1以色列人ê族長、千總、百總，kap官長，lóng有分班定tio̍h，ta̍k班有兩萬四千人，全年照月輪流，替換出入來服事王。Í-sek-lia̍t lâng ê cho̍k-tiúⁿ, chhian-chóng, pé-chóng, kap koaⁿ-tiúⁿ, lóng ū hun-pan tiāⁿ-tio̍h, ta̍k-pan ū nn̄g-bān sì-chheng lâng, choân-nî chiàu ge̍h lûn-liû, thòe-ōaⁿ chhut-ji̍p lâi ho̍k-sāi ông.

2正月第一班ê班長是Sat-pa-tē-gia̍p ê kiáⁿ Ngá-sok-pan；伊ê班內有兩萬四千人；Chiaⁿ-ge̍h tē-it pan ê pan-tiúⁿ sī Sat-pa-tē-gia̍p ê kiáⁿ Ngá-sok-pan; i ê pan-lāi ū nn̄g-bān sì-chheng lâng;

3伊是Hoat-le̍k-su ê kiáⁿ孫，管轄正月一切ê軍長。i sī Hoat-le̍k-su ê kiáⁿ-sun, koán-hat chiaⁿ-ge̍h it-chhè ê kun-tiúⁿ.

4二月ê班長是A-hap-hi人Tó-tāi，koh有Bi̍t-ki-lô也是hit班ê頭人；伊ê班內有兩萬四千人。Jī-ge̍h ê pan-tiúⁿ sī A-hap-hi lâng Tó-tāi, koh ū Bi̍t-ki-lô iā sī hit-pan ê thâu-lâng; i ê pan-lāi ū nn̄g-bān sì-chheng lâng.

5三月第三個軍長是祭司頭Iâ-hô-iâ-tāi ê kiáⁿ Pí-ná-ngá；伊ê班內有兩萬四千人。Saⁿ-ge̍h tē-saⁿ ê kun-tiúⁿ sī chè-si-thâu Iâ-hô-iâ-tāi ê kiáⁿ Pí-ná-ngá; i ê pan-lāi ū nn̄g-bān sì-chheng lâng.

6Chit-ê Pí-ná-ngá是三十人中ê勇士，管理hit三十人；伊ê班內koh有伊ê kiáⁿ Àm-bí-sat-poa̍t。Chit ê Pí-ná-ngá sī saⁿ-cha̍p lâng tiong ê ióng-sū, koán-lí hit saⁿ-cha̍p lâng; i ê pan-lāi koh ū i ê kiáⁿ Àm-bí-sat-poa̍t.

7四月第四個班長是Iok-ap ê小弟A-sat-hek；續接伊ê，是伊ê kiáⁿ Se-pa-tē-ngá；伊ê班內有兩萬四千人。Sì-ge̍h tē-sì ê pan-tiúⁿ sī Iok-ap ê sió-tī A-sat-hek; sòa-chiap i--ê, sī i ê kiáⁿ Se-pa-tē-ngá; i ê pan-lāi ū nn̄g-bān sì-chheng lâng.

8五月第五個班長是I-su-la̍h人San-ha̍p；伊ê班內有兩萬四千人。Gō͘-ge̍h tē-gō͘ ê pan-tiúⁿ sī I-su-la̍h lâng San-ha̍p; i ê pan-lāi ū nn̄g-bān sì-chheng lâng.

9六月第六個班長是Thê-ko-a人Ek-kiat ê kiáⁿ Í-la̍h；伊ê班內有兩萬四千人。La̍k-ge̍h tē-la̍k ê pan-tiúⁿ sī Thê-ko-a lâng Ek-kiat ê kiáⁿ Í-la̍h; i ê pan-lāi ū nn̄g-bān sì-chheng lâng.

10七月第七個班長是Í-hoat-liân族，Pí-lûn人Hi-lī-su；伊ê班內有兩萬四千人。Chhit-ge̍h tē-chhit ê pan-tiúⁿ sī Í-hoat-liân cho̍k, Pí-lûn lâng Hi-lī-su; i ê pan-lāi ū nn̄g-bān sì-chheng lâng.

11八月第八個班長是謝拉族Hō͘-sa人Se-pí-kai；伊ê班內有兩萬四千人。Poeh-ge̍h tē-poeh ê pan-tiúⁿ sī Siā-la̍h cho̍k Hō͘-sa lâng Se-pí-kai; i ê pan-lāi ū nn̄g-bān sì-chheng lâng.

12九月第九個班長是便雅憫族，A-ná-tu̍t人A-pí-í-siā；伊ê班內有兩萬四千人。Káu-ge̍h tē-káu ê pan-tiúⁿ sī Piān-ngá-bín cho̍k, A-ná-tu̍t lâng A-pí-í-siā; i ê pan-lāi ū nn̄g-bān sì-chheng lâng.

13十月第十個班長是謝拉族，Nî-tô-hoat人，Má-hap-lâi；伊ê班內有兩萬四千人。Cha̍p-ge̍h tē-cha̍p ê pan-tiúⁿ sī Siā-la̍h cho̍k, Nî-tô-hoat lâng, Má-hap-lâi; i ê pan-lāi ū nn̄g-bān sì-chheng lâng.

14十一月第十一個班長是Í-hoat-liân族，Pí-la̍h-tùn ê kiáⁿ Pí-ná-ngá；伊ê班內有兩萬四千人。Cha̍p-it-ge̍h tē-cha̍p-it ê pan-tiúⁿ sī Í-hoat-liân cho̍k, Pí-la̍h-tùn ê kiáⁿ Pí-ná-ngá; i ê pan-lāi ū nn̄g-bān sì-chheng lâng.

15十二月第十二個班長是Gô-to-lia̍p族，Nî-tô-hoat人Hek-tāi；伊ê班內有兩萬四千人。Cha̍p-jī-ge̍h tē-cha̍p-jī ê pan-tiúⁿ sī Gô-to-lia̍p cho̍k, Nî-tô-hoat lâng Hek-tāi; i ê pan-lāi ū nn̄g-bān sì-chheng lâng.

16管理以色列眾支派ê，記tī下底；管Liû-piān族ê，是Sè-ki-lī ê kiáⁿ，Í-lī-í-siā；管西門族ê，是Má-ka ê kiáⁿ Sī-hoat-thê-ngá；Koán-lí Í-sek-lia̍t chèng chi-phài--ê, kì tī ē-tóe; koán Liû-piān cho̍k--ê, sī Sè-ki-lī ê kiáⁿ, Í-lī-í-siā; koán Se-biān cho̍k--ê, sī Má-ka ê kiáⁿ Sī-hoat-thê-ngá;

17管利未人ê，是Ki-bó͘-lī ê kiáⁿ Hap-sa-pí-ngá；管亞倫ê族ê是Sat-tok；koán Lī-bī lâng--ê, sī Ki-bó͘-lī ê kiáⁿ Hap-sa-pí-ngá; koán A-lûn ê cho̍k--ê sī Sat-tok;

18管猶大人ê是大衛ê兄Í-lī-hō͘；管Í-sat-ka族ê，是Bí-ka-le̍k ê kiáⁿ Àm-lī；koán Iû-tāi lâng--ê sī Tāi-pi̍t ê hiaⁿ Í-lī-hō͘; koán Í-sat-ka cho̍k--ê, sī Bí-ka-le̍k ê kiáⁿ Àm-lī;

19管Se-pò͘-lûn族ê，是Gô-pa-tē-ngá ê kiáⁿ I-si-má-ngá；管Ná-hut-tha-lī人ê，是A-su-lia̍t ê kiáⁿ Iâ-lī-mô͘；koán Se-pò͘-lûn cho̍k--ê, sī Gô-pa-tē-ngá ê kiáⁿ I-si-má-ngá; koán Ná-hut-tha-lī lâng--ê, sī A-su-lia̍t ê kiáⁿ Iâ-lī-mô͘;

20管Í-hoat-liân族ê，是O-sat-sè-ngá ê kiaN2Ho5-sè-a；管Má-ná-se半支派ê，是Pí-tāi-ngá ê kiáⁿ約珥；koán Í-hoat-liân cho̍k--ê, sī O-sat-sè-ngá ê kiáⁿ Hô-sè-a; koán Má-ná-se pòaⁿ-chi-phài--ê, sī Pí-tāi-ngá ê kiáⁿ Iok-jíⁿ;

21管Ki-lia̍t地Má-ná-se半支派ê，是撒迦利亞ê kiáⁿ Ek-to；管便雅憫族ê，是Ap-nî-jíⁿ ê kiáⁿ Ngá-se-gia̍p；koán Ki-lia̍t tōe Má-ná-se pòaⁿ-chi-phài--ê, sī Sat-ka-lī-a ê kiáⁿ Ek-to; koán Piān-ngá-bín cho̍k--ê, sī Ap-nî-jíⁿ ê kiáⁿ Ngá-se-gia̍p;

22管Tàn族ê，是Iâ-lô-hán ê kiáⁿ A-sat-lia̍t。Chiah-ê是以色列眾支派ê首領。koán Tàn cho̍k--ê, sī Iâ-lô-hán ê kiáⁿ A-sat-lia̍t. Chiah-ê sī Í-sek-lia̍t chèng chi-phài ê siú-léng.

23以色列人二十歲內ê，大衛無算伊；因為耶和華bat講，伊beh加添以色列人親像天頂ê星。Í-sek-lia̍t lâng jī-cha̍p hè lāi--ê, Tāi-pi̍t bô sǹg i; in-ūi Iâ-hô-hoa bat kóng, I beh ke-thiⁿ Í-sek-lia̍t lâng chhin-chhiūⁿ thiⁿ-téng ê chhiⁿ.

24Sé-ló͘-ngá ê kiáⁿ Iok-ap起手算伊；總是對chit-ê事有受氣到tī以色列，所以無算到明白；伊ê數額也無記tī大衛王ê歷代志錄。Sé-ló͘-ngá ê kiáⁿ Iok-ap khí-chhiú sǹg i; chóng-sī tùi chit ê sū ū siū-khì kàu tī Í-sek-lia̍t, só͘-í bô sǹg kàu bêng-pe̍k; i ê siàu-gia̍h iā bô kì tī Tāi-pi̍t ông ê le̍k-tāi chì-lio̍k.

25掌管王ê府庫ê，是A-tia̍p ê kiáⁿ Ap-su-má-ui；掌管田野、城邑、鄉庄、衛所ê府庫ê，是O͘-se-ngá ê kiáⁿ約拿單。Chiáng-koán ông ê hú-khò͘--ê, sī A-tia̍p ê kiáⁿ Ap-su-má-ui; chiáng-koán chhân-iá, siâⁿ-ip, hiuⁿ-chng, ōe-só͘ ê hú-khò͘-ê, sī O͘-se-ngá ê kiáⁿ Iok-ná-tan.

26掌管作田ê農夫，是Ki-lio̍k ê kiáⁿ Í-su-lī。Chiáng-koán choh-chhân ê lông-hu, sī Ki-lio̍k ê kiáⁿ Í-su-lī.

27掌管葡萄園ê，是La̍h-má人Sī-múi，掌管葡萄園ê酒池，是Si̍t-hut-bí人Sat-pa-tí。Chiáng-koán phû-tô-hn̂g--ê, sī La̍h-má lâng Sī-múi, chiáng-koán phû-tô-hn̂g ê chiú-tî, sī Si̍t-hut-bí lâng Sat-pa-tí.

28掌管平洋ê橄欖樹kap桑材是Ki-tē-lí人Pa-le̍k-hap-lâm；掌管油池是Iok-a-si。Chiáng-koán pîⁿ-iûⁿ ê kaⁿ-ná-chhiū kap sng-châi sī Ki-tē-lí lâng Pa-le̍k-hap-lâm; chiáng-koán iû-tî sī Iok-a-si.

29掌管Sa-lûn飼牛群ê，是Sa-lûn人Si-thê-nāi；掌管山谷飼牛群ê，是A-tē-nāi ê kiáⁿ Sa-hoat。Chiáng-koán Sa-lûn chhī gû-kûn--ê, sī Sa-lûn lâng Si-thê-nāi; chiáng-koán soaⁿ-kok chhī gû-kûn--ê, sī A-tē-nāi ê kiáⁿ Sa-hoat.

30掌管駱駝ê，是以實瑪利人A-pí-le̍k；管驢ê，是Bí-lûn人Iâ-hi-tí-a。Chiáng-koán lo̍k-tô--ê, sī Í-si̍t-má-lī lâng A-pí-le̍k; koán lû--ê, sī Bí-lûn lâng Iâ-hi-tí-a.

31掌管羊群ê，是夏甲人Ngá-sek。Chiah-ê lóng是kā大衛王掌管產業ê。Chiáng-koán iûⁿ-kûn--ê, sī Hā-kah lâng Ngá-sek. Chiah ê lóng sī kā Tāi-pi̍t ông chiáng-koán sán-gia̍p--ê.

32大衛ê叔約拿單做謀士，chit-ê人有智慧koh做書記；Hap-mô͘-nî ê kiáⁿ Iâ-iat做王眾kiáⁿ ê同伴。Tāi-pi̍t ê chek Iok-ná-tan chòe bô͘-sū, chit ê lâng ū tì-hūi koh chòe su-kì; Hap-mô͘-nî ê kiáⁿ Iâ-iat chòe ông chèng-kiáⁿ ê tâng-phōaⁿ.

33A-hi-to-hut也做王ê謀士；A-ki人Hō͘-su做王ê朋友。A-hi-to-hut iā chòe ông ê bô͘-sū; A-ki lâng Hō͘-su chòe ông ê pêng-iú.

34續接A-hi-to-hut ê，有Pí-ná-ngá ê kiáⁿ Iâ-hô-iâ-tāi kap A-pí-a-tha；Iok-ap做王ê陸軍總長。Sòa-chiap A-hi-to-hut--ê, ū Pí-ná-ngá ê kiáⁿ Iâ-hô-iâ-tāi kap A-pí-a-tha; Iok-ap chòe ông ê lio̍k-kun chóng-tiúⁿ.

1大衛招集以色列ê首領，各支派ê首領，kap輪班服事王ê軍長、千總、百總，掌管王kap王ê kiáⁿ ê產業cheng-siⁿ-ê，kap太監，以及大權能ê，kap大權能ê勇士，lóng到耶路撒冷。Tāi-pi̍t chio-chi̍p Í-sek-lia̍t ê siú-léng, kok chi-phài ê siú-léng, kap lûn-pan ho̍k-sāi ông ê kun-tiúⁿ, chhian-chóng, pé-chóng, chiáng-koán ông kap ông ê kiáⁿ ê sán-gia̍p cheng-siⁿ--ê, kap thài-kàm, í-ki̍p tōa koân-lêng ê, kap tōa koân-lêng ê ióng-sū, lóng kàu Iâ-lō͘-sat-léng.

2大衛王就khiā起來講，我ê兄弟，我ê百姓ah，lín tio̍h聽我ê話；我ê心本想beh為tio̍h耶和華ê約櫃，koh為tio̍h咱ê上帝ê腳踏椅，起殿來安置伊；我已經備辦beh起。Tāi-pi̍t ông chiū khiā--khí-lâi kóng, Góa ê hiaⁿ-tī, góa ê peh-sìⁿ ah, lín tio̍h thiaⁿ góa ê ōe; góa ê sim pún siūⁿ beh ūi-tio̍h Iâ-hô-hoa ê iok-kūi, koh ūi-tio̍h lán ê Siōng-tè ê kha-ta̍h-í, khí tiān lâi an-tì i; góa í-keng pī-pān beh khí.

3總是上帝對我講，你bōe得thang為我ê名起殿，因為你是戰士，有hō͘人流血。Chóng-sī Siōng-tè tùi góa kóng, Lí bōe-tit-thang ūi Góa ê miâ khí tiān, in-ūi lí sī chiàn-sū, ū hō͘ lâng lâu-huih.

4M̄-kú耶和華以色列ê上帝，tī我ê父全家揀我做以色列王直到永遠；因為伊揀猶大做首領；tī猶大ê支派中揀我ê父ê家；tī我ê父ê眾kiáⁿ中歡喜我，設立我做以色列眾人ê王。M̄-kú Iâ-hô-hoa Í-sek-lia̍t ê Siōng-tè, tī góa ê pē choân-ke kéng góa chòe Í-sek-lia̍t ông ti̍t-kàu éng-oán; in-ūi I kéng Iû-tāi chòe siú-léng; tī Iû-tāi ê chi-phài tiong kéng góa ê pē ê ke; tī góa ê pē ê chèng-kiáⁿ tiong hoaⁿ-hí góa, siat-li̍p góa chòe Í-sek-lia̍t chèng-lâng ê ông.

5耶和華賞賜我chōe-chōe kiáⁿ，tī我ê kiáⁿ ê中間，揀我ê kiáⁿ所羅門，tī耶和華ê國坐位，治理以色列。Iâ-hô-hoa siúⁿ-sù góa chōe-chōe kiáⁿ, tī góa ê kiáⁿ ê tiong-kan, kéng góa ê kiáⁿ Só͘-lô-bûn, tī Iâ-hô-hoa ê kok chē-ūi, tī-lí Í-sek-lia̍t.

6伊koh對我講，你ê kiáⁿ所羅門beh 起我ê殿我ê院；因為我揀伊做我ê kiáⁿ，我也beh做伊ê父。I koh tùi góa kóng, Lí ê kiáⁿ Só͘-lô-bûn beh khí Góa ê tiān Góa ê īⁿ; in-ūi Góa kéng i chòe Góa ê kiáⁿ, Góa iā beh chòe i ê pē.

7伊若久長遵thàn我ê誡命法度，親像今á日，我就beh堅固伊ê國位，直到永遠。I nā kú-tn̂g chun-thàn Góa ê kài-bēng hoat-tō͘, chhin-chhiūⁿ kin-á-ji̍t, Góa chiū beh kian-kò͘ i ê kok-ūi, ti̍t-kàu éng-oán.

8Taⁿ tī耶和華ê會，以色列眾人ê面前，咱ê上帝也聽見，lín tio̍h查考lín ê上帝耶和華ê誡命來執守伊；án-ni lín thang享受chit-ê好ê地，留hō͘ lín後代ê kiáⁿ孫，永遠做業。Taⁿ tī Iâ-hô-hoa ê hōe, Í-sek-lia̍t chèng-lâng ê bīn-chêng, lán ê Siōng-tè iā thiaⁿ-kìⁿ, lín tio̍h chhâ-khó lín ê Siōng-tè Iâ-hô-hoa ê kài-bēng lâi chip-siú i; án-ni lín thang hióng-siū chit ê hó ê tōe, lâu hō͘ lín āu-tāi ê kiáⁿ-sun, éng-oán chòe-gia̍p.

9我ê kiáⁿ所羅門ah，你tio̍h認識你ê父ê上帝，誠實心歡喜服事伊；因為耶和華鑑察眾人ê心，知lóng總ê心思念頭；你若chhē伊，伊beh hō͘你tú-tio̍h；你若放sak伊，伊beh永遠拒絕你；Góa ê kiáⁿ Só͘-lô-bûn ah, lí tio̍h jīn-bat lí ê pē ê Siōng-tè, sêng-si̍t sim hoaⁿ-hí ho̍k-sāi I; in-ūi Iâ-hô-hoa kàm-chhat chèng-lâng ê sim, chai lóng-chóng ê sim-su liām-thâu; lí nā chhē I, I beh hō͘ lí tú-tio̍h; lí nā pàng-sak I, I beh éng-oán kū-choa̍t lí;

10你tio̍h謹慎，因為耶和華揀你起厝做聖所；你tio̍h勇敢去做。lí tio̍h kín-sīn, in-ūi Iâ-hô-hoa kéng lí khí chhù chòe sèng-só͘; lí tio̍h ióng-kám khì chòe.

11大衛將殿堂ê léng廊、房間、府庫、樓閣、內殿，kap施恩所hit間，一切ê圖樣，交伊ê kiáⁿ所羅門；Tāi-pi̍t chiong tiān-tn̂g ê léng-lông, pâng-keng, hú-khò͘, lâu-koh, lāi-tiān, kap Si-un-só͘ hit-keng, it-chhè ê tô͘-iūⁿ, kau i ê kiáⁿ Só͘-lô-bûn;

12Koh用tùi神所得tio̍h一切ê圖樣，就是耶和華殿ê院，四圍ê房，上帝殿ê府庫，kap聖物ê府庫chiah-ê圖樣，lóng交伊；koh ēng tùi Sîn só͘ tit-tio̍h it-chhè ê tô͘-iūⁿ, chiū-sī Iâ-hô-hoa tiān ê īⁿ, sì-ûi ê pâng, Siōng-tè tiān ê hú-khò͘, kap sèng-mi̍h ê hú-khò͘ chiah ê tô͘-iūⁿ, lóng kau i;

13Koh指示伊祭司kap利未人ê班列，kap耶和華殿內服事ê工，以及耶和華殿內服事ê器具；koh chí-sī i chè-si kap Lī-bī lâng ê pan-lia̍t, kap Iâ-hô-hoa tiān-lāi ho̍k-sāi ê kang, í-ki̍p Iâ-hô-hoa tiān-lāi ho̍k-sāi ê khì-kū;

14Koh秤金hō͘伊做ta̍k樣應用ê金器；亦秤銀hō͘伊，做ta̍k樣應用ê銀器；koh chhìn kim hō͘ i chòe ta̍k-iūⁿ èng-iōng ê kim-khì; ia̍h chhìn gûn hō͘ i, chòe ta̍k-iūⁿ èng-iōng ê gûn-khì;

15就是chiah-ê金燈台kap伊ê盞，就秤金來做ta̍k-ê燈台kap伊ê盞，koh用做銀燈台ê銀來秤hō͘伊；伊ê燈台kap伊ê盞lóng是án-ni，照ta̍k-ê燈台ê路用；chiū-sī chiah ê kim teng-tâi kap i ê chóaⁿ, chiū chhìn kim lâi chòe ta̍k ê teng-tâi kap i ê chóaⁿ, koh ēng chòe gûn teng-tâi ê gûn lâi chhìn hō͘ i; i ê teng-tâi kap i ê chóaⁿ lóng sī án-ni, chiàu ta̍k ê teng-tâi ê lō͘-ēng;

16Koh秤金hō͘伊來做排列餅ê桌；亦秤銀來做銀ê桌；koh chhìn kim hō͘ i lâi chòe pâi-lia̍t piáⁿ ê toh; ia̍h chhìn gûn lâi chòe gûn ê toh;

17Koh用好金hō͘伊做肉叉、盤、杯；koh秤金，hō͘伊thang做ta̍k-ê金碗，秤銀hō͘伊做ta̍k-ê銀碗；koh ēng hó-kim hō͘ i chòe bah-chhe, pôaⁿ, poe; koh chhìn kim, hō͘ i thang chòe ta̍k ê kim-óaⁿ, chhìn gûn hō͘ i chòe ta̍k ê gûn-óaⁿ;

18Koh秤好金hō͘伊thang做香壇；亦用金做ki-lō͘兵車ê款式，in thí開翼，遮蓋耶和華ê約櫃。koh chhìn hó-kim hō͘ i thang chòe hiuⁿ-tôaⁿ; ia̍h ēng kim chòe ki-lō͘-peng chhia ê khoán-sit, in thí-khui si̍t, jia-khàm Iâ-hô-hoa ê iok-kūi.

19大衛講，頂面chiah-ê規模，lóng是我得tio̍h耶和華默示寫出來ê。Tāi-pi̍t kóng, Téng-bīn chiah ê kui-bô͘, lóng sī góa tit-tio̍h Iâ-hô-hoa be̍k-sī siá chhut-lâi--ê.

20大衛koh kā伊ê kiáⁿ所羅門講，你tio̍h勇敢壯膽去做；莫得忍，亦莫得驚；因為耶和華上帝，就是我ê上帝，kap你tī-teh；伊的確無離開你，亦無放sak你，直到耶和華殿ê工lóng明白。Tāi-pi̍t koh kā i ê kiáⁿ Só͘-lô-bûn kóng, Lí tio̍h ióng-kám chòng-táⁿ khì chòe; bo̍h-tit lún, ia̍h bo̍h-tit kiaⁿ; in-ūi Iâ-hô-hoa Siōng-tè, chiū-sī góa ê Siōng-tè, kap lí tī-teh; I tek-khak bô lī-khui lí, ia̍h bô pàng-sak lí, ti̍t-kàu Iâ-hô-hoa tiān ê kang lóng bêng-pe̍k.

21看ah，有祭司kap利未人ê ta̍k班，為tio̍h beh辨理上帝殿ta̍k項ê事；koh有奇巧ê人，tī ta̍k項ê工歡喜幫贊你；亦有chiah-ê首領kap眾百姓一心聽thàn你ê命令。Khòaⁿ ah, ū chè-si kap Lī-bī lâng ê ta̍k-pan, ūi-tio̍h beh pān-lí Siōng-tè tiān ta̍k-hāng ê sū; koh ū kî-khiáu ê lâng, tī ta̍k-hāng ê kang hoaⁿ-hí pang-chān lí; ia̍h ū chiah ê siú-léng kap chèng peh-sìⁿ chi̍t-sim thiaⁿ-thàn lí ê bēng-lēng.

1大衛王對會眾講，我ê kiáⁿ所羅門是上帝特別揀ê，iáu-kú少年幼chíⁿ；chit-ê工程真大；因為chit-ê殿m̄是為tio̍h人，就是為tio̍h耶和華上帝起ê。Tāi-pi̍t ông tùi hōe-chiòng kóng, Góa ê kiáⁿ Só͘-lô-bûn sī Siōng-tè te̍k-pia̍t kéng--ê, iáu-kú siàu-liân iù-chíⁿ; chit ê kang-tiâⁿ chin-tōa; in-ūi chit ê tiān m̄-sī ūi-tio̍h lâng, chiū-sī ūi-tio̍h Iâ-hô-hoa Siōng-tè khí--ê.

2我為tio̍h我ê上帝ê殿，已經盡氣力，備辦金做金器，備辦銀做銀器，銅做銅器，鐵做鐵器，柴做柴器；koh有紅瑪瑙，kap thang鑲ê寶石、光石，彩色ê石，以及ta̍k樣ê寶石，矽(sia̍h)石極chōe。Góa ūi-tio̍h góa ê Siōng-tè ê tiān, í-keng chīn khùi-la̍t, pī-pān kim chòe kim-khì, pī-pān gûn chòe gûn-khì, tâng chòe tâng-khì, thih chòe thih-khì, chhâ chòe chhâ-khì; koh ū âng bé-ló, kap thang siuⁿ ê pó-chio̍h, kng-chio̍h, chhái-sek ê chio̍h, í-ki̍p ta̍k-iūⁿ ê pó-chio̍h, sia̍h-chio̍h ke̍k-chōe.

3因為我欣慕我ê上帝ê殿，就tī備辦起聖殿ê材料以外，koh用我本身所積聚ê金銀，獻tī我上帝ê厝；In-ūi góa him-bō͘ góa ê Siōng-tè ê tiān, chiū tī pī-pān khí sèng-tiān ê chhâi-liāu í-gōa, koh ēng góa pún-sin só͘ chek-chū ê kim-gûn, hiàn tī góa Siōng-tè ê chhù;

4就是Gô-hui ê金，三千tha-liân-tek ê金，鍛鍊ê銀七千tha-liân-tek，來安chiah-ê厝牆；chiū-sī Gô-hui ê kim, saⁿ-chheng tha-liân-tek ê kim, thoàn-liān ê gûn chhit-chheng tha-liân-tek, lâi an chiah ê chhù-chhiûⁿ;

5金做金器，銀做銀器，kap師傅ê手所做chiah-ê工。今á日有甚麼人歡喜將本身獻hō͘耶和華ah？kim chòe kim-khì, gûn chòe gûn-khì, kap sai-hū ê chhiú só͘ chòe chiah ê kang. Kin-á-ji̍t ū sím-mi̍h lâng hoaⁿ-hí chiong pún-sin hiàn hō͘ Iâ-hô-hoa ah?

6Tùi án-ni，眾族長，kap以色列ta̍k支派ê首領、千總、百總，以及監督hiah-ê kā王做工ê，lóng歡喜來獻。Tùi án-ni chèng cho̍k-tiúⁿ, kap Í-sek-lia̍t ta̍k chi-phài ê siú-léng, chhian-chóng, pé-chóng, í-ki̍p kam(**kàm)-tok hiah-ê kā ông chòe-kang--ê, lóng hoaⁿ-hí lâi hiàn.

7In為tio̍h上帝殿ê路用，獻金五千tha-liân-tek連一萬ta̍t-lī-khek，銀一萬tha-liân-tek，銅一萬八千tha-liân-tek，鐵十萬tha-liân-tek。In ūi-tio̍h Siōng-tè tiān ê lō͘-ēng, hiàn kim gō͘ chheng tha-liân-tek liân chi̍t-bān ta̍t-lī-khek, gûn chi̍t-bān tha-liân-tek, tâng chi̍t-bān poeh chheng tha-liân-tek, thih cha̍p-bān tha-liân-tek.

8見若有寶石ê，lóng交代Kek-sūn人Iâ-iat ê手，送入耶和華殿ê府庫。Kìⁿ-nā ū pó-chio̍h--ê, lóng kau-tài Kek-sūn lâng Iâ-iat ê chhiú, sàng-ji̍p Iâ-hô-hoa tiān ê hú-khò͘.

9因為in甘心獻，百姓lóng歡喜，因為in盡心獻hō͘耶和華；大衛王也大歡喜到極。In-ūi in kam-sim hiàn, peh-sìⁿ lóng hoaⁿ-hí, in-ūi in chīn-sim hiàn hō͘ Iâ-hô-hoa; Tāi-pi̍t ông iā tōa hoaⁿ-hí kàu-ke̍k.

10所以大衛tī會眾ê面前o-ló耶和華；大衛講，耶和華阮ê祖以色列ê上帝ah，是應該o-ló-ê，tùi永遠到永遠；Só͘-í Tāi-pi̍t tī hōe-chiòng ê bīn-chêng o-ló Iâ-hô-hoa; Tāi-pi̍t kóng, Iâ-hô-hoa goán ê chó͘ Í-sek-lia̍t ê Siōng-tè ah, sī eng-kai o-ló--ê, tùi éng-oán kàu éng-oán;

11耶和華ah，尊大、能力、榮光、得勝、威嚴lóng是你ê；凡若tī天頂地下ê，lóng是你ê；耶和華ah，國也是你ê，你是至koân，做萬有ê頭。Iâ-hô-hoa ah, chun-tōa, lêng-le̍k, êng-kng, tek-sèng, ui-giâm lóng sī Lí-ê; hoān-nā tī thiⁿ-téng tōe-ē--ê, lóng sī Lí-ê; Iâ-hô-hoa ah, kok iā sī Lí-ê, Lí sī chì-koâiⁿ, chòe bān-ū ê thâu.

12好額尊貴lóng tùi你來，你也掌管萬有；tī你ê手有大權能大氣力；hō͘人尊大，hō͘眾人大氣力，lóng出tī你ê手。Hó-gia̍h chun-kùi lóng tùi Lí lâi, Lí iā chiáng-koán bān-ū; tī Lí ê chhiú ū tōa koân-lêng tōa khùi-la̍t; hō͘ lâng chun-tōa, hō͘ chèng-lâng tōa khùi-la̍t, lóng chhut tī Lí ê chhiú.

13阮ê上帝ah，taⁿ阮感謝你，o-ló你榮光ê名；Goán ê Siōng-tè ah, taⁿ goán kám-siā Lí, o-ló Lí êng-kng ê miâ;

14我是甚麼，我ê百姓是甚麼，阮竟然能án-ni歡喜奉獻ah？因為萬物lóng tùi你來，阮用你ê物獻hō͘你；góa sī sím-mi̍h, góa ê peh-sìⁿ sī sím-mi̍h, goán kéng-jiân ōe án-ni hoaⁿ-hí hōng-hiàn ah? In-ūi bān-mi̍h lóng tùi Lí lâi, goán ēng Lí ê mi̍h hiàn hō͘ Lí;

15阮tī你ê面前是出外人，是寄腳ê，kap阮ê列祖一般樣；阮tī世間ê日子親像影，無thang ǹg望長長tī-teh。goán tī Lí ê bīn-chêng sī chhut-gōa lâng, sī kià-kha--ê, kap goán ê lia̍t-chó͘ chi̍t-poaⁿ-iūⁿ; goán tī sè-kan ê ji̍t-chí chhin-chhiūⁿ iáⁿ, bô thang ǹg-bāng tn̂g-tn̂g tī-teh.

16耶和華阮ê上帝ah，阮備辦chiah-ê chōe-chōe材料，beh為tio̍h你ê聖名起你ê殿，lóng是tùi你來，也lóng是你ê。Iâ-hô-hoa goán ê Siōng-tè ah, goán pī-pān chiah-ê chōe-chōe chhâi-liāu, beh ūi-tio̍h Lí ê sèng-miâ khí Lí ê tiān, lóng sī tùi Lí lâi, iā lóng sī Lí--ê.

17我ê上帝ah，我知你鑑察人ê心，歡喜正直；論到我，我用正直ê心歡喜獻這一切ê物；taⁿ我看見你ê百姓tī-chia，lóng歡喜獻hō͘你，我就歡喜。Góa ê Siōng-tè ah, góa chai Lí kàm-chhat lâng ê sim, hoaⁿ-hí chèng-ti̍t; lūn-kàu góa, góa ēng chèng-ti̍t ê sim hoaⁿ-hí hiàn che it-chhè ê mi̍h; taⁿ góa khòaⁿ-kìⁿ Lí ê peh-sìⁿ tī-chia, lóng hoaⁿ-hí hiàn hō͘ Lí, góa chiū hoaⁿ-hí.

18耶和華，阮列祖亞伯拉罕、以撒，以色列ê上帝ah，求你hō͘你ê百姓常常存chit號ê心思念頭，備辦in ê心歸向你。Iâ-hô-hoa, goán lia̍t-chó͘ A-pek-la̍h-hán, Í-sat, Í-sek-lia̍t ê Siōng-tè ah, kiû Lí hō͘ Lí ê peh-sìⁿ siông-siông chûn chit-hō ê sim-su liām-thâu, pī-pān in ê sim kui-ǹg Lí.

19Koh求你賞賜我ê kiáⁿ所羅門誠實ê心，來守你ê命令、法度、律例，做成這一切ê事，用我所備辦-ê來起殿。Koh kiû Lí siúⁿ-sù góa ê kiáⁿ Só͘-lô-bûn sêng-si̍t ê sim, lâi siú Lí ê bēng-lēng, hoat-tō͘, lu̍t-lē, chòe-chiâⁿ che it-chhè ê sū, ēng góa só͘ pī-pān-ê lâi khí tiān.

20大衛對chiah-ê會眾講，Lín tio̍h o-ló耶和華lín ê上帝；Tùi án-ni，會眾o-ló耶和華in列祖ê上帝，àⁿ頭拜耶和華kap王。Tāi-pi̍t tùi chiah ê hōe-chiòng kóng, Lín tio̍h o-ló Iâ-hô-hoa lín ê Siōng-tè; tùi án-ni hōe-chiòng o-ló Iâ-hô-hoa in lia̍t-chó͘ ê Siōng-tè, àⁿ-thâu pài Iâ-hô-hoa kap ông.

21隔日in獻祭hō͘耶和華，koh獻燒祭hō͘耶和華；就是獻公ê牛一千隻，公ê綿羊一千隻，羊á一千隻，kap伊ê灌奠；koh為以色列ê眾人獻chōe-chōe祭物。Keh-ji̍t in hiàn-chè hō͘ Iâ-hô-hoa, koh hiàn sio-chè hō͘ Iâ-hô-hoa; chiū-sī hiàn kang ê gû chi̍t-chheng chiah, kang ê mî-iûⁿ chi̍t-chheng chiah, iûⁿ-á chi̍t-chheng chiah, kap i ê koàn-tiān; koh ūi Í-sek-lia̍t ê chèng-lâng hiàn chōe-chōe chè-mi̍h.

22Hit日in tī耶和華ê面前lim食大大歡喜。In第二pái設立大衛ê kiáⁿ所羅門做王，為耶和華用油抹伊，hō͘伊做君王；亦用油抹Sat-tok做祭司。Hit-ji̍t in tī Iâ-hô-hoa ê bīn-chêng lim-chia̍h tōa-tōa hoaⁿ-hí. In tē-jī pái siat-li̍p Tāi-pi̍t ê kiáⁿ Só͘-lô-bûn chòe ông, ūi Iâ-hô-hoa ēng iû boah i, hō͘ i chòe kun-ông; ia̍h ēng iû boah Sat-tok chòe chè-si.

23Tùi án-ni，所羅門坐tī耶和華所賞賜ê位，續接伊ê老父大衛做王，無m̄興通；以色列眾人也lóng聽趁伊。Tùi án-ni Só͘-lô-bûn chē tī Iâ-hô-hoa só͘ siúⁿ-sù ê ūi, sòa-chiap i ê lāu-pē Tāi-pi̍t chòe ông, bô m̄ heng-thong; Í-sek-lia̍t chèng-lâng iā lóng thiaⁿ-thàn i.

24眾首領kap勇士，kap大衛王ê眾kiáⁿ，lóng順服所羅門王。Chèng siú-léng kap ióng-sū, kap Tāi-pi̍t ông ê chèng-kiáⁿ, lóng sūn-ho̍k Só͘-lô-bûn ông.

25耶和華hō͘所羅門tī以色列眾人ê面前，極其尊大；hō͘伊做國王ê威風，贏過以色列以前ê王。Iâ-hô-hoa hō͘ Só͘-lô-bûn tī Í-sek-lia̍t chèng-lâng ê bīn-chêng, ke̍k-kî chun-tōa; hō͘ i chòe kok-ông ê ui-hong, iâⁿ-kè Í-sek-lia̍t í-chêng ê ông.

26耶西ê kiáⁿ大衛做以色列眾人ê王；Iâ-se ê kiáⁿ Tāi-pi̍t chòe Í-sek-lia̍t chèng-lâng ê ông;

27伊做以色列王，歷過四十年，tī Hi-pek-lûn做王七年，tī耶路撒冷做王三十三年。i chòe Í-sek-lia̍t ông, le̍k-kè sì-cha̍p nî, tī Hi-pek-lûn chòe-ông chhit-nî, tī Iâ-lō͘-sat-léng chòe-ông saⁿ-cha̍p-saⁿ nî.

28伊食長歲壽；年歲、好額、榮光lóng滿足，就過世；伊ê kiáⁿ所羅門續接伊做王。I chia̍h tn̂g hè-siū; nî-hè, hó-gia̍h, êng-kng lóng móa-chiok, chiū kè-sì; i ê kiáⁿ Só͘-lô-bûn sòa-chiap i chòe-ông.

29大衛王頭到尾ê事，lóng記tī先見撒母耳ê冊，kap先知Ná-tan ê冊，以及先見Ka-tek ê冊。Tāi-pi̍t ông thâu kàu bé ê sū, lóng kì tī sian-kiàn Sat-bó͘-jíⁿ ê chheh, kap sian-ti Ná-tan ê chheh, í-ki̍p sian-kiàn Ka-tek ê chheh.

30Hiah-ê冊也記載伊治理國ê事，kap伊ê大權能，以及伊kap以色列，kap四方ê列國，所經過ê時事。Hiah ê chheh iā kì-chài i tī-lí kok ê sū, kap i ê tōa koân-lêng, í-ki̍p i kap Í-sek-lia̍t, kap sì-hng ê lia̍t-kok, só͘ keng-kè ê sî-sū.