1Lín tio̍h學我，親像我學基督。Lín tio̍h o̍h góa, chhin-chhiūⁿ góa o̍h Ki-tok.

2我o-ló lín，因為lín凡tāi-chì記念我，koh執守chiah-ê遺傳，照我所傳hō͘ lín ê。Góa o-ló lín in-ūi lín hoān tāi-chì kì-liām góa, koh chip-siú chiah ê ûi-thoân, chiàu góa só͘ thoân hō͘ lín ê.

3總是我ài lín知基督是做ta-po͘人ê頭，ta-po͘人做婦人人ê頭，上帝做基督ê頭。Chóng-sī góa ài lín chai Ki-tok sī chòe ta-po͘-lâng ê thâu, ta-po͘-lâng chòe hū-jîn-lâng ê thâu, Siōng-tè chòe Ki-tok ê thâu.

4見若ta-po͘人祈禱á是傳道，若罩頭殼，就凌辱伊ê頭。Kìⁿ-nā ta-po͘-lâng kî-tó á-sī thoân-tō, nā tà thâu-khak, chiū lêng-jio̍k i ê thâu.

5但是見若婦人人祈禱á是傳道，無罩頭殼，就凌辱伊ê頭，因為這kap剃頭毛無各樣。Nā-sī kìⁿ-nā hū-jîn-lâng kî-tó á-sī thoân-tō, bô tà thâu-khak, chiū lêng-jio̍k i ê thâu, in-ūi che kap thì thâu-mn̂g bô koh-iūⁿ.

6婦人人若無罩頭殼，就tio̍h剪頭毛；婦人人剪頭毛á剃頭毛若是見笑，就khah好tio̍h 罩頭。Hū-jîn-lâng nā bô tà thâu-khak, chiū tio̍h chián thâu-mn̂g; hū-jîn-lâng chián thâu-mn̂g á thì thâu-mn̂g nā sī kiàn-siàu, chiū khah hó tio̍h tà thâu.

7Ta-po͘人m̄應該罩頭，因為伊是上帝ê像kap榮光；但是婦人人就是ta-po͘人ê榮光。Ta-po͘-lâng m̄ eng-kai tà thâu, in-ūi i sī Siōng-tè ê siōng kap êng-kng; nā-sī hū-jîn-lâng chiū-sī ta-po͘-lâng ê êng-kng.

8因為ta-po͘人m̄是tùi婦人人出，獨獨婦人人是tùi ta-po͘人出。In-ūi ta-po͘-lâng m̄ sī tùi hū-jîn-lâng chhut, to̍k-to̍k hū-jîn-lâng sī tùi ta-po͘-lâng chhut.

9因為ta-po͘人m̄是為tio̍h婦人人chiah創造，是婦人人為tio̍h ta-po͘人來創造。In-ūi ta-po͘-lâng m̄ sī ūi-tio̍h hū-jîn-lâng chiah chhòng-chō, sī hū-jîn-lâng ūi-tio̍h ta-po͘-lâng lâi chhòng-chō.

10所以婦人人tio̍h有降服權柄ê記號tī伊ê頭殼，為tio̍h使者ê緣故。Só͘-í hū-jîn-lâng tio̍h ū hâng-ho̍k koân-pèng ê kì-hō tī i ê thâu-khak, ūi-tio̍h sù-chiá ê iân-kò͘.

11總是tī主若無ta-po͘人，就m̄成婦人人；無婦人人，就m̄成ta-po͘人。Chóng-sī tī Chú nā bô ta-po͘-lâng, chiū m̄ chiâⁿ hū-jîn-lâng; bô hū-jîn-lâng, chiū m̄ chiâⁿ ta-po͘-lâng.

12因為親像婦人人tùi ta-po͘人出，ta-po͘人也是tùi婦人人chiah有；獨獨萬項是tùi上帝出。In-ūi chhin-chhiūⁿ hū-jîn-lâng tùi ta-po͘-lâng chhut, ta-po͘-lâng iā sī tùi hū-jîn-lâng chiah ū; to̍k-to̍k bān hāng sī tùi Siōng-tè chhut.

13Lín心內家己省察：婦人人無罩頭殼來祈禱上帝，是合適mah？Lín sim-lāi ka-kī séng-chhat: hū-jîn-lâng bô tà thâu-khak lâi kî-tó Siōng-tè, sī ha̍p-sek mah?

14Tùi本性kiám m̄知，ta-po͘人有長ê頭毛是做見笑mah？Tùi pún-sèng kiám m̄ chai, ta-po͘-lâng ū tn̂g ê thâu-mn̂g sī chòe kiàn-siàu mah?

15但是婦人人有長ê頭毛，是做伊ê榮光；因為伊ê頭毛是賞賜伊做帕。Nā-sī hū-jîn-lâng ū tn̂g ê thâu-mn̂g, sī chòe i ê êng-kng; in-ūi i ê thâu-mn̂g sī siúⁿ-sù i chòe phè.

16設使有想ài beh辯駁ê，阮無chit號例，上帝chiah-ê教會也無。Siat-sú ū siūⁿ ài beh piān-pok ê, goán bô chit hō lē, Siōng-tè chiah ê kàu-hōe iā bô.

17Taⁿ我將chit-ê吩咐lín，m̄是o-ló lín，就是lín聚集，無致到利益，是致到損害。Taⁿ góa chiong chit-ê hoan-hù lín, m̄ sī o-ló lín, chiū-sī lín chū-chi̍p, bô tì-kàu lī-ek, sī tì-kàu sún-hāi.

18頭一項，我聽見lín聚集做會ê時，lín中間有分黨，我也大略信。Thâu chi̍t hāng, góa thiaⁿ-kìⁿ lín chū-chi̍p chòe hōe ê sî, lín tiong-kan ū hun-tóng, góa iā tāi-lio̍k sìn.

19因為lín中間bōe免得有黨派，beh hō͘真實ê人顯明tī lín中間。In-ūi lín tiong-kan bōe bián-tit ū tóng-phài, beh hō͘ chin-si̍t ê lâng hián-bêng tī lín tiong-kan.

20Án-ni lín聚集tī一所在，m̄是食主ê晚餐。Án-ni lín chū-chi̍p tī chi̍t só͘-chāi, m̄ sī chia̍h Chú ê boán-chhan.

21因為食ê時，ta̍k人做伊事先食伊ê ê-hng頓；有人iau，有人醉。In-ūi chia̍h ê sî ta̍k lâng chòe i tāi-seng chia̍h i ê ê-hng tǹg; ū lâng iau, ū lâng chùi.

22Lín kiám無厝thang lim食mah？á是lín看輕上帝ê教會，也hō͘無ê見笑ah？我beh對lín怎樣講？Tī chit-ê我beh o-ló lín mah？我無o-ló。Lín kiám bô chhù thang lim-chia̍h mah? Á-sī lín khòaⁿ-khin Siōng-tè ê kàu-hōe, iā hō͘ bô-ê kiàn-siàu ah? Góa beh tùi lín cháiⁿ-iūⁿ kóng? Tī chit-ê góa beh o-ló lín mah? Góa bô o-ló.

23因為我tùi主受，也bat傳hō͘ lín ê，就是主耶穌hō͘人賣hit暝有the̍h餅，In-ūi góa tùi Chú siū, iā bat thoân hō͘ lín ê, chiū-sī Chú Iâ-so͘ hō͘ lâng bōe hit mî ū the̍h piáⁿ,

24祝謝來peh伊，講，chit-ê是我ê身軀，為tio̍h lín phah破ê，lín tio̍h行án-ni來記念我。chiok-siā lâi peh i, kóng, Chit-ê sī góa ê seng-khu, ūi-tio̍h lín phah-phòa ê, lín tio̍h kiâⁿ án-ni lâi kì-liām góa.

25食了後也án-ni捧杯，講，Chit-ê杯就是新約，tī我ê血設立ê，見若lim ê時，tio̍h行án-ni來記念我。Chia̍h liáu-āu iā án-ni phâng poe, kóng, Chit ê poe chiū-sī sin iok, tī góa ê huih siat-li̍p ê, kìⁿ-nā lim ê sî, tio̍h kiâⁿ án-ni lâi kì-liām góa.

26因為lín ta̍k-pái食chit-ê餅，lim chit-ê杯，是表明主ê死，直到伊koh來。In-ūi lín ta̍k pái chia̍h chit ê piáⁿ, lim chit ê poe, sī piáu-bêng Chú ê sí, ti̍t kàu I koh lâi.

27Án-ni凡若食主ê餅，á是lim主ê poe，無合宜ê，是辜負主ê身軀kap血。Án-ni hoān-nā chia̍h Chú ê piáⁿ, á-sī lim Chú ê poe, bô ha̍p-gî ê, sī ko͘-hū Chú ê seng-khu kap huih.

28但是人tio̍h家己省察，chiah thang食chit-ê餅，lim chit-ê杯。Nā-sī lâng tio̍h ka-kī séng-chhat, chiah thang chia̍h chit ê piáⁿ, lim chit ê poe.

29人無分別主ê身軀來lim食，就是tùi lim食家己取審判。Lâng bô hun-piat Chú ê seng-khu lâi lim-chia̍h, chiū-sī tùi lim-chia̍h ka-kī chhú sím-phòaⁿ.

30所以lín中間衰lám ê，破病ê，chōe-chōe；死ê也無少。Só͘-í lín tiong-kan soe-lám ê, phòa-pīⁿ ê, chōe-chōe; sí ê iā bô chió.

31咱若家己審問，就無受審判。Lán nā ka-kī sím-mn̄g, chiū bô siū sím-phòaⁿ.

32總是咱受審判，是hō͘主所警戒，免得kap世間人同受定罪。Chóng-sī lán siū sím-phòaⁿ, sī hō͘ Chú só͘ kéng-kài, bián-tit kap sè-kan lâng tâng siū tēng-chōe.

33我ê兄弟ah，所以lín聚集beh食ê時，tio̍h 相 thèng候。Góa ê hiaⁿ-tī ah, só͘-í lín chū-chi̍p beh chia̍h ê sî, tio̍h saⁿ thèng-hāu.

34若有人iau，tio̍h tiàm in厝食，免得聚集致到受審判。其餘ê等我來，chiah beh設法。Nā ū lâng iau, tio̍h tiàm in chhù chia̍h, bián-tit chū-chi̍p tì-kàu siū sím-phòaⁿ. Kî-û ê tán góa lâi, chiah beh siat-hoat.

1兄弟ah，論到神ê賞賜，我m̄ ài lín m̄知。Hiaⁿ-tī ah, lūn-kàu Sîn ê siúⁿ-sù, góa m̄ ài lín m̄ chai.

2lín知lín做外邦人ê時，受迷惑去就近bōe講話ê偶像，chhut-chāi伊引誘。Lín chai lín chòe gōa-pang lâng ê sî, siū bê-he̍k khì chiū-kūn bōe kóng ōe ê ngó͘-siōng, chhut-chāi i ín-iú.

3所以我hō͘ lín知，hō͘上帝ê神感動來講ê，無人講，耶穌是thang咒詛；若m̄是hō͘聖神感動ê，也無人會講，耶穌是主。Só͘-í góa hō͘ lín chai, hō͘ Siōng-tè ê Sîn kám-tōng lâi kóng ê, bô lâng kóng, Iâ-so͘ sī thang chiù-chó͘; nā m̄ sī hō͘ Sèng Sîn kám-tōng ê, iā bô lâng ōe kóng, Iâ-so͘ sī Chú.

4Taⁿ恩賜有分別，但是神是siāng一個。Taⁿ un-sù ū hun-piat, nā-sī Sîn sī siāng chi̍t ê.

5職份有分別，但是主是siāng一個。Chit-hūn ū hun-piat, nā-sī Chú sī siāng chi̍t ê.

6功用有分別，但是上帝siāng一個，施行萬事tī眾人中ê。Kong-iōng ū hun-piat, nā-sī Siōng-tè siāng chi̍t ê, si-hêng bān sū tī chèng lâng tiong ê.

7但是聖神ê顯明是賞賜ta̍k人beh利益眾人。Nā-sī Sèng Sîn ê hián-bêng sī siúⁿ-sù ta̍k lâng beh lī-ek chèng lâng.

8因為有ê tùi神用智慧ê話hō͘伊；有ê照chit-ê神用知識ê話hō͘伊；In-ūi ū-ê tùi Sîn ēng tì-hūi ê ōe hō͘ i; ū-ê chiàu chit ê Sîn ēng chai-bat ê ōe hō͘ i;

9koh有人tī chit-ê神用信hō͘伊；有ê tī chit-ê神用醫病ê恩賜hō͘伊；koh ū lâng tī chit ê Sîn ēng sìn hō͘ i; ū-ê tī chit ê Sîn ēng i-pīⁿ ê un-sù hō͘ i;

10有ê hō͘伊能行各樣ê權能；有ê hō͘伊做先知；有ê hō͘伊能分別chiah-ê神；koh有ê hō͘伊能講ta̍k樣ê音語；有ê hō͘伊能翻譯ta̍k樣ê音語。ū-ê hō͘ i ōe kiâⁿ koh-iūⁿ ê koân-lêng; ū-ê hō͘ i chòe sian-ti; ū-ê hō͘ i ōe hun-piat chiah ê sîn; koh ū-ê hō͘ i ōe kóng ta̍k iūⁿ ê im-gú; ū-ê hō͘ i ōe hoan-e̍k ta̍k iūⁿ ê im-gú.

11Chiah-ê lóng是siāng一個神所施行ê，照伊所ài ê，隨樣分hō͘ ta̍k人。Chiah-ê lóng sī siāng chi̍t ê Sîn só͘ si-hêng ê, chiàu I só͘ ài ê, sûi-iūⁿ pun hō͘ ta̍k lâng.

12因為親像身軀是一個，也有chōe-chōe體，koh身軀ê體雖然chōe，lóng是一個身軀；基督也是án-ni。In-ūi chhin-chhiūⁿ seng-khu sī chi̍t-ê, iā ū chōe-chōe thé, koh seng-khu ê thé sui-jiân chōe, lóng sī chi̍t ê seng-khu; Ki-tok iā sī án-ni.

13因為咱眾人，無論是猶太，á是希利尼，做奴才ê á是自由ê，lóng bat受洗禮tī一個神，來屬tī一個身軀，也lóng總bat lim一個神。In-ūi lán chèng lâng, bô lūn sī Iû-thài á-sī Hi-lī-nî, chòe lô͘-châi ê á-sī chū-iû ê, lóng bat siū sóe-lé tī chi̍t ê Sîn, lâi sio̍k tī chi̍t ê seng-khu, iā lóng-chóng bat lim chi̍t ê Sîn.

14因為身軀m̄是一體，是chōe-chōe體。In-ūi seng-khu m̄ sī chi̍t thé, sī chōe-chōe thé.

15設使腳若講，我因為m̄是手，我無屬身軀；伊m̄是為tio̍h án-ni就無屬tī身軀。Siat-sú kha nā kóng, Góa in-ūi m̄ sī chhiú, góa bô sio̍k seng-khu; i m̄ sī ūi-tio̍h án-ni chiū bô sio̍k tī seng-khu.

16設使耳á若講，我因為m̄是目睭，我無屬tī身軀；伊m̄是為tio̍h án-ni就無屬tī身軀。Siat-sú hī-á nā kóng, Góa in-ūi m̄ sī ba̍k-chiu, góa bô sio̍k tī seng-khu; i m̄ sī ūi-tio̍h án-ni chiū bô sio̍k tī seng-khu.

17設使thong身軀是目睭，tùi tá-lo̍h能聽？若lóng是耳á，tùi tá-lo̍h能phīⁿ？Siat-sú thong seng-khu sī ba̍k-chiu, tùi tá-lo̍h ōe thiaⁿ? Nā lóng sī hī-á, tùi tá-lo̍h ōe phīⁿ?

18但是上帝照伊ê所ài，將chiah-ê體sûi-ê安排tī身軀。Nā-sī Siōng-tè chiàu I ê só͘ ài, chiong chiah ê thé sûi-ê an-pâi tī seng-khu.

19若百體lóng siāng一款，就身軀tī tá-lo̍h？Nā pah thé lóng siāng chi̍t khoán, chiū seng-khu tī tá-lo̍h?

20總是taⁿ體是chōe-chōe，也身軀是一個。Chóng-sī taⁿ thé sī chōe-chōe, iā seng-khu sī chi̍t ê.

21目睭bōe會對手講，我無欠用你；頭殼也bōe會對腳講，我無欠用lín。Ba̍k-chiu bōe-ōe tùi chhiú kóng, Góa bô khiàm-ēng lí; thâu-khak iā bōe-ōe tùi kha kóng, Góa bô khiàm-ēng lín.

22M̄-nā án-ni，身軀chiah-ê體，看做khah軟chiáⁿ ê koh-khah bōe無得。M̄ nā án-ni, seng-khu chiah ê thé, khòaⁿ chòe khah nńg-chiáⁿ ê koh khah bōe bô--tit.

23Koh咱看做身軀khah無貴氣ê體，咱就裝飾hō͘ in khah尊貴；也khah無文雅ê，咱hō͘ in koh-khah文雅。Koh lán khòaⁿ chòe seng-khu khah bô kùi-khì ê thé, lán chiū chng-thāⁿ hō͘ in khah chun-kùi; iā khah bô bûn-ngá ê, lán hō͘ in koh khah bûn-ngá.

24因為咱文雅ê體無所欠缺。獨獨上帝調和身軀；tī有欠缺ê，益發hō͘伊尊貴；In-ūi lán bûn-ngá ê thé bô só͘ khiàm-kheh. To̍k-to̍k Siōng-tè tiâu-hô seng-khu; tī ū khiàm-kheh ê, it-hoat hō͘ i chun-kùi;

25免得身軀無相合是beh hō͘百體平平相眷顧。bián-tit seng-khu bô saⁿ-ha̍p sī beh hō͘ pah thé pîⁿ-pîⁿ saⁿ koàn-kò͘.

26若一體受苦，百體同受苦；一體受榮光，百體同快樂。Nā chi̍t thé siū khó͘, pah thé tâng siū khó͘; chi̍t thé siū êng-kng, pah thé tâng khoài-lo̍k.

27Lín chiah-ê是基督ê身軀，sûi-ê是做體。Lín chiah-ê sī Ki-tok ê seng-khu, sûi-ê sī chòe thé.

28上帝所設tī教會ê，一是使徒，二是先知，三是教師，koh有行權能ê，koh有醫病ê恩賜，幫贊ê，治理ê，講ta̍k樣ê音語ê。Siōng-tè só͘ siat tī kàu-hōe ê, it sī sù-tô͘, jī sī sian-ti, saⁿ sī kàu-su, koh ū kiâⁿ koân-lêng ê, koh ū i-pīⁿ ê un-sù, pang-chān ê, tī-lí ê, kóng ta̍k iūⁿ ê im-gú ê.

29眾人kiám lóng是使徒mah？lóng是先知mah？lóng是教師mah？lóng行權能mah？Chèng lâng kiám lóng sī sù-tô͘ mah? lóng sī sian-ti mah? lóng sī kàu-su mah? lóng kiâⁿ koân-lêng mah?

30lóng有醫病ê恩賜mah？lóng會講ta̍k樣ê音語mah？lóng會翻譯mah？lóng ū i-pīⁿ ê un-sù mah? lóng ōe kóng ta̍k iūⁿ ê im-gú mah? lóng ōe hoan-e̍k mah?

31Lín tio̍h切切欣慕hiah-ê khah大ê恩賜。我用第一好 ê路續指示lín。Lín tio̍h chhiat-chhiat him-bō͘ hiah ê khah tōa ê un-sù. Góa ēng tē it hó ê lō͘ sòa chí-sī lín.

1我設使能講人kap天使ê音語，若無仁愛，我就成做響ê銅器，tân ê lâ鈸。Góa siat-sú ōe kóng lâng kap thiⁿ-sài ê im-gú, nā bô jîn-ài, góa chiū chiâⁿ chòe hiáng ê tâng-khì, tân ê lâ-poa̍h.

2我設使做先知，明白lóng總ê奧妙kap lóng總ê知識；koh設使有齊備ê信，夠額來移山，若無仁愛，我就bōe算做是甚麼。Góa siat-sú chòe sian-ti, bêng-pe̍k lóng-chóng ê ò-biāu kap lóng-chóng ê chai-bat; koh siat-sú ū chiâu-pī ê sìn, kàu-gia̍h lâi î soaⁿ, nā bô jîn-ài, góa chiū bōe sǹg chòe sī sím-mi̍h.

3我設使盡所有ê來賑濟，koh獻我ê身軀hō͘火燒，若無仁愛，就我無得tio̍h利益。Góa siat-sú chīn só͘ ū ê lâi chín-chè, koh hiàn góa ê seng-khu hō͘ hé sio, nā bô jîn-ài, chiū góa bô tit-tio̍h lī-ek.

4仁愛是gâu寬容慈悲；仁愛是無怨妒；仁愛無誇口，無phín-phóng，Jîn-ài sī gâu khoan-iông chû-pi; jîn-ài sī bô oàn-tò͘; jîn-ài bô khoa-kháu, bô phín-phóng,

5無行見笑ê事，無求家己ê利益，無快受氣，無記得人ê pháiⁿ；bô kiâⁿ kiàn-siàu ê sū, bô kiû ka-kī ê lī-ek, bô khoài siū-khì, bô kì-tit lâng ê pháiⁿ;

6無歡喜不義，是kap真理saⁿ-kap歡喜；bô hoaⁿ-hí put-gī, sī kap chin-lí saⁿ-kap hoaⁿ-hí;

7凡事忍受，凡事相信，凡事ǹg望，凡事吞忍。hoān sū jím-siū, hoān sū siong-sìn, hoān sū ǹg-bāng, hoān sū thun-lún.

8仁愛永遠bōe無—去；但是先知ê職beh廢無，hiah-ê音語beh soah，知識beh廢無。Jîn-ài éng-oán bōe bô--khì; nā-sī sian-ti ê chit beh hòe-bô, hiah ê im-gú beh soah, chai-bat beh hòe-bô.

9因為咱所知ê無完全，做先知也無完全；In-ūi lán só͘ chai ê bô oân-choân, chòe sian-ti iā bô oân-choân;

10完全ê若到，無完全ê就廢無。oân-choân ê nā kàu, bô oân-choân ê chiū hòe-bô.

11我做gín-ná ê時，講話親像gín-ná，性情親像gín-ná，意見親像gín-ná；已經成人，就廢無gín-ná ê事。Góa chòe gín-ná ê sî, kóng ōe chhin-chhiūⁿ gín-ná, sèng-chêng chhin-chhiūⁿ gín-ná, ì-kiàn chhin-chhiūⁿ gín-ná; í-keng sêng-jîn, chiū hòe-bô gín-ná ê sū.

12因為咱taⁿ對鏡teh看，bū-bū無明；但是到hit時就當頭對面。我taⁿ所知無完全；到hit時就知，親像我hō͘主知一樣。In-ūi lán taⁿ tùi kiàⁿ teh khòaⁿ, bū-bū bô bêng; nā-sī kàu hit sî chiū tng-thâu tùi-bīn. Góa taⁿ só͘ chai bô oân-choân; kàu hit sî chiū chai, chhin-chhiūⁿ góa hō͘ Chú chai chi̍t iūⁿ.

13現今所存ê，就是信、ǹg望、仁愛；chit三項，其中第一大ê是仁愛。Hiān-kim só͘ chûn ê, chiū-sī sìn, ǹg-bāng, jîn-ài; chí saⁿ hāng, kî-tiong tē it tōa ê sī jîn-ài.