；管Má-ná-se半支派ê，是Pí-tāi-ngá ê kiáⁿ約珥；koán Í-hoat-liân cho̍k--ê, sī O-sat-sè-ngá ê kiáⁿ Hô-sè-a; koán Má-ná-se pòaⁿ-chi-phài--ê, sī Pí-tāi-ngá ê kiáⁿ Iok-jíⁿ;

21管Ki-lia̍t地Má-ná-se半支派ê，是撒迦利亞ê kiáⁿ Ek-to；管便雅憫族ê，是Ap-nî-jíⁿ ê kiáⁿ Ngá-se-gia̍p；koán Ki-lia̍t tōe Má-ná-se pòaⁿ-chi-phài--ê, sī Sat-ka-lī-a ê kiáⁿ Ek-to; koán Piān-ngá-bín cho̍k--ê, sī Ap-nî-jíⁿ ê kiáⁿ Ngá-se-gia̍p;

22管Tàn族ê，是Iâ-lô-hán ê kiáⁿ A-sat-lia̍t。Chiah-ê是以色列眾支派ê首領。koán Tàn cho̍k--ê, sī Iâ-lô-hán ê kiáⁿ A-sat-lia̍t. Chiah-ê sī Í-sek-lia̍t chèng chi-phài ê siú-léng.

23以色列人二十歲內ê，大衛無算伊；因為耶和華bat講，伊beh加添以色列人親像天頂ê星。Í-sek-lia̍t lâng jī-cha̍p hè lāi--ê, Tāi-pi̍t bô sǹg i; in-ūi Iâ-hô-hoa bat kóng, I beh ke-thiⁿ Í-sek-lia̍t lâng chhin-chhiūⁿ thiⁿ-téng ê chhiⁿ.

24Sé-ló͘-ngá ê kiáⁿ Iok-ap起手算伊；總是對chit-ê事有受氣到tī以色列，所以無算到明白；伊ê數額也無記tī大衛王ê歷代志錄。Sé-ló͘-ngá ê kiáⁿ Iok-ap khí-chhiú sǹg i; chóng-sī tùi chit ê sū ū siū-khì kàu tī Í-sek-lia̍t, só͘-í bô sǹg kàu bêng-pe̍k; i ê siàu-gia̍h iā bô kì tī Tāi-pi̍t ông ê le̍k-tāi chì-lio̍k.

25掌管王ê府庫ê，是A-tia̍p ê kiáⁿ Ap-su-má-ui；掌管田野、城邑、鄉庄、衛所ê府庫ê，是O͘-se-ngá ê kiáⁿ約拿單。Chiáng-koán ông ê hú-khò͘--ê, sī A-tia̍p ê kiáⁿ Ap-su-má-ui; chiáng-koán chhân-iá, siâⁿ-ip, hiuⁿ-chng, ōe-só͘ ê hú-khò͘-ê, sī O͘-se-ngá ê kiáⁿ Iok-ná-tan.

26掌管作田ê農夫，是Ki-lio̍k ê kiáⁿ Í-su-lī。Chiáng-koán choh-chhân ê lông-hu, sī Ki-lio̍k ê kiáⁿ Í-su-lī.

27掌管葡萄園ê，是La̍h-má人Sī-múi，掌管葡萄園ê酒池，是Si̍t-hut-bí人Sat-pa-tí。Chiáng-koán phû-tô-hn̂g--ê, sī La̍h-má lâng Sī-múi, chiáng-koán phû-tô-hn̂g ê chiú-tî, sī Si̍t-hut-bí lâng Sat-pa-tí.

28掌管平洋ê橄欖樹kap桑材是Ki-tē-lí人Pa-le̍k-hap-lâm；掌管油池是Iok-a-si。Chiáng-koán pîⁿ-iûⁿ ê kaⁿ-ná-chhiū kap sng-châi sī Ki-tē-lí lâng Pa-le̍k-hap-lâm; chiáng-koán iû-tî sī Iok-a-si.

29掌管Sa-lûn飼牛群ê，是Sa-lûn人Si-thê-nāi；掌管山谷飼牛群ê，是A-tē-nāi ê kiáⁿ Sa-hoat。Chiáng-koán Sa-lûn chhī gû-kûn--ê, sī Sa-lûn lâng Si-thê-nāi; chiáng-koán soaⁿ-kok chhī gû-kûn--ê, sī A-tē-nāi ê kiáⁿ Sa-hoat.

30掌管駱駝ê，是以實瑪利人A-pí-le̍k；管驢ê，是Bí-lûn人Iâ-hi-tí-a。Chiáng-koán lo̍k-tô--ê, sī Í-si̍t-má-lī lâng A-pí-le̍k; koán lû--ê, sī Bí-lûn lâng Iâ-hi-tí-a.

31掌管羊群ê，是夏甲人Ngá-sek。Chiah-ê lóng是kā大衛王掌管產業ê。Chiáng-koán iûⁿ-kûn--ê, sī Hā-kah lâng Ngá-sek. Chiah ê lóng sī kā Tāi-pi̍t ông chiáng-koán sán-gia̍p--ê.

32大衛ê叔約拿單做謀士，chit-ê人有智慧koh做書記；Hap-mô͘-nî ê kiáⁿ Iâ-iat做王眾kiáⁿ ê同伴。Tāi-pi̍t ê chek Iok-ná-tan chòe bô͘-sū, chit ê lâng ū tì-hūi koh chòe su-kì; Hap-mô͘-nî ê kiáⁿ Iâ-iat chòe ông chèng-kiáⁿ ê tâng-phōaⁿ.

33A-hi-to-hut也做王ê謀士；A-ki人Hō͘-su做王ê朋友。A-hi-to-hut iā chòe ông ê bô͘-sū; A-ki lâng Hō͘-su chòe ông ê pêng-iú.

34續接A-hi-to-hut ê，有Pí-ná-ngá ê kiáⁿ Iâ-hô-iâ-tāi kap A-pí-a-tha；Iok-ap做王ê陸軍總長。Sòa-chiap A-hi-to-hut--ê, ū Pí-ná-ngá ê kiáⁿ Iâ-hô-iâ-tāi kap A-pí-a-tha; Iok-ap chòe ông ê lio̍k-kun chóng-tiúⁿ.

1大衛招集以色列ê首領，各支派ê首領，kap輪班服事王ê軍長、千總、百總，掌管王kap王ê kiáⁿ ê產業cheng-siⁿ-ê，kap太監，以及大權能ê，kap大權能ê勇士，lóng到耶路撒冷。Tāi-pi̍t chio-chi̍p Í-sek-lia̍t ê siú-léng, kok chi-phài ê siú-léng, kap lûn-pan ho̍k-sāi ông ê kun-tiúⁿ, chhian-chóng, pé-chóng, chiáng-koán ông kap ông ê kiáⁿ ê sán-gia̍p cheng-siⁿ--ê, kap thài-kàm, í-ki̍p tōa koân-lêng ê, kap tōa koân-lêng ê ióng-sū, lóng kàu Iâ-lō͘-sat-léng.

2大衛王就khiā起來講，我ê兄弟，我ê百姓ah，lín tio̍h聽我ê話；我ê心本想beh為tio̍h耶和華ê約櫃，koh為tio̍h咱ê上帝ê腳踏椅，起殿來安置伊；我已經備辦beh起。Tāi-pi̍t ông chiū khiā--khí-lâi kóng, Góa ê hiaⁿ-tī, góa ê peh-sìⁿ ah, lín tio̍h thiaⁿ góa ê ōe; góa ê sim pún siūⁿ beh ūi-tio̍h Iâ-hô-hoa ê iok-kūi, koh ūi-tio̍h lán ê Siōng-tè ê kha-ta̍h-í, khí tiān lâi an-tì i; góa í-keng pī-pān beh khí.

3總是上帝對我講，你bōe得thang為我ê名起殿，因為你是戰士，有hō͘人流血。Chóng-sī Siōng-tè tùi góa kóng, Lí bōe-tit-thang ūi Góa ê miâ khí tiān, in-ūi lí sī chiàn-sū, ū hō͘ lâng lâu-huih.

4M̄-kú耶和華以色列ê上帝，tī我ê父全家揀我做以色列王直到永遠；因為伊揀猶大做首領；tī猶大ê支派中揀我ê父ê家；tī我ê父ê眾kiáⁿ中歡喜我，設立我做以色列眾人ê王。M̄-kú Iâ-hô-hoa Í-sek-lia̍t ê Siōng-tè, tī góa ê pē choân-ke kéng góa chòe Í-sek-lia̍t ông ti̍t-kàu éng-oán; in-ūi I kéng Iû-tāi chòe siú-léng; tī Iû-tāi ê chi-phài tiong kéng góa ê pē ê ke; tī góa ê pē ê chèng-kiáⁿ tiong hoaⁿ-hí góa, siat-li̍p góa chòe Í-sek-lia̍t chèng-lâng ê ông.

5耶和華賞賜我chōe-chōe kiáⁿ，tī我ê kiáⁿ ê中間，揀我ê kiáⁿ所羅門，tī耶和華ê國坐位，治理以色列。Iâ-hô-hoa siúⁿ-sù góa chōe-chōe kiáⁿ, tī góa ê kiáⁿ ê tiong-kan, kéng góa ê kiáⁿ Só͘-lô-bûn, tī Iâ-hô-hoa ê kok chē-ūi, tī-lí Í-sek-lia̍t.

6伊koh對我講，你ê kiáⁿ所羅門beh 起我ê殿我ê院；因為我揀伊做我ê kiáⁿ，我也beh做伊ê父。I koh tùi góa kóng, Lí ê kiáⁿ Só͘-lô-bûn beh khí Góa ê tiān Góa ê īⁿ; in-ūi Góa kéng i chòe Góa ê kiáⁿ, Góa iā beh chòe i ê pē.

7伊若久長遵thàn我ê誡命法度，親像今á日，我就beh堅固伊ê國位，直到永遠。I nā kú-tn̂g chun-thàn Góa ê kài-bēng hoat-tō͘, chhin-chhiūⁿ kin-á-ji̍t, Góa chiū beh kian-kò͘ i ê kok-ūi, ti̍t-kàu éng-oán.

8Taⁿ tī耶和華ê會，以色列眾人ê面前，咱ê上帝也聽見，lín tio̍h查考lín ê上帝耶和華ê誡命來執守伊；án-ni lín thang享受chit-ê好ê地，留hō͘ lín後代ê kiáⁿ孫，永遠做業。Taⁿ tī Iâ-hô-hoa ê hōe, Í-sek-lia̍t chèng-lâng ê bīn-chêng, lán ê Siōng-tè iā thiaⁿ-kìⁿ, lín tio̍h chhâ-khó lín ê Siōng-tè Iâ-hô-hoa ê kài-bēng lâi chip-siú i; án-ni lín thang hióng-siū chit ê hó ê tōe, lâu hō͘ lín āu-tāi ê kiáⁿ-sun, éng-oán chòe-gia̍p.

9我ê kiáⁿ所羅門ah，你tio̍h認識你ê父ê上帝，誠實心歡喜服事伊；因為耶和華鑑察眾人ê心，知lóng總ê心思念頭；你若chhē伊，伊beh hō͘你tú-tio̍h；你若放sak伊，伊beh永遠拒絕你；Góa ê kiáⁿ Só͘-lô-bûn ah, lí tio̍h jīn-bat lí ê pē ê Siōng-tè, sêng-si̍t sim hoaⁿ-hí ho̍k-sāi I; in-ūi Iâ-hô-hoa kàm-chhat chèng-lâng ê sim, chai lóng-chóng ê sim-su liām-thâu; lí nā chhē I, I beh hō͘ lí tú-tio̍h; lí nā pàng-sak I, I beh éng-oán kū-choa̍t lí;

10你tio̍h謹慎，因為耶和華揀你起厝做聖所；你tio̍h勇敢去做。lí tio̍h kín-sīn, in-ūi Iâ-hô-hoa kéng lí khí chhù chòe sèng-só͘; lí tio̍h ióng-kám khì chòe.

11大衛將殿堂ê léng廊、房間、府庫、樓閣、內殿，kap施恩所hit間，一切ê圖樣，交伊ê kiáⁿ所羅門；Tāi-pi̍t chiong tiān-tn̂g ê léng-lông, pâng-keng, hú-khò͘, lâu-koh, lāi-tiān, kap Si-un-só͘ hit-keng, it-chhè ê tô͘-iūⁿ, kau i ê kiáⁿ Só͘-lô-bûn;

12Koh用tùi神所得tio̍h一切ê圖樣，就是耶和華殿ê院，四圍ê房，上帝殿ê府庫，kap聖物ê府庫chiah-ê圖樣，lóng交伊；koh ēng tùi Sîn só͘ tit-tio̍h it-chhè ê tô͘-iūⁿ, chiū-sī Iâ-hô-hoa tiān ê īⁿ, sì-ûi ê pâng, Siōng-tè tiān ê hú-khò͘, kap sèng-mi̍h ê hú-khò͘ chiah ê tô͘-iūⁿ, lóng kau i;

13Koh指示伊祭司kap利未人ê班列，kap耶和華殿內服事ê工，以及耶和華殿內服事ê器具；koh chí-sī i chè-si kap Lī-bī lâng ê pan-lia̍t, kap Iâ-hô-hoa tiān-lāi ho̍k-sāi ê kang, í-ki̍p Iâ-hô-hoa tiān-lāi ho̍k-sāi ê khì-kū;

14Koh秤金hō͘伊做ta̍k樣應用ê金器；亦秤銀hō͘伊，做ta̍k樣應用ê銀器；koh chhìn kim hō͘ i chòe ta̍k-iūⁿ èng-iōng ê kim-khì; ia̍h chhìn gûn hō͘ i, chòe ta̍k-iūⁿ èng-iōng ê gûn-khì;

15就是chiah-ê金燈台kap伊ê盞，就秤金來做ta̍k-ê燈台kap伊ê盞，koh用做銀燈台ê銀來秤hō͘伊；伊ê燈台kap伊ê盞lóng是án-ni，照ta̍k-ê燈台ê路用；chiū-sī chiah ê kim teng-tâi kap i ê chóaⁿ, chiū chhìn kim lâi chòe ta̍k ê teng-tâi kap i ê chóaⁿ, koh ēng chòe gûn teng-tâi ê gûn lâi chhìn hō͘ i; i ê teng-tâi kap i ê chóaⁿ lóng sī án-ni, chiàu ta̍k ê teng-tâi ê lō͘-ēng;

16Koh秤金hō͘伊來做排列餅ê桌；亦秤銀來做銀ê桌；koh chhìn kim hō͘ i lâi chòe pâi-lia̍t piáⁿ ê toh; ia̍h chhìn gûn lâi chòe gûn ê toh;

17Koh用好金hō͘伊做肉叉、盤、杯；koh秤金，hō͘伊thang做ta̍k-ê金碗，秤銀hō͘伊做ta̍k-ê銀碗；koh ēng hó-kim hō͘ i chòe bah-chhe, pôaⁿ, poe; koh chhìn kim, hō͘ i thang chòe ta̍k ê kim-óaⁿ, chhìn gûn hō͘ i chòe ta̍k ê gûn-óaⁿ;

18Koh秤好金hō͘伊thang做香壇；亦用金做ki-lō͘兵車ê款式，in thí開翼，遮蓋耶和華ê約櫃。koh chhìn hó-kim hō͘ i thang chòe hiuⁿ-tôaⁿ; ia̍h ēng kim chòe ki-lō͘-peng chhia ê khoán-sit, in thí-khui si̍t, jia-khàm Iâ-hô-hoa ê iok-kūi.

19大衛講，頂面chiah-ê規模，lóng是我得tio̍h耶和華默示寫出來ê。Tāi-pi̍t kóng, Téng-bīn chiah ê kui-bô͘, lóng sī góa tit-tio̍h Iâ-hô-hoa be̍k-sī siá chhut-lâi--ê.

20大衛koh kā伊ê kiáⁿ所羅門講，你tio̍h勇敢壯膽去做；莫得忍，亦莫得驚；因為耶和華上帝，就是我ê上帝，kap你tī-teh；伊的確無離開你，亦無放sak你，直到耶和華殿ê工lóng明白。Tāi-pi̍t koh kā i ê kiáⁿ Só͘-lô-bûn kóng, Lí tio̍h ióng-kám chòng-táⁿ khì chòe; bo̍h-tit lún, ia̍h bo̍h-tit kiaⁿ; in-ūi Iâ-hô-hoa Siōng-tè, chiū-sī góa ê Siōng-tè, kap lí tī-teh; I tek-khak bô lī-khui lí, ia̍h bô pàng-sak lí, ti̍t-kàu Iâ-hô-hoa tiān ê kang lóng bêng-pe̍k.

21看ah，有祭司kap利未人ê ta̍k班，為tio̍h beh辨理上帝殿ta̍k項ê事；koh有奇巧ê人，tī ta̍k項ê工歡喜幫贊你；亦有chiah-ê首領kap眾百姓一心聽thàn你ê命令。Khòaⁿ ah, ū chè-si kap Lī-bī lâng ê ta̍k-pan, ūi-tio̍h beh pān-lí Siōng-tè tiān ta̍k-hāng ê sū; koh ū kî-khiáu ê lâng, tī ta̍k-hāng ê kang hoaⁿ-hí pang-chān lí; ia̍h ū chiah ê siú-léng kap chèng peh-sìⁿ chi̍t-sim thiaⁿ-thàn lí ê bēng-lēng.