1我kiám bōe得自由mah？Kiám m̄是使徒mah？Kiám m̄-bat看見咱ê主耶穌mah？Lín kiám m̄是我tiàm-tī主做成ê工mah？Góa kiám bōe tit chū-iû mah? Kiám m̄ sī sù-tô͘ mah? Kiám m̄ bat khòaⁿ-kìⁿ lán ê Chú Iâ-so͘ mah? Lín kiám m̄ sī góa tiàm-tī Chú chòe-chiâⁿ ê kang mah?

2設使對tī別人我m̄是使徒，對tī lín我無m̄是；因為lín tiàm-tī主就是我做使徒ê印證。Siat-sú tùi tī pa̍t lâng góa m̄ sī sù-tô͘, tùi tī lín góa bô m̄ sī; in-ūi lín tiàm-tī Chú chiū-sī góa chòe sù-tô͘ ê ìn-chèng.

3有查問我ê，我就用chit-ê家己分訴。Ū chhâ-mn̄g góa ê, góa chiū ēng chit-ê ka-kī hun-sò͘.

4阮kiám無權thang lim thang食mah？Goán kiám bô koân thang lim thang chia̍h mah?

5阮kiám無權thang娶信主ê姊妹做bó͘來kap阮saⁿ-kap行，親像其餘ê使徒，kap主ê兄弟，kap磯法mah？Goán kiám bô koân thang chhōa sìn Chú ê chí-bē chòe bó͘ lâi kap goán saⁿ-kap kiâⁿ, chhin-chhiūⁿ kî-û ê sù-tô͘, kap Chú ê hiaⁿ-tī, kap Ki-hoat mah?

6á是kan-ta我kap巴拿巴無權thang免做工mah？Á-sī kan-ta góa kap Pa-ná-pa bô koân thang bián chòe kang mah?

7甚麼人當兵，來食家己ê糧mah？甚麼人栽葡萄園，無食伊ê果子mah？甚麼人飼cheng-siⁿ，無食hit陣ê奶mah？Sím-mi̍h lâng tng peng, lâi chia̍h ka-kī ê niû mah? sím-mi̍h lâng chai phû-tô hn̂g, bô chia̍h i ê ké-chí mah? sím-mi̍h lâng chhī cheng-siⁿ, bô chia̍h hit tīn ê lin mah?

8我講chiah-ê kiám是照人ê意見mah？á是律法無án-ni講mah？Góa kóng chiah-ê kiám sī chiàu lâng ê ì-kiàn mah? Á-sī lu̍t-hoat bô án-ni kóng mah?

9因為tī摩西ê律法有記載講，磨五穀ê牛，莫得láng伊ê嘴。上帝kiám是致意tī牛mah？In-ūi tī Mô͘-se ê lu̍t-hoat ū kì-chài kóng, Bō ngó͘-kok ê gû, bo̍h-tit láng i ê chhùi. Siōng-tè kiám sī tì-ì tī gû mah?

10á是一概為tio̍h咱來講伊？真正是為tio̍h咱來寫；因為犁園ê tio̍h存ǹg望來犁；磨五穀ê tio̍h ǹg望saⁿ-kap有份來磨。Á-sī it-khài ūi-tio̍h lán lâi kóng i? Chin-chiàⁿ sī ūi-tio̍h lán lâi siá; in-ūi lôe hn̂g ê tio̍h chûn ǹg-bāng lâi lôe; bō ngó͘-kok ê tio̍h ǹg-bāng saⁿ-kap ū hūn lâi bō.

11阮若將屬tī神ê物也tī lín中間，就tùi lín收成屬tī肉體ê物，kiám是過頭mah？Goán nā chiong sio̍k tī sîn ê mi̍h iā tī lín tiong-kan, chiū tùi lín siu-sêng sio̍k tī jio̍k-thé ê mi̍h, kiám sī kè-thâu mah?

12別人對tī lín尚且有份chit-ê權柄，何況阮mah？總是阮m̄-bat用chit-ê權，反tńg吞忍ta̍k項ê事，免得阮有甚麼阻擋基督ê福音。Pa̍t lâng tùi tī lín siōng-chhiáⁿ ū hūn chit ê koân-pèng, hô-hòng goán mah? Chóng-sī goán m̄ bat ēng chit ê koân, hoán-tńg thun-lún ta̍k hāng ê sū, bián-tit goán ū sím-mi̍h chó͘-tòng Ki-tok ê hok-im.

13Kiám m̄知tio̍h磨tī聖ê事ê食殿內ê物，跟隨祭壇ê，kap祭壇saⁿ-kap分物mah？Kiám m̄ chai tio̍h-bôa tī sèng ê sū ê chia̍h tiān-lāi ê mi̍h, kun-sûi chè-tôaⁿ ê, kap chè-tôaⁿ saⁿ-kap pun mi̍h mah?

14親像án-ni，主設法hō͘傳福音ê人tio̍h tùi福音來度活。Chhin-chhiūⁿ án-ni, Chú siat-hoat hō͘ thoân hok-im ê lâng tio̍h tùi hok-im lâi tō͘ oa̍h.

15但是chiah-ê事我lóng未bat用；koh我寫chiah-ê m̄是ài人án-ni款待我；因為我寧可死，不致人hō͘我所誇口ê歸tī空空。Nā-sī chiah ê sū góa lóng bē bat ēng; koh góa siá chiah-ê m̄ sī ài lâng án-ni khoán-thāi góa; in-ūi góa lêng-khó͘ sí, put-tì lâng hō͘ góa só͘ khoa-kháu ê kui tī khang-khang.

16我傳福音m̄是thang誇口ê事，是不得已nā-tiāⁿ；因為若無傳福音，我就有災禍。Góa thoân hok-im m̄ sī thang khoa-kháu ê sū, sī put-tek-í nā-tiāⁿ; in-ūi nā bô thoân hok-im, góa chiū ū chai-ē.

17我若甘心做chit-ê事，就有報賞；就若m̄甘心，有職任已經交代我lah。Góa nā kam-sim chòe chit ê sū, chiū ū pò-siúⁿ; chiū nā m̄ kam-sim, ū chit-jīm í-keng kau-tāi góa lah.

18Án-ni我ê報賞是甚麼ah？就是我teh傳福音，hō͘人免所費也會得tio̍h福音；免得我tī福音所有ê權用到盡。Án-ni góa ê pò-siúⁿ sī sím-mi̍h ah? Chiū-sī góa teh thoân hok-im, hō͘ lâng bián só͘-hùi iā ōe tit-tio̍h hok-im; bián-tit góa tī hok-im só͘ ū ê koân ēng kàu chīn.

19我對tī眾人sui-bóng是自由，iáu-kú將家己做眾人ê奴僕，為tio̍h beh得tio̍h人ná chōe。Góa tùi tī chèng lâng sui-bóng sī chū-iû, iáu-kú chiong ka-kī chòe chèng lâng ê lô͘-po̍k, ūi-tio̍h beh tit-tio̍h lâng ná chōe.

20Ǹg猶太人我就親像猶太人，beh得tio̍h猶太人；ǹg法下ê人，我雖然本身無屬tī法下，就親像法下ê人，beh得tio̍h法下ê人。Ǹg Iû-thài lâng góa chiū chhin-chhiūⁿ Iû-thài lâng, beh tit-tio̍h Iû-thài lâng; ǹg hoat ē ê lâng, góa sui-jiân pún-sin bô sio̍k tī hoat ē, chiū chhin-chhiūⁿ hoat ē ê lâng, beh tit-tio̍h hoat ē ê lâng.

21Ǹg法外ê人，我就親像法外人，beh得tio̍h法外ê人；其實我m̄是tī上帝ê法外，就是tī基督ê法內。Ǹg hoat gōa ê lâng, góa chiū chhin-chhiūⁿ hoat gōa lâng, beh tit-tio̍h hoat gōa ê lâng; kî-si̍t góa m̄ sī tī Siōng-tè ê hoat gōa, chiū-sī tī Ki-tok ê hoat lāi.

22Ǹg軟弱ê人，我就成做軟弱，beh得tio̍h軟弱ê人。Ǹg ta̍k號人，我成做ta̍k號款，一概是beh救人。Ǹg loán-jio̍k ê lâng góa chiū chiâⁿ-chòe loán-jio̍k, beh tit-tio̍h loán-jio̍k ê lâng. Ǹg ta̍k hō lâng, góa chiâⁿ-chòe ta̍k hō khoán, it-khài sī beh kiù lâng.

23ta̍k項事我因為福音來行，是hō͘我thang saⁿ-kap有份tī福音。Ta̍k hāng sū góa in-ūi hok-im lâi kiâⁿ, sī hō͘ góa thang saⁿ-kap ū hūn tī hok-im.

24Kiám m̄知在場tàu走ê ta̍k-ê lóng走，但是得tio̍h報賞ê只有一個；lín tio̍h án-ni走chiah thang得tio̍h。Kiám m̄ chai chāi-tiûⁿ tàu-cháu ê ta̍k ê lóng cháu, nā-sī tit-tio̍h pò-siúⁿ ê chí ū chi̍t-ê; lín tio̍h án-ni cháu chiah thang tit-tio̍h.

25見若鬥力ê ta̍k項事撙節；in是beh得tio̍h會敗壞ê冕旒，但是咱是beh得tio̍h bōe敗壞ê。Kìⁿ-nā tàu-la̍t ê ta̍k hāng sū chún-chat; in sī beh tit-tio̍h ōe pāi-hoāi ê bián-liû, nā-sī lán sī beh tit-tio̍h bōe pāi-hoāi ê.

26所以我án-ni teh走，m̄是親像無定tio̍h ê方向；我phah拳，無親像teh phah空氣；Só͘-í góa án-ni teh cháu, m̄ sī chhin-chhiūⁿ bô tiāⁿ-tio̍h ê hng-hiùⁿ; góa phah kûn, bô chhin-chhiūⁿ teh phah khong-khì;

27我phah我ê身軀到thiám-thiám，hō͘伊降服；驚了我已經傳hō͘別人，本身kiám-chhái tú-tio̍h拒絕。góa phah góa ê seng-khu kàu thiám-thiám, hō͘ i hâng-ho̍k; kiaⁿ-liáu góa í-keng thoân hō͘ pa̍t lâng, pún-sin kiám-chhái tú-tio̍h kū-choa̍t.

1兄弟ah，我m̄ ài lín m̄知咱ê列祖lóng tī雲下，也lóng tùi海中經過，Hiaⁿ-tī ah, góa m̄ ài lín m̄ chai lán ê lia̍t-chó͘ lóng tī hûn ē, iā lóng tùi hái-tiong keng-kè,

2也lóng tī雲中海中受洗禮歸tī摩西，iā lóng tī hûn-tiong hái-tiong siū sóe-lé kui tī Mô͘-se,

3也lóng食同一樣靈ê食，也lóng lim同一樣靈ê奶；iā lóng chia̍h tâng chi̍t iūⁿ lêng ê chia̍h, iā lóng lim tâng chi̍t iūⁿ lêng ê lim;

4因為in所lim ê是tùi tè in靈ê石磐出，hit-ê石磐就是基督。in-ūi in só͘ lim ê sī tùi tè in lêng ê chio̍h-pôaⁿ chhut, hit ê chio̍h-pôaⁿ chiū-sī Ki-tok.

5但是in中間khah chōe人hō͘上帝無歡喜；因為in ê身屍橫逆tī曠野。Nā-sī in tiong-kan khah chōe lâng hō͘ Siōng-tè bô hoaⁿ-hí; in-ūi in ê sin-si hoâiⁿ-ke̍h tī khòng-iá.

6Taⁿ chiah-ê事是做咱ê鑑戒，hō͘咱莫得愛pháiⁿ，親像in愛pháiⁿ一樣。Taⁿ chiah ê sū sī chòe lán ê kàm-kài, hō͘ lán bo̍h-tit ài pháiⁿ, chhin-chhiūⁿ in ài pháiⁿ chi̍t iūⁿ.

7Lín也莫得拜偶像，親像in中間有人拜伊；照所記載講，百姓坐teh lim食，起來跳舞。Lín iā bo̍h-tit pài ngó͘-siōng, chhin-chhiūⁿ in tiong-kan ū lâng pài i; chiàu só͘ kì-chài kóng, Peh-sìⁿ chē-teh lim-chia̍h, khí-lâi thiàu-bú.

8咱也莫得行淫，親像in中間有人行淫，一日死兩萬三千人。Lán iā bo̍h-tit kiâⁿ îm, chhin-chhiūⁿ in tiong-kan ū lâng kiâⁿ îm, chi̍t ji̍t sí nn̄g-bān saⁿ-chheng lâng.

9咱也莫得試主，親像in中間有人試伊，就hō͘蛇咬死。Lán iā bo̍h-tit chhì Chú, chhin-chhiūⁿ in tiong-kan ū lâng chhì I, chiū hō͘ chôa kā-sí.

10Lín也莫得nga̍uh-nga̍uh念，親像in中間有人nga̍uh-nga̍uh念，就hō͘剿滅ê滅in。Lín iā bo̍h-tit nga̍uh-nga̍uh liām, chhin-chhiūⁿ in tiong-kan ū lâng nga̍uh-nga̍uh liām, chiū hō͘ châu-bia̍t-ê bia̍t in.

11Taⁿ in tú-tio̍h chiah-ê事是做鑑戒，續記載來警戒咱，就是chiah-ê世代尾ê人。Taⁿ in tú-tio̍h chiah ê sū sī chòe kàm-kài, sòa kì-chài lâi kéng-kài lán, chiū-sī chiah ê sè-tāi bé ê lâng.

12所以家己掠做khiā在ê，tio̍h謹慎驚了跋倒。Só͘-í ka-kī lia̍h chòe khiā-chāi ê, tio̍h kín-sīn kiaⁿ-liáu poa̍h-tó.

13Lín所tú-tio̍h ê試無m̄是人ê常事；上帝是信實，無beh hō͘ lín tú-tio̍h試過頭tī lín所能當；就是tī受試ê時beh續開脫出ê路，hō͘ lín當會起。Lín só͘ tú-tio̍h ê chhì bô m̄ sī lâng ê siông-sū; Siōng-tè sī sìn-si̍t, bô beh hō͘ lín tú-tio̍h chhì kè-thâu tī lín só͘ ōe tng; chiū-sī tī siū chhì ê sî beh sòa khui thoat-chhut ê lō͘, hō͘ lín tng ōe khí.

14所以我所疼ê兄弟ah，tio̍h閃避拜偶像ê事。Só͘-í góa só͘ thiàⁿ ê hiaⁿ-tī ah, tio̍h siám-pī pài ngó͘-siōng ê sū.

15我所講是親像對知識ê人講；lín tio̍h省察我ê話。Góa só͘ kóng sī chhin-chhiūⁿ tùi tì-sek ê lâng kóng; lín tio̍h séng-chhat góa ê ōe.

16祝謝ê杯，咱所祝謝ê，kiám m̄是saⁿ-kap有份tī基督ê血mah？咱所peh ê餅kiám m̄是saⁿ-kap有份tī基督ê身軀mah？Chiok-siā ê poe, lán só͘ chiok-siā ê, kiám m̄ sī saⁿ-kap ū hūn tī Ki-tok ê huih mah? lán só͘ peh ê piáⁿ kiám m̄ sī saⁿ-kap ū hūn tī Ki-tok ê seng-khu mah?

17因為餅既然一個，咱雖然chōe-chōe人也是一體；因為lóng有份tī一個餅。in-ūi piáⁿ kì-jiân chi̍t-ê, lán sui-jiân chōe-chōe lâng iā sī chi̍t thé; in-ūi lóng ū hūn tī chi̍t ê piáⁿ.

18試看照肉體ê以色列人，hiah-ê食祭物ê kiám m̄是saⁿ-kap有份tī祭壇mah？Chhì-khòaⁿ chiàu jio̍k-thé ê Í-sek-lia̍t lâng, hiah ê chia̍h chè-mi̍h ê kiám m̄ sī saⁿ-kap ū hūn tī chè-tôaⁿ mah?

19Án-ni我是teh講甚麼？kiám是teh講祭偶像ê物是甚麼？Án-ni góa sī teh kóng sím-mi̍h? kiám sī teh kóng chè ngó͘-siōng ê mi̍h sī sím-mi̍h?

20á是講偶像是甚麼？是teh講外邦人所祭ê是祭鬼，m̄是祭上帝；我m̄ ài lín有份tī鬼。á-sī kóng ngó͘-siōng sī sím-mi̍h? sī teh kóng gōa-pang lâng só͘ chè ê sī chè kúi, m̄ sī chè Siōng-tè; góa m̄ ài lín ū hūn tī kúi.

21Lín bōe會lim主ê杯，兼lim鬼ê杯；bōe會有份tī主ê桌，兼有份tī鬼ê桌。Lín bōe-ōe lim Chú ê poe, kiam lim kúi ê poe; bōe-ōe ū hūn tī Chú ê toh, kiam ū hūn tī kúi ê toh.

22á是咱teh激hō͘主受氣mah？咱kiám khah勇壯伊mah？Á-sī lán teh kek hō͘ Chú siū-khì mah? Lán kiám khah ióng-chòng I mah?

23凡事lóng thang，總是無lóng有利益。凡事lóng thang，總是無lóng建立德行。Hoān sū lóng thang, chóng-sī bô lóng ū lī-ek. Hoān sū lóng thang, chóng-sī bô lóng kiàn-li̍p tek-hēng.

24莫得求利益家己，tio̍h求利益別人。Bo̍h-tit kiû lī-ek ka-kī, tio̍h kiû lī-ek pa̍t lâng.

25見若街市所賣ê thang食，莫得為tio̍h良心ê緣故來查問；Kìⁿ-nā koe-chhī só͘ bōe ê thang chia̍h, bo̍h-tit ūi-tio̍h liông-sim ê iân-kò͘ lâi chhâ-mn̄g;

26因為地kap thong地裡ê物lóng是主ê。in-ūi tōe kap thong tōe-ni̍h ê mi̍h lóng sī Chú ê.

27若有一個m̄信ê人請lín，也lín ài beh去，見若排teh請lín ê，thang食伊；莫得為tio̍h良心ê緣故來查問。Nā ū chi̍t ê m̄ sìn ê lâng chhiáⁿ lín, iā lín ài beh khì, kìⁿ-nā pâi teh chhiáⁿ lín ê, thang chia̍h i; bo̍h-tit ūi-tio̍h liông-sim ê iân-kò͘ lâi chhâ-mn̄g.

28設使有人kā lín講，chit-ê是祭物，就莫得食；這是為tio̍h hit-ê kā lín講ê人，以及良心ê緣故。Siat-sú ū lâng kā lín kóng, Chit-ê sī chè-mi̍h, chiū bo̍h-tit chia̍h; che sī ūi-tio̍h hit ê kā lín kóng ê lâng, í-ki̍p liông-sim ê iân-kò͘.

29所講ê良心m̄是家己ê，是hit人ê；因為我ê自由啥事hō͘別個良心擬議ah？Só͘ kóng ê liông-sim m̄ sī ka-kī ê, sī hit lâng ê; in-ūi góa ê chū-iû siáⁿ-sū hō͘ pa̍t ê liông-sim gí-gī ah?

30我若感恩來食，啥事為tio̍h我所感謝ê hō͘人譭謗ah？Góa nā kám-un lâi chia̍h, siáⁿ-sū ūi-tio̍h góa só͘ kám-siā ê hō͘ lâng húi-pòng ah?

31所以lín或是食，或是lim，或是做甚麼，lóng tio̍h因為榮光上帝來做。Só͘-í lín he̍k-sī chia̍h, he̍k-sī lim, he̍k-sī chòe sím-mi̍h, lóng tio̍h in-ūi êng-kng Siōng-tè lâi chòe.

32無論猶太，á是希利尼，á是上帝ê教會，lín莫得做in ê塞礙。Bô lūn Iû-thài, á-sī Hi-lī-nî, á-sī Siōng-tè ê kàu-hōe, lín bo̍h-tit chòe in ê that-gāi.

33親像我凡事hō͘眾人歡喜，無求家己ê利益，就是求眾人ê利益，ài beh hō͘ in得tio̍h救。Chhin-chhiūⁿ góa hoān sū hō͘ chèng lâng hoaⁿ-hí, bô kiû ka-kī ê lī-ek, chiū-sī kiû chèng lâng ê lī-ek, ài beh hō͘ in tit-tio̍h kiù.

1Lín tio̍h學我，親像我學基督。Lín tio̍h o̍h góa, chhin-chhiūⁿ góa o̍h Ki-tok.

2我o-ló lín，因為lín凡tāi-chì記念我，koh執守chiah-ê遺傳，照我所傳hō͘ lín ê。Góa o-ló lín in-ūi lín hoān tāi-chì kì-liām góa, koh chip-siú chiah ê ûi-thoân, chiàu góa só͘ thoân hō͘ lín ê.

3總是我ài lín知基督是做ta-po͘人ê頭，ta-po͘人做婦人人ê頭，上帝做基督ê頭。Chóng-sī góa ài lín chai Ki-tok sī chòe ta-po͘-lâng ê thâu, ta-po͘-lâng chòe hū-jîn-lâng ê thâu, Siōng-tè chòe Ki-tok ê thâu.

4見若ta-po͘人祈禱á是傳道，若罩頭殼，就凌辱伊ê頭。Kìⁿ-nā ta-po͘-lâng kî-tó á-sī thoân-tō, nā tà thâu-khak, chiū lêng-jio̍k i ê thâu.

5但是見若婦人人祈禱á是傳道，無罩頭殼，就凌辱伊ê頭，因為這kap剃頭毛無各樣。Nā-sī kìⁿ-nā hū-jîn-lâng kî-tó á-sī thoân-tō, bô tà thâu-khak, chiū lêng-jio̍k i ê thâu, in-ūi che kap thì thâu-mn̂g bô koh-iūⁿ.

6婦人人若無罩頭殼，就tio̍h剪頭毛；婦人人剪頭毛á剃頭毛若是見笑，就khah好tio̍h 罩頭。Hū-jîn-lâng nā bô tà thâu-khak, chiū tio̍h chián thâu-mn̂g; hū-jîn-lâng chián thâu-mn̂g á thì thâu-mn̂g nā sī kiàn-siàu, chiū khah hó tio̍h tà thâu.

7Ta-po͘人m̄應該罩頭，因為伊是上帝ê像kap榮光；但是婦人人就是ta-po͘人ê榮光。Ta-po͘-lâng m̄ eng-kai tà thâu, in-ūi i sī Siōng-tè ê siōng kap êng-kng; nā-sī hū-jîn-lâng chiū-sī ta-po͘-lâng ê êng-kng.

8因為ta-po͘人m̄是tùi婦人人出，獨獨婦人人是tùi ta-po͘人出。In-ūi ta-po͘-lâng m̄ sī tùi hū-jîn-lâng chhut, to̍k-to̍k hū-jîn-lâng sī tùi ta-po͘-lâng chhut.

9因為ta-po͘人m̄是為tio̍h婦人人chiah創造，是婦人人為tio̍h ta-po͘人來創造。In-ūi ta-po͘-lâng m̄ sī ūi-tio̍h hū-jîn-lâng chiah chhòng-chō, sī hū-jîn-lâng ūi-tio̍h ta-po͘-lâng lâi chhòng-chō.

10所以婦人人tio̍h有降服權柄ê記號tī伊ê頭殼，為tio̍h使者ê緣故。Só͘-í hū-jîn-lâng tio̍h ū hâng-ho̍k koân-pèng ê kì-hō tī i ê thâu-khak, ūi-tio̍h sù-chiá ê iân-kò͘.

11總是tī主若無ta-po͘人，就m̄成婦人人；無婦人人，就m̄成ta-po͘人。Chóng-sī tī Chú nā bô ta-po͘-lâng, chiū m̄ chiâⁿ hū-jîn-lâng; bô hū-jîn-lâng, chiū m̄ chiâⁿ ta-po͘-lâng.

12因為親像婦人人tùi ta-po͘人出，ta-po͘人也是tùi婦人人chiah有；獨獨萬項是tùi上帝出。In-ūi chhin-chhiūⁿ hū-jîn-lâng tùi ta-po͘-lâng chhut, ta-po͘-lâng iā sī tùi hū-jîn-lâng chiah ū; to̍k-to̍k bān hāng sī tùi Siōng-tè chhut.

13Lín心內家己省察：婦人人無罩頭殼來祈禱上帝，是合適mah？Lín sim-lāi ka-kī séng-chhat: hū-jîn-lâng bô tà thâu-khak lâi kî-tó Siōng-tè, sī ha̍p-sek mah?

14Tùi本性kiám m̄知，ta-po͘人有長ê頭毛是做見笑mah？Tùi pún-sèng kiám m̄ chai, ta-po͘-lâng ū tn̂g ê thâu-mn̂g sī chòe kiàn-siàu mah?

15但是婦人人有長ê頭毛，是做伊ê榮光；因為伊ê頭毛是賞賜伊做帕。Nā-sī hū-jîn-lâng ū tn̂g ê thâu-mn̂g, sī chòe i ê êng-kng; in-ūi i ê thâu-mn̂g sī siúⁿ-sù i chòe phè.

16設使有想ài beh辯駁ê，阮無chit號例，上帝chiah-ê教會也無。Siat-sú ū siūⁿ ài beh piān-pok ê, goán bô chit hō lē, Siōng-tè chiah ê kàu-hōe iā bô.

17Taⁿ我將chit-ê吩咐lín，m̄是o-ló lín，就是lín聚集，無致到利益，是致到損害。Taⁿ góa chiong chit-ê hoan-hù lín, m̄ sī o-ló lín, chiū-sī lín chū-chi̍p, bô tì-kàu lī-ek, sī tì-kàu sún-hāi.

18頭一項，我聽見lín聚集做會ê時，lín中間有分黨，我也大略信。Thâu chi̍t hāng, góa thiaⁿ-kìⁿ lín chū-chi̍p chòe hōe ê sî, lín tiong-kan ū hun-tóng, góa iā tāi-lio̍k sìn.

19因為lín中間bōe免得有黨派，beh hō͘真實ê人顯明tī lín中間。In-ūi lín tiong-kan bōe bián-tit ū tóng-phài, beh hō͘ chin-si̍t ê lâng hián-bêng tī lín tiong-kan.

20Án-ni lín聚集tī一所在，m̄是食主ê晚餐。Án-ni lín chū-chi̍p tī chi̍t só͘-chāi, m̄ sī chia̍h Chú ê boán-chhan.

21因為食ê時，ta̍k人做伊事先食伊ê ê-hng頓；有人iau，有人醉。In-ūi chia̍h ê sî ta̍k lâng chòe i tāi-seng chia̍h i ê ê-hng tǹg; ū lâng iau, ū lâng chùi.

22Lín kiám無厝thang lim食mah？á是lín看輕上帝ê教會，也hō͘無ê見笑ah？我beh對lín怎樣講？Tī chit-ê我beh o-ló lín mah？我無o-ló。Lín kiám bô chhù thang lim-chia̍h mah? Á-sī lín khòaⁿ-khin Siōng-tè ê kàu-hōe, iā hō͘ bô-ê kiàn-siàu ah? Góa beh tùi lín cháiⁿ-iūⁿ kóng? Tī chit-ê góa beh o-ló lín mah? Góa bô o-ló.

23因為我tùi主受，也bat傳hō͘ lín ê，就是主耶穌hō͘人賣hit暝有the̍h餅，In-ūi góa tùi Chú siū, iā bat thoân hō͘ lín ê, chiū-sī Chú Iâ-so͘ hō͘ lâng bōe hit mî ū the̍h piáⁿ,

24祝謝來peh伊，講，chit-ê是我ê身軀，為tio̍h lín phah破ê，lín tio̍h行án-ni來記念我。chiok-siā lâi peh i, kóng, Chit-ê sī góa ê seng-khu, ūi-tio̍h lín phah-phòa ê, lín tio̍h kiâⁿ án-ni lâi kì-liām góa.

25食了後也án-ni捧杯，講，Chit-ê杯就是新約，tī我ê血設立ê，見若lim ê時，tio̍h行án-ni來記念我。Chia̍h liáu-āu iā án-ni phâng poe, kóng, Chit ê poe chiū-sī sin iok, tī góa ê huih siat-li̍p ê, kìⁿ-nā lim ê sî, tio̍h kiâⁿ án-ni lâi kì-liām góa.

26因為lín ta̍k-pái食chit-ê餅，lim chit-ê杯，是表明主ê死，直到伊koh來。In-ūi lín ta̍k pái chia̍h chit ê piáⁿ, lim chit ê poe, sī piáu-bêng Chú ê sí, ti̍t kàu I koh lâi.

27Án-ni凡若食主ê餅，á是lim主ê poe，無合宜ê，是辜負主ê身軀kap血。Án-ni hoān-nā chia̍h Chú ê piáⁿ, á-sī lim Chú ê poe, bô ha̍p-gî ê, sī ko͘-hū Chú ê seng-khu kap huih.

28但是人tio̍h家己省察，chiah thang食chit-ê餅，lim chit-ê杯。Nā-sī lâng tio̍h ka-kī séng-chhat, chiah thang chia̍h chit ê piáⁿ, lim chit ê poe.

29人無分別主ê身軀來lim食，就是tùi lim食家己取審判。Lâng bô hun-piat Chú ê seng-khu lâi lim-chia̍h, chiū-sī tùi lim-chia̍h ka-kī chhú sím-phòaⁿ.

30所以lín中間衰lám ê，破病ê，chōe-chōe；死ê也無少。Só͘-í lín tiong-kan soe-lám ê, phòa-pīⁿ ê, chōe-chōe; sí ê iā bô chió.

31咱若家己審問，就無受審判。Lán nā ka-kī sím-mn̄g, chiū bô siū sím-phòaⁿ.

32總是咱受審判，是hō͘主所警戒，免得kap世間人同受定罪。Chóng-sī lán siū sím-phòaⁿ, sī hō͘ Chú só͘ kéng-kài, bián-tit kap sè-kan lâng tâng siū tēng-chōe.

33我ê兄弟ah，所以lín聚集beh食ê時，tio̍h 相 thèng候。Góa ê hiaⁿ-tī ah, só͘-í lín chū-chi̍p beh chia̍h ê sî, tio̍h saⁿ thèng-hāu.

34若有人iau，tio̍h tiàm in厝食，免得聚集致到受審判。其餘ê等我來，chiah beh設法。Nā ū lâng iau, tio̍h tiàm in chhù chia̍h, bián-tit chū-chi̍p tì-kàu siū sím-phòaⁿ. Kî-û ê tán góa lâi, chiah beh siat-hoat.