1我設使能講人kap天使ê音語，若無仁愛，我就成做響ê銅器，tân ê lâ鈸。Góa siat-sú ōe kóng lâng kap thiⁿ-sài ê im-gú, nā bô jîn-ài, góa chiū chiâⁿ chòe hiáng ê tâng-khì, tân ê lâ-poa̍h.

2我設使做先知，明白lóng總ê奧妙kap lóng總ê知識；koh設使有齊備ê信，夠額來移山，若無仁愛，我就bōe算做是甚麼。Góa siat-sú chòe sian-ti, bêng-pe̍k lóng-chóng ê ò-biāu kap lóng-chóng ê chai-bat; koh siat-sú ū chiâu-pī ê sìn, kàu-gia̍h lâi î soaⁿ, nā bô jîn-ài, góa chiū bōe sǹg chòe sī sím-mi̍h.

3我設使盡所有ê來賑濟，koh獻我ê身軀hō͘火燒，若無仁愛，就我無得tio̍h利益。Góa siat-sú chīn só͘ ū ê lâi chín-chè, koh hiàn góa ê seng-khu hō͘ hé sio, nā bô jîn-ài, chiū góa bô tit-tio̍h lī-ek.

4仁愛是gâu寬容慈悲；仁愛是無怨妒；仁愛無誇口，無phín-phóng，Jîn-ài sī gâu khoan-iông chû-pi; jîn-ài sī bô oàn-tò͘; jîn-ài bô khoa-kháu, bô phín-phóng,

5無行見笑ê事，無求家己ê利益，無快受氣，無記得人ê pháiⁿ；bô kiâⁿ kiàn-siàu ê sū, bô kiû ka-kī ê lī-ek, bô khoài siū-khì, bô kì-tit lâng ê pháiⁿ;

6無歡喜不義，是kap真理saⁿ-kap歡喜；bô hoaⁿ-hí put-gī, sī kap chin-lí saⁿ-kap hoaⁿ-hí;

7凡事忍受，凡事相信，凡事ǹg望，凡事吞忍。hoān sū jím-siū, hoān sū siong-sìn, hoān sū ǹg-bāng, hoān sū thun-lún.

8仁愛永遠bōe無—去；但是先知ê職beh廢無，hiah-ê音語beh soah，知識beh廢無。Jîn-ài éng-oán bōe bô--khì; nā-sī sian-ti ê chit beh hòe-bô, hiah ê im-gú beh soah, chai-bat beh hòe-bô.

9因為咱所知ê無完全，做先知也無完全；In-ūi lán só͘ chai ê bô oân-choân, chòe sian-ti iā bô oân-choân;

10完全ê若到，無完全ê就廢無。oân-choân ê nā kàu, bô oân-choân ê chiū hòe-bô.

11我做gín-ná ê時，講話親像gín-ná，性情親像gín-ná，意見親像gín-ná；已經成人，就廢無gín-ná ê事。Góa chòe gín-ná ê sî, kóng ōe chhin-chhiūⁿ gín-ná, sèng-chêng chhin-chhiūⁿ gín-ná, ì-kiàn chhin-chhiūⁿ gín-ná; í-keng sêng-jîn, chiū hòe-bô gín-ná ê sū.

12因為咱taⁿ對鏡teh看，bū-bū無明；但是到hit時就當頭對面。我taⁿ所知無完全；到hit時就知，親像我hō͘主知一樣。In-ūi lán taⁿ tùi kiàⁿ teh khòaⁿ, bū-bū bô bêng; nā-sī kàu hit sî chiū tng-thâu tùi-bīn. Góa taⁿ só͘ chai bô oân-choân; kàu hit sî chiū chai, chhin-chhiūⁿ góa hō͘ Chú chai chi̍t iūⁿ.

13現今所存ê，就是信、ǹg望、仁愛；chit三項，其中第一大ê是仁愛。Hiān-kim só͘ chûn ê, chiū-sī sìn, ǹg-bāng, jîn-ài; chí saⁿ hāng, kî-tiong tē it tōa ê sī jîn-ài.

1Tio̍h求仁愛；也tio̍h切切欣慕屬tī神ê恩賜；khah要緊ê是做先知來傳道。Tio̍h kiû jîn-ài; iā tio̍h chhiat-chhiat him-bō͘ sio̍k tī sîn ê un-sù; khah iàu-kín ê sī chòe sian-ti lâi thoân-tō.

2因為講各樣ê音語ê m̄是kap人講，是kap上帝講，因為無人會曉聽；總是伊有teh講屬神ê奧妙。In-ūi kóng kok iūⁿ ê im-gú ê m̄ sī kap lâng kóng, sī kap Siōng-tè kóng, in-ūi bô lâng ōe hiáu thiaⁿ; chóng-sī i ū teh kóng sio̍k sîn ê ò-biāu.

3獨獨做先知來傳道ê是kap人講，來建立，來勸勉，來安慰。To̍k-to̍k chòe sian-ti lâi thoân-tō ê sī kap lâng kóng, lâi kiàn-li̍p, lâi khoàn-bián, lâi an-ùi.

4講音語ê是建立家己；做先知傳道ê是建立教會。Kóng im-gú ê sī kiàn-li̍p ka-kī; chòe sian-ti thoân-tō ê sī kiàn-li̍p kàu-hōe.

5我ài得lín lóng會講音語，獨獨koh-khah ài，是lín做先知來傳道。因為講音語ê若無翻譯，hō͘教會得tio̍h建立，就做先知來傳道ê比伊khah大。Góa ài tit lín lóng ōe kóng im-gú, to̍k-to̍k koh khah ài, sī lín chòe sian-ti lâi thoân-tō. In-ūi kóng im-gú ê nā bô hoan-e̍k, hō͘ kàu-hōe tit-tio̍h kiàn-li̍p, chiū chòe sian-ti lâi thoân-tō ê pí i khah tōa.

6Taⁿ兄弟ah，我到lín hia，若清清講音語，也無用啟示，á是知識，á是做先知來傳道，á是用教示ê話來kā lín講，有甚麼利益lín？Taⁿ hiaⁿ-tī ah, góa kàu lín hia, nā chheng-chheng kóng im-gú, iā bô ēng khé-sī, á-sī chai-bat, á-sī chòe sian-ti lâi thoân-tō, á-sī ēng kà-sī ê ōe lâi kā lín kóng, ū sím-mi̍h lī-ek lín?

7Hit號無活氣ê物teh出聲，親像簫親像琴，若無分別伊ê音，thái會知所pûn所彈ê是甚麼ah？Hit hō bô oa̍h-khì ê mi̍h teh chhut siaⁿ, chhin-chhiūⁿ siau chhin-chhiūⁿ khîm, nā bô hun-piat i ê im, thái ōe chai só͘ pûn só͘ tôaⁿ ê sī sím-mi̍h ah?

8但是哨角出無定tio̍h ê音，是誰會備辦交戰ah？Nā sī sàu-kak chhut bô tiāⁿ-tio̍h ê im, chī-chūi ōe pī-pān kau-chiàn ah?

9Lín也是án-ni，若無用舌講快明ê話，thái會知所講ê ah？lín所講ê hō͘風飛去。Lín iā sī án-ni, nā bô ēng chi̍h kóng khoài bêng ê ōe, thái ōe chai só͘ kóng ê ah? lín só͘ kóng ê hō͘ hong pe-khì.

10世上ê音語不論jōa-chōe樣，無一個無意思。Sè-chiūⁿ ê im-gú put-lūn jōa chōe iūⁿ, bô chi̍t ê bô ì-sù.

11我若m̄-bat hit-ê聲ê意義，就講ê人beh掠我做番，我也beh掠伊做番。Góa nā m̄ bat hit ê siaⁿ ê ì-gī, chiū kóng ê lâng beh lia̍h góa chòe hoan, góa iā beh lia̍h i chòe hoan.

12Án-ni lín既然切切欣慕屬tī神ê恩賜，tio̍h求hō͘ lín充滿來建立教會。Án-ni lín kì-jiân chhiat-chhiat him-bō͘ sio̍k tī sîn ê un-sù, tio̍h kiû hō͘ lín chhiong-móa lâi kiàn-li̍p kàu-hōe.

13所以講音語ê tio̍h求能翻譯。Só͘-í kóng im-gú ê tio̍h kiû ōe hoan-e̍k.

14我若用音語祈禱，我ê神有teh祈禱，但是我ê心思無所利益。Góa nā ēng im-gú kî-tó, góa ê sîn ū teh kî-tó, nā-sī góa ê sim-su bô só͘ lī-ek.

15Án-ni是怎樣？我beh用神祈禱，也beh用心思祈禱；我beh用神吟詩，也beh用心思吟詩。Án-ni sī cháiⁿ-iūⁿ? Góa beh ēng sîn kî-tó, iā beh ēng sim-su kî-tó; góa beh ēng sîn gîm si, iā beh ēng sim-su gîm si.

16若無，就lín用神祝謝，hit號平常人既然m̄知你teh講甚麼，伊thái能當你感謝ê時來講，À-bēng？Nā bô, chiū lín ēng sîn chiok-siā, hit hō pêng-siông lâng kì-jiân m̄ chai lí teh kóng sím-mi̍h, i thái ōe tng lí kám-siā ê sî lâi kóng, À-bēng?

17你ê感謝是好，但是別人無得tio̍h建立。Lí ê kám-siā sī hó, nā-sī pa̍t lâng bô tit-tio̍h kiàn-li̍p.

18我感謝上帝，我講音語比lín眾人khah-chōe。Góa kám-siā Siōng-tè, góa kóng im-gú pí lín chèng lâng khah chōe.

19總是tī教會中我ài用心思講五句thang教示人ê話，贏過講萬句ê音語。Chóng-sī tī kàu-hōe tiong góa ài ēng sim-su kóng gō͘ kù thang kà-sī lâng ê ōe, iâⁿ-kè kóng bān kù ê im-gú.

20兄弟ah，論智慧莫得做gín-ná；論pháiⁿ tio̍h做嬰á，論智慧tio̍h做大人。Hiaⁿ-tī ah, lūn tì-hūi bo̍h-tit chòe gín-ná; lūn pháiⁿ tio̍h chòe eⁿ-á, lūn tì-hūi tio̍h chòe tōa lâng.

21Tī律法有記載，主講，我beh用別樣音語ê人，kap別樣人ê嘴唇，kā chit國ê百姓講；án-ni，in猶原m̄聽我。Tī lu̍t-hoat ū kì-chài, Chú kóng, Góa beh ēng pa̍t iūⁿ im-gú ê lâng, kap pa̍t iūⁿ lâng ê chhùi-tûn, kā chit kok ê peh-sìⁿ kóng; án-ni in iû-goân m̄ thiaⁿ góa.

22所以音語做兆頭，m̄是為tio̍h信ê人，是為tio̍h m̄信ê人；做先知來傳道，m̄是為tio̍h m̄信ê人，是為tio̍h信ê人。Só͘-í im-gú chòe tiāu-thâu, m̄ sī ūi-tio̍h sìn ê lâng, sī ūi-tio̍h m̄ sìn ê lâng; chòe sian-ti lâi thoân-tō, m̄ sī ūi-tio̍h m̄ sìn ê lâng, sī ūi-tio̍h sìn ê lâng.

23設使全教會聚集tī一所在，若lóng講音語，有平常人á是m̄信ê入來，kiám無beh講lín teh siáu mah？Siat-sú choân kàu-hōe chū-chi̍p tī chi̍t só͘-chāi, nā lóng kóng im-gú, ū pêng-siông lâng á-sī m̄ sìn ê ji̍p-lâi, kiám bô beh kóng lín teh siáu mah?

24設使lóng做先知來傳道，有一個m̄信ê á是平常人入來，伊就hō͘眾人叫-醒，hō͘眾人擬斷；Siat-sú lóng chòe sian-ti lâi thoân-tō, ū chi̍t ê m̄ sìn ê á-sī pêng-siông lâng ji̍p-lâi, i chiū hō͘ chèng lâng kiò-chhíⁿ, hō͘ chèng lâng gí-toàn;

25伊心內所隱密ê露現；就仆落去拜上帝，講上帝真正tī lín中間。i sim-lāi só͘ ún-ba̍t ê lō͘-hiān; chiū phak-lo̍h-khì pài Siōng-tè, kóng Siōng-tè chin-chiàⁿ tī lín tiong-kan.

26兄弟ah，án-ni是怎樣？Lín聚集ê時，ta̍k人有詩歌ê，有教示ê，有啟示ê，有音語ê，有翻譯ê。ta̍k項事tio̍h行來致到建立。Hiaⁿ-tī ah, án-ni sī cháiⁿ-iūⁿ? Lín chū-chi̍p ê sî, ta̍k lâng ū si-koa ê, ū kà-sī ê, ū khé-sī ê, ū im-gú ê, ū hoan-e̍k ê. Ta̍k hāng sū tio̍h kiâⁿ lâi tì-kàu kiàn-li̍p.

27若有講音語ê，只堪得兩個，siōng chōe三個，也tio̍h照次序，koh tio̍h一人翻譯。Nā ū kóng im-gú ê, chí kham-tit nn̄g ê, siōng chōe saⁿ ê, iā tio̍h chiàu chhù-sū, koh tio̍h chi̍t lâng hoan-e̍k.

28若無人thang翻譯，就tī教會中伊tio̍h靜靜；獨獨對本身kap對上帝講。Nā bô lâng thang hoan-e̍k, chiū tī kàu-hōe tiong i tio̍h chēng-chēng; to̍k-to̍k tùi pún-sin kap tùi Siōng-tè kóng.

29做先知來傳道ê，也只堪兩個á三個來講，其餘ê tio̍h分別伊。Chòe sian-ti lâi thoân-tō ê, iā chí kham nn̄g ê á saⁿ ê lâi kóng, kî-û ê tio̍h hun-piat i.

30若邊頭坐ê有人得tio̍h啟示，hit-ê事先講ê tio̍h靜靜。Nā piⁿ-thâu chē ê ū lâng tit-tio̍h khé-sī, hit ê tāi-seng kóng ê tio̍h chēng-chēng.

31因為lín一人一人lóng會thang做先知來傳道，hō͘眾人thang學習，hō͘眾人thang受苦勸。In-ūi lín chi̍t lâng chi̍t lâng lóng ōe thang chòe sian-ti lâi thoân-tō, hō͘ chèng lâng thang ha̍k-si̍p, hō͘ chèng lâng thang siū khó͘-khǹg.

32Koh先知ê神是順服tī先知。Koh sian-ti ê sîn sī sūn-ho̍k tī sian-ti.

33因為上帝m̄是紛亂ê，是和平ê；親像tī聖徒lóng總ê教會一樣。In-ūi Siōng-tè m̄ sī hun-loān ê, sī hô-pêng ê; chhin-chhiūⁿ tī sèng-tô͘ lóng-chóng ê kàu-hōe chi̍t iūⁿ.

34婦人人tī教會中，tio̍h靜靜；因為m̄准in講；就是tio̍h順服，親像律法也是án-ni講。Hū-jîn-lâng tī kàu-hōe tiong, tio̍h chēng-chēng; in-ūi m̄ chún in kóng; chiū-sī tio̍h sūn-ho̍k, chhin-chhiūⁿ lu̍t-hoat iā sī án-ni kóng.

35In若ài學習甚麼，tio̍h tī家內問家己ê丈夫；因為婦人人tī教會中來講是見笑，In nā ài ha̍k-si̍p sím-mi̍h, tio̍h tī ke-lāi mn̄g ka-kī ê tiōng-hu; in-ūi hū-jîn-lâng tī kàu-hōe tiong lâi kóng sī kiàn-siàu,

36上帝ê道理kiám是tùi lín出？á是kan-ta傳hō͘ lín ah？Siōng-tè ê tō-lí kiám sī tùi lín chhut? á-sī kan-ta thoân hō͘ lín ah?

37若有人家己掠做先知，á是做屬tī神ê人，就tio̍h知我所寫hō͘ lín ê是主ê命令。Nā ū lâng ka-kī lia̍h chòe sian-ti, á-sī chòe sio̍k tī sîn ê lâng, chiū tio̍h chai góa só͘ siá hō͘ lín ê sī Chú ê bēng-lēng.

38若有人m̄知，就kù-chāi伊m̄知。Nā ū lâng m̄ chai, chiū kù-chāi i m̄ chai.

39所以我ê兄弟ah，tio̍h切切欣慕做先知來傳道，也莫得禁止講音語。Só͘-í góa ê hiaⁿ-tī ah, tio̍h chhiat-chhiat him-bō͘ chòe sian-ti lâi thoân-tō, iā bo̍h-tit kìm-chí kóng im-gú.

40凡事tio̍h文雅也照規矩來行。Hoān sū tio̍h bûn-ngá iā chiàu kui-kú lâi kiâⁿ.

1兄弟ah，我hō͘ lín知我前所傳hō͘ lín ê福音，lín所承受，所óa靠來khiā在ê；Hiaⁿ-tī ah, góa hō͘ lín chai góa chêng só͘ thoân hō͘ lín ê hok-im, lín só͘ sêng-siū, só͘ óa-khò lâi khiā-chāi ê;

2lín若執守我所傳hō͘ lín福音ê道理，也m̄是空空信，就tùi chit-ê得救。lín nā chip-siú góa só͘ thoân hō͘ lín hok-im ê tō-lí, iā m̄ sī khang-khang sìn, chiū tùi chit-ê tit kiù.

3因為我所受來傳hō͘ lín ê，第一就是基督為tio̍h咱ê罪死，照聖經所記載；In-ūi góa só͘ siū lâi thoân hō͘ lín ê, tē it chiū-sī Ki-tok ūi-tio̍h lán ê chōe sí, chiàu sèng-keng só͘ kì-chài;

4koh有埋葬；第三日koh活，也照聖經所記載；koh ū bâi-chòng; tē saⁿ ji̍t koh-oa̍h, iā chiàu sèng-keng só͘ kì-chài;

5有出現hō͘磯法看見；koh出現hō͘十二個使徒看見；ū chhut-hiān hō͘ Ki-hoat khòaⁿ-kìⁿ; koh chhut-hiān hō͘ cha̍p-jī ê sù-tô͘ khòaⁿ-kìⁿ;

6koh一pái出現hō͘五百gōa ê兄弟同時看見，其中大半iáu tī-teh，但是有ê已經睏去。koh chi̍t pái chhut-hiān hō͘ gō͘-pah gōa ê hiaⁿ-tī tâng sî khòaⁿ-kìⁿ, kî-tiong tōa pòaⁿ iáu tī-teh, nā-sī ū-ê í-keng khùn-khì.

7Koh一pái出現hō͘雅各看見；又koh一pái出現hō͘ lóng總ê使徒看見；Koh chi̍t pái chhut-hiān hō͘ Ngá-kok khòaⁿ-kìⁿ; iū-koh chi̍t pái chhut-hiān hō͘ lóng-chóng ê sù-tô͘ khòaⁿ-kìⁿ;

8siōng路尾也出現hō͘我看見，我是親像未夠月來生ê。siōng lō͘-bé iā chhut-hiān hō͘ góa khòaⁿ-kìⁿ, góa sī chhin-chhiūⁿ bē kàu ge̍h lâi siⁿ ê.

9因為我是使徒ê至微細ê，bōe堪得稱做使徒，因為我bat khún-tio̍k上帝ê教會。In-ūi góa sī sù-tô͘ ê chì-bî-sòe ê, bōe kham-tit chheng chòe sù-tô͘, in-ūi góa bat khún-tio̍k Siōng-tè ê kàu-hōe.

10總是我taⁿ成做chit等號ê人，是tùi上帝ê恩chiah有；koh伊所賞賜我ê恩m̄是空空；但是我比in眾人khah tio̍h磨；其實m̄是我，是上帝ê恩kap我tī-teh ê。Chóng-sī góa taⁿ chiâⁿ chòe chit téng-hō ê lâng, sī tùi Siōng-tè ê un chiah ū; koh I só͘ siúⁿ-sù góa ê un m̄ sī khang-khang; nā-sī góa pí in chèng lâng khah tio̍h-bôa; kî-si̍t m̄ sī góa, sī Siōng-tè ê un kap góa tī-teh ê.

11Án-ni不論是我á是in，阮mī án-ni傳，lín mī án-ni信。Án-ni put-lūn sī góa á-sī in, goán mī án-ni thoân, lín mī án-ni sìn.

12Taⁿ若傳基督tùi死人中koh活，怎樣lín中間有人講死人無koh活ah？Taⁿ nā thoân Ki-tok tùi sí-lâng tiong koh-oa̍h, cháiⁿ-iūⁿ lín tiong-kan ū lâng kóng sí-lâng bô koh-oa̍h ah?

13死人若無koh活，就基督未bat koh活；Sí-lâng nā bô koh-oa̍h, chiū Ki-tok bē bat koh-oa̍h;

14基督若未bat koh活，就阮所傳ê是空空，lín ê信也是空空。Ki-tok nā bē bat koh-oa̍h, chiū goán só͘ thoân ê sī khang-khang, lín ê sìn iā sī khang-khang.

15死人若無koh活，就上帝未bat hō͘基督koh活；m̄-kú阮干證伊bat hō͘伊koh活，就顯明阮是做上帝白賊ê干證。Sí-lâng nā bô koh-oa̍h, chiū Siōng-tè bē bat hō͘ Ki-tok koh-oa̍h; m̄ kú goán kan-chèng I bat hō͘ I koh-oa̍h, chiū hián-bêng goán sī chòe Siōng-tè pe̍h-chha̍t ê kan-chèng.

16因為死人若無koh活，就基督未bat koh活。In-ūi sí-lâng nā bô koh-oa̍h, chiū Ki-tok bē bat koh-oa̍h.

17基督若未bat koh活，就lín ê信無chhái-kang，lín iáu-kú tī lín ê罪中。Ki-tok nā bē bat koh-oa̍h, chiū lín ê sìn bô chhái-kang, lín iáu-kú tī lín ê chōe tiong.

18就hiah-ê tiàm-tī基督已經睏ê，也是沉淪。Chiū hiah ê tiàm-tī Ki-tok í-keng khùn ê, iā sī tîm-lûn.

19咱若kan-ta在生有ǹg望tī基督，就tī眾人中咱是第一可憐ê。Lán nā kan-ta chāi-siⁿ ū ǹg-bāng tī Ki-tok, chiū tī chèng lâng tiong lán sī tē it khó-lîn ê.

20總是taⁿ基督已經tùi死人中koh活，做chiah-ê teh睏ê頭一個koh活ê。Chóng-sī taⁿ Ki-tok í-keng tùi sí-lâng tiong koh-oa̍h, chòe chiah ê teh khùn ê thâu chi̍t ê koh-oa̍h ê.

21因為既然tùi一人chiah有死，也tùi一人chiah有死人ê koh活。In-ūi kì-jiân tùi chi̍t lâng chiah ū sí, iā tùi chi̍t lâng chiah ū sí-lâng ê koh-oa̍h.

22因為親像tī亞當眾人lóng死，也親像án-ni tī基督眾人beh得tio̍h koh活。In-ūi chhin-chhiūⁿ tī A-tong chèng lâng lóng sí, iā chhin-chhiūⁿ án-ni tī Ki-tok chèng lâng beh tit-tio̍h koh-oa̍h.

23但是ta̍k-ê照伊ê次序；頭一個是基督，第二是hiah-ê屬基督ê，tī伊臨到ê時。Nā-sī ta̍k ê chiàu i ê chhù-sū; thâu chi̍t ê sī Ki-tok, tē jī sī hiah ê sio̍k Ki-tok ê, tī I lîm-kàu ê sî.

24然後末期到，就是伊已經廢無lóng總ê政治，lóng總ê權柄kap才能，將國交hō͘父上帝ê時；Jiân-āu boa̍t-kî kàu, chiū-sī I í-keng hòe-bô lóng-chóng ê chèng-tī, lóng-chóng ê koân-pèng kap châi-lêng, chiong kok kau hō͘ Pē Siōng-tè ê sî;

25因為伊的確做王，到hē lóng總ê對敵tī伊ê腳下。in-ūi I tek-khak chòe ông, kàu hē lóng-chóng ê tùi-te̍k tī I ê kha-ē.

26第一路尾受廢無ê對敵，就是死。Tē it lō͘-bé siū hòe-bô ê tùi-te̍k, chiū-sī Sí.

27因為有講，伊hō͘萬項有降服tī伊ê腳下。已經講，萬項有降服伊，就hit-ê hō͘萬項有降服伊ê，無在內，是明。In-ūi ū kóng, I hō͘ bān-hāng-ū hâng-ho̍k tī I ê kha-ē. Í-keng kóng, Bān-hāng-ū hâng-ho̍k I, chiū hit ê hō͘ bān-hāng-ū hâng-ho̍k I ê, bô chāi-lāi, sī bêng.

28萬項有已經降服伊，就Kiáⁿ也beh家己降服tī hō͘萬項有降服伊ê，hō͘上帝tī萬有中做萬有ê。Bān-hāng-ū í-keng hâng-ho̍k I, chiū Kiáⁿ iā beh ka-kī hâng-ho̍k tī hō͘ bān-hāng-ū hâng-ho̍k I ê, hō͘ Siōng-tè tī bān-ū tiong chòe bān-ū ê.

29若m̄是án-ni，就為tio̍h死人受洗禮ê，beh啥事？死人若一概無koh活，為tio̍h in受洗禮甚麼緣故？Nā m̄ sī án-ni, chiū ūi-tio̍h sí-lâng siū sóe-lé ê, beh siáⁿ-sū? Sí-lâng nā it-khài bô koh-oa̍h, ūi-tio̍h in siū sóe-lé sím-mi̍h iân-kò͘?

30Koh阮啥事時時冒險ah？Koh goán siáⁿ-sū sî-sî mō͘-hiám ah?

31兄弟ah，我tī咱ê主基督耶穌為tio̍h lín所有ê誇口，我kí伊來chiù-chōa，我日日phe死。Hiaⁿ-tī ah, góa tī lán ê Chú Ki-tok Iâ-so͘ ūi-tio̍h lín só͘ ū ê khoa-kháu, góa kí i lâi chiù-chōa, góa ji̍t-ji̍t phe-sí.

32我若照人ê款，tī以弗所kap野獸相phah，我有甚麼利益？死人若無koh活，咱就做咱lim，做咱食，因為明á日beh死lah。Góa nā chiàu lâng ê khoán, tī Í-hut-só͘ kap iá-siù saⁿ-phah, góa ū sím-mi̍h lī-ek? Sí-lâng nā bô koh-oa̍h, lán chiū chòe lán lim, chòe lán chia̍h, in-ūi bîn-á-ji̍t beh sí lah.

33莫得受迷惑；lām-sám交陪是敗壞好德行。Bo̍h-tit siū bê-he̍k; Lām-sám kau-pôe sī pāi-hoāi hó tek-hēng.

34Tio̍h醒悟來照義，莫得犯罪；因為有人m̄-bat上帝。我講án-ni，是beh hō͘ lín見笑。Tio̍h chhíⁿ-gō͘ lâi chiàu gī, bo̍h-tit hoān chōe; in-ūi ū lâng m̄ bat Siōng-tè. Góa kóng án-ni, sī beh hō͘ lín kiàn-siàu.

35有人beh講，死人怎樣koh活？用甚麼號ê身體來ah？Ū lâng beh kóng, Sí-lâng cháiⁿ-iūⁿ koh-oa̍h? Ēng sím-mi̍h hō ê sin-thé lâi ah?

36戇人ah，你所掖ê，無事先死，就bōe活。Gōng lâng ah, lí só͘ iā ê, bô tāi-seng sí, chiū bōe oa̍h.

37Koh你所掖ê m̄是hit-ê將來ê形體，或是麥，或是別樣ê五穀，不過是一粒子nā-tiāⁿ。Koh lí só͘ iā ê m̄ sī hit ê chiong-lâi ê hêng-thé, he̍k-sī be̍h, he̍k-sī pa̍t iūⁿ ê ngó͘-kok, put-kò sī chi̍t lia̍p chí nā-tiāⁿ.

38但是上帝照伊所定tio̍h ê，用形體hō͘伊；tī ta̍k號種子有伊家己ê形體。Nā-sī Siōng-tè chiàu I só͘ tiāⁿ-tio̍h ê, ēng hêng-thé hō͘ i; tī ta̍k hō chéng-chí ū i ka-kī ê hêng-thé.

39見若肉體m̄是同一樣ê肉體；人ê一款，獸ê一款，鳥ê一款，魚ê一款。Kìⁿ-nā jio̍k-thé m̄ sī tâng chi̍t iūⁿ ê jio̍k-thé; lâng-ê chi̍t khoán, siù-ê chi̍t khoán, chiáu-ê chi̍t khoán, hî-ê chi̍t khoán.

40有天裡ê形體，也有地裡ê形體；總是tī天裡ê ê榮光各樣tī地裡ê ê榮光。Ū thiⁿ-ni̍h ê hêng-thé, iā ū tōe-ni̍h ê hêng-thé; chóng-sī tī thiⁿ-ni̍h ê ê êng-kng koh-iūⁿ tī tōe-ni̍h ê ê êng-kng.

41日ê榮光是一款，月ê榮光koh一款，chiah-ê星ê榮光又koh一款；因為chit粒星kap hit粒星，榮光無相同。Ji̍t ê êng-kng sī chi̍t khoán, ge̍h ê êng-kng koh chi̍t khoán, chiah ê chhiⁿ ê êng-kng iū-koh chi̍t khoán; in-ūi chit lia̍p chhiⁿ kap hit lia̍p chhiⁿ, êng-kng bô saⁿ-tâng.

42死人koh活也是án-ni。所掖ê是會朽爛，koh活ê是bōe朽爛；Sí-lâng koh-oa̍h iā sī án-ni. Só͘ iā ê sī ōe hiú-nōa, koh-oa̍h ê sī bōe hiú-nōa;

43所掖ê是凌辱，koh活ê是榮光；所掖ê是軟chiáⁿ，koh活ê是勇健；só͘ iā ê sī lêng-jio̍k, koh-oa̍h ê sī êng-kng; só͘ iā ê sī nńg-chiáⁿ, koh-oa̍h ê sī ióng-kiāⁿ;

44所掖ê是血氣ê形體，koh活ê是神靈ê形體；若有血氣ê形體，也有神靈ê形體。só͘ iā ê sī hiat-khì ê hêng-thé, koh-oa̍h ê sī sîn-lêng ê hêng-thé; nā ū hiat-khì ê hêng-thé, iā ū sîn-lêng ê hêng-thé.

45所記載也是án-ni講，頭一個人，亞當，成做有血氣ê活人。Só͘ kì-chài iā sī án-ni kóng, Thâu chi̍t ê lâng, A-tong, chiâⁿ-chòe ū hiat-khì ê oa̍h lâng.

46路尾ê亞當成做賞賜活ê神。總是神ê m̄是事先，是血氣ê事先；神ê tè後。Lō͘-bé ê A-tong chiâⁿ-chòe siúⁿ-sù oa̍h ê sîn. Chóng-sī sîn ê m̄ sī tāi-seng, sī hiat-khì ê tāi-seng; sîn ê tè-āu.

47頭一個人出tī地裡，屬tī土ê類；第二ê人出tī天裡。Thâu chi̍t ê lâng chhut tī tōe-ni̍h, sio̍k tī thô͘ ê lūi; tē jī ê lâng chhut tī thiⁿ-ni̍h.

48Hit-ê屬tī土類ê是怎樣，見若屬tī土類ê也是án-ni；也hit-ê屬tī天裡ê是怎樣，見若屬tī天裡ê也是án-ni。Hit ê sio̍k tī thô͘-lūi ê sī cháiⁿ-iūⁿ, kìⁿ-nā sio̍k tī thô͘-lūi ê iā sī án-ni; iā hit ê sio̍k tī thiⁿ-ni̍h ê sī cháiⁿ-iūⁿ, kìⁿ-nā sio̍k tī thiⁿ-ni̍h ê iā sī án-ni.

49咱既然穿屬tī土ê ê形狀，也beh穿屬tī天ê ê形狀。Lán kì-jiân chhēng sio̍k tī thô͘ ê ê hêng-chōng, iā beh chhēng sio̍k tī thiⁿ ê ê hêng-chōng.

50兄弟ah，我講血氣ê肉體bōe會承接上帝ê國，會朽爛ê bōe會承接bōe朽爛ê。Hiaⁿ-tī ah, góa kóng hiat-khì ê jio̍k-thé bōe-ōe sêng-chiap Siōng-tè ê kok, ōe hiú-nōa ê bōe-ōe sêng-chiap bōe hiú-nōa ê.

51Taⁿ我用奧妙kā lín講；咱無beh lóng睏，是beh lóng變化，Taⁿ góa ēng ò-biāu kā lín kóng; lán bô beh lóng khùn, sī beh lóng piàn-hòa,

52一時á久，目一nih，末期哨角tân ê時；因為哨角beh tân，死人就beh koh活，變做bōe朽爛ê，咱也beh變化。chi̍t sî-á kú, ba̍k chi̍t nih, boa̍t-kî sàu-kak tân ê sî; in-ūi sàu-kak beh tân, sí-lâng chiū beh koh-oa̍h, piàn-chòe bōe hiú-nōa ê, lán iā beh piàn-hòa.

53因為chit-ê會朽爛ê的確tio̍h變做bōe朽爛，chit-ê會死ê變做bōe死。In-ūi chit ê ōe hiú-nōa ê tek khak tio̍h piàn-chòe bōe hiú-nōa, chit ê ōe sí ê piàn-chòe bōe sí.

54但是chit-ê會朽爛ê已經變做bōe朽爛，也chit-ê會死ê已經變做bōe死，就所記載講，有廢無死來khah贏伊，chit-ê話hit時beh應驗。Nā-sī chit ê ōe hiú-nōa ê í-keng piàn-chòe bōe hiú-nōa, iā chit ê ōe sí ê í-keng piàn-chòe bōe sí, chiū só͘ kì-chài kóng, Ū hòe-bô sí lâi khah-iâⁿ i, chit ê ōe hit sî beh èng-giām.

55死ah，你ê khah贏tī tá-lo̍h？死ah，你ê厲害tī tá-lo̍h？Sí ah, lí ê khah-iâⁿ tī tá-lo̍h? Sí ah, lí ê lī-hāi tī tá-lo̍h?

56死ê厲害就是罪，罪ê權勢是律法。Sí ê lī-hāi chiū-sī chōe, chōe ê koân-sè sī lu̍t-hoat.

57總是感謝上帝，伊hō͘咱對咱ê主耶穌基督得tio̍h khah贏。Chóng-sī kám-siā Siōng-tè, I hō͘ lán tùi lán ê Chú Iâ-so͘ Ki-tok tit-tio̍h khah-iâⁿ.

58所以，我所疼ê兄弟ah，lín tio̍h堅固，無搖choah，常常盡力tī主ê工；因為知lín tio̍h磨tī主ê m̄是空空。Só͘-í, góa só͘ thiàⁿ ê hiaⁿ-tī ah, lín tio̍h kian-kò͘, bô iô-choah, siông-siông chīn-la̍t tī Chú ê kang; in-ūi chai lín tio̍h-bôa tī Chú ê m̄ sī khang-khang.